‘Nanobe ngutiphi tintfo letibaluleke kakhulu, . . . chubekani nicabanga ngato.’​—FIL. 4:8.

1, 2. Yini leye yabangela kutsi bantfu labanyenti lamuhla babe nembono longakafaneli ngekuphila, futsi loko kuphakamisa miphi imibuto?

 SIPHILA eveni lelisetikhatsini letimatima naletibuhlungu kakhulu kunato tonkhe emlandvweni webantfu. Kubeketelela ‘letikhatsi letimatima’ kulukhuni kakhulu kubantfu labete buhlobo lobuhle naJehova. (2 Thim. 3:1-5) Bawa bavuka netinkinga malanga onkhe, kodvwa bayehluleka kutincoba ngalokuphelele. Bantfu labanyenti bacitsa sikhatsi sabo ekutijabuliseni kakhulu kute bangatikhatsati ngekuphila futsi bakhohlwe ngetinkinga labanato.

² Kute babeketelele kucindzeteleka labanako, bantfu baye babeke injabulo kucala ekuphileni kwabo. Nangabe emaKhristu anganaki, angatitfola asalandzela lendlela yekuphila lefananako. Singakubalekela njani loko? Kufanele sihlale singasatijabulisi yini? Singakwati njani kulondvolota umbono lofanele mayelana nenjabulo kanye nemitfwalo lesinayo? Ngutiphi timiso teliBhayibheli lokufanele tisicondzise kute sitsi nobe sinaka tintfo letibalulekile, singabese siyecisa?

Kunaka Tintfo Letibalulekile Kulelive Lelitsandza Injabulo

3, 4. ImiBhalo isisita njani kutsi sisicaphele sidzingo sekunaka tintfo letibalulekile?

³ Lelive litsatsa ‘kutsandza injabulo’ njengentfo lebaluleke kakhulu. (2 Thim. 3:4) Indlela lelikukhutsata ngayo kutijabulisa ingabeka buhlobo betfu naJehova engotini. (Taga 21:17) Ngako-ke, kunesizatfu lesihle sekutsi tincwadzi temphostoli Pawula letiya kuThimothi naThithusi tibe neseluleko lesimayelana nekunaka tintfo letibalulekile. Kusisebentisa leseluleko kutawusisita kutsi singayengwa ngumbono longakafaneli lelive lelinawo ngekuphila.​—Fundza 1 Thimothi 2:1, 2, NW; Thithusi 2:2-8.

⁴ Emakhulwini eminyaka ngembikwaloko, Solomoni wabhala ngekubaluleka kwekutincisha injabulo ngaletinye tikhatsi kute unake tintfo letibalulekile ekuphileni. (Shu. 3:4; 7:2-4) Ngesizatfu sekutsi kuphila kwetfu kufishane, kufanele ‘siphikelele’ kute sisindziswe. (Lukha 13:24) Kute kube nguleso sikhatsi, kufanele sichubeke sicabanga ngetintfo ‘letibaluleke kakhulu.’ (Fil. 4:8, 9, NW.) Loko kusho kutsi kufanele sitinakisise tonkhe tici tekuphila kwebuKhristu.

5. Ngusiphi lesinye sici sekuphila lokufanele sisinakisise?

⁵ Nasi sibonelo: Njengobe emaKhristu alingisa Jehova naJesu, ayawucaphela umtfwalo wawo wekusebenta kamatima. (Joh. 5:17) Ngesizatfu saloko, avame kunconywa ngekusebenta kamatima kanye nangekwetsembeka kwawo. Tinhloko temindeni tiyasicaphela sidzingo sekusebenta kamatima kute tisekele imindeni yato. Ecinisweni, kungatinaki tidzingo tenyama temalunga emndeni kusho ‘kulahla’ Jehova.​—1 Thim. 5:8.

