Guni adorarnu Dios modo riuulaʼdxiʼ
Guni adorarnu Dios modo riuulaʼdxiʼ
«Racaladxe gabe laatu, ucaa ique tu [...] ni naquiiñe ulabi nu.» (FILI. 4:8)
1, 2. Xiñee nabé riníʼ ique binni puru chizá tiempu riʼ, ne xii nga cani naquiiñeʼ guinabadiidxanu de laani.
TIEMPU riʼ nga ca dxi «jma nagana» nabani binni guidxilayú. Ca binni ni cadi nuu gaxha de Dios qué guidxélacaʼ ximodo gudxiilucaʼ ca guendanagana sticaʼ (2 Tim. 3:1-5). Cumu cadi nuucabe gaxha de Dios la? qué gápacabe tu gacané laacabe, nga runi biaʼ biaʼ zidiʼdisícabe lúcani. Yanna xi runi stale binni para gusiaandaʼ ca guendanagana stiʼ yaʼ. Stale de laacabe maʼ zizá sti ladu ne runi xcaadxi cosa para chuʼ nayecheʼ.
2 Stale binni ni nabani yanna la? nisi maʼ cuyubi paraa chizá o xi guni para chuʼ nayecheʼ ti guiaandaʼ ca guendanagana stiʼ. Yanna laanu, ca xpinni Cristu, pa qué chuʼnu cuidadu la? zándaca gueeda guicá modo nabani ca binni ca laanu ne guzulú gúninu casi cayúnicabe. Xi zanda gúninu para cadi guiábanu lu trampa ca yaʼ. Ñee dxandíʼ nga cadi naquiiñeʼ gúninu xiixa para chuʼnu nayecheʼ la? Ximodo zanda gánnanu gunáʼ nga ca cosa ni jma risaca ni naquiiñeʼ gúninu yaʼ. Xi conseju zeeda lu Biblia zacané laanu para gúninu ni na Dios modo riuulaʼdxiʼ yaʼ. Ximodo zacané cani laanu para cadi gácanu ti binni ni rinabaʼ gaca ca cosa ca módopeʼ naquiiñeʼ gácacani ne guni respetarnu modo riníʼ ique stobi yaʼ.
Gusisácanu Dios ndaaniʼ ti guidxilayú ra ruyubi binni puru si ni riuulaʼdxiʼ
3, 4. Guná nga ca conseju zeeda lu Biblia ni rusihuinni risaca gúninu ni na Dios modo riuulaʼdxiʼ.
3 Casi maca bizéʼtenu que, ca dxi nabáninu riʼ stale binni nisi cuyubi guni puru si ni riuulaʼdxiʼ (2 Tim. 3:4). Modo nabani ca binni ca zanda gucaani laanu guixélenu de Dios (Pro. 21:17). Nga runi, ora bicaa Pablu carta ra nuu Timoteu ne ra nuu Tito, bidiibe caadxi conseju ni cusihuinni pabiáʼ risaca guni binni ni na Dios jneza. Pa chinándanu cani la? qué zacá modo riníʼ ique binni guidxilayú laanu, purtiʼ laacaʼ qué rizaaláʼdxicaʼ ca cosa ni dxandíʼ risaca (biindaʼ 1 Timoteo 2:1, 2 ne Tito 2:2-8).
4 Maʼ raca stale siglu guníʼ Salomón naquiiñeʼ cuee binni tiempu para guni xiixa ni dxandíʼ risaca ne cadi guicá ique puru si guendarizá (Ecl. 3:4; 7:2-4). Ne zacá nga laani. Xiñee yaʼ. Purtiʼ nabé nagueenda ridiʼdiʼ ca dxi ribani ti binni, nga runi naquiiñeʼ gúninu stipa para guilanu (Luc. 13:24). Ne para ganda guilanu naquiiñeʼ cueenu tiempu para ca cosa «ni naquiiñe ulabi nu» (Fili. 4:8, 9). Nga riníʼ naquiiñeʼ guʼyaʼ chaahuinu pa dxandíʼ nabáninu casi modo naquiiñeʼ guibani ti xpinni Cristu.
5.Xii nga ni jma naquiiñeʼ gucaa ique ti xpinni Cristu.
