Tsotsuk me skʼoplal xkiltik li kabteltik ta stojolal Diose

«Jaʼuc nopic [...] scotol ti bu jaʼ ichʼbil ta muqʼue, [...] ti cʼusi lec scʼoplal ta nopele.» (FILI. 4:8, Ch)

1, 2. ¿Kʼu yuʼun ep krixchanoetik tsnopik ti chchʼaybat svokolik yuʼun li chʼayob oʼontonale, xchiʼuk kʼusitik chichʼ jakʼel ta skoj?

 MAS xa toj tsots vokolil chil avi li krixchanoetike. Ta melel, toj «xiʼbal sba [li avie], yuʼun naca vocol ta xvul ta loqʼuel». Li krixchanoetik ti mu lekuk xil sbaik xchiʼuk Jeovae mu onoʼox stsal yuʼunik li vokoliletike (2 Tim. 3:1-5, Ch). Yoʼontonuk xakʼbeik yipal ti bu kʼalal xuʼe, pe mu xuʼ yuʼunik. Jech oxal, ep buchʼutik jaʼ tsaʼik li kʼusitik ep achʼ chlokʼanuk tal sventa chchʼay-o yoʼontonike, yuʼun tsnopik ti jaʼ jech chchʼay ta sjolik li tsatsal vokoliletik tsnuptanike.

² Ta melel, kʼalal mu xa snaʼ kʼusi tspas ta xkuxlejalik li krixchanoetike jaʼ tsaʼik li chʼayob oʼontonale, vaʼun jaʼ to la jech xkuxet chaʼiik. Mi muʼyuk ta jkʼel jbatik li yajtsʼaklomutik Cristoe yikʼaluk me jaʼ xa jech xlik jchanbetik ti kʼuyelan xkuxlejalike. ¿Kʼusi skʼan jpastik sventa mu xijtsʼuje? ¿Mi yuʼun van mu xa stakʼ jchʼay koʼontontik ta jyalel? ¿Kʼusi xuʼ jpastik yoʼ ta smelolal noʼox jchʼay koʼontontik xchiʼuk ti jpastik li kʼusitik jbainojtike? ¿Kʼusi beiltaseletik ta Vivlia tskoltautik sventa tsotsuk skʼoplal xkiltik li kʼusitike, pe ti mu toj tsotsuk jtalelaltik xtoke o ti mu xa stsʼik kuʼuntik li kʼusi jsetʼ-jutebe?

Jaʼ jpastik li kʼusi tsots skʼoplale, mu jchanbetik stalelal li balumile

3, 4. ¿Kʼusi tojobtaseletik ta Vivlia tskoltautik sventa mu tajimoluk xkiltik ti chijtun ta stojolal Diose?

³ Ta melel, «jaʼ batem ta yoʼntonic o li cʼusi tscʼan [stukik]» li krixchanoetike, ti jaʼ noʼox tsnopbeik skʼoplal li chʼayob oʼontonale (2 Tim. 3:4). Mi jaʼ bat ta koʼontontik li chʼayob oʼontonal taje ta me sokesvan ta mantal (Pro. 21:17). Jaʼ yuʼun, kʼalal la stsʼiba skartatak li Pabloe te laj yalbe batel Timoteo xchiʼuk Tito ti toj tsots skʼoplal ti mu tajimoluk xilik ti chtunik ta stojolal Diose, taje jaʼ me tskoltautik ek sventa mu stsalutik li stalelal krixchanoetik ti mu tsotsuk skʼoplal chilik li kʼusitike (kʼelo 1 Timoteo 2:1, 2 xchiʼuk Tito 2:2-8).

⁴ Oy xa ta sjayibal siglo laj yal Salomón ti oy bakʼintik muʼyuk ta jchʼay koʼontontik ta skoj ti jaʼ ta jpastik li kʼusitik tsots skʼoplale (Ecl. 3:4; 7:2-4). Muʼyuk bu jal chijkuxi, jaʼ yuʼun skʼan tsots xkakʼbetik yipal sventa jta li jkolebaltike (Luc. 13:24). Sventa jech une skʼan me jchʼakbetik yorail li kʼusitik «ichʼbil ta muqʼue» (Fili. 4:8, 9, Ch). Jaʼ xkaltik, skʼan skʼel skotol li kʼusi skʼan spas ta xkuxlejal li jun yajtsʼaklom Cristoe.

5. ¿Kʼusi li kabteltik skʼan jtsaktik lek ta mukʼe?