Kunaka Tintfo Letibalulekile Kodvwa Sichubeke Sijabula Ekukhonteni Kwetfu

6. Sati ngani kutsi kukhonta Jehova kufanele sikutsatse njengalokubalulekile?

⁶ Jehova abesolo atsatsa kukhonta kweliciniso njengalokubalulekile. Sibonelo saloku kutsi  eMtsetfweni waMosi, ema-Israyeli abetfola imiphumela lebuhlungu nangabe aphambuka ekukhonteni Jehova. (Josh. 23:12, 13) Ekhulwini lekucala C.E., balandzeli baKhristu bekufanele balwe kamatima kute kukhonta kweliciniso kungangcoliswa timfundziso kanye nesimo sengcondvo lesibi. (2 Joh. 7-11; Semb. 2:14-16) Lamuhla, emaKhristu eliciniso ayachubeka atsatsa kukhonta kwawo njengalokubalulekile.​—1 Thim. 6:20.

7. Pawula wawulungiselela njani umsebenti wakhe?

⁷ Umsebenti wetfu wekushumayela usiletsela injabulo. Nanobe kunjalo, kute silondvolote injabulo kulomsebenti, kufanele sicabangisise ngekubaluleka kwawo futsi silungiselele kusenesikhatsi. Pawula wachaza indlela labecabanga ngayo ngebantfu labebafundzisa. Wabhala: “Sengaba ngiko konkhe kubo bonkhe, kuze ngako konkhe ngisindzise labanye. Ngikwenta konkhe ngesimanga seliVangeli, kuze nami ngibe nesabelo kulo.” (1 Khor. 9:22, 23) Pawula abekujabulela kusita labanye kutsi bafundze ngaNkulunkulu, futsi abehlale acabangisisa ngendlela labetawutenetisa ngayo tidzingo letehlukehlukene tetilaleli takhe. Ngaleso sizatfu, abekwati kubakhutsata futsi abacinise kutsi bakhonte Jehova.

8. (a) Kufanele sibe nasiphi simo sengcondvo ngebantfu lesibafundzisako ensimini? (b) Kuchuba sifundvo seliBhayibheli kungasiletsela njani injabulo emsebentini wetfu?

⁸ Umsebenti wekushumayela bewubaluleke kangakanani kuPawula? Abekulungele ‘kuba sigcili’ saJehova kanye nesalabo labebatawulalela liciniso labelifundzisa. (Rom. 12:11; 1 Khor. 9:19) Nasifundzisa labanye ngeliVi laNkulunkulu​—kungaba ngulapho sichuba tifundvo teliBhayibheli, emhlanganweni webuKhristu, nobe ekuKhonteni Kwemndeni—​siyawucaphela yini umtfwalo lesinawo kulabo lesibafundzisako? Mhlawumbe sibona shengatsi kuchuba sifundvo seliBhayibheli njalo kungumtfwalo lomkhulu kakhulu. Kuliciniso kutsi kuye kudzingeke sinciphise sikhatsi sekwenta tintfo tetfu kute sisisebentise ekusiteni labanye. Nanobe kunjalo, loko akuvumelani yini nemavi aJesu latsi: “Kubusisiwe kupha kunekwemukela”? (Imis. 20:35) Kufundzisa labanye indlela yekutfola insindziso kutawusiletsela injabulo lengeke ize ilingane naletinye tintfo.

9, 10. (a) Kunaka tintfo letibalulekile kusho kutsi akukafaneli yini siphumule futsi sijabule nalabanye? Chaza. (b) Yini lengasita lomdzala welibandla kutsi abe sikhutsato futsi angeneke?

⁹ Kunaka tintfo letibalulekile akusho kutsi akukafaneli sibe netikhatsi tekuphumula kanye netekujabula nalabanye. Jesu wabeka sibonelo lesihle ngekutsi angatiniki sikhatsi sekufundzisa kuphela kodvwa abe nesikhatsi sekuphumula nesekutfutfukisa buhlobo lobuhle nalabanye. (Luk. 5:27-29; Joh. 12:1, 2) Kunaka tintfo letibalulekile akusho kutsi kufanele sicinise sandla. Kube Jesu abecinisa sandla, bantfu bebangeke badvonseleke kuye. Ngisho nebantfwana bebativa bakhululekile nabanaye. (Mak. 10:13-16) Singasilingisa njani sibonelo saJesu?

