Teŵeterani Yehova na Mtima Wose
Teŵeterani Yehova na Mtima Wose
“Vinthu vyose vyakuzirwa, . . . lutilirani kughanaghanira vinthu ivi.”—FIL. 4:8.
1, 2. Cifukwa wuli ŵanandi ŵakupenja comene vyakusanguluska, ndipo pali mafumbo wuli?
TIKUKHALA mu nyengo zinonono ndiposo zakusuzga comene. Nchakusuzga comene kuti ŵanthu awo ŵali paubwezi yayi na Yehova ŵazizipizge masuzgo gha mu “nyengo zinonono na zakusuzga” izi. (2 Tim. 3:1-5) Cifukwa cakuti ŵalije movwiri, ŵakutondeka kumazga masuzgo agho ŵakusangana nagho zuŵa na zuŵa. Ŵanandi ŵakuyezgayezga kupenja vyakusanguluska viphya mwakuti ŵaleke kwenjerwa comene na umoyo wawo.
2 Kanandi ŵanthu ŵakuŵika vyakusanguluska pa malo ghakwamba mwakuti ŵaleke kwenjerwa. Usange Mkhristu wakuleka kuŵa maso nchipusu kuwira mu cipingo ici. Kasi tingaciŵambara wuli? Kasi cikung’anamura kuti tilekerethu kusangwa? Kasi tingacita wuli kuti tiwonenge vyakusanguluska na milimo yithu mwakwenelera? Kasi ni fundo wuli za mu Malemba izo tikwenera kulondezga kuti tileke kucita vinthu mwakutalulira?
Kuzirwiska Vinthu mu Caru Ico Cikutemwa Vyakusanguluska
3, 4. Kasi Malemba ghakutovwira wuli kuti tiŵikenge mtima pa vinthu vyauzimu?
3 Nchacitima kuti caru ici cikuzirwiska comene “vyakusanguluska.” (2 Tim. 3:4) Pakuti caru cikuzirwiska comene vyakusanguluska, para tingapusa umoyo withu wauzimu unganangika. (Zinth. 21:17) Lekani mu kalata iyo mpositole Paulosi wakalembera Timote na Tito, mukaŵaso ulongozgi wa kuteŵetera Yehova na mtima wose panji kuti kuzirwiska vinthu vyauzimu. Kulondezga ulongozgi uwu kungatovwira kuti tileke kutemwa comene vyakusanguluska nga umo caru cikucitira.—Ŵazgani 1 Timote 2:1, 2; Tito 2:2-8.
4 Solomoni wakati nchiwemi kughanaghanira vinthu vyakuzirwa pa umoyo, m’malo mwa kuŵika waka mtima pa vyakusanguluska. (Muph. 3:4; 7:2-4) Pakuti umoyo ngufupi, ipo tikwenera ‘kulimbalimba comene’ kuti tizakaponoskeke. (Luka 13:24) Kuti tizakapone, tikukhumbikwira kulutilira kughanaghanira vinthu vyose ivyo ni “vyakuzirwa.” (Fil. 4:8, 9) Ici cikung’anamura kuti tikwenera kuŵa maso na cilicose ico cikukhwaska umoyo withu wauzimu.
5. Kasi ni ulongozgi wuli uwo tikwenera kuwuzirwiska?
5 Mwaciyelezgero, pakuyezga Yehova na Yesu, Ŵakhristu ŵakuzirwiska comene ulongozgi wakuti ŵalimbikirenge nchito. (Yoh. 5:17) Kanandi Ŵakhristu ŵakulumbika cifukwa ca kulimbikira nchito ndiposo kugomezgeka. Mitu ya mbumba ndiyo comene yikukhumbikwira kulimbikira nchito kuti yipwelelere mbumba zawo. Nakuti munthu uyo wakuleka kupwelelera ŵamunyumba yake ni muheni comene kuluska uyo wakuleka kusopa Yehova.—1 Tim. 5:8.
