Rave i te Ikianga ei Akangateitei i te Atua

“Te akara meitaki ra te tangata akono ra i tona takainga.”​—MASE. 14:15.

1, 2. (a) Eaa to tatou manako maata no ta tatou au ikianga ka rave? (e) Eaa te au uianga ka akamanako tatou?

E MAATA ua atu ta tatou e rave ana i te au ra ravarai. E maata rai kare e puapinga rava ana. Ka akatupu ra tetai i te kino ki to tatou oraanga. Eaa te reira? Te au ikianga. Ta tatou au ikianga ka rave, me e mea maata me kore e mea meangiti ua, to tatou manako maata ra te akangateitei anga i te Atua.​—E tatau ia 1 Korinetia 10:31.

² Mama ainei ia koe te rave i te au ikianga, me kore e ngata ainei te reira kia koe? Me ka tupu tatou ei Kerititiano pakari, kia kite tatou i te akataka i te tika mei te tarevake, e e rave i te au ikianga te akaari maira e te aru ra te reira i to tatou uaorai irinakianga, kare i to tetai ke. (Roma 12:1, 2; Ebe. 5:14) Eaa tetai ua atu au tumu ka inangaro tatou i te rave i te au ikianga meitaki? Eaa ra i ngata ei i te rave i te reira i tetai taime? E eaa te au takainga ka rave tatou kia papu e ka akangateitei ta tatou au ikianga i te Atua?

Eaa ra ka Rave ei i te Au Ikianga?

3. Eaa te mea kare tatou e tuku kia tamanamanata mai i ta tatou ikianga?

³ Me manako ekoko tatou no runga i te au turanga Pipiria, ka manako mai to tatou au oa apii me kore te oa angaanga e kare tatou e papu roa ana i ta tatou irinakianga e ka mama ua i te akavare ia tatou. Penei ka pikikaa, akavare, keia, e ka tauta ratou i te akakeu ia tatou kia “aru i te urupu tangata” na te piri anga kia  ratou, me kore te uuna anga i ta ratou e rave ra. (Exo. 23:2) Inara, te tangata tei kite akapeea me rave i te au ikianga e akangateitei ra i te Atua, kare aia e tuku i te mataku me kore te inangaro kia arikiia mai no te rave i te mea te patoi ra i tona akava ngakau tereniia e te Pipiria.​—Roma 13:5.

4. Eaa ra tetai ke ka inangaro ei i te rave i te au ikianga no tatou?

⁴ Kare te katoatoa te inangaro ra i te rave i te au ikianga no tatou e inangaro ana i te takino ia tatou. Penei ka maro mai tetai au oa kia aru tatou i to ratou manako. Me kare tatou e noo ana i te kainga, penei te manako tikai maira to tatou kopu tangata ia tatou e ka inangaro i te akao mai ia ratou uaorai ki te au ikianga puapinga ka aro atu tatou. Ei akatauanga, akamanako i te turanga no runga i te vairakau rapakauanga. Te patoi pakari ra te Pipiria te taangaanga tau kore anga i te toto. (Anga. 15:28, 29) Kare e marama meitakiia ana tetai au manako no runga i te oraanga kopapa, e ka anoanoia tatou tataki tai kia rave i te ikianga e ko teea rapakauanga ka ariki tatou me kore ka patoi. * Penei e pakari te manako o to tatou aronga akaperepere no runga i teia au manako. Inara, me iki i taua au mea ra, ka anoanoia te Kerititiano tataki tai tei papetitoia kia apai i tana ‘uaorai apainga.’ (Gala. 6:4, 5) To tatou manako maata ko te akono tamou anga i te akava ngakau meitaki i mua i te Atua, kare i te tangata.​—1 Timo. 1:5.

