Man̈anaova Fanapahankevitry Man̈amia Voninahitry Zan̈ahary

‘Olo misy jery mandiniky dianany tsiaraikiaraiky.’​—OHAB. 14:15.

1, 2. a) Ino raha voanalohany mila iritriretintsika izikoa fa hanapakevitry? b) Ino aby fan̈ontanian̈a handeha hidinihintsika?

 ISANANDRA anao tsy maintsy man̈ano izio fo. Sasany amizio tsy dia misy vokany loatra. Fa sasany ndraiky mety hisy vokany maventy amy fiain̈ananao. Ino raha zen̈y? Izio fanapahankevitry. Amy fanapahankevitry jiaby ataontsika, na maventy zen̈y na hely, raha voanalohany mila iritriretin̈y, han̈amia voninahitry Zan̈ahary.​—Vakia 1 Korintianina 10:31.

² Fahitanao izy, sarotro sa mora mangala fanapahankevitry? Izikoa tianao hanjary Kristianin̈y matotro, anao mila mianatra mahay man̈avaka ny tsara ndreky ratsy, ke man̈ano fanapahankevitry mifan̈araka aminy eritreritrinao, fa tsy ninolo. (Rom. 12:1, 2; Heb. 5:14) Nan̈ino ma atsika mila mianatra mangala fanapahankevitry tsara? Nan̈ino tsy mora ndraikindraiky man̈ano zen̈y? Baka io ino aby raha mila hatao baka hahavitan̈a mangala fanapahankevitry man̈amia voninahitry Zan̈ahary?

Nan̈ino atsika mila manapakevitry?

3. Ino raha tsy tokony hambelantsika hibeko fanapahankevitry ataontsika?

³ Izikoa atsika misalasala hangala fanapahankevitry mifan̈araka amy fitsipikiny Baiboly, iro piaramianatra na piaramiasa amintsika aby io mety hieritreritry fa atsika tsy ten̈a resy lahatra tsarabe amy raha inoantsika. Ke olo karaha zen̈y farandraha mora havadiky jery eky. Iro mety havandy, han̈ano afera, na hangalatra. Ke atsika hampirisihindro han̈ano karaha zen̈y koa, na hitatahy iro han̈asitriky raha ratsy ataondro io. (Eks. 23:2) Fa olo araiky mahay man̈ano fanapahankevitry man̈amia voninahitry Zan̈ahary ndraiky, tsy mety han̈eky ho resiny favozoan̈a olo. Fan̈irian̈a ho tianolo io koa tsy ambelany hitariky izy han̈ano raha mifanohitry aminy eritreritrinany efa nampiofan̈iny tsarabe tamy Baiboly.​—Rom. 13:5.

4. Ino mahavy olo sasany tihanapakevitry amy pilasintsika?

⁴ Tsy olo jiaby tihanapakevitry amy pilasintsika io tihan̈ano raha ratsy amintsika aby. Mety hisy naman̈a tihan̈ampy atsika ke mety hanery atsika han̈araka hevitrindro. Havantsika koa ten̈a tia atsika. Ke nata atsika efa tsy miaraka mipetraka amindro eky, sasany amindro mety mbala hidikiditry amy fanapahankevitry maventy mila hataontsika fo. Ohatra ziô, resaka fitahan̈a. Baiboly efa mivolan̈a mazava tsarabe fa fady mampiditry lio. (Asa. 15:28, 29) Kanefa misy karazan̈a fitsaboan̈a sasany tsisy fivolan̈ana mety sa tsy mety, ke anjaranolo tsiaraikiaraiky fo manapakevitry momba zen̈y. a Havantsika aby io mety han̈izingizin̈y hevitrindro mare izikoa fa misy raha karaha zen̈y. Kanefa, azovy manan̈a andraikitry hanapakevitry momba zen̈y? Kristianin̈y tsiaraikiaraiky efa nanokanten̈a ndreky natao batisa. (Gal. 6:4, 5) Tsy fankasitrahan̈a baka aminolo raha ten̈a maventy amintsika, fa fanan̈ana eritreritry madio manoloan̈a Zan̈ahary.​—1 Tim. 1:5.

