Maan ajalɛ nga é fá’n be yo naan Ɲanmiɛn ɲan ɲrun
Maan ajalɛ nga é fá’n be yo naan Ɲanmiɛn ɲan ɲrun
“Sran ng’ɔ si sa’n kusu, ɔ niɛn i ja ng’ɔ tu’n su kpa.”—NYA. 14:15.
1, 2. (a) ?Ajalɛ kwlaa nga é fá be’n be nun’n, like benin yɛ ɔ fata kɛ ɔ yo e cinnjin kpafuɛ’n niɔn? (b) ?Kosan benin mun yɛ é wá kókó be su yalɛ ɔ?
CƐN ba kun nun’n, e fa ajalɛ kpanngban kpa. Be nun sunman be sin sa’n timan kekle sɔ liɛ. Sanngɛ wie’m be liɛ’n, be sin sa’n kwla kaci e mɛn dilɛ wafa’n. Ajalɛ kwlaa nga e fa’n nun’n, like ng’ɔ ti e cinnjin’n, yɛle kɛ maan Ɲanmiɛn ɲan ɲrun.—An kanngan 1 Korɛntfuɛ Mun 10:31 nun.
2 ?Ajalɛ falɛ’n ti pɔpɔ man amun? ?Annzɛ kusu i falɛ’n ti kekle? Sɛ e kunndɛ kɛ é káci Klistfuɛ m’ɔ wun sa wlɛ’n, ɔ fata kɛ e si ngbaciɛ ng’ɔ o sa tɛ’n nin sa kpa’n be afiɛn’n. Kpɛkun e jran su e fa ajalɛ. Nán maan e nian sran uflɛ i sa ng’ɔ si be’n su e fa ajalɛ. (Rɔm. 12:1, 2; Ebr. 5:14) ?Sa cinnjin uflɛ benin wie’m be ti yɛ ɔ fata kɛ e sɔnnzɔn ajalɛ kpa falɛ ɔ? ?Ngue ti yɛ ɔ ju wie’n ajalɛ falɛ’n ti klekle man e ɔ? ?Yɛ ninnge benin yɛ e kwla yo naan ajalɛ nga é fá’n b’a yo naan Ɲanmiɛn w’a ɲan ɲrun ɔn?
?Ngue li ti yɛ ɔ fata kɛ e fa ajalɛ kpa’n niɔn?
3. ?Kɛ é fá ajalɛ’n, ngue yɛ ɔ fataman kɛ e mɛn i atin naan ɔ tanndan e ja nun ɔn?
3 Ajalɛ falɛ’n nun’n, ɔ fata kɛ e jran Biblu’n nun mmla’m be su. Sɛ e wunman Biblu’n nun mmla trele ng’ɔ fata kɛ e jran su’n, e wiengu suklu mma mun annzɛ e wiengu junman difuɛ’m be kwla bu i kɛ e siman like nga e lafi su’n. Kpɛkun be kwla yo maan e fa ajalɛ tɛ. Be kwla bua ato, annzɛ be di ndrunmun annzɛ be wua kpɛkun be se kɛ e nin be e “bo yo kun” naan e yo i sɔ sa’n. Annzɛ be kwla se e kɛ e fia su. (Tul. 23:2) Sanngɛ sran ng’ɔ si wafa ng’ɔ fata kɛ ɔ fa ajalɛ naan Ɲanmiɛn w’a ɲan ɲrun’n, srongble’n ti ɔ su faman ajalɛ ng’ɔ nin i klun akunndan’n mɔ Biblu’n tinngɛli i’n be kɔman likawlɛ’n.—Rɔm. 13:5.
4. ?Ngue ti yɛ sran wie’m be kwla kunndɛ kɛ bé fá e ti ajalɛ ɔ?
