Dira Diphetho Tšeo di Tumišago Modimo

“Yo bohlale o šetša dikgato tša gagwe.”—DIE. 14:15.

1, 2. (a) Diphethong ka moka tšeo re di dirago, ke selo sefe seo re swanetšego go tshwenyega kudu ka sona? (b) Re tla ahlaahla dipotšišo dife?

GA GO pelaelo gore re dira tše dintši letšatši le letšatši. Bontši bja tšona ga di swarelele nako e telele. Lega go le bjalo, tše dingwe di ka kgoma maphelo a rena kudu. Ke’ng tšona tše? Ke diphetho. Diphethong ka moka tšeo re di dirago, go sa šetšwe gore ke tše dikgolo goba tše dinyenyane, selo seo re tshwenyegilego kudu ka sona ke go tumiša Modimo.—Bala 1 Bakorinthe 10:31.

² Na go bonolo goba go thata go dira diphetho? Ge e ba re nyaka go gola ka tsebo ya Bokriste, re swanetše go ithuta go bona phapano magareng ga se se lokilego le se se fošagetšego, ke moka re dire diphetho tšeo di bontšhago seo re kgodišegilego ka sona, e sego seo batho ba bangwe ba kgodišegilego ka sona. (Baroma 12:1, 2; Baheb. 5:14) Ke mabaka afe a mangwe a kwagalago ao a dirago gore re ithute go dira diphetho tše dibotse? Ke ka baka la’ng ka dinako tše dingwe go le thata go di dira? Gona ke megato efe yeo re ka e gatago go kgonthišetša gore diphetho tšeo re di dirago di tumiša Modimo?

Ke ka Baka La’ng re Swanetše go Dira Diphetho?

3. Ke’ng seo re sa swanelago go se dumelela se re šitiša go dira diphetho?

³ Ge e ba re palelwa ke go dira diphetho moo  go akaretšwago melao ya motheo ya Beibele, bao re tsenago le bona sekolo goba bao re šomago le bona ba ka phetha ka gore ga se ra kgodišega ka ditumelo tša rena e bile re huetšega gabonolo. Ba ka bolela maaka, ba hlalefetša ba bangwe goba ba utswa ke moka ba re tutueletša go “latela lešaba” ka go ba thekga goba ka go leka go uta seo ba se dirilego. (Ek. 23:2) Lega go le bjalo, motho yo a kgonago go dira diphetho tšeo di tumišago Modimo a ka se ke a dumelela poifo goba kganyogo ya go amogelwa ke batho ba bangwe e dira gore a itshware ka tsela yeo e thulanago le letswalo leo le tlwaeditšwego ka Beibele.—Baroma 13:5.

4. Ke ka baka la’ng ba bangwe ba ka nyaka go re direla diphetho?

⁴ Ga se gore batho ka moka bao ba nyakago go re direla diphetho ba ikemišeditše go re gobatša. Bagwera bao ba nago le maikemišetšo a mabotse ba ka re tutueletša go kwa keletšo ya bona. Ge e ba re dula kgole le gae, gantši ba leloko ba tshwenyega kudu ka gore re phela bjang gomme ba ka ikwa ba gapeletšega go tšwela pele ba nyaka go re thuša go dira diphetho tše dikgolo. Ka mohlala, ela hloko taba ya tša kalafo. Beibele e bolela ka mo go kwagalago gore ga se ra swanela go diriša madi gampe. (Dit. 15:28, 29) Lega go le bjalo, ditabeng tše dingwe tša tša kalafo ga go na melao yeo e bolelago ka go lebanya seo re swanetšego go se dira gomme go nyakega gore yo mongwe le yo mongwe wa rena a itirele phetho ya mabapi le mohuta wa kalafo woo a tlago go o amogela goba go o gana. * Batho bao ba re ratago ba ka ba le dikgopolo tše di tiilego ditabeng tše. Lega go le bjalo, ge Mokriste yo mongwe le yo mongwe yo a kolobeditšwego a dira phetho ditabeng tšeo, o swanetše go ithwalela “morwalo wa gagwe.” (Bagal. 6:4, 5) Selo seo re tshwenyegilego kudu ka sona ke go boloka letswalo le lebotse go Modimo, e sego bathong.—1 Tim. 1:5.