5. Eaa ta tatou ka rave kia kore to tatou akarongo e takinoia?

⁵ Ka tupu te kino pakari me manako ekoko tatou. Kua tata te pipi ko Iakobo e ko te tangata manako ekoko kua “tinamou kore, i tona katoa ra au aerenga.” (Iako. 1:8) Mei tetai tangata rai i roto i te poti kare ona oe i roto i te tai uriia, ka akakeuia aia e te au manako tauiui o te tangata. Mama ua te akarongo o taua tangata ra i te takinoia, e oti ka akaapa atu aia i tetai ke no tona turanga kino! (1 Timo. 1:19) Akapeea tatou me kopae i taua turanga ra? Ka tau tatou “kia akatinamouia i te akarongo.” (E tatau ia Kolosa 2:6, 7.) Kia rauka te tu tinamou, ka anoanoia tatou kia kite i te rave i te au ikianga te akaari maira i to tatou irinakianga no te Tuatua akauruia a te Atua. (2 Timo. 3:14-17) Eaa te ka arai ia tatou kia rave i te au ikianga meitaki?

Tumu i Ngata ei te Rave i te Au Ikianga

6. Akapeea te mataku te akakeu anga ia tatou?

⁶ Ka ngaro to tatou manako no te mataku—mataku i te rave i te ikianga tarevake, mataku e ka puapinga kore, me kare mataku no te ka akaraanga neneva tatou ki tetai ke. Te marama uaia atura taua au manako ra. Kare e tangata e inangaro i te rave i tetai ikianga tarevake te ka akatupu i te manamanata e te akama. Ka tauturu te inangaro no te Atua e tana Tuatua ia tatou kia kore e mataku. Na roto i teea au tu? No te inangaro i te Atua i akakeu ei ia tatou kia akara ua rai ki tana Tuatua e te au puka akatumuia ki runga i te Pipiria, i mua ake ka rave ei tatou i tetai au ikianga puapinga. Kare i reira e maata te au tarevake ta tatou ka rave. No teaa ra? No te mea ka rauka i te Pipiria i te “o atu i te pakari ki te kamakura; te kite, e te akono meitaki, ki te tangata ou.”​—Mase. 1:4.

7. Eaa ta te akaraanga o te Ariki ko Davida e apii maira kia tatou?

⁷ Ka rave ua rai ainei tatou i te ikianga tika? Kare. E rave pouroa ana tatou i te tarevake. (Roma 3:23) Ei akaraanga, e ariki pakari e te akarongo mou a Davida. Inara, no tana au ikianga tarevake i tetai au taime kua mamae aia e tetai ke. (2 Samu. 12:9-12) Noatu ra, kare a Davida i akatika ana i tona au tarevake kia akaekoko iaia no te rave anga i te au ikianga te ka akamareka i te Atua. (1 Ari. 15:4, 5) Ka rauka ia tatou i te rave i te au ikianga puapinga noatu te au tarevake ta tatou i rave ana, mei ia Davida rai, me maara ia tatou e kare a Iehova e manako mai i to tatou tarevake e ka akakore mai aia i ta tatou au ara. Ka turuturu ua mai  rai aia i te aronga e inangaro ra e e akarongo ra kiaia.​—Sala. 51:1-4, 7-10.

8. Eaa ta tatou i apii mai mei te au tuatua a te apotetoro ko Paulo no runga i te akaipoipo?

⁸ Ka akaiti mai tatou i te taitaia e kite nei tatou no te rave anga i te au ikianga. Akapeea ra? Na te kite mai anga e te vai ra tetai atu au mataara tau ka rauka ia tatou i te iki. Akamanako ana i te tu ta te apotetoro ko Paulo i akakite mai no runga i te akaipoipo. Kua akauruia aia kia tata e: “Teia taku tuatua ki te aronga takaua, te tane e te vaine: E mea meitaki ia ratou kia noo ua mei iaku katoa nei. Kia kore ra e tika ia ratou ra, ka akaipoipo ratou: e mea meitaki te akaipoipo.” (1 Kori. 7:8, 9) Kua akamaroiroi a Paulo i te turanga kare e akaipoipo ei mataara meitaki atu, kare ra e ko te ikianga anakeia.

