Lu xlakaskinka kaʼakxilhwi akgstitum skujnaniyaw Dios
Lu xlakaskinka kaʼakxilhwi akgstitum skujnaniyaw Dios
«Xlipaks wantu xakgstitum [...] wa yuma nkalakapastaktit natlawayatit.» (FILI. 4:8)
1, 2. ¿Tuku xlakata lhuwa kaj akglakgwa linkgo xlatamatkan, chu tuku takgalhskinin kilitlawatkan?
KAKILHTAMAKU lu nitlan tuku titaxtumakgolh. Xlikana la uku «xaʼawatiya kilhtamaku [niku] lhuwa skalajwa» o katuwa. Tiku ni lipawankgo Dios ni katsikgo la nalakkaxtlawakgo xtaʼakglhuwitkan (2 Tim. 3:1-5). Fuerza tlawanikgo xlakata nalakkaxtlawakgo xtaʼakglhuwitkan pero takgalana la titaxtumakgolh. Chu xlakata nialh lakapastakputunkgo xtaʼakglhuwitkan, lhuwa kaj lilakgastanankgo tuku anan kkakilhtamaku.
2 Lhuwa tiku kaj putsakgo tuku nalipaxuwakgo o nalilakgastanankgo xlakata nialh nalakapastakkgo xtaʼakglhuwitkan. Komo ni kuenta natlawayaw, akinin kstalaninanin Cristo max nachuna natsukuyaw linaw kilatamatkan. ¿La tlan natlawayaw xlakata nichuna nakinkaʼakgspulayan? ¿Wamputun pi nipara tsinu napaxuwayaw? ¿La tlan natlawayaw xlakata ni namalakatsaliyaw tuku lipaxuwayaw chu tuku kilitlawatkan? ¿Tukuya tastakyaw xalak Biblia nakinkamakgtayayan xaʼakgstitum naʼakxilhaw kilatamatkan pero ni namalakatsaliyaw?
Akgstitum kalatamaw maski latamanin kaj paxuwaputunkgo
3, 4. ¿Tukuya tastakyaw xalak Biblia limasiya pi lu xlakaskinka xaʼakgstitum nalinaw kilatamatkan?
3 Xlikana kakilhtamaku litsama tiku «tlakg paxkikgo wa tuku nalipaxuwakgo» chu kajwatiya lakpuwankgo tuku nalilakgastanankgo (2 Tim. 3:4; NM). Chu komo nachuna natlawayaw natalakglakgalhli kintakanajlakan (Pro. 21:17). Wa xlakata akxni Pablo katsokgnanilh Timoteo chu Tito kawanilh makgapitsin tastakyaw niku lichuwinan pi xaʼakgstitum xlinkgolh xlatamatkan chu la uku nakinkamakgtayayan ni nalakapastaknanaw la tlawakgo xalak kakilhtamaku (kalikgalhtawakga 1 Timoteo 2:1, 2 chu Tito 2:2-8).
4 Akglhuwa siglos titaxtunit akxni Salomón wa pi namin kilhtamaku natalakaskin nalimakgxtakgaw tuku lipaxuwayaw kaj xlakata natlawayaw tuku tlakg xlakaskinka (Ecl. 3:4; 7:2-4). Xlikana ni lhuwa kilhtamaku latamayaw wa xlakata lu xlakaskinka naliskujaw xlakata tlan nalakgtaxtuyaw (Luc. 13:24). Pero talakaskin nalimaxtuyaw kilhtamaku xlakata natlawayaw «xlipaks wantu xaʼakgstitum» (Fili. 4:8, 9). Uma wamputun pi tlakg kuenta kilitlawatkan putum tuku natlawayaw akinin kstalaninanin Cristo.
5. ¿Tuku lu xlakaskinka kiliʼakxilhatkan?
5 Kawiliw akgtum liʼakxilhtit, kstalaninanin Cristo tlawakgo chuna la Jehová chu Jesús akxni lu tlan makgantaxtikgo xtaskujutkan (Juan 5:17). Xlikana, tlan kalichuwinankan xlakata ni akgsaninankgo chu tlan kalipawankan. Xatlat tlakg xliskujat, xlakata tiku ni kamaxki tuku maklakaskinkgo xfamilia lu nitlan tuku tlawa, xtachuna la «tiku lakgmakganit Jehová» (1 Tim. 5:8, NM, nota).
