Tavini ia Iehova ma te Manako Pakari

“Ko te au mea mou ra, te au mea tau meitaki ra, . . . e akamaara i taua au mea ra.”​—PHILI. 4:8.

1, 2. Eaa tei akariro i te manganui i teia ao kia manako puapinga kore i te oraanga, te akatupu anga i teea au uianga?

KO TEIA te tuatau ngata e te tumatetenga rava atu i roto i te tuatua enua. No te kare e pirianga vaitata o te tangata kia Iehova, kare e rauka i te akono atu i te “kino maata.” (2 Timo. 3:1-5) Na to ratou uaorai maroiroi i tae ei ratou ki tetai ra—kare ra i puapingaia. Manganui te rave ua ra i te au tamataoraanga o teianei ao, kia kore e manako pakari atu i te oraanga.

² Ei akakoromaki i te taitaia o te oraanga, te tuku ra te au tangata i te au mea navenave ei mea mua. Me kare te au Kerititiano e matakite, ka rave katoa ratou i te reira. Akapeea tatou me kopae i te reira? Ka kopae ainei tatou i te au tamataora? Akapeea tatou me manako tau no runga i te au mea navenave e te au apainga? Ia tatou e manako meitaki ra i te oraanga, eaa te au kaveinga Pipiria te ka tau i te arataki ia tatou, kia kore tatou e manako pakari roa ia tatou uaorai?

Manako Pakari i Roto i Teia Ao Inangaro i te Mea Navenave

3, 4. Akapeea te au Tuatua Tapu te tauturu anga ia tatou kia akaperepere i te manako pakari?

³ Te tuku nei teianei ao i te puapinga ki runga i te ‘anoano o te au mea e navenave ei ra.’ (2 Timo. 3:4) Ka riro to teianei ao manako tamataora ua, ei akakino i to tatou pirianga kia Iehova. (Mase. 21:17) No reira i kapitiia mai ei ki roto i te au reta a te apotetoro ko Paulo kia Timoteo e Tito te akoanga no runga i te manako pakari. Me aru tatou i taua akoanga kare tatou e akakeuia e te manako puapinga kore o teianei ao no te oraanga.​—E tatau ia 1 Timoteo 2:1, 2; Tito 2:2-8. *

⁴ Te au anere mataiti i mua atu, kua tata a Solomona i te puapinga kia manako pakari i te au mea o te oraanga i to te au mea e navenave ei ra. (Kohe. 3:4; 7:2-4) E no te poto o te oraanga, ka anoanoia tatou kia “uapou ua atu” kia rauka te ora. (Luka 13:24) No reira, ka anoanoia tatou kia akamanako ua rai i “te au mea tau meitaki ra.” (Phili. 4:8, 9) Koia oki, kia akamanako meitaki i te au mea ravarai o te oraanga Kerititiano.

5. Eaa tetai ngai o te oraanga kia manako pakari tatou?

⁵ Ei akaraanga, e manako pakari ana te au Kerititiano i ta ratou apainga kia angaanga pakari, te aru anga ia Iehova raua ko Iesu. (Ioa. 5:17) E no te reira tu, e akapaapaa uaia ana ratou no te angaanga pakari e ka rauka kia irinakiia. E angaanga pakari ana te au upoko o te pamiri i te akono i to ratou pamiri. No te mea, me kare tetai e akono i tona uaorai ngutuare ‘kua akaruke aia’ ia Iehova!​—1 Timo. 5:8.

Manako Pakari e te Rekareka i ta Tatou Akamorianga

6. Akapeea tatou i kite ei e ka manako pakari tatou i ta tatou akamorianga kia Iehova?

⁶ E manako puapinga ua ana a Iehova i te akamorianga mou. Ei akaraanga, raro ake i te Ture a Mose, kua kite mai te ngati Iseraela i te au tupuanga kino tikai te uri ke anga ratou mei te akamorianga ia Iehova. (Iosu. 23:12, 13) I te  anere mataiti mua T.N., kua anoanoia te au pipi a Karaiti kia akono maroiroi tikai i te akamorianga mou kia kore e taviiviiia e te au apiianga e te au tu kino. (2 Ioa. 7-11; Apo. 2:14-16) Teia tuatau, te manako pakari nei rai te au Kerititiano mou i ta ratou akamorianga.​—1 Timo. 6:20.