4 Nán be nga be kunndɛ kɛ bé fá e ti ajalɛ’n be ngba yɛ be bu e wun akunndan tɛ ɔ. Aniaan wie mɔ be kunndɛ kɛ bé úka e’n bɔbɔ’n, be nun wie’m be kwla jran su kpa kɛ e fa be ajalɛ liɛ’n su. Kannzɛ e tranman e si nin e nin’m be bo wun kun bɔbɔ’n, sanngɛ e ndɛ te lo be. Ɔ maan wie liɛ’n be kunndɛ kɛ bé fá be wun wlɛ́ i ajalɛ cinnjin nga é fá’n nun. I wie yɛle are yolɛ’n. Like nga be fa mmoja’n yo m’ɔ timan su’n, Biblu’n bu i fɔ weiin. (Yol. 15:28, 29) Sanngɛ are yolɛ’n i su ndɛ wie’m be o lɛ’n, Biblu’n kanman be ndɛ sa trele. Ɔ maan sɛ sran kun kplín su kɛ be fa are sɔ’n be yo i o, annzɛ sɛ ɔ su kplinman su o, ɔ ti kɛ i bɔbɔ sa. * Are yolɛ sɔ’n i su akunndan nga e awlɛn su sran’m be bu’n, be kwla jran su kpa. Sanngɛ i sɔ ajalɛ’m be falɛ’n nun’n, ɔ fata kɛ Klistfuɛ kun m’ɔ fɛli i wun mannin Ɲanmiɛn mɔ be yoli i batɛmu’n, i ‘bɔbɔ yɛ ɔ suɛ i trɔ nin-ɔn.’ (Gal. 6:4, 5) I lɛ nun’n, nán klɔ sran’m be ɲrun dunman yɛ e kunndɛ ɔ, sanngɛ like ng’ɔ ti e cinnjin’n yɛle kɛ Ɲanmiɛn ɲrun’n nán maan e klun akunndan’n bu e fɔ.—1 Tim. 1:5.
5. ?Ngue yɛ e kwla yo naan y’a yaciman Ɲanmiɛn sulafilɛ mlɔnmlɔn ɔn?
5 Sɛ e wunman ajalɛ trele ng’ɔ fata kɛ e fa’n, sa kwla ɲan e. Zezi i sɔnnzɔnfuɛ Zaki klɛli i kɛ sran nga i akunndan ti nɲɔnnɲɔn’n, “i sa’n kwlaa nun ɔ kacikaci.” (Zak 1:8) Ɔ ti kɛ mmeli mɔ aunmuan’n fɛ i kɔ wa kɔ wa’n i nun sran sa. Ɔ maan klɔ sran’m be akunndan mɔ be kwlá lafiman su m’ɔ kacikaci’n i wie yɛ ɔ bu ɔ. I sɔ sran liɛ’n kwla yaci Ɲanmiɛn sulafilɛ mlɔnmlɔn, kpɛkun ɔ fa guɛ i sran uflɛ su. (1 Tim. 1:19) ?Ngue yɛ e kwla yo naan sa kɛ ngalɛ sa’n w’a ɲanman e ɔ? Ɔ fata kɛ e “lafi [Nyanmiɛn] i su kpa.” (An kanngan Kolɔsfuɛ Mun 2:6, 7 nun.) Sɛ e waan e Ɲanmiɛn sulafilɛ’n i bo’n wla ase kpa’n, ɔ fata kɛ e suan wafa nga e kwla fa ajalɛ ng’ɔ kle kɛ e lafi Ɲanmiɛn i Ndɛ’n su’n. (2 Tim. 3:14-17) ?Sanngɛ like benin ti yɛ ajalɛ falɛ’n kwla yo kekle man e ɔ?
Like nga ti yɛ ajalɛ falɛ’n kwla yo kekle’n
6. ?Wafa sɛ yɛ srɛ’n kwla tin e su ɔ?
6 Kɛ mɔ e bu i kɛ ajalɛ nga é fá’n ɔ́ yó tɛ annzɛ e su kwlá yomɛn i nuan su sa’n ti’n, srɛ kwla kun e. Annzɛ kusu e kwla bu i kɛ sɛ e fa ajalɛ wie’n sran’m bé bú e sinnglinfuɛ. I yo, i sɔ srɛ’n kwla kun e. Afin sran fi kunndɛman kɛ ɔ́ fá ajalɛ tɛ naan ɔ ɲan su ndɛ annzɛ ɔ wun ɲannzuɛn bɔbɔ. Kannzɛ ɔ ti sɔ’n, sanngɛ klolɛ nga e klo Ɲanmiɛn nin i Ndɛ’n, ɔ kwla uka e naan srɛ w’a kunman e ngboko. ?Wafa sɛ? Ɲanmiɛn mɔ e klo i’n ɔ́ yó maan é dún mmua nían i Ndɛ’n nin Biblu’n i akua’m be nun kwlaa ka naan y’a fa ajalɛ cinnjin mun. I liɛ’n e su diman fɔ ngboko. ?Ngue ti ɔ? Afin Biblu’n kwla yo naan “be nga be si-man sa’n, b’a si like ng’ɔ ti kpa’n annzɛ ng’ɔ ti tɛ’n, naan gbanflɛn’m b’a si sa, naan b’a si akunndan bulɛ’n i wun atin’n.”—Nya. 1:4.