Xaʼakgstitum skujnaniyaw Dios pero na paxuwayaw
6. ¿La likatsiyaw pi lu xlakaskinka kiliʼakxilhatkan kintakanajlakan?
6 Putum kilhtamaku Jehová kaskini xlakskujnin, lu xlakaskinka naʼakxilhkgo la nakakninanikgo. Wa xlakata akxni israelitas ni kgalhakgaxmatkgolh Limapakgsin nema maxkilh Moisés, ni kamakgtayalh akxni lipatinankgolh xtalakgalhinkan (Jos. 23:12, 13). Kxapulana siglo kaskinilh kstalaninanin Cristo pi kuenta xtlawakgolh xlakata ni xlixkajwanankgolh ni xaxlikana tamasiy chu nixatlan tayat (2 Juan 7-11; Apo. 2:14-16). Chu la uku nachuna kinkaskiniyan pi lu xlakaskinka naʼakxilhaw akxni nakakninaniyaw (1 Tim. 6:20).
7. ¿Tuku xtlawa Pablo xlakata tlan xlichuwinalh Dios?
7 Akxni anaw lichuwinanaw Dios lu lipaxuwayaw. Pero komo putum kilhtamaku paxuwaputunaw, lu xlakaskinka pulana liwana nalakkaxwiliyaw tuku nalichuwinanaw chu la natlawayaw. Kalilakapastakwi Pablo, putum kilhtamaku pulana xlakapastaka tiku xʼama kamasiyani. Pablo wa: «Kaxati kawaj [...] naklimalakgtaxtikgoy makgapitsin. Na wa yuma nchuna klitlaway xpalakata xatlan tamakatsinin, lakimpi makxtum naktakgalhikgoy amakgapitsin» (1 Cor. 9:22, 23). Pablo lu xlipaxuwa akxni xkalitachuwinan Dios amakgapitsin chu na xlilakpuwan la tlan xkamakgtayalh. Chuna xkamakgtaya xlakata tlan kskujnikgolh Jehová.
8. 1) ¿La kiliʼakxilhatkan tiku kamasiyaniyaw? 2) ¿Tuku xlakata lu lipaxuwayaw akxni wi tiku makgalhtawakgayaw?
8 Pablo lu akgstitum kskujnani Dios. Xatapaxuwan kskujni Jehová maski ni kxokgonikan chu nachuna xatapaxuwan xkamakgtaya tiku xkgaxmatnikgo (Rom. 12:11; 1 Cor. 9:19). Akinin na kinkalakgayawakanitan namasiyayaw xTachuwin Dios, akxni wi tiku makgalhtawakgayaw kxchik, akxni mastayaw akgtum takgalhchuwin kPukgalhtawakga xla xTatayananin Jehová o akxni katakgalhtawakgayaw Biblia kifamiliajkan. ¿Liwana katsiyaw pi lu xlakaskinka nakamasiyaniyaw amakgapitsin? Max tuwa namakgkatsiyaw wi tiku namakgalhtawakgayaw akgatunu semana, max talakaskin nalimaxtuyaw kilhtamaku nema wi tuku xʼamaw tlawayaw. Pero wa uma tuku Jesús wa pi kilitlawatkan «xaliwaka ntlan [...] nalilatapaya ntu natakinana, ni xawa ntu namakgamakglhtinana» (Hech. 20:35). Chuna xla, tuku tlakg lipaxuwayaw wa akxni kamasiyaniyaw amakgapitsin nema nakalakgmaxtu.
9, 10. 1) Kawanti la tlan xaʼakgstitum nalikatsiyaw pero na napaxuwayaw akxni katawilaw amakgapitsin. 2) ¿Tuku nakamakgtaya lakgkgolotsin tlan nalikatsikgo chu tlan nakatachuwinankan?
9 Xaʼakgstitum nawanaw ni wamputun pi ni nakatapaxuwayaw kiʼamigoskan. Jesús kinkawilinin lu tlan liʼakxilhtit. Ni kaj xkamasiyani latamanin, na xlimaxtu kilhtamaku xlakata najaxa chu tlakg tlan nakatalalin atanu latamanin (Luc. 5:27-29; Juan 12:1, 2). Akgstitum nawanaw na ni wamputun pi nikxni nalitsinaw. Komo Cristo nitlan xtilikatsilh chu nikxni xlitsilh, ¿tiku xtalakatsuwiniputulh? Pero Jesús nichuna xlikatsi. Asta laktsu kaman xtalakatsuwinikgo (Mar. 10:13-16). ¿La tlan nachuna nalikatsiyaw la Cristo?
