Tɔsake tɛdikɔ tangɛnyangɛnya Nzambi
Tɔsake tɛdikɔ tangɛnyangɛnya Nzambi
“Kanga [yewo] atushishimaka mbuka katandatshu.”—TUK. 14:15.
1, 2. a) Etena kɔsaso tɛdikɔ, naa oyango wa ntondo wahombaso monga la wɔ? b) Ambola akɔna wayangaso nsɛdingola?
ONDO sho mbɔsaka tɛdikɔ efula lushi tshɛ. Efula l’atei atɔ bu la shɛngiya ya wolo. Koko, tɔmɔtshi kokaka monga la shɛngiya ya wolo lo nsɛnɔ yaso. Lo tɛdikɔ tshɛ tɔsaso, oyadi ta weke kana ta totshitshɛ, oyango wa ntondo wahombaso monga la wɔ ele wa ntombola Nzambi.—Adia 1 Koreto 10:31.
2 Onde wɛ mɛnaka dia ekɔ dui dia wɔdu mbɔsa tɛdikɔ kana ekɔ dui dia wolo? Naka sho nangaka nkoma Akristo wambotshunda, kete sho pombaka mbeka dia ntshikitanya ɔlɔlɔ la kɔlɔ ndo mbɔsa tɛdikɔ tɛnya dietawɔ diele la so, koko aha diele l’anto akina. (Romo 12:1, 2; Heb. 5:14) Naa ɛkɔkɔ ɛmɔtshi watotshutshuya dia mbɔsa tɛdikɔ t’amɛna? Lande na kele lo tena dimɔtshi ekɔ dui dia wolo dia mbɔsa tɛdikɔ t’amɛna? Ndo akambo akɔna wahombaso nsala dia sho ndjashikikɛ ɔnɛ tɛdikɔ tɔsaso ngɛnyangɛnyaka Nzambi?
Lande na kahombaso mbɔsaka tɛdikɔ?
3. Kakɔna kahatahombe mbetawɔ dia tɔ ndɔshana la tɛdikɔ tɔsaso?
3 Naka sho mengengaka dia mbɔsa tɛdikɔ lo kɛnɛ katɔlɔmba atɔndɔ wa lo Bible, kete asekaso wa la kalasa kana wa l’olimu mbeyaka mfɔnya ɔnɛ sho bu l’eshikikelo lo kɛnɛ ketawɔso ndo vɔ mbeyaka ndjototshutshuya esadi eto dia nsala kɛnɛ kele kɔlɔ. Vɔ mbeyaka mbuta kashi kana mbuva ndo totshutshuya dia sho ‘ndjela olui w’anto’ lo tetawoya dia nsala kɛnɛ kasalawɔ kana mbishɛ ditshelo diawɔ. (Etum. 23:2) Koko, onto leya mbɔsa tɛdikɔ tangɛnyangɛnya Nzambi hatetawɔ pondjo dia wɔma kana nsaki ka mbetawɔma le anto akina mbokonya dia nde nsala akambo wayɔlɔshana la nkum’otema kande kambekiyama l’awui wa lo Bible.—Romo 13:5.
4. Lande na kakoka anto akina nkombola mbɔsa tɛdikɔ lo dihole diaso?
4 Aha onto tshɛ lakombola mbɔsa tɛdikɔ lo dihole diaso mbele l’oyango wa tosalɛ kɔlɔ. Angɛnyi aso wele l’eyango w’amɛna mbeyaka ntɛtɛ dia sho nkitanyiya alako awɔ. Naka sho mbidjasɛ etale mangana l’ambutshi aso, kete ondo ewotɔ aso mbeyaka ndjakiyanya di’ɔlɔlɔ aso ndo vɔ mbeyaka ntetemala ndjatambiya lo tɛdikɔ tɔsaso. Ɛnyɛlɔ, tɔsɛdingole awui amɔtshi wendana l’esakelo k’aseka enganga. Bible tonaka la wolo tshɛ okaloyelo wa dikila. (Etsha 15:28, 29) Koko, lam’ele Bible halembetshiya oseka kiambokambo tshɛ yɛnya woho wahombaso sakemɛ, onto tshɛ la l’atei aso nɔmbamaka dia mbɔsa yɛdikɔ yande lo kɛnɛ kendana la esakelo kahombande mbetawɔ kana ntona. * Anto wokaso ngandji mbeyaka totshutshuya dia sho nkaloya dikila. Koko, etena kɔsande yɛdikɔ l’akambo asɔ, Okristo tshɛ wakayakimɔ ndo wambobatizamaka pombaka mɛmba “wutshu andi ndame.” (Ngal. 6:4, 5) Oyango wa ntondo wahombaso monga la wɔ ele wa monga la nkum’otema ka pudipudi la ntondo ka Nzambi, koko aha k’anto.—1 Tim. 1:5.
