Seryosoha an Imo Pag-alagad kan Jehova
Seryosoha an Imo Pag-alagad kan Jehova
“An ngatanan nga harangdon [“seryoso,” NW], . . . paghunahunaa niyo ini nga mga bagay.”—FIL. 4:8.
1, 2. Kay ano nga damu yana an diri seryoso ha kinabuhi, ngan ano nga mga pakiana an nabangon?
NAIEKSPERYENSYAHAN naton yana an usa han pinakamakuri ngan pinakamakasurubo nga mga panahon ha kasaysayan. An mga tawo nga diri duok kan Jehova nakukurian gud nga atubangon inin “magpakalilisang nga mga panahon.” (2 Tim. 3:1-5) Nalalamposan nira an adlaw-adlaw nga pagkinabuhi pinaagi la han ira kalugaringon nga pangalimbasog kondi diri nasusulbad an ngatanan nira nga problema. Salit damu an pirme namimiling hin iba-iba nga klase hin kaliawan basi mangalimtan an ira mga kasub-anan.
2 Ha pangalimbasog nga malamposan an mga problema, agsob nga gin-uuna han mga tawo an kaliawan. Kon diri mag-iikmat, an mga Kristiano madali maimpluwensyahan hito nga disposisyon. Paonan-o naton ito malilikyan? Kinahanglan ba kita magin seryoso pirme? Paonan-o kita magigin timbang may kalabotan ha kaliawan ngan ha aton mga responsabilidad? Ano nga mga prinsipyo ha Biblia an sadang maggiya ha aton basi magin prayoridad naton an importante nga mga butang pero diri liwat kita magin sobra kaseryoso?
Magin Seryoso ha Kalibotan nga Nahigugma ha Kaliawan
3, 4. Paonan-o kita ginbubuligan han Kasuratan nga pabilhan an panginahanglan nga magin seryoso?
3 Sobra nga ginpapabilhan hini nga kalibotan an ‘gugma ha kalipayan.’ (2 Tim. 3:4) Ito nga disposisyon mahimo makadaot han aton espirituwalidad. (Prob. 21:17) Salit angayan la nga ha mga surat ni apostol Pablo kan Timoteo ngan kan Tito, nagsagdon hiya mahitungod han pagin “maligdong,” o seryoso. An pag-aplikar hito mabulig ha aton nga diri magpaimpluwensya ha diri seryoso nga pagtagad han kalibotan ha kinabuhi.—Basaha an 1 Timoteo 2:1, 2; Tito 2:2-8.
4 Mga siglo antes pa hito, hi Salomon nagsurat nga mas maopay nga hunahunaon an seryoso nga mga butang imbes nga hunahunaon pirme an kaliawan. (Ekles. 3:4; 7:2-4) Oo, tungod kay halipot la an kinabuhi, kinahanglan ‘manalinguha’ gud kita basi maluwas. (Luk. 13:24) Salit kinahanglan hunahunaon naton pirme an mga butang nga “harangdon” o seryoso. (Fil. 4:8, 9) Karuyag sidngon, sadang naton usisahon hin maopay an tagsa nga bahin han aton pagkinabuhi sugad nga Kristiano.
5. Ano an usa nga bahin han kinabuhi nga sadang naton seryosohon?
5 Pananglitan, ha pagsubad kan Jehova ngan kan Jesus, ginsiseryoso han mga Kristiano an ira responsabilidad nga magin maduruto ha trabaho. (Juan 5:17) Sugad nga resulta, agsob nga gindadayaw hira tungod han pagin maduruto ngan masasarigan. Importante labi na ha mga ulo han pamilya nga maduruto nga magtrabaho basi maitagana an panginahanglan han ira pamilya. Kay ha pagkamatuod, an diri pagtagana han materyal nga panginahanglan han pamilya pariho han pagsalikway kan Jehova!—1 Tim. 5:8.