5 Ca xpinni Cristu rinándacaʼ ejemplu stiʼ Jiobá ne Jesús, purtiʼ riguixhe íquecaʼ gúnicaʼ dxiiñaʼ sticaʼ jneza (Juan 5:17). Nga runi, cadi guendaridxagayaa diʼ nga gusisaca binni laacabe ra rúnicabe dxiiñaʼ, purtiʼ rúnicabe xhiiñacabe jneza ne qué ribáʼnacabe stiʼ binni. Tuuxa ni napa xiiñiʼ la? jma naquiiñeʼ gucaa ique guni dxiiñaʼ para gudii ni caquiiñeʼ binnilidxi. Xiñee yaʼ. Purtiʼ pa qué gúnibe ni, zeeda gácabe casi tuuxa ni «ma biree de ni runi cre» o ni maʼ bidxiideche Jiobá (1 Tim. 5:8).
Rúninu ni na Dios modo riuulaʼdxiʼ ne nuunu nayecheʼ
6. Xiñee naquiiñeʼ guni adorarnu Dios jneza.
6 Jiobá ribeza guni adorárcabe laa jneza ne maʼ xadxí rinábabe guni ca xpínnibe zacá. Ngue runi, dxi maʼ qué ñuni ca israelita ni na Ley ni gucuaa Moisés la? qué nulá Jiobá laacabe de ca yuubaʼ ni beeda luguiácabe pur ni bíʼnicabe (Jos. 23:12, 13). Lu primé siglu que gunábabe ca xpinni Cristu gúnicaʼ stipa para cadi guixélecaʼ de ni rusiidiʼ Biblia ne cadi gúnicaʼ casi runi binni ni qué runibiáʼ Dios (2 Juan 7-11; Apo. 2:14-16). Yanna riʼ, laaca rinábabe laanu guni adorarnu laabe jneza (1 Tim. 6:20).
7. Xi guiráʼ biʼniʼ Pablu ante chigucheeche diidxaʼ.
7 Riuʼnu nayecheʼ ora rúninu ni na Dios. Yanna, pa qué racaláʼdxinu gusaana de chuʼnu nayecheʼ la? naquiiñeʼ gusisácanu dxiiñaʼ cayúninu ne chuʼnu listu dede ante para gacanenu sti binni. Guzéʼtenu de Pablu, laabe nabé guníʼ íquebe ximodo nuu ca binni ni chigusiidibe. Sicaríʼ guniʼbe: «Rune zacá lade irá cabe tílasi zacá ganda ulaʼya caadxi. Rune irá nga tílasi guni cre binni stiidxa Cristu, ti zacá laca ne naa guieche nia ni» (1 Cor. 9:22, 23). Bidxá tipa ladxidóʼ apóstol riʼ ora gucanebe binni guiziidiʼ de Dios ne ora riníʼ íquebe ximodo zanda gudiibe laacaʼ guiráʼ ni caquiiñecaʼ. Zacá gunda guluube gana laacaʼ para guni adorarcaʼ Jiobá.
8. 1) Xi maʼ gudixhe íquenu gúninu para ganda gusíʼdinu binni ni cá lu Biblia. 2) Xiñee runi sentirnu nayecheʼ ora ridúʼndanenu binni Biblia.
8 Pablu biiyaʼ nabé risaca nga gucheeche diidxaʼ. Ne gudixhe íquebe gúnibe xhiiñaʼ Jiobá ne gácabe casi ti esclavu stiʼ ne stiʼ ca binni ni cucaadiaga laabe (Rom. 12:11; 1 Cor. 9:19). Laanu laaca nápanu ti dxiiñaʼ risaca, laani nga gusíʼdinu binni de Stiidxaʼ Dios, ne rúninu ni ora ridúʼndanenu laacabe Biblia dede ralídxicabe, ora rudiʼnu ti libana ndaaniʼ Yoo stiʼ Reinu ne ora ridúʼndanenu binnilídxinu Biblia. Ñee riénenu pabiáʼ risaca gacanenu ca binni ni cusíʼdinu la? Zándaca guiníʼ íquenu stale dxiiñaʼ nga chigúʼndanenu binni Biblia guiráʼ semana, purtiʼ caquiiñeʼ cueenu tiempu de lu cani rúninu para chigusíʼdinu binni. Peru ñee cadi ngapeʼ nga ni guníʼ Jesús gúninu ora bizeeteʼ ca diidxaʼ riʼ: «Jma nayeche ni rudii que ni ricaa» la? (Hech. 20:35.) Gástiruʼ sti cosa ni zusiecheʼ laanu jma que gusíʼdinu binni xi naquiiñeʼ guni para ganda guilá.
