قابىلداعان شەشىمدەرىڭ قۇدايعا ماداق اكەلسىن
قابىلداعان شەشىمدەرىڭ قۇدايعا ماداق اكەلسىن
«ەستى قادامىن بايقاپ باسار» (ناق. س. 14:15).
1، 2. ا) شەشىم قابىلداعاندا ەڭ الدىمەن نە جايىندا ويلاۋىمىز كەرەك؟ ٵ) ٴبىز قانداي سۇراقتاردى قاراستىرامىز؟
ٴبىز مۇنى كۇنىنە تالاي رەت ىستەيمىز. ولاردىڭ كوبىسى ومىرىمىزگە اسەر ەتە بەرمەيدى، ال كەيبىرى قاتتى اسەر ەتەدى. بۇل نە؟ قابىلداعان شەشىمدەرىمىز. مەيلى، ماڭىزدى نە ونشا ماڭىزدى ەمەس شەشىمدەر قابىلدايىق، ٴبىز ەڭ الدىمەن ولاردىڭ قۇدايعا ماداق اكەلگەنىن ويلايمىز (قورىنتتىقتارعا 1-حات 10:31 وقى).
2 سەن ٷشىن شەشىم قابىلداۋ وڭاي ما، قيىن با؟ ەگەر رۋحاني تولىسا تۇسكىمىز كەلسە، جامان مەن جاقسىنى ايىرا ٴبىلۋىمىز كەرەك. سونداي-اق شەشىمدەرىمىز وزگەنىڭ ەمەس، ٶز ۇستانىمدارىمىزعا نەگىزدەلۋى ٴتيىس (ريم. 12:1، 2؛ ەۆر. 5:14). دۇرىس شەشىم قابىلداۋدى ۇيرەنۋگە قانداي كەلەلى سەبەپتەر بار؟ نەگە كەيدە شەشىم قابىلداۋ قيىن بولادى؟ قابىلداعان شەشىمدەرىمىز قۇدايعا ماداق اكەلەتىنىنە سەنىمدى بولۋ ٷشىن نە ىستەۋگە بولادى؟
شەشىم قابىلداۋدىڭ نە قاجەتى بار؟
3. شەشىم قابىلداعاندا نەنىڭ كەدەرگى بولۋىنا جول بەرمەۋىمىز كەرەك؟
3 كيەلى كىتاپتىڭ تالاپتارىن ۇستانۋعا كەلگەندە ەكىويلى بولساق، سىنىپتاستارىمىز نە ارىپتەستەرىمىز ٴبىز تۋرالى نانىمدارىنا نىق سەنبەيتىن، وڭاي ىقپال ەتۋگە بولاتىن ادام دەگەن ويعا كەلۋى مۇمكىن. ولار وتىرىك ايتىپ، الداپ نە ۇرلىق جاساپ الىپ، سوسىن، وزدەرىنە قوسىلۋعا نە ىستەرىن بۇركەمەلەۋگە يتەرمەلەۋ ارقىلى ٴبىزدى «كوپشىلىككە ەرۋگە» تالپىندىرۋى مۇمكىن (مىس.ش. 23:2). الايدا قۇدايعا ماداق اكەلەتىندەي شەشىم قابىلداي الاتىن ادام قورىققاندىقتان نە وزگەلەرگە ۇناعىسى كەلگەندىكتەن كيەلى كىتاپقا سايكەس ماشىقتالعان ار-ۇجدانىنا قارسى ارەكەت ەتپەيدى (ريم. 13:5).
