Tami dullin meu püramyengepe ta Jehová

“Ti adümuhun-ngelu cüme raquiduamquei tañi chem chumal” (PRO. 14:15).

1, 2. 1) Taiñ dulliel mu, ¿chemu mülei taiñ raquiduamal? 2) ¿Chem ramtun inaduamaiñ?

 FILL ANTÜ dulliqueiñ chem chumal. Quiñeque müte falin-ngelai, caquelu dungu taiñ dulliel rume falin-ngei. Fei caletuafui taiñ mongen, huelu chem rume taiñ dulliel mülei ñi püramyeafiel ta Chau Jehová (papeltunge 1 Corintios 10:31).

² ¿Cüdautuqueimi tami dullial? Taiñ cüme cristianongerpual mülei taiñ quimal chem dungu ñi cümen ca chem dungu ñi cümenon. Cafei quisuque taiñ raquiduam mu dulliaiñ, caquelu che ñi duam mu no (Rom. 12:1, 2; Heb. 5:14). ¿Chumngelu mülei taiñ quimal chumngechi dullial? ¿Chumngelu quiñeque mu rume cüdaungei taiñ dullial? ¿Chumngechi cüme dulliafuiñ fei ñi püramyengeal ta Chau Dios?

¿Chumngelu mülei taiñ dullial?

3. ¿Chem dungu coneltulelayafui taiñ dulliel mu?

³ Epurume raquiduamlayaiñ taiñ inayal ti ngülam nüucülelu Biblia mu. Femnoliyiñ, taiñ pu compañ colegio ca cüdau mu raquiduamafuingün taiñ cüme feyentuquenon. Femngechi ngüneafeiñmeu, coilatuafuingün, hueñeafuingün ca feipiafeiñmu taiñ reyüconal quisu engün ñi femün mu. Feimu ngelai taiñ femngechi femal. Inayentulayafiyiñ tati huesaque dungu ñi femqueel epe com pu che (Éxo. 23:2). Quiñe cristiano quim dullilu ñi püramyeafiel ta Chau Jehová, duamtuquelai tañi cüme llohuaeteu ti pu che ca eluquelai chem no rume ñi catrütuafeteu inayal chem pilen ta Biblia (Rom. 13:5).

4. ¿Chumngelu pu che feipiafeiñmu chem taiñ chumal?

⁴ Quiñeque che, cüme duam mu feipiafeiñmu chem taiñ chumal. Quiñeque hueni feipiafeiñmu: “Iñche ngülamtuayu. Tüfa ta femaimi”. Cafei müleliyiñ taiñ familia cam femnoliyiñ, quisu engün ca ayüqueingün reyüconal taiñ dulliel mu fente taiñ piuqueyeniefiel. Raquiduamaiñ tati lahuentun dungu mu. Biblia cüme feipiqueiñmu ngelai taiñ tuculelngeal mollfüñ taiñ cuerpo mu (Hech. 15:28, 29). Mülei caquelu lahuentun dungu mu, quisuque pu cristiano ñi dullial tañi llohual cam llounoal. * Femngechi dulliliyiñ, taiñ pu familia caque rume dungu feipiafeiñmu. Huelu com pu cristiano mülei ñi loncontucual tüfachi dungu: caque quiñeque che ngüneduamuupe quisu tañi femün (Gál. 6:4, 5). Doyümaiñ taiñ ayühuelafiel ta Chau Dios, tati pu che no (1 Tim. 1:5).