7. ?Ngue yɛ famiɛn Davidi i su ndɛ’n kle e ɔ?
7 ?Ajalɛ nga é fá’n i kwlaa kpan yó kpa? Cɛcɛ. Afin e ngba e fɔn. (Rɔm. 3:23) I wie yɛle Famiɛn Davidi i liɛ’n. Ɔ si ngwlɛlɛ kpa yɛ ɔ ti Ɲanmiɛn sufuɛ kpa. Sanngɛ ɔ juli wie’n ɔ fali ajalɛ tɛtɛ. Ajalɛ sɔ maan afɛ tɔli i bɔbɔ nin sran uflɛ’m be su. (2 Sam. 12:9-12) Ɔ nin i sɔ ngba’n, Davidi w’a seman kɛ, kɛ m’ɔ fali ajalɛ tɛ laa’n ti’n, ɔ nin Ɲanmiɛn be nantilɛ’n nun’n ɔ wunman ajalɛ trele kun ng’ɔ ti m’ɔ fa’n. (1 Fam. 15:4, 5) Kɛ Davidi sa’n, sɛ e wla kpɛn su kɛ Zoova su boman fɔnlɛ nga e fɔnnin’n su diman jɔlɛ kun’n, kannzɛ e fali ajalɛ tɛ laa’n, sanngɛ é kwlá fá ajalɛ ekun. Be nga be klo Zoova mɔ be ɲin yi i’n, ɔ́ súan be bo tititi.—Jue. 51:3-6, 9-12.
8. ?Ngue yɛ aja’n i su ndɛ nga akoto Pɔlu kannin’n, ɔ kle e ɔ?
8 E kwla yo maan ajalɛ falɛ’n i wun srɛ ng’ɔ kun e’n, ɔ kan ase. ?Wafa sɛ? Yɛle kɛ maan e wun i wlɛ kɛ ɔ ju wie’n, sa kun i su ajalɛ kpa nga e kwla fa’n be sɔnnin. Maan e bu wafa nga akoto Pɔlu kannin aja’n i ndɛ’n i akunndan e nian. Ɲanmiɛn maan ɔ klɛli i kɛ: “N se be nga be nian ja-man bla nin bian’n, ɔ nin angboti mmla’m be kɛ be liɛ’n sɛ be ka kɛ min sa’n, ɔ ti kpa. Sanngɛ sɛ be kwlá tra-man be anwlɛn’n, maan be ja bla nin bian, afin sɛ be ja kun’n, ɔ ti kpa tra kɛ be konvi tran bla nin bian su’n.” (1 Kor. 7:8, 9) Pɔlu waan sɛ sran kun w’a jaman bla annzɛ bian’n ɔ ti kpa. Sanngɛ w’a seman kɛ i sɔ’n ngunmin yɛ ɔ ti kpa ɔ.
9. ?Ɔ fata kɛ ajalɛ nga e fa’n, be su akunndan nga sran’m be bu’n, ɔ yo e cinnjin? An yiyi nun.
9 ?Ɔ fata kɛ ajalɛ mɔ e fa’n, be su akunndan nga sran’m be bu’n, ɔ yo e cinnjin? Ɛɛn, ɔ kwla yo e cinnjin wafa wie lɛ. Maan e fa e ɲin e sie i ndɛ nga Pɔlu kɛnnin i nnɛn nga atrɛkpa’n be fa sɔli amuɛn’n i dilɛ’n su. Ɔ dili i nanwlɛ kɛ wie liɛ’n, ajalɛ kun bɔbɔ ba’n sa timan tɛ. Sanngɛ ɔ kwla yo be nga be nin a wunman ninnge ngba wlɛ’n be tɛ. ?I sɔ’n ti’n nda benin yɛ Pɔlu tali ɔ? Ɔ klɛli i kɛ: “Sɛ nnɛn yɛ n ko di n ko saci min niaan’n, n su di-mɛn i kun le naan m’an saci-man min niaan’n.” (1 Kor. 8:4-13) E kusu ɔ fata kɛ e bu wafa nga e ajalɛ nga e fa’n, be kwla sanngan sran uflɛ’m be ti nun’n i akunndan wie. Sanngɛ kusu like ng’ɔ ti e cinnjin’n, yɛle wafa nga e ajalɛ nga e fa be’n be kan e nin Zoova e janvuɛ tralɛ’n. (An kanngan Rɔmfuɛ Mun 14:1-4 nun.) ?Biblu’n nun mmla benin mun yɛ be kwla uka e naan ajalɛ nga e fa’n b’a yo naan Ɲanmiɛn w’a ɲan ɲrun ɔn?
