Ke Maʼuhiga Tāfito Kiā Tātou Te Fakahoko ʼo Totatou ʼu Maʼua ʼAē ʼi Te Tauhi Kiā Sehova
Ke Maʼuhiga Tāfito Kiā Tātou Te Fakahoko ʼo Totatou ʼu Maʼua ʼAē ʼi Te Tauhi Kiā Sehova
“Ke kotou vakavakaʼi fakalelei pe koteā te ʼu meʼa ʼaē ʼe maʼuhiga tāfito age.”—FILP. 1:10.
1, 2. Koteā ʼaē ʼe tupu ai te haga fakamuʼamuʼa tuʼumaʼu pē e te hahaʼi tokolahi ʼi te mālamanei te ʼu fakafiafia, pea ʼe malaga ʼaki ai te ʼu fehuʼi fea?
ʼE TOU māʼuʼuli nei ʼi he temi ʼe kua faigataʼa age te maʼuli pea mo fakaʼofaʼofa ʼaupitō age. Ko te hahaʼi ʼaē ʼe mole natou ʼiloʼi lelei ia te ʼAtua, ʼe lagi mata faigataʼa anai kiā nātou ia “te ʼu temi maʼuhiga ʼaupitō pea mo faigataʼa” ʼaenī. (2 Tim. 3:1-5) ʼAki pē ia tonatou ʼu mālohi fakatagata ʼe natou faiga ke natou tauʼi tonatou ʼu faigataʼaʼia, kae ʼi te agamāhani ʼe mole natou lava fakatokatoka fuli tonatou ʼu fihifihia. Koia ʼi tanatou faiga ʼaē ke mole liliu ʼo mamafa fau kiā nātou te ʼu faʼahi ʼaia, tokolahi ʼe natou faiga leva ke natou fakafiafia ʼi te temi fuli pē moʼo fakafīmālieʼi tonatou ʼu loto.
2 Moʼo fakafīmālieʼi ia tonatou maʼuli tuʼania ʼaē ʼi te ʼaho fuli, ʼe fakamuʼamuʼa tuʼumaʼu pē e te hahaʼi tonatou holi ʼaē ki te ʼu fakafiafia. Kapau ʼe mole nonofo tōkakaga te kau Kilisitiano kiai, pea ʼe faigafua pē anai hanatou tō ki te taʼi faʼahiga maʼuli ʼaia. Koteā ʼaē ʼe tou lava fai ke mole tou tō ki te taʼi faʼahiga maʼuli ʼaia? ʼE fakaʼuhiga anai koa ʼe mole kei feala hatatou fakafiafia? Koteā ʼaē kā tokoni mai kiā tātou ke tou maʼu he aga fakapotopoto ʼo ʼuhiga mo te ʼu fakafiafia pea mo totatou ʼu maʼua ʼaē ke tou fakahoko? Ko te ʼu pelesepeto Fakatohi-tapu fea ʼaē kā tokoni mai anai kiā tātou ke mole tou hoha fau ki te fakahoko ʼaē ʼo totatou ʼu maʼua Fakakilisitiano?
Ke Maʼuhiga Tāfito Kiā Tātou Totatou ʼu Maʼua Fakakilisitiano Logolā Te Manako ʼa Te Mālamanei Ki Te ʼu Fakafiafia
3, 4. Koteā te tokoni ʼe foaki mai ʼi te Tohi-Tapu ke tou lava mahino ai ki te maʼuhiga tāfito ʼo tatatou fakahoko totatou ʼu maʼua Fakakilisitiano?
3 ʼE tou tokagaʼi fuli ʼe fakamaʼuhigaʼi fau e te hahaʼi te ‘fakakaumeʼa mo te ʼu fakafiafia.’ (2 Tim. 3:4) Ko te tokaga fau ʼaē ke kita maʼu hota fīmālie ʼaki te ʼu fakafiafia ʼo te mālama ʼaenī, ʼe feala ke fakatupu kovi ki totatou maʼuli fakalaumālie. (Taag. 21:17) Koia lā ʼaē ʼi tana ʼu tohi ʼaē kiā Timoteo pea mo Tito, neʼe fai e te ʼapositolo ko Paulo te tokoni ʼo ʼuhiga mo he ʼu faʼahi neʼe tonu ke tokaga fakalelei kiai te kau Kilisitiano. Kā tou maʼuliʼi te tokoni ʼaia pea ʼe feala ai anai ke mole fakahalaʼi tātou e te ʼu manatu vale ʼa te mālamanei ʼo ʼuhiga mo te maʼuli.—Lau ia 1 Timoteo 2:1, 2; Tito 2:2-8.
