«Ӕмбаргӕ адӕймаг... хъуыды кӕны йӕ къахдзӕфтыл» (ӔМБ. 14:15).

1, 2. а) Уынаффӕтӕ хӕсгӕйӕ алы хатт дӕр цӕуыл хъуамӕ хъуыды кӕнӕм? ӕ) Цавӕр фарстатӕ равзардзыстӕм?

 АЛЫ бон дӕр нӕ алчидӕр рахӕссы дуне уынаффӕтӕ. Уыцы уынаффӕтӕй бирӕтӕ ахсджиаг нӕ вӕййынц. Кӕцыдӕртӕ та вӕййынц ахсджиаг, уымӕн ӕмӕ нын нӕ цардыл тынг бандавынц. Фӕлӕ цыфӕнды уынаффӕ ма рахӕссӕм, ахсджиаг уа ӕви нӕ, хъуамӕ алыхатт дӕр хъуыды кӕнӕм, уымӕй Хуыцауӕн кад ӕрхӕсдзыстӕм ӕви нӕ. (Бакӕс 1 Коринфӕгтӕм 10:31.)

² Уынаффӕтӕ хӕссын дын ӕнцон вӕййы ӕви зын? Цӕмӕй фӕлтӕрдджын чырыстӕттыл нымад уӕм, уый тыххӕй хъуамӕ хорз ӕвзӕрӕй хицӕн кӕнын зонӕм ӕмӕ уынаффӕтӕ хӕссӕм искӕй зондӕй нӕ, фӕлӕ нӕхи зондӕй (Ром. 12:1, 2; Дзут. 5:14). Цӕмӕн ма хъуамӕ ахуыр кӕнӕм раст уынаффӕтӕ хӕссын? Иуӕй-иу хатт нын зын цӕмӕн вӕййы исты уынаффӕ рахӕссын? Куыд ис базонӕн, нӕ уынаффӕтӕ Хуыцауӕн кад хӕссынц ӕви нӕ?

Уынаффӕтӕ хӕссын цӕмӕн хъӕуы?

3. Цы нӕ хъуамӕ ма хъыгдара уынаффӕтӕ хӕссын?

³ Библийы закъӕттӕ ӕххӕстгӕнгӕйӕ фидар куы нӕ уӕм, уӕд не ’мкъласонтӕ кӕнӕ не ’мкусджытӕ хъуыды кӕндзысты, нӕ уырнындзинад лӕмӕгъ кӕй у ӕмӕ нӕ ӕнцонтӕй кӕй ис фӕрӕдийын кӕнӕн. Уыдон, гӕнӕн ис, уарзой сайын, хинӕй цӕуын ӕмӕ давын ӕмӕ нӕ хъавой сӕ «фӕдыл» акӕнын, ома, уыдон куыд кӕнынц, цӕмӕй мах дӕр афтӕ кӕнӕм кӕнӕ та сын сӕ хъуыддӕгтӕ сусӕг кӕнӕм (Рац. 23:2). Фӕлӕ, Хуыцауӕн кад чи хӕссы, ахӕм уынаффӕтӕ хӕссын чи зоны, уыцы адӕймаг никӕмӕй тӕрсы, стӕй искӕй зӕрдӕ ссарыны  тыххӕй дӕр Библийы уагӕвӕрдты сӕрты нӕ ахизы (Ром. 13:5).

4. Иннӕты нӕ бӕсты цӕмӕн фӕфӕнды уынаффӕтӕ хӕссын?

