Ñamombaʼeguasúkena Jehovápe umi mbaʼe jadesidívare

‘Iñakãguapýva oikuaa porã moõpa opyrũta.’ (PRO. 14:15)

1, 2. a) Mbaʼépa jahechaukavaʼerã jadesidíta jave? b) Mbaʼe mbaʼépa ñahesaʼỹijóta koʼág̃a?

ÑANDE ningo koʼẽ koʼẽre jadesidivaʼerã hetaiterei mbaʼe. Umíva apytépe oĩ umi naiñimportanteguasúiva ha avei umi ikatúva okambiaite ñande rekove. Péro tahaʼe haʼeháicha umi mbaʼe jadesidívare jahechaukavaʼerã ñamombaʼeguasuha Ñandejárape (elee 1 Corintios 10:31).

² Ijetuʼúpa ndéve redesidi hag̃ua? Jaipotáramo ñande jerovia imbarete, jahechakuaavaʼerã mbaʼépa iporã ha mbaʼépa ivai. Ha jadesidi Ñandejára oipotaháicha, ndahaʼéi ñande rapichakuéra heʼiháicha (Rom. 12:1, 2; Heb. 5:14). Mbaʼépa ñanepytyvõta jadesidi porã hag̃ua? Mbaʼérepa sapyʼánte ijetuʼu upéva? Mbaʼéichapa ikatu ñamombaʼeguasu Ñandejárape umi mbaʼe jadesidíva rupive?

Mbaʼérepa jadesidivaʼerã?

3. Mbaʼe rehépa ñañatendevaʼerã jadesidíta jave?

³ Ndajakyhyjeivaʼerã jajapo hag̃ua la Biblia heʼíva. Ñane irũnguéra eskuéla térã ñande travahohapegua ohechakuaáramo ñandepyʼamokõiha, oimoʼãta ikangyha ñande jerovia ha ojapoukaséta ñandéve oimeraẽ mbaʼe. Heta vése haʼekuéra ijapu, ipokarẽ, imonda ha ikatu voi ñandejopy jajapo hag̃ua avei umi mbaʼe vai térã oipota ñamoʼã chupekuéra. Ha ‘hetavéramo jepe umi hembiapo vaíva,  ñande ndajajapoivaʼerã haʼekuéraicha’ (Éxo. 23:2). Ñamombaʼeguasuséramo Ñandejárape umi mbaʼe jadesidívare, nañamboykemoʼãi la Biblia heʼíva jakyhyje térã japyta porãséguinte ñande rapicha renondépe (Rom. 13:5).

4. Mbaʼérepa ikatu oĩ heʼíva ñandéve mbaʼépa jajapovaʼerã?

⁴ Oĩ heta ñanepytyvõséva ha heʼi ñandéve mbaʼépa jajapovaʼerã. Oiméne jareko ñane amígo oipotáva osẽ porãmba ñandéve opa mbaʼe, upévare oipota jadesidi haʼe heʼiháicha. Ikatu avei ñane hentekuéra ojepyʼapy ha odesidise ñanderehe umi mbaʼe iñimportánteva, ndajaikovéimaramo jepe hendivekuéra. Pór ehémplo, la Biblia heʼi porã ndovaleiha ñamoĩka tuguy, péro haʼekuéra ikatu ñandejopy jajapo hag̃ua upéva (Hech. 15:28, 29). Oĩ avei heta tratamiénto ndaivaíriva ha káda uno odesidivaʼerã ojapótapa térã nahániri. * Ha umícha jave ñane hentekuéra ikatu ñandejopy jajapo hag̃ua haʼekuéra heʼíva. Péro jaikuaa káda kristiáno ‘oguerahavaʼerãha imbaʼepohýi’ (Gál. 6:4, 5, BNP). Ñandéve g̃uarã iñimportanteve ñaime porã Ñandejára ndive, ndahaʼéi yvypórandi (1 Tim. 1:5).