⁵ Kʼalal tstsak lek ta mukʼ yabtelik li yajtsʼaklomtak Cristoe jaʼ me jech chchanbeik stalelal li Jeova xchiʼuk Jesuse (Juan 5:17). Ta melel, mu labaluk chkaʼitik ti chichʼik kʼupil kʼoptael li ermanoetik ta skoj ti lek stakʼ jpat koʼontontik ta stojolalike xchiʼuk ti lek snaʼ x-abtejike. Jaʼ me mas skʼan xakʼbe yipal li totile, yuʼun mi muʼyuk tsmakʼlin li yutsʼ yalale «jaʼ xjelov xchopolil jech chac cʼu chaʼal li bochʼo muʼyuc xchʼunoji[k]» Jeovae (1 Tim. 5:8).

Mu tajimoluk xkiltik li yabtel Diose, pe ta muyubajeluk me jpastik

6. ¿Kʼuxi jnaʼojtik ti skʼan mu tajimoluk xichʼ ilel li yichʼel ta mukʼ melel Diose?

⁶ Tskʼan onoʼox Jeova ti mu tajimoluk xichʼ ilel ti chijtun ta stojolale. Li j-israeletike toj ep laj yil svokolik ta skoj li kʼusi chopol la spasike,  pe muʼyuk xkoltaatik yuʼun Jeova ta skoj ti muʼyuk la xchʼunbeik li sMantal Moisese (Jos. 23:12, 13). Li yajtsʼaklomtak Cristo ta baʼyel sigloe albatik ti akʼo tsotsuk xakʼ yipalik sventa mu sokesatik yuʼun li jecheʼ chanubtasel xchiʼuk ti mu xchanik li chopol talelalile (2 Juan 7-11; Apo. 2:14-16). Jech-o chalbutik Jeova ti skʼan jpastike, ti tsotsuk skʼoplal xkiltik li yichʼel ta mukʼe (1 Tim. 6:20).

7. ¿Kʼuxi chchapan sba Pablo sventa tspasbe li yabtel Diose?

⁷ Chakʼ xkuxetel koʼontontik li abtel ta jpastik ta stojolal Diose. Skʼan me jtsaktik lek ta mukʼ li kabteltike xchiʼuk ti jchapan jbatik lek mi ta jkʼantik xkuxet-o koʼontontike. Jkʼeltik avil li kʼusi la spas Pabloe, yuʼun te onoʼox ta sjol kʼuyelan li krixchanoetik chbat xchanubtase. Xi laj yale: «Ta jpas scotol cʼu yepal xuʼ cuʼun ta stojol scotolic, yuʼun jech oy bochʼotic xuʼ chcolic. Jech ta jpas ta sventa li Lequil Aʼyeje, yuʼun jech coʼol oy cʼusi lec ta jta jchiʼuc li bochʼotic ta xchʼunique» (1 Cor. 9:22, 23). Kʼupil tajek chaʼi Pablo kʼalal tskolta ta mantal li krixchanoetike xchiʼuk tsnop lek kʼusi xuʼ spas sventa tskoltaan ta jujuntal. Jaʼ me jech tstijbe yoʼonton krixchanoetik sventa xtunik ta stojolal Jeova kʼalal jech tspase.

8. 1) ¿Kʼu yelan skʼan jtalelaltik ta stojolal li krixchanoetik ta jchanubtastike? 2) ¿Kʼu yuʼun chakʼ tajek muyubajel kʼalal chkakʼtik chanubtasel ta Vivliae?

⁸ Tsots skʼoplal laj yil spasbel yabtel Dios li Pabloe. Yuʼun oy onoʼox ta yoʼonton chtun ta stojolal Jeova xchiʼuk chtun ta stojolal li krixchanoetik ti lek chaʼiik mantale (Rom. 12:11; 1 Cor. 9:19). Li voʼotik eke oy ta jbatik ti xijchanubtasvan ta sKʼop Dios, xijbat ta naetik sventa xijchanubtasvan, chketʼestik junuk mantal ta Salon sventa Tsobobbail o ta jchantik Vivlia ta utsʼ-alalil. ¿Mi xkaʼibetik lek smelolal kʼusi jbainojtik ta stojolal li buchʼu ta jchanubtastike? Yikʼaluk van vokol chkaʼitik ti chijchanubtasvan junuk velta ta xemanae, ta skoj ti skʼan jchʼakbetik yorail ek li kʼusitik ta jpas jtuktike. Pe ¿mi mu jechuk van skʼan jpastik ta skoj ti xi laj yal Jesuse: «Jaʼ toj echʼem xcuxet yoʼnton li bochʼo ta xaqʼue; jaʼ mu sta jech li bochʼo ta xichʼe»? (Hech. 20:35.) Jaʼ jech, jaʼ noʼox chakʼ muyubajel kʼalal ta jchanubtastik krixchanoetik sventa xakʼik venta kʼuxi ta tael li kuxlejal sbatel osile.