4 ʼI ni ʼu sēkulō ki muʼa atu, neʼe fai e Salomone tana tohi ʼe talanoa ai ki te maʼuhiga ʼaē ʼi ʼihi temi ke ʼaua naʼa kita fakamuʼamuʼa fau te ʼu fakafiafia ʼi te ʼu meʼa ʼaē ʼe maʼuhiga tāfito age ʼo te maʼuli. (Tnk. 3:4; 7:2-4) Mai tona ʼaluʼaga ʼaē ʼe nounou te maʼuli ʼo te tagata, koia ʼe tonu ai ke tou ‘faiga mālohi’ ke haofaki tātou. (Luka 13:24) Pea ki te faʼahi ʼaia, ʼe tonu ke hoko atu ia tatatou tōkakaga ʼaē ʼo vakavakaʼi ia meʼa fuli “ ʼaē ʼe maʼuhiga tāfito age.” (Filp. 1:10) Ko tona fakaʼuhiga, ke tou fakahoko fakalelei totatou ʼu maʼua fuli ʼaē ʼi totatou maʼuli Fakakilisitiano.
5. Ko te faʼahi fea ʼo te maʼuli ʼe tonu ke maʼuhiga tāfito kiā tātou?
5 Ohagē lā, ʼi tanatou faʼifaʼitakiʼi ia Sehova pea mo Sesu, ʼe maʼuhiga tāfito ki te kau Kilisitiano ia tonatou maʼua ʼaē ke natou gāue kinakina. (Soa. 5:17) Koia, ʼi te agamāhani, ʼe vikiʼi te kau Kilisitiano moʼoni e te hahaʼi heʼe natou gāue kinakina pea ʼe tuha mo nātou ia te falala ʼa te hahaʼi ʼaē kiā nātou. ʼE fakamaʼua tāfito ki te ʼu pule fāmili ke natou tōkakaga ʼo gāue mālohi moʼo taupau ia te maʼuli fakasino ʼo tonatou fāmili. ʼE mahino ia, ʼe ko te mole tokaga ʼaē ki te maʼuli fakasino ʼo tona fāmili, ʼe fakatatau ki he tahi kua ‘fakafisi . . . kiā Sehova’!—1 Tim. 5:8.
Logolā Te Lahi ʼo Totatou ʼu Maʼua Fakakilisitiano Kae ʼe Tou Fakahoko ʼAki He Loto Fiafia
6. Koteā ʼaē ʼe tou ʼiloʼi ai ʼe tonu ke maʼuhiga tāfito kiā tātou tatatou tauhi kiā Sehova?
6 ʼE maʼuhiga kiā Sehova ke tou tauhi age kiā te ia ʼaki te moʼoni. Ohagē lā, neʼe hoko te ʼu malaʼia ki te kau Iselaele ʼi te temi ʼaē neʼe natou liʼaki ai tanatou tauhi ʼaē kiā Sehova. (Sos. 23:12, 13) ʼI te ʼuluaki sēkulō ʼo totatou temi, neʼe tonu ki te ʼu tisipulo ʼa Kilisito ke natou tauʼi fakamālohi te ʼu akonaki hala pea mo te ʼu aga ʼaē ʼe kovi ke mole ʼulihi ai te tauhi moʼoni. (2 Soa. 7-11; Fakh. 2:14-16) Iā ʼaho nei, ʼe kei maʼuhiga pē ki te kau Kilisitiano moʼoni ia tanatou tauhi ʼaē kiā Sehova.—1 Tim. 6:20.