5. Akokaso nsala diaha sho nshisha mbetawɔ kaso?
5 Naka sho mengenga dia mbɔsa tɛdikɔ, kete dui sɔ koka todja lo wâle. Ombeki Jakɔba akafunde dia onto lengenga dia mbɔsa tɛdikɔ “atahahoka lu akambu andi tshe.” (Jak. 1:8) L’ɛnyɛlɔ k’onto lele lo waato wele l’atei wa ndjale wasutshasutshama la lɔpɛpɛ la wolo, onto ɔsɔ sɛngiyamamaka la tokanyi ta kashi ndo tatshikitana t’ana w’anto. Ekɔ dui dia wɔdu dia onto la ngasɔ nshisha mbetawɔ kande ndo mɛndja anto akina onongo wɛndjɛndja. (1 Tim. 1:19) Akokaso nsala diaha dikambo dia ngasɔ tokomɛ? Sho pombaka “n[dj]ashikike lu mbetawo.” (Adia Kolosai 2:6, 7.) Dia sho ndjashikikɛ lo mbetawɔ, sho pombaka mbeka dia mbɔsaka tɛdikɔ tɛnya mbetawɔ kele la so l’Ɔtɛkɛta waki Nzambi wakasambiyama. (2 Tim. 3:14-17) Ko kakɔna kakoka toshimba dia sho mbɔsa tɛdikɔ t’amɛna?
Lande na kele mbɔsa tɛdikɔ kokaka monga dui dia wolo?
6. Shɛngiya yakɔna yakoka monga la wɔma le so?
6 Wɔma w’ɔnɛ tayɔsa yɛdikɔ ya kɔlɔ, w’ɔnɛ hatotokotsha yɛdikɔ yambotɔsa kana w’ɔnɛ anto akina wayɔsa dia hateye akambo mbeyaka tahemɛ. Kema kɔlɔ ndjakiyanya di’akambo asɔ. Ndoko onto lakombola mbɔsa tɛdikɔ ta kɔlɔ takoka ndjonga l’etombelo wa kɔlɔ le nde ndo ndjowosha sɔnyi. Kânga mbediɔ ngasɔ, ngandji kokaso Nzambi ndo Ɔtɛkɛta ande kokaka tokimanyiya dia sho nkitshakitsha wɔma. Lo toho takɔna? Nɛ dia tena tshɛ, ngandji kokaso Nzambi kayototshutshuyaka dia nsɛdingola Ɔtɛkɛta ande ndo ekanda walembetshiya Bible la ntondo ka sho mbɔsa tɛdikɔ t’ohomba. Ɔnkɔnɛ, tayokitshakitsha wandja wakokaso nsala. Lande na? Nɛ dia Bible kokaka ‘mbisha wanɛ wahatahokɔ akambo shɛnɔdi ndo ɛlɔngɔlɔngɔ ewo ndo dikoka di’ekanelo ka yimba.’—Tuk. 1:4.
7. Wetshelo akɔna wakokaso nkondja oma l’ɛnyɛlɔ kaki nkumekanga Davidi?
7 Onde tayɔsaka nshi tshɛ paka tɛdikɔ t’amɛna? Ndoko, nɛ dia sho tshɛ mindjaka. (Romo 3:23) Ɛnyɛlɔ, nkumekanga Davidi aki pami kaki la lomba ndo la kɔlamelo. Koko, lo tena dimɔtshi nde akɔshi tɛdikɔ ta kɔlɔ takonge l’etombelo wa kɔlɔ le nde ndo le anto akina. (2 Sam. 12:9-12) Koko, Davidi kombetawɔ dia wandja ande ndanya akoka waki la nde wa mbɔsa tɛdikɔ takangɛnyangɛnyaka Nzambi. (1 Khum. 15:4, 5) Sho kokaka monga anto wɔsa tɛdikɔ t’amɛna oyadi wandja wakatasale lo nshi yakete, naka l’ɛnyɛlɔ kaki Davidi sho mbohɔ dia Jehowa ayohɛ wandja aso ndo ayotodimanyiya kɔlɔ yaso. Nde ayotetemala nsukɛ wanɛ wawoka ngandji ndo wokitanyiya.—Osam. 51:1-4, 7-10.