⁴ Кӕй зӕгъын ӕй хъӕуы, нӕ бӕсты уынаффӕтӕ чи рахӕссы, уыдоны се ’ппӕты не ’взӕр нӕ фӕфӕнды. Зӕгъӕм, не ’мбӕлттӕ нын, гӕнӕн ис, дзурой, цӕмӕй афтӕ кӕнӕ афтӕ бакӕнӕм. Стӕй кӕд нӕ ныййарджытимӕ нал цӕрӕм, уӕддӕр ныл мӕт кӕнынц ӕмӕ сӕ фӕфӕнды, цӕмӕй-иу исты уынаффӕтӕ хӕсгӕйӕ уыдонмӕ дӕр байхъусӕм. Цӕвиттонӕн ӕрхӕссӕн ис хос кӕныны фарста. Библи комкоммӕ зӕгъы, тугӕй кӕй хъуамӕ хизӕм нӕхи (Хъуыд. 15:28, 29). Фӕлӕ цавӕр мадзӕлттӕй ис хос кӕнӕн, уый тыххӕй дзы ницы ис фыст, уымӕ гӕсгӕ алы адӕймаг дӕр хъуамӕ йӕхӕдӕг хӕсса уынаффӕ, хос кӕныны мадзӕлттӕй кӕцы равзардзӕн, уый фӕдыл a. Чи зоны, ацы хъуыддаджы фӕдыл нӕ бинонтӕн ис сӕхи хъуыды. Фӕлӕ чырыстон «йӕхи хӕссинаг» хъуамӕ йӕхӕдӕг ахӕсса (Гал. 6:4, 5). Сӕйраг дӕр нын у, цӕмӕй нын сыгъдӕг цӕсгом уа адӕмы раз нӕ, фӕлӕ Хуыцауы раз (1 Тим. 1:5).

5. Цы нӕ хъӕуы аразын, цӕмӕй нӕ «уырнындзинады нау» ма ныппырх уа?

⁵ Ӕнӕныфсхаст куы уӕм, уӕд уый тынг тӕссаг у. Апостол Иаков фыста, ӕнӕныфсхаст адӕймаг «алы хъуыддаджы дӕр хӕцы дыууӕрдӕм», зӕгъгӕ (Иак. 1:8). Абухгӕ денджызы уылӕнтӕ ӕнӕ руль науы дыууӕрдӕм куыд фӕраппар-баппар кӕнынц, афтӕ ӕнӕныфсхаст адӕймаджы дӕр адӕмы зонд куы иуырдӕм аппары, куы – иннӕрдӕм. Ахӕм адӕймагӕн йӕ «уырнындзинады нау» ӕнцонтӕй ныппырх уыдзӕн ӕмӕ ма уый тыххӕй иннӕты дӕр аххосджын кӕндзӕн (1 Тим. 1:19). Фӕлӕ ныл цӕмӕй ахӕм хабар ма ӕрцӕуа, уый тыххӕй цы хъӕуы? Хъуамӕ «уырнындзинады ӕрфидар уӕм». (Бакӕс Колоссӕгтӕм 2:6, 7.) Уый тыххӕй та хъуамӕ сахуыр уӕм ахӕм уынаффӕтӕ хӕссын, цӕмӕй бӕрӕг уа, Хуыцауы Ныхасыл нӕ ныфс кӕй дарӕм (2 Тим. 3:14–17). Фӕлӕ нӕ цымӕ раст уынаффӕтӕ хӕссын цы фӕхъыгдары?

Уынаффӕтӕ хӕссын зын цӕмӕн вӕййы

6. Адӕймаг куы тӕрса, уӕд ӕй уый цӕмӕ ӕркӕндзӕн?

