Brorhiẹn ro Brọghọphiyọ Ọghẹnẹ Oma
Brorhiẹn ro Brọghọphiyọ Ọghẹnẹ Oma
“Ohwo ro vwo iroro obọ rọ ra ọye o nẹ.”—ISẸ. 14:15.
1, 2. (a) Die yen ofori nẹ ọ dia ọdavwẹ rẹsosuọ rẹ avwanre ọke re de brorhiẹn? (b) Enọ vọ yen a cha fuẹrẹn?
AVWANRE brorhiẹn buebun kẹdẹ kẹdẹ. Buebun rayen ghwa ghanre-e. Jẹ, evo se djobote akpeyeren rẹ avwanre mamọ. O toro orhiẹn rẹ avwanre brẹ-ẹ, te ọ rhoro yẹrẹ ọ hanvwere, obo re ma ghanre ọyen e vwo brọghọ phiyọ Ọghẹnẹ oma.—Se 1 Kọrẹnt 10:31.
2 Ọ lọhọ kẹ wẹ wo vwo brorhiẹn gbanẹ ọ bẹn kẹ wẹ? Avwanre da guọnọ yerin tedje kerẹ Onenikristi, ofori nẹ a riẹn ofẹnẹ rẹ obo re gbare vẹ obo re brare rere e bru orhiẹn nene obo re segbuyota, ọ dia oborẹ ohwo ọfa tare-e. (Rom 12:1, 2; Hib. 5:14) Erhọ yen iroro efa re sorọ o vwo fo nẹ a riẹn obo re brẹ omamọ orhiẹn? Diesorọ ọ vwọ bẹn ọkievo e vwo brorhiẹn? Kẹ, mavọ yen avwanre se vwo brorhiẹn ri che brọghọ phiyọ Ọghẹnẹ oma?
Diesorọ E Vwo Brorhiẹn?
3. Erọnvwọn vọ yen a cha vwẹ uphẹn kẹ-ẹ nẹ i gbowọphiyọ orhienbro rẹ avwanre?
3 Avwanre de vwo ẹwẹn ivivẹ kpahen e vwo ruẹ oborẹ Baibol na tare, emọ rẹ isikuru avwanre yẹrẹ ihwo rẹ avwanre vẹ ayen gba wian se roro nẹ e ghwe se oborẹ Baibol na tare gbuyota-a, ọtiọyena, ayen sa riẹriẹ avwanre vwo ru oborẹ ayen guọnọre. Ayen se gun efian, ghwa ohwo re yẹrẹ chuji, ayen me davwẹngba vwọ riẹriẹ avwanre vwọ “vwẹ ẹro kerẹ otu” na womarẹ avwanre vwọ vwomaba ayen yẹrẹ rhurhu oborẹ ayen ruru na. (Eyan. 23:2) Ẹkẹvuọvo, ohwo rọ riẹn obo re brorhiẹn ri brọghọ phiyọ Ọghẹnẹ oma, cha vwẹ uphẹn kẹ oshọ yẹrẹ urhurusivwe rẹ ihwo vwo rhiabọreyọ nẹ o muo vwo ru obo ri che kpokpo ẹwẹn obrorhiẹn rọye-en.—Rom 13:5.