9, 10. 1) ¿Mi jaʼ van skʼan xal ti mu xa stakʼ xijtseʼin o ti mu xa stakʼ junuk koʼontontik xchiʼuk yantik ta skoj ti mu tajimoluk chkiltik li spasbel yabtel Diose? 2) ¿Kʼusi chkoltaatik-o li moletik sventa stakʼikuk noʼox kʼoponel xchiʼuk ti lekuk yoʼontonike?

⁹ Kʼalal chkaltik ti maʼuk tajimol chkiltik ti chijtun ta stojolal Diose maʼuk me skʼan xal ti mu xa stakʼ xijtseʼine o ti junuk koʼontontik xchiʼuk li kamigotaktike. Toj lek ta chanbel stalelal li Jesuse. Maʼuk noʼox la xchanubtas li krixchanoetike, yuʼun la sabe lek yorail sventa chkux xchiʼuk ti xojtikin mas li krixchanoetike (Luc. 5:27-29; Juan 12:1, 2). Maʼuk me skʼan xal xtok ti mu xa stakʼ xijtseʼine. ¿Mi oy van buchʼu nopaj ta stojolal Cristo jechuk ti tsotsuk tajek stalelale o ti jpʼel xa xale? Mu jechuk stalelal taje. Yuʼun jun yoʼontonik ta stojolal Jesús ek li ololetike (Mar. 10:13-16). ¿Kʼuxi xuʼ jchanbetik stalelal li Jchanubtasvanej kuʼuntik ti oy noʼox smelolal kʼusi tspase?

¹⁰ Xi laj yal jun ermano ta sventa jun mole: «Tsots tspas sba ta mantal li stuke, pe muʼyuk tskʼan ti tukʼuk xa tajek stalelal li yermanotake». ¿Mi jechutik van ek taje? Melel onoʼox chaʼa, muʼyuk onoʼox chopol ti oy kʼusi ta jkʼantik akʼo spasik ti oy noʼox srasonale. Jech kʼuchaʼal liʼe, kʼalal oy kʼusi tskʼan akʼo xkʼot ta pasel yuʼun yalab xnichʼnabik li totil-meʼiletike, xmuyubajik noʼox me chakʼik persa stael li yalab xnichʼnabik mi tskoltaike. Jaʼ jech li ta tsobobbail eke, koliyal chalik li ermanoetik kʼalal kʼux ch-aʼiatik ta jujuntal yuʼun li moletike xchiʼuk ti ch-albatik kʼusi skʼan spasik sventa stsatsubik ta mantale. Pe jech xtok un, skʼan me oyuk noʼox smelolal li kʼusi tsnop ta stojolal stuk jun mole, yuʼun me jaʼ chkoltaat sventa stakʼuk noʼox kʼoponel xchiʼuk ti lekuk yoʼontone (Rom. 12:3). Xi laj yal jun ermanae: «Mu lekuk chkil ti ixtol-loʼil chilik li kʼusi chkalbe moletike, pe mas me vokol chkaʼi chbat jkʼoponik xtok un mi mu snaʼ xloʼilajike». Oy jun ermana xtoke xi  chalbe skʼoplal li moletike: «Chakʼ tajek xiʼel kʼalal jpʼel xa xal chkʼopojik xchiʼuk kʼusitik tspasike». Ta melel, mu junuk mol ti tskʼan tsmak ta be ti xmuyubaj tajek li yermano ta skoj ti chtun ta stojolal li Jeova «Dios ti echʼem slequile», jaʼ xkaltik, ti xmuyubaj noʼoxe (1 Tim. 1:11).

Viniketik ti tspasik kʼusi sbainojik ta tsobobbaile

11. ¿Kʼuxi chakʼ ta ilel jun yajtsʼaklom Cristo ti «tscʼan» oy kʼusi tsbaine?