⁶ Адӕймаг куы тӕрса, зӕгъгӕ, раст уынаффӕ куы нӕ рахассон, мӕ пълӕнттӕй куы ницы рауайа кӕнӕ мӕхи иннӕты цӕсты куы бафтауон, уӕд йӕ ныфс ницӕмӕуал хӕсдзӕн. Ӕмӕ ахӕм адӕймаджы ис бамбарӕн. Никӕй фӕнды ӕвзӕр, зиан ын чи ӕрхӕсдзӕн ӕмӕ фӕсмон кӕуыл кӕндзӕн, ахӕм уынаффӕтӕ хӕссын. Фӕлӕ кӕд афтӕ дӕр рауайы, уӕддӕр, Хуыцауы кӕй уарзӕм ӕмӕ йын йӕ Ныхасӕн кӕй аргъ кӕнӕм, уый нын баххуыс кӕндзӕн, цӕмӕй къаддӕр тыхсӕм. Куыд? Хуыцауы кӕй уарзӕм, уымӕ гӕсгӕ-иу исты ахсджиаг уынаффӕ рахӕссыны размӕ алы хатт дӕр нӕ хъус ӕрдардзыстӕм Библимӕ ӕмӕ нӕ публикацитӕм. Афтӕ къаддӕр рӕдийдзыстӕм. Цӕмӕн? Уымӕн ӕмӕ Библийы фӕрцы «ӕвӕлтӕрд свӕййы уӕззаузонд, ӕрыгон бирӕ цыдӕртӕ базоны ӕмӕ хъуыды кӕнын сахуыр вӕййы» (Ӕмб. 1:4).

7. Паддзах Давидӕй цӕуыл ахуыр кӕнӕм?

⁷ Цымӕ нын алыхатт дӕр уайдзӕн раст уынаффӕтӕ хӕссын? Нӕ, уымӕн ӕмӕ нӕ иу дӕр ӕнӕрӕдийгӕ нӕу (Ром. 3:23). Зӕгъӕм, паддзах Давид уыди зондджын ӕмӕ Хуыцауыл иузӕрдион адӕймаг. Фӕлӕ-иу хаттӕй-хатт рахаста, йӕхицӕн дӕр ӕмӕ ма иннӕтӕн дӕр маст чи бавзарын кодта, ахӕм уынаффӕтӕ (2 Сам. 12:9–12). Фӕлӕ-иу йӕ рӕдыдтыты тыххӕй йӕ къухтӕ не ’руагъта – уӕддӕр-иу уынаффӕтӕ рахаста ӕмӕ йӕ Йегъовӕ йӕ хорзӕхӕй хайджын кодта (1 Пад. 15:4, 5). Кӕд мах дӕр рӕдийӕм, уӕддӕр ныфсджындӕр уыдзыстӕм, Давидау нӕ зӕрдыл куы дарӕм, Йегъовӕ нын нӕ рӕдыдтӕ кӕй ферох кӕны ӕмӕ нын нӕ тӕригъӕдтӕ кӕй ныххатыр кӕны. Йегъовӕйы чи уарзы ӕмӕ йӕм чи хъусы, уыдонӕн алы хатт дӕр ӕххуыс кӕндзӕн (Пс. 51:1–4, 7–10).

8. Бинонтӕ скӕныны хъуыддаджы фӕдыл апостол Павел цы загъта, уый нын цӕуыл дзурӕг у?

⁸ Нӕ бон ма у иу цыдӕр саразын, цӕмӕй нӕ уынаффӕты тыххӕй къаддӕр мӕт кӕнӕм. Цы? Арӕх уыцыиу уавӕры ӕрмӕст иухуызон кӕй нӕй бакӕнӕн, фӕлӕ цалдӕр хуызы, уый куы ӕмбарӕм, уӕд къаддӕр мӕт кӕндзыстӕм.  Ӕркӕсӕм-ма, апостол Павел бинонтӕ скӕныны тыххӕй цы ныффыста, уымӕ: «Кӕд искӕмӕ афтӕ кӕсы, ӕмӕ йӕ бон нӕу йӕ буары монцтыл хӕцын ӕмӕ йын хуыздӕр у бинонтӕ скӕнын, ӕмӕ кӕд ӕгӕр ӕрыгон нал у, уӕд бакӕнӕд, куыд ӕй фӕнды, афтӕ – тӕригъӕд нӕ ракӕндзӕн. Ахӕм адӕймӕгтӕ бинонтӕ скӕнӕнт. Фӕлӕ кӕд искӕмӕн йӕ бон у, ӕмӕ бинонтӕ ма скӕна, ӕмӕ йӕхиуыл йӕ бар цӕуы, ӕмӕ уымӕ гӕсгӕ йӕхицӕн загъта, зӕгъгӕ, ус нӕ ракурдзынӕн кӕнӕ мой не скӕндзынӕн, ӕмӕ кӕд йӕ фӕндыл фидар хӕцы, уӕд хорз кӕны» (1 Кор. 7:36–38). Павел загъта, адӕймаг ус куы нӕ ракура кӕнӕ куы нӕ смой кӕна, уӕд раст кӕй бакӕндзӕн, фӕлӕ ус куы ракура кӕнӕ куы смой кӕна, уӕд дӕр кӕй нӕ фӕрӕдидзӕн.