5. Taiñ doi feyentuleal, ¿chumafuiñ?

⁵ Cuñihun-ngei epurume raquiduamcülen, ¿chumngelu? Chumngechi feipi ti discipulo Santiago, tati che epurume raquiduamcülelu nielai nor raquiduam tañi femal chem dungu no rume (Sant. 1:8). Feichi che feleafui quiñe huampo reque nienolu remo. Femngechi quenayauquei, cürüf pimunieyu. Femngechi ti che lloule pu che ñi raquiduam, fei püntütripayafui Chau Jehová mu. Quiñeque che tañi huesa dullin mu culpatuquefi ta caquelu che (1 Tim. 1:19). ¿Chumafuiñ taiñ femnoal feichi dungu? Mülei taiñ nehuencüleal ca yafüluucüleal taiñ feyentun mu (papeltunge Colosenses 2:6, 7). Quim dulliliyiñ, ¡nehuencüleaiñ! Femngechi pengelaiñ taiñ maneluucülen Chau Dios tañi feipin mu (2 Tim. 3:14-17). Quiñeque mu, cüdautuafuiñ taiñ cüme dullial, ¿chumngelu?

¿Chumngelu quiñeque mu rume cüdaungei taiñ dullial?

6. Tati llican, ¿chumngechi huesa duamelafeiñmu?

⁶ Rume llicaleafuiñ taiñ huelulcayal, fei rume huesa duamelafeiñmeu. Huesa dulliliyiñ, conafuiñ quiñe huesa dungu mu fei yehuelcayafeiñmeu. Feimu inei no rume ayüquelai femngechi rupayal. Piuqueyefiliyiñ ta Chau Dios ca tañi Dungu, feita quelluaiñmu taiñ llicalenoal. Cafei quelluaiñmu taiñ inaduamal Biblia ca fillque papel petu taiñ dullinon falinque dungu. Femngechi femliyiñ, müte huelulcalayaiñ, ¿chumngelu? Tati Biblia eluquefi adümuhun tati quimchengenolu ca eluquefi quimün ca ñi cüme raquiduamnieal tati pu huechequeche (Pro. 1:4).

7. ¿Chem quimeleiñmu David tañi rupan?

⁷ Taiñ ngüneduampeel mu, ¿feipipei mai taiñ turpu huelulcaunoal? ¡Femlai! Com huelulcauqueiñ (Rom. 3:23). Peaiñ ñi rupan ta David. Tüfachi huentru quimchengefui ca cüme poyequefui ta Jehová, huelu huesa dulli chem tañi femal. Feimu rume huesalcahui ca huesalcafi caquelu pu che (2 Sam. 12:9-12). Tañi huelulcan mu eluulai tañi ngañhuadelaeteu, fei ñi amuleal tañi ayühuelafiel ta Jehová tañi dullin mu (1 Rey. 15:4, 5). David reque, loncontucuaiñ Jehová perdonaqueiñmeu ca rulpacünui taiñ huelulcan. Ca Jehová quelluntucuquefi com tañi piuqueyeteu ca feyentuqueteu. Loncontuculiyiñ, llicalcalayaiñmu taiñ cuifique huelulcan (Sal. 51:1-4, 7-10).

8. ¿Chem quimeltuqueiñmu Pablo ñi feipin?

⁸ Taiñ dullin mu, rume raquiduamelqueiñmu, feimu ¿chem dungu quelluaiñmu taiñ tüngcüleal? Loncontucuaiñ: caquerumeafui taiñ dulliel fei cüme tripayai. Ngüneduamaiñ ñi feipin tati apostol Pablo nütramcalu tati curehuen dungu mu. Fei huirintucui: “Tati curengenolu cam fütangenolu deu rupale ñi huechengen, fei raquiduamle ñi pepi ngüneunoal cudumuhun dungu mu, niepe müten tañi afcadi. Femle, culpalai. Huelu quiñeque che duamlai afcadi, ca pepi ngüneuquei tañi illutun. Feimu tañi piuque mu ayüle ñi fütangenoal cam curengenoal, fei rüf eluule ñi femal tüfachi dungu, cümei tañi dulliel” (1 Cor. 7:36-38, Traducción del Nuevo Mundo [TNM]). Chumngechi feipilei ti texto, quiñe che ayüle ñi quisuleal, cümei tati pi Pablo, huelu curengele cam fütangele, ca cümeafui.