4. Diesorọ ihwo evo vwọ guọnọ brorhiẹn vwọ kẹ avwanre?
4 Ọ dia ihwo eje re guọnọ brorhiẹn kẹ avwanre yen vwo orharhe ẹwẹ-ẹn. Igbeyan re guọnọ chọn avwanre uko sa guọnọ nẹ e ru nene uchebro rayen. Ọ da tobọ dianẹ avwanre dia sherẹ kẹ uwevwin, ọsẹ vẹ oni yẹrẹ ihwo rẹ orua avwanre sa guọnọ brorhiẹn kẹ avwanre kidie ayen vwo ọdavwẹ rẹ avwanre. Kerẹ udje, roro kpahen ota rẹ omaesivwo. Baibol na tarọ phephẹn nẹ a kẹnoma kẹ ọbara. (Iruo 15:28, 29) Baibol na ghwa vwẹ odjekẹ kiriguọ phia kpahen oka rẹ ona rẹ omaesivwo sansan rẹ avwanre che rhiabọreyọ-ọ, avwanre ọvo yen che brorhiẹn rẹ ona rẹ omaesivwo re che rhiabọreyọ yẹrẹ sen. Ihwo ri vwo ẹguọnọ rẹ avwanre se vwo orhiẹn romobọ rayen vwẹ ẹdia nana. Ẹkẹvuọvo, Onenikristi ọvuọvo ro bromaphiyame re yen che brorhiẹn na kidie “dohwo doghwa rọye gba cha ghwa” vwẹ ẹdia nana. (Gal. 6:4, 5) Obo re ma ghanre kẹ avwanre yen avwanre vwo vwo ẹwẹn obrorhiẹn rọ fonro vwẹ obaro rẹ Ọghẹnẹ, ọ dia ihworakpọ-ọ.—1 Tim. 1:5.
5. Mavọ yen a sa vwọ kẹnoma kẹ e vwo miovwo oyerinkugbe rẹ avwanre vẹ Jihova?
5 E che vwo ebẹnbẹn buebun avwanre rha riẹn obo re brorhiẹ-ẹn. Odibo Jems siri nẹ ohwo ro se brorhiẹ-ẹn pha kerẹ ohwo “ro hwomamu vwẹ asan ọvo-o.” (Jems 1:8) Kerẹ ohwo rọhẹ evun rẹ okọ ro vwo uviokọ-ọ rẹ odju muẹ gene vwẹ ọke rẹ ogiribo de djuẹ, ọtiọyen iroro rẹ ihwo efa ji che sun orhiẹn rẹ ohwo rọ riẹn obo re brorhiẹ-ẹn. Ohwo tiọyena se miovwo oyerinkugbe rọyen vẹ Jihova ọ me yọnrọn ihwo efa suọ! (1 Tim. 1:19) Mavọ yen avwanre sa vwọ kẹnoma kẹ ẹdia tiọyena? Ọyen “esegbuyota rẹ [avwanre] ejobi vwọ ghwotọ kokoroko.” (Se Kọlose 2:6, 7.) Esegbuyota rẹ avwanre se vwo muotọ, kẹ ofori nẹ avwanre yono obo re brorhiẹn ro djephia nẹ e se Ota rẹ Ọghẹnẹ gbuyota. (2 Tim. 3:14-17) Die yen sa nẹrhẹ ọ bẹn e vwo bru omamọ orhiẹn?
Oboresorọ Ọ Vwọ Bẹn E Vwo Brorhiẹn
6. Idjerhe vọ yen oshọ se vwo djobọte avwanre?
6 Oshọ se kuọrọn avwanre—oshọ nẹ e che bru orharhe orhiẹn, oshọ nẹ e che phi kparobọ-ọ, oshọ nẹ orhiẹn rẹ avwanre sa ghwa omavovwẹ rhe avwanre. Oshọ tioyena se ghini mu ohwo. O vwo ohwo vuọvo rọ guọnọ brorhiẹn rọ cha so okpetu yẹrẹ ghwa omavovwẹ rhe-e. Ẹguọnọ re vwo kpahen Ọghẹnẹ vẹ Ota rọyen sa chọn avwanre uko vwo si oshọ tiọyena kpotọ. Vwẹ idjerhe vọ? Ẹguọnọ re vwo kpahen Ọghẹnẹ che mu avwanre vwọ hiẹ Baibol na vẹ ẹbe rẹ ukoko na tavwen e ki brorhiẹn eghanghanre. Ọnana che si ichobọ rẹ avwanre kpotọ. Diesorọ? Kidie Baibol na sa “vwẹ iroro kẹ ihwo ighẹnghẹn erianrien vẹ evughe kẹ imighene.”—Isẹ 1:4.
