“E hòmber prudente ta wak bon unda e ta bai.”​—PRO. 14:15.

1, 2. (a) Kiko mester ta nos interes primordial ora di tuma desishon? (b) Ki preguntanan nos lo konsiderá?

TUR dia nos ta haña nos ta tuma vários desishon. Hopi di nan no tin konsekuensia duradero. Pero algun desishon por tin un efekto profundo riba nos bida. Sea ku nos ta tuma desishon grandi òf chikitu, nos interes primordial ta pa onra Dios.​—Lesa 1 Korintionan 10:31.

² Abo ta haña ku ta fásil pa tuma desishon? Òf esaki ta un reto pa bo? Si nos ke bira kristiannan maduro, nos tin ku siña distinguí loke ta bon for di loke ta malu i despues tuma desishon ku ta reflehá nos konvikshonnan i no esnan di otro hende. (Rom. 12:​1, 2; Heb. 5:14) Ki otro motibunan importante nos tin pa siña tuma bon desishon? Dikon tin biaha ta asina difísil pa tuma bon desishon? I ki pasonan nos tin ku dal pa hasi sigur ku nos desishonnan ta onra Dios?

Dikon Nos Tin ku Tuma Desishon?

3. Kiko nos mester evitá ora di tuma desishon?

³ Si nos ta indesiso ora ta trata di normanan bíbliko, nos kompañeronan di skol òf koleganan di trabou por konkluí ku nos no ta realmente konvensí di loke nos ta kere i ku nan por influensiá nos fásilmente. Por ehèmpel, nan por gaña òf hòrta i despues  purba konvensé nos pa “sigui e mayoria,” esta, pa hasi meskos ku nan òf kisas yuda tapa nan maldat. (Eks. 23:2) Sinembargo, un hende ku sa kon pa tuma desishon ku ta onra Dios lo no permití miedu òf deseo pa haña aseptashon di otronan pon’é bai kontra su konsenshi bíblikamente entrená.​—Rom. 13:5.

4. Dikon algun hende kisas ke tuma desishon pa nos?

⁴ No ta tur hende ku ke tuma desishon pa nos ke nos malu. Amigunan ku tin bon intenshon kisas ta insistí pa nos sigui nan konseho. Nos famia probablemente ainda ta interesá den nos bienestar aunke nos no ta biba den kas di nos mayornan mas. P’esei, kisas nan ta sinti ku nan tambe tin algu di bisa ora nos tin ku tuma desishonnan importante. Konsiderá por ehèmpel e asuntu di tratamentu médiko. Beibel klaramente ta kondená mal uso di sanger. (Echo. 15:​28, 29) Ma no ta tur kos relashoná ku tratamentu médiko ta klaramente definí den Beibel. P’esei den sierto kaso, kada persona tin ku disidí ki tratamentu e ta aseptá òf rechasá. * Nos sernan kerí kisas tin nan opinion firme riba e asuntunan akí. Sinembargo, kada kristian dediká i batisá tin ku “karga” su mes responsabilidat. (Gal. 6:​4, 5) Nos preokupashon prinsipal ta pa mantené un bon konsenshi dilanti di Dios i no pa komplasé hende.​—1 Tim. 1:5.

5. Kon nos por evitá ku nos fe ta noufragá?

⁵ Si nos ta personanan indesiso, nos por eksponé nos mes na hopi peliger. Disipel Santiago a bisa ku un hende indesiso ta “inkonstante den tur su kamindanan.” (Sant. 1:8) Dikon? Pasobra meskos ku un hòmber den un boto sin timon den laman brutu ta ser tirá p’aki i p’aya pa e olanan, un hende indesiso ta bai tras di tur tipo di opinion. Ta fásil pa un persona asina ‘noufragá enkuanto su fe’ i kulpa otronan pa e konsekuensianan lamentabel ku esei por trese kuné. (1 Tim. 1:19) Kon nos por evitá ku esei ta sosodé ku nos? Nos tin ku bira ‘establesí den nos fe.’ (Lesa Kolosensenan 2:​6 i 7.) Pa nos por ta hende stabil, nos tin ku siña tuma desishon ku ta reflehá nos fe den Dios su Palabra inspirá. (2 Tim. 3:​14-17) Pero kiko por stroba nos di tuma bon desishon?

Dikon Por Ta Difísil pa Tuma Desishon?