8. Wetshelo akɔna wakondjaso oma l’elembetshiyelo wakasha ɔpɔstɔlɔ Paulo lo dikambo dia diwala?
8 Sho kokaka nkitshakitsha ekiyanu waya lo kɛnɛ kendana la mbɔsa tɛdikɔ. Lo woho akɔna? Lo nshihodia ɔnɛ lo tena dimɔtshi, mbeyaka monga toho t’amɛna efula ta nsala dui ɔtɔi. Tende woho wakatɛkɛta ɔpɔstɔlɔ Paulo lo dikambo dia diwala. Oma l’ekimanyielo ka nyuma k’ekila, nde akafunde ate: “Keli naka untu nkanaka ati: ndi heyi ndjakimela utsha li osonami andi, naka pusa kandi ka dimba kambuleka wulu, ndu naka dikambu diako mbeyaka ntsha[ma], ndi atshi uku alangandi; kawo vo tshukana—dikambu so kema kolo. Ku one lakikitala l’utema, aha la saki, keli ambeya lama ndjakimela, la ambusanguya l’utema dia mumba usekaseka andi w’emuma, ndi ambutsha ololo.” (1 Kor. 7:36-38) Paulo akɛnya dia ntshikala onyemba ekɔ yɛdikɔ ya dimɛna efula, koko aha ɔsɔnwɛlɔ ɔsɔ oto mbele dimɛna.
9. Onde sho pombaka ndjakiyanya lo woho wɔsa anto akina tɛdikɔ tɔsaso? Lembetshiya.
9 Onde sho pombaka ndjakiyanya lo woho wɔsa anto akina tɛdikɔ tɔsaso? Lo yɛdikɔ mɔtshi sho kokaka ndjakiyanya. Tende kɛnɛ kakate Paulo lo dikambo dia mbo ya ndɛ yakoka mbɔsama oko yakalambɔma le dikishi. Nde akeyaka dia mbeyaka monga ko yɛdikɔ mɔtshi bu kɔlɔ, koko yɔ kokaka nyangiya onto lele la nkum’otema ka wɔdu. Yɛdikɔ yakɔna yakɔshi Paulo? Nde akafunde ate: “Naka mbu ya nde yayutakanya unyami, keti dimi handjole unatshi pundju, ne dia dimi ntukutakanya unyami.” (1 Kor. 8:4-13) Sho lawɔ pombaka nsɛdingola woho wakoka tɛdikɔ tɔsaso monga la shɛngiya lo nkum’etema y’anto akina. Lo mɛtɛ, dikambo diahombaso ndeka mbidja yimba lɔkɔ ele shɛngiya yakoka monga l’ɛsɔnwɛlɔ aso lo lɔngɛnyi lasaso la Jehowa. (Adia Romo 14:1-4.) Atɔndɔ akɔna wa lo Bible wakoka tokimanyiya dia sho mbɔsa tɛdikɔ tangɛnyangɛnya Nzambi?
Akambo asamalo wa nsala dia mbɔsa tɛdikɔ t’amɛna
10, 11. a) Ngande wakokaso mbewɔ dia monga akanga w’etako l’atei wa nkumbo? b) Kakɔna kahomba dikumanyi namaka lo yimba etena kɔsawɔ tɛdikɔ tendana l’etshumanelo?
10 Tewɔ dia monga akanga w’etako. La ntondo ka sho mbɔsa yɛdikɔ mɔtshi, sho pombaka ndjambola ɔnɛ: ‘Onde lekɔ la lotshungɔ la mbɔsa yɛdikɔ nyɛ?’ Nkumekanga Sɔlɔmɔna akafunde ate: “Lam’atuyakaka utaku, katuyakaka ndu sonyi. Keli yimba yatuyalaka kame la kanga ndjakitshakitsha.”—Tuk. 11:2.