7. Die yen udje rẹ Ovie Devid se yono avwanre?
7 Ọkieje yen e se vwo bru omamọ rẹ orhiẹn? Ẹjo. Avwanre ihwoeje ruẹ chọ. (Rom. 3:23) Kerẹ udje, Ovie Devid oyen ohwo ro vwo aghwanre vẹ esegbuyota. Jẹ, o vwo ọkievo ro vwo bru erharhe erhiẹn re so ojaeriọ kẹ vẹ ihwo efa. (2 Sam. 12:9-12) Ẹkẹvuọvo, echobọ ri Devid na nẹrhẹ o roro nẹ o gbi che se bru orhiẹn re cha vwerhẹn Jihova oma-a. (1 Ivie 15:4, 5) Kerẹ Devid avwanre ji se bru omamọ orhiẹn ọ da tobọ dianẹ e brorhiẹn chọ vwẹ obuko re siẹrẹ avwanre da karophiyọ nẹ Jihova cha kpairoro vrẹ echobọ rẹ avwanre ji vwo ghovwo imwemwu rẹ avwanre. O che bicha ihwo ri vwo ẹguọnọ rọyen ji nyo upho rọyen.—Une 51:1-4, 7-10.
8. Die yen avwanre yono vwo nẹ oborẹ Pol ta kpahen orọnvwe?
8 E se si ẹnwan re vwo brorhiẹn kpotọ. Mavọ yen e se ruo wan? Ọyen a vwọ mrẹvughe nẹ omamọ rẹ ọwọẹjẹ buebun herọ re se nene vwẹ ẹdia evo. Roro kpahen oborẹ ọyinkọn Pọl ta kpahen orọnvwe. Ẹwẹn ọfuanfon na muro vwo si: “Ọ da dianẹ ohwo roro iroro ro jefo kpahe aye rọye rọ sa phihọ otọ, rẹ urhuru sivwe rọye da ga, kirobo rọ ghene sa gan, e gbe jẹn o ru kirobo rọ guọnọre: e jẹn ayen rọvwọ ọye dia umwemwu-u. Ẹkẹvuọvo ohwo da ta vwẹ udu rọye kokoroko ọ dianẹ kẹ a gbarọ phihọ-ọ ẹkẹvuọvo ọ da dia ohwo ro se chirako rẹ urhuru sivwe rọye, rọ da ta vwẹ udu rọye nẹ, ọ sa phihọ otọ rhiri, yọ riẹ ru.” (1 Kọr. 7:36-38) Dede nẹ Pọl jiro nẹ a vwọ dia kpogono yen me yovwin, ọ je tanẹ a vwọ rọvwọn yovwirin.
9. Ofori nẹ avwanre roro kpahen ihwo efa siẹrẹ avwanre da guọnọ brorhiẹn? Djekpahọn.
9 Ofori nẹ avwanre roro kpahen ihwo efa siẹrẹ avwanre da guọnọ brorhiẹn? E, tẹdia evo. Vwo oniso rẹ oborẹ Pọl ta kpahen a vwọ ria emu re vwo ze izobo kẹ ema. Ọ tare nẹ, ọ dia ọ chọre a vwọ re oka rẹ emu yena-a, ẹkẹvuọvo ọ chọre ọ da dianẹ ọ cha so ikprowọ kẹ ohwo ofa siẹrẹ a da riọ. Kẹ, orhiẹn vọ yen Pọl bruru? O de si: “Ọ da dia emuọre kọye cha so eshe kẹ oniọvo mẹ, me gbe re uvwo rẹ eranvwe-e, ọ da rha so eshe kẹ oniọvo mẹ.” (1 Kọr. 8:4-13) Ọtiọyen o ji fo nẹ avwanre roro kpahen ẹwẹn obrorhiẹn rẹ ihwo efa ọke rẹ avwanre da guọnọ brorhiẹn e vwo jẹ ikprowọ ẹsuọ kẹ ayen. Jẹ, oborẹ orhiẹn rẹ avwanre se vwo djobọte oyerinkugbe rẹ avwanre vẹ Jihova yen obo re ma ghanre kẹ avwanre. (Se Rom 14:1-4.) Iyono ri Baibol vọ yen sa chọn avwanre uko vwo brorhiẹn ri che brọghọ phiyọ Ọghẹnẹ oma?
