Kõm̦m̦ani Pepe ko me Rej Kabuñbũruon Anij

“Armej ri jel̦ãl̦o̦kjen̦, ej kanooj lale an etetal.”—JK. 14:15.

1, 2. (a) Ta eo jej aikuj keememej aolep iien ñe jej kõm̦m̦ani pepe ko? (b) Ta kajjitõk ko jenaaj etali ilo katak in?

 AOLEP raan jej kõm̦m̦ani pepe ko. Elõñ iaan pepe ko ad rej jelõt kõj ilo jidik wõt iien. Bõtab, ewõr jet pepe ko raorõk me jej kõm̦m̦ani im el̦ap aer jelõt mour ko ad. Jej aikuj keememej bwe aolep iien jej kõm̦m̦ani pepe ko, jej aikuj kõm̦m̦ani ñan kabuñbũruon Jeova Anij meñe redik ak rel̦ap.—Riit 1 Korint 10:31.

² Ilo am kõm̦m̦ani pepe ko, men in ej juon men epidodo ke ak epen? Ro im rekõn̦aan bwe ren epaakel̦o̦k Jeova rej aikuj katak ñan jel̦ã oktak ko ikõtaan men ko rejim̦we im men ko rebõd. Innem rej aikuj kõm̦m̦ani pepe ko aer ekkar ñan men kein rar katak kaki, im jab kõtl̦o̦k bwe ro jet ren kõm̦m̦ani pepe ko ñan er. (Rom 12:1, 2; Hi. 5:14) Ta jet iaan un ko unin ad aikuj jel̦ã kõm̦m̦ani pepe ko rem̦m̦an? Etke jet iien ejjab pidodo ñan kõm̦m̦ani pepe ko rem̦m̦an? Im ta ko jej aikuj kõm̦m̦ani bwe jen maroñ kõm̦m̦ani pepe ko me rej kabuñbũruon Anij?

Etke Jej Aikuj Make Kõm̦m̦ani Pepe ko Ad?

3. Etke emaroñ pen ñan ad kõm̦m̦ani pepe ko rem̦m̦an?

³ El̦aññe jejaje ta eo jen pepe in kõm̦m̦ane meñe jejel̦ã ta eo Baibõl̦ ej ba, innem ri jikuul̦ im ri jerbal ro m̦õttad renaaj l̦õmn̦ak bwe jejjab lukkuun kaorõke tõmak eo ad. Im kõn ad mijak armej ro im kõn̦aan bwe ren m̦õttaik kõj, enaaj pidodo aer kapo kõj bwe jen riab, ko̦o̦t, ak n̦ooj jerbal ko aer renana. (Ex. 23:2) Bõtab, juon eo  im ejel̦ã kõm̦m̦ani pepe ko im rej kabuñbũruon Jeova eban l̦oor armej ro jet im kõm̦m̦ani m̦anit ko me rej n̦ae men ko ear katak kaki jãn Baibõl̦ eo.—Rom 13:5.

4. Etke ro jet rekõn̦aan kõm̦m̦ani pepe ko ñan kõj?

⁴ Jet armej rekõn̦aan kõm̦m̦ani pepe ko ñan kõj kõnke rekõn̦aan jipañ kõj. Ro m̦õttad remaroñ rõjañ kõj ñan l̦oori pepe ko aer kõnke rej l̦õmn̦ak bwe men in enaaj em̦m̦an ñan kõj. Meñe ejako ad jokwe ippãn baam̦le ko ad, ak jined im jemed renaaj baj kõn̦aan wõt jipañ kõj im renaaj kõn̦aan bõk kun̦aaer kõn pepe ko jej aikuj kõm̦m̦ani. Ñan waanjoñak, baj l̦õmn̦ak m̦õk kõn pepe eo an kajjojo armej kõn bõk bõtõktõk. Baibõl̦ eo ej lukkuun kaalikkar bwe jej aikuj kõjparok kõj jãn bõtõktõk. (Jrb. 15:28, 29) Bõtab, ejjel̦o̦k kien ilo Baibõl̦ eo ej kwal̦o̦k ta kein kõm̦adm̦õd ko jej aikuj kããlõti. Kõn men in, ej an kajjojo armej eddo ñan kããlõt ta kein kõm̦adm̦õd ko rekkar ñan e im rejjab ekkar ñan e. * Pepe ko ad remaroñ oktak jen pepe ko an ro nukid ak baam̦le ko ad. Bõtab, jej aikuj keememej bwe kajjojo ro doon Anij rej aikuj make ‘inek ijo kun̦aaer’ im kõm̦m̦ani pepe ko aer make. (Ga. 6:4, 5) Jej aikuj keememej bwe men eo eaorõktata ej bwe aolep pepe ko jej kõm̦m̦ani ren kam̦õn̦õn̦õik Jeova, im jab armej ro.—1 Ti. 1:5.