Seryoso Pero Malipayon ha Aton Pagsingba
6. Ano nga mga ehemplo an nagpapakita nga sadang naton seryosohon an aton pagsingba kan Jehova?
6 Tikang pa hadto, importante gud kan Jehova nga singbahon hiya ha husto nga paagi. Pananglitan, an mga Israelita nakaeksperyensya hin magraot nga resulta han binaya hira ha pagsingba kan Jehova. (Jos. 23:12, 13) Ha siyahan nga siglo K.P., an mga sumurunod ni Kristo kinahanglan mangalimbasog gud nga tipigan an tinuod nga pagsingba nga limpyo ha nakakadaot nga mga katutdoan ngan disposisyon. (2 Juan 7-11; Pah. 2:14-16) Yana, ginsiseryoso liwat han tinuod nga mga Kristiano an ira pagsingba.—1 Tim. 6:20.
7. Paonan-o hi Pablo nangandam para ha iya ministeryo?
7 An aton ministeryo nakakapalipay gud ha aton. Kondi basi matipigan ito nga kalipay, kinahanglan hunahunaon naton ito hin maopay ngan abanse nga mangandam. Iginsaysay ni Pablo kon paonan-o niya gintagad an mga tawo nga iya gintutdoan. Hiya nagsiring: “Nahimo ako ha ngatanan nga mga butang, tungod ha ngatanan nga mga tawo, basi nga ha ngatanan nga paagi maluwas ko an iba. Ngan ginbubuhat ko an ngatanan nga mga bagay tungod ha Maopay nga Sumat, basi hiangbit man ako ha ira.” (1 Kor. 9:22, 23) Nalipay hi Pablo nga buligan an mga tawo ha espirituwal, ngan ginhunahuna niya hin maopay kon paonan-o niya maihahatag an espisipiko nga panginahanglan han iya mamarati. Salit naaghat niya hira ngan napagios nga magsingba kan Jehova.
8. (a) Paonan-o naton sadang tagdon an mga tawo nga aton gintututdoan ha ministeryo? (b) Paonan-o an pagdumara hin pag-aram ha Biblia makakabulig ha aton nga magmalipayon ha ministeryo?
8 Ano kaimportante kan Pablo an iya ministeryo? Andam hiya nga “mag-alagad” o magpauripon kan Jehova ngan ha mga namamati ha mensahe han kamatuoran. (Roma 12:11; 1 Kor. 9:19) Kon nagtututdo kita han Pulong han Dios ha mga tawo—ha pagdumara man hin pag-aram ha Biblia, ha katirok o ha Pagsingba han Pamilya—ginhuhunahuna ba naton an aton responsabilidad ha ira? Bangin nahuhunahuna naton nga an pagdumara hin pag-aram ha Biblia nakakapabug-at la ha aton. Oo, kasagaran na nga kinahanglan ibanan naton an aton panahon ha personal nga mga buruhaton basi gamiton ito ha pagbulig ha iba. Kondi diri ba uyon ito ha ginsiring ni Jesus nga ‘burobulahan pa an paghatag kay ha pagkarawat’? (Buh. 20:35) An pagtutdo ha iba kon paonan-o maluwas magriresulta hin waray kapariho nga kalipay.
9, 10. (a) An pagin seryoso ba nangangahulogan nga diri kita puydi magrelaks ngan magpahalibway upod han iba? Isaysay. (b) Ano an makakabulig ha usa nga tigurang nga magin makapadasig ngan masayon madaop?
9 An pagin seryoso diri nangangahulogan nga diri kita puydi magrelaks ngan magpahalibway upod han iba. Iginpakita ni Jesus an hingpit nga susbaranan han paggahin hin panahon diri la ha pagtutdo kondi pati na ha pagrelaks ngan pakigsangkay ha iba. (Luk. 5:27-29; Juan 12:1, 2) An pagin seryoso diri liwat nangangahulogan nga kinahanglan pirme kita seryoso pagkit-on. Kon hi Jesus istrikto ngan sobra kaseryoso, an mga tawo diri unta madaop ha iya. Kondi bisan an kabataan komportable dumaop ha iya. (Mar. 10:13-16) Paonan-o naton masusubad an pagin timbang ni Jesus?