5. Mbaʼépa jajapovaʼerã pono japyta vai Ñandejára renondépe?

⁵ Mbaʼérepa ipeligrosoite ñandepyʼamokõi? Santiago heʼivaʼekue umichagua tapicha ‘ndaipyʼapeteĩriha mbaʼevépe, oipotaha peteĩ mbaʼe koʼág̃a ha koʼẽrõ katu ambue mbaʼéma’ (Sant. 1:8). Pe ipyʼamokõiva ningo ojapo ojeʼéva guivénte chupe, ojogua peteĩ kanóape oĩva rrío mbytépe, ápe ha pépe ogueraháva chupe torménta. Peichagua ndahasyiete opyta vai hag̃ua Ñandejára renondépe ha amo ipahápe katu ombojaséma ótrore ojere vaipa jave chupe (1 Tim. 1:19). Mbaʼépa jajapovaʼerã pono oiko ñanderehe upéicha? Tekotevẽ ñañehaʼãmbaite ‘ñañemopyenda hatã ñande jeroviápe’ (elee Colosenses 2:6, 7). Upearã jahechaukavaʼerã umi mbaʼe jadesidívare jajeroviaha Ñandejára Ñeʼẽre (2 Tim. 3:14-17). Péro oĩ avei heta mbaʼe ikatúva ñandejoko jadesidi porãse jave. Mbaʼe mbaʼépa umíva?

Mbaʼérepa sapyʼánte ijetuʼu jadesidi

6. Mbaʼérepa oĩ okyhyjéva odesidi hag̃ua?

⁶ Oĩ okyhyjéva odesidi hag̃ua oñemotĩ térã ojavýramo g̃uarã. Ha máva voi piko odesidiséta peteĩ mbaʼe omoprovléma térã omotĩtava chupe! Péro jahayhúramo Ñandejárape ha Iñeʼẽ ndajakyhyjemoʼãi jadesidi hag̃ua. Jajepokuaavaʼerã jahecha mbaʼépa heʼi la Biblia ha ambue puvlikasión jadesidi mboyve umi mbaʼe iñimportánteva. Péicha jajapóramo ndajajavyguasumoʼãi. Jaikuaágui la Biblia ‘omoaranduha umi iñaranduʼỹvape, ha omeʼẽha mitãrusukuérape akãporã ha akãguapy’ (Pro. 1:4, ÑÑB).

7. Mbaʼépa ñanemboʼe David ehémplo?

⁷ Jahecha haguéicha, la Biblia ha ambue puvlikasión ikatu ñanepytyvõ. Heʼisépa upéva akóinte jadesidi porãtaha? Nahániri, jaikuaaháicha opavave ñaneimperfékto (Rom. 3:23). David, pór ehémplo, iñarandu ha ijeroviapyvaʼekue, péro odesidi vai rupi heta ohasa asy haʼe ha hapichakuéra (2 Sam. 12:9-12). Upéicharõ jepe oñehaʼãmbaite oñemoĩ porã jey Jehová renondépe ha ndokyhyjéi odesidi hag̃ua ambue mbaʼe (1 Rey. 15:4, 5). Rréi David ojapo haguéicha, ñanemanduʼavaʼerã Jehová oheja reiha ñane rembiapo vaikue ha ñaneperdonaha. Avei nañanderesarairivaʼerã akóinte oipytyvõha umi ohayhu ha iñeʼẽrendúvape. Upéicharõ, oiméramo jajavýraʼe, aníkena jakyhyje jadesidi jey hag̃ua (Sal. 51:1-4, 7-10).

8. Mbaʼépa ñanemboʼe Pablo oñeʼẽrõ guare umi omendasévare?

⁸ Mbaʼépa ñanepytyvõta jajepyʼapýramo jadesidíta jave? Jahechakuaavaʼerã ndahaʼeiha  peteĩ hendáichante ikatúva jadesidi porã peteĩ mbaʼe. Hesakãve hag̃ua ñandéve upéva ñahesaʼỹijomi apóstol Pablo heʼivaʼekue umi omendasévare. Haʼe ohai: ‘Oĩramo peteĩ oimoʼãva iporãvetaha omenda ha iñakãguapýma, tojapo upe oĩ porãveháicha chupe g̃uarã ha tomenda; upéva ndahaʼéi pekádo. Péro upe odesidímava ipyʼaite guive nomendamoʼãiha, ha ohechakuaa iporãvetaha nomendáiramo, ojapo porãnte avei’ (1 Cor. 7:36-38, BNP). Jahechaháicha Pablo heʼi iporãha nañamendái, péro ndeʼíri upévante oĩ porãha.