5. Re ka phema bjang go senya tumelo ya rena?

⁵ Go ba pelopedi go ka re bea kotsing e kgolo. Morutiwa Jakobo o ngwadile gore motho wa pelopedi ‘ga a tsepama ditseleng tša gagwe ka moka.’ (Jak. 1:8) Go swana le monna yo a nametšego sekepe seo se tšewatšewago ke phefo lewatleng le le galefilego, o tla išwa kua le kua ke kgopolo e nngwe le e nngwe ya batho. Go tloga go le bonolo gore motho yo bjalo a senye tumelo ya gagwe gomme a phare batho ba bangwe molato ka baka la maemo a gagwe a sa kgahlišego! (1 Tim. 1:19) Re ka phema bjang mafelelo a bjalo? Re swanetše go ‘tsepamišwa tumelong.’ (Bala Bakolose 2:6, 7.) Gore re tsepame, re swanetše go ithuta go dira diphetho tšeo di bontšhago gore re dumela Lentšu la Modimo leo le buduletšwego. (2 Tim. 3:14-17) Eupša ke’ng seo se ka šitišago bokgoni bja rena bja go dira diphetho tše dibotse?

Seo se ka Dirago Gore go be Thata go Dira Diphetho

6. Poifo e ka re kgoma bjang?

⁶ Go boifa go ka re ferekanya—go boifa gore re ka dira diphetho tše di fošagetšego, go boifa gore re ka palelwa goba gore batho ba bangwe ba ka re lebelela re le mašilo. Go a kwagala go tshwenyega ka tsela yeo. Ga go motho yo a nyakago go dira diphetho tše di fošagetšego, diphetho tšeo di bakago mathata le go re leša dihlong. Lega go le bjalo, go rata Modimo le Lentšu la gagwe go ka re thuša go fenya poifo ya rena. Ka ditsela dife? Go rata Modimo go tla dira gore ka mehla re hlahlobe Lentšu la gagwe le dikgatišo tšeo di theilwego Beibeleng pele re dira diphetho tše dikgolo. Se se tla dira gore re se dire diphošo tše dintši. Ka baka la’ng? Ka gobane Beibele e ka ‘nea yo a se nago temogo bohlale gomme ya nea mofsa tsebo le tlhaologanyo.’—Die. 1:4.

7. Mohlala wa Kgoši Dafida o ka re ruta’ng?

⁷ Na ka mehla re tla dira diphetho tše di nepagetšego? Aowa. Ka moka ga rena re dira diphošo. (Baroma 3:23) Ka mohlala, Kgoši Dafida e be e le monna yo bohlale le yo a botegago. Lega go le bjalo, ka dinako tše dingwe o ile a dira diphetho tše di fošagetšego tšeo di ilego tša dira gore yena le ba bangwe ba tlaišege. (2 Sam. 12:9-12) Lega  go le bjalo, Dafida ga se a ka a dumelela diphošo tša gagwe di mo šitiša go dira diphetho le go amogelwa ke Modimo. (1 Dikg. 15:4, 5) Go swana le Dafida, re ka kgona go dira diphetho go sa šetšwe diphošo tša nakong e fetilego, re gopola gore Jehofa o tla hlokomologa diphošo tša rena gomme a re lebalela dibe. O tla dula a thekga bao ba mo ratago le go mo kwa.—Ps. 51:1-4, 7-10.

8. Re ithuta’ng go seo moapostola Paulo a se boletšego ka lenyalo?

⁸ Re ka fokotša dipelaelo tšeo re nago le tšona mabapi le go dira diphetho. Re ka dira seo bjang? Ka go lemoga gore ka dinako tše dingwe go na le ditsela tše mmalwa tše di nepagetšego tšeo re ka di kgethago. Ela hloko kamoo moapostola Paulo a ilego a nea mabaka ka gona ka lenyalo. O ile a budulelwa go ngwala gore: “Ge e ba motho a nagana gore o itshwara ka mo go sa swanelago mabapi le go se be ga gagwe lenyalong, ge e ba a fetile lebaka la bofsa, gona seo a swanetšego go se dira ke gore a tsene lenyalong ge e ba a nyaka; ga a dire sebe. A ba nyaleng. Eupša ge e ba motho a eme a tiile pelong ya gagwe e bile a sa gateletšege, eupša a kgona go laola thato ya gagwe gomme pelong ya gagwe a dirile phetho ya gore a dule a se lenyalong, o tla dira gabotse.” (1 Bakor. 7:36-38) Paulo o be a kgothaletša go se be lenyalong e le kgetho e nepagetšego, eupša e be e se yona feela kgetho e nepagetšego.