5. Ta eo jemaroñ kõm̦m̦ane bwe jen kõjparok tõmak eo ad?

⁵ Ej juon men ekauwatata el̦aññe jejaje ta pepe ko jen kõm̦m̦ani. Rijjelõk Jemes ear ba bwe juon eo im ejaje ta eo en kõm̦m̦ane “ebbururu ilo men otemjej.” (Jem. 1:8, UBS) Armej in epidodo an po im tõmak ilo l̦õmn̦ak ko rejjab m̦ool an armej ro im aolep iien rej oktaktak. Armej in ej ãinwõt juon em̦m̦aan ilo juon wa eo im ejjel̦o̦k an jebwe im n̦o ko rej kõm̦m̦an an peto petak. Enaaj m̦õkaj an armej in iion jorrããn, im enaaj naruon ro jet kõnke ear po ilo l̦õmn̦ak ko aer. (1 Ti. 1:19) Ewi wãween jemaroñ kõjparok bwe men in en jab wal̦o̦k ñan kõj? Jej aikuj kate kõj bwe jen “pen ilo tõmak.” (Riit Kolosse 2:6, 7.) Bwe jen maroñ pen wõt ilo tõmak, jej aikuj katak ñan jel̦ã kõm̦m̦ani pepe ko im rej kwal̦o̦k bwe jej lukkuun tõmake naan ko an Anij ilo Baibõl̦ eo. (2 Ti. 3:14-17) Bõtab, etke epen ñan kõm̦m̦ani pepe ko rem̦m̦an?

Etke Emaroñ Pen ñan Kõm̦m̦ani Pepe ko Ad Make

6. Ewi wãween mijak ej jelõt kõj ñe jej kõm̦m̦ani pepe ko?

⁶ Mijak ej kõm̦m̦an bwe en pen ad kõm̦m̦ani pepe ko rem̦m̦an. Jej mijak kõnke jemaroñ kõm̦m̦an bõd im jej mijak kõn ta ko ro jet remaroñ ba kõn pepe ko ad. Eñjake rot in ej wal̦o̦k ippãn aolep armej. Ejjel̦o̦k juon ekõn̦aan kõm̦m̦ani pepe ko me remaroñ kajorrããn ak kajook e. Bõtab, yokwe eo ad ñan Jeova im naan ko an ilo Baibõl̦ eo emaroñ jipañ kõj bwe en dikl̦o̦k ad mijak. Ewi wãween? Ñe jej yokwe Jeova, jenaaj etale naan ko an ilo Baibõl̦ eo im bok ko jet rej pedped iion Baibõl̦ eo m̦okta jãn ad kõm̦m̦ani pepe ko raorõk. Ilo wãween in, enaaj em̦m̦anl̦o̦k aolep pepe ko jej kõm̦m̦ani. Etke? Kõnke ikijen Baibõl̦ eo, Jeova ej kõm̦m̦an “bwe ro rejajelokjen ren jelãlokjen, im bareinwõt katakin ro emmõn drettair bwe ren meletlet im jelã kilen kõtõbraki men ko remmõn.”—JK. 1:4, UBS.

7. Ta eo jemaroñ katak jãn waanjoñak eo an Kiiñ Devid?

⁷ Jenaaj ke kõm̦m̦ani pepe ko rem̦m̦an aolep iien? Jeban, kõnke aolep armej rej likjab jãn iien ñan iien. (Rom 3:23) Ñan waanjoñak, Kiiñ Devid ear juon em̦m̦aan emãlõtlõt im ear tiljek ñan Anij. Bõtab, jet iien ear kõm̦m̦ani pepe ko rebõd me rar bõktok jorrããn ñan e im ro jet. (2 Sa. 12:9-12) Mekarta, Devid ear jab kõtl̦o̦k bwe bõd ko an ren kabõjrak e jen an kõm̦m̦ani pepe ko me renaaj karuakl̦o̦k e ñan Jeova. (1 Kiiñ 15:4, 5) Ãinwõt Devid, jen wõnm̦aanl̦o̦k wõt im kõm̦m̦ani pepe ko rem̦m̦an, im keememej bwe Jeova ej mel̦o̦kl̦o̦k im jol̦o̦k bõd ko ad.  Jeova enaaj wõnm̦aanl̦o̦k wõt im jipañ ro rej yokwe im pokake e aolep iien.—Sam 51:1-4, 7-10.