10 Chatum kstalanina Cristo chuna wa xlakata chatum kgolotsin: «Xla putum lu liwana makgantaxtiputun, pero nikxni lakpuwan pi nachuna xlitlawatkan amakgapitsi natalan». ¿Nachuna tlawayaw? Pero tlan nakaskiniyaw natalan tuku katsiyaw pi tlan namakgantaxtikgo. Akgtum liʼakxilhtit, akxni natlatni kawanikgo xkamanan tuku natlawakgo chu kamakgtayakgo, wa xlakata kamanan makgantaxtiputunkgo. Chu kcongregación, natalan paxtikatsininankgo akxni lakgkgolotsin kamakgtayakgo chu kawanikgo la tlan namatliwakglhkgo xtakanajlakan. Nachuna kgolotsin tiku pulalin congregación ni tlankajwa xlikatsit xlakata uma namakgtaya tlan na likatsi chu natalan natalakatsuwinikgo (Rom. 12:3). Chatum tala wa: «Nitlan xaklimakgkatsilh komo lakgkgolotsin kaj xlilitsinkgolh tuku kawanikan, pero na ni xaktachuwinamputulh tiku nipara tsinu litsin». Achatum tala wan: «Makgapitsi nipara tsinu litsinkgo asta makgakglhanankgo». Xlikana lakgkgolotsin ni lakaskinkgo pi chatum xtala nialh xatapaxuwan kskujnanilh Jehová «Dios tiku xapaxuwana» kaj xpalakata xasitsin tasiya (1 Tim. 1:11, NM).
Lakchixkuwin tiku makgantaxtikgo tuku kalakgayawakan kcongregación
11. ¿La limasiya chatum kstalanina Cristo «luwa tlan taskujut ntu mpuwaniy natlaway»?
11 Akxni Pablo kawanilh lakchixkuwin pi xliskujkgolh xlakata tlakg xkalakgayawaka taskujut kcongregación, ni xkawanima pi xputsakgolh tuku xkalimalankika. Wata xkawanima kaskujkgolh, akxni wa: «Lapi wi nti mpuxkunaniputun xtaskujut Dios, lhuwa tlan taskujut ntu mpuwaniy natlaway» (1 Tim. 3:1, 4). ¿La limasiya kstalanina Cristo pi skujnaniputun Dios? Lu nakamakgtayaputun natalan chu nakgalhi lakwan tayat. Lakgkgolotsin tlan nalakgayawakgo taskujut chatum tala chixku tiku akgtuma kata tamununitta chu makgantaxti tuku taskin xlakata siervo ministerial nawan chuna la talichuwinan 1 Timoteo 3:8-13, NM. Kversículo 8 wan pi wa uma tuku xlitlawat: «Siervos ministeriales [...] akgstitum xliwanatkan».
12, 13. ¿Tuku tlan natlawakgo lakgkgawasan xlakata tlakg nakalakgayawakan taskujut kcongregación?
12 Kgawasa, ¿tamununitata chu xaʼakgstitum skujnipat Dios? Komo aku stakpatku, lhuwa tuku tlan natlawaya xlakata tlan nalakgayawakana taskujut kcongregación. Pulaktum wa tlakg nalichuwinana Dios. ¿Tanu tanu natalan katataxtuya akxni lichuwinana Dios? ¿Putsapat tiku namakgalhtawakgaya? Komo naputsaya wi tiku namakgalhtawakgaya chu natlawaya chuna la wankan ktamakxtumit, tlakg tlan makgalhtawakgana nawana chu nakaʼakgtekgsa tuku makgkatsikgo tiku kamasiyaniya. Chu akxni tiku kamakgalhtawakgaya naʼakgtekgskgo pi talakaskin nalakgpalikgo xlatamatkan, nakatsiniya la nakamakgtayaya, liwana nalakapastaka la nakawaniya xlakata namakgantaxtikgo tastakyaw xalak Biblia.