9. Уынаффӕтӕ хӕсгӕйӕ иннӕтыл дӕр хъуамӕ хъуыды кӕнӕм? Бамбарын ӕй кӕн.

⁹ Уынаффӕтӕ хӕсгӕйӕ, мыййаг, иннӕтыл дӕр хъуамӕ хъуыды кӕнӕм? О. Цӕвиттонӕн-ма ӕркӕсӕм, Павел мӕнгхуыцӕуттӕн хаст нывӕндтӕй хӕрыны тыххӕй цы загъта, уымӕ. Павел ныффыста, адӕймаг дзы куы бахордтаид, уӕд нӕ фӕрӕдыдаид, фӕлӕ уымӕй йӕ бон уыд, лӕмӕгъ чи уыд, уымӕн йӕ уырнындзинадӕн зиан ӕрхӕссын. Цымӕ Павел цы уынаффӕ рахаста? Уый загъта: «Кӕд хӕринаг ме ’фсымӕрӕн цӕлхдур у, уӕд дзидза цӕрӕнбонты дӕр нал бахӕрдзынӕн, цӕмӕй ме ’фсымӕрӕн цӕлхдур ма суон» (1 Кор. 8:4–13). Уӕдӕ мах дӕр хъуамӕ хъуыды кӕнӕм, цы уынаффӕтӕ рахӕссӕм, уыдон иннӕтыл куыд бандавдзысты, ууыл. Фӕлӕ сӕйраджыдӕр хъуамӕ хъуыды кӕнӕм, нӕ уынаффӕтӕ, Йегъовӕимӕ нын цы хӕлардзинад ис, ууыл куыд бандавдзысты. (Бакӕс Ромӕгтӕм 14:1–4.) Библийӕ нын цавӕр уагӕвӕрдтӕ баххуыс кӕндзысты, цӕмӕй, Хуыцауӕн кад чи хӕссы, ахӕм уынаффӕтӕ хӕссӕм?

Ӕхсӕз хъуыддаджы хорз уынаффӕтӕ хӕссынӕн

10, 11. а) Цы хъуамӕ аразӕм, цӕмӕй бинонты ’хсӕн нӕхиуыл ма фервӕссӕм? ӕ) Хистӕр нӕлгоймӕгтӕ уынаффӕтӕ куы фӕхӕссынц, уӕд сӕ зӕрдыл цы хъуамӕ дарой?

¹⁰ Нӕхиуыл-иу ма фервӕссӕм. Исты саразынмӕ-иу куы хъавӕм, уӕд-иу хорз уаид, нӕхимӕ-иу ахӕм фарста куы раттиккам: «Афтӕ бакӕныны бар мын ис?» Паддзах Соломон ныффыста: «Дӕхиуыл фервӕссыдтӕ? Уӕд фегад уыдзынӕ. Зонд та ис бонзонгӕтӕм» (Ӕмб. 11:2).