9. Taiñ dullin mu, ¿cümepei mai duamtuafiel caquelu che ñi feipin mu? Feipinge quiñe pengelün dungu.

⁹ Taiñ dullin mu, ¿cümepeafui mai duamtuafiel caquelu pu che ñi feipin? Quiñeque mu cümeafui. Peaiñ quiñe pengelün dungu. Cuifi mu chalintuculelngequefui ilo culliñ tati pu adentun, fei hula fendengequefui ñi ingeal. Pablo ngüneduami quiñeque che iñmule ilo culliñ, huesa femlayafui. Huelu hueluraquiduamelafui ti che nehuencülenolu ñi feyentun mu. ¿Chem dulli ñi femal Pablo? Fei feipi: “Ti iyael mu huelulcayafui tañi peñi. Feimu ihuelayan ilo, femngechi ñi huelulcanoafiel tañi peñi” (1 Cor. 8:4-13, TNM). Taiñ dullin mu iñchiñ ca mülei taiñ raquiduamtucunieafiel tati pu che. Huelu loncontucuaiñ: doi falin-ngei taiñ tuteafiel ta Jehová (papeltunge Romanos 14:1-4). ¿Chem quelluaiñmu taiñ cüme dullial fei ñi püramyengeal ta Chau Dios?

Cayu dungu taiñ cüme dullial

10, 11. 1) ¿Chem quelluaiñmu taiñ nongelcaunoal taiñ pu che engün? 2) Tati pu loncolelu, ¿chem mülei tañi loncontucual tañi dulliel trahunche mu?

¹⁰ Tami dullin mu, nongelcauquilnge. Hunelu mu mülei taiñ ramtuhual: “¿Iñche mülei tañi huneluucüleal tüfachi dullin mu?”. Ti rey Salomón huirintucui: “Checahun-ngen mu, fei cüpayai ti yehuen, huelu tati pu ñom chengelu niequeingün quimün” (Pro. 11:2).

¹¹ Pu chau quiñeque mu mülei ñi eluhual ñi pu yall ñi quisu dullial, huelu tüfa feipilai ñi pu yall quisu ñi ngünehual tañi dullial (Col. 3:20). Pu ñuque mülei tañi ngünenieal tañi pu yall, huelu mülei tañi quimtucunieal pu chau loncolei tañi familia mu (Pro. 1:8; 31:10-18; Efes. 5:23). Huelu tüfa engün mülei tañi quimtucunieal Cristo am loncolelu quisu engün mu (1 Cor. 11:3). Ti trahunche mu, pu loncolelu dulliqueingün tañi cüme feleal pu peñi ca pu lamngen. Tati pu loncolelu mülei ñi femal tati huiriconcülelu Biblia mu müten (1 Cor. 4:6). Ca femngechi mülei ñi inayafiel chem pin ti quim manelfal cüdaufe (Mat. 24:45-47). Ayüleiñ taiñ cutrancaumequenoal iñchiñ ca caquelu pu che. Nongelcaulayaiñ. Ñom chengeliyiñ, femngechi dulliaiñ iñchiñ taiñ duam mu müten.

12. 1) ¿Chumngelu falin-ngei hune ngüneduamal com dungu? 2) ¿Chem dungu ngüneduamafuiñ?

¹² Com cüme ngüneduamnge. Salomón huirintucui: “Chem ñi adcünuel tati cüme cüdauquelu, cüme tripayai llemai, huelu tati matucaufe fillalerpuai” (Pro. 21:5). Peaiñ quiñe pengelün dungu. ¿Eimi ofrecelngequeimi quiñe negocio? Yeufaluulayaimi tami piuque mu, com cüme ngüneduamnge. Ramtuafimi tati doi quimfilu ti dungu ca ngüneduamnge chem pilen Biblia (Pro. 20:18). Cafei huirintucuafuimi chumngechi tripapeafui mai tami dulliel. Loncontucuaimi ñi chumquen ti quim cristiano: cüme raquiduamquei chem tañi dullial (Luc. 14:28). Raquiduamnge tami dullin mu mülei tami doi hueniyeafiel ta Chau Dios, re tami huehual plata müten no. Iñchiñ cüdautuafuiñ ca elcünuafuiñ tiempo taiñ ngüneduamal com ti dungu, huelu cüme dulliaiñ taiñ chumal. Fei tranaconlayaiñ huesaque dungu mu.