Owọẹjẹ Esan re sa Chọn Avwanre Uko Vwo Bru Omamọ Orhiẹn
10, 11. (a) Mavọ yen avwanre sa vwọ kẹnoma kẹ e vwo brorhiẹn rẹ wo vwo uturhi re vwo bru vwẹ orua na-a? (b) Die yen ofori nẹ ekpako kọn phiyọ ẹwẹn ọke rẹ ayen de brorhiẹn ro shekpahen ukoko na?
10 Wo brorhiẹn rẹ wo vwo uturhi wo vwo bru-u. Tavwen e ki brorhiẹn, ofori nẹ avwanre nọ oma rẹ avwanre, ‘Mẹvwẹ yen ohwo ro fori nẹ o brorhiẹn nana?’ Ovie Solomon de si: “Oma ẹyan da rhe nu, oma ẹphọphọ ko ji ghwe nene; ẹkẹvuọvo omaevwokpotọ ọ vẹ aghwanre gba yan.”—Isẹ 11:2.
11 Emiovwọn sa vwẹ uphẹn kẹ emọ rayen nẹ ayen bru erhiẹn evo, ẹkẹvuọvo e jẹ emọ ghwa vwẹ ẹwẹn romobọ rayen vwo brorhiẹn yena-a, ayen nọ esẹ vẹ ini rayen tavwen. (Kọl. 3:20) Ofori nẹ eya vẹ ini karophiyọ nẹ ọshare yen ọgbuyovwin rẹ orua na dede nẹ ayen vwo uturhi rẹ ayen vwo brorhiẹn evo. (Isẹ 1:8; 31:10-18; Ẹfe. 5:23) Vwẹ ọke vuọvo na, e jẹ eshare je riẹn nẹ ogangan rayen ji vwo asan rọ bare kidie Kristi yen ọgbuyovwin rayen. (1 Kọr. 11:3) Ekpako yen brorhiẹn vwọ kẹ ukoko na. Ẹkẹvuọvo, e jẹ ayen vwo imuẹro nẹ ayen yan nene Ota rẹ Ọghẹnẹ “kirobo rẹ ọbe ọfuanfon na djeri.” (1 Kọr. 4:6) Ayen ji nene odjekẹ rẹ odibo esiri na kpẹkpẹkpẹ. (Mat. 24:45-47) Avwanre sa vrabọ rẹ ebẹnbẹn buebun siẹrẹ a da vwomakpotọ brorhiẹn rẹ avwanre vwo uturhi re vwo bru ọvo.
12. (a) Diesorọ e vwo ru ehiahiẹ? (b) Djekpahen oborẹ ohwo se ru ehiahiẹ na wan.