10 May kalabotan ha usa nga tigurang, usa nga bugto an nagsiring, “Hitaas an iya suruklan para ha iya kalugaringon pero diri hiya naglalaom hin kahingpitan ha iba.” Ito ba liwat an isisiring han iba mahitungod ha imo? Husto la nga magkaada makatadunganon nga ginlalaoman ha iba. Pananglitan, an kabataan naaaghat gud kon an ira mga kag-anak naghihimo hin makatadunganon nga mga tumong ngan ginbubuligan hira nga makab-ot ito. Ha pariho nga paagi, mahimo dasigon han mga tigurang an kabugtoan nga mag-uswag ha espirituwal ngan tagan hin espisipiko nga mga suhestyon kon paonan-o bubuhaton ito. Dugang pa, kon timbang an panhunahuna han usa nga tigurang ha iya kalugaringon, magigin makapadasig hiya ngan masayon madaop. (Roma 12:3) Usa nga bugto nga babaye an nagsiring: “Nadiri ako kon an ngatanan ginhihimo la nga pataraw-an han usa nga tigurang. Pero kon pirme liwat hiya seryoso, mag-aalang ka pagdaop ha iya.” Usa pa nga bugto an nagsiring nga para ha iya may mga tigurang nga “makaharadlok daupon kay sobra hira kaseryoso.” Diri gud karuyag han mga tigurang nga maibanan an kalipay nga sadang abaton han ngatanan nga kabugtoan ha ira pagsingba kan Jehova, an “malipayon nga Dios.”—1 Tim. 1:11, NW.
Pagkarawat hin Responsabilidad ha Kongregasyon
11. Ano an ginkikinahanglan basi magkaada pribilehiyo ha kongregasyon?
11 Han gindasig ni Pablo an kalalakin-an ha kongregasyon nga mangalimbasog nga magin kwalipikado ha dugang nga responsabilidad, diri niya katuyoan nga aghaton hira nga kab-uton an ira ambisyon. Lugod, hi Pablo nagsurat: “Kon an tawo magbiling ha katungdanan han obispo [o paramangno] maopay nga buhat an iya ginbibiling.” (1 Tim. 3:1, 4) An Kristiano nga lalaki nga naruruyag magin tigurang sadang magkaada daku nga hingyap nga makultibar an mga kalidad nga ginkikinahanglan ha pagserbi ha kabugtoan. Kon an usa nga bugto nga lalaki usa ka tuig na nga bawtismado ngan nakab-ot na an Kasuratanhon nga mga kwalipikasyon ha ministeryal nga mga surugoon nga gin-unabi ha 1 Timoteo 3:8-13, puydi hiya irekomenda. Tigamni nga an bersikulo 8 espisipiko nga nasiring: “An mga diakono [o ministeryal nga surugoon] kinahanglan nga magmaligdong,” o seryoso.
12, 13. Pagsaysay hin mga paagi kon paonan-o an batan-on nga kalalakin-an mangangalimbasog pagkab-ot hin mga responsabilidad ha kongregasyon.
12 Usa ka ba nga bawtismado nga lalaki nga mga 20 anyos ngan seryoso ha pag-alagad kan Jehova? Damu an paagi ha pagkab-ot hin pribilehiyo ha kongregasyon. An usa amo an pagpauswag han imo pakigbahin ha ministeryo. Nalilipay ka ba pakig-upod ha kabugtoan ha ministeryo anoman an ira edad? Nangangalimbasog ka ba nga makabiling hin madudumarahan hin pag-aram ha Biblia? Kon ha imo pagdumara hin pag-aram ginsusunod mo an mga suhestyon nga ginhihisgotan ha mga katirok, mag-uuswag an imo abilidad ha pagtutdo. Ngan magigin mapinairon ka ha usa nga nag-aaram han mga paagi ni Jehova. Samtang nasasabtan han imo estudyante nga kinahanglan maghimo hiya hin mga pagbag-o, mahibabaro ka nga magin mapailubon ngan mataktika ha pagbulig ha iya nga iaplikar an mga prinsipyo ha Biblia.