Ninnge nsiɛn mɔ maan e kwla fa ajalɛ kpa’n
10, 11. (a) ?Wafa sɛ yɛ e kwla kpalo tutre dilɛ’n awlobo’n nun ɔn? (b) ?Kɛ asɔnun kpɛnngbɛn’m bé fá ajalɛ ng’ɔ kan asɔnun’n, ngue yɛ ɔ fataman kɛ be wla fi su ɔ?
10 Nán e yo tutrefuɛ. Ka naan y’a fa ajalɛ kun’n, ɔ fata kɛ e usa e wun kɛ: ‘?N le atin n fɛ i sɔ ajalɛ liɛ’n?’ Famiɛn Salomɔn klɛli i kɛ: “Tutre’n i sinma yɛlɛ nyannzuɛn. Akunndan’n kusu ti wun ase kanfuɛ’m be liɛ.”—Nya. 11:2.
11 Wie liɛ’n, siɛ nin niɛn’m be kwla man be mma’m be atin kɛ be fa ajalɛ wie mun. Sanngɛ ɔ nin i fataman kɛ ba’m be bu i kɛ be tiaun be le atin be fɛ i sɔ ajalɛ mun. (Kol. 3:20) Awlo’n nun’n, bla nga be le ba’n be kwla fa ajalɛ wie mun. Sanngɛ ɔ ti kpa kɛ be wun i wlɛ kɛ be wun mun yɛ be ti be su kpɛn’n niɔn. (Nya. 1:8; 31:10-18; Efɛ. 5:23) I kunngba’n, ɔ fata kɛ yasua’m be wun i wlɛ kɛ be leman atin be faman be klunklo ajalɛ kwlaa. Maan be si kɛ Klist ti be su kpɛn. (1 Kor. 11:3) Ajalɛ nga asɔnun kpɛnngbɛn’m be fa’n, ɔ kan asɔnun wunmuan’n. Sanngɛ be nian nun kpa naan Ɲanmiɛn i ‘ndɛ nga be klɛli’n, b’a fa su’ sɛsɛsɛ. (1 Kor. 4:6) Asa ekun’n be nian ajalɛ nga sran kpa nanwlɛfuɛ’n kle’n i su kpa. (Mat. 24:45-47) Maan e kan e wun ase naan ajalɛ nga be man e atin kɛ e fa’n, yɛ e fa ɔ. Sɛ e yo sɔ’n, kekle su tɔman e bɔbɔ nin sran uflɛ’m be su, yɛ ngokɔɛ’n su tɔman e su wie.
12. (a) ?Ngue ti yɛ ɔ fata kɛ e usa ngwlɛlɛ afɛ ɔ? (b) Wafa nga sran kun kwla usa ngwlɛlɛ afɛ’n, an yiyi nun.
