Guutimut ataqqinaataasumik aalajangiisarit

“Silatuup alloriarnini sianigeqqissaartarpai.” — USSATIT 14:15.

1, 2. (a) Aalajangikkatsinnut tamanut tunngatillugu suna pingaarnerpaatittariaqarparput? (b) Apeqqutit suut maanna sammissavavut?

ULLUT tamaasa aalajangigassarpassuaqartarpugut. Aalajangikkatta ilarpassuisa kinguneri soqutaarpianngitsuusarput. Ilaalli inuunitta sinneranut sunniuteqangaarsinnaasarput. Uagutsinnulli pingaarnerpaavoq aalajangikkatsinnut tamanut tunngatillugu — aalajangikkavut soqutaarpianngippata pingaaruteqartupilussuugaluarpataluunniit — Guutimut ataqqinaataanissarput. — Atuaruk 1 Korinthimiut 10:31.

² Illit aalajangiinissaq ajornanngitsutut isigisarpiuk, imaluunniit sapernartittarpiuk? Kristumiutut inersimallualerumagutta eqqortumik eqqunngitsumillu immikkoortitsisinnaaneq namminerlu paasisimasanut naapertuuttumik, allat isumaat tunngaviginagit, aalajangiinissaq ilinniartariaqarparput. (Romamiut 12:1, 2; Hebræerit 5:14) Silatusaartumik aalajangiinissap ilinniarnissaanut sunik allanik pingaarutilinnik pissutissaqarpugut? Sooq aalajangiinissaq ilaannikkut taama sapernartigisarpa? Aamma aalajangikkatta Guutimut ataqqinaataanissaat qulakkeerniarlugu suut iliuuserisinnaavavut?

Sooruna aalajangiisassasugut?

3. Aalajangiissagaangatta suut akornutaatissanngilavut?

³ Najoqqutassianik Biibilimeersunik maleruaanissarput nangaassutigisarutsigu atuaqativut imaluunniit suleqativut isumaqalersinnaapput upperisatta ilumoornera upperivinngikkipput taamaammallu sunneruminartugut. Imaassinnaavoq sallusarlutilluunniit peqquserluttarlutilluunniit tillittartut uagullu ‘amerlanerusut iliornerannut maleruutiinnartinniarsaraluta’ immisut iliortinniarsarigaatigut imaluunniit iliuuserisaminnik  isertuitinniarsarigaatigut. (2 Mosesi 23:2) Guutimulli ataqqinaataasumik qanoq aalajangiisoqartarneranik ilisimannittup qununini allanilluunniit akuerineqarusunnini nalunngeqatiginnissutiminut Biibili tunngavigalugu ilinniartinneqarsimasumut akerliusumik iliuuseqassutiginavianngilaa. — Romamiut 13:5.

4. Sooq allat uagutsinnik aalajangiissusserusuttarpat?

⁴ Allat uagutsinnik aalajangiissusserusukkaangamik ajortumik isumaqarneq ajorunarput. Ikinngutit uagutsinnik ikiuerusuttut siunnersuutiminnik malinneqqulluta kimigiiserfigisinnaavaatigut. Angajoqqaanni najugaqarunnaarsimaguit ilimanarpoq ilaquttavit illit ingerlalluarnissannik suli soqutiginninnissaat misigisimanissaallu illit aalajangigassannut pingaarutilinnut tunngatillugu suli aalajangeeqataasariaqarlutik. Nakorsartinnermut tunngasut assersuutigeriartigit. Aammik atornerluineq Biibilimi erseqqissumik assuarineqarpoq. (Apustilit Suliaat 15:28, 29) Peqqissutsitsinnulli tunngasunik aalajangigassaqartarpoq erseqqissumik malittarisassiartaqanngitsunik, aalajangersimasumillu nakorsartinnissamut akuersissanerluta akuersissannginnerlutaluunniit tamatta immikkut aalajangertariaqartakkatsinnik. * Qanigisavut immaqa tamakkununnga tunngatillugu aalajangersimalluinnartunik isumaqarput. Aalajangigassanulli tamakkununnga tunngatillugu kristumiup tunniulluinnarsimallunilu kuisimasup kialuunniit “nammagassani nammineq nammassavaa”. (Galatiamiut 6:4, 5) Uagut pingaarnerpaatipparput Guutimut ilerasuutissaqarnaveersaarnissarput, inunnit akuerineqarnissarput pinnagu. — 1 Timotheusi 1:5.

