Ia Faatāua le Auaunaga iā Ieova

“O mea uma ua matuā tāua, . . . ia faaauau ona manatunatu i nei mea.”​—FILI. 4:8.

1, 2. O le ā le māfuaaga ua faamuamua ai e tagata mea e fiafia ai i le olaga, ma o ā fesili ua lāgā ai?

UA TATOU ola i se lalolagi o loo feagai ma tulaga e sili ona faigatā ma le mataʻutia, i le talafaasolopito o le fanau a tagata. Ua toetoe a lē mafai ona fesagaʻia e tagata e leai se faavae lelei faaleagaga, nei aso “e sili ona faigatā.” (2 Timo. 3:1-5) E ui e iai faafitauli, ae e latou te faalagolago pea i nai a latou taumafaiga i lea aso ma lea aso. I le taumafai e ʻalofia le soona popole i le olaga, ua liliu atu le toʻatele i faafiafiaga eseese o lenei lalolagi.

² Ina ia lavātia popolega, e masani ona faamuamua e tagata mea e fiafia ai i le olaga. A lē faaeteete, e faigofie ona maua se Kerisiano i lea ituaiga o olaga. E faapefea ona tatou ʻalofia le faia faapea? Po o lona uiga, o le a ʻalofia so o se mea e fiafia ai i taimi uma? E faapefea ona faapaleni mea e fiafia ai ma o tatou tiute tauave? O ā mataupu silisili faale-Tusi Paia e taʻitaʻia ai i tatou, ina ia paleni, ma lē soona faamamafa le vaaiga i le olaga?

Ia Matutua i le Mafaufau i se Lalolagi e Pupū i Mea Faafiafia

3, 4. Ua faapefea ona fesoasoani mai le Tusi Paia, ina ia tatou matutua i le mafaufau?

³ Ua soona faatāua e lenei lalolagi le “pupū i mea faafiafia.” (2 Timo. 3:4) Ona ua faamamafa naʻuā e le lalolagi mea faafiafia, e mafai la ona lamatia ai lo tatou itu faaleagaga. (Faata. 21:17) O lea, ua talafeagai ai fautuaga o loo maua i tusi a le aposetolo o Paulo iā Timoteo ma Tito, o loo faatāuaina ai le matutua i le mafaufau. Pe a faatatau nei fautuaga, o le a mafai ai ona tatou teena le vaaiga a le lalolagi, o le soona pupū i mea e fiafia ai.—Faitau le 1 Timoteo 2:1, 2; Tito 2:2-8.

⁴ I ni senituri ua mavae, na tusi Solomona e uiga i le aogā o le tuua o nisi o mea e faafiafia ai, ina ia mafaufau ai i mea e tāua i le olaga. (Fai. 3:4; 7:2-4) Ona o le puupuu o le olaga, e ao ai ona tatou “faamalolosi ma finafinau” ina ia faasaoina. (Luka 13:24) E aofia ai lo tatou manatunatu pea i mea e “matuā tāua.” (Fili. 4:8, 9) O lona uiga, o le mātaʻitū o vala uma lava o le olaga faa-Kerisiano.

5. O le ā se vala o le olaga e ao ona faatāuaina?

⁵ O se faataʻitaʻiga, e faatāua e Kerisiano la latou matafaioi ina ia toʻaʻaga i galuega, i le faataʻitaʻi atu iā Ieova ma Iesu. (Ioa. 5:17) O le iʻuga, e masani ona viia i latou ona e galulue malosi ma le faamaoni. E faatāua e ulu o aiga le galulue malosi ina ia tausia o latou aiga. Aemaise lava, ona e tutusa le lē tausia e se tasi o lona aiga, ma le “faafitia” o Ieova!—1 Timo. 5:8.

