Maghimo sang mga Desisyon nga Nagapadungog sa Dios
Maghimo sang mga Desisyon nga Nagapadungog sa Dios
“Ang tawo nga maalamon nagabinagbinag sang iya mga tikang.”—HULU. 14:15, NW.
1, 2. (a) Ano ang panguna nga kabalak-an naton kon nagahimo kita sang mga desisyon? (b) Ano nga mga pamangkot ang aton pagabinagbinagon?
GINAHIMO naton ini adlaw-adlaw. Madamo sa sini ang indi tanto ka importante, apang ang pila may daku nga epekto sa aton kabuhi. Ano ini? Mga desisyon. Sa tanan nga desisyon nga aton ginahimo, dalagku man ukon gagmay, ang panguna nga dapat naton kabalak-an amo ang pagpadungog sa Dios.—Basaha ang 1 Corinto 10:31.
2 Mahapos lang bala para sa imo ang pagdesisyon ukon nabudlayan ka sa paghimo sini? Agod mangin hamtong kita sa espirituwal, dapat naton makilala kon ano ang husto kag kon ano ang sayop kag maghimo sang kaugalingon nga desisyon nga wala lang nagasunod sa gusto sang iban. (Roma 12:1, 2; Heb. 5:14) Ano ang pila ka malig-on nga rason kon ngaa dapat naton tun-an nga maghimo sing maayo nga desisyon? Ngaa kon kaisa mabudlay gid maghimo sing desisyon? Kag ano nga mga tikang ang mahimo naton agod mapat-od nga ang aton mga desisyon nagapadungog sa Dios?
Ngaa Kinahanglan Magdesisyon?
3. Ano ang indi naton dapat pagtugutan nga mag-impluwensia sa aton mga desisyon?
3 Kon makita sang aton mga kaeskwela ukon katrabaho nga indi kita makadesisyon sing malig-on tuhoy sa mga talaksan sang Biblia, magahinakop sila nga indi kita kumbinsido sa aton ginapatihan kag madali lang nila kita maimpluwensiahan. Mahimo nga nagabinutig sila, nagapangdaya, ukon nagapangawat kag nagatinguha nga ganyaton kita nga “magsonod sa kadam-an” paagi sa pag-entra sa ila ukon sa pagtago sang ila mga ginahimo. (Ex. 23:2) Apang kon ang isa makahibalo magdesisyon, indi niya paglapason ang iya nahanas sa Biblia nga konsiensia bangod lamang sa kahadlok ukon sa handum nga batunon sang iban.—Roma 13:5.
4. Ngaa luyag sang iban nga magpasilabot sa aton mga desisyon?
4 Indi tanan nga luyag mag-impluwensia sa aton mga desisyon may malain nga motibo. Mahimo kita piliton sang aton mga abyan nga luyag magbulig sa aton nga sundon ang ila laygay. Bisan pa malayo na kita sa aton pamilya, mahimo nga nagakabalaka gihapon sila sa aton amo nga luyag nila magpasilabot sa aton mga desisyon. Halimbawa, binagbinaga ang isyu sa pagpabulong. Maathag nga ginapakamalaut sang Biblia ang pagpatughong sing dugo. (Binu. 15:28, 29) Apang may mga sahi sang pagpabulong nga wala sing maathag nga sugo kag nagakinahanglan sang aton personal nga desisyon. * Mahimo ipilit sang aton mga hinigugma ang ila opinyon. Apang, ang tagsa ka bawtismado nga Cristiano dapat magdala “sang iya kaugalingon nga lulan.” (Gal. 6:4, 5) Ang aton panguna nga kabalak-an amo ang paghupot sang matinlo nga konsiensia sa atubangan sang Dios, indi sang tawo.—1 Tim. 1:5.