12 Maan e usa ngwlɛlɛ afɛ. Salomɔn klɛli i kɛ: “Sran ng’ɔ́ yó like-ɔ ɔ sunnzun i klun naan w’a yo’n, ɔ́ dí alaje. Nga kusu b’ɔ kpli yo like’n, awe’n yɛ ɔ nin i bé yía nun-ɔn.” (Nya. 21:5) Maan ɔ yo kɛ b’a fa aata dilɛ like wie b’a kle e kɛ e yo sa. Sɛ ɔ ti sɔ’n, nán e yaci wafa nga e wun fa yo e’n i lɛ naan ɔ sanngan e akunndan’n. Maan e kunndɛ aata sɔ’n i su ndɛ wie mun. Be nga be di i sɔ aata’n titi’n maan e usa be ngwlɛlɛ afɛ. Kpɛkun maan e kunndɛ Biblu’n nun mmla nga be kɛn i sɔ’n i ndɛ’n. (Nya. 20:18) Kɛ ɔ ko yo naan ninnge nga e kunndɛkunndɛ be sɔ’n b’a yo sɛsɛ’n, maan e klɛ ninnge akpasua nɲɔn e sie. Akpasua kun yiyi aata sɔ’n i su mmlusuɛ’m be nun. Kpɛkun kun kan kalɛ ng’ɔ fata kɛ e bo’n ɔ nin ninnge nga be kwla mian e sa’n be ndɛ. Yɛ ka naan y’a fa ajalɛ’n, maan e ‘bu i sika’n e nian.’ (Lik 14:28) Sɛ e fa ajalɛ’n, wafa nga sika ndɛ’n kwla mian e sa’n, ɔ nin wafa nga i sɔ’n kwla yo maan e nin Zoova e afiɛn’n saci’n, maan e dun mmua e bu i akunndan. Sa kun i su like kunndɛkunndɛlɛ’n ɔ timan pɔpɔ. Afin ɔ fa e blɛ nin e wunmiɛn’n. Sanngɛ sɛ e yo sɔ’n, e su kpliman e tuman e je naan e ti’n w’a wun e su ngbɛn.
13. (a) ?Zak 1:5 se e sɛ? (b) ?Sɛ e srɛ Ɲanmiɛn kɛ ɔ man e ngwlɛlɛ’n, wafa sɛ yɛ i sɔ’n kwla uka e ɔ?
13 Maan e srɛ Ɲanmiɛn naan ɔ man e ngwlɛlɛ. Saan sɛ e se Ɲanmiɛn kɛ ɔ uka e naan e fa ajalɛ’n yɛ e ajalɛ sɔ’m bé yó naan w’a ɲan ɲrun ɔn. Zezi i sɔnnzɔnfuɛ Zaki klɛli i kɛ: “Sɛ ngwlɛlɛ’n w’a ti-man amun nun wie kpa’n, maan ɔ kan kle Nyanmiɛn bɔ i sa ti-man tankaan’n, b’ɔ fa like man sran’m be kwlaa ɔ ijɔ-mɛn i sin’n. Ɔ maan sran sɔ’n ɔ́ wún sa wlɛ.” (Zak 1:5) Maan e di e wun nanwlɛ kɛ ɔ fata kɛ e ɲan ngwlɛlɛ m’ɔ fin Ɲanmiɛn’n naan y’a kwla fa ajalɛ kpa. Nán maan ɲannzuɛn kun e i sɔ yolɛ’n nun. (Nya. 3:5, 6) Afin i kwlaa yoli o sɛ e lafi e bɔbɔ e akunndan’n su’n, e mlinlɛ su yoman ya. Kɛ e srɛ Ɲanmiɛn kɛ ɔ man e ngwlɛlɛ mɔ e kunndɛ Ɲanmiɛn Ndɛ’n nun mmla nga be kwla uka e’n, e man Ɲanmiɛn wawɛ’n i atin kɛ ɔ uka e naan e wun sa nga ti yɛ e waan é fá ajalɛ kun’n.—Ebr. 4:12; an kanngan Zak 1:22-25 nun.
14. ?Ngue ti yɛ ɔ fataman kɛ e tu ajalɛ falɛ’n i blɛ’n e sie ɔ?
14 Maan e fa ajalɛ’n. Nán maan e kpli e fa ajalɛ. Maan e kunndɛkunndɛ ajalɛ ng’ɔ fata kɛ e fa’n i su like naan e srɛ Ɲanmiɛn’n ka. Ngwlɛlɛfuɛ’n “ɔ niɛn i ja ng’ɔ tu’n su kpa.” (Nya. 14:15) Sanngɛ kusu nán maan e tu ajalɛ falɛ’n i blɛ’n e sie lele. Sran nga ɔ yo sɔ’n, ɔ kwla kan ndɛ ngbɛnngbɛn wie mun naan w’a faman ajalɛ’n. (Nya. 22:13) Kannzɛ bɔbɔ ɔ yo sɔ o, ajalɛ kun yɛ w’a fɛ i lɛ ɔ. Yɛle kɛ ɔ fali ajalɛ kɛ sran uflɛ mun yɛ be sie i ɔ.
15, 16. ?Ngue yɛ ɔ fata kɛ e yo naan y’a kwla yia ajalɛ nga e fa’n i nuan ɔn?