4. نەگە باسقالار ٴبىز ٷشىن شەشىم قابىلداعىسى كەلۋى مۇمكىن؟
4 كەيدە ٴبىز ٷشىن وزگەلەر شەشىم قابىلداعىسى كەلەدى، ٴبىراق ولاردىڭ ٴبارى بىردەي بىزگە جاماندىق ويلامايدى. دوستارىمىز كومەكتەسكىسى كەلىپ، كەڭەستەرىنە قۇلاق اسقانىمىزدى قالايتىن شىعار. ٷي ىشىندەگىلەرىمىز ٴبىزدى ۋايىمدايدى. سوندىقتان ولاردان بولەك تۇراتىن بولساق تا، بىزگە ماڭىزدى شەشىمدەر قابىلداۋ كەرەك بولعاندا، مۇندايدا شەت قالماۋىمىز كەرەك دەپ ويلاۋى مۇمكىن. مىسالىعا، ەم قابىلداۋ ماسەلەسىن الايىق. كيەلى كىتاپتا قانعا قاتىستى ناقتى نۇسقاۋ بەرىلگەن (ەل. ٸس. 15:28، 29). ٴبىراق باسقا جاعدايلاردا ماسەلە انىق بولماي، بەلگىلى ٴبىر ەم-دومعا كەلىسۋ-كەلىسپەۋگە قاتىستى جەكە شەشىم قابىلداۋ تالاپ ەتىلەتىن كەزدەر بولادى a. ال جاقىندارىمىزدىڭ بۇل ەمگە قاتىستى ٶز كوزقاراسى بار شىعار. الايدا مۇنداي جاعدايدا قۇدايعا باعىشتالىپ، شومىلدىرۋ راسىمىنەن وتكەن ٵربىر ٴماسىحشى ٶز جاۋاپكەرشىلىگىنىڭ «جۇگىن ٶزى كوتەرۋى» كەرەك (عال. 6:4، 5). ٴبىز ادامنىڭ الدىندا جاقساتتى بولۋدى ەمەس، ەڭ الدىمەن، قۇدايدىڭ الدىندا ار-ۇجدانىمىزدىڭ تازا بولعانىن قالايمىز (ٴتىم. 1-ح. 1:5).
5. قالاي ٴبىز سەنىمنەن ايىرىلىپ قالۋدان اۋلاق بولا الامىز؟
5 ەكىويلى بولۋ وتە قاۋىپتى. شاكىرت جاقىپ ەكىويلى ادامنىڭ «بارلىق ىسىندە تۇراقسىز» ەكەنىن ايتقان (جاق. 1:8). ول ەسكەكسىز قايىقپەن داۋىلدى تەڭىزگە شىققان ادام سياقتى، وزگەلەردىڭ تۇراقسىز ويلارىنا ەرەدى. مۇنداي ادامنىڭ «اپاتقا ۇشىراپ»، سەنىمنەن ايىرىلىپ قالۋى وپ-وڭاي، سوسىن، ول باسىنا تۇسكەن باقىتسىزدىعى ٷشىن وزگەنى كىنالاۋى مۇمكىن (ٴتىم. 1-ح. 1:19). بۇدان قالاي اۋلاق بولا الامىز؟ ٴبىز «سەنىمىمىزدى بەرىك ساقتاۋىمىز» كەرەك (قولوستىقتارعا 2:6، 7 وقى). ال بۇل ٷشىن قۇداي سوزىنە دەگەن سەنىمىمىزدى كورسەتەتىن شەشىمدەر قابىلداۋدى ۇيرەنۋىمىز قاجەت (ٴتىم. 2-ح. 3:14—17). بۇعان نە كەدەرگى جاساۋى مۇمكىن؟
شەشىم قابىلداۋ نەگە قيىن؟
6. قورقىنىش بىزگە قالاي اسەر ەتۋى مۇمكىن؟
6 قورقىنىش ادامدى بۇعاۋلاپ تاستايدى. شەشىم قابىلداعاندا دا ادام قاتەلىك جاساپ قويۋدان، ونى جۇزەگە اسىرا الماي قالۋدان نە وزگەلەردىڭ الدىندا اقىماق بولىپ كورىنۋدەن قورقۋى مۇمكىن. بۇل تۇسىنىكتى دە: كىم بۇرىس شەشىم قابىلداعانىنىڭ كەسىرىنەن زارداپ شەككىسى نە ۇياتقا قالعىسى كەلەدى دەيسىڭ. الايدا قۇدايعا جانە ونىڭ سوزىنە دەگەن سۇيىسپەنشىلىك قورقىنىشقا بوي الدىرماۋىمىزعا كومەكتەسەدى. قالايشا؟ سۇيىسپەنشىلىك ٴبىزدى ماڭىزدى شەشىم قابىلداماس بۇرىن قۇداي سوزىنە جانە سوعان نەگىزدەلگەن ادەبيەتتەرگە جۇگىنۋگە تالپىندىرادى. وسىنىڭ ارقاسىندا كوپتەگەن قاتەلىكتەردەن اۋلاق بولامىز. نەلىكتەن بۇلاي دەيمىز؟ ويتكەنى كيەلى كىتاپ «اقىلى تولماعانعا اقىل بەرىپ، جاستارعا ٴبىلىم، سانالىلىق سيلاي» الادى (ناق. س. 1:4).