9. Ka manamanata ainei tatou i te manako o tetai ke no ta tatou au ikianga? Akamarama mai.

⁹ Ka manamanata ainei tatou eaa to tetai pae manako no ta tatou au ikianga ka rave? Tetai taime. Akara ana i ta Paulo e tuatua ra no te kai anga i te au kai penei kua akaatingaia ana ki te au itoro. Kua akakite aia e kare e tarevake ana te reira ikianga, inara ka takino te reira i te akava ngakau paruparu o tetai tangata. Eaa i reira ta Paulo pauanga? “Kia maitu taku taeake i te kai ra,” i tata ei aia, “kare rava au e kai i te puaka e tuatau ua atu, ko te maitu aea taku taeake iaku.” (1 Kori. 8:4-13) Ka akamanako katoa tatou e eaa ta tatou ikianga ka akatupu ki te akava ngakau o tetai ke. To tatou manako maata ra, eaa ta tatou ikianga ka akatupu ki to tatou pirianga kia Iehova. (E tatau ia Roma 14:1-4.) Eaa te au kaveinga Pipiria te ka tauturu ia tatou kia rave i te au ikianga te akangateitei ra i te Atua?

Ono Takainga no te Rave i te Au Ikianga Meitaki

10, 11. (a) Akapeea tatou te kopae anga i te tu ngakau parau i roto i te pamiri? (e) Eaa ta te aronga pakari ka akamanako me rave i te au ikianga te o maira te putuputuanga?

¹⁰ Kopae i te ngakau parau. I mua ake ka iki ei i tetai angaanga, ka ui tatou kia tatou uaorai e, ‘E tikaanga ainei toku kia rave i teia ikianga?’ Kua tata te Ariki ko Solomona e: “Kua tupu te ngakau parau ra, tei muringao te akama: tei te aronga akaaka ra te pakari.”​—Mase. 11:2.

¹¹ Penei ka akatika te au metua i ta ratou tamariki kia rave i tetai au ikianga, inara eiaa te tamariki e manako ua i te rave i taua tikaanga ra. (Kolo. 3:20) E tikaanga to te au vaine e te au mama i roto i te ngutuare, inara te anoanoia ra ratou kia ariki i te taoonga upoko o ta ratou au tane. (Mase. 1:8; 31:10-18; Ephe. 5:23) Pera katoa, te anoanoia ra te au tane kia kite e kua kotingaia to ratou mana e tei raro ake ratou ia Karaiti. (1 Kori. 11:3) E rave ana te aronga pakari i te au ikianga te o maira te putuputuanga. Inara, ka akapapu ratou e kia kore e ‘rai to ratou manako i tei tataia ra’ i roto i te Tuatua a te Atua. (1 Kori. 4:6) Ka aru vaitata katoa ratou i te akauenga tei orongaia mai kia ratou no ko mai i te tavini akono meitaki. (Mata. 24:45-47) Me rave tatou i te au ikianga tau, kare te tu taitaia e te mamae e tupu kia tatou e ki tetai ke, me kua orongaia mai te tikaanga kia rave tatou i te reira.

12. (a) Eaa ra tatou ka rave ei i te kimikimianga? (e) Akamarama mai akapeea tetai me rave i taua kimikimianga ra.

 ¹² Rave i te kimikimianga. “Te kimianga o te aronga maroiroi ra, tei runga ïa i te apinga maata,” i tata ei a Solomona, “kareka ta te aronga rapurapu ua ra, tei te putaua ïa.” (Mase. 21:5) Ei akaraanga, te manako ra ainei koe i tetai akakoroanga pitiniti? Auraka e tuku i toou manako kia akaaere ia koe. Rave i te au kimikimianga, uiui i te au manako o te aronga tei kite meitaki i taua au mea ra, e e akamanako i te au kaveinga Pipiria no runga i te reira. (Mase. 20:18) No te akapapa anga i taau kimikimianga, akanoo e rua papaanga—e tai te akataka maira i te puapinga, tetai ko te au kaiou. Mua ake ka rave ei koe te ikianga e “tare i te ka pou.” (Luka 14:28, NW) Akamanako eaa taau ikianga ka akatupu ki toou turanga pae moni, pera katoa toou pirianga kia Iehova. Maata te tautaanga e te taime ka pou i te rave i te kimikimianga. Na te rave anga i te reira, kare koe e rapurapu i te rave i te au ikianga te akatupu ra i te manamanata e te taitaia.

