Wokim Ol Disisen i Givim Biknem Long God

“Man i gat gutpela tingting, em i save was gut long ol pasin em i mekim.”​—SND. 14:15.

1, 2. (a) Wanem samting i namba wan bikpela samting taim yumi wokim ol disisen? (b) Bai yumi skelim wanem ol askim?

 ATING long olgeta de yumi save wokim dispela planti taim. Na planti taim dispela i no mekim bikpela samting long yumi. Tasol sampela taim em inap mekim bikpela samting long laip bilong yumi. Em wanem samting? Em ol disisen. Namba wan laik bilong yumi i olsem, yumi laik bai olgeta disisen yumi wokim, maski ol i bikpela o liklik, ol i mas givim biknem long God.​—Ritim 1 Korin 10:31.

² Olsem wanem? Yu pilim olsem em i isi long wokim ol disisen o i hatwok long wokim ol disisen? Sapos yumi laik kamap strongpela Kristen, yumi mas lain long kliagut long wanem pasin i stret na wanem pasin i no stret. Na yumi no ken bihainim tingting bilong narapela na wokim disisen, nogat, yumi mas wokim tingting bilong yumi yet na wokim disisen. (Rom 12:​1, 2; Hib. 5:14) Wanem sampela narapela as na yumi mas lain long wokim ol gutpela disisen? Bilong wanem sampela taim i hatwok tru long wokim ol disisen? Na yumi ken mekim wanem na bai ol disisen bilong yumi i givim biknem long God?

Bilong Wanem Yumi Mas Wokim Ol Disisen?

3. Yumi no ken larim wanem samting i stiaim tingting bilong yumi taim yumi wokim ol disisen?

³ Sapos yumi gat tupela tingting long ol lo bilong Baibel, orait ol wanskul o wanwok inap ting yumi no strong long bilip bilong yumi, olsem na i no hatwok long ol i pulim yumi. Ating ol i save giaman, trikim narapela, o stil na traim long pulim yumi long “bihainim pasin bilong ol” o haitim rong bilong ol. (Kis. 23:2) Tasol man i save wokim ol disisen i givim biknem long God, em bai i no larim pasin bilong pret o laik bilong i stap pren bilong ol narapela i kirapim em long mekim samting i no stret wantaim maus bilong bel em Baibel i skulim pinis.​—Rom 13:5.

4. Ating i gat wanem as na sampela i laik wokim ol disisen bilong yumi?

⁴ Sampela man husat i laik wokim disisen bilong yumi, ol i gat laik long helpim yumi, ol i no laik givim hevi long yumi. Na ating ol gutpela pren i strong long yumi mas bihainim tok bilong ol. Na tu, sapos yumi no stap moa wantaim famili, ating ol wanblut i save tingim yet yumi na pilim olsem taim yumi mas wokim sampela  bikpela disisen, ol i mas insait long dispela. Wanpela samting olsem, em long sait bilong oraitim sik. Baibel i tambuim pasin bilong kisim blut. (Apo. 15:​28, 29) Tasol sampela arapela rot bilong stretim sik, i no gat lo stret i makim wanem samting yumi ken mekim, olsem na yumi olgeta i mas wokim disisen bilong yumi yet long wanem kain marasin samting yumi orait long kisim o i no orait long kisim. a Ating ol wanblut bai i gat strongpela tingting long ol dispela samting. Tasol taim i gat wok long wokim disisen long ol dispela samting, olgeta Kristen i dediket na baptais pinis ol i mas “mekim ol samting em ol yet i gat wok long mekim.” (Gal. 6:​4, 5) Namba wan bikpela samting yumi laikim em olsem, maus bilong bel bilong yumi i mas i stap klin long ai bilong God.​—1 Tim. 1:5.