Ia Faatāua ma Fiafia Pea i la Tatou Tapuaʻiga

6. Aiseā e ao ai ona tatou faatāuaina la tatou tapuaʻiga iā Ieova?

⁶ E tāua iā Ieova le auala e tatou te tapuaʻi atu ai iā te Ia. O se faataʻitaʻiga, i le taimi o le  tulafono faa-Mose, na oo i le nuu o Isaraelu āuga leaga ina ua latou see ese mai le tapuaʻiga iā Ieova. (Iosua 23:12, 13) I le uluaʻi senituri T.A., sa manaʻomia ona taumafai malosi soo o Keriso, ina ia puipuia le tapuaʻiga moni mai aʻoaʻoga ma uiga e faaleagaina ai. (2 Ioa. 7-11; Faaa. 2:14-16) I aso nei, o loo faaauau ona faatāuaina e Kerisiano moni la latou tapuaʻiga.—1 Timo. 6:20.

7. Na faapefea ona sauniuni Paulo mo lana faiva?

⁷ O la tatou auaunaga o se mea e fiafia ai. Peitaʻi, ina ia faatumauina lo tatou fiafia i le auaunaga, e ao ona tatou manatu mamafa i ai ma faia sauniuniga. Na faamatala mai e Paulo lona manatunatu iā i latou sa ia aʻoaʻoina. Na ia tusi: “Ua avea aʻu ma mea uma i tagata o ituaiga uma, ina ia iʻu lava ina faaolaina nisi iā te aʻu. A ua ou faia mea uma ona o le tala lelei, ina ia ou talaʻi atu i isi.” (1 Kori. 9:22, 23) Na fiafia Paulo e fesoasoani i tagata i le itu faaleagaga, ma mafaufau i auala patino e fesoasoani ai i ē na ia talaʻi i ai. O lea, na mafai ai ona ia faalaeiau ma uunaʻia i latou e tapuaʻi iā Ieova.

8. (a) O le ā lo tatou manatu i ē o loo tatou aʻoaʻoina i le faiva? (e) E faapefea i le faia o se suʻesuʻega faale-Tusi Paia ona fiafia atili ai i le faiva?

⁸ O le ā le tāua o le auaunaga iā Paulo? Na lotomalie o ia e “pologa” iā Ieova, ma ē na faalogo i le feʻau o le upu moni. (Roma 12:11; 1 Kori. 9:19) Pe a tatou aʻoaʻo tagata i le Afioga a le Atua—i se suʻesuʻega faale-Tusi Paia i aiga, i sauniga faa-Kerisiano, po o le Tapuaʻiga a le Aiga—po o tatou lagona la tatou tiute tauave iā i latou o loo tatou aʻoaʻoina? Atonu e tatou te manatu o le faia o se suʻesuʻega faale-Tusi Paia ma se isi tagata, o se avega mamafa iā i tatou. E moni, e manaʻomia ai le tuu o isi mea e tatou te fiafia ai, ae faaaogā le taimi e fesoasoani atu ai i isi. Ae pe lē o le agaga ea lenā o le fetalaiga a Iesu, “e sili le fiafia e maua i le foaʻi atu i lo o le talia mai?” (Galu. 20:35) O le aʻoaʻoina o tagata i le ala e maua ai le faaolataga, e tatou te maua ai le fiafia e sili atu i lo se isi galuega tatou te faia.

9, 10. (a) Po o le uiga o le faatāuaina o mea, e lē toe tafafao ma fiafia ma isi? Faamatala. (e) O le ā e fesoasoani i se toeaina ina ia faalaeiauina isi, ma faigofie ai ona talanoa atu isi iā te ia?

⁹ O le faatāuaina o la tatou faiva, e lē faapea ai ua leai so tatou taimi e tafafao ma fiafia ai ma isi tagata. Sa faia e Iesu se faaaʻoaʻoga lelei e ala i le faaaogāina o le taimi e aʻoaʻo atu ai, atoa ma taimi e tafafao ma atiaʻe ai faiā lelei ma isi. (Luka 5:27-29; Ioa. 12:1, 2) O le faatāuaina o mea, e lē o uiga atu i le matapaū i taimi uma. Ana faapea sa matapaū ma inainā uiga faaalia o Iesu, e mautinoa e lē latalata mai tagata iā te ia. E oo foʻi i tamaiti sa lalata iā Iesu. (Mare. 10:13-16) E faapefea ona tatou faataʻitaʻi i lenei uiga paleni o Iesu?