7. Neʼe feafeaʼi te teuteuʼi ʼaē e Paulo ʼo tona minisitelio?
7 ʼE tou maʼu te fiafia mokā tou fakahoko tatatou minisitelio. Kae ke feala hatatou taupau tatatou fiafia ʼi te minisitelio, ʼe ʼaoga ke tou teuteuʼi fakatomuʼa te ʼu faʼahiga palalau ʼaē kā tou fai ki te hahaʼi. Neʼe fakamahino e Paulo ia tana tokagaʼi ʼaē te ʼu meʼa ʼi te loto ʼo te hahaʼi ʼaē neʼe ina akoʼi. Neʼe ina tohi fēnei: “Kua au liliu ko meʼa fuli maʼa te hahaʼi kehekehe, ke feala ai haku haofaki niʼihi. Kae ʼe au fai ia meʼa fuli ʼuhi ko te logo lelei, ke au kau ai mo niʼihi.” (1 Ko. 9:22, 23) Neʼe fiafia Paulo ʼi tana tokoni ʼaē ki te hahaʼi ʼi te faʼahi fakalaumālie, pea neʼe ina toe fakakaukauʼi peʼe feafeaʼi anai hana foaki te ʼu meʼa ʼaē ʼe ʼaoga ki te hahaʼi, ʼaē neʼe fakalogo ki tana ʼu faiakonaki. Koia neʼe feala ai hana fakalotomālohiʼi nātou pea mo uga nātou ke natou tauhi kiā Sehova.
8. (a) ʼE tonu ke feafeaʼi tatatou aga ki te hahaʼi ʼaē ʼe tou akoʼi ʼi totatou minisitelio? (b) ʼE tou lava maʼu feafeaʼi te fiafia ʼi totatou minisitelio mokā tou fai he ako Tohi-Tapu?
8 Neʼe maʼuhiga feafeaʼi kiā Paulo ia tona minisitelio? Neʼe fia “kaugana” kiā Sehova pea mo te hahaʼi ʼaē neʼe fakalogo ki te logo ʼo te moʼoni. (Loma 12:11; 1 Ko. 9:19) Kā tou fakahoko ia totatou maʼua ʼaē ko te akoʼi ʼo te Folafola ʼa te ʼAtua ki te hahaʼi, ʼi he ako Fakatohi-tapu, ʼi he fono, peʼe ʼi te Tauhi Fakafāmili, ʼe tou mahino lelei koa ʼi te ʼu lakaga ʼaia ki te maʼuhiga ʼaē ʼo te gāue ʼe tou lolotoga fai kiā nātou ʼaē ʼe tou akoʼi? ʼE lagi kiā tātou, ʼe mamafa fau tatatou fai tuʼumaʼu ʼaē ʼo he ako Fakatohi-tapu ʼa he tahi. ʼE moʼoni, heʼe ʼi te agamāhani ʼe tonu ke tou toʼo he temi mai tatatou ʼu gāue takitokotahi pea ke tou fakaʼaogaʼi totatou temi ʼaia moʼo tokoni ki te hahaʼi. Kae ʼe mole ʼalutahi koa lā te taʼi fakatuʼutuʼu ʼaia mo te ʼu folafola ʼa Sesu ʼaē neʼe ina ʼui fēnei: “ ʼE lahi age te fiafia ʼi takita foaki, ʼi takita tali”? (Gāue 20:35) Ko tatatou akoʼi te ala ʼo te maʼuli ki te hahaʼi, ʼe tou maʼu ai te fiafia ʼaē ʼe mole tou maʼu ʼi he tahi age gāue.
9, 10. (a) Ko tatatou tōkakaga fakalelei ʼaē ʼo fakahoko ia totatou ʼu maʼua, ʼe fakaʼuhiga koa ʼe mole kei tou fakaʼaogaʼi hotatou temi ke tou fakafiafia ai pea mo fakatahitahi mo niʼihi? Kotou fakamahino. (b) Koteā ʼaē kā tokoni anai ki he tagata ʼāfea ke ina fakalotomālohiʼi te kōkelekāsio pea ke faigafua kiā nātou hanatou fakaovi age kiā ia?