11 Ambutshi kokaka mbisha anawɔ lotshungɔ la mbɔsa tɛdikɔ l’akambo amɔtshi, koko ana hawohombe mbɔsa dia wekɔ la lowandji lɔsɔ. (Kol. 3:20) Wadi ndo waa mama wekɔ la yema ya lowandji l’atei wa nkumbo, koko vɔ pombaka mbeya lowandji lele la waomɛwɔ wele ewandji wa nkumbo. (Tuk. 1:8; 31:10-18; Ef. 5:23) Woho akɔ wâmɛ mbele, waomi pombaka mbeya dia lowandji lawɔ lekɔ l’elelo ndo ɔnɛ vɔ pombaka nɛmbɛ lowandji la Kristo. (1 Kor. 11:3) Dikumanyi mbɔsaka tɛdikɔ tendana l’etshumanelo. Koko, vɔ pombaka ndjashikikɛ dia ‘hawete la ntondo k’akambo wakafundama’ l’Ɔtɛkɛta waki Nzambi. (1 Kor. 4:6) Vɔ pombaka ndjela nto ɛlɔmbwɛlɔ kalongolawɔ oma le ɔhɔmbɔ wa kɔlamelo nna lo nna. (Mat. 24:45-47) Sho kokaka mbewɔ dia ndjanyangiya ndo nyangiya anto akina, naka l’okitshakitsha tshɛ sho mbɔsaka tɛdikɔ paka etena kakondjaso lotshungɔ la nsala dui sɔ.
12. a) Lande na kahombaso nsala eyangelo la ntondo ka mbɔsa tɛdikɔ? b) Lembetshiya woho wakoka onto nsala eyangelo wa ngasɔ.
12 Tosale eyangelo. Sɔlɔmɔna akafunde ate: “Tukanyi ta kanga kolamelu, tatûkundjiyaka diango efula. Keli kanga utalutalu atuyalaka la wula.” (Tuk. 21:5) Ɛnyɛlɔ, onde wɛ ekɔ lo nanga munda okanda? Tetawɔke dia tokanyi tayɛ kahemɛ. Sɛdingola akambo tshɛ, yanga alako le anto wanda okanda ndo shikikɛ atɔndɔ wa lo Bible wendana l’awui asɔ. (Tuk. 20:18) Dia wɛ ndjalɔngɔsɔla dia nsala eyangelo, sala listɛ hiende. Lɔmɔtshi la wahɔ wayoyokondjaka ndo lokina la ekakatanu wayohomanaka layɛ. La ntondo ka wɛ mbɔsa yɛdikɔ, ‘tokotɛdiki kɛnɛ kalɔmbama.’ (Luka 14:28) Sɛdingola shɛngiya yakoka monga la yɛdikɔ yayɛ aha paka lo kɛnɛ kendana la ekondjelo kayɛ, koko ndo lo kɛnɛ kendana la lonyuma layɛ. Dia nsala eyangelo, paka wɛ ntshungola etena ndo mbidja welo. Lo nsala ngasɔ, wɛ kokaka mbewɔ mbɔsa tɛdikɔ l’esasesase ndo ndjonga la lonyangu.
13. a) Eshikikelo kakɔna katanaso lo Jakoba 1:5? b) Ngande wakoka dɔmbɛlɔ tokimanyiya dia nkondja lomba?
13 Tɔlɔmbɛ Nzambi lomba. Tɛdikɔ taso tayɔngɛnyangɛnya Nzambi paka naka sho mbɔlɔmba dia nde tokimanyiya woho wa sho tiɔsa. Ombeki Jakɔba akafunde ate: “Naka omotshi ambuhumba yimba, ndi alombe [Nzambi], katushaka antu tshe diango la lukahu, hâhangwela, ku ndi ayuwushayo.” (Jak. 1:5) Kema dikambo dia sɔnyi dia mbetawɔ ɔnɛ tekɔ l’ohomba wa lomba l’oma le Nzambi dia lɔ tokimanyiya dia sho mbɔsa tɛdikɔ. (Tuk. 3:5, 6) Ndo nto, ndjaɛkɛ tshɛ lo lomba laso hita kokaka tonganyiya esadi eto. Naka sho nɔmba dia nkondja lomba ndo nsala eyangelo dia mbeya atɔndɔ wa l’Ɔtɛkɛta waki Nzambi, kete tayɛnya dia sho mbetawɔka dia nyuma k’ekila tokimanyiya dia nsɛdingola tokanyi tatotshutshuya dia nsala dui dimɔtshi.—Heb. 4:12; adia Jakoba 1:22-25.
