Yumi Mas Mekem Ol Desisen We Oli Givim Ona Long God

“Man we i gat hed, hem i stap lukluk gud long rod we bambae i folem.”—PROV. 14:15.

1, 2. (a) ?Long olgeta desisen we yumi stap mekem, yumi mas tingbaot wanem samting fastaem? (b) ?Wanem ol kwestin we bambae yumi tokbaot?

EVRI dei, yumi stap mekem plante desisen. Plante long ol desisen ya, oli givhan long yumi blong smoltaem. Be sam long olgeta, oli save gat bigfala paoa long laef blong yumi. Long olgeta desisen we yumi stap mekem, nating se oli bigwan no oli smol, be yumi tingbaot se ol desisen ya oli mas givim ona long God fastaem.—Ridim 1 Korin 10:31.

² ?Olsem wanem? ?Yu yu luk se i isi blong mekem ol desisen no yu harem se samtaem i had long yu? Sipos yumi wantem kam bigman long ol Kristin fasin, yumi mas lanem blong luksave mo blong jusumaot wanem i stret mo wanem i no stret. Biaen yumi mas mekem ol desisen we oli stret folem bilif blong yumi, be i no folem bilif blong narafala. (Rom 12:1, 2; Hib. 5:14) Be i gat sam narafala risen tu from wanem yumi mas lanem blong mekem ol gudfala desisen. ?Wanem ol risen ya? ?From wanem samtaem, yumi harem se i had tumas blong mekem ol desisen? ?Mo wanem ol rod we yumi save folem blong meksua se ol desisen blong yumi oli givim ona long God?

?From Wanem Yumi Mas Mekem Ol Desisen?

3. ?Taem yumi wantem mekem ol desisen, yumi no mas letem wanem samting i blokem yumi?

³ Sipos yumi no save mekem desisen blong folem wan rul blong Baebol, bambae ol fren blong yumi long skul no long wok oli ting se bilif blong yumi i hafhaf, nao bambae i isi nomo blong oli pulum yumi blong mekem samting we i no stret. Maet oli giaman no oli stil, mo biaen oli traem pulum yumi blong mekem olsem olgeta no blong haedem fasin nogud we oli stap mekem. Oli talem se hemia fasin we “bighaf blong ol man oli mekem.” (Eks. 23:2) Be man we i save mekem ol desisen we oli givim ona long God, hem i defren. Man olsem i no letem fraet mo fasin blong wantem mekem narafala i glad long hem, i blokem hem. Hem i mekem ol fasin we oli laenap wetem tingting blong hem we hem i trenem gud folem ol rul blong Baebol.—Rom 13:5.

4. ?From wanem samfala oli wantem mekem ol desisen blong yumi?

⁴ Sam man oli wantem mekem desisen blong yumi. Be hemia i no min se oli wantem spolem yumi. Maet ol fren we oli wantem halpem yumi, oli  talem long yumi blong folem advaes blong olgeta. Nating se yumi stap longwe long papa mo mama blong yumi, ating ol famle blong yumi oli wantem we yumi stap gud, ale maet oli wantem se yumi mekem desisen we i folem tingting blong olgeta. Traem tingbaot sipos dokta i mas katem yu. Baebol i talem klia se Jehova i no laekem nating fasin blong yusum blad long rod we i no stret. (Wok 15:28, 29) Be Baebol i no talem evri smosmol samting we man i mas folem blong lukaotgud long helt blong hem, taswe, wanwan man i mas mekem prapa desisen blong hem long saed blong weswan tritmen we bambae hem i agri long hem mo weswan tritmen we hem i no wantem. * Long taem olsem, maet olgeta we oli lavem yumi oli gat strong tingting long tritmen we oli wantem se yumi folem. Be, wanwan Kristin we i givim laef blong hem i go finis long God, i “gat wok blong hem,” i min se hem i mas mekem prapa desisen blong hem. (Gal. 6:4, 5) Samting we yumi mas tingbaot fastaem hemia blong gat wan tingting we i klin gud long fes blong God, be i no long fes blong ol man.—1 Tim. 1:5.

5. ?Yumi save mekem wanem blong bilif blong yumi i no foldaon?