¹¹ Kʼalal laj yalbe viniketik li Pablo ti akʼo oyuk kʼusi sbainik mas li ta tsobobbaile, maʼuk laj yalbe ti akʼo saʼik li kʼusi tskʼan stukike. Li kʼusi la skʼan laj yale jaʼ ti tsots x-abtejike, yuʼun xi laj yale: «Me oy bochʼo tscʼan ta xʼoch ta jqʼuelvanej yuʼun jcholcʼopetique, jaʼ jun lequil abtel tscʼan tspas» (1 Tim. 3:1, 4). ¿Kʼuxi chakʼ ta ilel li jun yajtsʼaklom Cristo ti «tscʼan» tsta taje? Jaʼ ti x-ayan ta yoʼonton xtun ta stojolal yermanotake xchiʼuk ti xchʼies li lekil talelaletike. Li moletike xuʼ me xalik ti xuʼ xa xichʼ biiltasel junuk ermano mi lokʼem xa junuk jabil yichʼoj voʼe xchiʼuk mi spas xa batel yuʼun li kʼusitik chichʼ kʼanel sventa x-och ta yajkoltaobba mol jech kʼuchaʼal chal ta 1 Timoteo 3:8-13. Xi jamal chal versikulo 8 ti kʼusi skʼan xichʼ pasele: «Li bochʼo ta xʼoch ta yajcoltaubbail jcholcʼopetique [moletik] tscʼan lec scʼoplalic».

12, 13. ¿Kʼusi xuʼ spas li keremetik sventa oy kʼusitik sbainik mas li ta tsobobbaile?

¹² Kerem, ¿mi avichʼoj xa voʼ xchiʼuk ti maʼuk tajimol chavil ti chatun ta stojolal Jeovae? Mi yakal xa chata avaʼleje oy ep kʼusi xuʼ xapas sventa oy kʼusitik xabain spasel li ta tsobobbaile. Jtose jaʼ ti xalokʼ mas ta chol mantale. ¿Mi chachiʼin ta chol mantal ermanoetik ti jeltos sjabilalike? ¿Mi yakal chasaʼ junuk krixchano ti chchan yaʼi Vivliae? Mi chavakʼ persa jech chachanubtasvan kʼuchaʼal chichʼ alel ta tsobajeletike, chakʼot me ta lekil jchanubtasvanej. Maʼuk noʼox taje, yuʼun chachan batel kʼuxi xuʼ xkʼuxubaj ta avoʼonton li buchʼu chachanubtase. Kʼalal chlik xa yaʼibe smelolal ti skʼan sjel batel xkuxlejal li avajchanuntak une skʼan me xavakʼ ta ilel ti oy smalael avuʼune xchiʼuk ti oy slekil avoʼonton kʼalal chakolta sventa xakʼ ta xkuxlejalik li kʼusi chal beiltaseletik ta Vivliae.

¹³ ¿Mi avalojbe ti xuʼ xakolta li ermanoetik ti oy xa sjabilalike? ¿Mi ta sjunul avoʼonton chakolta aba ta xchʼubael xchiʼuk sventa lekuk oy li Salon sventa Tsobobbaile? Mi lek xanaʼ xa-abtej xchiʼuk mi chaval ti chapas li kʼusi skʼan pasele jaʼ me te chavakʼ ta ilel ti atsakoj lek ta mukʼ li avabtel ta stojolal Diose. Xuʼ me jech atalelal kʼuchaʼal Timoteo ti ta sjunul yoʼonton la xchabi yermanotake (kʼelo Filipenses 2:19-22).

14. ¿Kʼuxi «ta xichʼic qʼuelbel yabtelic» li keremetik ta tsobobbaile?

¹⁴ Moletik ta tsobobbail, akʼbeik me yabtel li buchʼutik «[svokʼoj xa sbaik] ta sventa cʼusi stalel ta scʼupin li queremetique», ti jaʼ xa yakalik saʼel «li cʼusi tuqʼue, li xchʼunojel [oʼontonale], li cʼanvaneje, xchiʼuc ti jun [oʼontonale]» (2 Tim. 2:22). «Ta xichʼic qʼuelbel yabtelic» kʼalal tspasik li abtelaletik ta tsobobbaile. Mi lek tspasik li kʼusi ch-akʼbat sbainike «jech chil scotolic ti lec chbat [yuʼunike]» (1 Tim. 3:10; 4:15).

Lekuk me jtalelaltik ta tsobobbail xchiʼuk ta jnatik

15. ¿Kʼuxi skʼan lekuk xakʼ ta ilel stalelal ta stojolal yantik li yajtsʼaklom Cristo kʼuchaʼal chal 1 Timoteo 5:1, 2?