7. ٴداۋىت پاتشانىڭ مىسالىنان نە نارسەگە ۇيرەنەمىز؟
7 ٴبىز ارقاشان دۇرىس شەشىم قابىلداي الامىز با؟ جوق. ويتكەنى قاتەلىك جاسامايتىن ادام بولمايدى (ريم. 3:23). مىسالى، ٴداۋىت پاتشا دانا دا ادال ادام بولعان. دەسە دە كەيدە ول وزىنە دە، وزگەلەرگە دە كەسىرىن تيگىزگەن بۇرىس شەشىمدەر قابىلداعان (پات. 2-ج. 12:9—12). سوعان قاراماستان ول قۇدايدىڭ ىقىلاسىنا يە بولاتىنداي دۇرىس شەشىمدەردى مۇلدەم قابىلداي المايمىن دەپ ويلاماعان (پات. 3-ج. 15:4، 5). ەحوبانىڭ كەمشىلىكتەرىمىزگە تۇسىنىكپەن قاراپ، كۇنالارىمىزدى كەشىرەتىنىن ەستە ۇستايتىن بولساق، ٴبىز دە ٴداۋىت سياقتى، قاتەلىكتەرىمىزگە قاراماي، شەشىم قابىلداۋدان قاشپايمىز. ويتكەنى ەحوبا ٶزىن جاقسى كورەتىن جانە مويىنسۇناتىن ادامدى ارقاشان قولدايدى (زاب. 51:1—4، 7—10).
8. ەلشى پاۋىلدىڭ نەكەگە قاتىستى ايتقاندارىنان نە نارسەگە ۇيرەنۋگە بولادى؟
8 شەشىم قابىلداۋدىڭ جۇگىن قالاي جەڭىلدەتۋگە بولادى؟ كەيدە بىرنەشە دۇرىس شەشىمنىڭ بولۋى مۇمكىن ەكەنىن تۇسىنگەنىمىز جاقسى. ەلشى پاۋىلدىڭ نەكەگە قاتىستى قالاي وي جۇگىرتكەنىن قاراستىرايىق. كيەلى رۋحتىڭ جەتەلەۋىمەن ول بىلاي دەپ جازدى: «ال ەگەر پاك قىز نە جىگىت قۇشتارلىق سەزىمىن جۇگەندەي المايتىنداي سەزىنسە، ٵرى البىرت شاقتان وتكەن بولسا، ٶز قالاۋىنا ساي نەكەلەسسىن. بۇل — كۇنا ەمەس. وندايلار نەكەگە تۇرسىن. ال كىمدە-كىم نەكەگە تۇرۋدى قاجەت دەپ تاپپاعاندىقتان جانە ٶز-وزىنە يە بولا الاتىندىقتان، سالتباستى بولىپ قالۋدى شەشسە ٵرى جۇرەگىندەگى وسى شەشىمىنە بەرىك بولسا، دۇرىس ىستەيدى» (قور. 1-ح. 7:36—38). پاۋىل سالتباستى بولۋعا كەڭەس بەرگەن، ٴبىراق بۇدان باسقا دا دۇرىس شەشىم قابىلداۋعا بولاتىن.
9. قابىلداعان شەشىمدەرىمىزگە وزگەلەر قالاي قارايتىنىن ەسكەرۋىمىز كەرەك پە؟ ٴتۇسىندىر.
