Худайны сабландырчатхан пӧгіннер алыңар

«Ибіре сағынчатхан кізі... полған на алтымын сынапча» (ПРИТ. 14:15).

1, 2. а) Пӧгіннер аларға итчетсебіс, иң пурун нимедеңер сағынарға кирек? б) Пу статьяда ниме ӱзӱрібізербіс?

 КӰННІҢ сай піс кӧп пӧгіннер алчабыс. Ол пӧгіннернің піреелері улуғлар, піреелері кічіглер. Оларның піреелері чуртазыбысты алыстырыбызарға айабас. Хайдағ даа пӧгін алчатсабыс, иң пурун ол пӧгіннер Худайны сабландырчалар ба тіп сағынчабыс. (1 Коринфтегілерге 10:31 хығырыбызыңар.)

² Пӧгіннер аларға сірерге оой ба алай сидік пе? Духовнай саринаң пызығ христианнар поларға хынчатсабыс, чахсыны чабалдаң талластырарға ӱгренерге кирекпіс. Паза алған пӧгінібісте пасха кізінің кӧңні нимес, че позыбыстың кӧңнібіс кӧрінерге кирек (Рим. 12:1, 2; Евр. 5:14). Ноға орта пӧгіннер аларға ӱгренерге кирек? Ноға пӧгіннер аларға сидік полча? Пістің пӧгіннерібіс Худайны сабландырзыннар тіп, хайдағ алтымнар идерге кирек?

Ноға пӧгіннер аларға кирек?

3. Пӧгін алчатсабыс, нимее тӧстенмеске кирекпіс?

³ Библейскай принциптернең палғалыстығ сурығларда тідімніг полбазабыс, хада ӱгренчеткеннер алай хада тоғынчатханнар киртінізібісте ікінҷілепчебіс, аннаңар пасхаларының оңдайынҷа тудын сығарбыс тіп сағынарлар. Аннаңар олар чойланған паза оғырлаан соонда, оларға хозыларға алай оларның киректерін чазырарға чӧптирлер (Исх. 23:2). Худайны сабландырчатхан пӧгіннер алчатхан кізі кізілердең хорыххан ӱчӱн алай кізілер аны пос кізізіне саназыннар тіп, Библия хоостыра ӱгреділген совезінең тоғыр парбас (Рим. 13:5).

4. Ноға пасха кізілер пістің ӱчӱн пӧгін аларға хынарлар?

⁴ Пістің ӱчӱн пӧгін аларға итчеткен кізілер прайлары піске хомай идерге хынминчалар. Нанҷыларыбыс піске хынчалар, аннаңар оларның чӧбінҷе тудынарға чӧптепчелер. Піс чағыннарыбыснаң хада чуртабинчатсабыс таа, олар пістің ӱчӱн пичелленчелер паза піске чахсы ползын тіп, піснең хада пӧгіннер аларға хынчалар. Кӧзідімге, имнег сурығларында. Ханнаң хайди тузаланарға Библия кӧні устағлар пирче (Илҷ. 15:28, 29). Имненҷең оңдайларның пасха сурығларында Библия кӧні устағ пирбинче. Хайдағ оңдайнаң имненерге, хайди имненмеске піске постарыбысха пӧгерге кирек *. Ол сурығларда пістің туғанннарыбыстың пасха сағыстар поларлар. Че кіреске тӱскен христианин алған пӧгін ӱчӱн позы нандырығ тудар (Гал. 6:4, 5). Иң пурун, піске кізілернің кӧңнілеріне кірерге нимес, че Худайның алнында арығ совестьтіг поларға кирек (1 Тим. 1:5).

5. Хайди киртініс чідір салбасха?

⁵ Тідінмес кізі позын хорғысха сухча. Иаков ӱгренҷі пасхан: «Ікі сағыстанған кізі ноо даа чолында пик турбас» (Иак. 1:8). Андағ кізі хайнапчатхан салғахтарҷа аар-пеер тасталчатхан кимеге тӧӧй. Аның кӧрізі пасха кізілернің кӧрістері хоостыра алысча. Андағ кізі киртінізін оой чідір салча, анаң анзында пасхаларын пыролапча! (1 Тим. 1:19). Хайди андағ нимее кір парбасха? Піске киртінізібісте пик турарға кирек. (Колосстағыларға 2:6, 7 хығырыбызыңар.) Киртіністе пик турар ӱчӱн, Худай Сӧзіне киртінізібіс кӧрінчеткен пӧгіннер аларға ӱгренерге кирек (2 Тим. 3:14—17). Орта пӧгіннер аларға пірееде піске ниме харығ полча?

Ноға пӧгіннер аларға сидік полча?

6. Хорыхчатсабыс, пірееде хайди тудынчабыс?