7. Akapeea a Paulo te akapapa anga no tana angaanga orometua?

⁷ E mea mataora tikai ta tatou angaanga orometua. Inara, e mataora ai i te reira, ka anoanoia tatou kia akamanako meitaki e kia akapapa vave. Kua akamarama mai a Paulo i tona akamanako anga i te au tangata tana i apii. Kua tata aia e: “Kua akaarite au iaku uaorai i te au mea katoa i te tangata ravarai nei, kia ora iaku tetai papaki i taua au ravenga katoa nei. No te evangelia i peraʼi au, kia rauka katoa iaku i ta te evangelia ra.” (1 Kori. 9:22, 23) Mareka tikai a Paulo te tauturu i te tangata i te pae vaerua, e kua manako pakari e ka akapeea aia me tauturu i te au anoano takake o te aronga e akarongo maira. No reira i rauka ai iaia te akamaroiroi e te akakeu ia ratou kia akamori ia Iehova.

8. (a) Eaa to tatou tu ki te au tangata ta tatou e apii ra i roto i te angaanga orometua? (e) Akapeea te rave anga i tetai apii Pipiria te oronga mai anga i te mataora no te angaanga orometua?

⁸ Mei teaa ra te puapinga te angaanga orometua kia Paulo? Kua inangaro puareinga aia i te “tavini” ia Iehova e te aronga ka akarongo mai ki te karere tuatua mou. (Roma 12:11; 1 Kori. 9:19) Me apii tatou i te tangata i te Tuatua a te Atua​—i te tuatau apii Pipiria i te kainga, uipaanga Kerititiano, me kore te Akamorianga a te Ngutuare—​te akamanako ra ainei tatou i ta tatou apainga ki te aronga e apii ra tatou? Penei ka manako tatou e e apainga teiaa rava te rave putuputu anga i tetai apii Pipiria. E tika, ka akapae tatou i tetai taime mei ta tatou uaorai e rave ra, e kia tuku i te reira taime kia tauturu i tetai ke. Kare ainei te rotai ra te reira ki ta Iesu au tuatua e “e mea meitaki i te oronga atu i te rave mai”? (Anga. 20:35) Kare to tatou mataora e rauka i te akaaite atu ki tetai ua atu angaanga, me apii tatou i tetai ke i te mataara ki te ora.

9, 10. (a) Te aiteanga ainei o te manako pakari e kare tatou e akangaroi e e kapiti mataora atu ki te au tangata? Akamarama mai. (e) Eaa te ka tauturu i tetai tangata pakari kia riro ei akamaroiroi anga e kia rauka ua i te aravei atu?

⁹ Kare te aiteanga o te manako pakari e kare tatou e akangaroi e e kapiti mataora atu ki te au tangata. Kua akanoo a Iesu i te akaraanga apa kore no te tuku anga i tetai taime i te apii, te akangaroi, e te akatupu i te au pirianga puapinga ki tetai ke. (Luka 5:27-29; Ioa. 12:1, 2) Kare katoa te aiteanga o te manako pakari e kia kore tatou e oaoa. Naringa a Iesu kare e oaoa ana, papu e kare te tangata e akavaitata atu kiaia. Kua mataora tikai te tamariki i te piri atu kiaia. (Mare. 10:13-16) Akapeea tatou me aru i te tu manako tau o Iesu?

¹⁰ Kua akakite tetai taeake no runga i tetai tangata pakari e, “Kua akanoo aia i tetai turanga teitei nona uaorai, kare ra no tetai ke.” Mei te reira ainei toou tu? E mea meitaki kia tapapa tau atu mei tetai ke. Ei akaraanga, e ariu meitaki ana te tamariki me tuku te au metua i te au akakoroanga tau e me tauturu i te tamariki kia itae i te reira. Kia akamaroiroi katoa te aronga pakari i te au taeake o te putuputuanga kia tupu i te pae vaerua e kia oronga i te au manako taka meitaki kia ratou e akapeea me rave i te reira. Pera katoa, me manako tau tetai tangata pakari iaia uaorai, ka riro aia ei akamaroiroi anga e ka rauka ua i te aravei atu iaia. (Roma 12:3) Kua tuatua tetai tuaine e: “Kare au e inangaro ana i tetai tangata pakari kia manako i te au mea ei mea kangakanga ua. Inara me manako pakari ua rai aia i te au taime pouroa, ngata te aravei atu iaia.” Kua tuatua katoa tetai e e manako ana aia e ko tetai aronga pakari, “ka emiemi rai koe i te aravei ia ratou no to ratou tu.” Kare rava te aronga pakari e inangaro i te takore i te manako mataora o te au taeake irinaki no ta ratou akamorianga ia Iehova, “te Atua mataora.”​—1 Timo. 1:11, NW.