9 قابىلداعان شەشىمدەرىمىزگە وزگەلەر قالاي قارايتىنىن ەسكەرۋىمىز كەرەك پە؟ قانداي دا ٴبىر شامادا ەسكەرۋىمىز كەرەك. پۇتتارعا قۇربان ەتىلگەندەي بولىپ كورىنەتىن تاعامعا قاتىستى پاۋىلدىڭ نە ايتقانىنا كوڭىل ٴبولشى. ول شەشىمنىڭ ٶزى قاتە بولماسا دا، ار-ۇجدانى ٵلسىز ادامعا كەرى اسەر ەتۋى مۇمكىن ەكەنىن بىلگەن. پاۋىل قانداي توقتامعا كەلدى ەكەن؟ ول بىلاي دەپ جازدى: «جەيتىن تاماعىم باۋىرلاسىمدى سۇرىندىرسە، ونى سۇرىندىرمەۋ ٷشىن بۇدان بىلاي ەشقاشان ەت جەمەيمىن» (قور. 1-ح. 8:4—13). ٴبىز دە قابىلداعان شەشىمدەرىمىزدىڭ وزگەلەرگە قالاي اسەر ەتەتىنىن ەسكەرۋىمىز كەرەك. سويتسە دە، ەڭ الدىمەن، ٴبىزدى شەشىمدەرىمىزدىڭ ەحوبامەن قارىم-قاتىناسىمىزعا قالاي اسەر ەتەتىنى قىزىقتىرادى (ريمدىكتەرگە 14:1—4 وقى). قۇدايعا ماداق اكەلەتىن شەشىمدەر قابىلداۋعا كيەلى كىتاپتاعى قانداي پرينسيپتەر كومەكتەسەدى؟
دۇرىس شەشىم قابىلداۋعا كومەكتەسەتىن التى قادام
10، 11. ا) وتباسى مۇشەلەرى وزدەرىنە تىم سەنىمدى بولۋدان قالاي اۋلاق بولا الادى؟ ٵ) قاۋىمعا قاتىستى شەشىمدەر قابىلداعاندا، اقساقالدار نەنى ەستە ۇستاۋلارى كەرەك؟
10 وزىڭە تىم سەنىمدى بولۋدان اۋلاق بول. قانداي دا ٴبىر ارەكەتتى جاساماس بۇرىن وزىمىزدەن: «وسىلاي ەتۋگە قاقىم بار ما؟»— دەپ سۇراعانىمىز دۇرىس. سۇلەيمەن پاتشا: «مەنمەندىككە ماسقارا سەرىك، كىشىپەيىلگە دانالىق سەرىك»،— دەپ جازعان (ناق. س. 11:2).
11 اتا-انالارى قانداي دا ٴبىر ماسەلەلەرگە قاتىستى بالالارىنىڭ شەشىم قابىلداۋىنا رۇقسات ەتۋى مۇمكىن. ٴبىراق بالالارى بار بيلىك قولدارىنا بەرىلدى دەپ ويلاماۋلارى كەرەك (قول. 3:20). وتباسىندا ايەلدەردىڭ دە بەلگىلى شامادا بيلىگى بار، ايتسە دە ولار ٷي ٸشىنىڭ باسشىسى وتاعاسى ەكەنىن ۇمىتپايدى (ناق. س. 1:8؛ 31:10—18؛ ەفەس. 5:23). وتاعالارى دا بيلىكتەرىنىڭ شەكسىز ەمەس، قايتا، ماسىحكە باعىنىشتى ەكەندەرىن تۇسىنەدى (قور. 1-ح. 11:3). اقساقالدار قاۋىمعا قاتىستى شەشىمدەر قابىلدايدى. الايدا ولار قۇداي سوزىندە «جازىلعانداردى عانا ۇستانىپ»، ودان ارتىققا بارمايدى (قور. 1-ح. 4:6). سونداي-اق ادال قۇلدىڭ نۇسقاۋلارىن بەرىك ۇستانادى (مات. 24:45—47). ەگەر كىشىپەيىلدىلىك تانىتىپ، قاقىمىز بار جايتتارعا عانا قاتىستى شەشىم قابىلدايتىن بولساق، ٶزىمىزدى دە، وزگەنى دە كوپتەگەن ۋايىم مەن قايعىدان ساقتايمىز.
12. ا) نەگە ٴبىز ىزدەنىس جۇرگىزۋىمىز كەرەك؟ ٵ) مۇنى قالاي ىستەۋگە بولاتىنىن ٴتۇسىندىر.