8. Ta eo jemaroñ katak jãn naan ko an Paul kõn m̦are?

⁸ Ewi wãween bwe en maroñ dikl̦o̦k ad mijak in kõm̦m̦ani pepe ko? Jej aikuj keememej bwe emaroñ lõñl̦o̦k jãn juon pepe ejim̦we. Ñan waanjoñak, rijjelõk Paul ear kõmel̦el̦eik armej ro kõn pepe ko remaroñ kõm̦m̦ani ikijen men in m̦are. Ear ba: “Innãm ij ba ñan ro re jañin pãlele, kab ro e jako pãleir, em̦m̦an el̦aññe rej pãd im ãinwõt ña. A el̦aññe re jab maroñ make iaer, ren pãlele.” (1 Ko. 7:8,9) Meñe Paul ear rõjañ armej ro bwe em̦m̦anl̦o̦k jab pãlele, ear ba bwe ebar em̦m̦an pãlele.

9. Jej aikuj ke l̦õmn̦ak kõn wãween an ro jet naaj watõke pepe ko jej kõm̦m̦ani? Jouj im kõmel̦el̦e.

⁹ Jej aikuj ke l̦õmn̦ak kõn wãween an ro jet naaj watõke pepe ko jej kõm̦m̦ani? Aet, bõtab ewõr joñan. Ñan waanjoñak, jen lale ta eo Paul ear ba kõn m̦õñã ko rar katok kaki ñan ekjab ko. Ear ba bwe ejjel̦o̦k jorrããn ñe juon ej pepe in bõk ekkan kein, bõtab men in emaroñ kal̦õkatip ro jet. Ta eo Paul ear pepe in kõm̦m̦ane? Ear ba: “El̦aññe m̦õñã ej l̦õkatipe jeiõ im jatũ, I jãmin m̦õñã kanniõk indeeo, bwe in jab kal̦õkatipe jeiõ im jatũ.” (1 Ko. 8:4-13) Kõj bareinwõt jen lukkuun lale bwe pepe ko ad ren jab kal̦õkatip ro jet. Bõtab, men eo eaorõktata in ej bwe jen l̦õmn̦ak kõn ewi wãween pepe ko ad remaroñ jelõt kõtaan eo ad ippãn Jeova. (Riit Rom 14:1-4, UBS.) Ta naan in kakapilõk ko ilo Baibõl̦ im remaroñ jipañ kõj ñan kõm̦m̦ani pepe ko im renaaj kabuñbũruon Jeova?

Wãween ko Jiljino ñan Kõm̦m̦ani Pepe ko Rem̦m̦an

10, 11. (a) Ewi wãween ro uwaan baam̦le ko remaroñ kõjparok er ñan jab bõkjab? (b) Ta eo elder ro rej aikuj keememeje ñe rej kõm̦m̦ani pepe ko ñan congregation ko?

¹⁰ M̦oktata, kwõn jab bõkjab. M̦okta jen ad pepe in kõm̦m̦ane juon men, jej aikuj kajjitõkin kõj make, ‘Ej ke tõllo̦kũ ñan aõ kõm̦m̦ane pepe in?’ Kiiñ Solomon ear je: “Enaj mõkaj an armij ro eutiej burueir bed ilo jook, ak jelãlokjen ej bed ibben ro ettã burueir.”—JK. 11:2, UBS.

¹¹ Ro jemen im jinen ajri ro remaroñ kamãlim an ro nejier kõm̦m̦ani jet pepe ko, bõtab ajri ro rejjab aikuj bõkjab ak l̦õmn̦ak bwe ewõr aer maroñ ilo aolep men. (Kol. 3:20) Kõrã ro ewõr joñan maroñ ko ippãer ilo baam̦le eo im rej aikuj keememej bwe l̦õm̦aro pãleir rej bõran baam̦le eo. (JK. 1:8; 31:10-18; Ep. 5:23) Ãindein, l̦õm̦aro rej aikuj bar kile bwe ewõr joñan maroñ ko aer im bwe rej pãd ium̦win maroñ eo an Kũraij. (1 Ko. 11:3) Elder ro rej kõm̦m̦ani pepe ko im rej jelõt congregation eo. Bõtab, rej kõjparok bwe ren “jab el̦l̦ã jãn men ko em̦õj jeje” ilo Baibõl̦ eo. (1 Ko. 4:6) Rej lukkuun l̦oore aolep naan in tõl ko rej bõki jãn ri karejar eo etiljek im mãlõtlõt. (Matu 24:45-47) Jen kõttãik kõj make im kõm̦m̦ani pepe ko wõt el̦aññe ewõr ad maroñ ñan kõm̦m̦ani.