5. Paano naton malikawan nga maguba ang aton pagtuo?
5 Makatalagam gid kon indi kita makahibalo maghimo sing desisyon. Si disipulo Santiago nagsulat nga ang tawo nga indi makapamat-od, “indi malig-on sa tanan niya nga dalanon.” (Sant. 1:8) Kaangay sia sang tawo sa sakayan nga wala sing timon nga ginapalidpalid lang sang opinyon sang iban. Daw ano kahapos maguba ang pagtuo sini nga tawo kag ibasol sa iban ang iya malain nga nadangatan! (1 Tim. 1:19) Paano naton ina malikawan? Dapat nga “napabakod [kita] sa pagtuo.” (Basaha ang Colosas 2:6, 7.) Agod matigayon naton ina nga kabakod, dapat kita maghimo sang desisyon nga nagapakita sang aton pagtuo sa inspirado nga Pulong sang Dios. (2 Tim. 3:14-17) Apang, ano ang mahimo makaupang sa aton sa paghimo sang maayo nga mga desisyon?
Kon Ngaa Mabudlay Maghimo sing mga Desisyon
6. Paano ang kahadlok mahimo makaapektar sa aton?
6 Ang kahadlok mahimo magpugong sa aton sa paghimo sing desisyon—kahadlok nga magsayop sa pagdesisyon, kahadlok nga mapaslawan, ukon kahadlok nga kadlawan sang iban. Normal lamang ina. Wala sang bisan sin-o ang luyag maghimo sang indi maayo nga desisyon nga mahimo bangdan sang problema kag kahuy-anan. Walay sapayan sini, ang aton gugma sa Dios kag sa iya Pulong mahimo makadula sang aton kahadlok. Sa ano nga mga paagi? Ang gugma sa Dios magapahulag sa aton nga usisaon ang iya Pulong kag ang mga publikasyon nga pasad sa Biblia antes kita maghimo sing importante nga mga desisyon. Paagi sa sini mabuhinan naton ang sayop nga aton mahimo. Ngaa? Bangod ang Biblia ‘makahatag sing kaalam sa mga tawo nga kulang sing kinaalam, kag agod mahatagan ang mga pamatan-on sing ihibalo kag ikasarang sa paghunahuna sing maayo.’—Hulu. 1:4, NW.
7. Ano ang ginatudlo sa aton sang halimbawa ni David?
7 Mapat-od bala naton nga husto pirme ang aton desisyon? Indi. Tanan kita nagakasala. (Roma 3:23) Subong halimbawa, si Hari David isa ka tawo nga maalam kag matutom. Apang, may mga tion nga nakahimo sia sing indi maayo nga mga desisyon nga ginbangdan sang pag-antos niya kag sang iban. (2 Sam. 12:9-12) Bisan pa sini, wala gintugutan ni David ang iya kasaypanan nga magpugong sa iya sa paghimo sang mga desisyon nga ginakahamut-an sang Dios. (1 Hari 15:4, 5) Kaangay ni David, makahimo man kita sing husto nga mga desisyon bisan pa nakasayop kita sang una kon dumdumon naton nga ginapalampas ni Jehova ang aton mga kasaypanan kag ginapatawad ang aton mga sala. Padayon niya nga sakdagon ang mga nagahigugma kag nagatuman sa iya.—Sal. 51:1-4, 7-10.
8. Ano ang matun-an naton sa ginsiling ni apostol Pablo tuhoy sa pag-asawahay?
8 Mahimo naton mabuhinan ang kabalaka sa paghimo sang desisyon. Paano? Paagi sa pagdumdom nga kon kaisa madamo sang husto nga desisyon nga puede naton pilion. Binagbinaga kon paano nangatarungan si apostol Pablo tuhoy sa pag-asawahay. Gin-inspirar sia pagsulat: “Kon ang bisan sin-o nagahunahuna nga nagagawi sia sing di-nagakaigo sa iya pagkadiminyo, kon lampas na sia sa hingurusgan sang pagkapamatan-on, kag kon amo ini ang dapat mahanabo, himuon niya kon ano ang luyag niya; wala sia nagapakasala. Magminyo sila. Apang kon ang bisan sin-o determinado sa iya tagipusuon, nga wala nagabatyag nga kinahanglan niya magminyo, kundi may awtoridad sa iya kaugalingon nga kabubut-on kag naghimo sini nga desisyon sa iya tagipusuon, nga magpabilin sia nga di-minyo nagahimo sia sing maayo.” (1 Cor. 7:36-38) Ginpanugda ni Pablo nga mas maayo kon ang isa indi na magminyo, apang indi lamang ini ang husto nga desisyon.