13. 1) ¿Chem maneluhun elueiñmu Santiago 1:5? 2) ¿Chumngelu mülei taiñ llellipuafiel ta Chau Dios taiñ eluaeteu quimün?

¹³ Ngillatunge tami nieal quimün. Iñchiñ mülei taiñ llellipual, femngechi taiñ dullin mu püramyeafiyiñ ta Chau Dios. Santiago feipi: “Quiñeque eimün nienolmün Ngünechen ñi quimün, ngillatufimün ta quisu, fei Ngünechen ta eluaimünmeu. Quisu eluquefi itrocom che ñi quimael quisu ñi cüme dungu ca chem dungu rume ñi feipiel felequei müten” (Sant. 1:5). Llellipufiliyiñ ta Chau Dios taiñ quelluaeteu cüme dullial, yehuelcaulayaiñ (Pro. 3:5, 6). Quisu taiñ pin mu müten maneluuliyiñ, huesa tripayafuiñ. Llellipunieafiyiñ ta Jehová taiñ eluaeteu quimün ca ngüneduamnieafiyiñ ñi chem pilen Biblia. Femngechi femliyiñ, Chau Ngünechen ñi cüme nehuen quelluaiñmu quimürpual chumngelu dulliqueiñ chem chumal (Heb. 4:12; papeltunge Santiago 1:22-25).

14. ¿Chemu ngelai ñi alüñmayal taiñ dullial?

¹⁴ Dullinge tami chumal. Matu dullilayaiñ. Hunelu mülei taiñ ngüneduamal ti dungu ca llellipuafiel ta Jehová taiñ eluaeteu quimün. Femngechi femquei tati quimchengelu, “cüme raquiduamquei tañi chem chumal” (Pro. 14:15). Huelu alüñmalayaiñ taiñ dullial. Tati che epurume raquiduamquelu entuquei chem rume tañi dullinoal (Pro. 22:13). Huelu femlu tüfa, eluquei caquelu che ñi dullial chem tañi chumal.

15, 16. ¿Chumafuiñ taiñ femürpual taiñ dulliel?

¹⁵ Femnge tami dulliel. Taiñ cüme dullial rume yafüluuqueiñ, huelu femnoliyiñ taiñ dulliel, com ngünamcangeafui. Salomón feipi: “Com dungu tami femal tami cuhu mu, femnge com tami nehuen mu” (Ecl. 9:10). Chumafuiñ rume taiñ femtriparpual taiñ cüme dulliel. Raquiduamaiñ quiñe pengelün dungu: quiñe cristiano ayüi ñi precursorngeal, ¿cüme tripapeafui mai tañi femquen? Cüme dullile tañi cüdau ca chumngechi tañi cüme rupaleal, ¡femafui llemai! Huelu femnole, nielayafui tiempo tañi amuldungual.

¹⁶ Quiñeque mu, rume cüdaungeafui femtripayal taiñ cüme dulliel, ¿chumngelu cai? Biblia feipi: “Com tüfachi chüf mapu ñi ngünenieteu tati huecüfü ñi pepiluhun” (1 Juan 5:19). “Doi mai hueichaquefiyiñ pu gobierno, pu autoridad, tati pu ngünenielu tüfachi mapu dumiñmalelu, fei tüfa tati pu huecüfü huenu mu mülelu” (Efes. 6:12, TNM). Chumngechi feipilei Pablo ca Judas, com pu che ayülu ñi püramyeafiel ta Chau Jehová conquei feichi fütra hueichan reque (1 Tim. 6:12; Jud. 3).

17. ¿Chem ayüquei Chau Jehová taiñ femal?