9 Ko tatatou tōkakaga fakalelei ʼaē ʼo fakahoko ia totatou ʼu maʼua, ʼe mole fakaʼuhiga leva ʼe mole kei tou fakaʼaogaʼi hotatou temi ke tou fakafiafia ai mo niʼihi pea mo tou mālōlō. Neʼe tuku mai e Sesu te faʼifaʼitaki lelei ʼo ʼuhiga mo te faʼahi ʼaia, he neʼe ina fakaʼaogaʼi te temi ki te akoʼi ʼaē ʼo te hahaʼi, kae neʼe toe ʼi ai pē foki mo tona temi fakafiafia pea ke feʼiloʼiʼaki lelei ai mo ʼihi. (Luka 5:27-29; Soa. 12:1, 2) ʼE mole toe fakaʼuhiga foki ia tatatou fakahoko lelei ʼaē ʼo totatou ʼu maʼua, ʼe mole kei tou malimali. Kana neʼe mole aga fakakaumeʼa lā ia Sesu mo te hahaʼi, ʼe mahino papau ia neʼe mole fia fakaovi age te hahaʼi kiā te ia. Kae māʼiapē lā mo te kihiʼi tamaliki neʼe mole natou mātataku ʼi te ʼolo ki ai. (Mko. 10:13-16) ʼE tou lava faʼifaʼitakiʼi feafeaʼi te aga fakapotopoto ʼaē ʼa Sesu?
10 Neʼe ʼui fēnei e te tehina ʼo ʼuhiga mo te tagata ʼāfea: “ ʼE lahi te ʼu lēkula ʼe ina fakamaʼua pē kiā ia totonu ke ina muliʼi, kae neʼe mole ina fakamaʼua tana ʼu lēkula ʼaia ke muliʼi e niʼihi.” ʼE kotou fēia koa mo koutou? ʼE lelei ke tou fakapotopoto ʼo ʼuhiga mo te ʼu meʼa ʼaē ʼe tou fakamaʼua ki ʼihi. Ohagē lā, ʼe feala ki te ʼu mātuʼa ke natou tokoni ki te tuputupu fakalaumālie ʼo tanatou fānau ʼaki hanatou kole age kiā nātou ke natou fai he ʼu gāue ʼe ʼalutahi pē mo te ʼu meʼa ʼaē kua natou mahino kiai. ʼO toe fēia pē, ʼe feala ki te ʼu tagata ʼāfea ke natou fakalotomālohiʼi niʼihi ʼi te kōkelekāsio ke natou tuputupu ʼi te faʼahi fakalaumālie, pea mo natou foaki age kiā nātou he ʼu tokoni ʼaoga ki te faʼahi ʼaia. Tahi ʼaē meʼa, kā aga fakapotopoto he tagata ʼāfea, pea ʼe ina fai anai he ʼu palalau ʼe fakalotomālohi ki te kōkelekāsio pea ʼe faigafua anai ki ʼihi hanatou fakaovi age ki ai. (Loma 12:3) Neʼe ʼui fēnei e te tuagaʼane: “ ʼE mole au loto au ki he tagata ʼāfea ʼe ina fakaʼuhiga tuʼumaʼu ia meʼa fuli pē moʼo fakakata. Kae kapau leva ʼe mata mamalu pē ia ʼi te temi fuli, pea ʼe faigataʼa anai hakita fakaovi ki ai.” ʼE ʼui e te tahi tuagaʼane, ʼe hagē “ ʼe mata faigataʼa hakita fakaovi ki ʼihi tagata ʼāfea heʼe mole he temi ʼe natou malimali ai.” Ko te kau tagata ʼāfea ʼe mole natou loto anai ʼi he temi ke puli te fiafia ʼa te kau Kilisitiano fuli, ʼi tanatou tauhi ʼaē kiā Sehova, “te ʼAtua fiafia.”—1 Tim. 1:11.
