Paghimog mga Desisyon nga Magpasidungog sa Diyos
Paghimog mga Desisyon nga Magpasidungog sa Diyos
“Ang usa nga maalamon magapalandong sa iyang mga lakang.”—PROV. 14:15.
1, 2. (a) Sa tanang desisyon nga atong himoon, unsay una natong tagdon? (b) Unsang mga pangutana ang atong hisgotan?
MATAG adlaw lagmit mohimo kitag daghan niini. Ang uban dili kaayo mapuslanon. Apan, ang pipila mahimong dakog epekto sa atong kinabuhi. Unsa kini? Mga desisyon. Sa tanang desisyon nga atong himoon, dako man o gamay, ang una natong tagdon mao ang pagpasidungog sa Diyos.—Basaha ang 1 Corinto 10:31.
2 Sayon ba alang kanimo ang paghimog desisyon o lisod? Aron mohamtong kita ingong Kristohanon, kinahanglang makaila kita sa husto ug sayop ug dayon mohimog desisyon nga uyon sa atong gituohan, dili nianang sa uban. (Roma 12:1, 2; Heb. 5:14) Unsa ang ubang rason nga kinahanglan kitang mohimog maayong mga desisyon? Nganong usahay lisod kaayo ang paghimo niana? Ug unsang mga lakang ang atong himoon aron matino nga ang atong mga desisyon magpasidungog sa Diyos?
Nganong Kinahanglang Modesisyon?
3. Unsay dili nato tugotan nga mag-impluwensiya sa atong paghimog desisyon?
3 Kon palingpaling kita bahin sa mga sukdanan sa Bibliya, ang atong mga eskolmet o katrabaho basin makaingon nga dili kita kombinsido sa atong mga gituohan ug busa dali ra kitang maimpluwensiyahan. Sila tingali mamakak, manglimbong, o mangawat ug dayon modani kanato sa ‘pagsunod sa panon sa katawhan’ pinaagi sa pagduyog kanila o sa pagtago sa ilang binuhatan. (Ex. 23:2) Apan, ang usa nga antigong mohimog mga desisyon nga magpasidungog sa Diyos dili magpaimpluwensiya sa kahadlok o sa tinguha nga uyonan sa kadaghanan, hinunoa sundon niya ang iyang nabansay-sa-Bibliya nga tanlag.—Roma 13:5.
4. Nganong ang uban gustong modesisyon para nato?
4 Dili tanan nga gustong modesisyon para nato may daotang tuyo. Ang maayog-tuyo nga mga higala basin mamugos nga sundon nato ang ilang tambag. Kon dili na kita ipon sa atong mga ginikanan, sila lagmit mabalaka gihapon sa atong kaayohan ug padayong makiglabot sa importanteng mga desisyon nga atong himoon. Pananglitan, tagda ang bahin sa pagpatambal. Ang Bibliya tin-awng nagdili sa sayop nga paggamit sa dugo. (Buh. 15:28, 29) Hinuon, ang ubang paagi sa pagpanambal wala direktang idili, busa ang matag usa kinahanglang modesisyon kon kini ba dawaton o dili. * Basin ang atong mga minahal mapugsanon sa ilang opinyon bahin sa maong mga isyu. Apan, sa dihang modesisyon bahin niana, ang matag bawtismadong Kristohanon magpas-an sa “iyang kaugalingong luwan.” (Gal. 6:4, 5) Ang paghupot ug maayong tanlag atubangan sa Diyos, dili sa tawo, mao ang una natong hatagag pagtagad.—1 Tim. 1:5.