12. (a) Etke jej aikuj kappukot mel̦el̦e ko m̦okta jen ad kõm̦m̦ane juon pepe? (b) Ta ko jej aikuj kõl̦mãnl̦o̦kjen̦ kaki m̦okta jãn ad kõm̦m̦ani pepe ko?

¹² Kein karuo, kwõn kappukot mel̦el̦e ko me renaaj jipañ eok kõm̦m̦ane pepe eo am̦. Solomon  ear je: “Kwõn kanooj lale [im kapooj] ial̦ in neõm̦, innãm ial̦ ko am̦ otemjej renaaj jim̦we.” (JK. 4:26) Ñan waanjoñak, kwõj ke l̦õmn̦ak in kõm̦m̦ane juon am̦ l̦oon ilo pããñ? Kwõn jab kajerbale kõn̦aan ko am̦ ñan kõm̦m̦ane pepe in. Kajjitõk jipañ ippãn ro im em̦õj aer iione men in, im bar lale ta naan in kakapilõk ko ilo Baibõl̦ eo im remaroñ jipañ eok ilo pepe in am̦. (JK. 20:18) Ilo am̦ pepel̦o̦k im̦aan, kwõn lukkuun etale ta jeraam̦m̦an ko remaroñ wal̦o̦k, im bareinwõt ta jerata ko remaroñ wal̦o̦k ñan kwe el̦aññe kwõnaaj kõm̦m̦ane pepe in. M̦okta jãn am̦ kõm̦m̦ane pepe in, kwõn l̦õmn̦ak kõn aolep men ko im remaroñ jelõt pepe eo am̦. (Luk 14:28) Kõl̦mãnl̦o̦kjen̦ kõn wãween enaaj jelõt maroñ eo am̦ ñan kabwe aikuj ko am̦, im kõtaan eo am̦ ippãn Jeova. Ej bõk iien ñan ad kappukot mel̦el̦e ko im jejjab aikuj kõm̦m̦ane men in ilo m̦õkaj. Ilo ad kõm̦m̦ani men kein, renaaj kõjparok kõj bwe jen jab kõm̦m̦ani pepe ko im remaroñ bõktok jorrããn ak bũrom̦õj tokãlik.

13. (a) Ilo Jemes 1:5, ta eo ej rõjañ kõj ñan kõm̦m̦ane? (b) Ewi wãween jar kõn mãlõtlõt emaroñ jipañ kõj?

¹³ Kein kajilu, kwõn jar kõn mãlõtlõt. Pepe ko ad renaaj kabuñbũruon Jeova el̦aññe jej kajjitõk ippãn bwe en jipañ kõj. Rijjelõk Jemes ear ba: “El̦aññe jabdewõt iaami ej aikuj mãlõtlõt, en kajjitõk kõn e ippãn Anij, eo Ej wũjlep ñan armej otemjej, im jab en̦o̦uk kake, im Enaaj lel̦o̦k ñan e.” (Jem. 1:5) Jen jab mijak in kajjitõk ippãn Jeova bwe en jipañ kõj ñan kõm̦m̦ani pepe ko. (JK. 3:5, 6) Jen jab lõke mãlõtlõt ko ad make kõnke men in emaroñ tõlpiloik kõj. Ilo ad jar kõn mãlõtlõt im lale naan in kakapilõk ko an Jeova ilo Baibõl̦ eo, jej kõtl̦o̦k bwe kajoor eo an en jipañ kõj ñan etale kõj make.—Hi. 4:12; riit Jemes 1:22-25.

14. Etke jejjab aikuj aepedped?

¹⁴ Kein kemen, kwõn kõm̦m̦ane pepe eo am̦ make. Ãlikin am̦ kappukot mel̦el̦e ko im kajjitõk ippãn Jeova bwe en jipañ eok im lewõj mãlõtlõt, innem kwõmaroñ wõnm̦aanl̦o̦k im kõm̦m̦ane pepe eo am̦. Juon eo emãlõtlõt ej bõk iien ñan an “kanooj lale an etetal.” (JK. 14:15) Bõtab, kwõn jab aepedped in kõm̦m̦ane pepe eo am̦. Juon eo ej aepedped ekkã an rum̦wij in kõm̦m̦ani pepe ko an im ej kõm̦m̦an jekpen. (JK. 22:13) Ejjab kõm̦m̦ane pepe ko an make ak ej kõtl̦o̦k bwe ro jet ren kõm̦m̦ani.