9. Dapat bala kita mabalaka kon paano tamdon sang iban ang aton desisyon? Ipaathag.
9 Dapat bala kita mabalaka kon paano tamdon sang iban ang aton desisyon? Dapat man. Talupangda kon ano ang ginsiling ni Pablo tuhoy sa mga pagkaon nga mahimo ginhalad sa mga idolo. Nagsiling sia nga indi man sayop kon magdesisyon ang isa nga magkaon sini, apang mahimo ini makapasandad sa isa nga maluya ang konsiensia. Ano ang pamat-od ni Pablo? “Kon ang kalan-on nagapasandad sa akon utod,” sulat niya, “indi na gid ako magkaon liwat sang karne, agod indi ko mapasandad ang akon utod.” (1 Cor. 8:4-13) Sing kaanggid, dapat man naton binagbinagon kon bala ang aton desisyon makaapektar sa konsiensia sang iban. Siempre pa, ang aton panguna nga ginakabalak-an amo ang epekto sini sa aton kaangtanan kay Jehova. (Basaha ang Roma 14:1-4.) Ano nga mga prinsipio sa Biblia ang makabulig sa aton nga makahimo sang mga desisyon nga nagapadungog sa Dios?
Anom ka Tikang sa Paghimo sang Maayo nga Desisyon
10, 11. (a) Paano naton malikawan nga mangin makahas sa sulod sang pamilya? (b) Ano ang dapat dumdumon sang mga gulang kon nagadesisyon sila para sa kongregasyon?
10 Likawi nga mangin makahas. Antes maghimo sing isa ka desisyon, maayo nga pamangkuton naton ang aton kaugalingon, ‘May kinamatarong bala ako sa paghimo sini nga desisyon?’ Si Hari Solomon nagsulat: “Ang makahas mahuy-an; apang ang mapainubuson maalamon.”—Hulu. 11:2, NW.
11 Mahimo tugutan sang ginikanan ang ila kabataan nga maghimo sang pila ka desisyon, apang ang mga kabataan indi dapat maghunahuna nga makadesisyon na sila sa tanan nga butang. (Col. 3:20) Ang mga asawa kag iloy may awtoridad man sa pamilya, apang dapat nila kilalahon ang pagkaulo sang ila mga bana. (Hulu. 1:8; 31:10-18; Efe. 5:23) Sing kaanggid, dapat man kilalahon sang mga bana nga may limitasyon ang ila awtoridad kag dapat sila magpasakop kay Cristo. (1 Cor. 11:3) Ang mga gulang nagahimo sang mga desisyon para sa kongregasyon. Apang, ginapat-od nila nga “indi magsobra sa mga butang nga nasulat na” sa Pulong sang Dios. (1 Cor. 4:6) Ginasunod gid nila ang panuytoy halin sa matutom nga ulipon. (Mat. 24:45-47) Malikawan naton kag sang iban ang mga problema kon maghimo lamang kita sang mga desisyon sa mga butang nga may awtoridad kita.
12. (a) Ngaa dapat kita mag-research? (b) Ipaathag kon paano himuon sang isa ang pag-research?
12 Mag-research. “Ang mapisan nga nagaplano magaayuhan,” siling ni Solomon, “apang ang tawo nga nagapadasudaso magaimol.” (Hulu. 21:5, NW) Halimbawa, may plano ka bala nga magnegosyo? Indi ka magpadala sa imo emosyon. Hibalua anay ang importante nga mga impormasyon, mangayo sing laygay sa mga eksperto sa sini, kag hibalua ang mga prinsipio sa Biblia nga nadalahig. (Hulu. 20:18) Sa imo pag-research, maggamit sing duha ka listahan—ang isa listahan sang mga bentaha kag ang isa listahan sang mga disbentaha. Antes ka magdesisyon, ‘sumaha anay ang kagastuhanan.’ (Luc. 14:28) Binagbinaga man kon ano ang mangin epekto sini sa imo indi lamang sa pinansial kundi sa imo man kaangtanan kay Jehova. Ang pag-research nagakinahanglan gid sang tion kag panikasog. Apang sa paghimo sini, malikawan mo nga magpadasudaso sa pagdesisyon nga mahimo magresulta sa problema.