5. Qanoq ililluta uppernikkut umiiarnaveersaarsinnaavugut?

⁵ Aalajangersinnaasanngikkutta assut navianartorsiortarsinnaavugut. Ajoqersugaq Jaaku allappoq inuk ‘isummamigut saqittuartoq’, imaluunniit aalajangersinnaanngitsoq, ‘inuuserisamigut allanngorartuartuusoq’. (Jaaku 1:8) Taanna silarsuarmi isummanit allanngorartunit eqqakattaarineqarporlusooq — umiatsiatut aquuteqanngitsutut anorersuartumi malissiortutut. Inuk taama ittoq uppernerminut tunngatillugu umiiarsinnaavoq taavalu alianartunik atugaqarnerminut allanik pisuutitsisinnaalluni. (1 Timotheusi 1:19) Uagut qanoq ililluta taamaalinaveersaarsinnaavugut? ‘Uppernermi aalajaattariaqarpugut.’ (Atuakkit Kolossemiut 2:6, 7). Uppernikkut aalajaalliumalluta Guutip oqaasianik isumassarsiarititaasumik upperinninnitsinnik ersersitsisunik aalajangiisarnissaq ilikkartariaqarparput. (2 Timotheusi 3:14-17) Silatusaartumilli aalajangiiniarnitsinni suna akornutaasinnaava?

Sooq aalajangernissaq sapernarsinnaasartoq

6. Annilaanganeq uagutsinnut qanoq sunniuteqarsinnaava?

⁶ Annilaanganeq iliuuseqarsinnaajunnaassutigisinnaavarput — kukkusumik aalajangiissasoraluta, iluatsinngitsuussasoraluta sianiippasissasoralutaluunniit. Taamatut eqqarsartoqarpat paasinassaaq. Kinaluunniit ajornartorsiuteqalissutigisaminik kanngusuutigilersinnaasaminilluunniit sianiilliorluni aalajangeerusunngilaq. Guutimilli asanninneq oqaasianillu nuannarinninneq annilaangannginnerulissutigisinnaavarput. Qanoq? Guutimik asanninnerput kajumississutigalugu pingaarutilinnik aalajangiinnginnitsinni taassuma oqaasianik Biibililersaarutinillu misissueqqaartuaannassaagut. Taava kukkussutivut ikinnerussapput. Biibilimi ‘misilittagakitsumik paasisimasaqalersitsisarpoq angummillu inuusuttumik ilisimasaqalersitsisarluni isumatussuseqalersitsisarlunilu.’ — Ussatit 1:4.

7. Kunngip Daavip maligassiaa sumik ilinniarfigisinnaavarput?

⁷ Aalajangiigaangatta tamatigut eqqortumik aalajangiisarpugut? Naamik, tamatta kukkusarpugut. (Romamiut 3:23) Assersuutigalugu kunngi Daavi silatullunilu aalajaatsuuvoq. Taamaakkaluartorli ilaannikkut kukkusunik aalajangiisarpoq imminut allanullu naalliuutaangaartunik. (2 Samueli 12:9-12) Daavilli kukkussutini tamakku Guutimit iluarisaanartunik aalajangiisinnaajunnaassutiginngilai. (1 Kunngit 15:4, 5) Uagut kukkusimagaluarluta eqqortunik aalajangiisarsinnaavugut Daavip pisimaneratut eqqaamasarutsigu Jehovap kukkussutivut ajortuliavullu pillugit  isumakkeerfigiumaaraatigut. Taassuma imminik asannittut imminullu naalattut annertoqqusersortuassavai. — Tussiaat 51:3-6, 9-12.

8. Paulusip aappariinneq pillugu allagai sumik ilinniarfigaavut?

⁸ Aalajangiinissamut annilaangasarutta annilaangannginnerunissamut suna iluaqutigisinnaavarput? Ilaannikkut aalajangigassat eqqortut arlaliusinnaasarnerannik paasinninnerput iluaqutigissavarput. Maluginiaruk Paulusi aappariinnermut tunngasut eqqartoramigit qanoq tunngavilersuinersoq. Guutimit isumassarsisitaalluni ima allappoq: “Aappaqanngitsut uillarnerillu oqarfigiumavakka ajunnginnerussasoq uattut inuuseqartuaannarunik, kisianni pinaveersaarneq saperunik aappaninniarlit; aappaninnermi pileritsassimanermit iluarneruvoq.” (1 Korinthimiut 7:8, 9) Paulusi allappoq aappaqanngitsuuniarluni aalajangerneq pitsaanerpaasoq, eqqortutuaanngitsorli.