9. Bisiene ximodo zanda gúninu ni na Dios ne cueenu tiempu para chuʼnu nayecheʼ ti ratu né xcaadxi binni.
9 Cadi purtiʼ si rúninu ni na Dios qué zanda cueenu tiempu para chuʼnu nayecheʼ ti ratu né ca xhamígunu. Jesús bisaana ti ejemplu galán chinándanu. Qué nusiidisibe binni ni na Dios, sínuque laaca guleebe tiempu para guiziiláʼdxibe ne para chúʼnebe ca xhamígube (Luc. 5:27-29; Juan 12:1, 2). Peru laaca qué riníʼ diʼ nga qué zanda guxidxinenu binni. Pa ñaca Cristu ti binni naduxhuʼ, guirutiʼ tu niná nidxiña laabe. Peru laabe qué ñácadibe zacá. Dede ca baʼduhuiiniʼ que riéchecaʼ chuʼcaʼ gaxha de laabe (Mar. 10:13-16). Ximodo zanda chinándanu ejemplu stiʼ Jesús yaʼ.
10. Xi zanda guni ca binnigola ca ti guidxiña binni laacaʼ ne gácacaʼ nachaʼhuiʼ né laacabe.
10 Ti xpinni Cristu guníʼ ca diidxaʼ riʼ de ti binnigola: «Laabe riuuláʼdxibe gúnibe ca dxiiñaʼ stibe módopeʼ nexheʼ gácacani, peru qué ribézabe guni xcaadxi xpinni Cristu dxiiñaʼ sticaʼ sin gucheecaʼ». Ñee zacaca riníʼcabe de laanu la? Gastiʼ naca nga cuézanu quixhe ique binni guni jma de biaʼ cayuni. Guzéʼtenu ti ejemplu. Ora cani napa xiiñiʼ gábicaʼ laacabe quixhe íquecabe ugaandacabe xiixa ne gacanecaʼ laacabe la? ca xiiñicabe rúnicaʼ stipa pur ugaandacaʼ ni. Ne ca binni ridagulisaa riéchecaʼ ora gacané ca binnigola laacaʼ lu xiixa ni caquiiñecaʼ ne ora gudiicabe laacaʼ xiixa conseju ni zacané laacaʼ guiniisicaʼ lu stiidxaʼ Dios. Yanna binnigola ca laaca naquiiñeʼ ganna nuu ni qué zanda guni ne cadi gudxiibaʼ laca laa, zacá zusihuínnibe zanda guidxiña binni laabe ne gácabe nachaʼhuiʼ né laacaʼ (Rom. 12:3). Ti gunaa xpinni Cristu guníʼ sicaríʼ: «Qué ñuuladxeʼ ñuuyaʼ ca binnigola ca guiráʼ ni ñábicabe laacaʼ casi guendariguite, peru laaca ñaca nagana para naa ninieniáʼ tobi ni natuumbu lú guiráʼ ora». Sti gunaa xpinni Cristu guníʼ: «Nuu binnigola la? cásipeʼ guʼyaʼ binni laacaʼ maca cadxibi pur modo laacaʼ». Xi qué zaná ti binnigola guni yaʼ. Qué ziuulaʼdxiʼ guni xiixa ni uguu ca xpinni Cristu triste ora maʼ cayúnicaʼ ni na Jiobá, ti Dios ni nayecheʼ (1 Tim. 1:11, NM).