5. Yumi ken mekim wanem na bai bilip bilong yumi i no ken bagarap olsem sip i bruk long rip?

⁵ Sapos yumi no inap wokim disisen, bikpela hevi inap painim yumi. Disaipel Jems i tok kain man olsem i ‘save senisim nabaut tingting bilong em long olgeta samting em i mekim.’ (Jems 1:8) Man i no inap wokim disisen, tok bilong ol man bai pulim nabaut tingting bilong em, i olsem dispela man i stap long bot i no gat stia na bikpela win i sakim nabaut. Em i isi tru long bilip bilong dispela man i bagarap olsem sip i bruk long rip, na em bai tok em asua bilong ol narapela na hevi i painim em! (1 Tim. 1:19) Yumi ken mekim wanem bilong abrusim dispela? Yumi mas kamap “strong long bilip.” (Ritim Kolosi 2:​6, 7.) Bilong kamap strong olsem, yumi mas lain long wokim ol disisen i soim olsem yumi bilip long Tok Bilong God. (2 Tim. 3:​14-17) Tasol wanem samting inap mekim na yumi no inap wokim ol gutpela disisen?

Bilong Wanem i Hatwok Long Wokim Ol Disisen?

6. Pasin bilong pret inap mekim wanem long yumi?

⁶ Pret inap mekim na yumi no wokim disisen​—yumi pret olsem disisen yumi bai wokim i no stret, disisen bai i no wok gut, o ol narapela bai lap long yumi. Yumi ken pilim tru ol dispela tingting. I no gat wanpela man i laik wokim disisen i no gutpela, olsem disisen i kamapim hevi o mekim man i sem. Tasol maski i olsem, pasin bilong laikim tru God na Tok bilong em bai helpim yumi long daunim pasin bilong pret. Olsem wanem dispela inap helpim yumi? Pasin bilong laikim tru God bai kirapim yumi long skelim Baibel na ol buk na nius bilong Baibel, paslain long yumi wokim ol bikpela disisen. Long dispela rot bai yumi no mekim planti popaia tumas. Bilong wanem i olsem? Long wanem, Baibel inap ‘helpim man i gat liklik save tasol long kisim gutpela tingting, na [Baibel] bai i givim gutpela save long ol yangpela man, na soim ol long gutpela pasin bilong wokabaut.’​—Snd. 1:4.

7. Pasin bilong King Devit inap skulim yumi long wanem samting?

⁷ Olsem wanem? Oltaim bai yumi wokim ol disisen i stret? Nogat. Yumi olgeta i save popaia. (Rom 3:23) Olsem, King Devit i gat savetingting na i stap gut long God. Tasol sampela taim em i wokim ol disisen i no gutpela na dispela i givim pen na hevi long em yet na ol narapela. (2 Sml. 12:​9-12) Tasol maski i olsem, Devit i no larim ol popaia bilong em i kirapim em long ting olsem em i no inap wokim ol gutpela disisen em God i orait long en. (1 Kin. 15:​4, 5) Sapos yumi bihainim pasin bilong Devit na tingim olsem Jehova bai lusim tingting na fogivim ol sin bilong yumi, orait bai yumi inap wokim ol disisen maski bipo yumi bin mekim sampela popaia. Jehova bai wok yet long helpim ol man i laikim em na i bihainim tok bilong em.​—Sng. 51:​1-4, 7-10.

8. Tok aposel Pol i mekim long marit i skulim yumi long wanem samting?

⁸ Yumi ken daunim pasin bilong pret long wokim ol disisen. Olsem wanem yumi inap mekim dispela? Yumi mas tingim olsem long sampela disisen yumi mas wokim, i gat planti rot i stret long bihainim. Tingim tok aposel Pol i mekim long samting bilong marit. Holi spirit i kirapim em long tok: “Sapos wanpela man husat i no bin mekim maritpasin i ting em i no inap bosim laik bilong bodi bilong en na i gutpela moa long em i  marit, orait larim em i bihainim laik bilong em sapos em i no yangpela tumas. Em i no mekim sin. Larim ol kain man olsem i marit. Tasol sapos wanpela man i pasim tok long bel olsem em bai i no inap mekim maritpasin, na em i strong long bihainim dispela tingting, long wanem, em i no pilim olsem em i mas marit na em inap bosim em yet, orait dispela i gutpela.” (1 Kor. 7:​36-38) Pol i tok pasin bilong stap singel em i nambawan gutpela rot long bihainim, tasol i no dispela rot tasol i stret long bihainim.