13 ¿Kawaniya natalan tiku linkgoya kata pi tlan nakamakgtayaya komo wi tuku namaklakaskinkgo? ¿Makgtayanana akxni kaxakanankan kPukgalhtawakga? Komo lakgatiya skuja chu makgtayanana akxni talakaskin, nalimasiyaya pi lu xlakaskinka akxilha naskujnaniya Jehová. Kalakapastakti pi tlan nawana xtachuna la Timoteo, tiku xlikana xkamakgtayaputun xnatalan (kalikgalhtawakga Filipenses 2:19-22).
14. ¿La “nakaliʼukxilhkan; chuna chi namakgtayanankgoy” lakgkgawasan xalak congregación?
14 Lakgkgolotsin, kakalakgayawatit umakgolh lakgkgawasan tiku tsalanimakgolh «xlipaks wa nitlan xtatlawaputukan nkaman», chu liskujmakgolh xlakata nakgalhikgo umakgolh tayat «wa ntu xakgstitum latamat, chu ntakanajla, chu ntapaxkit, chu ntapaxuwan», o tlan latalalinkan (2 Tim. 2:22). Taskujut nema natlawakgo kcongregación “nakaliʼukxilhkan; chuna chi namakgtayanankgoy”. Komo namakgantaxtikgo tuku nakalakgayawakan, «paks naʼuxkilhkgoy lantla nalitaliwaka[kgo]» (1 Tim. 3:10; 4:15).
Katlawaw tuku xaʼakgstitum kcongregación chu kkinchikkan
15. Chuna la wan 1 Timoteo 5:1, 2, ¿la limasiya kstalanina Cristo pi xaʼakgstitum kalikatsini amakgapitsin?
15 Xaʼakgstitum nalikatsiyaw kilhchanima tlan nakalikatsiniyaw chu nakamaxkiyaw kakni putum kinatalankan chuna la Pablo stakyawalh Timoteo (kalikgalhtawakga 1 Timoteo 5:1, 2). Tlakg xlakaskinka xaʼakgstitum nalikatsiyaw akxni akinin natalan lakchixkuwin talalinaw natalan lakpuskatin. Job kinkawilinin lu tlan liʼakxilhtit, xlakata putum kilhtamaku kamaxkilh kakni lakpuskatin, chu tlakg xmaxki kakni xpuskat, xlakata nikxni lakgatilh atanu puskat (Job 31:1). Tiku xaʼakgstitum likatsini xnatalan nikxni wi tuku limasini pi lakgati chu ni tlawa tuku nitlan nalimakgkatsi achatum. Chu akxni xlakskujni Dios, chatum kgawasa chu chatum tsumat tsukukgo lalakgapaskgo xlakata alistalh natamakgaxtokgkgo xlakaskinka nalamaxkikgo kakni. Tala tiku liwana lakapastaknan nikaj malakpuwani achatum pi lakgati komo ni tatamakgaxtokgputun (Pro. 12:22).
16. ¿Tuku lakpuwankgo xalak kakilhtamaku xlakata tuku lakgayawakanit xachixku chu xatlat pero tuku wan Biblia?
16 Atanu tuku na lu xlakaskinka naʼakxilhaw wa tuku Dios kaliyawanit chatunu chatunu xalak kfamilia. Xkakilhtamaku Satanás nitlan lichuwinan tuku lakgayawakanit xachixku chu xatlat. ¿La chuna tlawa? Limaklakaskin tuku lilakgastanankan nema kaj likgalhkgamanan la chatum tlat pulalin familia chu niti kgalhakgaxmata. Pero Biblia kinkawaniyan pi xachixku wi tuku lu xlakaskinka lakgayawakanit «xchixku mpuskat, wa xpuxku mpuskat» (Efe. 5:23; 1 Cor. 11:3).
17. ¿La limasiyayaw pi lu xlakaskinka akxilhaw tuku kinkalakgayawanitan Dios kkinchikkan?
17 Kstalanina Cristo xlimaxkit tuku maklakaskinkgo xfamilia, pero komo ni kamakgtaya nakanajlanikgo Dios ni tlawama tuku xaʼakgstitum chu ni limasiya liskgalala (Deu. 6:6, 7). Wa xlakata 1 Timoteo 3:4 wan pi tiku tlakg lakgatayaputun taskujut kcongregación «ntlan namapakgsinan kxchik, chu nalimapakgsikgoy xkaman mpi wa ntu lakatitum nalakgachixkuwikgoy, chu namaxkikgoy nkakni». Komo wix tlat, akstu katlawanika uma takgalhskinin: «¿Kkatakakninani Dios kifamilia akgatunu semana?». Lu nitlan, pero klhuwa familias wa xapuskat tiku wani xchixku kakatakgalhtawakgalh xfamilia. Putum lakchixkuwin tiku tamakgaxtokgkgonit lu xlakaskinka xliʼakxilhatkan uma tuku kalakgayawakanit. Chu xapuskat na xlimakgtayat xchixku xlakata tlan namakgantaxti chuna la lakkaxwilikgonit nakgalhtawakgo.