13 Mga batan-on nga kalalakin-an, puydi kamo magpresentar nga bumulig ha bisan ano nga paagi ha mga edaran ha kongregasyon. Puydi liwat kamo bumulig ha paglimpyo ngan pagmintinar han Kingdom Hall basi pirme ito maopay pagkit-on. Kon nagpipresentar kamo ha pagbulig ha bisan ano nga paagi, iginpapakita niyo nga seryoso kamo ha iyo pag-alagad. Pariho kan Timoteo, mahibabaro kamo nga ipakita an kinasingkasing nga pagtagad ha panginahanglan han kongregasyon.—Basaha an Filipos 2:19-22.
14. Paonan-o an batan-on nga kalalakin-an ‘mapuproybahan’ kon may kapas na ba hira nga magserbi ha kongregasyon?
14 Mga tigurang, magin andam nga tagan hin toka ha kongregasyon an batan-on nga kalalakin-an nga nangangalimbasog ‘paglikay ha binatan-on nga mga pagbati’ ngan nagtitinguha han “pagkamatadong, pagtoo, paghigugma, ngan kamurayaw,” upod an iba nga mag-opay nga kalidad. (2 Tim. 2:22, Maopay nga Sumat) Hito nga paagi ‘mapuproybahan’ kon may kapas na ba hira nga magpas-an hin mga responsabilidad, basi an ira “kauswagan mahipahayag ha ngatanan.”—1 Tim. 3:10; 4:15.
Magin Seryoso ha Kongregasyon ngan ha Pamilya
15. Sumala ha 1 Timoteo 5:1, 2, paonan-o naton maipapakita an pagin seryoso ha aton pagtratar ha iba?
15 Nahiuupod ha pagin seryoso an paghatag hin dignidad ha aton kabugtoan. Ha sagdon ni Pablo kan Timoteo, iya ginhisgotan an panginahanglan nga ipakita an pagtahod ha iba. (Basaha an 1 Timoteo 5:1, 2.) Importante ini labi na ha pakig-upod ha diri kapariho an sekso. Maopay gud subaron an susbaranan ni Job ha paghatag hin dignidad ha kababayin-an, labi na ha iya asawa. Nangalimbasog gud hiya nga diri magkita nga may kaipa ha iba nga babaye. (Job 31:1) Kon seryoso kita ha pagtratar ha aton kabugtoan, diri kita mapikat ha ira o magbubuhat hin bisan ano nga magigin hinungdan nga diri hira magin komportable ha pakig-upod ha aton. An pagpakita hin dignidad importante labi na ha mag-uyab. An Kristiano nga seryoso ha iya pag-alagad diri gud magmumulay ha emosyon han iba.—Prob. 12:22.
16. Ano an kaibahan han pagtagad han kalibotan ha papel han bana ngan tatay ha ginsisiring han Biblia may kalabotan hito?
16 Kinahanglan pirme liwat naton seryosohon an hatag ha aton han Dios nga responsabilidad ha pamilya. Ginmiminos han kalibotan ni Satanas an papel han bana ngan tatay. Iginpapakita han mga salida ngan sine nga an ulo han pamilya baga hin angay la yaangyaangan ngan diri tahuron. Kondi ginpapabug-atan han Kasuratan nga an bana may daku nga responsabilidad ngan gintokahan hiya nga “ulo han asawa nga babaye.”—Efe. 5:23; 1 Kor. 11:3.
17. Isaysay kon paonan-o maipapakita han aton pakigbahin ha pagsingba han pamilya nga seryoso kita ha aton mga responsabilidad.