9. Yu ting yumi mas wari long ol narapela bai i gat wanem tingting long ol disisen yumi wokim? Stori long dispela.

⁹ Olsem wanem? Yumi mas wari long ol narapela bai i gat wanem tingting long ol disisen yumi wokim? Yes, sampela taim yumi mas tingim dispela. Tingim tok Pol i mekim long pasin bilong kisim ol kaikai ol man inap ting ol i bin ofaim long ol imis. Em i tok i no olsem man i wokim disisen i no stret, tasol dispela disisen inap bagarapim man em maus bilong bel bilong em i no strong. Pol i pasim tok long mekim wanem? Em i tok: “Sapos kaikai i mekim brata bilong mi i pundaun, mi no inap kaikai abus gen. Nogut mi mekim brata bilong mi i pundaun.” (1 Kor. 8:​4-13) Yumi tu i mas tingim ol samting disisen bilong yumi bai mekim long maus bilong bel bilong ol narapela. Tasol namba wan samting yumi mas tingim, em samting ol disisen bilong yumi i mekim long pasin bilong yumi long pas gut wantaim Jehova. (Ritim Rom 14:​1-4.) Wanem ol stiatok bilong Baibel bai helpim yumi long wokim ol disisen i givim biknem long God?

Sikspela Rot Bilong Wokim Ol Disisen

10, 11. (a) Olsem wanem yumi inap abrusim pasin bilong hambak insait long famili? (b) Ol elda i mas tingim wanem samting taim ol i wokim ol disisen i mekim sampela samting long kongrigesen?

¹⁰ No ken hambak. Paslain long yumi makim samting yumi bai mekim, yumi mas askim yu yet olsem: ‘Em wok bilong mi long wokim dispela disisen?’ King Solomon i tok: “Ol man i save litimapim nem bilong ol yet bai i kisim bikpela sem. Ol man i gat gutpela tingting i save daunim ol yet.”​—Snd. 11:2.

¹¹ Papamama inap larim pikinini bilong ol long wokim sampela disisen, tasol ol pikinini i no ken ting ol yet i gat namba long mekim olsem. (Kol. 3:20) Ol maritmeri na ol mama i gat namba insait long famili long wokim sampela disisen, tasol ol i mas tingim wok bilong man bilong ol olsem het bilong famili. (Snd. 1:8; 31:​10-18; Efe. 5:23) Na olsem tasol, ol maritman i mas tingim olsem wok bos bilong ol i gat mak bilong en, ol i stap aninit long Krais. (1 Kor. 11:3) Ol elda i save wokim ol disisen i mekim sampela samting long kongrigesen. Tasol ol i save was gut, nogut ol i “kalapim ol tok i stap long Rait Holi.” (1 Kor. 4:6) Na tu, ol i bihainim ol tok i kam long gutpela wokboi. (Mat. 24:​45-47) Sapos yumi bihainim pasin daun na wokim ol disisen em yumi gat namba long wokim, bai yumi no givim pen na bel hevi long yumi yet na ol narapela.

12. (a) Bilong wanem yumi mas mekim wok painimaut? (b) Stori long olsem wanem wanpela inap mekim wok painimaut olsem.

¹² Mekim wok painimaut. Solomon i tok: “Ol man bilong wok ol i save tingting gut na mekim wok, olsem na wok bilong ol i kamap gutpela na ol i gat planti samting. Tasol sapos ol man i hariap tumas long mekim wok, bai wok bilong ol i  no kamap gutpela na ol bai i sot long ol samting.” (Snd. 21:5) Olsem, yu tingting long insait long wanpela wok bisnis? No ken larim bel bilong yu i stiaim tingting bilong yu. Kisim save long olgeta samting bilong dispela wok bisnis, na kisim tingting bilong ol man i gat save long samting yu laik mekim, na skelim ol stiatok bilong Baibel i stret long dispela samting. (Snd. 20:18) Bilong mekim gut wok painimaut, wokim tupela lista​—long wanpela lista raitim ol gutpela samting dispela wok bai kamapim, na long narapela lista raitim ol hevi bilong en. Paslain long yu wokim wanpela disisen, “skelim gut pe bilong dispela samting.” (Luk 14:28) Skelim ol samting disisen bilong yu bai mekim long yu long sait bilong mani na long pasin bilong yu long pas gut wantaim Jehova. Bilong mekim wok painimaut, yu mas lusim taim na wok strong. Tasol taim yu mekim olsem, ating bai yu no wokim ol disisen hariap tumas na kisim hevi long en long bihain.