15, 16. Bwe jen maroñ jerbali ak kajejjeti pepe ko ad, ta ko jej aikuj kõm̦m̦ani?

¹⁵ Kein kal̦alem, kwõn jerbale ak kajejjete pepe eo am̦. Enaaj ejjel̦o̦k tokjãn ad kate kõj ñan kõm̦m̦ane juon pepe el̦aññe jejjab jerbale ak kate kõj joñan wõt ad maroñ ñan kajejjete. Solomon ear je: “Jabdewõt eo peim̦ ej loe bwe en kõm̦m̦ane, kwõn kõm̦m̦ane kõn am̦ maroñ.” (Ekl. 9:10) Kõn men in, jej aikuj m̦õn̦õn̦õ in kajerbal iien im maroñ ko ad ñan kajejjete pepe ko ad. Ñan waanjoñak, juon ri kwal̦o̦k naan emaroñ pepe in bõk jerbal in regular pioneer. Enaaj ke lo tõprak ilo pepe in ear kõm̦m̦ane? Enaaj lo tõprak el̦aññe ejjab jol̦o̦k el̦ap iien ilo jikin jerbal  eo an im menin kam̦õn̦õn̦õ ko. Etke? Kõnke men kein remaroñ kõm̦m̦an an m̦õk im bõk el̦ap iien ko an jãn an kwal̦o̦k naan.

¹⁶ Jemaroñ kõm̦m̦ani pepe ko raorõk, bõtab emaroñ pen ñan ad jerbali ak kajejjeti. Etke? Kõnke “aolepen lal̦ ej pãd wõt ilo ri nana eo.” (1 Jon 5:19) Ilo lal̦ in rainin, jej tarin̦aek Setan im enjel̦ ro an renana. (Ep. 6:12) Rijjelõk Paul im Jud rar jim̦or kalikkar bwe armej ro im rej pepe in jerbal ñan Anij renaaj iion apañ im mãlejjoñ ko.—1 Ti. 6:12; Jud 3.

17. Ñe jej kõm̦m̦ani pepe ko, ta eo Jeova ej ekõn̦aan bwe jen kõm̦m̦ane?

¹⁷ Kein kajiljino, kwõn bar etale pepe eo am̦ im kõm̦m̦an kajim̦we ko el̦aññe ej menin aikuj. Kõnke jejjab jel̦ã ta eo enaaj wal̦o̦k ilju im jekl̦aj, jet iien pepe ko ad rejjab jejjet ekkar ñan kõn̦aan ko ad. (Jem. 4:13-15) Meñe emaroñ pen ak Jeova ekõn̦aan bwe jen kijenmej wõt kõn pepe ko raorõk jaar kõm̦m̦ani meñe jemaroñ ioon mãlejjoñ ko. Juon eo ear pepe ñan ajel̦o̦k mour eo an ñan Jeova ejjab aikuj ukote ñe em̦õj an kõm̦m̦ane pepe in. Ãindein bareinwõt ippãn ri pãlele ro im em̦õj aer kõm̦m̦an kallim̦ur ko ñan doon ke rar m̦are. Ñe jej kõm̦m̦an pepe rot kein, Anij ekõn̦aan bwe jen kajejjeti. (Riit Sam 15:1, 2, 4.) Bõtab, jej aikuj keememej bwe ewõr jet pepe ko im jemaroñ kajim̦we. Juon eo emãlõtlõt enaaj bar etale pepe ko ear kõm̦m̦ani jãn iien ñan iien. Ñe ej loe bwe ej aikuj kajim̦we ak kõm̦m̦an oktak ko ilo pepe eo an, innem enaaj kõttãik e ñan an kõm̦m̦ane men in. (JK. 16:18, UBS) Men eo eaorõktata ej aikuj l̦õmn̦ak kake ej bwe en kabuñbũruon Anij ilo aolep men ko ej kõm̦m̦ani ilo mour eo an.