6. Ki efekto miedu por tin riba nos?

⁶ Miedu por paralisá nos—miedu di tuma desishon robes, miedu di faya òf miedu di parse bobo den bista di otro hende. Ta di komprondé ku nos por tin e preokupashonnan ei. Ningun hende no ke tuma mal desishon ku por kousa problema i kisas pone nan pasa bèrgwensa. Amor pa Dios i pa su Palabra por yuda nos vense miedu. Kon asina? E amor ku nos tin pa Dios lo motivá nos pa semper konsultá su Palabra i publikashonnan basá riba Beibel promé ku nos tuma desishonnan importante. Asina nos lo kometé ménos fayo. Dikon? Debí ku Beibel por “siña e hende, ku no tin eksperensia den kosnan di bida, konosé bida. Esun hóben ta haña konosementu i ta siña kon skohe bon kaminda.”​—Pro. 1:4, BPK.

7. Kiko nos por siña for di Rei David su ehèmpel?

⁷ Pero semper nos lo tuma desishon korekto? Nò. Nos tur ta kometé fayo. (Rom. 3:23) Rei David, por ehèmpel, tabata un hòmber sabí i fiel. Apesar di esei, tabatin biaha ku el a tuma mal desishon ku a kousa sufrimentu pa su mes i pa otronan. (2 Sam. 12:​9-12) Sinembargo, David no a laga su fayonan strob’é di tuma desishon ku ta agradá Dios. (1 Rei. 15:​4, 5) Meskos ku David, nos por tuma desishon korekto apesar di fayonan ku nos a kometé den pasado ora nos kòrda ku Yehova lo pasa por alto di esakinan i pordoná nos pikánan. Yehova lo sigui sostené esnan ku ta stim’é i obedes’é.​—Sal. 51:​1-4, 7-10.

8. Kiko nos ta siña for di apòstel Pablo su komentario relashoná ku matrimonio?

 ⁸ Nos por redusí e ansiedat ku nos ta sinti ora di tuma desishon. Kon nos por hasi esei? Nos mester realisá ku tin biaha tin vários opshon ku ta bon. Konsiderá, por ehèmpel, e rasonamentu ku apòstel Pablo a usa relashoná ku matrimonio. El a skirbi bou di inspirashon: “Ma mi ta bisa e solteronan i e biudanan, ku ta bon pa nan, si nan keda manera ami. Ma si nan no tin dominio propio, laga nan kasa; pasobra ta mihó kasa ku kima di pashon.” (1 Kor. 7:​8, 9) Pablo a rekomendá ku ta mihó pa un hende keda soltero, pero no ku esei tabata e úniko opshon korekto.

9 Nos mester ta preokupá kon otro hende ta mira e desishonnan ku nos ta tuma? Splika.

⁹ Nos mester ta preokupá kon otro hende ta mira e desishonnan ku nos ta tuma? Sí, te na sierto grado. Tuma nota di loke Pablo a bisa relashoná ku komementu di kuminda ku aparentemente tabata sakrifiká na ídolonan. Loke el a bisa ta indiká ku un desishon riba su mes kisas no ta malu pero e por molestia e konsenshi débil di un otro ruman. I kiko tabata Pablo su desishon? El a skirbi: “Si kuminda ta hasi mi ruman trompeká, lo mi no kome karni nunka mas, pa mi no hasi mi ruman trompeká.” (1 Kor. 8:​4-13) Nos tambe mester tene kuenta ku konsenshi di otro hende ora nos ta tuma desishon. Pero nos preokupashon prinsipal mester ta ki efekto nos desishon tin riba nos amistat ku Yehova. (Lesa Romanonan 14:​1-4.) Ki prinsipionan bíbliko lo yuda nos tuma desishon ku ta onra Dios?

Seis Paso pa Tuma Bon Desishon

10, 11. (a) Den famia, kon nos por evitá di tuma libertatnan ku no ta toka nos? (b) Kiko ansianonan mester tene na mente ora nan tin ku tuma desishon ku tin efekto riba e kongregashon?

¹⁰ Evitá di tuma libertat. Promé ku nos disidí di hasi algu, nos tin ku puntra nos mes: ‘Mi ta outorisá pa tuma e desishon akí?’ Rei Salomon a skirbi: “Ora ku orguyo [“arogansia,” NW] bini, desonor tambe ta bini, ma sabiduria ta serka e humildenan.”​—Pro. 11:2.

