“An Bunga kan Espiritu” Nagpapamuraway sa Dios
“An Bunga kan Espiritu” Nagpapamuraway sa Dios
“An sakong Ama napapamuraway kaini, na kamo padagos na nagbubunga nin dakol.”—JUAN 15:8.
1, 2. (a) Ano an mga oportunidad niato na madagka an iba? (b) Anong balaog gikan ki Jehova an nagpapaoswag kan abilidad niato na paglingkodan sia?
ISIP-ISIPA an duwang senaryo: Narisa nin sarong Kristiana na garo may hararom na iniisip an sarong hoben na tugang na babae. Iinareglo nia na makaibanan ini sa paglilingkod sa langtad. Mantang nag-oolay sinda bago kan kada sunod na harong, pinonan kaining iestorya kun ano an nakakapurisaw sa saiya. Pagkatapos, sa pamibi, an hoben nagpasalamat ki Jehova sa mamomoton na pagmakolog kan maygurang na tugang; idto nanggad an kaipuhan nia. Sa saro pang lugar, kapupuli pa sana nin sarong mag-agom hale sa paghuhulit sa ibang nasyon. Sa sarong pagtiripontipon, mantang ogmahon nindang iineestorya an saindang mga eksperyensia, sarong hoben na tugang na lalaki an toninong na naghihinanyog. Pakalihis nin nagkapirang taon, mantang sia nag-aandam pasiring sa saiya mismong asignasyon sa ibang nasyon, iniisip nia an mag-agom na idto asin an pag-oolay na nakadagka sa saiya na magmisyonero.
2 Tibaad huli sa mga situwasyon na iyan, nagigirumdoman mo an saro na nakatabang sa saimo o natabangan mo. Siempre, bihirang mangyari na an sasarong pag-oolay makapabago sa buhay nin saro, alagad kada aldaw, may mga oportunidad kita na dagkahon asin pakosogon an iba. Imahinara na igwa nin sarong bagay na makakapaoswag kan saimong mga abilidad asin kualidad, tanganing an mga iyan magin mas kapakipakinabang sa mga tugang nindo asin mas magamit nin Dios. Bako daw na marahayon iyan? An totoo, tinatawan kita ni Jehova nin siring nanggad kaiyan na balaog—an saiyang banal na espiritu. (Luc. 11:13) Mantang naghihiro sa satong buhay an espiritu nin Dios, nagbubunga iyan sa sato nin magagayon na kualidad na nakakapaoswag kan kada aspekto kan paglilingkod niato sa Dios. Sarong makangangalas nanggad na balaog!—Basahon an Galacia 5:22, 23.
3. (a) Paano nagpapamuraway sa Dios an satong pagpatalubo kan “bunga kan espiritu”? (b) Anong mga hapot an pag-oolayan niato?
3 An mga kualidad na bunga kan banal na espiritu kapahayagan kan mismong personalidad kan Gikanan kan espiritung iyan, si Jehova Dios. (Col. 3:9, 10) Ipinarisa ni Jesus an pinakadahelan kun taano ta an mga Kristiano maninigong magmaigot na arogon an Dios kan sabihon nia sa saiyang mga apostol: “An sakong Ama napapamuraway kaini, na kamo padagos na nagbubunga nin dakol.” * (Juan 15:8) Mantang pinapatalubo niato “an bunga kan espiritu,” an mga resulta heling-heling sa satong pagtaram asin paggawe; dangan, ini nagtataong pag-omaw sa satong Dios. (Mat. 5:16) Sa anong mga paagi an bunga kan espiritu laen sa mga ugale kan kinaban ni Satanas? Paano niato mapapatalubo an bunga kan espiritu? Taano ta tibaad depisil sa sato na gibohon iyan? Pag-oolayan niato an mga hapot na ini mantang tinotokar niato an enot na tolong aspekto kan bunga kan espiritu—an pagkamoot, kagayagayahan, asin katoninongan.