9. Na re swanetše go tshwenyega ka gore ba bangwe ba tla re’ng ka diphetho tšeo re di dirago? Hlalosa.

⁹ Na re swanetše go tshwenyega ka gore ba bangwe ba tla re’ng ka diphetho tšeo re di dirago? Ee, re ka tshwenyega go fihla bokgoleng bjo itšego. Ela hloko seo Paulo a se boletšego ka go ja dijo tšeo di ka bonalago di hlabetšwe medimo ya diswantšho. O ile a bolela gore go kgetha go di ja go ka fo se be phošo, eupša go ka kgopiša motho wa letswalo le le fokolago. Paulo o ile a phetha ka gore’ng? O ngwadile gore: “Ge e ba dijo di kgopiša ngwanešo, gona nka se sa hlwa ke eja nama le ka mohla, e le gore ke se ke ka kgopiša ngwanešo.” (1 Bakor. 8:4-13) Le rena re swanetše go ela hloko kamoo diphetho tša rena di tla kgomago matswalo a ba bangwe. Ke therešo gore selo seo re tshwenyegilego kudu ka sona ke kamoo dilo tšeo re di kgethago di tlago go kgoma tswalano ya rena le Jehofa. (Bala Baroma 14:1-4.) Ke melao efe ya motheo yeo e tlago go re thuša go dira diphetho tšeo di tumišago Modimo?

Megato e Tshelelago ya go Dira Diphetho tše di Nepagetšego

10, 11. (a) Re ka phema bjang go ikgodiša ka lapeng? (b) Ke’ng seo bagolo ba swanetšego go se gopola ge ba dira diphetho tšeo di kgomago phuthego?

¹⁰ Phema go ikgodiša. Pele re kgetha go dira selo se itšego, re swanetše go ipotšiša gore: ‘Na ke nna yo a swanetšego go dira phetho ye?’ Kgoši Solomone o ngwadile gore: “Na go na le boikgodišo? Gona go tla ba le go nyatšega; eupša bohlale ke bja baipoetši.”—Die. 11:2.

¹¹ Batswadi ba ka nea bana ba bona sebaka sa go dira diphetho tše itšego, eupša bana ga se ba swanela go fo phetha ka gore ke boikarabelo bja bona go dira diphetho. (Bakol. 3:20) Basadi le bomma ba neilwe boikarabelo bjo itšego ka lapeng eupša ba dira gabotse ge ba sa tšeele fase bohlogo bja banna ba bona. (Die. 1:8; 31:10-18; Baef. 5:23) Ka mo go swanago, banna ba swanetše go lemoga gore matla a bona a lekanyeditšwe le gore ba swanetše go ikokobeletša Kriste.  (1 Bakor. 11:3) Bagolo ba dira diphetho tšeo di kgomago phuthego. Lega go le bjalo, ba kgonthišetša gore ga ba ‘fetele ka kua ga dilo tše di ngwadilwego’ ka Lentšung la Modimo. (1 Bakor. 4:6) E bile ba kgomarela tlhahlo yeo ba e hwetšago go mohlanka yo a botegago. (Mat. 24:45-47) Re ka phema gore rena le ba bangwe re nyame le go tlaišega ge ka boipoetšo re dira diphetho ge feela re neilwe matla a go dira bjalo.

12. (a) Ke ka baka la’ng re swanetše go dira nyakišišo? (b) Hlalosa kamoo motho a ka dirago nyakišišo yeo ka gona.