12 Ru Ehiahiẹ. Solomọn siri nẹ, “Iroro rẹ ohwo rọ vwẹ ẹro te otọ je yovwo-o, ẹkẹvuọvo ohwo ro bru okpakpa che fiabọ.” (Isẹ 21:5) Kerẹ udje, wo roro sẹ ofori wo vwo rhiabọreyọ oka rẹ iruo ọvo yẹrẹ siọn? Wọ vwẹ uphẹn kẹ oborẹ oma ru we nẹ o djobọte orhiẹn wẹ-ẹn. Ru ehiahiẹ wọ vwọ riẹn uyota eghanghanre kpahen iruo na, nokpẹn rẹ uchebro mie ihwo re riẹn kpahọn, wo mi ji roro kpahen oborẹ Baibol na ta kpahọn. (Isẹ 20:18) Wo de ru ehiahiẹ wẹn nu, gbe si phiyọ ọbe ọvọ erere ri se te we obọ kugbe imuoshọ ri se norhe siẹrẹ wo de rhiabọreyọ iruo na. Tavwen wo ki brorhiẹn, “roro unu ro muru.” (Luk 14:28) Wo roro kpahen igho rẹ wọ cha mrẹ vwẹ iruo na ọvo-o, ji roro kpahen obo re cha phia kẹ oyerinkugbe wẹn vẹ Jihova. Ọ reyọ ọke vẹ ẹgba e ki se ru ehiahiẹ. Ẹkẹvuọvo wo de ruo, wọ sa kẹnoma kẹ orhiẹn rẹ okpakpa rọ sa so okpetu vẹ ẹnwan rẹ ọkamuka vwẹ obaro obọ.
13. (a) Imuẹro vọ yen evunrẹ Jems 1:5? (b) Mavọ yen ẹrhovwo ra nẹ vwọ kẹ aghwanre sa vwọ chọn avwanre uko?
13 Nẹrhovwo vwọ kẹ aghwanre. Orhiẹn rẹ avwanre cha vwerhẹn Jihova oma siẹrẹ avwanre da nokpẹn rẹ ukẹcha rọyen tavwen e ki bro. Odibo Jem de si: “Ohwo ro rhe vwo aghwanre vwẹ usun rẹ ovwa-an, e jọ nọ vwẹ obọ rẹ Ọghẹnẹ, ọye ri se siobọ nẹ kemu kemu kẹ ohwo, ọ ghwọ kuẹ ohwo-o; kọ vwọ ke.” (Jems 1:5) Wo jẹ oma vo owẹ wọ vwọ nokpẹn rẹ ukecha-a kidie avwanre eje yen guọnọ aghwanre ri Jihova ọke rẹ avwanre da guọnọ brorhiẹn. (Isẹ 3:5, 6) Vwọ vrẹ ọyena, avwanre da vwẹroso aghwanre avwanre ọvo ọke re de brorhien, o se sun avwanre ghwru. A da nẹrhovwo vwọ kẹ aghwanre je hiẹ Ota rẹ Ọghẹnẹ vwọ kẹ ukẹcha ọke ra da guọnọ brorhiẹn, jẹ a vwẹ uphẹn kẹ ẹwẹn ọfuanfon na nẹ ọ chọn avwanre uko vwọ riẹn oboresorọ a vwọ guọnọ bru oka rẹ orhiẹn evo.—Hib. 4:12; se Jems 1:22-25.
14. Diesorọ o vwo fo nẹ a kẹnoma kẹ e vwo gbeghẹrẹ?
14 Brorhiẹn na. Wo brokpakpa brorhiẹ-ẹn jokpanẹ wo ru ehiahiẹ je nẹrhovwo rhe Jihova vwọ kẹ aghwanre nure. Ohwo ro vwo aghwanre nabọ reyọ ọke vwo roro emu fiotọ kidie “obọ rọ ra ọye o nẹ.” (Isẹ 14:15) Ẹkẹvuọvo, wo gbeghẹrẹ-ẹ. Ọkiọvo, ihwo evo tobọ vwo ugogo ọrọnvwọn ro mu ayen vwo gbeghẹrẹ-ẹ. (Isẹ 22:13) Oka rẹ ohwo tiọyen rhie uphẹn phiyọ kẹ ihwo efa nẹ ayen brorhiẹn vwọ kẹ.
15, 16. Die yen o churobọ si e vwo phikparobọ vwẹ orhiẹn rẹ avwanre bruru?