¹¹ Por ehèmpel, mayornan por permití nan yunan tuma sierto desishonnan, pero esei no ta duna e yunan derecho di hasi i deshasí. (Kol. 3:20) Esposa- i mamanan tin un grado di outoridat denter di e famia, pero nan mester rekonosé ku ta e esposo ta kabes di famia. (Pro. 1:8; 31:​10-18; Efe. 5:23) Esposonan tambe mester rekonosé ku nan outoridat ta limitá i ku ta Kristu ta nan kabes. (1 Kor. 11:3) Ansianonan ta tuma desishon ku tin efekto riba e kongregashon, pero nan tin ku sòru pa “no bai mas ayá di e kosnan skirbí” den e Palabra di Dios. (1 Kor. 4:6, NW) Ademas, nan tin ku pega na e instrukshonnan ku nan ta risibí di e esklabo fiel. (Mat. 24:​45-47) Sí, nos por evitá hopi ansiedat i amargura pa nos mes i pa otronan si nos ta modesto i ta tuma solamente e desishonnan ku nos ta outorisá pa tuma.

12. (a) Dikon nos tin ku hasi investigashon? (b) Splika kon un hende por hasi tal investigashon.

 ¹² Hasi investigashon. Salomon a skirbi: “E plannan di hende balente siguramente ta kondusí na abundansia, ma tur esnan ku tin purá, siguramente ta resultá den pobresa.” (Pro. 21:5) Por ehèmpel, bo tin pensá di hasi un fiansa ku e idea di kuminsá un negoshi? No laga bo emoshonnan dominá bo. Buska tur informashon relevante, buska konseho serka esnan ku tin eksperensia riba e tereno ei i wak ki prinsipio bíbliko ta importante pa tene kuenta kuné. (Pro. 20:18) Despues di esei, ta bon pa traha dos lista: un lista ku e benefisionan i un lista ku e obligashonnan. Anto promé ku bo tuma un desishon, “kalkulá e gastunan.” (Luk. 14:28) Konsiderá ki efekto bo desishon lo tin riba bo situashon finansiero i tambe riba bo relashon ku Yehova. Ta sierto ku ta tuma tempu i esfuerso pa hasi investigashon i pa analisá tur faktor, pero di e manera ei bo ta evitá di tuma un desishon muchu purá ku por kousa ansiedat i otro problema despues.

13. (a) Ki siguransa Santiago 1:5 ta duna nos? (b) Ora nos pidi Dios sabiduria, kon esei por yuda nos?

¹³ Pidi Dios sabiduria. Pa nos desishonnan onra Dios, nos tin ku pidié yuda nos. Disipel Santiago a skirbi: “Si kualke di boso falta sabiduria, lag’é pidi Dios, kende ta duna na tur hende generosamente i sin reproche, i esaki lo wòrdu duná na dje.” (Sant. 1:5) No ta un bèrgwensa pa rekonosé ku nos tin mester di sabiduria di Dios pa yuda nos tuma desishon korekto. (Pro. 3:​5, 6) Al fin i al kabo, si nos keda dependé riba nos propio komprondementu, fásilmente nos por tuma desishon robes. Ora nos hasi orashon pidi Dios sabiduria i analisá e prinsipionan bíbliko tras di un asuntu, su spiritu santu ta yuda nos diserní kiko berdaderamente ta motivá nos pa tuma sierto desishon.​—Heb. 4:12; lesa Santiago 1:​22-25.

14. Dikon nos no mester tarda pa tuma desishon?

¹⁴ Tuma e desishon. No kore tuma desishon promé ku bo hasi investigashon i resa pidi Dios pa sabiduria. Un hende prudente ta “wak bon unda e ta bai.” (Pro. 14:15) Di otro banda, no tarda pa tuma desishon. Un hende ku ta hasi esei ta buska èksküs pa no tuma akshon. (Pro. 22:13) Pero tòg el a tuma un desishon; el a laga otro hende kontrolá su bida.

15, 16. Kiko nos tin ku hasi pa kumpli ku nos desishon?

¹⁵ Kumpli ku bo desishon. E esfuerso ku nos ta hasi pa tuma un bon desishon lo ta en bano si nos no ta desididu pa tuma akshon. Salomon a skirbi: “Tur loke bo man haña pa hasi, hasié ku tur bo forsa.” (Ekl. 9:10) Si nos ke tin éksito, nos mester ta dispuesto pa hasi  tur loke ta nesesario pa logra nos meta. Por ehèmpel, un publikadó di kongregashon por disidí ku e ke traha komo pionero. Si e ke logra esei, e no tin ku dediká demasiado tempu na trabou i rekreo, pasobra esakinan lo kaba ku tur su energia i kita e tempu ku e tin mester pa kumpli ku su ministerio.