¹² Dira nyakišišo. Solomone o ngwadile gore: “Maano a motho yo mafolofolo a a mo hola, eupša mang le mang yo a akgofago o wela bohloking.” (Die. 21:5) Ka mohlala, na o nagana ka go thoma kgwebo? O se ke wa tšewa ke maikwelo. Nyaka go tseba ditaba ka botlalo, tsoma keletšo ya bao ba tlwaelanego le ditaba tšeo ke moka o bone gore ke melao efe ya motheo ya Beibele yeo e šomago tabeng ye. (Die. 20:18) Gore o kgone go rulaganya nyakišišo ya gago, ngwala malokelelo a mabedi—le lengwe e be la mehola ya yona, le lengwe e be la mathata a yona. Pele o dira phetho, “bala ditshenyegelo.” (Luka 14:28) O se ke wa tshwenyega feela ka gore phetho ya gago e ka kgoma bjang boemo bja gago bja ditšhelete eupša le gore e ka kgoma bjang boemo bja gago bja moya. Go dira nyakišišo go nyaka nako le maiteko. Ka go dira bjalo, o ka phema go dira diphetho tša lepotlapotla tšeo di tla go bakelago dipelaelo tšeo di sa nyakegego.

13. (a) Jakobo 1:5 e re kgonthišetša’ng? (b) Go rapelela bohlale go tla re thuša bjang?

¹³ Rapelela bohlale. Diphetho tša rena di tla tumiša Modimo ge feela re mo kgopela gore a re thuše go di dira. Morutiwa Jakobo o ngwadile gore: “Ge e ba mang le mang wa lena a hloka bohlale, a a tšwele pele a kgopela Modimo, gobane o fa bohle kudu ka ntle le go goboša; o tla bo newa.” (Jak. 1:5) Ga se ra swanela go lešwa dihlong ke go dumela gore re hloka bohlale bja Modimo gore bo re thuše go dira diphetho. (Die. 3:5, 6) Ge e le gabotse, go ithekga ka kwešišo ya rena go ka re lahletša gabonolo. Ge re rapelela bohlale le go nyakišiša melao ya motheo Lentšung la Modimo, re dumelela moya o mokgethwa o re thuša go lemoga maikemišetšo a rena ge re nyaka go kgetha selo se itšego.—Baheb. 4:12; bala Jakobo 1:22-25.

14. Ke ka baka la’ng re swanetše go phema go dikadika?

¹⁴ Dira phetho. O se ke wa kitimela mogatong wo pele o dira nyakišišo le go rapelela bohlale. Motho yo bohlale o ipha nako ya go “šetša dikgato tša gagwe.” (Die. 14:15) Le gona, o se ke wa dikadika. Motho yo a dikadikago a ka itirela sehlare sa ntšhirela sa go se tšee kgato. (Die. 22:13) Eupša o sa dutše a dira phetho—o a phetha, ge e le gabotse, o dumelela batho ba bangwe ba laola bophelo bja gagwe.

15, 16. Go diriša phetho go akaretša’ng?

¹⁵ Diriša phetho ya gago. Nako yeo re e feditšego re dira phetho e nepagetšego e ka ba ya lefeela ge e ba re sa diriše ka mafolofolo phetho yeo re e fihleletšego. Solomone o ngwadile gore: “Tšohle tšeo seatla sa gago se kgonago go di dira, di  dire ka matla a gago ka moka.” (Mmo. 9:10) E le gore re atlege, re swanetše go ikemišetša go dira sohle seo re ka se kgonago gore re diriše diphetho tša rena. Ka mohlala, mogoeledi wa phuthego a ka dira phetho ya go tšea bobulamadibogo. Na o tla atlega? O tla atlega ge feela a ka se diriše matla a mantši a le mošomong wa boiphedišo goba a itapološa gomme seo sa mo amoga nako yeo a bego a swanetše go e fetša a le bodireding.

¹⁶ Gantši ga go bonolo go diriša diphetho tše dibotse. Ka baka la’ng? Ka gobane “lefase ka moka le rapaletše matleng a yo kgopo.” (1 Joh. 5:19) Re swanetše go lwa le “mebušo le balaodi, le babuši ba lefase ba leswiswi le gotee le madira a kgopo a moya legodimong.” (Baef. 6:12) Moapostola Paulo le morutiwa Juda ba bolela gore bao ba kgethago go tumiša Modimo ba tla lebeletšana le ntwa e itšego.—1 Tim. 6:12; Juda 3.