¹⁰ Akhuluma ngalomdzala welibandla, lomunye umzalwane watsi: “Unalokunyenti lakulindzele kuye ngekwakhe, kodvwa akalindzeli kutsi labanye bangawenti emaphutsa.” Kungashiwo lokufananako yini ngawe? Kuhle kulindzela tintfo letifanele kulabanye. Nasi sibonelo: Bantfwana batfutfuka kahle nangabe batali babo bababekela imigomo lefanele futsi babasita kutsi bayifinyelele. Ngalokufananako, labadzala belibandla bangakhutsata labanye ebandleni kutsi bakhule ngekwakamoya futsi babatjele nekutsi loko bangakwenta njani. Ngetulu kwaloko, nangabe lomdzala anembono lolingene ngaye ngekwakhe, utawuba sikhutsato futsi angeneke. (Rom. 12:3) Lomunye dzadze watsi: “Angitsandzi kutsi lomdzala welibandla atitsatse kancane tonkhe tintfo. Kodvwa nangabe asacinisa sandla ngaso sonkhe sikhatsi, kuba matima kukhuluma naye.” Lomunye watsi yena ubona shengatsi labanye labadzala “abangeneki melula ngobe babonakala besabeka nobe banesitfunti.” Labadzala akukafaneli bacedze injabulo labanye ebandleni lokufanele babe nayo ekukhonteni Jehova, ‘longuNkulunkulu lojabulako.’​—1 Thim. 1:11, NW.

 Kwenta Imisebenti Yasebandleni

11. Kusho kutsini ‘kufisa’ imisebenti leyengetiwe ebandleni?

¹¹ Ngesikhatsi Pawula akhutsata emadvodza langemaKhristu kutsi alwele kufanelekela kwenta imisebenti leyengetiwe, abengakahlosi kuwakhutsata kutsi alindzele kutfola tinzuzo letitsite. Kunaloko, wabhala: “Nangabe umuntfu afisa umsebenti wekuba ngumbonisi, ufisa umsebenti lomuhle.” (1 Thim. 3:1, 4) ‘Kufisa’ imisebenti leyengetiwe kusho kutsi indvodza lengumKhristu kufanele ibe nelilukuluku lelicinile lekufuna kusebenta ngekutimisela kute ibe netimfanelo takamoya letidzingekile futsi ikwati nekukhonta labanye bazalwane. Nangabe umzalwane sekanemnyaka abhajatisiwe futsi asafinyelele timfuneko letisemBhalweni tekuba yinceku lesebentako letivetwe ku-1 Thimothi 3:8-13, anganconyelwa kutsi abe ngiyo. Caphela nekutsi livesi 8 lalombhalo litsi: ‘Tinceku letisebentako kufanele [tinake tintfo letibalulekile.]’

12, 13. Shano tindlela bazalwane labasebasha labangaveta ngato kutsi bafisa imisebenti leyengetiwe ebandleni.

¹² Ungumzalwane lobhajatisiwe yini losekatawufika eminyakeni lengu-20 futsi lonaka tintfo letibalulekile? Kunetindlela letimbalwa longaveta ngato kutsi ufisa imisebenti leyengetiwe. Lenye yato kutfutfukisa indlela lohlanganyela ngayo emsebentini wekushumayela. Ungumuntfu lokujabulelako yini kusebenta nebazalwane labaneminyaka leyehlukehlukene emsebentini wekushumayela? Wetama kutfola umuntfu longamfundzela liBhayibheli yini? Nawuwasebentisa emacebo lowatfola emihlanganweni yebuKhristu lapho uchuba sifundvo seliBhayibheli, utawutfutfukisa likhono lakho lekufundzisa. Ngetulu kwaloko, utawukwati nekumvela loyo muntfu lomfundzelako. Njengobe abona sidzingo sekwenta lushintjo, utawukwati kumsita ngesineke nangekuhlakanipha kutsi asebentise timiso teliBhayibheli.