¹⁰ Sa faapea mai se tasi uso e uiga i se toeaina, “E na te taumafai ia fai le mea e sili ona lelei, ae na te lē faatalitalia isi e faia faapea.” Pe e te faapena? E talafeagai lo tatou faatalitalia o mea e mafai ona fai e isi. O se faataʻitaʻiga, e fiafia le fanau, pe afai e faatū e mātua ni sini e talafeagai, ma fesoasoani iā i latou ina ia ausia. E mafai foʻi e toeaina ona latou faalaeiauina isi o le faapotopotoga ina ia agaʻi i luma i le itu faaleagaga, ma avatu ni fautuaga patino i le auala e fai ai. Ma afai e paleni le vaaiga a le toeaina iā te ia lava, o le a faigofie ona talanoa atu isi iā te ia. (Roma 12:3) Fai mai se tuafafine: “Ou te lē fiafia i se toeaina e na ona fai mea malie i taimi uma. Ae afai e matapaū se toeaina i taimi uma, e faigatā foʻi ona talanoa atu i ai.” Ua faapea mai se isi tuafafine, o nisi toeaina “e tele ina fefefe ai tagata, ona o o latou uiga lē māfana.” E lē tatau i toeaina ona tineia le uiga fiafia e iai i tagata talitonu e tusa ma la latou tapuaʻiga iā Ieova, “le Atua fiafia.”—1 Timo. 1:11.

 Talia o Tiute Tauave i le Faapotopotoga

11. I le faapotopotoga, o le ā le uiga o le faaupuga “aapa atu”?

¹¹ Ina ua timaʻi atu Paulo i tane o le faapotopotoga ia ausia agavaa mo isi tiute tauave, e lē faapea sa ia uunaʻia ni uiga fiasili. Ae sa ia tusia: “Afai e fia aapa atu se tasi i le tofi o se ovasia, e naunau o ia i galuega lelei.” (1 Timo. 3:1, 4) O le “aapa atu,” e manaʻomia ai ona naunau tane Kerisiano e galulue malosi, ina ia ausia uiga faaleagaga e auauna atu ai i o latou uso. Afai ua atoa le tausaga talu ona papatiso se uso, ma ua ia ausia i se tulaga talafeagai agavaa mo auauna o le faiva o loo taʻua i le 1 Timoteo 3:8-13, e mafai ona faatūina o ia mo lea tofiga. Ia mātau o loo taʻua patino mai i le fuaiupu e 8: “E tatau i auauna o le faiva ona matutua i o latou mafaufau.”

12, 13. Faamatala auala e mafai ai e uso talavou ona aapa atu mo tiute tauave.

¹² Po o oe o se uso talavou ua uma ona papatiso, ma e te faatāuaina lau tapuaʻiga iā Ieova? E tele ni auala e te aapa atu ai. E mafai ona faaleleia lou sao i le galuega talaʻi. Pe e te fiafia e galulue faatasi ma uso e eseese lo latou matutua i le auaunaga? Po o e taumafai e maua sau suʻesuʻega faale-Tusi Paia? Afai e te faatatauina fautuaga mai sauniga mo le faia o se suʻesuʻega faale-Tusi Paia, o le a faalelei ai lou tomai e aʻoaʻo atu. O le a iā te oe foʻi le loto malamalama i lē o loo aʻoaʻoina ala o Ieova. Pe a amata ona iloa e lau tagata aʻoga suiga e ao ona ia fai, e te iloa ai ona fesoasoani iā te ia ma le onosaʻi ma le faautauta, e faatatauina mataupu silisili o le Tusi Paia.

¹³ O outou uso talavou, e mafai ona tou fesoasoani i uso matutua i le faapotopotoga i so o se auala e mafai ai. E mafai foʻi ona tou manatu i le tulaga o le Maota mo Sauniga, e ala i le tausia ina ia lelei ma mamā. Pe a e lotomalie e fesoasoani atu i so o se auala e te mafai ai, e faaalia ai e te faatāuaina lau auaunaga. I le pei o Timoteo, e mafai foʻi ona e faamasani i le auala e tausia ai manaʻoga o le faapotopotoga.—Faitau le Filipi 2:19-22.