9. Aalajangikkavut allanit qanoq isumaqarfigineqarnersut isumakuluutigissavarput? Nassuiaruk.

⁹ Aalajangikkavut allanit qanoq isumaqarfigineqarnersut isumakuluutigissavarput? Ilaatigut. Maluginiakkit Paulusip nerisassanik guutipilunnut pilliutigineqarsimasinnaasunik nerinermut tunngatillugu allagai. Miserratiginngilaa aalajangigaq immini kukkusuunngikkaluartoq sanngiinnerusumik nalunngeqatiginnissutilimmut ajoqutaasinnaasoq. Paulusi nammineq qanoq aalajangersimava? Ima allappoq: “[Nerisassat] qatanngutiga tammartippassuk neqitussaarluinnarumaneruvunga qatanngutiga tammartikkumanagu.” (1 Korinthimiut 8:4-13) Uaguttaaq aalajangikkavut allat nalunngeqatiginnissutaannut qanoq sunniuteqassanersut eqqarsaatigisariaqarparput. Eqqarsaatiginerpaasarparpulli aalajangikkatta Jehovamut ikinngutaanitsinnut qanoq sunniuteqarnissaat. (Atuakkit Romamiut 14:1-4). Najoqqutassiat Biibilimiittut suut Guutimut ataqqinaataasumik aalajangiinissamut iluaqutigisinnaavavut?

Silatusaartumik aalajangiinissamut iluaqutissat arfinillit

10, 11. (a) Qanoq ililluta ilaqutariinni makitanaveersaarsinnaavugut? (b) Utoqqaanertat ilagiinnut sunniuteqartussanik aalajangiigaangamik suna eqqarsaatigisariaqarpaat?

¹⁰ Makitanaveersaarit. Sunissarput aalajangertinnagu imminut ima aperisariaqarpugut: ‘Uanga tamatuminnga aalajangiisussaatitaavunga?’ Kunngi Salomo allappoq: “Makitassutsip kanngunassuseq kingunerisarpaa, qanilaartulli ilisimassuseq pigaat.” — Ussatit 11:2.

¹¹ Angajoqqaat immaqa meeqqatik aalajangersimasunut tunngatillugu aalajangiisinnaatippaat, meeqqalli eqqaamasariaqarpaat ilaannikkuinnaq taamatut nammineq aalajangiisinnaatitaasarlutik. (Kolossemiut 3:20) Nuliaasut anaanaasullu ilaqutariinni oqartussaaffeqarput, silatusaassappulli uimik ilaqutariinni ittuunera akuerigunikku. (Ussatit 1:8; 31:10-18; Efesosimiut 5:23) Taamatuttaaq uiusut oqartussaassutsimik killeqarnerat Kristusimullu naalatsigitittariaqarnertik akuerisariaqarpaat. (1 Korinthimiut 11:3) Utoqqaanertattaaq oqartussaassuseqartitaapput. Ilagiinnut sunniuteqartartunik aalajangiisarput, Guutilli oqaasiani ‘allassimasut qimmullugit’ iliunnginnissartik qulakkeertariaqarpaat. (1 Korinthimiut 4:6, 1936) Aamma inussiamit aalajaatsumit siunnersuutigineqartunik malinneqqissaartarput. (Matthæusi 24:45-47) Imminut aliasuutissinnaveersaarlutalu isumakuluutissinnaveersaarsinnaavugut aamma allat aliasuutissinnaveersaarlugillu isumakuluutissinnaveersaarsinnaavavut  maniguulluta aatsaat aalajangiisinnaatitaagaangatta aalajangiisarutta.

12. (a) Sooq misissueqqaartassaagut? (b) Nassuiaruk qanoq misissuisoqarsinnaanersoq.

¹² Misissueqqaartarit. Salomo ima allappoq: “Eqiasuitsup pilersaarusiai iluanaarutissarsisitsisarput, tuaviorpallaartorli ajorsaateqalersarpoq.” (Ussatit 21:5) Assersuutigalugu niuernikkut isumaqatigiissuteqarnissat eqqarsaatigaajuk? Taamaappat misigissutsinnit aqutseqinak. Paasissutissanik atorluarsinnaasunik katersuigit, misilittagalinnut siunnersoqqugit, najoqqutassiallu Biibilimiittut suut tamatumunnga tunngassuteqarnersut misissoruk. (Ussatit 20:18) Paasissutissat pissarsiatit allattukkit iluaqutaasut ajoqutaasullu immikkoortillugit. Taava aalajanginnginninni ‘aningaasartuutissatit naatsorsorsinnaassavatit’. (Lukasi 14:28) Aalajangikkavit aningaasaqarninnut qanoq sunniuteqarsinnaanera kisiat eqqarsaatiginagu aammali anersaakkut peqqissutsinnut qanoq sunniuteqarnissaa eqqarsaatigiuk. Misissuineq piffissamik nukinnillu atuinartarpoq. Taamaalioruilli isumaalliorlutit aalajangissanngilatit pisariaqanngitsumik isumakuluuteqalersitsisumik.