¹⁶ Hopi biaha, e mihó desishonnan ta esnan di mas difísil pa kumpli kuné. Dikon? Pasobra “henter mundu ta bou di kontròl di e malbado.” (1 Juan 5:19) Nos tin un lucha tenas kontra “e forsanan mundial di e skuridat akí, kontra e forsanan spiritual di maldat den e lugánan selestial.” (Efe. 6:12) Tantu apòstel Pablo komo disipel Hudas a mustra ku kristiannan ku ke onra Dios tin un lucha formal.​—1 Tim. 6:12; Hudas 3.

17. Unabes ku nos a tuma un desishon, kiko Yehova ta ferwagt di nos?

¹⁷ Analisá bo desishon i hasi kualke ahuste nesesario. Debí ku nos no sa kiko futuro ta trese kuné, tin biaha kosnan no ta bai manera nos a plania. (Sant. 4:​13, 14) Apesar di esei, Yehova ta ferwagt ku nos lo pega na sierto desishonnan ku nos a tuma aunke esei por kousa difikultat. Por ehèmpel, e desishon ku un kristian a tuma pa dediká su mes na Yehova òf pa kasa ta definitivo. Yehova ta ferwagt ku nos lo kumpli ku loke nos a primintí. (Lesa Salmo 15:​1, 2 i 4.) Pero mayoria di desishon ku nos tuma no tin asina tantu peso. Kada tantu tempu un hende sabí lo analisá e desishonnan ku el a tuma. Lo e no laga orguyo òf terkedat strob’é di ahustá un desishon òf hasi kualke kambio nesesario. (Pro. 16:18) Loke ta mas importante p’e ta pa hasi sigur ku su akshonnan ta sigui duna onor na Dios.

Siña Otro Hende Tuma Desishon Ku Ta Onra Dios

18. Kon mayornan por siña nan yunan pa tuma bon desishon?

¹⁸ Tin hopi kos ku mayornan por hasi pa siña nan yunan tuma desishon ku ta onra Dios. E mihó manera ku nan por hasi esei ta pa medio di nan bon ehèmpel. (Luk. 6:40) Mayornan por splika nan yunan kiko nan mes a hasi pa tuma sierto desishon. Kisas nan por laga nan yunan mes tuma algun desishon i elogiá nan ora e desishonnan ei duna bon resultado. Pero kiko si e mucha tuma un desishon robes? E promé inklinashon di un mayor kisas ta pa protehá e yu di e konsekuensianan di su mal desishon. Ma esei no semper ta na bienestar di e yu. Por ehèmpel, un mayor por laga su yu siña stür pa haña reibeweis. Imaginá ku e yu violá un regla di tráfiko i haña un but. E mayor por disidí di paga e but. Pero, si e laga e yu mes traha pa paga e but probablemente e yu lo siña ku e tin ku karga responsabilidat pa su akshonnan.​—Rom. 13:4.

19. Kiko nos tin ku siña studiantenan di Beibel, i kon nos por hasi esei?

¹⁹ Hesus a bisa su siguidónan pa siña otro hende e kaminda di e bèrdat. (Mat. 28:20) Un di e kosnan mas importante ku nos por siña studiantenan di Beibel ta kon pa tuma bon desishon. Si nos ke hasi esei na un manera efikas, nos tin ku resistí e inklinashon di bisa nan kiko nan tin ku hasi. Ta mas mihó pa siña nan rasoná a base di prinsipionan bíbliko pa asina nan por tuma nan mes desishon. Al fin i al kabo, “kada un di nos lo duna kuenta di su mes na Dios.” (Rom. 14:12) P’esei, nos tur tin bon motibu pa tuma desishon ku ta onra Dios.

[Nota]

Kon Lo Bo Kontestá?

• Dikon nos tin ku siña kon pa tuma desishon?

• Ki efekto miedu por tin riba nos, i kon nos por vense miedu?

• Ki seis paso nos tin ku dal pa hasi sigur ku nos desishonnan ta onra Dios?

[Preguntanan di Estudio]

[Kuadro/​Plachi na página 20]

Seis Paso pa Tuma Bon Desishon

1 Evitá di Tuma Libertat

2 Hasi Investigashon

3 Pidi Dios Sabiduria

4 Tuma e Desishon

5 Kumpli ku Bo Desishon

6 Analisá i Hasi Ahuste

[Plachi na página 19]

Un hende indesiso ta manera un hòmber den un boto sin timon den laman brutu