12 ىزدەن. سۇلەيمەن: «ۇقىپتىنىڭ وي-نيەتى داۋلەتكە باستار، تىم اسىققان تاپشىلىققا ۇشىرار»،— دەگەن (ناق. س. 21:5). ساعان ىسكەرلىك ۇسىنىس جاسالدى دەلىك. بىرىنشىدەن، سەزىمىڭنىڭ جەتەگىنە ەرمە. جاسالعان ۇسىنىسقا قاتىستى مۇمكىندىگىنشە كوپ مالىمەت جينا، وسىنداي ىستەردەن حابارى بار اداممەن اقىلداس جانە كيەلى كىتاپتاعى پرينسيپتەردى زەرتتە (ناق. س. 20:18). ىزدەنىسىڭنىڭ ناتيجەسىن قورىتىندىلاۋ ٷشىن ۇسىنىستىڭ پايدالى جاقتارى مەن كەرى اسەر ەتەتىن جاقتارىنىڭ ٴتىزىمىن جاسا. شەشىم قابىلداماس بۇرىن «شىعىنىڭدى ەسەپتە» (لۇقا 14:28). قابىلداعان شەشىمىڭنىڭ تابىسىڭا عانا ەمەس، قۇدايمەن قارىم-قاتىناسىڭا اسەر ەتۋى مۇمكىن ەكەنىن دە نازاردان تىس قالدىرما. ىزدەنىس جۇرگىزۋ ۋاقىت پەن كۇشتى تالاپ ەتەدى. ٴبىراق وسىنىڭ ارقاسىندا كەيىننەن بارماق تىستەپ قالاتىنداي شەشىم قابىلداۋدان اۋلاق بولاسىڭ.
13. ا) جاقىپ 1:5 تەگى سوزدەر ٴبىزدى نە نارسەگە سەندىرەدى؟ ٵ) دانالىق سۇراپ دۇعا ەتكەنىمىز بىزگە قالاي كومەكتەسەدى؟
13 دانالىق سۇراپ دۇعا ەت. قۇدايدىڭ كومەگىنە جۇگىنسەك قانا، شەشىمدەرىمىز وعان ماداق اكەلەدى. شاكىرت جاقىپ بىلاي دەگەن: «قايسىبىرەۋىڭە دانالىق جەتپەي جاتسا، جومارتتىقپەن ٵرى ەش جازعىرماي-اق بەرە سالاتىن قۇدايدان سۇراي بەرسىن، سوندا وعان بەرىلەدى» (جاق. 1:5). شەشىم قابىلداۋ ٷشىن قۇدايدىڭ دانالىعىنا مۇقتاج ەكەنىمىزدى مويىنداۋدا تۇرعان ەش وعاشتىق جوق (ناق. س. 3:5، 6). ٶز اقىل-سانامىزعا عانا سۇيەنسەك، شالىس قادام جاساپ قويۋىمىز وپ-وڭاي. ال دانالىق سۇراپ دۇعا ەتسەك جانە قۇداي سوزىندەگى پرينسيپتەردى زەرتتەسەك، ٶزىمىزدى قانداي دا ٴبىر ارەكەتكە تالپىندىرىپ وتىرعان شىنايى نيەتىمىزدى تۇسىنۋگە كيەلى رۋحتىڭ كومەكتەسۋىنە جول بەرەمىز (ەۆر. 4:12؛ جاقىپ 1:22—25 وقى).
14. نەگە ۋاقىتتى سوزا بەرۋدەن اۋلاق بولۋىمىز كەرەك؟
14 ٴبىر توقتامعا كەل. بۇل قادامدى جاساۋعا اسىقپا. الدىمەن ىزدەن، دانالىق سۇراپ دۇعا ەت. اقىلدى ادام «قادامىن بايقاپ باسۋ» ٷشىن ۋاقىتىن ايامايدى (ناق. س. 14:15). الايدا ۋاقىتتى تىم سوزباعان دا دۇرىس. ۋاقىتتى سوزا بەرەتىن ادام سىنىققا سىلتاۋ ىزدەپ، شەشىم قابىلداۋدى كەيىنگە ىسىرا بەرەدى (ناق. س. 22:13). ٴبىراق ول ٴبارىبىر شەشىم قابىلداعان بولىپ ەسەپتەلەدى، ويتكەنى، بىلايشا ايتقاندا، ٶز ٶمىرىن بىرەۋدىڭ قولىنا تاپسىرۋدى شەشەدى.
15، 16. قابىلداعان شەشىمىمىزگە ساي ارەكەت ەتۋ ٷشىن نە ىستەۋ كەرەك؟
15 قابىلداعان شەشىمىڭە ساي ارەكەت ەت. قابىلداعان شەشىمىمىزگە ساي ارەكەت ەتىپ، ونى جۇزەگە اسىرۋعا تىرىسپاساق، ەڭبەگىمىز زايا كەتەدى. سۇلەيمەن «قولىمىزدان كەلەتىن ىستەردى اتقارۋ» ٷشىن بارىنشا كۇش سالۋىمىز كەرەكتىگىن ايتقان (ەكك. 9:10). شەشىمىمىزگە ساي ارەكەت ەتۋ ٷشىن وزگەرىستەر جاساۋعا دايىن بولۋىمىز كەرەك. مىسالى، ٴبىر جاريالاۋشى ٸزاشار بولۋدى شەشۋى مۇمكىن. ول شەشىمىن جۇزەگە اسىرا الا ما؟ وسى دۇنيەلىك جۇمىس پەن كوڭىل سەرگىتۋگە تىم كوپ كوڭىل ٴبولىپ، ۋاقىتىن ۇرلاۋىنا جول بەرمەسە، جۇزەگە اسىرا الۋى ابدەن مۇمكىن.