Kuzirwiska Vinthu Vyauzimu
6. Cifukwa wuli tikwenera kuzirwiska vinthu vyauzimu?
6 Nyengo zose Yehova wakuzirwiska kusopa kwaunenesko. Mwaciyelezgero, mwakuyana na Dango la Mozesi, Ŵaisrayeli ŵakasuzgikanga comene para ŵaleka kusopa Yehova. (Josh. 23:12, 13) Ŵakhristu ŵakwambilira, ŵakeneranga kulimbalimba kuti ŵavikilire kusopa kwaunenesko ku visambizgo vya cisopa cautesi na nkharo zinyake. (2 Yoh. 7-11; Uvu. 2:14-16) Mazuŵa ghano napo, Ŵakhristu ŵaunenesko ŵakulutilira kuzirwiska vinthu vyauzimu.—1 Tim. 6:20.
7. Kasi Paulosi wakacitanga wuli uteŵeti wake?
7 Uteŵeti withu wa m’munda ukutipa cimwemwe. Kweni kuti tilutilire kukondwa nawo, tikwenera kuwuzirwiska na kunozgekera. Paulosi wakalongosora umo wakaghanaghaniranga ŵanthu awo ŵakaŵasambizganga. Wakati: “Nazgoka vinthu vyose ku ŵanthu ŵa mitundu yose, mwakuti mu nthowa yiliyose niponoske ŵanji. Kweni nkhucita vinthu vyose cifukwa ca makani ghawemi, mwakuti niŵe wakusangana na ŵanji mwa igho.” (1 Kor. 9:22, 23) Paulosi wakakondwanga kovwira ŵanji mwauzimu, ndipo wakaghanaghanirangapo comene umo wangaŵawovwilira. Lekani wakaŵakhozganga na kuŵaciska kuti ŵasopenge Yehova.
8. (a) Kasi awo tikuŵasambizga tikwenera kuŵawona wuli? (b) Kasi kusambizga ŵanthu Baibolo kungatovwira wuli kuti tikondwenge na uteŵeti?
8 Kasi uteŵeti ukaŵa wakuzirwa wuli kwa Paulosi? Wakaŵa wakukhumbisiska kuteŵetera Yehova ndiposo ŵanthu awo ŵakategherezganga uthenga wake. (Rom. 12:11; 1 Kor. 9:19) Kasi tikumanya makora mulimo uwo tili nawo para tikusambizga mazgu gha Ciuta, kwali mpha maungano gha mpingo, pa Nyengo Yakusopera ya Mbumba, panji para tikucitiska sambiro la Baibolo? Mutepanji tikuwona kuti kucitiska sambiro la Baibolo ni mphingo yikuru kwa ise. Mbunenesko kuti tikukhumbikwira kujiwombolera nyengo mwakuti tiwovwire ŵanji. Kweni asi kucita nthena kukukolerana na mazgu gha Yesu ghakuti “muli kukondwa kukuru mu kupeleka kuluska mu kupokera”? (Mil. 20:35) Palije mulimo uwo ungatipa cimwemwe cikuru kuluska kusambizga ŵanji nthowa iyo yikulongozgera ku ciponosko.
9, 10. (a) Kasi kuzirwiska vinthu vyauzimu kukung’anamura kuti tileke kupumura na kucezga na ŵanyithu? Longosorani. (b) Nchivici cingawovwira kuti mulara waŵe wakukhozga ndiposo kuti ŵabali ŵafwatukenge nayo?
9 Kuzirwiska panji kuti kuŵika mtima pa vinthu vyauzimu kukung’anamura kuti tileke kusangwa na ŵanyithu yayi. Yesu wakaŵanga na nyengo ya kusambizga, kweniso wakapumuranga na kucezga na ŵanji. (Luka 5:27-29; Yoh. 12:1, 2) Kuŵika mtima pa vinthu vyauzimu kukung’anamura kuti tileke kukondwa yayi. Yesu waŵenge wambura kukondwa, ŵanthu ŵakatenge ŵamulondezgenge yayi. Kumbukani kuti na ŵana wuwo ŵakafwatukanga nayo. (Mrk. 10:13-16) Kasi tingacita wuli kuti tiwonenge vinthu mwakwenelera nga ni Yesu?