Jipañ Ro Jet ñan Jel̦ã Kõm̦m̦ani Pepe ko Rej Kabuñbũruon Anij

18. Ewi wãween an ro jemen im jinen maroñ katakin ro nejier ñan kõm̦m̦ani pepe ko rem̦m̦an?

¹⁸ Ro jemen im jinen ajri ro remaroñ katakin ro nejier wãween eo ñan kõm̦m̦ani pepe ko im rej kabuñbũruon Anij. Joñak ko aer ej men eo em̦m̦antata im emaroñ katakin ajri ro. (Luk 6:40, UBS) El̦aññe ekkar, ro jemen im jinen ajri ro remaroñ kõmel̦el̦e ñan ro nejier kõn wãween eo er make rar kõm̦m̦ane juon pepe. Remaroñ bareinwõt kõtl̦o̦k bwe ro nejier ren kõm̦m̦ani jet pepe ko ñan er make, innem nõbar er ñe etõprak pepe ko aer. Bõtab, ta el̦aññe ear jab em̦m̦an pepe eo ajri eo ear kõm̦m̦ane? Men eo m̦oktata ro jemen im jinen renaaj kõn̦aan kõm̦m̦ane ej jipañ ajri eo nejier bwe en jab iion jorrããn. Bõtab, jet iien men in emaroñ jab lukkuun jipañ eo nejier. Ñan waanjoñak, juon jemen im jinen emaroñ kõtl̦o̦k bwe eo nejin en kõm̦m̦ane juon an l̦aijen in kattõr wa. Ak ke ear kattõr im rupe juon kien im rar bakkiiñi, jemen im jinen remaroñ kõn̦aan kõl̦l̦ã on̦ãn bakkiiñ eo an. Bõtab, el̦aññe jemen im jinen rej ba ñan e bwe en jerbal ñan kõl̦l̦ã on̦ean bakkiiñ eo, men in enaaj jipañ e ñan jel̦ã kilen make bõk eddon mour eo an.—Rom 13:4.

19. Ta eo jej aikuj katakin ri katak Baibõl̦ ro ad, im ewi wãween jemaroñ kõm̦m̦ane men in?

¹⁹ Jijej ear jiroñ ri kal̦oor ro an bwe ren katakin armej ro jet. (Matu 28:20) Juon iaan katak ko raorõktata me jemaroñ katakin ri katak Baibõl̦ eo ad kake ej bwe ren jel̦ã kõm̦m̦ani pepe ko rem̦m̦an. Bwe jen lo tõprak ilo men in, jejjab aikuj kwal̦o̦k ñan er ta eo rej aikuj kõm̦m̦ane ñe rej kõm̦m̦ane juon pepe. Ak em̦m̦anl̦o̦k bwe jen kal̦apl̦o̦k aer mel̦el̦e kõn naan in kakapilõk ko ilo Baibõl̦ eo bwe ren make kõm̦m̦ani pepe ko aer. Eaorõk bwe juon en make kõm̦m̦ani pepe ko ippãn make kõnke kõj kajjojo jenaaj aikuj ‘lel̦o̦k naan kõn kõj make ñan Anij.’ (Rom 14:12) Kõn men in, jen kõm̦m̦ani pepe ko im rej kabuñbũruon Anij.

[Kamelele eo itulal]

Ewi Wãween Kwõnaaj Uwaak?

• Etke jej aikuj katak ñan jel̦ã kõm̦m̦an pepe ko?

• Ewi wãween mijak ej jelõt kõj ñe jej kõm̦m̦ani pepe ko, im ewi wãween jemaroñ jol̦o̦k ad mijak?

• Ta wãween ko jiljino jemaroñ kõm̦m̦ani bwe pepe ko ad ren kabuñbũruon Anij?

[Kajitõk ko ñan katak]

[Box/Pija ilo peij 16]

Wãween ko Jiljino ñan Kõm̦m̦ani Pepe ko Rem̦m̦an

[Pija ilo peij 16]

1 Jab Bõkjab

2 Kappukot Mel̦el̦e ko me Renaaj Jipañ Eok Kõm̦m̦ane Pepe eo Am̦

3 Jar kõn Mãlõtlõt

4 Kõm̦m̦ane Pepe eo Am̦ Make

5 Jerbale ak Kajejjete Pepe eo Am̦

6 Bar Etale im Kõm̦m̦an Kajim̦we

[Pija ilo peij 15]

Juon eo ejaje kõm̦m̦an pepe ko ej ãinwõt juon em̦m̦aan eo ilo juon wa ejjel̦o̦k an jebwe im n̦o ko rej kõm̦m̦an an peto petak