13. (a) Wanem gutpela tok i stap long Jems 1:5? (b) Sapos yumi beten bilong kisim savetingting, olsem wanem dispela i helpim yumi?

¹³ Beten bilong kisim savetingting. Ol disisen yumi wokim bai givim biknem long God sapos yumi askim em long helpim yumi long wokim ol disisen. Disaipel Jems i tok: “Sapos wanpela bilong yupela i sot long savetingting, orait em i mas wok long askim God, na God bai givim long em. Long wanem, God i save amamas long givim planti samting long ol man na em i no save krosim ol taim em i mekim olsem.” (Jems 1:5) Yumi no ken sem long yumi mas kisim savetingting i kam long God bilong helpim yumi long wokim ol disisen. (Snd. 3:​5, 6) Sapos yumi bilip tasol long save bilong yumi yet, dispela inap giamanim yumi. Taim yumi beten askim God long givim yumi savetingting na yumi skelim ol stiatok i stap long Baibel, yumi larim holi spirit i helpim yumi long luksave long i gat wanem as tru na yumi laik mekim wanpela samting.​—Hib. 4:12; ritim Jems 1:​22-25.

14. Bilong wanem yumi no ken surikim taim bilong wokim disisen?

¹⁴ Wokim disisen. No ken hariap tumas long wokim disisen paslain long yu mekim wok painimaut na beten bilong kisim savetingting. Man i gat savetingting, em bai “was gut long ol pasin em i mekim.” (Snd. 14:15) Tasol tu, no ken surikim taim bilong wokim disisen. Man i mekim olsem bai kamapim kain kain eskius long i gat wanem as na em i no wokim disisen. (Snd. 22:13) Taim man i no wokim disisen, dispela i olsem em i larim ol narapela long bosim laip bilong em.

15, 16. Yumi mas mekim wanem bilong bihainim disisen bilong yumi?

¹⁵ Bihainim disisen bilong yu. Hatwok yumi mekim bilong wokim gutpela disisen inap lus nating, sapos yumi no wok strong long mekim ol samting i stret wantaim disisen bilong yumi. Solomon i tok: “Sapos yu mekim wanpela wok, orait taitim bun na mekim save tru.” (Sav. 9:10) Bilong disisen bilong yumi i ken wok gut, yumi mas redi long mekim ol samting yumi mas mekim  bilong bihainim dispela disisen. Olsem: Wanpela pablisa bilong kongrigesen i laik kamap painia. Olsem wanem? Em inap mekim dispela wok? Yes em inap, sapos em i no mekim planti wok skin na painim planti amamas we inap pinisim strong na taim em i mas i gat bilong mekim wok autim tok.

¹⁶ Planti taim ol gutpela disisen i hatwok long bihainim. Bilong wanem i olsem? Long wanem, “dispela graun olgeta i stap long han bilong Satan.” (1 Jon 5:19) Yumi mas pait wantaim “ol hetman i bosim tudak bilong dispela graun, na ol spirit nogut i stap antap.” (Efe. 6:12) Aposel Pol na disaipel Jut i tok, ol man husat i laik givim biknem long God, ol i mas pait strong.​—1 Tim. 6:12; Jut 3.