13. (a) Ano ang ginapasalig sa aton sang Santiago 1:5? (b) Paano ang pagpangamuyo sing kaalam makabulig sa aton?
13 Mangamuyo sing kaalam. Ang aton mga desisyon magapadungog lamang sa Dios kon mangayo kita sing bulig sa iya sa paghimo sini. Si disipulo Santiago nagsulat: “Kon may isa sa inyo nga kulang sang kaalam, padayon sia nga magpangayo sa Dios, kay maalwan Sia nga nagahatag sa tanan kag wala nagapangita sang sayop; kag ihatag ini sa iya.” (Sant. 1:5) Dapat naton batunon nga kinahanglan naton ang panuytoy sang Dios sa paghimo sing desisyon. (Hulu. 3:5, 6) Kay kon magsalig lang kita sa aton kaugalingon nga paghangop, madali kita maglisa. Kon mangamuyo kita sing kaalam kag tun-an ang mga prinsipio sa Pulong sang Dios, ginatugutan naton ang balaan nga espiritu nga magbulig sa aton nga mahantop kon ano gid ang aton motibo sa paghimo sang isa ka butang.—Heb. 4:12; basaha ang Santiago 1:22-25.
14. Ngaa indi kita dapat magpabuyanbuyan?
14 Maghimo sang desisyon. Indi magpadalidali sa pagdesisyon kon wala ka pa naka-research kag nakapangamuyo. Ang maalam nga tawo “nagabinagbinag sang iya mga tikang.” (Hulu. 14:15, NW) Sa pihak nga bahin, indi man sia dapat magpabuyanbuyan. Ang isa nga nagapabuyanbuyan mahimo mangita sing mga balibad kon ngaa indi sia makadesisyon. (Hulu. 22:13) Apang isa gihapon ka desisyon ang iya ginahimo—desisyon nga magpakontrol sa iban.
15, 16. Ano ang nadalahig sa pagtuman sang isa ka desisyon?
15 Tumana ang imo desisyon. Ang aton panikasog nga makahimo sing maayo nga desisyon mangin wala sing pulos kon indi naton ini pagtumanon. “Ang bisan ano nga makita nga himoon sang imo kamut, himoa ini sa imo gahum,” sulat ni Solomon. (Man. 9:10) Agod magmadinalag-on kita, dapat nga handa kita nga gamiton ang aton mga ginapanag-iyahan sa pagtuman sang aton mga desisyon. Halimbawa, ang isa ka manugbantala sa kongregasyon mahimo magdesisyon nga magpayunir. Magamadinalag-on bala sia? Huo, kon indi niya pagtugutan ang iya sekular nga trabaho kag kalingawan nga mag-ubos sang iya kusog kag tion para sa ministeryo.
16 Ang pinakamaayo nga mga desisyon amo sa masami ang mabudlay tumanon. Ngaa? Bangod “ang bug-os nga kalibutan yara sa gahom sang isa nga malauton.” (1 Juan 5:19) Dapat kita magpakigdumog batok “sa mga manuggahom sang kalibutan sining kadudulman, batok sa malaut nga mga puersa nga espiritu sa langitnon nga mga duog.” (Efe. 6:12) Ginpakita nanday apostol Pablo kag disipulo Judas nga ang tanan nga nagadesisyon nga padunggan ang Dios may pagpakig-away.—1 Tim. 6:12; Jud. 3.
17. Kon nagahimo kita sang mga desisyon, ano ang ginapaabot ni Jehova?
17 Usisaa liwat ang imo desisyon kag maghimo sing mga pagbag-o kon kinahanglanon. Indi tanan nga desisyon nagakatuman suno sa ginplano naton. “Ang tion kag ang kahigayonan” nagakahanabo sa aton tanan. (Man. 9:11) Ginapaabot ni Jehova nga indi kita mangampo sa pagtuman sang pila ka desisyon bisan pa makaatubang kita sang mga problema. Ang desisyon nga ginhimo sang isa sang gindedikar niya ang iya kabuhi kay Jehova indi puede bag-uhon, kaangay man sang panumpa sa kasal. Ginapaabot sang Dios nga tumanon naton ina nga mga desisyon. (Basaha ang Salmo 15:1, 2, 4.) Apang ang kalabanan nga desisyon nga aton ginahimo indi man tuman ka importante. Ang maalam nga tawo nagausisa liwat sang iya ginhimo nga mga desisyon. Wala niya ginatugutan ang bugal ukon ang iya mabaskog nga opinyon nga mag-upang sa iya sa pagbag-o sang isa ka desisyon. (Hulu. 16:18) Ang iya panguna nga ginakabalak-an amo ang padayon nga pagpadungog sa Dios.