Tou Fakahoko Te ʼu Maʼua ʼi Te Kōkelekāsio
11. Koteā te fakaʼuhiga ʼo te ʼui ʼaē ke “fakaʼamu” he tehina ki he gāue ʼi te kōkelekāsio?
11 ʼI te temi ʼaē neʼe fakalotomālohiʼi ai e Paulo te ʼu tehina ʼo te kōkelekāsio ke natou gāue ki he ʼu maʼua ʼe lahi age, neʼe mole ko te fia maʼu tuʼulaga ʼaē neʼe ina uga nātou kiai. Kailoa ia, he neʼe ina tohi fēnei: “Kapau ʼe fakaʼamu he tahi ki he gāue fakataupau, ʼe fakaʼamu ia ki he gāue matalelei.” (1 Tim. 3:1, 4) Ko te “fakaʼamu” ʼa te ʼu tehina Kilisitiano ki he gāue ʼi te kōkelekāsio, ko tona fakaʼuhiga ʼaē ke natou fakatuputupu ʼi ʼonatou loto ia te manatu ʼaē ke natou faiga mālohi ki he ʼu kalitātē fakalaumālie moʼo tauhi ia tonatou ʼu tehina. Kapau ko he tehina kua lagi taʼu kātoa tana kua papitema, pea kua feala pē tana fakahoko ia te ʼu maʼua Fakatohi-tapu ʼaē ʼe tuʼu iā 1 Timoteo 3:8-13, ke liliu ko he tagata faifekau fakaminisitelio, pea ʼe feala ke foaki age hana gāue ʼi te kōkelekāsio.ʼE ʼui fakahagatonu ʼi te vaega 8: “ ʼE tonu foki te kau faifekau fakaminisitelio ko he ʼu tagata ʼe tāu mo te fakaʼapaʼapa.”
12, 13. Kotou fakamatala he ʼu ʼaluʼaga ʼe feala ke fakaʼamu kiai he ʼu tehina kei tūpulaga.
12 Ko koe koa ko he tehina tūpulaga ʼe maʼuhiga tāfito kiā koe tau tauhi kiā Sehova? ʼE lahi te ʼu gāue ʼe feala ke ke fakaʼamu kiai. ʼE feala ke ke hikihiki age tau lagolago ʼaē ki te minisitelio. ʼE ke fiafia koa ʼi te gāue fakatahi mo tou ʼu tehina ʼaē ʼe mole taʼiake tahi mo koe ʼi te fai fakamafola? ʼE ke lolotoga faiga nei koa ke ke maʼu hau ako Tohi-Tapu? Kā ke fai he ako Tohi-Tapu ʼa he tahi, ʼo mulimuli ki te ʼu tokoni ʼaē ʼe tuku atu ʼi te ʼu fono Fakakilisitiano, ʼe ke hikihiki ai anai ia tou poto faiako. Tahi ʼaē meʼa, ʼe ke akoako ai anai ke ke lotomahino kiā ia ʼaē ʼe ina lolotoga ako te ʼu ala ʼo Sehova. Kā kua mahino leva ʼe kua tonu ke ina fai he ʼu fetogi ʼi tona maʼuli, pea ʼe ke akoako anai ke ke tokoni ki ai ke ina maʼuliʼi te ʼu pelesepeto ʼo te Tohi-Tapu, ʼo ke faʼa kātaki pea mo ke fakaʼapaʼapa ki ai.
13 Ko koutou, ʼu tehina tūpulaga, ʼe feala ke kotou tokoni ki te hahaʼi mātutuʼa ʼo te kōkelekāsio, ʼi he ʼaluʼaga pē ʼe ʼaoga ai kiā nātou. ʼE feala ke kotou toe tokaga ki te ʼu gāue ʼaē ʼe fai ʼi te Fale ʼo Te Puleʼaga, ʼo kotou lagolago ki tona fakamaʼa pea mo tona taupau ʼaē ke maʼa. ʼI takotou lagolago ki te ʼu ʼaluʼaga ʼaē ʼe kotou fealagia kiai, ʼe kotou fakahā ai ʼe maʼuhiga kiā koutou tokotou minisitelio. Ohagē ko Timoteo, ʼe feala hakotou akoako ke kotou tōkakaga fakalelei ki te ʼu meʼa ʼaē ʼe ʼaoga ki te kōkelekāsio.—Lau ia Filipe 2:19-22.
