Moak soone Entscheidungen, waut Gott ieren
Moak soone Entscheidungen, waut Gott ieren
“Een vestendja Maun bedenkjt sikj siene Wäaj” (SPR. 14:15, PB)
1-2. (a) Waut sull bie ons daut wichtichste sennen, bie aul daut, waut wie entscheiden? (b) Waut woa wie nu seenen?
WIE motten jieda Dach välet entscheiden. Eenjet von daut, waut wie entscheiden, es veleicht nich sea wichtich. Oba wada aundret es sea wichtich un kaun väl aun ons Läwen doonen. Oba bie aul onse Entscheidungen, endoont aus daut nu kjliene ooda groote sent, es daut wichtichste emma, daut wie doamet Gott ieren (läs 1. Korinta 10:31).
2 Es daut fa die leicht, eene Entscheidunk to moaken ooda es die daut schwoa? Om goode Frind to sennen met Jehova mott wie daut lieren, tweschen rajcht un orrajcht to unjascheeden. Un onse Entscheidungen motten sikj opp daut stetten, waut wie jleewen, un nich opp daut, waut aundre sajen (Reem. 12:1-2; Heb. 5:14). Wuarom es daut noch wichtich to lieren, goode Entscheidungen to moaken? Wuarom es daut eenjemol soo schwoa? Un waut kjenn wie doonen toom soone Entscheidungen moaken, waut Gott ieren?
Wuarom mott wie Entscheidungen moaken?
3. Waut sell wie nich tooloten, wan wie Entscheidungen moaken?
3 Wan wie twiewlen, daut to doonen, waut de Schreft sajcht, dan kjennen onse Schoolpoatna ooda Oabeitspoatna denkjen, daut wie nich werkjlich aun de Schreft jleewen un daut see ons leicht äwaräden kjennen. Dee doonen veleicht lieejen, sent onopprechtich ooda stälen un wellen ons met äare “Grupp metrieten”, daut wie daut uk doonen ooda oppet weinichste daut plietsch hoolen, waut see doonen (2. Mo. 23:2, PB). Oba wan wie weeten, woo wie Gott met onse Entscheidungen ieren kjennen, dan woa wie nich ut Angst waut doonen, waut wie weeten, waut orrajcht es. Un wie woaren ons uk nich von aundre doatoo äwaräden loten (Reem. 13:5).
4. Wuarom wellen aundre veleicht fa ons Entscheidungen moaken?
4 Nich aule, waut wellen fa ons entscheiden, meenen daut schlemm. Mau rajcht onse Frind, wellen ons veleicht utem gooden Senn bat doa brinjen, daut wie äaren Rot nokomen. Un wan wie nich mea tus wonen, dan moakt ons Frintschoft sikj veleicht noch sorjen äwa ons un dee denkjen veleicht, daut dee doa motten met en sennen, wan wie wichtje Entscheidungen moaken. Daut kunn biejlikj sennen, wan daut om Doktarie jeit. De Schreft sajcht dietlich, daut wie nich sellen Bloot aunnämen (Apj.15:28-29). Oba bie aundre Doktarieen sajcht de Schreft nich krakjt, waut wie doonen sellen. Jieda eena von ons mott daut goot äwalajen un selfst eene Entscheidunk moaken. Ons Frintschoft well ons oba veleicht to eene jewesse Doktarie beräden, waut see denkjen, waut goot es. Oba jieda jedeepta Christ mott “siene ieejne Laust droagen” un selfst de Veauntwuatunk äwanämen, waut dee doonen well (Gal. 6:4-5, PB). Fa ons es daut daut wichtichste, een goodet Jewessen ver Gott to haben, un nich ver Menschen (1. Tim. 1:5).