Pagkamoot na Basado sa Mas Halangkaw na Prinsipyo
4. Anong klaseng pagkamoot an itinokdo ni Jesus na isagibo kan mga parasunod nia?
4 An pagkamoot na bunga kan banal na espiritu laen nanggad sa klase nin pagkamoot na lakop sa kinaban. Taano man? Basado iyan sa mas halangkaw na prinsipyo. An pagkakalaen na ini itinampok ni Jesus sa Sermon sa Bukid. (Basahon an Mateo 5:43-48.) Sinabi nia na dawa an mga parakasala may tendensiang trataron an iba arog kan pagtratar sa sainda kan iba. An siring na “pagkamoot” mayo nin tunay na pagsakripisyo kundi pagpinahelingan sana nin kabootan. Kun gusto niatong ‘mapatunayan na kita mga aki kan satong Ama na nasa kalangitan,’ dapat na magin laen kita. Imbes na trataron an iba arog kan pagtratar ninda sa sato, an pagmansay asin pagtratar niato sa iba dapat na arog kan ki Jehova. Pero, paano posibleng mamotan an satong mga kaiwal, arog kan ipinagboot ni Jesus?
5. Paano niato ikakapaheling an pagkamoot sa mga nagpepersegir sa sato?
5 Isip-isipa an sarong halimbawa sa Biblia. Mantang naghuhulit sa Filipos, si Pablo asin Silas inarestar, hinampak nin grabe, asin ibinugtak sa mas nasa laog na bilanggoan, na duman ipinandog an mga bitis ninda. Sa kamugtakan nindang iyan, posibleng marhay na minaltrato man sinda kan bantay sa presohan. Kan sa dai linalaoman makaluwas sinda huli sa linog, ikinaogma daw ninda na makakabalos na sinda sa lalaki? Dai. An saindang sinserong pagmakolog sa ikakarahay nia—an saindang mapagsakripisyong pagkamoot—nakamotibar sa sainda na humiro tolos para sa saiya, na ginibong posible na an bantay asin an gabos na kasararo nia sa harong magturubod. (Gibo 16:19-34) Dakol sa mga tugang niato sa presenteng panahon an ‘nagbebendisyon man sa mga nagpepersegir.’—Roma 12:14.
6. Sa anong mga paagi ikakapaheling niato an mapagsakripisyong pagkamoot sa satong mga tugang? (Helingon an kahon sa pahina 21.)
6 Orog pa dian an pagkamoot niato sa mga kapagtubod. “Kita may paninimbagan na itao an satong kalag para sa satong mga tugang.” (Basahon an 1 Juan 3:16-18.) Pero, an pagkamoot mas parate niatong ikakapaheling sa mas saradit na bagay. Halimbawa, kun kita may nasabi o nagibo na ikinakolog kan boot nin sarong tugang, ikakapaheling niato an pagkamoot paagi sa pag-enot na makipag-ulian. (Mat. 5:23, 24) Paano kun nakolgan kita nin iba? Kita daw “andam na magpatawad,” o kun beses daw nagtatanom kita nin raot nin boot? (Sal. 86:5) An makosog na pagkamoot na bunga kan banal na espiritu makakatabang sa sato na tahoban an saradit na pagkakasala, na lubos na pinapatawad an iba ‘kun paanong kita lubos na pinatawad ni Jehova.’—Col. 3:13, 14; 1 Ped. 4:8.
7, 8. (a) Paano an pagkamoot sa mga tawo konektado sa pagkamoot sa Dios? (b) Paano niato mapapararom an pagkamoot niato ki Jehova? (Helingon an ilustrasyon sa ibaba.)