¹³ Nine bazalwane labasebasha ningakwati kutenta nitfolakale ebandleni kute nisite bantfu labakhulile nganobe ngutiphi tindlela. Ningaphindze nivete kutsi ninenshisekelo endleleni liHholwa leMbuso lelibukeka ngayo, ngekutsi niligcine lihlantekile futsi lihlelekile. Nangabe utimisela kusita nganobe ngabe nguyiphi indlela, lowo moya uniketa bufakazi bekutsi uyawutsandza umsebenti lowentako. NjengaThimothi, utawukwati kunakekela tidzingo telibandla ngebucotfo.​—Fundza Filiphi 2:19-22.

14. Bazalwane labasebasha ‘bangavivinyeka’ njani kute basebente ebandleni?

¹⁴ Nine labadzala belibandla, kufanele nibanike imisebenti bazalwane labasebasha labalwela ‘kubalekela tinkhanuko tebusha’ futsi labaphishanekela “kulunga, nekukholwa, nelutsandvo, nekuthula,” kanye naletinye timfanelo letinhle. (2 Thim. 2:22) Ngekubabela imisebenti labangayenta ebandleni, ‘bangavivinyeka’ kutsi bakwati kutfwala imitfwalo yabo, kute bantfu ‘babone kuchubekela kwabo embili.’​—1 Thim. 3:10; 4:15.

Naka Tintfo Letibalulekile Ebandleni Kanye Nasemndenini

15. Ngekuya kwembhalo wa-1 Thimothi 5:1, 2, singaveta njani kutsi sinaka tintfo letibalulekile endleleni lesiphatsa labanye ngayo?

¹⁵ Kunaka tintfo letibalulekile kufaka ekhatsi kuhlonipha bazalwane nabodzadze. Nakeluleka Thimothi, Pawula waveta sidzingo sekuphatsa labanye ngenhlonipho. (Fundza 1 Thimothi 5:1, 2.) Loku kubaluleke kakhulu nawusebentelana nebantfu bebulili  lobehlukile. Sibonelo saJobe sekuhlonipha bantfu besifazane, ikakhulukati umfati wakhe, kufanele silingiswe. Wenta imetamo yekungambuki lomunye umuntfu wesifazane bese amkhanuka. (Jobe 31:1) Kutsatsa bazalwane kanye nabodzadze njengalabo lababalulekile kutawusenta singadlali ngelutsandvo nobe sente tintfo letitawubenta bative bangakakhululeki nabanatsi. Kuhlonipha labanye kubaluleke kakhulu nalapho bantfu batsandzana futsi bafuna kushada. UmKhristu lonaka tintfo letibalulekile angeke adlale ngemiva yemuntfu webulili lobehlukile.​—Taga 12:22.

16. Veta kutsi umbono labanye labanawo ngesikhundla semadvodza wehluke njani kuloko liBhayibheli lelikushoko ngendzima yawo.

¹⁶ Kudzingeka sichubeke siyitsatsa njengalebalulekile imitfwalo Nkulunkulu lasinikete yona emndenini. Lelive laSathane alisihloniphi sikhundla semadvodza. Tekutijabulisa tenta tinhloko temndeni tibukeke njengaleto lokungakafaneli tinakwe nobe tihlonishwe. Nanobe kunjalo, imiBhalo inika indvodza umtfwalo lomkhulu, wekuba ‘yinhloko yemfati.’​—Ef. 5:23; 1 Khor. 11:3.

17. Chaza kutsi kuba nencenye ekukhonteni kwemndeni kungaveta njani kutsi siyitsatsa njengalebalulekile imitfwalo lesiniketwe yona.

¹⁷ Indvodza ingawunakekela ngekwenyama umndeni wayo, kodvwa nangabe ingawunakekeli ngekwakamoya, ingaveta kutsi yeswele kuhlakanipha. (Dut. 6:6, 7) Umbhalo wa-1 Thimothi 3:4 utsi nangabe inhloko yemndeni ifuna kwenta imisebenti letsite ebandleni, kufanele ibe yindvodza ‘lewuphetse kahle umuti wayo, lefundzisa ngekuhlonipheka konkhe kutsi bantfwana bayo batfobeke.’ Mayelana nalendzaba, tibute: ‘Ngiyasibekela yini eceleni sikhatsi sekukhonta kwemndeni?’ Labanye bafati labangemaKhristu kuye kudzingeke bawancenge emadvodza abo kute ahole emisebentini lehlobene nekukhonta Nkulunkulu. Indvodza ngayinye kufanele itihlole kutsi iwutsatsa njani lomtfwalo wayo. Kuliciniso kutsi umfati longumKhristu kufanele akusekele Kukhonta Kwemndeni futsi abambisane nendvodza yakhe kute akwente kuphumelele.