5. Woo kjenn wie daut väabieejen, daut wie vom Gloowen aufkomen?
5 Wan wie twiewlen, dan woa wie väl Trubbels haben. De Jinja Jakobus schreef, wäa twiewelt “es han un häa opp aul siene Wäaj” (Jak. 1:8, PB). Wan een Mensch nich kaun siene ieejne Entscheidungen moaken, dan kaun dee leicht von aundre metjeräten woaren. Dee es dan krakjt soo aus eena, waut sien Boot em Storm nich stieren kaun un soo nich kontrolt, wua hee hanfoat. Soon Mensch kunn leicht waut doonen, waut am von Jehova aufbrinjt un dan mau rajcht aundre doafäa beschuljen (1. Tim. 1:19). Woo kjenn wie daut väabieejen? Wie motten “faust em Gloowen” stonen (läs Kolossa 2:6-7, PB). Om daut wie kjennen em Gloowen fauststonen, mott wie lieren, Entscheidungen to moaken, waut wiesen, daut wie Gloowen aun Gott sien Wuat haben (2. Tim. 3:14-17). Wuarom kaun daut oba schwoa sennen, goode Entscheidungen to moaken?
Wuarom daut kaun schwoa sennen, Entscheidungen to moaken
6. Waut kaun daut aun ons doonen, wan wie Angst haben?
6 Daut kaun schwoa sennen, Entscheidungen to moaken, wan wie Angst haben biejlikj fa dit: woo daut woat utkomen, aus wie woaren waut orrajcht doonen ooda aus aundre sikj woaren domm haben äwa ons. Un daut es uk gaunz jeweenlich, daut wie ons äwa dit Sorjen moaken. Kjeena well eene schlajchte Entscheidunk moaken, waut bloos Trubbel brinjt ooda Schaund opp eenem brinjt. Oba de Leew fa Gott un sien Wuat kaun ons halpen, nich soo Angst to haben. Wuarom kjenn wie daut sajen? Wiels de Leew fa Gott woat ons doatoo brinjen, daut wie emma wellen en sien Wuat un en onse biblische Bieekja forschen, ea wie eene wichtje Entscheidunk moaken. Wan wie daut doonen, woa wie lang nich soo väl Fäla moaken. Woosoo nich? Wäajen de Schreft halpt “de onbedochte kluak to sennen, un de junge vestendich un veninftich to woaren” (Spr. 1:4, PB).
7. Waut kjenn wie von dän Kjennich David lieren?
7 Woa wie emma rajchte Entscheidungen moaken? Nä. Wie moaken aula Fäla (Reem. 3:23). De Kjennich David wia biejlikj een weisa un trua Maun. Oba hee muak doawäajen eenjemol schlajchte Entscheidungen, waut Lieden opp am un uk opp aundre brocht (2. Sam. 12:9-12). Oba David jleewd nich, daut hee nich mea kunn soone Entscheidungen moaken, waut Gott jefollen, bloos wiels hee mol Fäla jemoakt haud (1. Kjen. 15:4-5). Krakjt soo kaun ons daut uk gonen, wan wie soo aus David em Denkj hoolen, daut Jehova onse Fäla äwasitt un onse Sinden vejeft, wan ons daut leet es. Hee woat wieda dee unjastetten, waut am leewen un jehuarsom sent (Psa. 51:3-6, 9-12).
8. Waut lia wie doavon, waut de Apostel Paulus säd, aus eena sikj sull befrieen ooda nich?
8 Bie eenjet jeft daut mea aus eenen rajchten Wajch, waut to entscheiden. Wan wie doaraun denkjen, kaun ons daut veleicht halpen, ons weinja Sorjen to moaken. See wie mol, waut de Apostel Paulus mol säd, aus eena sikj befrieen sull ooda nich. Hee schreef: “To dee, dee nich befriet sent, un to de Wätfrues saj ekj, daut daut fa an goot es, sikj nich to befrieen, soo aus ekj mie nich befriet hab. Oba wan see sikj nich beharschen kjennen, dan lot see sikj befrieen; wäajen befrieen es bäta, aus sikj met äare Lost nich Rot to weeten” (1. Kor. 7:8-9, PB). Wan de Apostel Paulus uk säd, daut et daut baste wia, onbefriet to bliewen, wia daut doawäajen oba uk fein, wan sikj wäa befried.