Buligi ang Iban nga Maghimo sang mga Desisyon nga Nagapadungog sa Dios
18. Paano matudluan sang ginikanan ang ila kabataan sa paghimo sang maayo nga desisyon?
18 Dapat tudluan sang mga ginikanan ang ila kabataan sa paghimo sang mga desisyon nga nagapadungog sa Dios. Daku ang mahimo sang ila maayo nga halimbawa. (Luc. 6:40) Kon nagakaigo, mahimo ipaathag sang mga ginikanan sa ila kabataan kon ano anay nga mga tikang ang ila ginhimo antes sila nagdesisyon. Mahimo man nila tugutan ang ila kabataan nga makadesisyon para sa ila kaugalingon kag dayawon sila kon maayo ang resulta sang ila desisyon. Apang, kamusta kon indi maayo ang nangin resulta? Ang mga ginikanan may huyog nga amligan ang ila kabataan sa resulta sang ila ginhimo, apang ang paghimo sina indi pirme makahatag sing kaayuhan sa bata. Halimbawa, mahimo pahanugutan sang ginikanan nga makakuha sang lisensia sa pagmaneho ang ila bata. Apang kamusta kon may ginlapas sia nga kasuguan sa trapiko kag ginmultahan? Mahimo bayaran sang ginikanan ang multa. Apang, mangin mas responsable ang bata kon patrabahuon sia para mabayaran ang iya multa.—Roma 13:4.
19. Ano ang dapat naton itudlo sa aton mga estudyante sa Biblia, kag paano naton ini himuon?
19 Ginsugo ni Jesus ang iya mga sumulunod nga tudluan ang iban. (Mat. 28:20) Ang isa sa pinakaimportante nga butang nga matudlo naton sa aton mga estudyante sa Biblia amo ang paghimo sing maayo nga mga desisyon. Agod mahimo ini, likawan naton nga diktahan sila sang dapat nila himuon. Mas maayo kon tudluan naton sila nga mangatarungan base sa mga prinsipio sang Biblia agod makahibalo sila sa pagdesisyon para sa ila kaugalingon. Dugang pa, “ang kada isa sa aton manabat sang iya kaugalingon sa Dios.” (Roma 14:12) Gani, kita tanan may malig-on gid nga rason nga maghimo sing mga desisyon nga nagapadungog sa Dios.
[Nota]
^ par. 4 Para sa dugang nga impormasyon sa sini nga topiko, tan-awa ang suplemento sang Ang Aton Ministeryo sa Ginharian nga Enero 2007, pahina 3-6 nga natig-uluhan “Paano Ko Tamdon ang mga Bahin Sang Dugo kag ang mga Pagbulong nga Nagagamit Sang Akon Dugo?”
Ano ang Imo Sabat?
• Ngaa dapat kita magtuon sa paghimo sing mga desisyon?
• Paano ang kahadlok mahimo mag-apektar sa aton, kag paano naton ini malandas?
• Ano ang anom ka tikang nga mahimo naton agod mapat-od nga ang aton mga desisyon nagapadungog sa Dios?
[Mga Pamangkot sa Pagtinuon]
[Kahon/Retrato sa pahina 16]
Mga Tikang sa Paghimo sang Maayo nga mga Desisyon
1 Likawi nga Mangin Makahas
2 Mag-research
3 Mangamuyo sing Kaalam
4 Maghimo sang Desisyon
5 Tumana ang Imo Desisyon
6 Usisaa Liwat kag Maghimo sing mga Pagbag-o
[Retrato sa pahina 15]
Ang isa nga indi makadesisyon daw kaangay sang tawo sa sakayan nga wala sing timon sa tunga sang maunos nga dagat