13. (a) Jaaku 1:5-imi qanoq neriorsoqqissaarneqarpugut? (b) Guutimut ilisimassusermik qinusarneq qanoq iluaqutigisinnaavarput?

¹³ Guuti ilisimassusermik qinnuigisaruk. Aalajangigassaqaraangatta Guuti ikioqqulluta qinnuigisarutsigu aalajangikkavut taassumunnga ataqqinaataasassapput. Ajoqersugaq Jaaku ima allappoq: “[Ilisimassutsimigut] inorsartumik ilaqarussi taassuma qinnutigissavaa ilisimassuseq Guutimit avoqqaarlernani naammalluinnartunik tamanut tunisisartumit, taava piumaarpaa.” (Jaaku 1:5) Aalajangigassaqaraangatta Guutip ilisimassusianik pisariaqartitsinitsinnik nassuerutiginninnissaq kanngusuutissaanngilaq. (Ussatit 3:5, 6) Tassa nammineq paasisimasaqassuserput kisiat tutsuigigutsigu tammartinneqariaannaasinnaavugut. Guuti ilisimassusermik qinnuigisarlugulu Biibilimi najoqqutassianik misissuisarutta anersaap illernartup ikiorsinnaavaatigut aalajangersimasumik iliuuseqarusunnitsinnut sumik pissutiginiagaqarnitsinnik paasinninnissamut. — Hebræerit 4:12; atuakkit Jaaku 1:22-25.

14. Sooq aalajangerniaasaarnaveersaartassaagut?

¹⁴ Aalajangiisarit. Aalajangiiniapallannak aalajangiitinnak misissueqqaartarit ilisimassuserlu qinnutigalugu. “Silatuup alloriarnini sianigeqqissaartarpai.” (Ussatit 14:15) Aammali aalajangerniaasaaqinak. Aalajangerniaasaartartoq aalajangiinnginnissaminut eqqumiilluinnartunik utoqqatsissutissarsiorsinnaasarpoq. (Ussatit 22:13) Taamaalioraangamili allanit aqunneqarluni aalajangiisarpoq.

15, 16. Aalajangikkamik piviusunngortitsinissaq qanoq paasisariaqarpa?

¹⁵ Aalajangikkat piviusunngortiguk. Aalajangigarput aalajangiusimanngikkutsigu piviusunngortinngikkutsigulu silatusaartumik aalajangerniarluta ilungersornivut maangaannarsinnaapput. Salomo ima allappoq: “Assavit suliassarsiaat suliarissavatit piginnaanerit tamaat atorlugu.” (Oqaluussisartup oqaasii 9:10) Aalajangikkavut iluatsissappata piffissamik nukinnillu atuinissamut  piumassuseqartariaqarpugut. Assersuutigeriartigu oqaluussisartoq ilagiinniittoq pionerinngorniarluni aalajangertoq. Iluatsissava? Qularnanngilaq, ima sulitigalunilu aliikkusersortiginngikkuni kiffartornissaminut nukissaarullunilu piffissaarulluni.

¹⁶ Aalajangiussat pitsaanerpaat qaqutiguinnaq piviusunngortikkuminarnerpaajusarput. Sooq? ‘Silarsuaq tamarmi Ajortumut naalatsigitimmat.’ (1 Johannesi 5:19) “[Pissaanernut] taartumi matumani silarsuarmi naalagaasunut ajussutsillu anersaavinut pissaasunut qilaap ataaniittunut” akiuuttariaqarpugut. (Efesosimiut 6:12) Apustilip Paulusip ajoqersukkallu Judasip erseqqissaarpaat Guutimut ataqqinaataarusuttut ilungersorlutik akiuuttariaqartut. — 1 Timotheusi 6:12; Judasi 3.