14. E faapefea ona ʻtofotofoina po ua agavaa’ uso talavou e auauna i le faapotopotoga?

¹⁴ O outou toeaina, ia tuu atu ni galuega i uso talavou, o ē o loo taumafai e ʻsosola ese mai i tuʻinanauga masani o talavou,’ ma tausisi i le “amiotonu, le faatuatua, le alofa, le filemu,” atoa ai ma isi uiga lelei. (2 Timo. 2:22) E ala i le tuu atu iā i latou o ni mea e fai i le faapotopotoga, e mafai ai ona “tofotofoina i latou po ua agavaa” e faia tiute tauave, ina ia “iloa ai e tagata uma [lo latou] agaʻigaʻi i luma.”—1 Timo. 3:10; 4:15.

Faatāuaina o Isi i le Faapotopotoga ma le Aiga

15. E faapefea ona tatou faatāuaina isi, e tusa ai ma le 1 Timoteo 5:1, 2?

¹⁵ O le faatāuaina o isi, e aofia ai le faamamaluina o o tatou uso ma tuafāfine. I lona fautua atu iā Timoteo, na taʻua ai e Paulo e manaʻomia ona feagai ma isi i le faaaloalo. (Faitau le 1 Timoteo 5:1, 2.) E tāua tele lenei tulaga i le feagai ai ma i latou o le isi itupā. E tatau ona faataʻitaʻi i le faaaʻoaʻoga a Iopu i le faamamaluina o fafine, aemaise  lava i lana avā. Sa ia maumauaʻi e ʻalofia le faataupupula manaʻonaʻo atu i se isi fafine. (Iopu 31:1) O le faatāuaina o o tatou uso ma tuafāfine, o le a tatou lē faatafai atu ai iā i latou, pe faia so se mea e lē lelei ai o latou faalogona a o faatasi ma i tatou. E sili ona tāua le faamamaluina o isi, aemaise pe afai o uō se tama ma se teine ma le faamoemoe e faaipoipo. O se Kerisiano e faaaloalo, e lē taalo i faalogona o se tasi o le isi itupā.—Faata. 12:22.

16. O le ā le eseesega o le manatu o nisi i le lalolagi i le tulaga o le tane po o le tamā, ma le faamatalaga a le Tusi Paia i lana tiute tauave?

¹⁶ E manaʻomia foʻi ona faatāua o tatou tiute tauave ua tuuina mai e le Atua i totonu o le aiga. I le lalolagi a Satani, ua avea le tiute o se tamā ma mea e ula i ai. Ua māfua lenei tulaga ona o polokalame i le TV ma faafiafiaga, ia e faaalia ai le tauemu ma le lē faaaloalo i le ulu o le aiga. Peitaʻi, e tusa ai ma le Tusi Paia, e matuā tāua le tiute tauave a le tane ona ua tofia o ia e fai ma ʻulu o le avā.’—Efe. 5:23; 1 Kori. 11:3.

17. Faamatala pe faapefea i le faataunuu o le tapuaʻiga a le aiga, ona faaalia ai e tāua iā i tatou o tatou tiute tauave.

¹⁷ E masani ona tausia e se tane lona aiga i le itu faaletino. Ae afai e na te lē tausia i le itu faaleagaga, e lē o faaalia la le faautauta ma le atamai. (Teu. 6:6, 7) O lea ua taʻua ai i le 1 Timoteo 3:4, pe afai o oe o le ulu o le aiga ma o loo e aapa atu mo isi faaeaga i le faapotopotoga, e tatau ona avea oe ma se tane ʻe pule lelei i lou lava aiga, e gauaʻi ma e faaaloalo lau fanau.’ O lea la, ia fesili ifo iā te oe lava, ʻPo o oʻu faatulaga se taimi mo le faia pea o le tapuaʻiga a le aiga?’ O nisi avā Kerisiano e tauanau pea a latou tane, ia taʻimua i mea faaleagaga. E tatau i tane taʻitoʻatasi ona manatu i le tāua tele o lenei tiute tauave. E tatau foʻi i se avā Kerisiano ona lagolagosua i le faatulagaga o le Tapuaʻiga a le Aiga, ma felagolagomaʻi ma lana tane ina ia faataunuuina.