15 Ajalɛ nga e fali’n, maan e yiɛ i nuan. Sɛ y’a nianman nun kpa y’a yiaman ajalɛ nga e fali’n i nuan’n, nn e ɲin nga e miannin naan y’a fa ajalɛ kpa’n ɔ yoli ngbɛn. Salomɔn klɛli i kɛ: “Like kwlaa nga á yó’n, fa ɔ wunmiɛn’n gua su yó.” (Aku. 9:10) Sɛ e waan é yía ajalɛ nga e fali’n i nuan’n, ɔ fata kɛ e yo ninnge wie mun. I wie yɛle kɛ jasin bofuɛ kun kwla fa ajalɛ kɛ ɔ́ káci atin bofuɛ. ?Ɔ́ yó sɛ naan w’a kwla yia ajalɛ sɔ’n i nuan? Yɛle kɛ nán maan ɔ yaci i junman’n nin i ɲin su yiyilɛ’n be lɛ naan be fɛ i wunmiɛn’n nin i blɛ ng’ɔ fata kɛ ɔ fa bo jasin’n. Sɛ ɔ yo sɔ’n yɛ ɔ́ kwlá káci atin bofuɛ ɔ.
16 Ajalɛ kpakpa’m be nuan yialɛ’n ti kekle. ?Ngue ti ɔ? Afin “klunwifuɛ’n sie mɛn wunmuan’n.” (1 Zan 5:19) “E nin mmusu mun, nin aosin tuun nga e o nun yɛ’n i min’n i kpɛnngbɛn mun, yɛ mmusu tɛtɛ bɔ be o nglo lɔ’n” yɛ ɔ fata kɛ e kun ɔn. (Efɛ. 6:12) Akoto Pɔlu nin Zezi i sɔnnzɔnfuɛ Zidi be nɲɔn’n be kleli kɛ be nga be waan bé mánmán Ɲanmiɛn’n, saan bé kplí kpa.—1 Tim. 6:12; Zid 3.
17. ?E ajalɛ’m be nuan yialɛ’n nun’n, ngue yɛ Zoova kunndɛ kɛ e yo ɔ?
17 Maan e bu ajalɛ’n i akunndan ekun naan sɛ ɔ fata kɛ e siesie i ye’n, y’a siesie. Ajalɛ nga e fa be’n, nán be ngba yɛ be nuan yia sɛsɛ kɛ nga e fa siesieli’n sa ɔ. Afin e siman e ɲrun lɔ sa. (Zak 4:13, 14) Kannzɛ ɔ ti sɔ’n, sanngɛ Zoova kunndɛ kɛ sɛ ajalɛ wie’m be nuan like yolɛ’n mian e sa’n maan e jran kekle. Sɛ sran kun fa ajalɛ kɛ ɔ́ fɛ́ i wun mán Ɲanmiɛn’n, saan ɔ́ yó i nuan su sa. Ɔ lemɛn i yowlɛ uflɛ kun. Ɔ ti kɛ nda nga be tɛ i aja’n nun’n sa. Ɲanmiɛn kunndɛ kɛ e nanti e ajalɛ sɔ’n su titi. (An kanngan Jue Mun 15:1, 2, 4 nun.) Kusu ajalɛ sunman be nuan yialɛ’n timan kekle. Sran ng’ɔ si ngwlɛlɛ’n ɔ ju blɛ wie’n, ɔ tran ase bu ajalɛ ng’ɔ fali be’n be su akunndan. Sɛ ɔ fata kɛ ɔ kaci i sa’n, ɔ su diman tutre. Ɔ́ káci. (Nya. 16:18) Like ng’ɔ ti sran sɔ’n i cinnjin’n, yɛle kɛ maan ninnge ng’ɔ yo be’n be manman Ɲanmiɛn titi.
Maan amun uka sran uflɛ naan ɔ fa ajalɛ nga be manman Ɲanmiɛn’n
18. ?Wafa sɛ yɛ siɛ nin niɛn’m be kwla kle be mma’m be ajalɛ kpa falɛ ɔ?