⁵ Yumi save kasem bigfala trabol sipos yumi no save mekem desisen. Disaepol Jemes i talem se man we i no save mekem desisen, hem i “stap tingbaot blong go long tu rod.” (Jem. 1:8) Man olsem, i sem mak long wan man we i stap long bot we i no gat stia. Taem win i blu, ol bigfala wef blong solwota oli saksakem hem i go olbaot. Yes, ol tingting blong man we oli jenis oltaem, oli save gat paoa long man we i no save mekem desisen, nao i isi nomo blong bilif blong hem i foldaon. Biaen, hem i blemem ol narafala from ol trabol we oli kasem hem. (1 Tim. 1:19) ?Yumi save mekem wanem blong trabol olsem i no hapen long yumi? Yumi mas mekem se ‘bilif blong yumi i kam strong moa oltaem.’ (Ridim Kolosi 2:6, 7.) Blong bilif blong yumi i strong oltaem, yumi mas lanem blong mekem ol desisen we oli soemaot se yumi bilif long Tok blong God, Baebol. (2 Tim. 3:14-17) ?Be wanem ol samting we oli save mekem i had long yumi blong mekem ol gudfala desisen?

?From Wanem i Had Samtaem Blong Mekem Ol Desisen?

6. ?Fraet i save mekem wanem long yumi?

⁶ Fraet i save blokem yumi blong mekem wan desisen. Maet yumi fraet se desisen blong yumi i rong, i nogud, no yumi fraet se narafala bambae i tingting nogud long yumi. Ol tingting olsem oli no rong. Yumi evriwan yumi no wantem mekem wan rong desisen we i karem trabol i kam long yumi mo i mekem yumi sem. Nating se i olsem, lav we yumi gat long God mo long Tok blong hem, i save halpem yumi blong sakemaot fraet. ?Yumi save sakemaot fraet olsem wanem? Lav we yumi gat long God bambae i pulum yumi blong lukaot advaes blong hem oltaem long Baebol mo long ol buk we oli stanap long Baebol, bifo we yumi mekem ol impoten desisen. Long rod ya, yumi save se taem yumi mekem ol desisen blong yumi bambae yumi no mestem. ?From wanem? From we Baebol i save “openem tingting blong man we i no save samting yet, mo i save mekem ol yang man oli waes gud, mo oli gat gudfala tingting.”—Prov. 1:4.

7. ?Eksampol blong King Deved i tijim wanem long yumi?

⁷ ?Be olsem wanem? ?Bambae yumi mekem ol desisen we oli stret oltaem? Nogat. Yumi evriwan yumi stap mekem mastik. (Rom 3:23) Traem tingbaot King Deved. Hem i wan gudfala man blong God mo  hem i waes tu. Be samtaem hem i mekem sam nogud desisen we i spolem hem mo ol narafala. (2 Saml. 12:9-12) Nating se i olsem, Deved i no letem mastik blong hem i blokem hem blong mekem ol desisen we oli mekem God i glad long hem. (1 King 15:4, 5) Yumi tu, yumi save mekem olsem Deved. Nating se yumi mekem sam mastik bifo, be yumi save mekem ol desisen from we yumi tingbaot se Jehova bambae i fogivim ol sin blong yumi, mo i fogetem olgeta tu. Jehova bambae i gohed blong givhan long olgeta we oli lavem hem mo oli obei long hem.—Sam 51:1-4, 7-10.

8. ?Yumi lanem wanem long tingting blong aposol Pol long saed blong mared?

⁸ Yumi save blokem ol wari we yumi gat taem yumi wantem mekem ol desisen. ?Yumi mekem samting ya olsem wanem? Yumi mas luksave se samtaem i gat defdefren rod we oli stret blong jusum, i no se i gat wan long olgeta nomo we i stret. Yu traem luk samting we aposol Pol i talem long saed blong mared. Tabu spirit i pulum Pol blong raetem se: “Sipos i gat boe mo gel we tufala i promes finis blong mared, nao tufala i agri blong livim mared fastaem, be boe ya i wantem gel ya tumas, mo hem i harem we bambae i mekem i no stret, nao i ting se i stret blong tufala i mared, i gud tufala i mared olsem we hem i wantem. Hemia i no sin ya. Be sipos i gat tu narafala olsem, mo i no gat man i fosem boe ya, be long tingting blong hem nomo, hem i no wantem gohed blong i mared, nao tingting blong hem i stap kwaet, mo hem i no mekem i nogud long gel ya, boe ya i mekem i gud.” (1 Kor. 7:36-38) Pol i talem se man no woman we i no mared, hem i jusum rod we i beswan. Be Pol i no talem se rod ya nomo i stret.

9. ?Olsem wanem? ?I stret we yumi tingbaot tingting we narafala i gat long ol desisen blong yumi? Eksplenem.