17. Ke’ng seo Jehofa a se letetšego diphethong tšeo re di dirago?

¹⁷ Hlahloba phetho ya gago gomme o dire diphetogo ge go nyakega. Ga se diphetho ka moka tšeo di sepelago bjalo ka ge re be re rulagantše. “Ditiragalo tšeo di sa letelwago” di re wela ka moka. (Mmo. 9:11) Lega go le bjalo, Jehofa o letetše gore re kgomarele diphetho tše dingwe go sa šetšwe go lebeletšana le diteko. Motho o itirela phetho ya go neela bophelo bja gagwe go Jehofa goba ya go tsena lenyalong. Modimo o letetše gore re phelele diphetho tše bjalo. (Bala Psalme 15:1, 2, 4.) Lega go le bjalo, diphetho tše dintši ga go thata go di dira. Nako le nako motho yo bohlale o tla hlahloba diphetho tšeo a di dirilego. A ka se dumelele gore go ikgantšha goba go ngangabala go mo thibele go fetoša goba go tlogela phetho yeo a e dirilego. (Die. 16:18) Selo seo a tshwenyegilego kudu ka sona ke go kgonthišetša gore tsela yeo a phelago ka yona e tumiša Modimo.

Tlwaetša ba Bangwe go Dira Diphetho Tšeo di Tumišago Modimo

18. Batswadi ba ka tlwaetša bana ba bona bjang go dira diphetho tše di nepagetšego?

¹⁸ Batswadi ba ka thuša bana ba bona kudu go ithuta go dira diphetho tšeo di tumišago Modimo. Tsela e kaonekaone ya go ba ruta ke ka go ba beela mohlala o mobotse. (Luka 6:40) Ge go swanetše, batswadi ba ka hlalosetša bana ba bona megato yeo bona ba ilego ba e gata pele ba dira diphetho tše itšego. Ba ka ba ba dumelela bana ba bona go itirela diphetho gomme ba ba reta ge diphetho tšeo di atlega. Eupša go thwe’ng ge e ba ngwana a dira phetho e fošagetšego? Selo sa mathomo seo gantši motswadi a ka se dirago e ka ba go šireletša ngwana gore a se lebeletšane le ditlamorago tša phetho yeo, eupša ga se ka mehla go dira bjalo go tla holago ngwana. Ka mohlala, motswadi a ka dumelela ngwana go ba le lengwalo la go otlela. A re re mohlomongwe ngwana o tshela molao wa tsela gomme o a otlwa. Motswadi a ka mo lefelela kotlo yeo. Lega go le bjalo, ge e ba ngwana a ka swanelwa ke go šoma gore a lefe kotlo ya gagwe, gantši o tla ithuta go ikarabela ka ditiro tša gagwe.—Baroma 13:4.

19. Ke’ng seo re ka se rutago barutwana ba rena ba Beibele, gona re ka dira seo bjang?

¹⁹ Jesu o boditše balatedi ba gagwe gore ba rute ba bangwe. (Mat. 28:20) E nngwe ya dithuto tše bohlokwa kudu yeo re ka e rutago barutwana ba Beibele ke kamoo ba ka dirago diphetho tše di nepagetšego. Gore re dire seo ka katlego, re swanetše go phema go ba direla diphetho. Go kaone kudu go ba ruta kamoo ba ka neago mabaka ka melao ya motheo ya Beibele e le gore ba ka itirela phetho. Ge e le gabotse, “yo mongwe le yo mongwe wa rena o tla ikarabela go Modimo.” (Baroma 14:12) Ka gona, ka moka ga rena re na le lebaka le le kwagalago la go dira diphetho tšeo di tumišago Modimo.

[Mongwalo wa tlase]

O be o tla Araba Bjang?

• Ke ka baka la’ng re swanetše go ithuta kamoo re ka dirago diphetho?

• Poifo e ka re kgoma bjang, gona re ka fenya bjang dipoifo tšeo re nago le tšona?

• Ke megato efe e tshelelago yeo re ka e gatago go kgonthišetša gore re dira diphetho tšeo di tumišago Modimo?

[Dipotšišo tša Thuto]

[Box/​Picture on page 16]

Megato ya go Dira Diphetho tše di Nepagetšego

1 Phema go Ikgodiša

2 Dira Nyakišišo

3 Rapelela Bohlale

4 Dira Phetho

5 Diriša Phetho

6 Hlahloba Phetho Gomme o Dire Diphetogo

[Seswantšho go letlakala 15]

Motho wa pelopedi o swana le sekepe seo se tšewatšewago ke phefo lewatleng le le galefilego