14. Lande na kahombaso mbewɔ dia ntaloya tɛdikɔ taso?
14 Tɔshi tɛdikɔ. Tatosasɛke dia mbɔsa tɛdikɔ la ntondo ka sho nsala eyangelo ndo nɔmba Nzambi lomba. Onto lele la lomba tshungolaka etena ka ‘nshishima mboka katandatshu.’ (Tuk. 14:15) Lo wedi okina, tatotaloyake tɛdikɔ tahombaso mbɔsa. Onto lataloya tɛdikɔ tande mbeyaka mbisha tɛkɛ nɛndɛ tɛnya lande na kahandasale dikambo dimɔtshi. (Tuk. 22:13) Koko, nde ndjokomɛka lo mbɔsa yɛdikɔ, mbuta ate ndjetawɔka dia anto akina mbɔsa tɛdikɔ lo dihole diande.
15, 16. Kakɔna kalɔmbama dia nkotsha tɛdikɔ tɔsaso?
15 Tokotsha tɛdikɔ tɔsaso. Welo wadjaso dia mbɔsa tɛdikɔ t’amɛna kokaka mbɔtɔ l’ashi naka hatosadi la wolo dia tikotsha. Sɔlɔmɔna akafunde ate: “Kene tshe kayena lunya laye dia ntsha, kukitshi la wulu aye.” (Und. 9:10) Dia nkotsha tɛdikɔ tɔsaso, sho pombaka mbetawɔ dia mbidja welo wahombama. Ɛnyɛlɔ, opandjudi ɔmɔtshi wa l’etshumanelo mbeyaka mbɔsa yɛdikɔ ya nkamba olimu w’ombatshi mboka. Dia mbokotsha, nde hahombe mbetawɔ di’olimu wa l’emunyi wa tshambandeko ndo tɔkɛnyɔ mboshishɛ wolo ndo wenya wahombande mbetsha l’olimu w’esambishelo.
16 Aha mbala tshɛ mbatongaka dui dia wɔdu dia nkotsha tɛdikɔ tɔsaso. Lande na? Nɛ dia “wa la kete tshe weko lu wulu wa kanga kolo.” (1 Joa. 5:19) Ndo nto, sho pombaka ndɔshana “la embuledi wa la kete wa udjima one, la elui w’edienge wa lu ahuli wa l’ulungu.” (Ef. 6:12) Ɔpɔstɔlɔ Paulo nde la ombeki Judɛ wakɛnya dia wanɛ wasɔna dia ngɛnyangɛnya Nzambi wayohomba ndɔ ta dia wolo.—1 Tim. 6:12; Jude 3.
17. Kakɔna kalongamɛ Jehowa etena kɔsaso tɛdikɔ?
17 Tonyomɔsɛdingola tɛdikɔ tɔsaso ndo tosale etshikitanu naka kokaka. Aha tɛdikɔ tshɛ mbatongaka l’etombelo w’amɛna. ‘Tena la awui wa shashimoya’ tokomɛka sho tshɛ. (Und. 9:11) Kânga mbediɔ ngasɔ, Jehowa nongamɛka dia sho nkotsha tɛdikɔ tɔmɔtshi kânga mbakokaso mpomana l’ekakatanu. Yɛdikɔ yɔsa onto dia ndjakimɔ le Jehowa kana ya ntshika dɔkɔlɔkɔ dia diwala ekɔ yɛdikɔ yahahombe tshikitanyema. Nzambi nongamɛka dia sho nkotsha tɛdikɔ ta ngasɔ. (Adia Osambu 15:1, 2, 4.) Koko, tɛdikɔ efula bu la shɛngiya ya wolo. Onto lele la lomba atɔsɛdingolaka tɛdikɔ tɔsande mbala la mbala. Nde hatetawɔka di’otako mboshimba dia nsala etshikitanu wahombama lo tɛdikɔ tɔsande. (Tuk. 16:18) Dikambo dioleki ohomba le nde, ele ndjashikikɛ dia yoho yande ya lɔsɛnɔ yekɔ lo ntetemala ngɛnyangɛnya Nzambi.