9. Sull wie ons doaräwa sorjen, woo aundre äwa onse Entscheidungen denkjen? Laj daut ut.
9 Sull wie ons doaräwa sorjen, waut aundre denkjen, äwa waut wie entscheiden? En wesset jo. Paulus räd biejlikj mol von soont, aus daut doarom jinkj, aus eena sull Fleesch äten, waut veleicht ieescht wia de Jetta jeopfat worden. Hee säd, daut wudd veleicht nich orrajcht sennen, soon Fleesch to äten; oba wan daut eenen aundren sien Jewessen baudad, dan wudd daut orrajcht sennen. To waut wort Paulus sikj eenich? Hee schreef: “Wan mien äten mienen Brooda toom faulen brinjen sull, well ekj niemols mea Fleesch äten, daut ekj mienen Brooda nich toom stolpren brinj” (1. Kor. 8:4-13, PB). Wie motten uk äwalajen, waut onse Entscheidungen aun aundre äa Jewessen doonen. Oba noch wichtja es, daut onse Entscheidungen ons nich von Jehova aufbrinjen (läs Reema 14:1-4). Waut vonne biblische Gruntsauzen woaren ons halpen, soone Entscheidungen to moaken, waut Gott ieren.
Sas Sachen, waut ons halpen, goode Entscheidungen to moaken
10-11. (a) Woo kjenn wie enne Famielje daut Haupt achten? (b) Aun waut sellen de Eltestasch denkjen, wan dee Entscheidungen moaken fa de Vesaumlunk?
10 Moak nich soone Entscheidungen, waut die nich trafen. Ea wie eene Entscheidunk moaken, mott wie äwalajen: “Hab ekj daut Rajcht doatoo, dit to entscheiden?” De Kjennich Salomo schreef: “Wan Stolt kjemt, kjemt uk Schaund, oba met Deemoot kjemt uk Weisheit” (Spr. 11:2, PB).
11 Elren loten äare Kjinja veleicht äwa eenjet selfst entscheiden, oba daut meent doawäajen nich, daut de Kjinja aules kjennen entscheiden, onen de Elren to froagen (Kol. 3:20). Ehefrues un Mitta kjennen väl doonen toom enne Famielje halpen. Oba dee sellen doawäajen äaren Ehemaun achten aus Haupt von de Famielje (Spr. 1:8; 31:10-18; Efs. 5:23). Un Ehemana motten uk doaraun denkjen, daut see Jesus aus Haupt motten achten (1. Kor. 11:3). De Eltestasch moaken wesse Entscheidungen fa de Vesaumlunk, oba dee seenen doano, daut von an “kjeena wieda gonen saul aus jeschräwen steit”, en Gott sien Wuat (1. Kor. 4:6, PB). Un dee hoolen sikj uk doaraun, waut de trua un weisa Kjnajcht sajcht (Mat. 24:45-47). Wie kjennen ons een deel Trubbels spoaren, wan wie deemootich sent un bloos soone Entscheidungen moaken, wua wie daut Rajcht to haben un waut ons trafen.
12. (a) Wuarom wudd wie sellen nosieekjen? (b) Laj daut ut, woo eena daut doonen kaun.
12 Doo nosieekjen. Salomo schreef: “Väasechtich plonen, brinjt eenem Vedeenst, soo secha aus aufbrutschen, Oamoot brinjt” (Spr. 21:5, PB). West du biejlikj met een Jeschaft aunfangen? Dan doo daut nich too haustich. Unjasto die ieescht mol soo väl aus du kaust doaräwa, froag Menschen, waut om Jeschafta omweeten, un denkj uk doaräwa no, waut de Schreft doatoo sajcht (Spr. 20:18). Wan du ieescht soo väl nojesocht hast aus du kaust, dan moak eene List von Sachen, waut kjennen goot utkomen un eene von Sachen, waut kjennen schlajcht utkomen. Un ea du dan eene Entscheidunk moakst, doo die “de Kosten äwaräakjnen” (Luk. 14:28, PB). Denkj nich bloos, woo väl Jelt du moaken woascht, oba uk, waut daut aun die em jeisteljen doonen woat. Daut brukt Tiet un Krauft toom sikj daut aula unjastonen. Oba wan du daut deist, dan woascht du secha soone Entscheidunk moaken, waut die woat halpen, Trubbels utem Stich to gonen.