10 Pakuyowoya za mulara munyake, mbali munyake wakati, “Wakukhumba kuti wacitenge vinthu makora, kweni wakukhazga kuti ŵanji ŵacitenge vinthu mwakufikapo yayi.” Kasi ŵanji ŵangayowoya mwakuyana waka za imwe? Nchiwemi kuleka kukhazga vinandi ku ŵanyithu. Mwaciyelezgero, ŵana ŵakucita makora para ŵapapi ŵakuŵaŵikira vilato viwemi ndiposo para ŵakuŵawovwira kuti ŵavifiske. Mwakuyana waka, ŵalara ŵangakhozga ŵanji mu mpingo kuti ŵakure mwauzimu na kuŵapa masacizgo gha umo ŵangacitira. Nakuti para mulara wakujiwona mwakwenelera, ŵanji ŵafwatukenge nayo ndipo waŵakhozgenge makora. (Rom. 12:3) Mudumbu munyake wakati: “Nkhukhumba yayi kuti mulara wawonenge cilicose mwamawara. Kweni para nyengo zose wakuŵa wambura kukondwa, mphakusuzga kufwatuka nayo.” Munyakeso wakati wakuwona kuti ŵalara ŵanyake “ŵangawoneka ŵakofya cifukwa cakuti nyengo zose ŵakuwoneka ŵambura kukondwa.” Ŵalara ŵaleke kutimbanizga cimwemwe ico Ŵakhristu ŵakwenera kuŵa naco pa kusopa Yehova, “Ciuta wakukondwa.”—1 Tim. 1:11.
Zomerani Milimo mu Mpingo
11. Kasi “kunwekera” milimo mu mpingo kukung’anamuraci?
11 Apo Paulosi wakaciskanga ŵanalume mu mpingo kuti ŵalimbikirenge mwakuti ŵaŵe ŵakwenelera milimo yakusazgikira, cilato cikaŵa cakuti ŵafiske makhumbiro ghawo yayi. M’malo mwake wakalemba kuti: “Usange munthu wakunwekera mulimo wa ulaŵiliri, wakukhumba mulimo uwemi.” (1 Tim. 3:1, 4) Ŵanalume Ŵacikhristu awo “ŵakunwekera” ŵakwenera kufwilirapo kufiska mikhaliro yauzimu mwakuti ŵateŵetere ŵabali ŵawo. Usange pajumpha cilimika cimoza kufuma apo mbali wakabapatizikira, ndipo wakufiska ivyo lemba la 1 Timote 3:8-13 likuyowoya kuti munthu waŵe muteŵeti wakovwira, ŵalara ŵangasacizga kuti wimikike pa mulimo uwu. Wonani kuti vesi 8 likuti: “Ŵateŵeti ŵakovwira nawo ŵakwenera kuŵa ŵambura mawara.”
12, 13. Yowoyani umo ŵabali ŵawukirano ŵangalongolera kuti ŵakunwekera milimo.
12 Usange ndimwe mbali wakubapatizika ndipo muli pafupi kukwaniska vilimika 20, kasi mukuŵikapo mtima pa vinthu vyauzimu? Pali nthowa zinandi izo mungalongolera kuti mukunwekera milimo mu mpingo. Nthowa yimoza njakuti mucitengeko mwakukwana uteŵeti wa m’munda. Kasi mukutemwa kwenda na ŵanthu ŵa misinkhu yose mu uteŵeti wa m’munda? Kasi mukuyezgayezga kusanga munthu wakuti musambire nayo Baibolo? Musazgirengeko luso lwinu lwa kusambizga usange mukulondezga masacizgo agho tikusambira pa maungano. Nakuti mulengerenge lusungu uyo wakusambira nthowa za Yehova. Para msambiri wawona kuti wakukhumbikwira kusintha vinthu vinyake, mumovwirenge mwakuzika ndiposo mwavinjeru kuti walondezge fundo za mu Baibolo.