 Rave i te Apainga i Roto i te Putuputuanga

11. Eaa te aiteanga kia “inangaro” i te itae atu i roto i te putuputuanga?

¹¹ Te akamaroiroi anga a Paulo i te au tane o te putuputuanga kia tau no te au apainga maata atu, kare aia e akamaroiroi ana i tetai kia rave i tana uaorai e akakoro ra. Mari ra, kua tata aia e: “Kia inangaro tetai tangata i te taoonga episekopo ra, [me kore te itae atu ei tangata pakari no te putuputuanga] kua inangaro aia i te angaanga meitaki.” (1 Timo. 3:1, 4) Me “inangaro” te au tane Kerititiano i te itae atu, kia inangaro maata ratou i te angaanga pakari kia rauka te au tu pae vaerua te ka anoanoia kia tavini i to ratou au taeake. Me kua papetitoia tetai taeake e tai mataiti e kua rotai tona tu ki te au Tuatua Tapu ei tavini orometua mei tei taikuia i roto ia 1 Timoteo 3:8-13, ka tau aia kia ikiia. Akara e te akakite taka meitaki ra te irava 8 e: ‘Koia katoa oki te au tavini orometua, kia manako pakari.’

12, 13. Akataka mai i te au mataara no te au taeake mapu kia itae atu i te au apainga.

¹² E taeake mapu manako pakari ainei koe kua papetitoia? E au mataara tetai ka rauka ia koe te itae atu. Tetai, na te akameitaki anga i taau tuanga no te angaanga orometua. E mataora ana ainei koe i te angaanga ki te au taeake tukeke te mataiti i te angaanga tutu anga? Te kimi ra ainei koe i tetai tangata no te apii atu i te Pipiria kiaia? Me rave koe i tetai apii Pipiria tei tau ki te au manako e orongaia ra i te au uipaanga Kerititiano, ka akameitaki mai koe i te tu o taau apiianga. Tei maata atu, ka marama atu koe i te manako o te tangata e apii ra i te au arataa o Iehova. I taau tangata apii e kite maira i te anoano kia taui, ka akakoromaki e ka maru koe me tauturu iaia kia aru i te au kaveinga Pipiria.

¹³ Ka rauka ia kotou e te au taeake mapu i te tauturu atu i te aronga pakarikari o te putuputuanga i te ka rauka ia kotou. Ka rauka katoa ia kotou i te tauturu atu i te tama e te akono meitaki anga i te Are Uipaanga Patireia kia manea. Me rave koe i taau ka rauka, te akapapu maira toou tu inangaro e te manako pakari ra koe i taau angaanga orometua. Ka rauka ia koe i te akono tika tikai i te au anoano o te putuputuanga mei ia Timoteo rai.​—E tatau ia Philipi 2:19-22.

14. Akapeea me “timata” me kua tau te au taeake mapu kia tavini i roto i te putuputuanga?

¹⁴ E te aronga pakari, e taangaanga i te au taeake mapu e tauta pakari ra i te ‘rere ke mei te au anoano no te ou anga’ e te aruaru ra i te ‘tuatua-tika, akarongo, aroa, e te au,’ e tetai atu au tu meitaki. (2 Timo. 2:22) Na te oronga anga i tetai au angaanga na ratou i roto i te putuputuanga, ka rauka i te “timata” me kua tau ratou kia rave i te au apainga, ‘kia kite te tangata katoa i te tupu anga o to ratou kite.’​—1 Timo. 3:10; 4:15.

Akaari i te Manako Pakari no te Putuputuanga e te Pamiri

15. Kia tau kia 1 Timoteo 5:1, 2, ka akapeea tatou me akaari i te manako pakari ki tetai ke?

¹⁵ Te akangateitei anga i to tatou au taeake e te au tuaine, te kapiti maira i te manako pakari. I roto i tana akoanga kia Timoteo, kua tuatua a Paulo e kia akangateitei atu i tetai ke. (E tatau ia 1 Timoteo 5:1, 2.) E puapinga tikai teia me akamanako atu i tetai tane me kore  vaine. Ka tau kia aru i te akaraanga o Iobu no te akangateitei anga i te au vaine, tana vaine akaipoipo tikai. Kua tauta pakari tikai aia kia kore e akara ua ma te inangaro tau kore i tetai vaine ke. (Iobu 31:1) Me akamanako pakari tatou i to tatou au taeake e te au tuaine, kare tatou e akameamea atu ia ratou me kore e rave i tetai mea kare te taeake me kore te tuaine e reka mai. E puapinga tikai i te akangateitei i tetai ke me te akainangaro ra tetai i tetai ma te manakonako anga kia akaipoipo. Kare rava tetai Kerititiano manako pakari e taki ke i te manako ngakau o tetai tane me kore vaine.​—Mase. 12:22.

16. Akakite mai i te manako tuke o tetai i teianei ao no te tuanga a te tane e te metua tane, ki ta te Pipiria e akataka maira.

¹⁶ Ka anoano katoaia tatou kia manako pakari ua rai i ta tatou au tuanga tei orongaia mai e te Atua i roto i te pamiri. Te akavaavaa ra to Satani ao i te tuanga a te tane e te metua tane. E rekareka ana te au pitiniti tamataora i te taakama e te akangateitei kore i te upoko o te pamiri. Inara, te tuku ra te au Tuatua Tapu i te apainga maata tikai ki runga i te tane e koia “te upoko o te vaine.”​—Ephe. 5:23; 1 Kori. 11:3.