¹⁷ Ngüneduamnge ñi chum tripan ñi dulliel, femngechi ñi cüme huechutripayal. Quiñeque mu, com femürpulayafuiñ chumngechi taiñ ayünieel, ¿chumngelu? Com iñchiñ huesa ruparumeafuiñ (Ecl. 9:11). Quiñeque mu, Chau Jehová ayüniei taiñ femürpuafiel taiñ dulliel chem dungu rupale rume. Quiñeque dungu taiñ dulliel, fei taiñ nieal afcadi ca hultucual taiñ mongen ta Chau Jehová mu (papeltunge Salmo 15:1, 2, 4). Huelu caquelu dungu taiñ dulliel müte falin-ngelai, huelu tati quim cristiano cüme ngüneduamai tañi dulliel. Huelulcaule rume, mallma piuquengelayai. Fei chumai rume tañi cüme femürpuafiel tañi dulliel (Pro. 16:18). Doi falintuniefi tañi püramyeafiel ta Chau Jehová.

Quimeltucheaiñ chumngechi püramyeafiel ta chau dios taiñ dullin mu

18. Pu chau ca pu ñuque, ¿chumngechi quimelelafuingün tañi pu yall tañi cüme dullial?

¹⁸ Pu chau ca pu ñuque rume quelluafuingün tañi pu yall tañi cüme dullial, fei ñi püramyeafiel ta Chau Jehová. Tañi femün mu engün, quimelelafuingün tañi femal (Luc. 6:40). Quimelelafuingün tañi chumün petu tañi dullinon. Quiñeque mu quiñe chau cam quiñe ñuque eluhuafui tañi yall ñi dullial. Cüme dullile engün mülei tami saquiafiel. Huelulcaule tami yall, pürüm cuñiutucuafiñ piafuimi, huelu cümelayafui quiñeque mu. Peaiñ quiñe pengelün dungu. Quiñe chau eluhui tañi fotüm ñi entual licencia tañi manejayal. Huelu petu miyaulu auto mu, ti fotüm huesa femi fei entumultangei. Ñi chau culliafui, ¿felei? Huelu feipifile tañi fotüm ñi cüdahual tañi cullial ti multa, femngechi quimconafui tañi femün (Rom. 13:4).

19. 1) ¿Chem mülei taiñ quimelelafiel tati pu estudiaquelu? 2) ¿Chumngechi femafuiñ?

¹⁹ Jesús pengelcünui com iñchiñ taiñ quimeltucheal (Mat. 28:20). Iñchiñ quimelelafuiñ pu estudiaquelu tañi cüme dullial. Tüfa rume falin-ngei. Taiñ cüme femal, mülei taiñ ngünehual taiñ feipinoafiel chem tañi chumal. Doi cümeafui raquiduamelafiel engün ca quelluafiel inaduamal Biblia ñi feipin. Femngechi quisuque dullial engün. Feimu Biblia feipi: “Caque quiñeque iñchiñ juzgayaiñmeu Chau Ngünechen” (Rom. 14:12, TNM). Felei llemai, amulepe taiñ püramyefiel ta Chau Jehová taiñ cüme dullin meu.

[Quimngeal dungu]

¿Chem huiñoldunguafuimi?

• ¿Chumngelu fente falin-ngei taiñ quim dullial?

• ¿Chumngechi huesalcayafeiñmu ti llican? Huelu, ¿chumngechi chaftuafiyiñ?

• ¿Chem cayu dungu mülei taiñ femal taiñ püramyeafiel ta Chau Dios?

[Tati chillcatun ñi ramtun]

[Huichulechi dungu/​Adentun]

Cayu dungu taiñ cüme dullial

1 Tami dullin mu, nongelcauquilnge

2 Com cüme ngüneduamnge

3 Ngillatunge tami nieal quimün

4 Dullinge tami chumal

5 Femnge tami dulliel

6 Ngüneduamnge fei ñi cüme huechutripayal

[Adentun]

Tati che epurume raquiduamquelu trürümuuquei quiñe huampo nienolu remo