18. Bantfwana bangafundza njani kunaka tintfo letibalulekile?

¹⁸ Bantfwana nabo bakhutsatwa kutsi banake tintfo letibaluleke kakhulu ekuphileni. (Shu. 12:1) Akusikubi kutsi bantfwana labancane bafundze kusebenta kamatima, bente imisebenti yasekhaya lelingana neminyaka kanye nemandla abo. (Sil. 3:27) Ngesikhatsi iNkhosi Davide isengumfana, yafundza kuba ngumelusi lokahle. Yafundza nekuba ngumhlabeli kanye nembhali wetingoma​—lawo ngemakhono layenta yakwati nekuyosebentela umbusi waka-Israyeli. (1 Sam. 16:11, 12, 18-21) Njengemfana, Davide abekwati kudlala, kodvwa wafundza nemakhono labalulekile, ngekuhamba kwesikhatsi lawasebentisa kute advumise Jehova. Likhono lakhe lekuba ngumelusi lamsita wakwati kuhola sive saka-Israyeli ngesineke. Nine labasha, mangakhi emakhono labalulekile leniwafundzako​—emakhono latawunisita kutsi nikhonte uMdali  wenu futsi nilungele imitfwalo yesikhatsi lesitako?

Bani Nembono Lolinganiselako

19, 20. Ngusiphi simo sengcondvo lesifanele lotimisele kusilondvolota endleleni lophila ngayo kanye nasekukhonteni kwakho Nkulunkulu?

¹⁹ Singakulwela kuba nembono lolinganiselako​—singabi bantfu labacinisa sandla kakhulu. Asifuni kutenta bantfu ‘labalunge kakhulu.’ (Shu. 7:16) Kungacinisi sandla kungenta kutsi kungabi nesimo lesishubile ekhaya, emsebentini, nobe lapho sinebazalwane kanye nabodzadze labangemaKhristu. Emalunga emindeni kufanele abalekele kugcekana kute angacedzi kuthula umndeni lokufanele ube nako. Ebandleni, sonkhe singaba netikhatsi letimnandzi kanye netekujabula ndzawonye, sigcine kukhulumisana kanye nekufundzisa kwetfu kwakha futsi kukuhle.​—2 Khor. 13:10; Ef. 4:29.

²⁰ Siphila eveni lelingakuboni kubaluleka kwaJehova nobe kwemitsetfo yakhe. Ngalokwehlukile, bantfu baJehova batsatsa kulalela kwabo Nkulunkulu kanye nekuba cotfo kuye njengalokubaluleke kakhulu. Kuyajabulisa kuba yincenye yalenhlangano yebantfu labatsatsa kukhonta Jehova ‘njengalokubaluleke kakhulu’! Shengatsi sonkhe singatimisela kutsi sihlale sitsatsa kuphila kanye nekukhonta kwetfu Nkulunkulu njengalokubalulekile.

Ungaphendvula Njani?

• Kungani kufanele simelane nembono walelive longakalungi mayelana nekuphila?

• Singajabula njani nanobe sitsatsa umsebenti wetfu njengalobalulekile?

• Umbono wetfu ngemitfwalo lesinayo ungakuveta njani kutsi sinaka tintfo letibalulekile nobe cha?

• Chaza kutsi kungani kubalulekile kuhlonipha bazalwane kanye nemalunga emndeni.

[Imibuto Yesihloko Lesifundvwako]

[Titfombe ekhasini 16]

Indvodza kufanele inakekele umndeni wayo ngekwakamoya kanye nangekwenyama