¹⁵ Kʼalal lek jtalelaltike te smakoj ti oyuk sbalil xkiltik li kermanotaktike xchiʼuk ti xkichʼtik  ta mukʼe, jech kʼuchaʼal laj yalbe Timoteo li Pabloe (kʼelo 1 Timoteo 5:1, 2). Pe mas to me skʼan skʼel sba kʼalal chchiʼin ta loʼil junuk ermana li jun ermanoe o kʼalal chchiʼin ta loʼil ermano li ermanae. Toj lek kʼusi chakʼ jchantik li Jobe, yuʼun skotol ora oy sbalil laj yil li antsetike, pe mas to jech la spas ta stojolal li yajnile. Tsots laj yakʼ yip sventa mu skʼel yan ants ti tskʼan xa tskʼupin yaʼie (Job 31:1, NM). Ti buchʼu lek stalelal chakʼ ta ilel ta stojolal li yermanotak xchiʼuk yermanatake muʼyuk tsloʼlabe sjol xchiʼuk muʼyuk tspas li kʼusi xuʼ chopol xaʼiike. Jech xtok, mas to me skʼan xichʼ sbaik ta mukʼ li buchʼu snopoj chikʼ sbaike. Muʼyuk me bu jecheʼ noʼox tsloʼlabe yoʼonton junuk ermano o ermana li yajtunel Dios ti lek snaʼ x-ichʼvan ta mukʼe (Pro. 12:22).

16. ¿Kʼu yelan chilbeik yabtel malalil xchiʼuk totil li krixchanoetike, pe kʼusi chal Vivlia ta sventa li vinike?

¹⁶ Jtos ti kʼusi skʼan jtsaktik lek ta mukʼ xtoke jaʼ ti kʼusi yabtel akʼbilik yuʼun Dios ta jujuntal li ta utsʼ-alalile. Li Satanase yakʼoj ta kʼexlal li kʼusi sbainoj malalil xchiʼuk li kʼusi sbainoj totile. ¿Kʼu yelan? Jaʼ ti te chyalesbat skʼoplalik ta chʼayob oʼontonal li totiletike, ti te chchopol loʼiltaatik xchiʼuk ti mu xa bu ichʼbilik ta mukʼe. Yan li Vivliae chal kaʼitik ti tsots kʼusi sbainoj li malalile, yuʼun «jaʼ jolil cʼotem yuʼun li yajnile» (Efe. 5:23; 1 Cor. 11:3).

17. ¿Kʼuxi chkakʼtik ta ilel ti jtsakojtik lek ta mukʼ li kʼusi jbainoj ta kutsʼ kalaltike?

¹⁷ Li yajtsʼaklom Cristo ti tsmakʼlin li yutsʼ yalale, pe ti jaʼ muʼyuk tsventain li kʼusitik chtun yuʼunik ta mantale muʼyuk me lek ti vaʼ yelan tspase xchiʼuk jaʼ me svinajeb ti muʼyuk pʼije (Deu. 6:6, 7). Jaʼ yuʼun chal kaʼitik 1 Timoteo 3:4 ti «[skʼan] snaʼ lec sventainel sna [li buchʼu tskʼan oy kʼusi tsbain ta tsobobbaile]; tscʼan chchanubtas lec ta xchʼunel mantal li xnichʼnabe xchiʼuc ti lec chbat stalelique». Xi me skʼan xajakʼbe aba mi totilote: «¿Mi chketʼes jujun xemana li Akʼobal sventa Yichʼel ta Mukʼ Jeova ta Kutsʼ Kalaltike?». Kʼux ta alel, pe oy antsetik ti tskʼanbeik tsots vokol smalalik sventa xlokʼ ta yoʼonton xetʼesik li chanun ta utsʼ-alalile. Skʼan me stsakik ta mukʼ li kʼusi tsots sbainojik li malaliletike. Jech, skʼan onoʼox me skolta smalal li ermana sventa xchanunajike.

18. ¿Kʼusi xuʼ kak xchanik ta spasel yoʼ stsakik ta mukʼ kʼusitik tsots skʼoplal li ololetike?