7 Paano niato mapapatalubo an mapagsakripisyong pagkamoot sa satong mga tugang? Paagi sa pagpararom kan satong pagkamoot sa Dios. (Efe. 5:1, 2; 1 Juan 4:9-11, 20, 21) An panahon na personal niatong ginagamit para ki Jehova paagi sa pagbasa sa Biblia, paghorophorop, asin pamibi nagpaparigon kan satong boot asin nagpapatalubo kan pagkamoot niato sa satong langitnon na Ama. Minsan siring, kaipuhan niatong bakalon an panahon tanganing rumani sa Dios.
8 Sa pag-ilustrar: Imahinara na kada aldaw, sa sarong espesipikong oras sana puedeng magbasa kan Tataramon nin Dios, maghorophorop dian, asin mamibi ki Jehova. Bako daw na sisiertohon mo na gamiton an oras na iyan sa paagi na mayong makakaolang sa saimong personal na panahon ki Jehova? Siempre, mayo nin makakaolang sa pagdolok niato sa Dios sa pamibi, asin an kadaklan sa sato puedeng magbasa sa Biblia noarin man gusto niato. Pero, tibaad kaipuhan niatong gumibo nin aksion tanganing likayan an aroaldaw na kasiribotan na makaolang sa satong personal na panahon sa Dios. Naghihingoa daw kamo na bakalon kada aldaw an pinakadakol na panahon na mapupuede tanganing rumani ki Jehova?
“Kagayagayahan Hale sa Banal na Espiritu”
9. Ano an sarong karakteristiko kan kagayagayahan na bunga kan banal na espiritu?
9 An sarong lataw na karakteristiko kan bunga kan espiritu iyo an pagigin nagdadanay kaiyan. Ipinapaheling ini kan ikaduwang aspekto na pag-oolayan niato, an kagayagayahan. An aspektong ini arog sa sarong tanom na kayang mabuhay dawa sa bakong marahay na kamugtakan. Sa bilog na daga, dakol sa mga lingkod nin Dios an ‘nag-ako kan tataramon sa ibong nin grabeng kahorasaan na may kagayagayahan hale sa banal na espiritu.’ (1 Tes. 1:6) An iba nag-aagi nin kasakitan asin pagtios. Pero, pinapakosog sinda ni Jehova paagi sa espiritu nia “tanganing lubos na makatagal asin magin matinios na may kagayagayahan.” (Col. 1:11) Ano an gikanan kan kagayagayahan na ini?
10. Ano an gikanan kan satong kagayagayahan?
10 Bakong arog kan “kayamanan na bakong segurado” kan kinaban ni Satanas, an espirituwal na kayamanan na itinatao sa sato ni Jehova may nagdadanay na halaga. (1 Tim. 6:17; Mat. 6:19, 20) Itinatagama nia sa sato an magayagayang patanaw nin daing sagkod na ngapit. Magayagaya kita sa pagigin kabtang nin pambilog na kinaban na kasararoan nin Kristianong magturugang. Orog sa gabos, an satong kagayagayahan nakabasar sa relasyon niato sa Dios. Namamatean niato an arog kan ki David, na minsan ngani napiritan na mamuhay bilang dulag, inomaw nia si Jehova sa awit, na nagsasabi: “Huli ta an saimong mamomoton na kabootan orog karahay kisa sa buhay, pag-oomawon ka kan sakuya mismong mga ngabil. Sa siring pag-oomawon taka sa bilog na buhay ko.” (Sal. 63:3, 4) Dawa kun nag-aagi kita nin kasakitan, naggagayagaya nanggad kita sa pag-omaw sa Dios.