⁶ Пірееде саба пӧгіннер аларға паза пасхаларының харахтары алнында, алығ чіли, кӧрінерге хорыхчабыс. Пірдеезі сидіктерге алай уйатха ағылчатхан саба пӧгіннер аларға хынминча. Че Худайға паза аның Сӧзіне хыныс піске ол хорғысты тобырып аларға полыс пирер. Хайди? Худайға хыныс пӧгіннер алар алнында Худай Сӧзінде паза Библияда тӧстелген публикацияларда чӧптер тілирге кӧӧктірер. Анзы пісті кӧп алҷаастардаң арачылир. Ноға? Библия «опыт чох кізілерге хыйға поларға полысча. Чиит оолға піліс пирче паза тирең сағынарға ӱгретче» нооза (Прит. 1:4).

7. Давид ханнаң нимее ӱгренчебіс?

⁷ Піс хаҷан даа орта пӧгіннер аларбыс па? Чох. Піс прайзыбыс алҷаастар итчебіс (Рим. 3:23). Кӧзідімге, Давид хан хыйға паза киртістіг кізі полған. Че пірееде саба пӧгіннер алҷаң. Ол пӧгіннер ӱчӱн позы даа, пасхалары даа ирееленҷеңнер (2 Сам. 12:9—12). Андағ даа полза, Давид алҷаастарына Худайның кӧңніне кірчеткен пӧгіннер аларға харығ поларға пирбеҷең (1 Цар. 15:4, 5). Давид чіли, Худай пыро тастапчатханнаңар ундутпазабыс, иткен алҷаастарыбысха пӧгін аларға харығ поларға пирбеспіс. Худай ағаа хынчатханнарға паза аның чооғын исчеткеннерге аннаң андар хабазар (Пс. 51:1—4, 7—10).

8. Павелнің сӧстерінең хоныхтаңар ниме піліп алчабыс?

⁸ Нинҷе-де чол орта полчатханын пілзебіс, пӧгін аларға ниик арах полар. Хоных хонарынаңар Павелнің сӧстерін кӧр кӧреелер. Худай худы пастыра ол пас салған: «Хоных хонмаан кізі позының хынығыстарын тут полбинчатса паза пызығ частарға чит парза, хайди хынча іди ползын, чазых ит салбас. Андағ кізі хоных хонзын. Че кем-де позының чӱреенде хоных хонмасха пӧгін алза паза, хынығыстарын холында тудып, ол пӧгін хоостыра пик тудынчатса, чахсы итче» (1 Кор. 7:36, 37, НТ). Павел, хоных хонмаза, чахсы полар теен. Че хоных хонғанын даа орта пӧгін тирге чарир.

9. Піс алған пӧгіннерібістің ӱчӱн пасха кізілер ниме сағынчатханнаңар сағыссырирға кирек пе? Чарыда чоохтап пиріңер.

⁹ Піс алған пӧгіннердеңер пасхалары ниме сағынчатханнаңар сағыссырирға кирек пе? Пірееде кирек. Павел идолларға тайыға пирілген чиистеңер ниме теенін кӧр кӧреелер. Павел андағ чиисті чеенінде пір дее хомай ниме кӧрбеен. Че аны чеені пасха кізінің совезін ардадыбызарға айабас. Павел хайдағ пӧгін алған? Ол пасхан: «Харындазымны чиис хыҷыхтандырчатса, харындазымны хыҷыхтандырбас ӱчӱн, итті хаҷан даа чібеспін» (1 Кор. 8:4—13). Пістің тудынызыбыс пасха кізілернің совезіне хайди теелчеткеннеңер сағынарға кирек. Че иң пурун, алған пӧгіннерібіс Иегованаң ынархасха хайди теелчеткеннеңер сағынарға кирек. (Римдегілерге 14:1—4 хығырыбызыңар.) Хайдағ библейскай принциптер Худайны сабландырчатхан пӧгіннер аларға полыс пирерлер?

Орта пӧгіннер аларға полысчатхан алты алтым

10, 11. а) Сӧбіреде постаңар хайди иртіре сағынмасха? б) Ах сағаллар, ӧмедегі харындас-пиҷелерге теелчеткен сурығларда пӧгіннер алчатсалар, нимедеңер ундутпасха киректер?

¹⁰ Посха ла ізенмеңер. Пӧгін алар алнында позыңны сурыбыс: «Пу пӧгін аларға минің правом пар ба?» Соломон хан пасхан: «Посха ла ізенгені уйатха ағылча, пӧзік сананмас кізілер, тізең, хыйғалар» (Прит. 11:2).