15 Ru oborẹ wo brorhiẹn nẹ wo che ru. Ẹgbaẹdavwọn rẹ avwanre vwo bru omamọ orhiẹn che shefia avwanre rhe nenesi rẹ orhiẹn na-a. Solomọn de si: “Kemu kemu rẹ obọ wẹn se ru, vwẹ ogangan wẹn ruo.” (Aghwo. 9:10) Avwanre da guọnọ phikparobọ ofori nẹ e ru erọnvwọn re cha chọn avwanre uko vwo phikparobọ. Kerẹ udje, oghwoghwota ọvo se brorhiẹn rọ vwọ dia ọkobaro. O che phikparobọ? O se ruo siẹrẹ ọ rha vwẹ uphẹn kẹ igho ẹguọnọ vẹ akpọẹriọ nẹ e reyọ ọke vẹ ẹgba rọyen ro fori nẹ o vwo kpo aghwoghwo-o.
16 Avwanre da tobo bru omamọ orhiẹn, ọkiọvo ọ bẹn e vwo phikparobọ vwọ. Diesorọ? Kidie “akpọ na ejobi hẹ obọ rẹ ogangan rẹ ohwo umwemwu na.” (1 Jọn 5:19) Avwanre cha họnre vwọso “ihwo ride ri suẹn akpọ rẹ ebri nana, otuofovwi rẹ erhi umwemwu re hẹ obo obenu na.” (Ẹfe. 6:12) Ọyinkọn Pọl vẹ odibo Jud jẹ avwanre riẹn nẹ akpeyeren cha lọhọ-ọ vwọ kẹ ihwo re guọnọ ga Ọghẹnẹ.—1 Tim. 6:12; Jud 3.
17. Die yen Jihova rhẹro rọyen mie avwanre vwẹ ọke re de brorhiẹn?
17 Rhoma fuẹrẹn orhiẹn na rere wo ru ewene phiyọ siẹrẹ o de fo. O dia orhiẹn eje yen wian nene obo re muegbe rọye-en kidie “ọke vẹ uphe ro di bru” avwanre ejobi cha. (Aghwo. 9:11) Ẹkẹvuọvo, o vwo orhiẹn evo re che se wene-e, ọ da tobọ dianẹ avwanre roro nẹ ọ cha bẹn e vwo phikparobọ vwevunrẹ rayen. Orhiẹn rẹ ohwo vwọ vwomakpahotọ kẹ Jihova vẹ ive rẹ orọnvwe dia orhiẹn re se wene-e. Ọghẹnẹ guọnọre nẹ avwanre ru nene orhiẹn tiọyena. (Se Une Rẹ Ejiro 15:1, 2, 4.) Orhiẹn buebun rẹ avwanre brẹ ghwa ghanre-e. Ọtiọyena, oyen obo ri yovwirin e de roro kpahen orhiẹn re bru wanre. A da mrẹvughe nẹ ofori e vwo ru ewene phiyọ orhiẹn ọvo re bruru vwẹ ọkiọvo rọ wanre, e jẹ a vwẹ uphẹn kẹ omaẹkparọ nẹ ọ dobọ rẹ avwanre ji e vwo jẹ ewene na eruo-o. (Ise 16:18) Obọ re ma ghanre yen avwanre vwo yeren akpọ vwẹ idjerhe ro de brọghọ phiyọ Jihova oma.