18 Siɛ nin niɛn’m be kwla uka be mma mun kpa naan b’a si wafa nga be kwla fa ajalɛ nga be manman Ɲanmiɛn’n. Amun mɔ amun kle be like’n, amun ajalɛ kpa’n su yɛ bé nían ɔn. (Lik 6:40) Wafa nga siɛ nin niɛn’m be fali ajalɛ wie’n, be kwla yiyi nun be kle be mma mun. Asa ekun’n, be kwla man be mma’m be atin kɛ be fa ajalɛ wie mun. Kpɛkun sɛ ajalɛ sɔ’n yo ye’n be yo be mo. ?Yɛ sɛ ba’n fa ajalɛ tɛ’n nin? Like klikli nga siɛ kun annzɛ niɛn kun kwla yo’n, yɛle kɛ ɔ́ yó naan nán ba’n i ajalɛ tɛ’n i su afɛ’n tɔ ba’n su. Sanngɛ nán blɛ ngba nun yɛ i sɔ’n úka ba’n niɔn. Ɔ kwla yo kɛ siɛ annzɛ niɛn sɔ’n ɔ mɛn i wa’n i atin kɛ ɔ ko pase pɛlimi sa. I sin’n ba sɔ’n ɔ tɔn loto nun cisanlɛ mmla kun. Ɔ maan b’a fu i alamannin. Siɛ’n annzɛ niɛn’n kwla tannin kalɛ sɔ’n. Sanngɛ sɛ be se ba’n i kɛ ɔ di junman naan w’a fa tannin i alamannin’n, cɛn uflɛ ka naan w’a fa ajalɛ’n ɔ́ bú i sin kpa.—Rɔm. 13:4.
19. ?Ngue yɛ ɔ fata kɛ e kle Biblu’n nun like suanfuɛ mun ɔn? ?Yɛ wafa sɛ yɛ e kwla yo sɔ ɔ?
19 Zezi seli i sɔnnzɔnfuɛ’m be kɛ be kle be wiengu’m be like. (Mat. 28:20) Ninnge cinnjin kpa nga e kwla kle be nga be nin e suan Biblu’n nun like’n, be nun kun yɛle wafa nga be kwla fa ajalɛ kpa’n. Sɛ e waan é sí i sɔ’n yo kpa’n, ɔ fata kɛ e tra e awlɛn naan y’a faman be ti ajalɛ. Sɛ e kle be wafa nga be kwla jran Biblu’n nun mmla’m be su be fa be tiaun ajalɛ’n, ɔ flunman lele. Afin i kwlaa yoli o “e kwlaa é wá kán sa nga e yoli be’n klé Nyanmiɛn.” (Rɔm. 14:12) I sɔ’n ti’n, ɔ ti cinnjin man e kɛ e fa ajalɛ nga be manman Ɲanmiɛn’n.
[Ja ngua lɛ ndɛ’n]
^ Sɛ amun waan amún sí i su ndɛ ekun’n, an nian Ɲanmiɛn Sielɛ Blɛ junman fluwa afuɛ 2006, Novamblu i afiɛn fluwa m’ɔ o i bue 3-6 su’n i nun. Be flɛ ndɛ sɔ’n kɛ “?Ajalɛ mennin yɛ ń fɛ́ i m bɔbɔ min mmoja’n i nun ninnge mun ɔ nin ayre yolɛ mɔ be kwla fa m bɔbɔ min mmoja’n be yo’n be su ɔ?”
?Wafa sɛ yɛ amún tɛ́ su ɔ?
• ?Ngue ti yɛ ɔ fata kɛ e suan ajalɛ kpa falɛ ɔ?
• ?Ajalɛ i falɛ nun’n, wafa sɛ yɛ srɛ’n kwla tin e su ɔ? ?Yɛ wafa sɛ yɛ e kwla jran srɛ’n i ɲrun kekle ɔ?
• ?Ninnge nsiɛn benin yɛ e kwla yo naan ajalɛ nga é fá’n b’a manman Ɲanmiɛn ɔn?
[Kosan mun]
[Kuku/Foto, bue 20]
Ninnge nga mɔ maan e kwla fa ajalɛ kpa’n
1 Nán e yo tutrefuɛ
2 Maan e usa ngwlɛlɛ afɛ
3 Maan e srɛ Ɲanmiɛn naan ɔ man e ngwlɛlɛ
4 Maan e fa ajalɛ’n
5 Maan e yia ajalɛ nga e fa’n i nuan
6 Maan e bu ajalɛ’n i akunndan ekun yɛ e siesie i ye
[Foto, bue 19]
Akunndan’n nɲɔnnɲɔn bufuɛ’n ti kɛ mmeli mɔ aunmuan’n fɛ i kɔ wa kɔ wa’n i nun sran sa.