18. E faapefea ona aʻoaʻoina fanau ia taulaʻi atu i mea e sili ona tāua?

¹⁸ Ua uunaʻia foʻi fanau ia taulaʻi atu i mea e sili ona tāua i le olaga. (Fai. 12:1) E lē leaga pe a iloa e tamaiti i le aiga, ona fai feʻau ia e talafeagai ma lo latou matutua ma tomai. (Aue. 3:27) A o laʻitiiti le tupu o Tavita, sa aʻoaʻoina o ia e avea ma leoleo mamoe lelei. Sa aʻoaʻoina foʻi e ia le tomai o le faimusika ma le fatupese, ma iʻu ai ina agavaa e auauna i luma o le tupu o Isaraelu. (1 Samu. 16:11, 12, 18-21) E lē taumatea sa fiafia Tavita e taalo a o laʻitiiti, ae sa ia aʻoaʻoina foʻi tomai tāua na ia faaaogā mulimuli ane e viia ai Ieova. O lona tomai o se leoleo mamoe, na fesoasoani iā te ia e taʻitaʻia ai ma le onosaʻi le nuu o Isaraelu. Talavou e, e fia ni tomai tāua ua e aʻoaʻoina e  fesoasoani ai i lou auauna atu i Lē na faia oe, ma saunia ai oe mo tiute tauave i le lumanaʻi?

Ia Iai se Vaaiga Paleni

19, 20. O le ā le vaaiga paleni e te maumauaʻi ia iai pea iā te oe lava ma lau tapuaʻiga?

¹⁹ E ao iā i tatou uma ona iai pea se vaaiga paleni iā i tatou, ma lē soona faamamafa le vaaiga i le olaga. E tatou te lē mananaʻo ia “amiotonu naʻuā.” (Fai. 7:16) O le fai o sina tala mālie, e mafai ona fesoasoani i taimi e lē toʻafilemu ai i totonu o le aiga, galuega, pe feagai foʻi ma o tatou uso ma tuafāfine Kerisiano. E ao i tagata o le aiga ona faaeteete i le soona faitio, ina neʻi faaleagaina le saogalemu o le aiga, lea e avea o se nofoaga e mapu i ai. E ao i tagata uma i le faapotopotoga ona fiafia ma toē faatasi, ma ia talanoa ma aʻoaʻo atu i se auala lelei ma atiaʻe ai.—2 Kori. 13:10; Efe. 4:29.

²⁰ Ua tatou soifua i se lalolagi ua lē faatāuaina Ieova ma ana tulafono. Ae e ese mai ai tagata o Ieova, auā e tāua iā i latou le usiusitaʻi ma faamaoni i lo latou Atua. Maʻeu le matagofie o le avea ma vaega o lenā aufaatasiga telē o tagata, o ē e tapuaʻi iā Ieova ʻma le matuā faaaloalo lava’! Tau ina ia tatou maumauaʻi e taulaʻi atu pea i mea e sili ona tāua o le olaga, ma la tatou tapuaʻiga.

E Faapefea Ona E Tali?

• Aiseā e tatau ai ona tatou teena le vaaiga a le lalolagi, o le soona pupū i mea faafiafia?

• E faapefea ona tatou fiafia ma faatāua pea la tatou faiva?

• E faapefea i lo tatou manatu i le taliaina o tiute tauave, ona iloa ai pe tatou te faatāua mea pe leai?

• Faamatala le māfuaaga e tāua ai ona faamamaluina o tatou uso ma tagata o le aiga.

[Fesili mo le Suʻesuʻega]

[Ata i le itulau 12]

E tatau i se tane ona tausia lona aiga i le itu faaletino ma le faaleagaga