11. Taano ta mahalaga na may kagayagayahan kita sa paglilingkod ki Jehova?
11 Dinagka ni apostol Pablo an mga Kristiano: “Danay kamong maggayagaya sa Kagurangnan. Sa giraray sasabihon ko, Maggayagaya kamo!” (Fil. 4:4) Taano ta mahalaga para sa mga Kristiano na otobon nin may kagayagayahan an paglilingkod ninda ki Jehova? Huli sa isyu na ibinangon ni Satanas may koneksion sa soberaniya ni Jehova. Hinihingako ni Satanas na mayo nin naglilingkod sa Dios nin gikan sa boot. (Job 1:9-11) Kun inootob niato an satong obligasyon ki Jehova alagad mayo kita nin kagayagayahan, kulang an satong atang nin pag-omaw. Kaya, hinihingoa niatong himateon an sadol kan salmista: “Maglingkod kamo ki Jehova na may paggayagaya. Umatubang kamo sa saiya na may magayagayang kurahaw.” (Sal. 100:2) An paglilingkod na gikan sa magayagaya asin andam na puso nagpapamuraway sa Dios.
12, 13. Ano an satong magigibo tanganing labanan an negatibong mga saboot?
12 Pero an totoo, dawa an debotadong mga lingkod ni Jehova magkakaigwa nin mga panahon na mangluluya an boot asin masasakitan na mapagdanay an positibong pananaw. (Fil. 2:25-30) Ano an makakatabang sa sato sa siring na mga panahon? An Efeso 5:18, 19 nagsasabi: “Padagos kamong mapano nin espiritu, na nagtataram sa lambang saro nin mga salmo asin mga pag-omaw sa Dios patin espirituwal na mga awit, na nag-aawit asin inaakompanyaran an saindong sadiri nin musika sa saindong puso para ki Jehova.” Paano niato ikakaaplikar an konsehong iyan?
13 Kun kita napupurisaw huli sa negatibong mga saboot, puede kitang makimaherak ki Jehova sa pamibi asin maghingoang horophoropon an mga bagay na kaomaw-omaw. (Basahon an Filipos 4:6-9.) Para sa nagkapira, an pagkarokanta kan mga rekording nin mga awit na pang-Kahadean nakakapaogma asin nakakatabang sa sainda na magin positibo. An sarong tugang na lalaki na parateng desganado asin nangluluya an boot huli sa pagsakit nagsabi: “Apuera sa regular na odok sa pusong pamibi, nagtuom ako nin pirang awit na pang-Kahadean. Nagtao nin katoninongan sa sakong puso an pagkanta kan magagayon na pag-omaw na ini ki Jehova, baga man makosog o sa isip ko sana. An librong Rumani ki Jehova ilinuwas man kaidto. Duwang beses kong binasa iyan durante kan suminunod na taon. Garo iyan nakakaginhawang panghaplas sa sakong puso. Aram kong binendisyonan ni Jehova an paghihingoa ko.”
“Nakakapasararong Bogkos nin Katoninongan”
14. Ano an sarong lataw na aspekto kan katoninongan na bunga kan banal na espiritu?
14 Sa satong internasyonal na mga kombension, an mga delegado na manlaenlaen an pinaghalean maogmang marhay sa pakikiiba sa mga kapwa Kristiano. Ipinapaheling kaiyan an sarong aspekto kan katoninongan na naeeksperyensiahan ngonyan kan banwaan nin Dios—an pangglobong pagkasararo niato. Parateng napapangalas an mga nagmamasid kun naheheling ninda na an mga tawong inaasahan nindang magkaiwal “maigot na naghihingoa na otobon an pagkasararo kan espiritu sa nakakapasararong bogkos nin katoninongan.” (Efe. 4:3) Talagang pambihira an pagkasararo na ini kun iisipon an kinaipuhan na pangganahan nin dakol.
15, 16. (a) Ano an pinagdakulaan na pagmansay ni Pedro, asin paano iyan nagtao sa saiya nin kadepisilan? (b) Paano si Pedro tinabangan ni Jehova na itanos an saboot nia?