Ca hombre ni runi dxiiñaʼ lade ca binni ridagulisaa
11. Ximodo rusihuinni ti xpinni Cristu rapa gana ugaanda ti dxiiñaʼ risaca.
11 Ora gudxi Pablu ca hombre quixhe íquecaʼ ugaandacaʼ xiixa dxiiñaʼ ra ridagulisaacaʼ, cadi cayábibe laacaʼ gúnicaʼ xiixa para guchacaʼ bi yánnicaʼ. Né ca diidxaʼ ca cucaabe laacaʼ gúnicaʼ dxiiñaʼ, purtiʼ guniʼbe: «Pa nuu tuuxa cá ique gaca [binnigola] sti ca xpinni Cristu la? jneza ni cá ique guni» (1 Tim. 3:1, 4). Ximodo rusihuinni ti xpinni Cristu «jneza ni cá ique» ugaandaʼ yaʼ. Ora quixhe ique gacané ca biʼchiʼ ne ca bizaʼnaʼ ne gapa ca guenda ni caquiiñeʼ para laani. Pa ti xpinni Cristu maʼ bisaa biaʼ ti iza de guyuunisa ne cayuni ni ruzeeteʼ 1 Timoteo 3:8-13 ra na xi naquiiñeʼ guni ti siervu ministerial la? ca binnigola ca zanda gúʼyacaʼ pa maʼ zanda guicaabe dxiiñaʼ ca. Lu versículo 8 ca ruzeeteʼ tobi de ca cosa ni naquiiñeʼ gúnicabe: «Zaqueca ni gaca [siervu ministerial], gaca ni tobi nabani jneza».
12, 13. Xi zanda guni ca hombrehuiiniʼ para guicaacaʼ jma dxiiñaʼ lade ca binni ridagulisaa.
12 Hombrehuiiniʼ, ñee maʼ guyuunísaluʼ ne nácaluʼ ti xpinni Cristu ni runi adorar Dios modo riuulaʼdxiʼ la? Pa maʼ caniisiluʼ la? nuu stale cosa ni zanda guʼnuʼ para gápaluʼ xcaadxi dxiiñaʼ lade binni ridagulisaa. Tobi de laacani nga gucheecheluʼ diidxaʼ jma. Ñee rucheecheluʼ diidxaʼ né ca xpinni Cristu de gadxé gadxé iza la? Ñee cayúniluʼ stipa pur guidxélaluʼ tuuxa ni gúʼndaneluʼ Biblia la? Pa chinándaluʼ ca conseju ni rudiicabe lu ca guendaridagulisaa ca ora maʼ cayuundaneluʼ binni la? zácaluʼ ti maestru ni nanna gusiidiʼ ne ziéneluʼ ximodo nuu ca binni ni cusiidiluʼ. Ne ora guiene cani cusiidiluʼ naquiiñeʼ guchaacaʼ modo nabánicaʼ la? zadxélaluʼ modo gacaneluʼ laacabe para gúnicabe ni na ca conseju ni zeeda lu Biblia.
13 Ñee maʼ gúdxiluʼ ca xpinni Cristu ni maʼ huaniisi nuuluʼ para gacaneluʼ laacaʼ ora iquiiñecaʼ xiixa la? Ñee racaneluʼ para guiá ne gaca chaahuiʼ Yoo sti Reinu la? Pa riuuláʼdxiluʼ gacaneluʼ ne nuuluʼ listu para guʼnuʼ intiica dxiiñaʼ ni caquiiñeʼ gaca la? zusihuínniluʼ riuuláʼdxiluʼ guni adorarluʼ Dios jneza. Cadi guiaandaʼ lii zanda gácaluʼ casi Timoteu, laa gucané ca xpinni Cristu ne gunnaxhii laacabe de guidubi ladxidóʼ (biindaʼ Filipenses 2:19-22).
14. Ximodo rusihuinni ca hombrehuiiniʼ ca maʼ zanda gúnicaʼ dxiiñaʼ lade ca binni ridagulisaa.
14 Laatu, ca binnigola, naquiiñeʼ gudiitu dxiiñaʼ ca hombrehuiiniʼ ni cayuni stipa pur gucaanaʼ «ni cadi jneza riguba yu cani nahuiini ruʼ» ne cani cayuni stipa pur chinanda conseju riʼ: «Ibani lu jneza. Bini cre Dios ne gunaxhii binni ne biyubi cadi tinde [luʼ]» (2 Tim. 2:22). Ca dxiiñaʼ ni gúnicabe lade ca binni ridagulisaa, zusihuínnicani «pa zaquiiñe [ca]be para dxiiña ca». Pa gúnicabe ca dxiiñaʼ guicaacabe la? zahuinni «ze dxi ziyene [cabe] jma» (1 Tim. 3:10; 4:15).