14. ʼO ʼuhiga mo te ʼu tehina tūpulaga, ʼe lava feafeaʼi ke “sivisivi . . . tonatou ʼu fealagia” ʼaē ke natou tauhi ʼi te kōkelekāsio?
14 ʼU tagata ʼāfea, kotou fakaʼaogaʼi ki te ʼu gāue ʼaē ʼe fai ʼi te kōkelekāsio ia te ʼu tehina tūpulaga ʼaē ʼe natou faiga ke natou “feholaki mai te ʼu holi ʼo te temi tūpulaga” pea mo natou haga kumi “te faitotonu, te tui, te ʼofa, te tokalelei,” pea mo ʼihi atu kalitātē. (2 Tim. 2:22) Kā tuku age kiā nātou he ʼu gāue ke natou fakahoko ʼi te kōkelekāsio, pea ʼe feala ai ke “sivisivi . . . tonatou ʼu fealagia” ʼaē ki te fakahoko ʼo he ʼu maʼua, ke ‘hā ki te hahaʼi fuli ia tanatou tuputupu ʼaē ʼi te faʼahi fakalaumālie.’—1 Tim. 3:10; 4:15.
Ke Tou Fakamaʼuhigaʼi Totatou ʼu Tehina Mo Tuagaʼane ʼi Te Kōkelekāsio Pea Mo Totatou Fāmili
15. ʼAki te koga tohi ʼo 1 Timoteo 5:1, 2, ʼe tou lava fakahā feafeaʼi ʼe tou fakamaʼuhigaʼi ia totatou ʼu tehina mo tuagaʼane?
15 ʼE toe kau ki te ʼu gāue ʼaē ke fakahoko lelei ʼi te kōkelekāsio, ia takita fakaʼapaʼapa ʼaē ki tokita tehina mo tuagaʼane. ʼI te tokoni ʼaē neʼe fai e Paulo kiā Timoteo, neʼe talanoa ai ia Paulo ki te ʼaoga ʼaē ke kita fakaʼapaʼapa ki ʼihi. (Lau ia 1 Timoteo 5:1, 2.) ʼE maʼuhiga tāfito te faʼahi ʼaia mokā ʼe tou tōkakaga ke ʼaua naʼa tou fakatupu he ʼu holi heʼeʼaoga ʼi te loto ʼo he tehina peʼe ko he tuagaʼane. ʼE lelei ke tou muliʼi te faʼifaʼitaki ʼa Sopo ʼo ʼuhiga mo te fakaʼapaʼapa ʼaē ki te hahaʼi fafine, tāfito lā tana fakaʼapaʼapa ʼaē ki tona ʼohoana. Neʼe tokaga mālohi ia Sopo ke ʼaua naʼa ina sioʼi pea mo holi ki he tahi age fafine. (Sopo 31:1) Kapau ʼe tou fakamaʼuhigaʼi ia totatou ʼu tehina mo tuagaʼane, pea ʼe tou faiga anai ke ʼaua naʼa tou fai he aga heʼeʼaoga mo he tahi kae mole tou fia ʼohoanaʼi, peʼe tou fai he aga ʼe feala ai ke ufiufi he tehina peʼe ko he tuagaʼane. ʼE ʼiloga te maʼuhiga ʼaē ʼo te fakaʼapaʼapa ki te hahaʼi ʼi te temi ʼaē ʼe fakatahi ai he tama mo he taʼahine ʼe nā ʼamanaki ʼohoana. Ko he Kilisitiano ʼe aga fakapotopoto ʼe mole ina kākāʼi anai te ʼofa ʼo ia ʼaē ʼe fakatahi mo ia.—Taag. 12:22.
16. Koteā ʼaē ʼe kehekehe ai te manatu ʼa ʼihi ʼi te mālama ʼaenī pea mo te manatu ʼi te Tohi-Tapu, ʼo ʼuhiga mo te tuʼulaga ʼo te tagata ʼohoana pea mo tamai ?