16 قابىلداعان دۇرىس شەشىمدەرىمىزدى جۇزەگە اسىرۋ وڭاي بولا بەرمەيدى. نەگە؟ سەبەبى «بۇكىل دۇنيە شايتاننىڭ بيلىگىندە» (جوح. 1-ح. 5:19). ٴبىز «وسى دۇنيەنى بيلەپ-توستەپ وتىرعان اكىمدەرگە قارسى، ياعني كوكتەگى زۇلىم رۋحتارعا قارسى كۇرەسۋىمىز» كەرەك (ەفەس. 6:12). ەلشى پاۋىل مەن شاكىرت ياھۋدا قۇدايعا ماداق اكەلۋدى قالايتىندارعا ايانباي كۇرەسۋگە تۋرا كەلەتىنىنە نۇسقاعان (ٴتىم. 1-ح. 6:12؛ ياھد. 3).
17. قابىلداعان شەشىمدەرىمىزگە قاتىستى ەحوبا بىزدەن نە كۇتەدى؟
17 شەشىمدەرىڭدى قايتا قاراستىرىپ، قاجەت بولسا، وزگەرىستەر جاسا. بارلىق نارسە تۋرا ٶزىمىز جوسپارلاعانداي بولا بەرمەيدى. ٴبارىمىز دە «ۋاقىت پەن جاعدايدىڭ ورايلاس كەلۋىنە» تاۋەلدىمىز (ەكك. 9:11). سويتسە دە ەحوبا بىزدەن، قيىندىقتارعا كەزىگۋىمىز مۇمكىن ەكەنىنە قاراماي، كەيبىر شەشىمدەرىمىزگە بەرىك بولادى دەپ كۇتەدى. مىسالى، ادام ٶمىرىن ەحوباعا باعىشتاسا نە نەكە انتىن بەرسە، ونىڭ بۇل شەشىمى وزگەرمەيدى. سوندىقتان ەحوبا بىزدەن وسىنداي شەشىمدەرىنەن اينىمايدى دەپ كۇتەدى (زابۋر 14:1، 2، 4 وقى). ايتكەنمەن قابىلداعان شەشىمدەرىمىزدىڭ ٴبارى بىردەي مۇنداي جاۋاپكەرشىلىك جۇكتەمەيدى. ەستى ادام اراگىدىك شەشىمدەرىن قايتا قاراستىرىپ وتىرادى. ول كوكىرەكتىك نە قىڭىرلىقتىڭ قانداي دا ٴبىر وزگەرىستەر جاساۋىنا نەمەسە شەشىمىنەن مۇلدەم باس تارتۋىنا كەدەرگى بولۋىنا جول بەرمەيدى (ناق. س. 16:18). ول، ەڭ الدىمەن، ٶمىر سالتىنىڭ ارقاشان قۇدايعا ماداق اكەلگەنىن ويلايدى.