13. (a) Waut vesprakjt Jakobus 1:5 ons? (b) Woo kaun ons daut halpen, no Weisheit to froagen?
13 Froag Gott no Weisheit. Wie motten Jehova no Help froagen, daut wie kjennen soone Entscheidungen moaken, waut am jefaulen. De Jinja Jakobus schreef: “Wan daut bie irjentwäm von junt aun Weisheit fält, dan saul hee Gott doano froagen. Wiels Gott jiedrem jieren jeft un kjeenen schelt, woat am de Weisheit jejäft woaren” (Jak. 1:5, PB). Ons fält daut aula aun Weisheit un doawäajen es daut uk sea goot, wan wie Gott doano froagen (Spr. 3:5-6). Soone Menschen, waut jleewen, see weeten aul aules, kjennen leicht Fäla moaken, wan see waut entscheiden. Wan wie to Jehova bäden un enne Schreft no Help sieekjen, woat hee ons halpen to vestonen, wuarom wie wesset werkjlich doonen wellen (Heb. 4:12; läs Jakobus 1:22-25).
14. Wuarom sell wie daut nich oppschuwen, eene Entscheidunk to moaken?
14 Moak de Entscheidunk. Doo nich haustich waut entscheiden ea du hast nojesocht un om Weisheit jebät. Een weisa Maun nemt sikj de Tiet un “bedenkjt sikj siene Wäaj” (Spr. 14:15, PB). Oba doo daut uk nich oppschuwen, de Entscheidunk to moaken. Eenje schuwen daut eenjemol onen goode Uasoak opp (Spr. 22:13). Oba soone Menschen loten enne Werkjlichkjeit aundre äa Läwen kontrollen.
15-16. Waut es doa met en, daut notokomen to waut wie ons sent eenich jeworden?
15 Komm daut no, to waut du die eenich jeworden best. Aul de Aunstrenjunk, eene goode Entscheidunk to moaken, kaun vejäfs sennen, wan eena daut nich werkjlich deit, to waut eena sikj es eenich jeworden. Salomo säd: “Jeff die gaunz han, to daut waut du en diene Krauft doonen kaust” (Liera 9:10, PB). Wan wie wellen haben, daut onse Entscheidunk saul goot utkomen, dan mott wie uk reed sennen, doaropp to schaufen, to waut wie ons sent eenich jeworden. Biejlikj woat een Vekjindja von de Vesaumlunk sikj veleicht eenich, Pionia to woaren. Oba woat hee daut volbrinjen? Secha woat hee daut kjennen, wan hee nich too väl Tiet brukt toom schaufen ooda fa Tietvedrief, oba leewa toom prädjen.
16 Wan wie uk goode Entscheidungen moaken, kaun daut doawäajen schwoa sennen daut notokomen. Wuarom? Wäajen “de gaunze Welt vom beesen beharscht woat” (1. Joh. 5:19, PB). Wie haben eenen Kaumf “jäajen jewaultje, beese Jeista von de Himmelswelten un met Jewaulten un Harschoften von em diestren, dee äwa dise Welt harschen” (Efs. 6:12, PB). De Apostel Paulus un de Jinja Judas säden beid, daut dee, waut sikj wälen Gott to ieren, woaren nich een leichtet Läwen haben (1. Tim. 6:12; Jud. 3).