Yono Ihwo Efa Oborẹ Ayen se Vwo Brorhiẹn ri Che Brọghọ Phiyọ Jihova Oma
18. Mavọ yen emiọvwọn se vwo yono emọ rayen obo re brẹ omamọ orhiẹn?
18 Emiọvwọn sa chọn emọ rayen uko vwọ riẹn obo re brorhiẹn ri che brọghọ phiyọ Jihova oma. Idjerhe ro me yovwin rẹ ayen se vwo yono emọ rayen ọyen ayen vwo phi omamọ rẹ udje phiyotọ. (Luk 6:40) Vwẹ ọke ro shephiyọ, emiọvwọn sa vuẹ emọ rayen oborẹ ayen komobọ vwo bru oka rẹ orhiẹn ọvo. Ayen je sa vwẹ uphẹn kẹ emọ rayen nẹ ayen brorhiẹn evo ji jiri ayen siẹrẹ ayen de bru omamọ orhiẹn. Kẹ, ọmọ wẹn de bru orharhe orhiẹn vwo? Emiọvwọn na se vwo ẹwẹn rẹ ayen vwo rhuẹrẹ ebẹnbẹn na phiyọ kẹ ọmọ na, ẹkẹvuọvo, ọnana cha vwẹ ukẹcha kẹ ọmọ na vwo yono nẹ echobọ rọyen rhe-e. Kerẹ udje, emiọvwọn sa vwẹ uphẹn kẹ ọmọ rayen nẹ o ru driver’s license rọyen. Ọ vwọ djẹ imoto kọ churhi rẹ idjerhe ri igọmẹti vwo mu, a da tanẹ ọ hwa igho evo. Ọsẹ yẹrẹ oni rọyen sa hwa igho na kẹ. Ẹkẹvuọvo, ayen da yan jẹ ọmọ na vwọ nẹ ọyen ọvo wian owian vwọ hwosa na, ọ cha nẹrhẹ ọmọ na yono vwo nẹ echobọ rọyen.—Rom 13:4.
19. Die yen ofori nẹ e yono ihwo rẹ avwanre vwẹ Baibol yono, kẹ, mavọ yen e se vwo ru ọtiọyen?
19 Jesu vuẹ idibo rọyen nẹ ayen yono ihwo efa. (Mat. 28:20) Uyono ọghanghanre ọvo re se yono ihwo rẹ avwanre vwẹ Baibol yono ọyen e vwo yono ayen obo re brẹ omamọ orhiẹn. A sa vwọ chọn ayen uko vwo yono obo re brẹ omamọ orhiẹn, ofori nẹ a kẹnoma kẹ a vwọ vuẹ ayen oborẹ ayen che ru. Ukperẹ ọtiọyen, e yono ayen oborẹ ayen sa vwọ mrẹ omamọ rẹ uchebro vwẹ Baibol na rere ayen komobọ sa vwọ jẹ ojẹ rẹ oborẹ ayen che ru. Kidie “ohwo ọvuọvo kọ cha vwẹ unu gbe ikun rẹ oma rọye kẹ Ọghẹnẹ.” (Rom 14:12) Ọtiọyena, ofori nẹ avwanre ihwoeje yono obo re brorhiẹn ri che brọghọ phiyọ Ọghẹnẹ oma.
Die Yen Ẹkpahọnphiyọ Wẹn?
• Diesorọ o vwo fo nẹ e yono obo re brorhiẹn?
• Idjerhe vọ yen oshọ se vwo djobọte avwanre, kẹ, mavọ yen avwanre se vwo phi oshọ rẹ avwanre kparobọ?
• Owọẹjẹ esan vọ yen sa chọn avwanre uko vwo brorhiẹn ri che brọghọ phiyọ Jihova oma?
[Onọ]
[Ekpeti/Uhoho]
Owọẹjẹ re sa Chọn Avwanre Uko Vwo Bru Omamọ Orhiẹn
1 Kẹnoma kẹ E Vwo Brorhiẹn re Vwo Uturhi re Vwo Bru-u
2 Ru Ehiahiẹ
3 Nẹrhovwo Vwọ kẹ Aghwanre
4 Brorhiẹn Na
5 Ru Oborẹ Wo Brorhiẹn nẹ Wo Che Ru
6 Rhoma Fuẹrẹn ji ru Ewene
[Uhoho]
Ohwo rọ riẹn obo re brorhiẹ-ẹn pha kerẹ ohwo rọ evun rẹ okọ ro vwo uviokọ-ọ rẹ odju muẹ gene vwẹ ọke rẹ ogiribo de djuẹ