Gusisácanu dxiiñaʼ nápanu ra ridagulisaanu ne ndaaniʼ lídxinu
15. Casi na 1 Timoteo 5:1, 2, ximodo rusihuinni ti xpinni Cristu rusisaca ca biʼchiʼ ne ca bizaʼnaʼ.
15 Laaca zusihuínninu rúninu xhiiñaʼ Dios jneza ora guni respetarnu guiráʼ ca xpinni Cristu ne gusisácanu laacaʼ casi na conseju bidii Pablu Timoteu (biindaʼ 1 Timoteo 5:1, 2). Ne jma naquiiñeʼ guʼnuʼ ni na conseju ca ora guidxaaguʼ ti hombrehuiiniʼ o ti dxaapahuiiniʼ. Job bisaana ti ejemplu nabé sicarú, purtiʼ laa biʼniʼ respetar guiráʼ gunaa, peru jma biʼniʼ respetar xheelaʼ. Bisihuínnibe ni ora bíʼnibe ti stipa pur cadi guyadxibe guirutiʼ ne gacaláʼdxibe laa (Job 31:1). Tu rusisaca ca biʼchiʼ ne ca bizaʼnaʼ la? qué zusihuinni riuulaʼdxiʼ tuuxa de laacabe pa cadi cá ique guichaganáʼ laabe ne qué liica zuni xiixa ni gusituí lube. Ca xpinni Dios ni gapa ti compromisu né tuuxa para guichaganáʼ la? naquiiñeʼ guni respetar binni ca. Ti xpinni Cristu ni runi adorar Dios jneza la? qué zucaabe tuuxa guni cré zachaganabe laa pa cadi dxandíʼ ni (Pro. 12:22).
16. Ximodo ruuyaʼ guidxilayú stiʼ Binidxabaʼ dxiiñaʼ ni runi xaíque stiʼ ti familia, peru xi riníʼ Biblia de dxiiñaʼ stícabe.
16 Sti cosa ni naquiiñeʼ gusisácanu nga dxiiñaʼ ni maʼ bidii Dios cada binni ni nuu ndaaniʼ ti familia. Guidxilayú stiʼ Binidxabaʼ riʼ rusihuinni qué risaca dxiiñaʼ stiʼ tuuxa ni naca xaíque ndaaniʼ ti familia. Ximodo yaʼ. Casi lu televisión la? ridiʼdiʼ stale chiste ni rucaa binni guxidxi de cani naca xaíque ndaaniʼ ti familia pur guiráʼ ni riníʼcabe de laacaʼ. Peru Stiidxaʼ Dios na risaca nga dxiiñaʼ napa ti hombre ndaaniʼ lidxi «purtiʼ nácabe xaíque stiʼ xheelabe» (Efe. 5:23; 1 Cor. 11:3).
17. Ximodo rusihuínninu risaca para laanu guizíʼdinu de Dios ndaaniʼ lídxinu.
17 Ti xpinni Cristu ni rudii ni caquiiñeʼ binnilidxi para guibani, peru qué rusiidiʼ laacabe de Dios la? qué rusihuinni nuu xpiaaniʼ (Deu. 6:6, 7). Nga runi, 1 Timoteo 3:4 na, pa tuuxa racalaʼdxiʼ gapa ti dxiiñaʼ ndaaniʼ ti neza binni ridagulisaa la? naquiiñeʼ gaca «tobi ni nanna guni mandar ndaani lidxi ne usiidi ca xiiñi uzuuba diidxa sin icabi ruaa». Pa nácaluʼ ti hombre ni napa xiiñiʼ, gunabadiidxaʼ laca lii: «Ñee runeʼ adorar Dios né binnilidxeʼ guiráʼ semana la?». Triste guininu ni, peru nuu gunaa xpinni Cristu napa xidé guinábacaʼ xheelacaʼ cuee tiempu para guʼndané laacaʼ. Guiráʼ hombre ni maʼ bichaganáʼ naquiiñeʼ guʼyaʼ risaca nga cuee tiempu para guni adorar Dios né binnilidxi. Ne naquiiñeʼ gacané gunaa ca laabe para ganda gúnicabe ni ora nexheʼ gácani.