17. Akamarama mai akapeea ta tatou pirianga ki te akamorianga a te ngutuare te akaari anga e te manako pakari ra tatou i ta tatou au apainga.

¹⁷ Ka oronga te tane i te au mea pae materia no tona pamiri. Me kare aia e oronga i te arataki anga pae vaerua, kare aia e akaari ana i te tu kite e te pakari. (Deu. 6:6, 7) No reira te karanga ra a 1 Timoteo 3:4 e me ko koe te upoko o te pamiri e te itae atura i te au akameitakianga i roto i te putuputuanga, kia riro koe ei tangata “arataki meitaki i tona uaorai ngutuare ra, e tana au tamariki i te kauraro marie anga.” No runga i teia, e ui kia koe uaorai, ‘E akanoo putuputu ana ainei au i te taime no te akamorianga a te ngutuare no toku pamiri?’ Ka pati akatenga roa tetai au vaine Kerititiano i ta ratou tane kia rave i te arataki anga i te pae vaerua. Kia manako pakari te tane tataki tai i tana apainga. Tika rai, ka turuturu te vaine Kerititiano i te akanoonoo anga o te Akamorianga a te Ngutuare e kia angaanga kapiti ki tana tane kia puapingaia te reira.

18. Akapeea te au tamariki me apii kia manako pakari?

¹⁸ Te akamaroiroi katoaia ra te tamariki kia akamanako pakari i te oraanga. (Kohe. 12:1) Kare e kino ana no te tamariki mapu kia kite i te angaanga pakari, rave anga i te au angaanga i te kainga tei tau ki to ratou mataiti e te ka rauka ia ratou. (Aue 3:27) Te mapu anga te Ariki ko Davida, kua apii aia kia riro mai ei tiaki mamoe meitaki. Kua apii katoa aia kia riro mai ei tangata akatangi e te atu imene—e au tu karape tei tauturu iaia kia tavini i mua i te tutara o Iseraela. (1 Samu. 16:11, 12, 18-21) Kare ekoko, e mataora ana a Davida i te kanga i tona mapuanga, e kua apii aia i te au tu karape puapinga tana i taangaanga i muri mai ei akapaapaa ia Iehova. Kua tauturu tona au tu  karape iaia ei tiaki mamoe kia arataki i te iti tangata o Iseraela ma te akakoromaki. Te au mapu e, eia au tu karape e apii ra kotou ei tauturu ia kotou kia tavini i Tei Anga mai ia kotou e kia akapapa no te au apainga no te tuatau ki mua?

Kia Manako Tau Ua

19, 20. Eaa te tu tau taau ka akono tamou noou uaorai e taau akamorianga?

¹⁹ Kia aruaru tatou i te manako tau ua—kia kore e manako pakari roa ia tatou uaorai. Kare tatou e inangaro kia “maata ua i te ketaketa kia tika.” (Kohe. 7:16) Ka rauka te tu kangakanga i te tamaru mai i te tu taitaia, i te kainga, ngai angaanga, me kore me akamanako atu i to tatou au taeake e te au tuaine Kerititiano. Kia matakite te au mema pamiri i te akaapa kino atu, kia rauka i te noo au ua e te meitaki i te kainga. I roto i te putuputuanga, ka rekareka te katoatoa i te tamataora kapiti, kia riro ua rai ta tatou pukapuka anga e te apii anga ei akamaroiroi anga e kia papu tikai.​—2 Kori. 13:10; Ephe. 4:29.

²⁰ Kare te ao e noo nei tatou e manako pakari ana ia Iehova e tana au ture. Te iti tangata ra o Iehova, te manako pakari ra no runga i te kauraro e te tiratiratu ki to ratou Atua. Mataora tikai te riro anga ei tuanga no te taokotaianga maata o te iti tangata e akamori ra ia Iehova ma te manako pakari! Kia manako pakari ua rai tatou i to tatou oraanga e te akamorianga.

[Tataanga Rikiriki i Raro]

Akapeea Koe me Pau?

• Eaa tatou ka kopae ei i te manako puapinga kore o teia ao no te oraanga?

• Akapeea tatou e rekareka ai ma te manako pakari i ta tatou angaanga orometua?

• Eaa te akaari maira me te manako pakari ra tatou i ta tatou apainga me kare?

• Akamarama mai eaa i puapinga ai kia akangateitei tatou i te au taeake e te au mema pamiri.

[Au Uianga Apii]

[Au Tutu i te kapi 12]

E oronga te tane i te au mea pae materia e te pae vaerua no tona pamiri