18. ¿La tlan nakatsinikgo laktsu kamanan xaʼakgstitum tuku natlawakgo?
18 Biblia na kawani lakkamanan pi xaʼakgstitum naʼakxilhkgo tuku tlakg xlakaskinka kxlatamatkan (Ecl. 12:1). Lu tlan pi kamanan nakamaskujukan kxchikkan, katlawakgolh tuku tlantiya natlawakgo. Maski laktsinajku, uma nakamakgtaya nakatsinikgo skujkgo (Lam. 3:27). Akxni David kgawasaku xwanit katsinilh nakuentajtlawa borregos. Na katsinilh tlakgnan chu tlawa takilhtlin, uma tuku katsinilh makgtayalh xlakata tlan kskujnilh mapakgsina xalak Israel (1 Sam. 16:11, 12, 18-21). Xlikana akxni David aktsujku xwanit xkgamanan chuna la amakgapitsin, pero na lhuwa tuku katsinilh nema makgtayalh nalimalanki Jehová. Akgtum liʼakxilhtit, xlakata xkakuentajtlawa borregos chu ni lakapara ksitsi makgtayalh xlakata napulalin Israel. Lakgkgawasan, ¿wi tuku katsinipatit nema nakamakgtayayan tlakg liwana naskujnaniyatit miMalakatsukinakan chu tlakg nakalakgayawakanatit taskujut alistalh?
Ni kamalakatsaliw
19, 20. ¿Tuku ni nalakpuwanaw chu la kiliʼakxilhatkan kintaskujutkan?
19 Putum kiliskujatkan xlakata ni nalakpuwanaw pi akinin tlakg xlakaskinka nixawa amakgapitsin. Kstalaninanin Cristo ni litaxtuputunkgo la «tiku nikxni tlaway tuku nitlan» (Ecl. 7:16). Akxni paxuwayaw kinkamakgtayayan akxni kgalhiyaw taʼakglhuwit, max kkinchikkan, kkimputaskujutkan o kcongregación. Nachuna ni nakalichuwinanaw kifamiliajkan, komo chuna natlawayaw max natlawa pi naʼanan taʼakglhuwit. Kcongregación na kilikatsinitkan nakatalitsinaw kinatalankan chu nalipaxuwayaw akxni akxtum katawilaw. Pero, akxni nakatachuwinanaw chu kamasiyaniyaw, putum kilhtamaku nakamatliwakglhaw kinatalankan (2 Cor. 13:10; Efe. 4:29).
20 Uma kakilhtamaku ni kgalhakgaxmata Jehová nipara xlimapakgsin. Pero akinin xaxlikana kstalaninanin Cristo kgalhakgaxmataw chu ni makgxtakgaw. ¡Lu lipaxuw pi makgtapakgsiyaw kkachikin tiku “xaʼakgstitum” skujnanikgo Jehová! Xlikana, la uku liwana lakapastaknitaw xaʼakgstitum nalatamayaw chu nakakninaniyaw Dios.
¿La xkgalhtinanti?
• ¿Tuku xlakata nalakgmakganaw chuna la lakpuwankgo uma kakilhtamaku?
• ¿Tuku tlan natlawayaw xlakata xaʼakgstitum naskujnaniyaw Dios chu na napaxuwayaw?
• ¿La akxilha kstalanina Cristo tiku akgstitum skujni Dios, taskujut nema lakgayawakanit?
• ¿Tuku xlakata lu xlakaskinka tlan nakalikatsiniyaw kifamiliajkan chu natalan xalak congregación?
[Takgalhskinin]
[Epígrafe xla página 15]
Lakchixkuwin tiku tamakgaxtokgkgonit xlimaxkitkan tuku maklakaskinkgo xfamilia chu na nakamasiyanikgo xlakata Dios