⁹ ?Olsem wanem? ?I stret we yumi tingbaot tingting we narafala i gat long ol desisen blong yumi? Yes, samtaem yumi mas tingbaot tingting blong narafala. I gud blong makem wanem we Pol i talem long saed blong ol mit we oli yusum blong mekem wosip long ol aedol. Pol i agri se i no rong blong kakae ol mit ya, be desisen olsem i save spolem samfala we bilif blong olgeta i no strong. ?Pol i mekem wanem desisen? Hem i raetem se: “Sipos mit i save spolem brata no sista blong mi, bambae mi mi no moa save kakae mit bakegen samtaem. Mi no wantem mekem wan samting nating, we i save mekem wan narafala Kristin i foldaon long sin.” (1 Kor. 8:4-13) Yumi tu yumi mas tingbaot se ol desisen blong yumi oli save mekem tingting blong narafala i strong no oli save spolem tingting blong narafala. Be i tru se samting we yumi mas tingbaot fastaem, hemia se ol samting we yumi jusum bambae oli mekem wanem long fasin fren blong yumi wetem Jehova. (Ridim Rom 14:1-4.) ?Wanem ol rul blong Baebol we oli halpem yumi blong mekem ol desisen we oli givim ona long God?

Sikis Rod Blong Mekem Ol Gudfala Desisen

10, 11. (a) ?Yumi save mekem wanem blong yumi no flas insaed long famle? (b) ?Ol elda oli mas tingbaot wanem taem oli stap mekem ol desisen blong givhan long kongregesen?

¹⁰ Yumi no mas flas. Bifo we yumi jusum blong mekem wan samting, yumi mas tingbaot fastaem se, ‘?Mi mi gat raet blong mekem desisen ya?’ King Solomon i raetem se: “Man we i stap flas, bambae i no longtaem hem i sem bigwan, be man we i mekem tingting blong hem i stap daon, hem i wan waes man.”—Prov. 11:2.

¹¹ Maet ol papa mama oli givim raet long ol pikinini blong olgeta blong mekem sam desisen, be ol pikinini oli no mas ting se oli gat raet blong mekem desisen long saed blong eni samting we oli wantem. (Kol. 3:20) Ol waef mo ol mama oli gat raet blong mekem sam desisen long saed blong famle be oli mas luksave se oli mas stap daon long ol man blong olgeta. (Prov. 1:8; 31:10-18; Efes. 5:23) Long sem fasin, ol man we oli mared oli mas luksave se oli no gat raet blong mekem eni samting we oli wantem, be oli mas stap daon long Kraes we i hed blong olgeta. (1 Kor. 11:3) Ol elda oli mekem ol desisen we oli blong givhan long kongregesen. Be oli “no mas bitim mak long ol tok ya” we oli stap finis long Tok blong God. (1 Kor. 4:6, NW) Mo tu, oli folem gud ol advaes we oli kasem long slef we i stret mo waes. (Mat. 24:45-47, NW) Sipos yumi gat tingting daon mo yumi mekem ol desisen nomo we yumi gat raet blong mekem, bambae yumi blokem plante wari mo trabol blong oli no kasem yumi mo ol narafala.

12. (a) ?From wanem yumi mas lukaot moa save? (b) Yu traem eksplenem olsem wanem blong lukaot moa save.

¹² Yumi mas lukaot moa save. Solomon i raetem se: “Man we i mekem gudfala plan mo i stap wok strong long hem, hem i save kasem plante samting, be man we i stap wok hareap, neva hem i save kasem i naf.” (Prov. 21:5) Yu traem tingbaot se yu wantem pem wan bisnes. Yu no mas letem ol filing blong yu oli pulum yu blong mekem desisen. I gud yu lukaot  moa save we i stret blong givhan long yu long desisen ya. Yu askem advaes long olgeta we oli gat save long saed blong bisnes olsem, mo yu traem faenemaot ol rul blong Baebol we oli stret long saed ya. (Prov. 20:18) I gud yu raetemdaon ol save we yu faenemaot, long tu defren lis. Wan lis i soemaot ol gudfala samting we yu save kasem long bisnes ya, mo narafala lis i soemaot ol nogud samting we oli save kamaot. Bifo we yu mekem desisen blong yu, yu mas “wokemaot praes blong olgeta samting.” (Luk 14:28) Yu mas tingbaot tu se desisen blong yu bambae i mekem wanem long yu long saed blong mane mo long saed blong spirit. I tru se taem yu lukaot moa save, yu yusum taem blong yu mo yu mas traehad. Be taem yu mekem olsem, bambae yu no mekem ol desisen hareap, we biaen yu save harem nogud tumas from.