5. Ino raha mila hataontsika, koa tsy tiantsika ho vaky sambo amy finoan̈a?

⁵ Mety hidiranandra mare atsika izikoa misalasala hanapakevitry. Jakoba, pianatra Jesosy, nanoratra fa olo araiky misalasala io olo “miovaova amy raha jiaby ataony.” (Jak. 1:8) Izy mira olo araiky an̈abo sambo tsisy volan, kanefa ranomasin̈y mihetsiky mare. Ke hevitrinolo fo arehany, kanefa izio miovaova. Ho mora aminolo karaha zen̈y ho vaky sambo amy finoan̈a, ke olo fo amy zay baka io hamezany tsin̈y. (1 Tim. 1:19) Karakory ialan̈a amy raha karaha zen̈y? Atsika mila “tsy ho voahozongozon̈o amy finoan̈a.” (Vakia Kolosianina 2:6, 7.) Karakory atao baka tsy ho voahozongozon̈o? Mila haboakantsika amy fanapahankevitry ataontsika fa atsika mino mare Volan̈a Zan̈ahary. (2 Tim. 3:14-17) Fa, ino ma raha mety hisakan̈a atsika tsy han̈ano fanapahankevitry tsara?

Nan̈ino ma sarotro manapakevitry?

6. Ino vokatra tahotro io amintsika?

⁶ Tahotro io mety hisakan̈a atsika tsy hangala fanapahankevitry. Atsika baka mety havozo mare tsao ratsy fanapahankevitry ataontsika, na tsao tsy hahomby izio, na koa mavozo tsao ataonolo dindery. Tsy diso atsika koa mahatsapa karaha zen̈y. Tsisy olo baka tihan̈ano fanapahankevitry ratsy, mety hampisy problemo na han̈isy baraka zen̈y. Ke ino basy han̈ampy atsika tsy havozo? Fitiavan̈a Zan̈ahary ndreky Volan̈anany. Amy fomba karakory? Fitiavan̈a Zan̈ahary io handrisiky atsika handiniky Volan̈anany ndreky iro fitaovan̈a mifototro amy Baiboly, isaka alohany han̈ano fanapahankevitry maventy. Ke vokany, tsy ho tafan̈ano hadisovan̈a matetiky atsika. Fotony Baiboly afaka man̈ampy “olo tsy dia nandia fiain̈ana mba hanjary hisain̈y, avio tanora hanjary hahay raha ndreky hisain̈y tsarabe.”​—Ohab. 1:4.

7. Ino raha ianarantsika baka aminy ohatrany Panjaka Davida?

⁷ Tsy maintsy ho tsara fo ma fanapahankevitry jiaby ataontsika? Ehe. Atsika jiaby baka samby mety han̈ano hadisovan̈a. (Rom. 3:23) Panjaka Davida, ohatra, olo hendry salakady tsy nivadiky. Fa nisy fotoan̈a fo izy nan̈ano fanapahankevitry ratsy, ke nitondra jaly taminany ndreky taminolo hafa. (2 Sam. 12:9-12) Fa raha zen̈y tsy nambelany Davida hisakan̈a izy tsy han̈ano fanapahankevitry hankasitrahany Zan̈ahary. (1 Mpanj. 15:4, 5) Karaha Davida, ndray nisy hadisovan̈a nataontsika taloha, tsy hisalasala foeky atsika, izikoa tsaroantsika fa Jehovah man̈ambela hadisovan̈antsika. Ke izikoa atsika tia izy ndreky man̈araka volan̈anany, atsika hampiany fo.​—Sal. 51:1-4, 7-10.

8. Ino raha ianarantsika baka amy raha nivolan̈iny Paoly mikasiky vadian̈a?

⁸ Ino raha han̈ampy atsika tsy havozo be izikoa fa hanapakevitry? Mila tadidiantsika fa ndraikindraiky, maro fanapahankevitry tsara mety fidin̈a. Aleva onon̈o baka raha nivolan̈iny apostoly Paoly mikasiky vadian̈a. Karaha ty ho izy: “Izikoa misy olo mieritreritry fa sarotro aminany mifehy ten̈a izikoa izy midoko tsy manambady, ke izy efa tsy tanora loatra, ambilà izy hanambady, izikoa zen̈y tiany. Tsy manota izy koa man̈ano zen̈y. Fa izikoa ndraiky misy olo efa tapakevitry an̈aty fonany ao sady tsisy raha miforse izy, ke avoafehiny tsara fan̈irian̈anany, izy amy zay manapakevitry an̈aty fonany ao fa tsy hanambady foeky, tsara raha ataony zen̈y.” (1 Kor. 7:36-38) Paoly nivolan̈a fa fidokoan̈a tsy manambady io farany tsara. Fa ndray zen̈y, misy safidy tsara hafa koa nivolan̈iny.