16 ʼE toe maʼua foki ke maʼuhiga tāfito kiā tātou te ʼu gāue ʼaē neʼe tuku mai e te ʼAtua ke tou fakahoko ʼi totatou ʼu fāmili. ʼI te mālama ʼa Satana, ʼe fakakataʼi te tuʼulaga ʼo te tagata ʼohoana pea mo tamai. ʼI te ʼu ʼata, ʼe fakalainoaʼi pea ʼe mole he fakaʼapaʼapa ki te gāue ʼa te pule fāmili. Kae ʼi te Tohi-Tapu, ko te tuʼulaga ʼaē ʼe maʼu e te tagata ʼohoana, ʼe ko he maʼua ʼe maʼuhiga ʼaupitō heʼe ko ia ʼaē “ ʼe pule ki tona ʼohoana.”—Efe. 5:23; 1 Ko. 11:3.
17. Kotou fakamahino peʼe tou fakamaʼuhigaʼi feafeaʼi totatou ʼu maʼua Fakakilisitiano ʼaki tatatou lagolago ʼaē ki te tauhi fakafāmili.
17 ʼE lagi tokaga he tagata ʼohoana ki tona fāmili ʼi te faʼahi fakakoloa. Kae kapau ʼe mole tokaga ia ki tona fāmili ʼi te faʼahi fakalaumālie, pea ʼe mole mahino ia ki te ʼu meʼa ʼaē ʼe ʼaoga tāfito ki tona fāmili pea ʼe puli iā ia te aga fakapotopoto. (Teu. 6:6, 7) Koia, ʼe ʼui ai iā 1 Timoteo 3:4, kapau ko koe ko he pule fāmili pea mo ke fakaʼamu ki he ʼu pilivilēsio ʼi te kōkelekāsio, ʼe tonu muʼa ke ke liliu ko he tagata “ ʼe ina takitaki fakalelei tona loto fale, mo ina maʼu he ʼu fānau ʼe natou fakalogo lelei.” ʼO ʼuhiga mo te faʼahi ʼaia, ke ke fai kiā koe totonu te fehuʼi ʼaenī: ‘ ʼE au fakaʼaogaʼi tuʼumaʼu koa hoku temi ke au fai ai te tauhi fakafāmili mo toku fāmili?’ Ko ʼihi tuagaʼane ʼe natou kolekole ki ʼonatou ʼohoana ke natou fakahoko ia tonatou ʼu maʼua ʼaē ʼi te faʼahi fakalaumālie. ʼE tonu ki te ʼu tagata ʼohoana fuli ke natou tahi fakakaukauʼi lelei ia tonatou maʼua ʼaia ʼi tonatou maʼuli fakafāmili. ʼE mahino ia, ʼe tonu ki te fafine ʼohoana ke lagolago ki te fakatuʼutuʼu ʼaē ʼo ʼuhiga mo te Tauhi Fakafāmili, pea ke gāue tahi mo tona ʼohoana ke ʼi ai hona fua.
18. ʼE lava akoako feafeaʼi e he fānau ke natou fakahoko fakalelei te ʼu maʼua ʼaē ʼe maʼuhiga tāfito age?
18 ʼE toe fakalotomālohiʼi te fānau ke natou fakahoko fakalelei te ʼu maʼua ʼaē ʼe maʼuhiga tāfito age. (Tnk. 12:1) ʼE mole kita agakovi ki te fānau mokā kita akoʼi age kiā nātou ke natou gāue kinakina, ke natou fai he ʼu gāue ʼi te loto fale, ʼo mulimuli pē ki tonatou taʼu pea mo tonatou ʼu fealagia. (Tagi. 3:27) ʼI te kei tūpulaga ʼa te Hau ko Tavite, neʼe ina ako ke liliu ko he tagata tauhi ovi ʼe gāue lelei. Neʼe ina toe ako mo te fai māholo pea mo te faʼu ʼo he ʼu hiva, pea ʼaki tona ʼu faiva ʼaia neʼe feala ai kiā ia ke gāue ki te hau ʼo Iselaele. (1 Sam. 16:11, 12, 18-21) ʼE mahino papau ia, ʼi te kei tamasiʼi ʼaē ʼa Tavite neʼe gaoʼi ohagē pē ko te tamaliki fuli, kae neʼe ina toe ako pē foki mo te ʼu faiva gāue neʼe ʼaoga leva kiā ia ki muli age moʼo fakavikiviki kiā Sehova. Ko tana poto ʼaē ʼi te tokaga pea mo te taupau te faga ovi neʼe tokoni kiā ia ke ina takitaki te puleʼaga ʼo Iselaele ʼaki he faʼa kātaki. ʼU tūpulaga, ko te ʼu faʼahi fea ʼaē ʼe kotou akoako ke kotou popoto ai, ʼaē kā tokoni atu anai ke kotou tauhi ki tokotou Tupuʼaga pea mo nofo teuteu ai ke kotou fakahoko he ʼu gāue ʼi te kōkelekāsio.