13 Imwe ŵabali ŵawukirano, koleranani na ŵalara mu mpingo, ndipo jipelekani kovwirapo apo pakukhumbikwira wovwiri. Mungawovwirapo kuti Nyumba ya Ufumu yiwonekenge yakutowa. Usange mukujipeleka kuti movwirepo, mukulongora kuti mukuzirwiska uteŵeti winu. Nga ni Timote, namwe mungapwelelera nadi vyakukhumbikwa mu mpingo.—Ŵazgani Ŵafilipi 2:19-22.
14. Kasi ŵabali ŵawukirano ‘ŵangayezgeka’ wuli usange mbakwenelera kuteŵetera mu mpingo?
14 Ŵalara, mukwenera kuŵapa mulimo ŵabali ŵawukirano awo ŵakuyezgayezga kucimbirako “ku makhumbiro agho ghakwiza na uwukirano” ndipo ŵakulondezga “urunji, cipulikano, citemwa, mtende,” ndiposo mikhaliro yinyake yiwemi. (2 Tim. 2:22) Para mukuŵapa vyakucita mu mpingo, ‘ŵangayezgeka usange mbakwenelera’ kucita uteŵeti, mwakuti ‘ŵanthu wose ŵawone umo ŵakukulira.’—1 Tim. 3:10; 4:15.
Kuzirwiska Vinthu mu Mpingo Ndiposo mu Mbumba
15. Mwakuyana na 1 Timote 5:1, 2, kasi tingalongora wuli kuti tikuzirwiska ŵanji?
15 Kuzirwiska vinthu vyauzimu kukusazgapo kucindika ŵabali na ŵadumbu ŵithu. Wonani ulongozgi uwo Paulosi wakaphalira Timote uwo ukulongora kuzirwa kwa kucindika ŵanji. (Ŵazgani 1 Timote 5:1, 2.) Ulongozgi uwu ngwakuzirwa, comenecomene para tikucita vinthu na ŵanthu awo mbanalume panji ŵanakazi ŵanyithu yayi. Tingayezga Yobu uyo wakacindikanga ŵanakazi, comenecomene muwoli wake. Wakaŵikapo mtima kuti waleke kudodoliska mwanakazi munyake na cilato ciheni. (Job 31:1) Para tikucindika ŵabali na ŵadumbu, tizamucita nawo milangwe yabweka yayi panji kucita cilicose ico cingapangiska kuti ŵaleke kufwatuka nase. Kucindikana nkhwakuzirwa, comenecomene usange mwanalume na mwanakazi ŵali pa cibwezi na cilato cakuti ŵatoranenge. Mkhristu waunenesko wazamuseŵereskapo yayi maghanoghano gha ŵanji, comenecomene gha uyo ni mwanalume panji mwanakazi munyake yayi.—Zinth. 12:22.
16. Yowoyani mphambano pakati pa umo caru cikuwonera mfumu na umo Malemba ghakulongosolera mulimo wake.
16 Tikweneraso kuŵa maso kuti tilutilire kuzirwiska milimo iyo Ciuta wali kutipa mu mbumba. Caru ca Satana cikuyuyura mulimo wa mutu wa mbumba. Cikupanga vyakusanguluska ivyo vikuyuyura mutu wa mbumba na kumutora nga nchichwapi cawakawaka. Ndipouli, Malemba ghakuzirwiska comene mulimo wa mfumu, ghakuti ndiyo ni “mutu wa muwoli wake.”—Efe. 5:23; 1 Kor. 11:3.