¹⁸ Li Vivliae chalbe alab-nichʼnabiletik ti skʼan me stsakik lek ta mukʼ li kʼusitik tsots skʼoplal ta kuxlejale (Ecl. 12:1). Lek me kʼalal tspasik jsetʼ-juteb abtelaletik ta yutna li ololetike, ti chichʼ tsakbel ta mukʼ li sjabilalike xchiʼuk ti kʼusi xtojobik spasele. Vaʼun jaʼ me jech ta sbikʼtal noʼox chchanik yoʼ xakʼbeik yipal li abtele (Lam. 3:27). Kʼalal bikʼit toʼox li Davide la xchan xchabiel chij. La xchan stijel son xchiʼuk la stsʼibabe sletrail, ti vaʼ yelan kʼusitik xtojob ta spasele jaʼ bat tunuk-o ta stojolal li ajvalil ta Israele (1 Sam. 16:11, 12, 18-21). Melel onoʼox ti lek snaʼ xtajin kʼuchaʼal yan ololetike, pe jech xtok un, oy kʼusitik la xchan ti ep sbalil sventa jaʼ la skʼupil kʼopta-o Jeova ta mas tsʼakale. Jech  kʼuchaʼal liʼe, kʼalal laj yakʼ ta ilel ti oy smalael yuʼun ta xchabiel li xchije, jaʼ itun yuʼun kʼalal la sbeiltas li Israele. Kerem-tsebetik, ¿mi oy kʼusitik yakaloxuk xchanel sventa xatunik lek ta stojolal li Jpasvanej avuʼunike xchiʼuk ti oy kʼusitik xabainik ta tsʼakale?

Oyuk noʼox smelol li jtalelaltike

19, 20. ¿Kʼu yelan skʼan xkil jba jtuktik xchiʼuk kʼu yelan skʼan xkiltik li kabteltik ta stojolal Diose?

¹⁹ Jkotoltik me skʼan xkakʼbetik yipal ti mu xkichʼ jbatik tajek ta mukʼe, jaʼ xkaltik, ti mu tsotsuk jkʼoplal xkil jba jtuktike. Mi junuk yajtsʼaklom Cristo tskʼan «ti toj tu[kʼ]» xaʼi sbae (Ecl. 7:16). Kʼalal chlik jutuk kʼop ta jnatik, ta kabteltik xchiʼuk li ta tsobobbaile jaʼ me chkoltavan kʼalal lek jnaʼ xijkʼopojutik xchiʼuk ti xijtseʼin noʼoxe. Jech xtok, sventa mu sok ti jun koʼontontike mu me stakʼ jchopol kʼopta li kutsʼ kalaltike. Skʼan me xijtseʼin xchiʼuk li kermanotaktik ta tsobobbaile xchiʼuk ti xijmuyubajuk noʼox xchiʼukike. Jech xtok un, skʼan me mu xchibajesvan li jkʼopojeltike xchiʼuk ti kʼuyelan chijchanubtasvane yuʼun skʼan me spat oʼontonal ti kʼuyelan ta jpastike (2 Cor. 13:10; Efe. 4:29).

²⁰ Li krixchanoetik avie muʼyuk bu stsakojik ta mukʼ Jeova mi jaʼuk li smantaltake. Yan li yajtsʼaklomutik Cristoe ta jkʼan ta jchʼunbetik smantal xchiʼuk ti tukʼuk koʼontontik ta stojolale. ¡Jaʼ jun muyubajel chkaʼitik ti jmoj chijtun ta stojolal Jeova xchiʼuk li buchʼutik «lec chbat stalelique»! Ta melel, tsotsuk skʼoplal xkiltik ti kʼuyelan chkichʼtik ta mukʼ Diose xchiʼuk ti kʼuyelan kuxulutike.

¿Kʼusi chatakʼ?

• ¿Kʼu yuʼun skʼan mu jchanbetik stalelal li krixchanoetik ti mu tsotsuk skʼoplal chilik li kʼusitike?

• ¿Kʼusi skʼan jpastik sventa mu tajimoluk xkiltik ti chijtun ta stojolal Diose pe ti ta muyubajeluk jpastik xtoke?

• ¿Kʼu yelan chil kʼusitik sbainoj li yajtsʼaklom Cristo ti tsakvanem lek ta mukʼe?

• ¿Kʼu yuʼun toj tsots skʼoplal ti xkichʼtik ta mukʼ li kutsʼ kalaltik xchiʼuk kermanotaktike?

[Sjakʼobiltak sventa xchanobil]

[Lokʼol ta pajina 12]

Skʼan smakʼlin yutsʼ yalal li malalile xchiʼuk sventain li kʼusitik chtun yuʼunik ta mantale