Tetsha anto akina dia vɔ mbɔsa tɛdikɔ tangɛnyangɛnya Nzambi
18. Ngande wakoka ambutshi mbetsha anawɔ dia vɔ mbɔsaka tɛdikɔ t’amɛna?
18 Ambutshi kokaka nsala akambo efula dia nkimanyiya anawɔ dia vɔ mbeka dia mbɔsa tɛdikɔ tangɛnyangɛnya Nzambi. Ɛnyɛlɔ k’ɔlɔlɔ ekɔ wetshelo woleki dimɛna. (Luka 6:40) Naka kokaka, ambutshi mbeyaka nembetshiya anawɔ kɛnɛ kakawasale vɔamɛ dia mbɔsa tɛdikɔ tɔmɔtshi. Ondo vɔ kokaka nto nkombola dia mbisha anawɔ lotshungɔ dia vɔ mbɔsa tɛdikɔ tɔmɔtshi ndo vɔ ndjowawandola naka tɛdikɔ takɔ tamboyonga l’etombelo w’ɛlɔlɔ. Ko kakɔna kayotota naka yɛdikɔ yakɔshi ɔna yamboyonga l’etombelo wa kɔlɔ? Dui dia ntondo diakoka ambutshi nsala mbeyaka monga dia nkokɛ ɔna oma lo mpokoso, koko dikambo sɔ hongaka nshi tshɛ l’etombelo w’amɛna le ɔna. Ɛnyɛlɔ, ambutshi mbeyaka mbetawɔ di’ɔnawɔ monga la mukanda wɛnya dia nde ekɔ la lotshungɔ la nkɛndjakɛndja. Ko tɔshi dia ɔna ɔsɔ ambɔnyɔla ɛlɛmbɛ wendana l’ɔkɛndjɛkɛndjɛlɔ ko wambowodjɛ kibawo. Ambutshi mbeyaka mfuta kibawo kɛsɔ. Koko, naka vɔ nɔmba ɔna dia nde nkamba olimu dia ntana falanga ya mfuta kibawo kɛsɔ, kete nde ayeka dia mɛmba wotsho wa ditshelo diande hita.—Romo 13:4.
19. Kakɔna kahombaso mbetsha ambeki aso wa Bible, ndo ngande wakokaso nsala dikambo sɔ?
19 Yeso akatɛ ambeki ande dia vɔ mbetsha anto akina. (Mat. 28:20) Wetshelo woleki ohomba wakokaso mbisha ambeki wa Bible, ele mbaɛnya woho wakokawɔ mbɔsa tɛdikɔ t’amɛna. Dia vɔ nsala dikambo sɔ lo yoho ya dimɛna, sho pombaka mbewɔ diaha mbɔsa tɛdikɔ lo dihole diawɔ. Ekɔ ohomba efula dia sho mbaetsha dia vɔ kanaka yimba l’atɔndɔ wa lo Bible dia vɔ mbɔsaka tɛdikɔ vɔamɛ nɛ dia “shu tshe, untu l’untu, tayuyateketela le [Nzambi].” (Romo 14:12) Ɔnkɔnɛ, sho tshɛ onto l’onto tekɔ l’ɛkɔkɔ wa shikaa wa mbɔsaka tɛdikɔ tangɛnyangɛnya Nzambi.
[Nɔte ka l’ɛse ka dikatshi]
^ od. 4 Dia ntana awui akina wendana l’okambelo wa la dikila, enda sawo diele l’ɔtɛ a dui ɔnɛ: “Ngande wɔsami tangangɔ tɔsami oma lo dikila ndo ɛgzamɛ kana esakelo walɔmbawɔ dia kamba la dikila diami?” diakatondjama lo dikatshi di’okotsha dia Olimu aso wa Diolelo wa Ngɔndɔ ka dikumi l’ɔtɔi 2006, lɛkɛ 3-6.
Ngande wayoyokadimola?
• Lande na kahombaso mbeka woho wa mbɔsaka tɛdikɔ?
• Ngande wakoka wɔma monga la shɛngiya le so, ndo ngande wakokaso nshidiya wɔma aso?
• Akambo akɔna asamalo wahombaso nsala dia ndjashikikɛ ɔnɛ tekɔ lo mbɔsa tɛdikɔ tangɛnyangɛnya Nzambi?
[Ambola wa wekelo]
[Kiombo/Osato wa lo lɛkɛ 16]
Akambo wa nsala dia mbɔsa tɛdikɔ t’amɛna
1 Tewɔ dia monga akanga w’etako
2 Tosale eyangelo
3 Tɔlɔmbɛ Nzambi lomba
4 Tɔshi tɛdikɔ
5 Tokotsha tɛdikɔ tɔsaso
6 Tonyomɔsɛdingola tɛdikɔ tɔsaso ndo tosale etshikitanu naka kokaka
[Osato wa lo lɛkɛ 15]
Onto lengenga dia mbɔsa tɛdikɔ ekɔ oko pami kele lo waato wasutshasutshama la lɔpɛpɛ la wolo lo ndjale