17. Kasi ivyo tikucita na Nyengo Yakusopera ya Mbumba vikulongora kuti tikuzirwiska milimo yithu? Longosorani.
17 Mfumu wangaŵa kuti wakupwelelera mwakuthupi mbumba yake. Kweni para wakutondeka kuyipwelelera mwauzimu, wakulongora kuti walije vinjeru ndipo wakughanaghana makora yayi. (Dute. 6:6, 7) Lemba la 1 Timote 3:4 likuti usange ndimwe mutu wa mbumba ndipo mukunwekera mauteŵeti ghakusazgikira mu mpingo, mukwenera ‘kulongozga makora ŵamunyumba yinu, ndipo muŵe na ŵana ŵakujilambika na mtima wose.’ Jifumbani kuti, ‘Kasi nyengo zose nkhuŵa na nyengo yakusopera mu mbumba yane?’ Ŵafumu ŵanyake awo Mbakhristu kanandi ŵawoli ŵawo ndiwo ŵakuŵakumbuska kuti ŵalongozge vinthu vyauzimu. Mfumu waliyose wakwenera kuzirwiska comene mulimo uwo wali nawo. Muwoli Wacikhristu nayo wakwenera kukhozgera Nyengo Yakusopera ya Mbumba na kukolerana na mfumu wake kuti vinthu vyendenge makora.
18. Kasi ŵana ŵangasambira wuli kuzirwiska vinthu vyakuzirwa?
18 Ŵana ŵakuciskika kuti ŵaŵikenge mtima pa vinthu vyakuzirwa comene. (Muph. 12:1) Nchiheni yayi kuti ŵana ŵasambirenge kugwira nchito mwakulimbikira pa nyumba, mwakuyana na msinkhu ndiposo maluso ghawo. (Cit. 3:27) Apo Davide wakaŵa msepuka, wakasambira kuliska makora viŵeto. Wakasambiraso kwata na kwimba sumu, maluso agho ghakamovwira kuti waŵe muteŵeti wa themba la Israyeli. (1 Sam. 16:11, 12, 18-21) Nchakuwonekerathu kuti apo Davide wakaŵa msepuka nayo wakaseŵeranga, kweni wakasambiraso maluso ghanyake ghakuzirwa agho ghakamovwira kuteŵetera Yehova. Mulimo wa uliska uwo wakacitanga apo wakaŵa msepuka ukamovwira kuti waŵe mulongozgi muwemi wa Israyeli. Imwe ŵawukirano, kasi mukusambira maluso wuli agho ghangazakamovwirani kuteŵetera Mlengi ndiposo kuzakacita milimo yinyake?
Lekani Kutalulira
19, 20. Kasi mwaŵikapo mtima kuti mulutilirenge kucita vici?
19 Tose tingalutilira kujiwona mwakwenelera m’malo mwa kujiwona mwakutalulira. Tikukhumba yayi kuŵa ‘ŵarunji mwakujumphizga.’ (Muph. 7:16) Kusangwapo kungamazga suzgo la maghanoghano, kwali mpha nyumba, ku nchito, panji para tili na Ŵakhristu ŵanyithu. Ŵamumbumba ŵakwenera kuŵa maso comene kuti mtende na civikiliro ivyo vikuŵa pa nyumba vileke kukukurwa. Mu mpingo, tose tingasambira kusangwa na kucezga vinthu vyakukhozga ndiposo viwemi.—2 Kor. 13:10; Efe. 4:29.
20 Tikukhala mu caru ico cikuyuyura Yehova ndiposo malango ghake. Kweni ŵanthu ŵa Yehova ŵakuwona kuti kupulikira na kugomezgeka nkhwakuzirwa comene. Nchakukondweska comene kuti tili mu gulu la ŵanthu awo ŵakusopa Yehova na “mtima wose.” Tiyeni tilutilire kuŵika mtima panji kuti kuzirwiska vinthu vyauzimu ndipo tileke kuwona umoyo withu mwakutalulira.
Kasi Mungazgora Wuli?
• Cifukwa wuli tikwenera yayi kuwona vyakusanguluska nga umo caru cikuviwonera?
• Kasi tingacita wuli kuti tiŵenge ŵakukondwa uku tikuŵikapo mtima pa uteŵeti?
• Kasi tingalongora wuli kuti tikuzirwiska mulimo withu?
• Cifukwa wuli kucindikana nkhwakuzirwa mu mpingo ndiposo mu mbumba?
[Mafumbo]
[Vithuzithuzi pa peji 12]
Mfumu wakwenera kupwelelera mbumba yake mwakuthupi na mwauzimu wuwo