17 An bana sadang magtagana han materyal nga panginahanglan han iya pamilya. Kondi kon diri niya mangnoan an ira espirituwal nga panginahanglan, iginpapakita hito nga diri hiya maaramon. (Deut. 6:6, 7) Salit an 1 Timoteo 3:4 nasiring nga kon ulo ka han pamilya ngan nangangalimbasog nga magkaada dugang nga pribilehiyo ha kongregasyon, kinahanglan ‘gindadara mo hin maopay an imo panimalay, ngan an imo mga anak masinugtanon ha bug-os nga kaligdong.’ May kalabotan hini, pakianhi an imo kalugaringon, ‘May-ada ba ako regular nga eskedyol ha pagdumara han pagsingba han pamilya?’ An iba nga asawa haros makimalooy na ha ira bana nga manguna ha espirituwal nga mga buruhaton. An bana sadang maghunahuna hin maopay kon paonan-o niya gintatagad ini nga responsabilidad. Syempre, kinahanglan suportahan han Kristiano nga asawa an kahikayan nga Pagsingba han Pamilya ngan makigkooperar ha iya bana basi magin malampuson ito.
18. Paonan-o an kabataan mahibabaro ha pagin seryoso?
18 An kabataan gin-aaghat liwat nga magin seryoso. (Ekles. 12:1) Maopay nga mahibaro hira ha pagin maduruto ngan pagbulig ha mga buruhaton ha balay nga angay ha ira edad ngan abilidad. (Pagta. 3:27) Han bata pa hi Hadi David, nahibaro hiya nga magin maopay nga magbarantay hin karnero. Nahibaro liwat hiya nga magin musikero ngan paragkomposo, nga tungod hito nagserbi hiya ha hadi han Israel. (1 Sam. 16:11, 12, 18-21) Sigurado nga han bata pa hi David nag-uuyag hiya, pero nahibaro liwat hiya hin mapulsanon nga mga abilidad nga ha urhi nagamit niya pagdayaw kan Jehova. An iya abilidad sugad nga magbarantay hin karnero nakabulig ha iya nga magin mapailubon ha panguna ha nasud han Israel. Mga kabataan, ano nga mga buruhaton an iyo gin-aadman nga mabulig ha iyo ha pag-alagad ha iyo Maglalarang ngan magagamit ha iyo mga responsabilidad ha tidaraon?
Magin Timbang
19, 20. Ano nga timbang nga pagtagad ha imo kalugaringon ngan ha imo pagsingba an determinado ka nga pirme ipakita?
19 Karuyag naton mangalimbasog nga magkaada timbang nga panhunahuna ha aton kalugaringon ngan diri magin sobra kaseryoso. Diri naton karuyag nga ‘magpalabi hin pagkamatadong.’ (Ekles. 7:16) An pagpatawa mahimo makawara han tensyon, ha balay man, ha trabaho, o ha pakig-upod ha kabugtoan. Sadang mag-ikmat an mga membro han pamilya nga diri magin sobra kakritiko basi diri mawara an kamurayawan ha panimalay. Ha kongregasyon, an ngatanan puydi magkarisyo ngan malipay ha pakig-upod ha usa kag usa, ngan pirme himoon nga makaparig-on ngan positibo an aton pag-iristorya ngan paagi han pagtutdo.—2 Kor. 13:10; Efe. 4:29.
20 Nagkikinabuhi kita ha kalibotan nga diri nagpapabili kan Jehova ngan ha iya mga balaud. Kondi an katawohan ni Jehova seryoso gud ha ira pagsugot ngan pagkamaunungon ha ira Dios. Makalilipay gud nga magin bahin han sugad kadaku nga grupo han katawohan nga seryoso nga nagsisingba kan Jehova! Hinaot magin determinado kita nga pirme seryosohon an aton pagtagad ha aton kinabuhi ngan pagsingba.
Ano an Imo Baton?
• Kay ano nga diri kita sadang magpaimpluwensya ha diri seryoso nga pagtagad han kalibotan ha kinabuhi?
• Paonan-o kita magigin malipayon kondi seryoso ha aton ministeryo?
• Paonan-o an aton pagtagad ha aton responsabilidad magpapakita kon seryoso kita o diri?
• Isaysay kon kay ano nga seryoso nga butang an paghatag hin dignidad ha kabugtoan ngan ha aton kapamilya.
[Mga Pakiana]
[Mga Retrato ha pahina 12]
An bana kinahanglan magtagana han materyal ngan espirituwal nga panginahanglan han iya pamilya