5. Sa unsang paagi nato malikayan ang pagkalunod sa atong pagtuo?
5 Ang pagpalingpaling sa pagdesisyon makapameligro kanato. Ang disipulong si Santiago misulat nga ang tawong palingpaling “mabalhinon sa tanan niyang mga dalan.” (Sant. 1:8) Sama sa usa ka tawo diha sa way-timon nga sakayan sa balorong dagat, siya kusokusohon sa mabalhinong mga opinyon sa tawo. Dali gayong malunod ang pagtuo sa maong tawo ug dayon basolon ang uban sa iyang gidangatan! (1 Tim. 1:19) Sa unsang paagi nato kana malikayan? Kinahanglan kitang ‘magmalig-on sa pagtuo.’ (Basaha ang Colosas 2:6, 7.) Aron makabatog kalig-on, kinahanglang makakat-on kita sa paghimog desisyon nga magpadayag sa atong pagtuo sa inspiradong Pulong sa Diyos. (2 Tim. 3:14-17) Apan, unsay makababag sa atong paghimog maayong desisyon?
Kon Nganong Lisod ang Paghimog mga Desisyon
6. Sa unsang paagi ang kahadlok makaapektar kanato?
6 Ang kahadlok makapugong kanato sa paglihok—kahadlok nga masayop sa pagdesisyon, mapakyas, o isipon sa uban nga hungog. Dili kana ikatingala kay walay usa nga gustong masayop sa pagdesisyon, nga mahimong hinungdan sa problema ug kaulawan. Bisan pa niana, ang atong gugma sa Diyos ug sa iyang pulong makatabang kanato nga dili kaayo mahadlok. Sa unsang mga paagi? Ang gugma sa Diyos kanunayng magtukmod kanato sa pagsusi sa iyang Pulong ug sa binase-sa-Bibliya nga mga basahon sa dili pa kita mohimog importanteng mga desisyon. Busa mamenosan ang atong mga sayop. Ngano? Kay ang Bibliya ‘makahatag ug kaalam ngadto sa walay kasinatian, sa kahibalo ug katakos sa panghunahuna ngadto sa batan-ong lalaki.’—Prov. 1:4.
7. Unsang leksiyon ang atong makat-onan kang Haring David?
7 Makahimo ba kita kanunay ug hustong desisyon? Dili. Kitang tanan masayop. (Roma 3:23) Si Haring David maoy usa ka pananglitan. Bisag siya maalamon ug matinumanon, may mga higayon nga siya nakahimog dili-maayong desisyon nga tungod niana nag-antos siya ug ang uban. (2 Sam. 12:9-12) Apan wala itugot ni David nga ang iyang mga sayop makaapektar sa iyang katakos sa paghimog mga desisyon nga uyon sa kabubut-on sa Diyos. (1 Hari 15:4, 5) Kita makahimog maayong desisyon bisan pa sa atong nangaging kasaypanan kon, sama kang David, atong hinumdoman nga si Jehova magpasaylo sa atong mga sala. Siya padayong magpaluyo niadtong nahigugma ug nagmasinugtanon kaniya.—Sal. 51:1-4, 7-10.
8. Unsay atong makat-onan sa giingon ni apostol Pablo bahin sa kaminyoon?
8 Mahimong mamenosan nato ang atong kabalaka sa paghimog mga desisyon. Sa unsang paagi? Pinaagi sa pag-ila nga usahay adunay hustong mga dalan nga kapilian. Tagda kon sa unsang paagi si apostol Pablo nangatarongan bahin sa kaminyoon. Siya misulat: “Kon adunay naghunahuna nga siya nagagawing dili husto sa iyang pagkaulay, kon siya lapas na sa pagbuswak sa pagkabatan-on, ug kini mao ang angayng mahitabo, ipabuhat kaniya kon unsay iyang gusto; siya dili makasala. Paminyoa sila. Apan kon adunay nakapiho na diha sa iyang kasingkasing, nga walay pagpanginahanglan, apan may awtoridad sa iyang kaugalingong kabubut-on ug nakahimo na niining desisyona sa iyang kaugalingong kasingkasing, sa paghupot sa iyang kaugalingong pagkaulay, siya magabuhat ug maayo.” (1 Cor. 7:36-38) Gidasig ni Pablo ang pagkatagsaanon ingong labing maayong dalan, apan dili lamang kana ang hustong dalan nga mahimong pilion.