9. Oĩ porãpa jajepyʼapy ñande rapichakuéra opensávare? Emyesakãmi.

⁹ Oĩ porãpa jajepyʼapy ñande rapichakuéra opensávare jadesidíta jave? Sapyʼánte oĩ porã. Jahechami mbaʼépa heʼivaʼekue Pablo oñeʼẽrõ guare umi tembiʼu oñekuaveʼẽvare umi ñandejára guaʼúpe. Haʼe ohechakuaa ojedesidi jave peteĩ mbaʼe, noĩvaíriramo jepe, ikatuha omoñeñandu vai umi ijerovia kangývape. Upévare heʼi: ‘Upe haʼúva rupive ajapoukáramo ivaíva che ermánope, arakaʼeve ndaʼuveimavaʼerã soʼo, ani hag̃ua amoñeñandu vai chupe’ (1 Cor. 8:4-13, BNP). Ñande avei jahechakuaavaʼerã mbaʼéichapa oñeñandúta ñande rapichakuéra upe jadesidívare, ha japyta porãtapa Jehová renondépe, upéva iñimportanteve jey hína opa mbaʼégui (elee Romanos 14:1-4). Péro, mbaʼéichapa la Biblia ñanepytyvõta ikatu hag̃uáicha jadesidi porã ha upéicha ñamombaʼeguasu Ñandejárape?

Seis mbaʼe ikatúva ñanepytyvõ jadesidi porã hag̃ua

10, 11. a) Mbaʼe rehépa ñanemanduʼavaʼerã ani hag̃ua jadesidise ótrore ñande rogapýpe? b) Mbaʼérepa oñatendevaʼerã umi ansiáno odesidíta jave ermanokuéra rehehápe?

¹⁰ Ani jadesidise ótrore. Ñepyrũrã ñañeporanduvaʼerã: “Añetehápe piko che adesidivaʼerã ko mbaʼe?”. Rréi Salomón heʼivaʼekue: ‘Umi ijejapóva oñemotĩta katuete, oñemomirĩvape térã noñemombaʼeguasúivape katu omoirũ arandu’ (Pro. 11:2).

¹¹ Tuvakuéra ikatu oheja ifamíliape odesidi heta mbaʼe, péro upéva ndeʼiséi ikatuha ojapo ojaposéva (Col. 3:20). Tembireko avei ikatu odesidi heta mbaʼe hogapýpe, upéicharamo jepe imanduʼavaʼerã iména omoakãha ifamíliape (Pro. 1:8; 31:10-18; Efe. 5:23). Ha ména imanduʼavaʼerã Jesucristo omoakãha chupe (1 Cor. 11:3). Kongregasiónpe katu umi ansiáno odesidi heta mbaʼe ermanokuéra rehehápe, upévare oñatendevaʼerã ani omboyke ‘Ñandejára Ñeʼẽ heʼíva’ (1 Cor. 4:6). Oñehaʼãvaʼerã avei ojapo opa mbaʼe tembiguái jeroviaha ha iñarandúva heʼiháicha (Mat. 24:45-47). Upévare, pono jajepyʼapyeterei ha jaiko ñambohasa asy umi oĩvape ñande jerére, tekotevẽ ñaneakãguapy ha ani jadesidi peteĩ mbaʼe ótro odesidivaʼerã.

12. a) Mbaʼérepa jaikuaa porã raẽ vaʼerã jadesidítava, heʼi haguéicha rréi Salomón? b) Mbaʼépa tekotevẽ jajapo jaikuaa porãséramo peteĩ mbaʼe?

¹² Jaikuaa porã raẽ vaʼerã. Salomón heʼivaʼekue: ‘Ikatupyrýva rembiapo mbaʼe porã  memete, ha umi vai vaínte ojapóva katu opa mboriahúpe’ (Pro. 21:5). Ñamoĩ chupe oñekuaveʼẽha ndéve peteĩ traváho, rejagarrátapa upepete voi? Tekotevẽ reikuaa porã raẽ mbaʼépa upe rejapótava, ejerure konsého umi oikuaávape ha ehecha mbaʼépa heʼi la Biblia upe mbaʼére (Pro. 20:18). Upéi eanota mbaʼérepa iporãta ha mbaʼérepa ivaíta rejagarráramo upe traváho. Nemanduʼavaʼerã peteĩ kristiáno ikatupyrýva katuete ‘oguapy raẽtaha okalkula mboýpa ohupytýta chupe’ upe ojaposéva (Luc. 14:28, NM). Rehechavaʼerã mbaʼéichapa repytáta Jehová renondépe ha ani repensánte mboýpa reganáta. Koʼã mbaʼe reikuaa hag̃ua reñemotiémpo ha reñehaʼãvaʼerã, upéicha redesidi porãta ha rejeíta heta akãrasýgui.