9. Tokony mba iritriretintsika koa ma fomba fahitanolo fanapahankevitry handeha ataontsika io? Hazavà.

⁹ Tokony mba iritriretintsika koa ma fomba fahitanolo fanapahankevitry handeha hataontsika io? Ia, izio tsara dinihin̈y koa. Zahava baka raha nivolan̈iny Paoly momba fihinanan̈a hanin̈y mety efa baka natao soron̈o tamy sampy. Nivolan̈iny fa ndray tsy diso aby olo sasany manapakevitry hihina izio, iro mety hanafintohin̈y olo manan̈a eritreritry malemy. Ke akory fo basy ho Paoly? Ho izy: “Ke izikoa baka aminy hanin̈y edy ampalahelo rahalahiko, sitrany zaho tsy hihina hena eky, fotony tsy tiako hampalahelo rahalahiko.” (1 Kor. 8:4-13) Ilaintsika koa mandiniky vokatrany fanapahankevitry ataontsika io aminy eritreritrinolo hafa. Fa ny ten̈a maventy, mila dinihintsika ino vokatrany safidintsika io amy fifandraisantsika amy Jehovah. (Vakia Romanina 14:1-4.) Ino aby toro lalan̈a amy Baiboly ao afaka han̈ampy atsika han̈ano fanapahankevitry man̈amia voninahitry Zan̈ahary?

Dingana tsiota han̈ampy atsika han̈ano fanapahankevitry tsara

10, 11. a) Ino han̈ampy atsika tsy han̈ambony ten̈a an̈atiny tokantran̈ontsika? b) Ino raha mila tsaroany antipan̈ahy iro koa fa hangala fanapahankevitry mety hisy vokany amy fiangonan̈a?

¹⁰ Aza man̈ambony ten̈a. Alohany man̈ano raha araiky, iritrireta ty: ‘Anjaranaka ma manapakevitry momba raha ty?’ Panjaka Solomona nanoratra: “Avoabaraka lan̈ianolo man̈ambony ten̈a, fa hendry ndraiky lan̈ianolo manetry ten̈a.”​—Ohab. 11:2.

¹¹ Marin̈y fa mety hambelany raimandreny hanapakevitry amy raha sasany zanakandro. Fa ndray zen̈y, tsy tokony hadin̈any tsaiky fa raimandrenindro manan̈a fahifan̈a amindro. (Kol. 3:20) Man̈angy koa manan̈a fahifan̈a sasany an̈atiny tokantran̈onany. Fa ndray zen̈y, mila tsaroandro fa lelahy lohany. (Ohab. 1:8; 31:10-18; Efes. 5:23) Karaha zen̈y koa, mila tadidiny lelahy manambady fa voafetra fo fahifan̈a anan̈andro, fotony iro tokony han̈eky Kristy. (1 Kor. 11:3) Fanapahankevitry ataony antipan̈ahy aby io misy vokany amy fiangonan̈a. Fa mila alaindro antoko fa iro ‘tsy miala amy raha voasoratra’ an̈aty Volan̈a Zan̈ahary. (1 Kor. 4:6) Mifen̈y koa iro man̈araka marikitry taridalan̈a amezany panompo atokisan̈a. (Mat. 24:45-47) Tsy han̈ano fanapahankevitry mety hisy vokany ratsy amintsika ndreky aminolo hafa atsika izikoa manetry ten̈a, ke fanapahankevitry anan̈antsika fahifan̈a fo ataontsika.

12. a) Nan̈ino ma atsika tokony han̈ano fikarohan̈a? b) Karakory fomba han̈anaovan̈a fikarohan̈a io?

¹² Man̈anaova fikarohan̈a. Solomona nanoratra karaha ty: “Olo mazoto mahazo tombony, fotony mandamin̈y tsialohaloha raha hataony, fa hanjary masikiny ndraiky zay olo mekimeky man̈ano raha.” (Ohab. 21:5) Mety misy olo ma, ohatra, tihiaraka hiasa aminao? Aza mora indesimpô. Diniha ino aby raha mila hainao. Mangataha torohevitry aminolo mahay tsarabe raha momba izio. Baka io diniha ino toro lalan̈a Baiboly mifandray amizio. (Ohab. 20:18) Anao afaka man̈ano listy aroe: Soratinao aminy araiky ino lafy tsarany, fa aminy araiky ndraiky lafy ratsiny. Alohany hanapakevitry, ‘diniha tsarabe vola mety ho lany.’ (Lioka 14:28) Diniha tsao izio hiteraka problemo arabola aminao, avio diniha koa ino vokatranizio amy fifandraisanao amy Jehovah. Fan̈anaovan̈a fikarohan̈a io ten̈a mitaky fotoan̈a ndreky angovo. Fa izikoa anao mifen̈y fo man̈ano zen̈y ke tsy mekimeky hanapakevitry, anao mety tsy ho takatrany problemo na asaloha.