9. Angay ba natong tagdon kon unsay hunahunaon sa uban bahin sa atong mga desisyon? Ipatin-aw.
9 Angay ba natong tagdon kon unsay hunahunaon sa uban bahin sa atong mga desisyon? Sa pipila ka kahimtang. Matikdi ang giingon ni Pablo bahin sa mga pagkaon nga daw nahalad na sa mga idolo. Iyang giila nga ang usa ka desisyon mahimong dili sayop, apan kini basin makadaot sa usa nga huyang ug tanlag. Unsa ang desisyon ni Pablo? “Kon ang pagkaon makapandol sa akong igsoon,” siya misulat, “dili na gayod ako mokaon pag-usab ug karne, aron ako dili makapandol sa akong igsoon.” (1 Cor. 8:4-13) Kita usab angayng maghunahuna sa epekto sa atong mga desisyon diha sa tanlag sa uban. Siyempre, ang una natong tagdon mao ang epekto sa atong mga desisyon diha sa atong relasyon kang Jehova. (Basaha ang Roma 14:1-4.) Unsang mga prinsipyo sa Bibliya ang makatabang nato sa paghimog desisyon nga magpasidungog sa Diyos?
Unom ka Lakang sa Paghimog Maayong mga Desisyon
10, 11. (a) Sa unsang paagi nato malikayan ang pagkamapangahason diha sa pamilya? (b) Unsay angayng hinumdoman sa mga ansiyano sa dihang maghimog mga desisyon nga makaapektar sa kongregasyon?
10 Likayi ang pagkamapangahason. Sa dili pa modesisyon, pangutan-a ang kaugalingon, ‘Ako ba ang angay modesisyon niini?’ Si Haring Solomon misulat: “Miabot ba ang pagkamapangahason? Nan modangat ang kaulawan; apan ang kaalam anaa sa mga makasaranganon.”—Prov. 11:2.
11 Mahimong tugotan sa mga ginikanan ang ilang mga anak sa paghimog pipila ka desisyon, apan dili angayng angkonon sa mga anak ang maong katungod. (Col. 3:20) Ang mga asawa may awtoridad usab diha sa pamilya apan kinahanglan nilang ilhon ang pagkaulo sa ilang bana. (Prov. 1:8; 31:10-18; Efe. 5:23) Sa susama, angayng ilhon sa mga bana nga limitado ang ilang awtoridad ug nga sila nailalom ni Kristo. (1 Cor. 11:3) Ang mga ansiyano maghimog mga desisyon nga makaapektar sa kongregasyon. Apan, ilang paneguroon nga sila ‘dili mosaylo sa mga butang nga nahisulat’ diha sa Pulong sa Diyos. (1 Cor. 4:6) Sila usab nagsunod gayod sa mga instruksiyon gikan sa matinumanong ulipon. (Mat. 24:45-47) Atong malikayan nga makapahinabog dakong kabalaka ug kasakit sa kaugalingon ug sa uban kon modesisyon kita sa panahon lamang nga kita gihatagag awtoridad.
12. (a) Nganong angay kitang manukiduki? (b) Isaysay kon sa unsang paagi ang usa manukiduki.
12 Panukiduki. “Ang mga plano sa kugihan mosangpot gayod sa kaayohan,” misulat si Solomon, “apan ang matag usa nga madalidalion mosangko lamang sa kawalad-on.” (Prov. 21:5) Pananglitan, may negosyo ba nga gitanyag kanimo? Ayaw pagpadaog sa imong emosyon. Sayra ang tanang importanteng impormasyon, magpatambag sa mga eksperto, ug susiha kon unsang mga prinsipyo sa Bibliya ang nalangkit niana. (Prov. 20:18) Aron organisado ang imong pagpanukiduki, paghimog duha ka listahan—ang usa magdetalye sa mga benepisyo, ang lain sa posibleng mga problema. Sa dili ka pa modesisyon, ‘kuwentaha ang gasto.’ (Luc. 14:28) Hunahunaa kon unsay epekto sa imong desisyon diha sa imong pinansiyal nga kahimtang ug sa imong relasyon kang Jehova. Ang pagpanukiduki nagkinahanglag panahon ug paningkamot. Apan kon himoon nimo kana, imong malikayan ang paghimog dinalidali nga mga desisyon nga moresulta sa mga problema ug kabalaka.