13. (a) Eaa te akapapu anga i roto ia Iakobo 1:5? (e) Akapeea te pure anga no te pakari te tauturu anga ia tatou?

¹³ Pure no te pakari. Ka akangateitei ta tatou au ikianga i te Atua, me pati tatou kia tauturu mai aia ia tatou i te rave i te reira. Kua tata te pipi ko Iakobo e: “Kia ngere ra tetai tangata i te pakari, ka pati aia ki te Atua ra, ko tei oronga ua mai i ta te tangata ravarai ma te patoi kore; e e orongaia mai tana.” (Iako. 1:5) Kare i te mea akama i te akakite e te anoano ra tatou i te pakari o te Atua ei tauturu ia tatou kia rave i te au ikianga. (Mase. 3:5, 6) No te mea, te irinaki ua anga ki runga i to tatou marama ka arataki ke ia tatou. Me pure tatou no te pakari e te kimi anga i te au kaveinga i roto i te Tuatua a te Atua, te tuku ra tatou i te vaerua tapu ei tauturu ia tatou kia kite mai i to tatou akakoroanga tikai no te rave anga i tetai angaanga.​—Ebe. 4:12; e tatau ia Iakobo 1:22-25.

14. Eaa ra tatou ka kopae ei i te tu tavarevare?

¹⁴ Rave i te ikianga. E rave i te kimikimianga e e pure no te pakari i mua ake ka rave ei i teia takainga. Ka akamanako meitaki tetai tangata pakari i te ‘akono i tona takainga.’ (Mase. 14:15) Tetai tua ra, eiaa e tavarevare. Penei ka rave tetai tangata tavarevare i te au kotoe anga kia kore e rave i te au mea. (Mase. 22:13) Ka rave rai aia i tetai ikianga​—inara, ka akatika aia i tetai aronga ke kia akatere i tona oraanga.

15, 16. Eaa te o maira no te akatupu anga i tetai ikianga?

¹⁵ Akatupu i te ikianga. Ka puapinga kore ta tatou tautaanga no te rave anga i tetai ikianga meitaki me kare tatou e aru e e tauta pakari i te akatupu i te reira. “Ko tei kitea e koe ta to rima e rave ra, ka rave ma to ririnui ra,” i tata ei a Solomona. (Kohe. 9:10) E puapingaia ai, ka inangaro tatou i te taangaanga i te au mea te ka anoanoia kia akatupu i ta tatou au ikianga. Ei  akaraanga, penei ka iki tetai papuritia o te putuputuanga kia painia. Ka puapingaia ainei aia? Ae, me kare aia e tuku i te angaanga moni e te tamataora i te akapou i tona maroiroi e te taime tana e anoano ra no te rave i tana angaanga orometua.

¹⁶ Ko te au ikianga meitaki tikai, te mea ngata rava atu i te akatupu. No teaa ra? No te mea “te vai ua nei rai to te ao ravarai i raro ake i taua vaerua kino ra.” (1 Ioa. 5:19) Te tamaki nei tatou i “te au tutara o teianei ao poiri, e te au vaerua kikino i te reva nei.” (Ephe. 6:12) Kua akakite mai te apotetoro ko Paulo e te pipi ko Iuda e ko te aronga tei iki i te akangateitei i te Atua e tamaki anga ta ratou.​—1 Timo. 6:12; Iuda 3.