13. a) Ino toky azontsika baka amy Jakoba 1:5? b) Ino vokany izikoa atsika mivavaka baka hahazo fahendrena?

¹³ Mivavaha baka hahazo fahendrena. Han̈amia voninahitry Zan̈ahary fanapahankevitry ataontsika izikoa atsika mangataka fan̈ampian̈a aminany. Karaha ty nisoratiny Jakoba, pianatrany Jesosy: “Izikoa misy aminaro tsendriky mahay man̈avaka ny tsara ndreky ratsy, izy tokony tsy voly hangataka amy Zan̈ahary, fotony izy tsy matity aminolo jiaby sady tsy mba man̈amia tsin̈y. Hamiany olo io raha angatahiny.” (Jak. 1:5) Tsy mampamen̈atra man̈eky fa atsika mila fahendrena baka amy Zan̈ahary izikoa fa hanapakevitry. (Ohab. 3:5, 6) Sady izikoa fahaizan̈antsika fo atokisantsika, atsika ho very. Atsika ndraiky izikoa mivavaka, mangataka fahendrena amy Jehovah, baka io mitady taridalan̈a amy Volan̈anany ao, hiasa amintsika edy fan̈ahy masin̈y. Ke ho hitantsika ino ten̈a antony mahavy atsika man̈iry han̈ano raha araiky.​—Heb. 4:12; vakia Jakoba 1:22-25.

14. Nan̈ino atsika tsy tokony hangatakandra?

¹⁴ Tapaha hevitrinao. Fa alohanizen̈y, man̈anaova fikarohan̈a antsendriky avio mivavaha baka hahazo fahendrena. Olo misain̈y tsarabe zen̈y mangala fotoan̈a ‘handinihan̈a lalan̈anany.’ (Ohab. 14:15) Fa ndray zen̈y, aza mangataka andra. Olo araiky koa mangatakandra lava fo, izy tsy tihanapakevitry, ke mamoron̈o fialantsin̈y fo. (Ohab. 22:13) Kanefa, efa manapakevitry fo izy amy zen̈y. Izy manapakevitry han̈ambela olo hafa hikomandy fiain̈ananany.

15, 16. Karakory atao man̈atanteraka fanapahankevitry?

¹⁵ Tantiraha fanapahankevitrinao. Tsisy dikany ezaka jiaby efa nataontsika baka hahavitan̈a hangala fanapahankevitry tsara, izikoa atsika tsy mifen̈y man̈atanteraka izio. Karaha ty ho Solomona: “Ataova raha jiaby mety vitany tan̈anao.” (Mpito. 9:10) Ke atsika mila von̈ono han̈ano zay vitantsika baka han̈atantirahan̈a izio. Mety misy pitory, ohatra, mieritreritry han̈ano pisava lalan̈a. Ino raha mila ataony izikoa tiany hahomby? Tokony hitandrin̈y fo izy tsao ho varian̈a loatra aminy asa ndreky fangalan̈a diandian̈a, ke hanjary tsisy fotoan̈a ndreky angovo han̈anaovan̈a fanompoan̈a eky.

¹⁶ Tsy mora matetiky man̈atanteraka fanapahankevitry tsara. Nan̈ino? Fotony ‘donia misy atsika ty ambany fahifan̈any araiky ratsy in̈y.’ (1 Jaona 5:19) Atsika tsy maintsy mifen̈y miady “amy panjakany donia an̈atiny hiziky ty, ndreky amy fan̈ahy ratsy aby amy faritriny lan̈itry an̈y.” (Efes. 6:12) Joda pianatra ndreky apostoly Paoly, samby nivolan̈a fa lan̈ianolo tapakevitry han̈amia voninahitry Zan̈ahary, tsy maintsy miady mare.​—1 Tim. 6:12; Joda 3.