13. a) Mbaʼépa ohechauka ñandéve Santiago 1:5? b) Mbaʼérepa tekotevẽ jajerure Ñandejárape tañanemoarandu?

¹³ Jajerure Jehovápe tañanemoarandu. Ñamombaʼeguasuséramo Ñandejárape umi mbaʼe jadesidíva rupive, jajerurevaʼerã chupe tañanepytyvõ. Santiago heʼi porã vaʼekue: ‘Oiméramo pende apytépe peteĩ naiñarandupáiva, tojerure Ñandejárape. Haʼe ningo ipojera opavavéndi, ohekyiʼỹre mbaʼeve. Oiméramo ojeruréva arandu, Ñandejára omeʼẽta chupe’ (Sant. 1:5, BNP). Mbaʼéreiko upéicharõ ñatĩta jajerure hag̃ua Jehovápe tañanepytyvõ jadesidíta jave! (Pro. 3:5, 6.) Jadesidíramo peteĩ mbaʼe ñandejehegui reínte, ikatu ñasẽ vai. Péro jajerure asýramo Jehovápe tañanemoarandu ha jahecháramo mbaʼépa heʼi la Biblia, ijespíritu sánto ñanepytyvõta jaikuaa hag̃ua mbaʼérepa iporãve jaiporavo peteĩ mbaʼe (Heb. 4:12; elee Santiago 1:22-25).

14. Mbaʼérepa ndovaléi ñahaʼarõiterei jadesidíta jave?

¹⁴ Ani ñahaʼarõiterei. Ndovaléi añete jajapura jadesidíta jave, jahecha haguéicha tekotevẽ jaikuaa porã raẽ ndaivaíripa hína upe jajaposéva ha jajerure Jehovápe tañanemoarandu. Umi iñarandúva ningo ‘oikuaa porã moõpa opyrũta’ (Pro. 14:15). Péro naiporãi avei jaʼe: “Ág̃a amo gotyovénte ajapóne”. Pe ipyʼamokõiva heʼi jepi oimeraẽ mbaʼe pono ojapo oñehaʼarõva chugui (Pro. 22:13). Ha ojapóvo péicha, oimoʼãʼỹre ohejahína ótro odesidi hese.

15, 16. Mbaʼépa tekotevẽ jajapo ñakumpli hag̃ua pe jadesidíva?

¹⁵ Jajapovaʼerã jadesidíva. Ñañehaʼãmbaitéramo jepe jadesidi porã peteĩ mbaʼe péro ndajajapói mbaʼeve, vyroreietépe jey ñasẽta. Rréi Salomón heʼivaʼekue: ‘Opaite mbaʼe oĩva nde pópe, rejapovaʼerã koʼág̃a ikatu reheve’ (Ecl. 9:10). Jajapovaʼerã opa ikatúva jaipotáramo osẽ porã ñandéve upe jadesidíva. Pór ehémplo peteĩ ermáno odesidíva ojapo iprekursorádo  osẽ porãta, ndohejáiramo itraváho ha umi vyʼarã omokaneʼõ ha hoʼupa chugui itiémpo.

¹⁶ Heta vése umi mbaʼe jadesidi porãva ijetuʼuve ñakumpli hag̃ua, ‘ko múndo oĩmbaite rupi pe aña poguýpe’ (1 Juan 5:19). Upeichaite ningo, ñande ‘ñañorairõhína umi mburuvichakuéra pytũmbýpe oĩva ndive, umi ánhel aña yvategua ndive’ (Efe. 6:12). Pablo ha Judas heʼi haguéicha, umi odesidíva omombaʼeguasu Ñandejárape heta oñorairõvaʼerã (1 Tim. 6:12; Jud. 3).