18. Ximodo zanda guiziidiʼ ca xcuidihuiiniʼ ca gúnicaʼ dxiiñaʼ ni jma risaca.
18 Stiidxaʼ Dios riguu gana ca hombrehuiiniʼ ne ca dxaapahuiiniʼ ca gúʼyacaʼ xii nga ni jma risaca lu xquendanabánicaʼ (Ecl. 12:1). Ca baʼduhuiiniʼ ca zanda gúnicaʼ xiixa dxiiñaʼ ndaaniʼ lídxicaʼ biaʼ iza nápacaʼ ne biaʼ zanda gúnicaʼ. Zacá zaziidicabe gúnicabe dxiiñaʼ né stale gana dede nahuiinicabe (Lam. 3:27). Casi David la? dede nahuiiniʼ biziidiʼ chigapa dendxuʼ. Laaca biziidibe guxhídxibe saa ne quixhe chaahuibe canción, nabé guyuulaʼdxiʼ Saúl, rey stiʼ Israel ca gracia gúpabe, ngue runi gunabaʼ chigúnibe dxiiñaʼ ra nuu (1 Sam. 16:11, 12, 18-21). Dxi guca David nahuiiniʼ la? laaca gudxite casi runi guiráʼ xcuidihuiiniʼ, peru laaca gúpabe xcaadxi guenda ni gucané laabe gusisácabe Jiobá despué. Dxi yegápabe dendxuʼ biziidibe cadi guidxiichibe nagueenda, ne gucané ngue laabe para gunda biʼniʼ mandarbe guidxi Israel. Hombrehuiiniʼ ne dxaapahuiiniʼ, ñee cayúnitu stipa para guiziiditu ximodo gúnitu ni na Dios jma jneza, ne gápatu dxiiñaʼ ni jma risaca ndaaniʼ xquidxi Dios despué la?
Naquiiñeʼ gánnanu nuu cosa qué zanda gúninu
19, 20. Xi naquiiñeʼ guiníʼ íquenu de laanu ne de dxiiñaʼ ni rúninu para Jiobá.
19 Guiranu naquiiñeʼ gánnanu nuu cosa ni zanda gúninu ne nuu ni qué zanda gúninu, ne cadi guiníʼ íquenu jma risácanu que stobi. Nin ti xpinni Cristu cadi naquiiñeʼ guiníʼ ique jma jneza cani runi (Ecl. 7:16). Nabé galán nga chuʼnu nayecheʼ, purtiʼ zacaneni laanu ora gápanu xiixa guendanagana ndaaniʼ lídxinu, ra rúninu dxiiñaʼ o ra ridagulisaanu. Laaca cadi galán diʼ guininu cadi jneza modo runi binnilídxinu xiixa cosa, purtiʼ zándaca guchiichini laacabe ne pur nga maʼ qué ganda chuʼ familia ca tobi si. Ne laaca galán guxídxinenu ca bíʼchinu ne ca bizáʼnanu ni ridagulisaanenu ne cueenu tiempu para chuʼnu nayecheʼ né laacabe ti ratu. Ora guininu ne gusíʼdinu sti binni laaca naquiiñeʼ uguʼnu gana laacaʼ ne gacanenu laacaʼ guzuhuaa chaahuicaʼ (2 Cor. 13:10; Efe. 4:29).
20 Ca binni ni nabeza ndaaniʼ guidxilayú riʼ, qué gápacaʼ respetu Jiobá ne ca ley stiʼ. Peru laanu ca xpinni Cristu nabé risaca para laanu guzúʼbanu stiidxaʼ Jiobá ne cadi gusaananu de gúninu ni nabe. ¡Nabé sicarú nga nuunu ndaaniʼ ti guidxi ni cayuni ni na Jiobá modo riuulaʼdxiʼ! Nga runi, maʼ gudixhe íquenu guibáninu para guni adorarnu Jiobá jneza.
Xi nicábiluʼ
• Xiñee naquiiñeʼ gucáʼnanu modo riníʼ ique binni guidxilayú.
• Ximodo zanda gúninu ni na Dios modo riuulaʼdxiʼ ne chuʼnu nayecheʼ.
• Ximodo ruuyaʼ ti xpinni Cristu ca dxiiñaʼ stiʼ.
• Xiñee naquiiñeʼ gusisácanu ne guni respetarnu ca binnilídxinu ne ca binni ridagulisaa.
[Guendarinabadiidxaʼ stiʼ párrafo]
[Ca dibuju/foto ni zeeda lu yaza 12]
Ti hombre ni maʼ bichaganáʼ naquiiñeʼ gudii ni guibaniné binnilidxi ne gusiidiʼ laacabe de Dios