¹¹ Ныййарджытӕн сӕ бон у сӕ сывӕллӕттӕн уый бар дӕттын, цӕмӕй цавӕрдӕр уынаффӕтӕ сӕхӕдӕг хӕссой. Фӕлӕ сывӕллӕттӕ афтӕ хъуамӕ ма хъуыды кӕной, ӕмӕ сын алцы кӕныны бар ис (Кол. 3:20). Устытӕ ӕмӕ мадӕлтӕн хӕдзары ис цавӕрдӕр бартӕ, фӕлӕ хъуамӕ ма рох кӕной, хӕдзары хицау нӕлгоймаг кӕй у (Ӕмб. 1:8; 31:10–18; Еф. 5:23). Нӕлгоймӕгтӕ та хъуамӕ ӕмбарой, бартӕ иууылдӕр сӕ къухы кӕй не сты, уымӕн ӕмӕ сӕ сӕргъы Чырысти лӕууы (1 Кор. 11:3). Хистӕр нӕлгоймӕгтӕ цы уынаффӕтӕ рахӕссынц, уыдон ӕмбырдыл ӕнӕфӕзынгӕ нӕ фӕвӕййынц. Фӕлӕ хъуамӕ архайой, цӕмӕй, «фыст цы у, уый сӕрты ма хизой» (1 Кор. 4:6). Хистӕр нӕлгоймӕгтӕ ма лӕмбынӕг феххӕст кӕнынц, ӕууӕнкджын цагъарӕй цы амындтӕ райсынц, уыдон дӕр (Матф. 24:45–47). Мах нӕхи дӕр ӕмӕ иннӕты дӕр бирӕ мӕстытӕй бахиздзытӕм, уынаффӕтӕ бонзонгӕйӕ куы хӕссӕм, ӕрмӕстдӕр уӕд.

12. а) Алцыдӕр-иу цӕмӕн хъуамӕ сбӕлвырд кӕнӕм? ӕ) Уый куыд ис саразӕн?

¹² Алцыдӕр-иу сбӕлвырд кӕнӕм. «Алцыдӕр бӕстон чи кӕны, уымӕн йӕ фӕндтӕй ис  пайда, тагъд чи кӕны, уымӕн та йӕ фӕстаг цӕуы мӕгуырмӕ»,– ныффыста Соломон (Ӕмб. 21:5). Мыййаг, дӕ зӕрдӕйы исты бизнес райдайын ис? Кӕд о, уӕд тагъд ма кӕн. Алцыдӕр лӕмбынӕг развар. Ахӕм хабӕрттӕ хорз чи зоны, уыцы адӕймаджы бафӕрс ӕмӕ Библийы уагӕвӕрдтыл ахъуыды кӕн (Ӕмб. 20:18). Дыууӕ сыфы райс, ӕмӕ дзы иуыл ныффысс, хорзӕй дзы цы ис, уыдӕттӕ, иннӕйыл та, ӕвзӕрӕй дзы цы ис, уыдӕттӕ. Цалынмӕ исты уынаффӕ нӕ рахӕссай, уӕдмӕ «цас бахъӕудзӕн, уый... банымай» (Лук. 14:28). Стӕй-иу ахъуыды кӕн, уыцы бизнесыл цас ӕхца бахардз кӕнын хъӕудзӕн ӕрмӕст ууыл нӕ, фӕлӕ ма дӕ уырнындзинадыл куыд фӕзындзӕн, ууыл дӕр. Хъуыддаг сбӕлвырд кӕнынӕн та хъӕуы рӕстӕг ӕмӕ хъарутӕ. Афтӕмӕй уынаффӕ талф-тулфӕй нӕ рахӕсдзынӕ, ӕмӕ уый фӕстӕ фӕсмон ницӕуыл кӕндзынӕ.

13. а) Иаковы 1:5 нын зӕрдӕ цӕмӕй ӕвӕры? ӕ) Хуыцауӕй зонд куы курӕм, уӕд нын уый куыд баххуыс кӕндзӕн?