17. Long sait bilong wokim ol disisen, Jehova i laik bai yumi mas mekim wanem?

¹⁷ Bihain skelim gen disisen bilong yu na stretim sapos yu gat wok long mekim olsem. I no olgeta disisen i wok gut olsem yumi bin ting em bai wok. “Taim nogut i save painim yumi olgeta.” (Sav. 9:11) Tasol Jehova i laik bai yumi strong yet long bihainim sampela disisen yumi bin wokim, maski ol hevi i painim yumi. Disisen man i mekim bilong dediketim laip bilong em long Jehova o man i mekim tok promis taim em i marit, dispela i no samting em i ken senisim tingting long en, em i mas bihainim yet disisen em i bin wokim. God i tok yumi mas bihainim ol kain disisen olsem. (Ritim Song 15:​1, 2, 4.) Tasol planti disisen i no bikpela olsem. Man i gat savetingting, em bai skelim gen bihain ol disisen em i bin wokim. Em bai no larim pasin antap o strongpela het i pasim em long stretim o senisim disisen em i bin wokim. (Snd. 16:18) Namba wan samting em i tingim, em i laik bai wokabaut bilong em i givim yet biknem long God.

Skulim Ol Narapela Long Wokim Ol Disisen i Givim Biknem Long God

18. Olsem wanem papamama inap skulim pikinini bilong ol long wokim ol gutpela disisen?

¹⁸ Papamama inap mekim planti samting bilong helpim pikinini bilong ol long lain long pasin bilong wokim ol disisen i givim biknem long God. Gutpela piksa bilong papamama i nambawan gutpela rot bilong skulim pikinini. (Luk 6:40) Long taim i stret long mekim, papamama inap stori long pikinini long olsem wanem ol yet i bin wokim disisen long wanpela samting. Ol inap larim pikinini yet i wokim sampela disisen, na ol i mekim tok amamas taim disisen bilong ol i wok gut. Tasol olsem wanem sapos pikinini i mekim disisen i no gutpela? Ating pastaim papa o mama i laik banisim pikinini long ol samting nogut dispela bai kamapim, tasol planti taim dispela i no inap helpim pikinini. Olsem, papamama inap larim pikinini long kisim laisens bilong draiv. Tasol olsem wanem sapos pikinini i brukim lo bilong trafik na em i mas baim? Papamama inap baim, tasol sapos ol i tok pikinini i mas mekim wok bilong baim dispela samting, ating em bai lain long karim hevi bilong ol samting em yet i mekim.​—Rom 13:4.

19. Yumi mas skulim ol Baibel sumatin bilong yumi long wanem samting? Olsem wanem yumi inap mekim olsem?

¹⁹ Jisas i tokim ol disaipel bilong em long skulim ol narapela man. (Mat. 28:20) Wanpela bikpela samting yumi ken skulim ol Baibel sumatin long en, em pasin bilong mekim ol gutpela disisen. Bilong mekim gut dispela samting, yumi no ken tokim ol long samting ol i mas mekim. Nogat. Mobeta yumi skulim ol long skelim ol stiatok bilong Baibel bambai ol yet inap wokim disisen long ol samting ol i mas mekim. Em nau, “yumi olgeta wan wan bai tokaut long God long as bilong ol samting yumi bin mekim.” (Rom 14:12) Olsem na i gat as tru na yumi olgeta i laik wokim ol disisen i givim biknem long God.

[Futnot]

Bai Yu Bekim Olsem Wanem?

• Bilong wanem yumi mas lain long rot bilong wokim ol disisen?

• Pasin bilong pret inap mekim wanem long yumi? Olsem wanem yumi inap daunim pasin bilong pret?

• Yumi ken bihainim wanem 6-pela rot bilong mekim ol disisen i givim biknem long God?

[Askim Bilong Stadi]

[Blok/Piksa long pes 16]

Ol Rot Bilong Mekim Ol Gutpela Disisen

1 No Ken Hambak

2 Mekim Wok Painimaut

3 Beten Bilong Kisim Savetingting

4 Wokim Disisen

5 Bihainim Disisen

6 Skelim Gen na Stretim

[Piksa long pes 15]

Man i no inap wokim disisen em i olsem man i sindaun long bot i no gat stia na bikpela win i sakim nabaut