15 Depisil na pagkasararoon an mga tawo na manlaenlaen an pinaghalean. Tanganing matabangan kitang masabotan kun ano an dapat na pangganahan tanganing magkaigwa kan siring na pagkasararo, pag-olayan niato an sarong halimbawa kan enot na siglo, si apostol Pedro. An pagmansay nia sa bakong turing mga Hentil maririsa sa mga tataramon nia: “Aram nindong gayo na bako nanggad na sono sa ley na an sarong Judio makiiba o rumani sa sarong tawo na iba an rasa; alagad ta ipinaheling sa sako nin Dios na dai ko maninigong apodon na maramog o maati an siisay man na tawo.” (Gibo 10:24-29; 11:1-3) Kaoyon kan pagmansay na lakop kan panahon na idto, minalataw na nagdakula si Pedro na nagtutubod na inoobligar sia kan Ley na mamoot sana sa mga kapwa Judio. Tibaad normal nanggad sa saiya na ibilang an mga Hentil na kaiwal asin dapat ikaongis. *
16 Imahinara na sana si Pedro na posibleng marhay na bakong komportable mantang palaog sia sa harong ni Cornelio. Posible daw talaga na an sarong tawo na dating may negatibong pagmansay sa mga Hentil magigin ‘kaoyon’ ninda sa “nakakapasararong bogkos nin katoninongan”? (Efe. 4:3, 16) Iyo, huling pirang aldaw sana bago kaiyan, binuksan kan espiritu nin Dios an puso ni Pedro, na nakatabang sa saiya na itanos an saboot nia asin mahale an saiyang pagpalaenlaen. Paagi sa bisyon, lininaw sa saiya ni Jehova na an pagmansay nin Dios sa mga tawo dai nakabasar sa rasa o nasyonalidad. (Gibo 10:10-15) Huli kaini, makakapagsabi si Pedro ki Cornelio: “Sa katotoohan ako nakakaisi na an Dios mayong ipinapaorog, kundi sa lambang nasyon an tawo na natatakot sa saiya asin naggigibo nin katanosan inaako nia.” (Gibo 10:34, 35) Nagbago si Pedro, asin sia nagin talagang kasaro kan “bilog na kasararoan nin mga tugang.”—1 Ped. 2:17.
17. Taano ta pambihira an pagkasararo kan banwaan nin Dios?
17 An eksperyensia ni Pedro nakakatabang sa sato na pahalagahan an pambihirang pagbabago na nangyayari sa banwaan nin Dios ngonyan. (Basahon an Isaias 2:3, 4.) Minilyon na tawo “hale sa gabos na nasyon asin tribo asin banwaan patin lenguahe” an guminibo nin pagtatanos sa kaisipan ninda tanganing ioyon sa “kun ano an marahay asin inaako patin sangkap na kabotan nin Dios.” (Kap. 7:9; Roma 12:2) Dati, dakol sa sainda an impluwensiado nin pagkaongis, iriwal, asin pagkabaranga kan kinaban ni Satanas. Alagad paagi sa pag-adal sa Tataramon nin Dios asin sa tabang kan banal na espiritu, nanodan ninda na “isagibo an mga bagay na nakakakontribwir sa katoninongan.” (Roma 14:19) An ibinungang pagkasararo nagtatao nin kaomawan sa Dios.
18, 19. (a) Paano an kada saro sa sato makakakontribwir sa katoninongan asin pagkasararo kan kongregasyon? (b) Ano an pag-oolayan niato sa sunod na artikulo?
18 Paano an kada saro sa sato makakakontribwir sa katoninongan asin pagkasararo na yaon sa banwaan nin Dios? Sa dakol na kongregasyon, may mga nagbalyo hale sa ibang nasyon. An nagkapira tibaad may laen na mga kostumbre o daing gayo makataram kan satong lenguahe. Naghihingoa daw kitang mabisto sinda? Ini an irinerekomendar kan Tataramon nin Dios na dapat gibohon. Sa pagsurat sa kongregasyon sa Roma, na may mga nagtutubod na Judio asin Hentil, si Pablo nagsabi: “Akoon nindo an lambang saro, kun paanong inako man kita kan Cristo, para sa kamurawayan nin Dios.” (Roma 15:7) May kakongregasyon daw kamo na puede nindong midbidon nin orog?