¹³ Хуыцауӕй зонд курӕм. Нӕ уынаффӕтӕ Хуыцауӕн кад ӕрмӕстдӕр уӕд ӕрхӕсдзысты, ӕмӕ дзы ӕххуыс куы курӕм. Ахуыргӕнинаг Иаков фыста: «Уӕдӕ уӕ кӕд искӕмӕ зонд фаг нӕй, уӕд курӕд Хуыцауӕй,– уымӕн ӕмӕ уый алкӕмӕн дӕр дӕтты рӕдауӕй ӕмӕ ӕнӕ уайдзӕфӕй,– ӕмӕ йын ӕнӕратгӕ нӕ фӕуыдзӕн» (Иак. 1:5). Уынаффӕтӕ хӕсгӕйӕ Хуыцауӕй зонд куы курӕм, уӕд уым худинагӕй ницы ис (Ӕмб. 3:5, 6). Уымӕн ӕмӕ, ӕрмӕстдӕр нӕхи зондӕй куы архайӕм, уӕд нӕ уый хорзӕй ницӕмӕ ӕркӕндзӕн. Хуыцауӕй зонд куы фӕкурӕм ӕмӕ уынаффӕтӕ Библийы куы фӕагурӕм, уӕд сыгъдӕг тыхӕн уый бар фӕдӕттӕм, цӕмӕй-иу нын нӕ зӕрдӕйы ӕцӕг фӕндтӕ раргом кӕна (Дзут. 4:12; бакӕс Иаковы 1:22–25).

14. Хъуыддаг-иу цӕуылнӕ хъуамӕ раргъӕв-баргъӕв кӕнӕм?

¹⁴ Уынаффӕ-иу рахӕссӕм. Тагъд-иу ма кӕн, цалынмӕ алцыдӕр не сбӕлвырд кӕнай ӕмӕ Хуыцауӕй зонд нӕ ракурай, уӕдмӕ. Зондджын адӕймаг алы хатт дӕр рӕстӕг рахицӕн кӕны, цӕмӕй «йӕ къахдзӕфтыл» ахъуыды кӕна (Ӕмб. 14:15). Фӕлӕ-иу хъуыддаг хъуамӕ ма раргъӕв-баргъӕв кӕна. Афтӕ чи фӕкӕны, уый алыхуызон ӕфсӕнттӕ фӕагуры, цӕмӕй уынаффӕ ма рахӕсса (Ӕмб. 22:13). Фӕлӕ уӕддӕр афтӕмӕй уынаффӕ рахӕссы – иннӕтӕн уый бар ратты, цӕмӕй йын зондамонджытӕ уой.

15, 16. Цы уынаффӕ рахастам, уый цӕмӕй нӕ къухы бафта, уымӕн цы хъӕуы?

¹⁵ Нӕ уынаффӕтӕм гӕсгӕ-иу архайӕм. Хорз уынаффӕ рахӕссыныл нын цы хъарутӕ ацыд, уыдон уыдзысты дзӕгъӕлы, уыцы уынаффӕмӕ гӕсгӕ куы нӕ архайӕм, уӕд. «Цыфӕнды ма аразай, араз ӕй ӕппӕт хъарутӕй»,– ныффыста Соломон (Еккл. 9:10). Цӕмӕй нӕ фӕнд нӕ къухы бафта, уый тыххӕй хъӕуы лӕмбынӕг ахъуыды кӕнын, нӕ фӕндтӕ сӕххӕст кӕнынӕн нӕ цы бахъӕудзӕн, ууыл. Дзырдӕн, хъусынгӕнӕджы фӕнды, цӕмӕй пионерӕй лӕггад кӕнын райдайа. Исты йын рауайдзӕн? О, кӕд ӕй уацамындӕн цы рӕстӕг ӕмӕ цы хъарутӕ хъӕуы, уый йӕ куыстыл ӕмӕ ирхӕфсӕнтыл нӕ хардз кӕна, уӕд.