13. (a) Unsay gipasalig sa Santiago 1:5? (b) Sa unsang paagi ang pag-ampo alang sa kaalam makatabang kanato?
13 Pag-ampo alang sa kaalam. Makahimo lamang kitag mga desisyon nga magpasidungog sa Diyos kon magpatabang kita kaniya. Si disipulong Santiago misulat: “Kon aduna man kaninyoy nakulangan ug kaalam, magpadayon siya sa pagpangayo sa Diyos, kay siya nagahatag nga madagayaon ngadto sa tanan ug dili mamuyboy; ug kini igahatag kaniya.” (Sant. 1:5) Dili angayng ikaulaw nga nagkinahanglan kita sa kaalam sa Diyos sa paghimog mga desisyon. (Prov. 3:5, 6) Sa pagkatinuod, ang pagsalig sa kaugalingong pagsabot daling makapahisalaag kanato. Sa dihang kita mag-ampo alang sa kaalam ug magsusi sa mga prinsipyo sa Pulong sa Diyos, kita nagpatabang sa balaang espiritu aron mailhan nato ang atong tinuod nga motibo sa pagbuhat sa usa ka butang.—Heb. 4:12; basaha ang Santiago 1:22-25.
14. Nganong angayng likayan ang paglangaylangay?
14 Paghimog desisyon. Ayaw dayon pagdesisyon kon wala ka pa manukiduki ug mag-ampo alang sa kaalam. Ang maalamon “magapalandong sa iyang mga lakang.” (Prov. 14:15) Apan, ayaw paglangaylangay. Ang langayan daghag pasumangil kon nganong dili niya himoon ang usa ka butang. (Prov. 22:13) Sa pagkatinuod, siya midesisyon gihapon—nga ang uban maoy magkontrolar sa iyang kinabuhi.
15, 16. Unsay nalangkit sa pagtuman sa usa ka desisyon?
15 Sunda ang imong desisyon. Mausik lang ang atong paningkamot sa paghimog maayong desisyon kon dili nato kana sundon. “Ang tanan nga makaplagan sa imong kamot nga buhaton, buhata uban sa imong kusog mismo,” misulat si Solomon. (Eccl. 9:10) Aron molampos, kinahanglang andam kitang motagana sa mga kinahanglanon sa pagpatuman sa atong mga desisyon. Pananglitan, ang usa ka magmamantala tingali nakadesisyon nga magpayunir. Molampos kaha siya? Lagmit molampos siya kon likayan niya ang sobrang trabaho ug kalingawan nga makapaluya kaniya ug makahurot sa iyang panahon alang sa ministeryo.
16 Ang labing maayong mga desisyon dili kanunayng sayon sundon. Ngano? Kay “ang tibuok kalibotan nailalom sa gahom sa usa nga daotan.” (1 Juan 5:19) Kinahanglan kitang makigbugno batok “sa mga magmamando sa kalibotan niini nga kangitngit, batok sa daotang mga puwersa nga espirituhanon sa langitnong mga dapit.” (Efe. 6:12) Gipaila ni apostol Pablo ug sa disipulong si Judas nga kadtong modesisyon sa pagpasidungog sa Diyos kinahanglang makigbugno.—1 Tim. 6:12; Jud. 3.
17. Kon bahin sa paghimog mga desisyon, unsay gidahom ni Jehova kanato?
17 Susiha pag-usab ang desisyon ug himoa ang kausaban kon gikinahanglan. Dili tanang desisyon molampos sumala sa giplano. “Ang panahon ug ang wala damhang panghitabo” modangat kanatong tanan. (Eccl. 9:11) Bisan pa niana, gidahom ni Jehova nga sundon nato ang pipila ka desisyon bisag may kalisdanan. Ang desisyon sa usa sa pagpahinungod sa iyang kinabuhi kang Jehova o paghimog panaad sa kaminyoon kinahanglang magmalungtaron. Gidahom sa Diyos nga tumanon nato ang maong mga desisyon. (Basaha ang Salmo 15:1, 2, 4.) Hinuon, ang kadaghanang desisyon dili kaayo hinungdanon. Ang maalamong tawo mosusi sa iyang mga desisyon matag karon ug unya. Dili niya tugotan nga ang garbo o pagkagahig-ulo magpugong kaniya sa paghimog kausaban o pagbag-o pa gani sa desisyon. (Prov. 16:18) Tinoon gayod niya nga ang iyang pagkinabuhi padayong magpasidungog sa Diyos.