13. (a) ?Jemes 1:5 i givim wanem gudfala advaes? (b) ?Taem yumi prea blong askem waes, fasin ya i halpem yumi olsem wanem?

¹³ Yumi mas prea blong askem waes. Sipos yumi askem long God blong i halpem yumi blong mekem ol desisen, bambae ol desisen blong yumi oli save givim ona long God. Disaepol Jemes i raetem se: “Sipos wan long yufala i no gat waes, hem i mas askem long God blong i givim waes long hem, nao God bambae i save givim long hem, from we fasin blong God, hem i no save tok nogud long man we i askem samting long hem, hem i stap givim ol samting long ol man long gladhat blong hem.” (Jem. 1:5) Yumi no mas sem blong askem waes blong God, blong i givhan long yumi blong mekem ol desisen. (Prov. 3:5, 6) Sipos yumi folem prapa tingting blong yumi nomo, bambae i isi blong yumi mekem ol desisen we oli no stret. Taswe yumi mas prea long God blong askem waes blong hem, mo yumi traem faenemaot ol rul blong hem long Baebol. Taem yumi mekem olsem, yumi stap letem tabu spirit i halpem yumi blong faenemaot tingting we i stap pusum yumi blong wantem mekem wan samting.—Hib. 4:12; ridim Jemes 1:22-25.

14. ?From wanem yumi no mas tekem tumas taem blong mekem wan desisen?

¹⁴ Yumi mekem desisen blong yumi. Sipos yumi no lukaot moa save yet mo yumi no prea yet long God blong askem waes blong hem, yumi no mas hareap blong mekem desisen. Man we i waes i tekem taem blong “lukluk gud long rod we bambae i folem.” (Prov. 14:15) Be yumi no mas tekem tumas taem tu. Man we i tekem tumas taem blong mekem wan desisen, hem i save gat plante narakaen eskius blong talem from wanem hem i no mekem wan samting. (Prov. 22:13) Mo nating se hem i no mekem wan samting, hem i mekem wan desisen yet. Hem i mekem desisen blong letem narafala i bos long laef blong hem.

15, 16. ?Yumi mas mekem wanem blong folem desisen blong yumi?

¹⁵ Yumi mas mekem sam samting blong folem desisen blong yumi. Yumi save traehad bigwan blong mekem wan gudfala desisen, be sipos yumi no mekem samting blong folem desisen blong yumi, yumi traehad blong nating nomo. Solomon i raetem se: “Wanem samting we yumi stap mekem, yumi mas strong long hem long fulpaoa blong yumi.” (Pri. 9:10) Blong yumi save harem gud long desisen blong yumi, yumi mas rere blong yusum taem, paoa, mane, mo olting blong yumi blong folem desisen blong yumi. Yu traem tingbaot sipos wan pablisa long kongregesen blong yu i wantem mekem wok blong paenia. ?Yu ting se bambae hem i kasem mak blong hem? Yes, ating bambae hem i kasem, sipos  hem i no letem pleplei mo ol wok blong hem long saed blong mane oli tekem tumas taem blong hem, nao hem i no moa gat taem mo paoa blong mekem gud wok blong prij.

¹⁶ Plante taem ol desisen we oli beswan, oli no isi blong folem. ?From wanem? From we “olgeta man blong wol ya oli stap long paoa blong Setan.” (1 Jon 5:19) Yumi mas faet agens long “ol rula blong wol ya we i tudak, mo agens long paoa blong ol rabis spirit we oli stap long ol ples long heven.” (Efes. 6:12, NW) Aposol Pol mo disaepol Jud, tufala i talemaot se olgeta we oli mekem desisen blong givim ona long God bambae oli mas faet strong.—1 Tim. 6:12; Jud 3.

17. ?Long saed blong ol desisen we yumi mekem, Jehova i wantem we yumi mekem wanem?