¹¹ Іҷе-пабалар палаларына постарына пірее пӧгіннер аларға чаратчалар. Че палалар іди сыбыра тудын поларлар тіп санабасха киректер (Кол. 3:20). Сӧбіреде ипчілернің паза іҷелернің ідӧк ӱлгӱ пар. Че олох туста оларға сӧбіренің пазы ирі полчатханын ундутпасха кирек (Прит. 1:8; 31:10—18; Еф. 5:23). Ирінің ідӧк сӧбіреде хыри-пазы чох ӱлгӱ чоғыл. Ирі Христостың чооғын истерге кирек (1 Кор. 11:3). Ах сағаллар ідӧк ӧмее теелчеткен пӧгіннер алчалар. Че ах сағалларға, Худай Сӧзінің «пазылғаннаң артых сағын таппас» ӱчӱн, сиргек поларға кирек (1 Кор. 4:6). Ідӧк олар ізестіг нымысчы пирчеткен устағ хоостыра хап-орта тудынчалар (Матф. 24:45—47). Пазымнығ ползабыс паза пістің правобыс пар сурығларда пӧгін алзабыс, позыбысты кӧп сағыссырастардаң арачылап аларбыс.

12. а) Ноға істезіг апарарға кирек? б) Хайди істезіг апарарға?

¹² Істезіг апарыңар. Соломон пасхан: «Кӱстенҷік кізінің планнары маңнанысха ағылчалар, полған на маңзыраах кізі хызылар» (Прит. 21:5). Кӧзідімге, сірер бизнеснең айғазарға ба, чох па пӧкчезер. Эмоциялар хоостыра пӧгін албаңар. Ол кирекке килісчеткен прай нимелерні істезіңер. Хайдағ библейскай принциптер санға аларға кирек сағынып алыңар (Прит. 20:18). Істезіг чахсы апарар ӱчӱн, ікі список ит салыңар. Пірсінде чахсы сариларын, ікінҷізінде, тізең, нимее анзы ағыларын пас салыңар. Пӧгін алар алнында «хорадар ниме нооларны» прай санап аларға кирек (Лука 14:28). Сағын кӧріңер, хайди алған пӧгін материальнай сарина ла нимес, духовнай даа сарина теңер. Андағ істезіге кӧп тус паза кӱс кирек, че анзы кирек чох сидіктерге ағылчатхан пӧгіннер албасха полызар.

13. а) Иаковтың 1:5 хайдағ ізеніс пирче? б) Пазырыста хыйға сағыс сурынғаны піске хайди полыс пирер?

¹³ Пазырыста хыйға сағыс сурыныңар. Пӧгін алар алнында Худайдаң устағ сурынзабыс ла, ол пӧгін Худайны саблир. Иаков ӱгренҷі пасхан: «Сірернің пірееңернің Худайдаң пирілген хыйғазы читпинчетсе, Аннаң сурынзын, ағаа пирілер. Худай прайзына, харанмин, уйаттырбин, пиредір нооза» (Иак. 1:5). Худайның хыйғазында кирексінчеткенібісте уйатчаң ниме чоғыл (Прит. 3:5, 6). Постарыбысха ла ізензебіс, алҷаас ит саларға хорғыс пар. Хыйға сағыс сурынып пазырчатсабыс паза Библияда килістіре принциптерні тілепчетсебіс, ызых хут ноға іди тудынчатханыбысты піліп аларға полыс пирер (Евр. 4:12; Иаковтың 1:22—25 хығырыбызыңар).

14. Ноға пӧгін аларын соона салдырбасха кирек?

¹⁴ Пӧгін алыңар. Че істезіг апарбин паза пазырыста хыйға сағыс сурынмин, анзын идерге маңзырабаңар. Хыйға кізі «полған на алтымын сынапча» (Прит. 14:15). Че андағ даа полза, соона салдырбин, пӧгін аларға кирек. Піреезі пір дее ниме итпеске аймах-пасха сылтағлар тілепче (Прит. 22:13). Пасха кізілер аның ӱчӱн пӧгін алзалар даа, ол пӧгін ӱчӱн кізі позы нандырығ тутча.

15, 16. Алған пӧгін хоостыра тудынар ӱчӱн ниме идерге кирек?

¹⁵ Алған пӧгін хоостыра тудыныңар. Пӧгін аларға хоратхан тус паза кӱс тик полбазын тіп, піске ол алған пӧгін хоостыра тудынарға кирек. Соломон пасхан: «Холың ит полчатхан нимені, прай кӱзің салып, ит» (Эккл. 9:10). Алған пӧгіннер хоостыра тудынар ӱчӱн кӱзібісті, тузыбысты паза пасха даа нимелерні хорадарға тимде поларға кирекпіс. Кӧзідімге, искірігҷі, пионер полып, нымысчыланарға хынча. Ол пионер пол полар ба? Нымысчыланарға кирек тузын паза кӱзін ӱтертеністерге паза тоғысха хоратпаза, пол полар.