19 Ano pa an magigibo niato tanganing an banal na espiritu humiro sa buhay niato? Pag-oolayan an hapot na ini sa sunod na artikulo mantang tinotokar niato an iba pang aspekto kan bunga kan espiritu.
[Mga Nota sa Ibaba]
^ par. 3 Kaiba sa bunga na nasambitan ni Jesus “an bunga kan espiritu” pati na “an bunga nin mga ngabil” na idinodolot sa Dios kan mga Kristiano paagi sa paghuhulit kan Kahadean.—Heb. 13:15.
^ par. 15 An Levitico 19:18 nagsasabi: “Dai ka magbalos o magtanom nin raot nin boot sa mga aki kan saimong banwaan; asin kamotan mo an saimong kapwa nin siring sa saimo man sana.” Naniniwala an mga Judiong namomoon sa relihion na an “mga aki kan saimong banwaan” asin “an saimong kapwa” nanonongod sa mga Judio sana. Kahagadan kan Ley na an mga Israelita magdanay na siblag sa ibang mga nasyon. Minsan siring, dai kaiyan sinusuportaran an punto de vistang pinapalakop kan mga namomoon sa relihion kan enot na siglo, na an gabos na bakong Judio kaiwal asin dapat ikaongis bilang mga indibiduwal.
Ano an Isisimbag Nindo?
• Paano niato ikakapaheling an mapagsakripisyong pagkamoot sa satong mga tugang?
• Taano ta mahalaga na inootob niato nin may kagayagayahan an paglilingkod niato sa Dios?
• Paano kita makakakontribwir sa katoninongan asin pagkasararo kan kongregasyon?
[Mga Hapot Para sa Pag-adal]
[Kahon sa pahina 21]
“Ini an Tunay na mga Kristiano”
Sa librong Between Resistance and Martyrdom—Jehovah’s Witnesses in the Third Reich, isinasaysay an mga komento nin sarong presong hoben na Judio, na dian ilinaladawan kan hoben an nangyari kan enot niang mabisto an mga Saksi ni Jehova pagkaabot nia sa kampo de konsentrasyon sa Neuengamme:
“Pagkaabot ming mga Judio sa kampo hale sa Dachau, tolos-tolos na itinago kan ibang mga Judio an ano man na yaon sa sainda tanganing dai sinda maobligar na tawan kami. . . . Kan mayo pa kami [sa kampo de konsentrasyon], nagdadaramayan kami. Alagad digdi, na buhay na an nakataya, an pinakamahalaga sa lambang saro iyo na iligtas an sadiri nia, bahala na an iba. Alagad imahinara an ginigibo kan mga Estudyante sa Biblia. Kan panahon na idto, kaipuhan nindang magparatrabaho, na nagpapakarhay nin mga tubo nin tubig. Malipot an panahon asin maghapon sindang nakatindog mantang nakababad sa tubig na arog nin yelo kalipot. Mayo nin nakakasabot kun paano ninda natatagalan ini. Sinabi ninda na tinatawan sinda ni Jehova nin kosog. Arog mi, kaipuhan nindang marhay an saindang tinapay huling gutom sinda. Alagad ano an saindang ginibo? Tinipon ninda an gabos nindang tinapay, kinua an kabanga kaiyan para sa saindang sadiri, asin an kabanga itinao ninda sa saindang mga kapagtubod na nag-arabot pa sana hale sa Dachau. Asin maogma ninda sindang inako asin hinadokan. Bago sinda magkakan, namibi sinda. Pagkatapos, gabos sinda kontento asin maogma. Sabi ninda, dai na sinda gutom. Aram nindo, kaidto ko naisip: Ini an tunay na mga Kristiano.”
[Mga Ritrato sa pahina 19]
Kada aldaw, binabakal daw nindo an panahon hale sa ibang mga aktibidad tanganing rumani ki Jehova?