17. Waut well Jehova haben, waut wie met de Entscheidungen sellen doonen, waut wie jemoakt haben?
17 Kjikj trigj un äwalaj, aus du saust waut endren. Nich aule Entscheidungen komen krakjt soo ut aus wie jeplont haben, wäajen “Tiet un Jlekj spälen emma eene Roll” (Liera 9:11, PB). Bie jewesse Entscheidungen velangt Jehova von ons, daut wie doabie bliewen, wan ons daut uk mol schwoa väakjemt. Jehova well haben, daut wie daut, waut wie vespräakjen, wan wie ons am hanjäwen ooda wan wie ons befrieen, sea iernst nämen. Gott velangt von ons, daut wie ons aun dise Entscheidungen hoolen (läs Psalm 15:1-2, 4). Oba de mieeschte Entscheidungen, waut wie moaken, sent nich soo wichtich. Doawäajen es daut goot, bieaun mol trigjtokjikjen no de Entscheidungen, waut wie jemoakt haben. Un wan wie enwoaren, daut wie waut endren motten, dan sell wie nich too stolt ooda too ieejenkoppich sennen toom daut doonen (Spr. 16:18). Daut wichtichste es, daut wie wieda Jehova deenen.
Halp aundre, daut dee kjennen Entscheidungen moaken, waut Gott ieren
18. Woo kjennen de Elren äare Kjinja lieren, goode Entscheidungen to moaken?
18 Elren kjennen väl doonen toom äare Kjinja lieren, soone Entscheidungen to moaken, waut Gott ieren. De basta Wajch es, an een goodet Väabilt to sennen (Luk. 6:40). Wan daut paussent es, kjennen de Elren äare Kjinja vetalen, waut see deeden toom jewesset entscheiden. See kjennen uk äare Kjinja loten jewesse Entscheidungen moaken un dee dan doafäa lowen, wan daut goot utkjemt. Oba waut sellen see doonen, wan de Kjinja nich eene goode Entscheidunk moaken? De Elren wellen veleicht fuaz dän Trubbel fiksen, oba daut wudd de Kjinja nich halpen toom waut lieren. Saj wie mol, de Elren loten äaren Sän eenen Foaraschien moaken. Oba dan deit dee waut, waut jäajen daut Jesaz es un saul Strof tolen. De Elren wudden kjennen de Strof betolen, oba wan de Sän doafäa wudd motten schaufen toom de Strof tolen, dan wudd dee daut bäta lieren, veauntwuatlich to sennen fa daut, waut dee deit (Reem. 13:4).
19. Waut sell wie onse Bibelschiela lieren un wuarom sell wie daut doonen?
19 Jesus säd to siene Jinja, daut see aundre sullen lieren (Mat. 28:20). Eent von daut wichtichste, waut wie onse Bibelschiela kjennen lieren, es, woo dee goode Entscheidungen moaken kjennen. Om an to halpen, daut to lieren, sell wie an nich väasajen, waut see doonen sellen. Daut es väl bäta, wan wie dee lieren, woo see kjennen gooden Rot enne Schreft finjen, om daut see kjennen selfst entscheiden, waut see doonen wellen. Wiels jieda eena mott “von sikj selfst ver Gott Räakjenschoft jäwen” (Reem. 14:12, PB). Wie motten aula lieren, soone Entscheidungen to moaken, waut Gott ieren.
Waut wurscht du sajen?
• Woosoo sell wie lieren, woo wie kjennen Entscheidungen moaken?
• Waut kaun daut aun ons doonen, wan wie Angst haben, un woo kjenn wie dee äwakomen?
• Waut fa sas Sachen kjenn wie doonen toom secha moaken, daut onse Entscheidungen Gott ieren?
[Study Questions]
[Kausten]
Sachen toom goode Entscheidungen moaken
1 Moak nich soone Entscheidungen, waut die nich trafen
2 Doo nosieekjen
3 Froag Gott no Weisheit
4 Moak de Entscheidunk
5 Komm daut no, to waut du die eenich jeworden best
6 Kjikj trigj un äwalaj, aus du saust waut endren
[Bilt]
Een Mensch, waut twiewelt, es krakjt soo aus eena, waut sien Boot em Storm nich stieren kaun