17. Aalajangertakkavut eqqarsaatigalugit Jehovap suna piumasaraa?

¹⁷ Aalajangikkavit kinguneri nalilikkit pisariaqarpallu aaqqiissuteqarlutit. Siunissami qanoq pisoqarnissaa qulakkeerlugu ilisimasinnaannginnatsigu ilaannikkut aalajangikkavut ilimagisatsinnit allaanerusumik kinguneqartarput. (Jaaku 4:13, 14) Taamaakkaluartorli aalajangikkatta ilaannut tunngatillugu misilinneqaraluaruttaluunniit aalajangiusimannittarnissarput Jehovap piumasaraa. Jehovamut tunniulluinnarsimaneq katinnermilu neriorsoqatigiinneq aalajangernerupput allanngortinneqarsinnaanngitsut. Guutip piumasaraa aalajangikkanik tamakkuninnga eqqortitsisarnissarput. (Atuakkit Tussiaat 15:1, 2, 4). Aalajangigassalli amerlanerit pingaaruteqannginnerusarput. Inuup silappaarissup aalajangersimasani eqqarsaatigeqqittassavai. Makitanermik uteriinnermilluunniit aalajangikkaminik allannguinaveersaassanngilaq. (Ussatit 16:18) Taassumunngali pingaarnerpaasoq tassaavoq inooriaatsimi Guutimut ataqqinaataajuarnissaata qulakkeernissaa.

Allat Guutimut ataqqinaataasumik aalajangiisarnissaannik ilinniartikkit

18. Angajoqqaat meeqqatik Guutimut ataqqinaataasumik aalajangiisarnissaannik qanoq ilinniartissinnaavaat?

¹⁸ Angajoqqaat meeqqatik Guutimut ataqqinaataasumik aalajangiisarnissaannik ilinniartinniarlugit iliuuseqangaarsinnaapput. Oqartoqartarpoq maligassiuisoq ilinniartitsillaqqinnerpaasartoq. (Lukasi 6:40) Angajoqqaat meeqqatik oqaluttuussinnaavaat aalajangigassaq aalajangersimasoq aalajangerniarlugu qanoq iliorsimanerlutik. Aamma meeqqatik namminneq aalajangiitissinnaavaat kinguneqarluarsimagaangallu nersualaartarlugit. Taavami qitornaq pitsaavallaanngitsumik aalajangerpat? Angajoqqaat immaqa meerartik kingunipilunnut illersorniaqqaassavaat, tamannali meeqqamut pitsaanerpaajuaannarneq ajorpoq. Takorlooriartigu angajoqqaat ernertik imaluunniit panitsik kørekortitaarniarnerani tapersersoraat, taannalu angallannermut inatsimmik unioqqutitsisoq akiligassinneqarlunilu. Angajoqqaat akiligassaq akilersinnaagaluarpaat. Qitornaasulli akiligassaq nammineq aningaasarsiaminik akilerpagu taassuma iliuutsiminut akisussaanissaminik paasinninnissaa ilimanaateqarnerussaaq. — Romamiut 13:4.

19. Atuaqqissaaqatigisartakkavut sumik ilinniartissavavut, aamma qanoq taamaaliorsinnaavugut?

¹⁹ Jiisusip ajoqersukkani allanik ilinniartitseqquai. (Matthæusi 28:20) Biibilimik atuaqqissaaqatigisartakkatsinnut ilinniartitsissutigisinnaasatta pitsaanerpaat ilagaat taakkua silatusaartumik qanoq aalajangiisarsinnaanerat. Tamanna ilikkassappassuk qanoq iliornissaannik oqarfiginaveersaartariaqarpavut. Aap, najoqqutassiat Biibilimiittut tunngavigalugit namminneq aalajangiisarnissaannut ilinniartittariaqarpavut. Tassami, “tamatta immikkut Guutimut nassuertussaavugut.” (Romamiut 14:12) Taamaattumik Guutimut ataqqinaataasumik aalajangiisarnissamut pissutissaqarluarpugut.

[Quppernerup ataani ilanngussaq]

Qanoq akissavit?

• Qanoq aalajangiisarnissap ilinniarnissaa sooq pingaaruteqarpa?

• Annilaanganeq uagutsinnut qanoq sunniuteqarsinnaasarpa, qanorlu tamanna ajugaaffigisinnaavarput?

• Guutimut ataqqinaataasumik aalajangiiumalluta suut iliuuserisinnaavavut?

[Atuaqqissaarnermi apeqqutit]

[Qupp. 18-mi ungalusaq/​assiliartaq]

Silatusaartumik aalajangiinissamut iluaqutaasussat

1 Makitanaveersaarit

2 Misissueqqaartarit

3 Guuti ilisimassusermik qinnuigisaruk

4 Aalajangiisarit

5 Aalajangikkat piviusunngortiguk

6 Kinguneri nalilikkit aaqqiissuteqar- lutillu

[Qupp. 17-mi assiliartaq]

Aalajangersinnaanngitsoq umiatsiatut aquuteqanngitsutut anorersuartumi malissiortutut ippoq