¹⁶ Чахсы даа пӧгін хоостыра тудынарға аар полча. Ноға? «Тиксі-тилекей чабал кӱзі алтында» нооза (1 Иоан. 5:19). Ідӧк піске «тигірдең тӱскен пастыхтардаң, ӱлгӱдегілердең, пу чир ӱстӱндегі харасхы кӱстернің устағҷыларынаң, чабал хуттардаң тоғыр чаалазарға» кирек (Еф. 6:12). Павел илҷі паза Иуда ӱгренҷі Худайны саблирға пӧгін алған кізілерге оларнаң харбазарға кирек полчатханын кӧзіт пиргеннер (1 Тим. 6:12; Иуд. 3).

17. Алған пӧгіннерібістеңер чоох парчатса, Иегова пістең ниме сағыпча?

¹⁷ Кирек полза, алған пӧгіннеріңні алыстырыңар. Пірееде алған пӧгіннерібіс чахсы салтарларға ағылбинчалар. «Прай ниме тустың паза кинетін пол парчатхан киректернің холында» нооза (Эккл. 9:11). Че Иегова, сидіктерге урунзабыс таа, алған пӧгіннерібіс хоостыра тудынзыннар тіп сағыпча. Иеговаа пазырыста чуртазын пирібіскен алай хоных хонған кізее пирген сӧзінҷе хаҷан даа тудынарға кирек. (Псалом 15:1, 2, 4 хығырыбызыңар.) Пірее пӧгіннер олаңай полчалар. Хыйға кізі алған пӧгіннерін нинҷе-де тус пазынаң хатап кӧрглепче. Андағ кізі улуғзырах паза поғдархаас нимес, аннаңар, кирек полза, алған пӧгіннерін алыстырча (Прит. 16:18). Ол Худайны саблирын чуртазында пастағы орынға турғысча.

Пасхаларын Худайны сабландырчатхан пӧгіннер аларға ӱгредіңер

18. Хайди іҷе-пабалар палаларын чахсы пӧгін аларға ӱгредіп аларлар?

¹⁸ Іҷе-пабалар палаларын Худайны сабландырчатхан пӧгіннер аларға ӱгрет поларлар. Иң чахсы оңдайларның пірсі — постарына кӧзідім поларға (Лука 6:40). Оңдай полза, іҷе-пабаларға палаларына ноға андағ пӧгін алылғаннаңар чоохтирға чарир. Ідӧк палаа позының чуртазына теелчеткен пӧгіннер аларға чарат турыңар. Чахсы пӧгіннер алза, аны махтирға чарир. Че пала саба пӧгіннер алчатса, ниме идерге? Іҷе-пабазы аны сидіктердең арачылирға хынарлар, че анзы чахсы нимее ағылбас. Кӧзідімге, іҷе-пабазы палазына водительскай права аларға чаратча. Права алып алып, ол чолдағы правилоны сайбабысча. Аның ӱчӱн штраф тӧлирге килісче. Іҷе-пабазына ол штрафты тӧлебізерге чарир. Че ол пала позы штрафха ахча тоғынып алза, позының киректерінің ӱчӱн нандырығ тударға ӱгреніп алар (Рим. 13:4).

19. Библия ӱгренчеткен кізілерні нимее ӱгредерге кирек паза хайди анзын идерге?

¹⁹ Иисус ӱгренҷілеріне пасхаларын ӱгредерге чахаан (Матф. 28:20). Андағ ӱгредіг иң чахсы иртсін тіп, Библия ӱгренчеткен кізее хайди тудынарға кӧні чоохтабасха кӱстенерге кирек. Орта сағысха килер ӱчӱн, андағ кізіні Библиядағы принциптердеңер тирең сағынарға ӱгрет салза, чахсы полар. «Полғаныбыс ла Худайның алнында нандырығ тударбыс» нооза (Рим. 14:12). Аннаңар піске прайзыбысха Худайны сабландырчатхан пӧгіннер аларға кирек.

[Сноска]

Хайди нандырарҷыхсар?

• Ноға пӧгіннер аларға ӱгренерге кирек?

• Хорғыс піске хайди теепче паза хайди анзын тобырарға?

• Худайны сабландырар пӧгін алар ӱчӱн, хайдағ алты алтым идерге кирек?

[Ӱгредіг сурығлары]

[Рамка/хоос]

Чахсы пӧгіннер аларға полысчаң алты алтым

1 Посха ла ізенмеңер

2 Істезіг апарыңар

3 Пазырыста хыйға сағыс сурыныңар

4 Пӧгін алыңар

5 Алған пӧгін хоостыра тудыныңар

6 Кирек полза, алған пӧгіннеріңні алыстырыңар

[Хоос]

Ікінҷілепчеткен кізі хайнапчатхан салғахтарҷа аар-пеер тасталчатхан кимеге тӧӧй