¹⁷ Yumi mas tingbaot bakegen desisen blong yumi mo sipos i nidim, yumi mas mekem sam jenis. I no olgeta desisen evriwan we oli kamtru olsem we yumi wantem. From we yumi no save wanem bambae i hapen long fiuja, samtaem ol desisen we yumi mekem oli no kamaot olsem we yumi wantem. (Jem. 4:13, 14) Nating se i olsem, Jehova i wantem we yumi strong blong folem sam desisen nating se i gat sam samting oli traem yumi. Sipos wan man i givim laef blong hem i go long Jehova no i mared, hem i no moa save jenisim desisen blong hem. Long saed blong ol desisen olsem, God i wantem we yumi folem wanem we yumi promes blong mekem. (Ridim Ol Sam 15:1, 2, 4.) Plante long ol desisen we yumi mekem oli no ol bigfala desisen. Wanwan taem man we i waes bambae i tingbaot bakegen ol desisen we hem i mekem. Bambae hem i no letem flas i blokem hem blong mekem sam jenis long saed blong wan desisen no blong i jenisim desisen blong hem fulwan. (Prov. 16:18) Samting we i moa impoten long man olsem, hemia blong meksua se long olgeta samting we hem i mekem long laef blong hem, hem i gohed blong givim ona long God.

Yumi Mas Trenem Ol Narafala Blong Oli Mekem Ol Desisen We Oli Givim Ona Long God

18. ?Papa mo mama tufala i save mekem wanem blong halpem pikinini blong tufala blong i save mekem ol gudfala desisen?

¹⁸ Ol papa mo mama, oli save mekem plante samting blong halpem pikinini blong olgeta, blong hem i save mekem ol desisen we oli givim ona long God. Nambawan rod blong tijim pikinini, hemia blong soemaot gudfala eksampol blong oli folem. (Luk 6:40) Long taem we i stret, papa mo mama tufala i save eksplenem long pikinini blong tufala, olsem wanem tufala i mekem wan desisen. Maet tufala i wantem se pikinini blong tufala i mekem sam prapa desisen blong hem. Mo biaen, taem gudfala samting i kamaot from desisen blong hem, tufala i talem ol gudfala toktok long pikinini. ?Be olsem wanem sipos pikinini i mekem wan rong desisen? Maet fas samting we papa mo mama tufala i tingbaot, hemia blong blokem pikinini blong i no kasem ol trabol we oli kamaot from desisen blong hem. Be ating samting ya bambae i no givhan long pikinini. Yu traem tingbaot sipos papa mo mama i letem pikinini blong tufala i karem laesens blong draevem trak. Ale, wan dei taem pikinini ya i stap draevem trak, hem i brekem loa, nao hem i mas faen. Papa mo mama i save pem faen blong pikinini ya. Be blong givhan long pikinini, i moa waes blong letem hem i wok blong kasem mane we i naf blong pem faen blong hem. Long rod ya, papa mo mama tufala i tijim hem se hem i mas kakae frut blong wanem we hem i mekem.—Rom 13:4.

19. ?Yumi mas tijim wanem long ol Baebol stadi blong yumi, mo yumi save mekem samting ya olsem wanem?

¹⁹ Jisas i talem long ol man blong hem se oli mas tijim ol narafala man. (Mat. 28:20) Wan samting we i impoten tumas blong tijim ol Baebol stadi long hem, hemia blong oli save mekem ol gudfala desisen. Blong tijim gud olgeta long saed ya, yumi mas blokem fasin ya blong talem oltaem wanem samting we oli mas mekem. I moa gud blong tijim olgeta blong oli tingting long ol rul blong Baebol long wan fasin we i givhan long olgeta blong mekem prapa desisen blong olgeta. Yes, “yumi evriwan i mas talemaot olgeta fasin blong yumi long fes blong God.” (Rom 14:12) Taswe yumi evriwan i mas mekem ol desisen we oli givim ona long God.

[Futnot]

?Bambae Yu Yu Ansa Olsem Wanem?

• ?From wanem yumi mas lanem olsem wanem blong mekem ol desisen?

• ?Fraet i save mekem wanem long yumi, mo yumi save winim fraet olsem wanem?

• ?Wanem ol sikis rod we yumi save folem blong meksua se ol desisen blong yumi oli givim ona long God?

[Kwestin]

[Bokis/Foto blong pija long pej 20]

Ol Rod Blong Mekem Ol Gudfala Desisen

1 Yumi No Mas Flas

2 Yumi Mas Lukaot Moa Save

3 Yumi Mas Prea Blong Askem Waes

4 Yumi Mekem Desisen Blong Yumi

5 Yumi Mas Mekem Sam Samting Blong Folem Desisen Blong Yumi

6 Yumi Mas Tingbaot Bakegen Mo Yumi Mekem Sam Jenis

[Tok blong pija long pej 18]

Man we i no save mekem desisen i sem mak long wan man we i stap long bot we i no gat stia. Taem win i blu, ol bigfala wef blong solwota oli saksakem hem i go olbaot