17. Ino raha tiany Jehovah hataontsika momba fanapahankevitry sasany efa nataontsika?

¹⁷ Diniha ndraiky fanapahankevitry io avio man̈anaova fan̈itsian̈a izikoa ilain̈y. Tsy fanapahankevitry jiaby handeha tsara karaha niritriretanao izy. Atsika jiaby baka samby “mety ho voa raha amy fotoan̈a tsy ampoizin̈y.” (Mpito. 9:11) Fa ndray zen̈y, tiany Jehovah atsika koa mifen̈y fo mitana fanapahankevitry efa niraisintsika, ndray iô raha sarotro. An̈isanizen̈y, fanapahankevitrinolo araiky hanonkanten̈a amy Jehovah, na koa voady momba mariazy. (Vakia Salamo 15:1, 2, 4.) Fa tsy maventy be karaha zen̈y ndraiky fanapahankevitry sasany. Misy jery olo araiky izikoa ndraikindraiky izy mba mangala fotoan̈a handinihan̈y fanapahankevitry efa nataony. Tsara dinihin̈y iro in̈y, tsao efa mila hahitsy na hivoan̈a. Tsy tokony hambelany hisakan̈a izy tsy han̈ano zen̈y, fan̈ambonianten̈a na firen̈ana olo. (Ohab. 16:18) Tiany han̈amia voninahitry Zan̈ahary fomba fiain̈ananany, ke zen̈y raha ten̈a maventy aminany.

Ampia olo hafa han̈ano fanapahankevitry man̈amia voninahitry Zan̈ahary

18. Akory mety hampianarany raimandreny zanany han̈ano fanapahankevitry tsara?

¹⁸ Raimandreny afaka mampianatra zanakandro hahay hangala fanapahankevitry man̈amia voninahitry Zan̈ahary. Farandraha malaka amindro tsaiky aby io eky modely tsara ambelandro. (Lioka 6:40) Afaka ataondro ziô, mikoran̈a amy zanakandro fomba nan̈anaovandro fanapahankevitry sasany. Mety hambelandro koa zanakandro han̈ano fanapahankevitry sasany, avio izikoa nety tsara izin̈y, tsara mba derain̈y koa iro. Fa karakory ndraiky izikoa tsy nety fanapahankevitry nataony tsaiky io? Matetiky, raimandreny direkty tihiaro zanany. Kanefa raha zen̈y tsy ten̈a man̈ampy tsaiky io. Atsika baka hangala ohatra. Anao nividy kartabla niny zanakanao. Baka io izio nampindraminy kamaradinany. Fa tsy nety nampodiny tsaiky io foeky raha io. Akory ataonao izikoa zanakanao efa tsy tianao man̈ampody raha karaha in̈y eky? Direkty hividiananao araiky vaovao fo izy? Sa izy irahinao mandeha mikoran̈a amy kamaradinany an̈y baka han̈ampodianany tsaiky io kartabla in̈y, na izy mamory vola hividianan̈a vaovao? Aia hitanao ten̈a mahomby amindro zen̈y?​—Rom. 13:4.

19. Ino raha mila hampianarintsika pianatra Baibolintsika, avio akory han̈anaovantsika zen̈y?

¹⁹ Jesosy nan̈iraka pan̈aradia izy hampianatra olo. (Mat. 28:20) An̈isany leson araiky farany maventy mety hampianarintsika pianatra Baibolintsika, fomba han̈anaovan̈a fanapahankevitry tsara. Tsy tokony atsika hivolan̈a aminany ino raha mila hataony. Tsaratsara aminany, izy ampianarintsika mandiniky toro lalan̈a amy Baiboly, amy zen̈y izy afaka manapakevitry ino raha ataony. Sady “atsika tsiaraikiaraiky samby mbala hitsarainy Zan̈ahary.” (Rom. 14:12) Hita baka amy zen̈y fa ten̈a raha maventy, mangala fanapahankevitry man̈amia voninahitry Zan̈ahary.

[Lamariky amy pazy ambany]

Akory Hamalianao Ty?

• Nan̈ino atsika mila mianatra karakory atao manapakevitry?

• Ino vokatrany tahotro io amintsika, avio ino han̈ampy atsika tsy hatahotro?

• Ino dingana tsiota han̈ampy atsika han̈ano fanapahankevitry man̈amia voninahitry Zan̈ahary?

[Fan̈ontanian̈a]

[Efajoro/​Sary]

Dingana Hangalan̈a Fanapahankevitry Tsara

1 Aza Man̈ambony Ten̈a

2 Man̈anaova Fikarohan̈a

3 Mivavaha Baka Hahazo Fahendrena

4 Tapaha Hevitrinao

5 Tantiraha Fanapahankevitrinao

6 Diniha Ndraiky Izio Avio Man̈anaova Fan̈itsian̈a

[Sary]

Olo araiky koa misalasala manapakevitry, mira lelahy an̈abo sambo tsisy familian̈a izy, kanefa ranomasin̈y mihetsiky mare