17. Mbaʼépa Jehová ohaʼarõ ñandehegui jadesidíta jave peteĩ mbaʼe iñimportánteva, ha mávapepa opromete oguerohorytaha?

¹⁷ Jahecha mbaʼéichapa osẽ upe jadesidíva ha ñakambia tekotevẽramo. Sapyʼánte nosẽporãi ñandéve jajaposéva, pe ‘tiémpo ha umi mbaʼe oikóva ñahaʼarõʼỹre ohupytýgui opavavépe’ (Ecl. 9:11). Péro jadesidi jave peteĩ mbaʼe iñimportánteva, Jehová ohaʼãrõ ñakumpli ha jajepytaso mbarete ijykére toiko la oikóva. Pór ehémplo jadesidíramo ñamenda térã ñañemeʼẽ Jehovápe jaservi hag̃ua chupe, ndaikatúi ñamboykénte umi kompromíso. Haʼe oipota ñakumpli, ha opromete oguerohorytaha umi omombaʼévape chupe (elee Salmo 15:1, 2, 4). Heta mbaʼe jadesidíva jepi naiñimportanteguasúi. Upéicharõ jepe, pe kristiáno iñarandúva akóinte ojepyʼamongeta umívare, ha noñemombaʼeguasúi ni noñemohatãi haʼe heʼívapente. Upéva rangue oñehaʼã ojapo umi mbaʼe oipytyvõtava chupe ha naiprovlémai okambia hag̃ua upe odesidivaʼekue (Pro. 16:18). Chupe g̃uarã iñimportanteve opa mbaʼégui omombaʼeguasu Ñandejárape.

Ñamboʼékena ñande rapichakuérape odesidi porã hag̃ua

18. Mbaʼéichapa tuvakuéra ikatu oipytyvõ ifamíliape odesidikuaa hag̃ua?

¹⁸ Tuvakuéra, peẽ ikatu peipytyvõ pene famíliape odesidi porã hag̃ua, ha upéicha omombaʼeguasu Ñandejárape. Ha upéva pemboʼekuaa chupekuéra pene ehémplo rupive (Luc. 6:40). Ikatu voi pemombeʼu mbaʼépa pejapóraʼe pedesidi mboyve peteĩ mbaʼe. Avei pehejakuaa pene famíliape todesidi jepi haʼeño, ha osẽ porãramo ani penderesarái peguerohory hag̃ua chupe. Péro ojavýramo, naiporãmoʼãi peguerochichĩ ha pedefende chupe pono oiko hese mbaʼeve. Pór ehémplo, ñamoĩ chupe peteĩ túva ohejaha itaʼýrape oguenohẽ irrehistrorã. Upéi pe mitãrusu oñemulta omaneha hatãitereígui. Itúva ikatu opaga hese, péro iporãvéta ohejáramo itaʼýrape ombaʼapo opaga hag̃ua. Upéicha pe mitãrusu oñatendevétama ojapóvare (Rom. 13:4).

19. Mbaʼépa ñamboʼevaʼerã ñane estudiántepe, ha mbaʼéichapa jajapovaʼerã upéva?

¹⁹ Jesucristo heʼivaʼekue hembiguaikuéra omboʼevaʼerãha umi héntepe (Mat. 28:20). Upévare iñimportanteterei ñande ñamboʼe ñane estudiántepe odesidi porã hag̃ua. Upearã tekotevẽ jajejokokuaa ha ani jaʼe chupe mbaʼéichapa ojapovaʼerã opa mbaʼe. Iporãvéta ñaipytyvõramo chupe ojepyʼamongeta ha ohecha hag̃ua la Biblia heʼíva, ha péicha haʼete odesidíta. Jaikuaaháicha amo ipahápe ‘enterove jajecháta Jehovándi ñane rembiapokuére’ (Rom. 14:12). Upéicharõ, ñañehaʼãmbaitékena jadesidi porã ñamombaʼeguasu hag̃ua Jehovápe.

[Nóta]

Mbaʼépa rembohováita?

• Mbaʼérepa tekotevẽ ñañehaʼã jadesidi porã?

• Mbaʼérepa sapyʼánte ijetuʼu jadesidi hag̃ua? Mbaʼépa ñanepytyvõta jadesidi hag̃ua kyhyjeʼỹre?

• Emombeʼu umi seis mbaʼe ikatúva ñanepytyvõ jadesidi porã hag̃ua ha upéicha ñamombaʼeguasu Ñandejárape.

[Porandu ñahesaʼỹijóva]

[Nóta oĩva taʼanga ndive páhina 15]

Ipyʼamokõiva ojogua peteĩ kanóape oĩva rrío mbytépe, ápe ha pépe ogueraháva chupe torménta

[Nóta oĩva taʼanga ndive páhina 16]

1 Ani jadesidise ótrore

2 Jaikuaa porã raẽ vaʼerã

3 Jajerure Jehovápe tañanemoarandu

4 Ani ñahaʼarõiterei

5 Jajapovaʼerã jadesidíva

6 Jahecha mbaʼéichapa osẽ upe jadesidíva ha ñakambia tekotevẽramo