 ¹⁶ Цы хорз уынаффӕтӕ рахӕссӕм, уыдонмӕ гӕсгӕ нын арӕх ӕнцон нӕ вӕййы архайын. Цӕуылнӕ? Уымӕн ӕмӕ «ӕгас дуне... ис Фыдбылызы къухы» (1 Иоан. 5:19). Стӕй нӕ хъӕуы тох кӕнын «ацы талынг дунейы хицӕутты ныхмӕ, уӕлӕрвты чи ис, уыцы фыдгӕнӕг тыхты ныхмӕ» (Еф. 6:12). Апостол Павел дӕр ӕмӕ ахуыргӕнинаг Иудӕ дӕр фыстой, Хуыцауы кадджын кӕнын кӕй фӕнды, уыдоны кӕй хъӕуы ӕппӕт тыхтӕй тох кӕнын (1 Тим. 6:12; Иуд. 3).

17. Нӕ уынаффӕты тыххӕй Йегъовӕйы цы фӕнды?

¹⁷ Нӕ уынаффӕйыл-иу ахъуыды кӕнӕм ӕмӕ куы хъӕуа, уӕд-иу ӕй фӕивӕм. Уынаффӕ куы рахӕссӕм, уӕд хабар алы хатт, мах куыд фӕфӕнды, афтӕ нӕ рауайы, уымӕн ӕмӕ, «кӕд кӕуыл цы ’рцӕудзӕн, уымӕн ничи ницы зоны» (Еккл. 9:11). Фӕлӕ уӕддӕр Йегъовӕйы фӕнды, цӕмӕй нӕ уынаффӕтӕй кӕцыдӕртӕ макуы фӕивӕм, кӕд зындзинӕдтыл сӕмбӕлӕм, уӕддӕр. Адӕймаг йӕхи Йегъовӕйӕн куы снывонд кӕны кӕнӕ йӕ цард искӕимӕ куы баиу кӕны, уӕд уымӕн аивӕн нал вӕййы. Хуыцауы фӕнды, цӕмӕй, цы дзырд радтам, уый ӕххӕст кӕнӕм. (Бакӕс Псалом 15:1, 2, 4.) Фӕлӕ, кӕй зӕгъын ӕй хъӕуы, цы уынаффӕтӕ рахӕссӕм, уыдонӕй бирӕтӕ афтӕ ахсджиаг нӕ вӕййынц. Зондджын адӕймаг-иу рӕстӕгӕй-рӕстӕгмӕ йӕ уынаффӕтыл ахъуыды кӕндзӕн. Ӕмӕ йӕ сӕрбӕрзонддзинадӕн уый бар нӕ ратдзӕн, цӕмӕй йӕ уынаффӕтӕ ма фӕива кӕнӕ бынтон ӕндӕр уынаффӕтӕ ма рахӕсса (Ӕмб. 16:18). Фӕлӕ сӕйраджыдӕр хъуыды кӕны, цӕмӕй йӕ хъуыддӕгтӕ Хуыцауӕн кад хӕссой.

Иннӕты ахуыр кӕн, Хуыцауӕн кад чи хӕссы, ахӕм уынаффӕтӕ хӕссын

18. Ныййарджыты бон куыд у сӕ сывӕллӕтты ахуыр кӕнын раст уынаффӕтӕ хӕссын?