17. Me rave i te au ikianga, eaa ta Iehova e tapapa maira mei ia tatou?

¹⁷ Akara akaou i te ikianga e e rave i te akatikatika anga me ka anoanoia. Kare te au ikianga e tupu tikai ana mei tei paraniia. Ka tupu ‘te au tuatau e te tupu anga kitea koreia’ kia tatou pouroa. (Kohe. 9:11, NW) Pera katoa, ka inangaro a Iehova kia akono tatou i tetai au ikianga noatu e ka aro atu tatou i te au timataanga. Kare e rauka i tetai tangata i te taui i tana ikianga kia akatapu i tona oraanga kia Iehova me kore tana tia no te akaipoipo. Inangaro te Atua kia rave tatou i taua au ikianga. (E tatau ia Salamo 15:1, 2, 4.) Kare te maataanga o te au ikianga e pakari rava ana. Tetai au taime, ka akara akaou te tangata manako meitaki i te au ikianga tana i rave. Kare aia e tuku i te tu akaparau me kore te tu marokiakia ei arai iaia kia rave i te akatikatika anga me kore te taui anga i tetai ikianga. (Mase. 16:18) Tona manako maata kia akapapu e te akangateitei ra tona oraanga i te Atua.

Tereni i Tetai kia Rave i te Au Ikianga ei Akangateitei i te Atua

18. Akapeea te au metua me tereni i ta ratou tamariki kia rave i te au ikianga meitaki?

¹⁸ Maata atu ta te au metua ka rave i te tauturu i ta ratou tamariki kia rave i te au ikianga ei akangateitei i te Atua. Ko te akaraanga meitaki te apiianga meitaki roa atu. (Luka 6:40) Me ka tau, e akamarama te au metua ki ta ratou tamariki e ko teea te au takainga ta ratou i rave no tetai ikianga papu. Penei ka inangaro katoa ratou i te tuku i ta ratou tamariki kia rave i tetai au ikianga, e e akameitaki atu ia ratou me puapingaia te ikianga. Akapeea ra me kua rave te tamaiti i te ikianga tarevake? Te manako mua o te metua, ko te paruru i te tamaiti mei te au tupuanga kino, inara kare i te mea meitaki no te tamaiti. Ei akaraanga, ka tuku te metua i te tamaiti kia tiki i tetai raitini no te apinga akaoro. Penei kua aati te tamaiti i te ture o te mataara, e kua akautungaia. Penei ka tutaki te metua i te utunga. Inara, me ka angaanga te tamaiti ei tutaki i te utunga, ka apii te reira iaia kia apai i tana uaorai apainga.​—Roma 13:4.

19. Eaa ta tatou ka apii ki te aronga apii Pipiria, e akapeea tatou me rave i te reira?

¹⁹ Kua akakite a Iesu ki tana au pipi kia apii i tetai ke. (Mata. 28:20) Tetai au apiianga puapinga maata rava atu ta tatou ka apii ki te aronga apii Pipiria, akapeea me rave i te au ikianga meitaki. E rave meitaki ei i te reira, kare tatou e akakite kia ratou e akapeea me rave i te reira. E meitaki atu no tatou kia apii ia ratou kia akamanako i te au kaveinga Pipiria kia rauka ia ratou i te iki akapeea me rave i te reira. No te mea, ‘ka aaki tatou uaorai i te tuatua ki te Atua.’ (Roma 14:12) No reira, e tumuanga tau to tatou pouroa kia rave i te au ikianga ei akangateitei i te Atua.

[Tataanga Rikiriki i Raro]

Akapeea Koe me Pau?

• Eaa tatou ka anoano ei kia kite akapeea me rave i te au ikianga?

• Eaa ta te mataku ka akatupu kia tatou, akapeea tatou me autu i te reira?

• Eaa te au takainga e ono te akapapu ra e te akangateitei ra ta tatou au ikianga i te Atua?

[Au Uianga Apii]

[Pia/​Tutu i te kapi 16]

Au Takainga no te Rave i te Au Ikianga Meitaki

1 Kopae i te Ngakau Parau

2 Rave i te Kimikimianga

3 Pure no te Pakari

4 Rave i te Ikianga

5 Akatupu i te Ikianga

6 Akara Akaou e kia Akatikatika

[Tutu i te kapi 15]

Aite te tangata manako ekoko ki te tangata i roto i te poti kare e oe i roto i te tai uriia