Bansaya ang Uban sa Paghimog mga Desisyon nga Magpasidungog sa Diyos
18. Sa unsang paagi ang mga ginikanan makabansay sa mga anak sa paghimog maayong mga desisyon?
18 Ang mga ginikanan daghag mahimo aron tabangan ang ilang mga anak nga makakat-on sa paghimog mga desisyon nga magpasidungog sa Diyos. Ang maayong panig-ingnan maoy usa sa kinamaayohang mga paagi sa pagtudlo. (Luc. 6:40) Kon nahiangay, ipatin-aw sa mga ginikanan ngadto sa ilang mga anak kon sa unsang paagi sila mihimog usa ka desisyon. Mahimong tugotan sab nila ang ilang mga anak sa pagdesisyon sa ilang kaugalingon ug dayon dayegon sila sa dihang molampos kana. Komosta kon ang bata nakahimog dili-maayong desisyon? Ang sagad himoon sa ginikanan mao ang pagpanalipod sa ilang anak gikan sa sangpotanan niana, apan kana dili kanunayng makaayo sa bata. Pananglitan, tingali ang ginikanan motugot sa iyang anak sa pagkuhag lisensiya sa pagdrayb. Ibutang ta nga ang anak nakalapas ug balaod sa trapiko ug gimultahan. Mahimong bayran kana sa ginikanan. Apan kon patrabahoan sa anak ang bayad sa multa, lagmit makakat-on siya nga mahimong responsable.—Roma 13:4.
19. Unsay angay natong itudlo sa atong mga estudyante sa Bibliya, ug sa unsang paagi nato kana mahimo?
19 Gisugo ni Jesus ang iyang mga sumusunod sa pagtudlo sa uban. (Mat. 28:20) Ang usa sa labing hinungdanong mga butang nga atong ikatudlo sa mga estudyante sa Bibliya mao ang paghimog maayong mga desisyon. Aron matudloan sila sa epektibong paagi, kinahanglang likayan nato nga sultihan sila kon unsay angayng buhaton. Mas maayo nga tudloan silang mangatarongan base sa mga prinsipyo sa Bibliya aron sila makadesisyon kon unsay buhaton. Total, “ang matag usa kanato manubag alang sa iyang kaugalingon ngadto sa Diyos.” (Roma 14:12) Busa, kitang tanan angayng mohimog mga desisyon nga magpasidungog sa Diyos.
[Footnote]
^ par. 4 Alang sa panaghisgot bahin niini, tan-awa ang pasukip nga “Unsay Angay Nakong Desisyon Bahin sa mga Tipik sa Dugo ug sa Pagtambal nga Gamiton ang Kaugalingon Nakong Dugo?” sa Atong Ministeryo sa Gingharian sa Enero 2007, panid 3-6.
Unsay Imong Tubag?
• Nganong kinahanglang makakat-on kita sa paghimog desisyon?
• Sa unsang paagi ang kahadlok makaapektar kanato, ug unsaon kana pagbuntog?
• Unsa ang unom ka lakang aron ang atong mga desisyon tinong magpasidungog sa Diyos?
Mga Pangutana sa Pagtuon]
[Kahon/Hulagway sa panid 16]
Mga Lakang sa Paghimog Maayong mga Desisyon
1 Likayi ang Pagkamapangahason
2 Panukiduki
3 Pag-ampo Alang sa Kaalam
4 Paghimog Desisyon
5 Sunda ang Desisyon
6 Susiha Pag-usab ug Himoa ang Kausaban
[Hulagway sa panid 15]
Ang tawong palingpaling maoy samag way-timon nga sakayan sa balorong dagat