وزگەلەردى قۇدايعا ماداق اكەلەتىن شەشىمدەر قابىلداۋعا ۇيرەت
18. اتا-انالاردىڭ بالالارىن جاقسى شەشىم قابىلداۋعا قالاي ۇيرەتۋىنە بولادى؟
18 اتا-انالار بالالارىنا قۇدايعا ماداق اكەلەتىندەي شەشىم قابىلداۋدى ۇيرەتۋ ٷشىن كوپ نارسە ىستەي الادى. جاقسى ۇلگى كورسەتۋ — ەڭ جاقسى ٴتالىم (لۇقا 6:40). ورىندى بولعان جەردە، اتا-انالار كەزىندە بەلگىلى ٴبىر جايتقا قاتىستى وزدەرىنىڭ قالاي شەشىم قابىلداعاندارىن ايتىپ بەرۋىنە بولادى. بالكىم، كەيبىر جايتتارعا قاتىستى بالالارىنىڭ وزدەرىنە شەشىم قابىلداۋعا مۇمكىندىك بەرىپ، جاقسى شەشىم قابىلداسا، ولاردى ماقتاۋلارىنا بولاتىن شىعار. ال بالا بۇرىس شەشىم قابىلداسا شە؟ اتا-اناسى ٵ دەگەننەن ونى جاماندىقتان قورعاعىسى كەلەر، ٴبىراق بۇلاي ەتۋ ارقاشان بالا ٷشىن پايدالى بولا بەرمەيدى. مىسالى، اتا-اناسى بالاسىنا كولىك جۇرگىزۋشىسىنىڭ كۋالىگىن الۋىنا رۇقسات ەتتى دەلىك. ال ول جول ەرەجەسىن بۇزىپ، ايىپپۇل تولەۋى كەرەك بولدى. اتا-اناسىنىڭ ونى تولەي سالۋىنا دا بولادى. الايدا ايىپپۇلدى تولەۋ ٷشىن بالانىڭ وزىنە جۇمىس ىستەۋ قاجەت بولسا، ول قولىمەن ىستەگەندى موينىمەن كوتەرۋدى ۇيرەنسە كەرەك (ريم. 13:4).
19. كيەلى كىتاپتى زەرتتەپ جۇرگەن ادامعا نەنى ۇيرەتۋىمىز كەرەك جانە مۇنى قالاي ىستەۋگە بولادى؟
19 يسا شاكىرتتەرىنە وزگەلەرگە ٴتالىم بەرۋدى تاپسىرعان (مات. 28:20). كيەلى كىتاپتى زەرتتەپ جۇرگەن ادامعا ۇيرەتۋ كەرەك ماڭىزدى جايتتاردىڭ ٴبىرى — دۇرىس شەشىم قابىلداي ٴبىلۋ. بۇل ىستە جەمىستى بولۋ ٷشىن، زەرتتەۋشىنىڭ قالاي ارەكەت ەتۋى كەرەكتىگىن ايتىپ بەرۋدەن اۋلاق بولعان دۇرىس. مۇنىڭ ورنىنا كيەلى كىتاپتاعى پرينسيپتەر تۋرالى وي جۇگىرتۋدى ۇيرەتكەنىمىز الدەقايدا جاقسى ەمەس پە؟ سەبەبى «ٴارقايسىمىز قۇداي الدىندا ٶز ٸس-ارەكەتىمىز ٷشىن ەسەپ بەرەمىز» عوي (ريم. 14:12). سوندىقتان قۇدايعا ماداق اكەلەتىندەي شەشىمدەر قابىلداۋعا بارىمىزدە دە كەلەلى سەبەپ بار.
[سىلتەمە]
a بۇل تاقىرىپ 2006-جىلدىڭ قاراشا ايىنداعى «ٴبىزدىڭ پاتشالىق قىزمەتىمىزدىڭ» 3—6 بەتتەرىندەگى «مەن قان فراكسيالارى مەن ٶز قانىم قولدانىلاتىن ەمشارالارعا قالاي قارايمىن؟» دەگەن قوسىمشادا تالقىلانادى.
قالاي جاۋاپ بەرەر ەدىڭدەر؟
• نەگە ٴبىز شەشىم قابىلداۋدى ۇيرەنۋىمىز كەرەك؟
• قورقىنىش بىزگە قالاي اسەر ەتەدى جانە ودان قالاي ارىلۋعا بولادى؟
• شەشىمدەرىمىز قۇدايعا ماداق اكەلەتىندەي بولۋ ٷشىن قانداي التى قادامدى جاساۋعا بولادى؟
[زەرتتەۋگە ارنالعان سۇراقتار]
[16-بەتتەگى سۋرەت/قورشاۋ]
دۇرىس شەشىم قابىلداۋعا كومەكتەسەتىن قادامدار
1 وزىڭە تىم سەنىمدى بولۋدان اۋلاق بول
2 ىزدەن
3 دانالىق سۇراپ دۇعا ەت
4 ٴبىر توقتامعا كەل
5 قابىلداعان شەشىمىڭە ساي ارەكەت ەت
6 قايتا قاراستىر جانە وزگەرىستەر جاسا
[15-بەتتەگى سۋرەت]
ەكىويلى بولۋ ەسكەكسىز قايىقپەن داۋىلدى تەڭىزگە شىعۋمەن تەڭ