Tou Taupau He Manatu ʼe Fakapotopoto
19, 20. Ko te manatu fakapotopoto fea ʼaē kua kotou fakatotonu ke kotou maʼuliʼi pea ke kotou maʼu ʼo ʼuhiga mo takotou tauhi ʼaē kiā Sehova?
19 ʼE feala pē kiā tātou fuli ke tou aga fakapotopoto ʼo ʼuhiga mo totatou ʼu maʼua ʼaē ʼe tou fakahoko. ʼE mole tou faiga anai ke tou ‘faitotonu fau.’ (Tnk. 7:16) ʼI ʼihi temi ʼe lelei ke kita gaohi meʼa fakakata moʼo fakalelu ai he ʼaluʼaga ʼe fakatupu ʼita, peʼe ʼi tokita loto fale, peʼe ʼi te fale gāue, peʼe kā kita felōgoi mo tokita tehina mo tuagaʼane Kilisitiano. ʼI te loto fale, ʼe tokaga anai te fāmili ke mole natou fevalokiʼaki, heʼe feala ai anai ke puli te maʼuli tokalelei ʼaē ʼe tonu ke maʼu ʼi te loto fale. ʼI te kōkelekāsio, ʼe feala pē kiā tātou fuli ke tou kakata fakatahi pea mo fefakafiafiaʼaki fakatahi, ʼo tou fai palalau ke lagalaga pea mo fakalotomālohi ia tatatou faʼahiga faiako.—2 Ko. 13:10; Efe. 4:29.
20 ʼE tou māʼuʼuli nei ʼi he mālama ʼe mole fakamaʼuhigaʼi e te hahaʼi ia Sehova pea mo tana ʼu lao. Kae ki te hahaʼi ʼa Sehova ʼe maʼuhiga kiā nātou ia tanatou fakalogo pea mo tanatou agatonu ʼaē ki tonatou ʼAtua. ʼI meʼa fakafiafia hatatou kau ki te hahaʼi tokolahi ʼaē ʼe “maʼuhiga” tāfito kiā nātou tanatou tauhi kiā Sehova! ʼOfa pē ke tou fakatotonu ke tou tōkakaga tuʼumaʼu ʼo fakahoko fakalelei ia totatou ʼu maʼua ʼaē ʼi totatou maʼuli pea mo tatatou tauhi.
ʼE Kotou Tali Feafeaʼi Anai?
• He koʼē ʼe tonu ke tou tauʼi ia te manatu vale ʼa te mālamanei ʼo ʼuhiga mo te maʼuli?
• ʼE feafeaʼi hatatou fiafia logolā te lahi ʼaē ʼo totatou ʼu maʼua ʼi totatou minisitelio?
• ʼE hā feafeaʼi ʼi tatatou faʼahiga fakahoko ʼo totatou ʼu maʼua Fakakilisitiano peʼe maʼuhiga peʼe kailoa kiā tātou?
• Kotou fakamahino peʼe koʼē ʼe maʼuhiga ʼaupitō kiā tātou ia tatatou fakaʼapaʼapa ʼaē ki totatou ʼu tehina pea mo totatou fāmili.
[ʼU fehuʼi ʼo te ako]
[Paki ʼo te pasina 16]
Ko he tagata ʼohoana ʼe tonu ke tokaga ki tona fāmili ʼi te faʼahi fakakoloa pea mo fakalaumālie