¹⁸ Ныййарджытӕн сӕ бон у сӕ сывӕллӕттӕн баххуыс кӕнын, цӕмӕй, Хуыцауӕн кад чи хӕссы, ахӕм уынаффӕтӕ хӕссой. Ӕмӕ сын сӕхӕдӕг фӕзминаг куы уой, уӕд сын уымӕй хуыздӕр ницы уыдзӕн (Лук. 6:40). Куы хъӕуа, уӕд сӕ бон у сӕ сывӕллӕттӕн бамбарын кӕнын, сӕхӕдӕг цавӕрдӕр уынаффӕтӕ куыд рахастой, уый. Хъуамӕ ма сывӕллӕттӕн бар дӕттой, цӕмӕй-иу уыдон дӕр исты уынаффӕтӕ рахӕссой ӕмӕ-иу сӕ раппӕлой, сӕ фӕнд сӕ къухы куы бафта, уӕд. Фӕлӕ сывӕллон исты ӕвзӕр уынаффӕ куы рахӕсса, уӕд та? Ныййарӕджы алкӕддӕр фӕфӕнды йӕ сывӕллоны бахъахъхъӕнын, цӕмӕй мацы фыдбылызы бахауа, фӕлӕ уый алы хатт сывӕллонӕн пайда не ’рхӕссы. Цӕвиттонӕн ӕрхӕссӕм ахӕм хъуыддаг. Ныййарӕг йӕ сыввӕллонӕн бар радта, цӕмӕй шофыры гӕххӕт райса. Фӕлӕ сывӕллон фӕндагыл цӕуыны уагӕвӕрдтӕй кӕцыдӕр фехӕлдта, ӕмӕ йын штраф фидын кӕнынц. Кӕй зӕгъын ӕй хъӕуы, ныййарӕгӕн йӕ бон у уыцы штраф бафидын, фӕлӕ хуыздӕр уыдзӕн, сывӕллонӕн йӕхи куы бакусын кӕна, цӕмӕй уыцы штраф йӕхӕдӕг бафида. Афтӕмӕй сахуыр уыдзӕн йӕ хъуыддӕгты тыххӕй дзуапп дӕттын (Ром. 13:4).

19. Нӕ ахуыргӕнинӕгты цӕуыл хъуамӕ ахуыр кӕнӕм ӕмӕ уый нӕ бон куыд у аразын?

¹⁹ Йесо йӕ фӕдылдзӕуджытӕн бафӕдзӕхста, цӕмӕй адӕмы ахуыр кӕной (Матф. 28:20). Нӕ ахуыргӕнинӕгты хъуамӕ сӕйраджыдӕр сахуыр кӕнӕм раст уынаффӕтӕ хӕссын. Ӕмӕ сын цӕмӕй уыцы хъуыддаг хорз уайа, уый тыххӕй сын нӕхӕдӕг нӕ амондзыстӕм, мӕнӕ афтӕ ӕмӕ афтӕ бакӕн, зӕгъгӕ. Бирӕ хуыздӕр у, цӕмӕй сӕ сахуыр кӕнӕм Библийы уагӕвӕрдтыл хъуыды кӕнын, цӕмӕй-иу сӕхӕдӕг аскъуыддзаг кӕной, куыд бакӕндзысты, уый. Алчидӕр нӕ «Хуыцауы раз дзуапп ратдзӕн йӕхи тыххӕй» (Ром. 14:12). Не ’ппӕты дӕр тынг фӕнды, цӕмӕй, Хуыцауӕн кад чи хӕссы, ахӕм уынаффӕтӕ хӕссӕм.

[Фиппаинаг]

Цавӕр дзуапп ратдзынӕ?

• Цӕмӕн хъуамӕ ахуыр кӕнӕм уынаффӕтӕ хӕссын?

• Адӕймаг куы тӕрса, уӕд ӕй уый цӕмӕ ӕркӕндзӕн ӕмӕ цӕмӕй ма тӕрсӕм, уый тыххӕй цы ис саразӕн?

• Цавӕр ӕхсӕз хъуыддаджы нын баххуыс кӕндзысты, цӕмӕй, Хуыцауӕн кад чи хӕссы, ахӕм уынаффӕ хӕссӕм?

[Фарстатӕ ахуыр кӕнынӕн]

[Рамкӕ/Ныв 16 фарсыл]

Куыд ис раст уынаффӕтӕ хӕссӕн

1 Нӕхиуыл-иу ма фервӕссӕм

2 Алцыдӕр-иу сбӕлвырд кӕнӕм

3 Хуыцауӕй зонд курӕм

4 Уынаффӕ-иу рахӕссӕм

5 Нӕ уынаффӕтӕм гӕсгӕ-иу архайӕм

6 Нӕ уынаффӕйыл-иу ахъуыды кӕнӕм ӕмӕ куы хъӕуа, уӕд-иу ӕй фӕивӕм

[Ныв 15 фарсыл]

Ӕнӕныфсхаст адӕймаг у ӕнӕ руль науы хуызӕн