Ol Fasin We Oli Olsem “Frut Blong Spirit” Oli Leftemap Nem Blong God

“Taem yufala i karem plante frut long laef blong yufala, samting ya i save leftemap nem blong Papa blong mi.”—JON 15:8.

1, 2. (a) ?Wanem ol defren janis we yumi gat blong leftemap tingting blong ol narafala? (b) ?Wanem presen we Jehova i givim blong halpem yumi blong kamgud moa long wok blong hem?

YUMI traem tingbaot tufala stori ya. Faswan, hemia: Wan Kristin woman i luksave se wan yangfala sista i stap wari. Ale, hem i go toktok wetem hem, i mekem plan blong tufala i prij tugeta. Taem tufala i stap long wok blong prij, yangfala sista ya i tokbaot ol trabol blong hem. Taem yangfala ya i gobak long haos, hem i prea long Jehova. Hem i talem tangkiu long Jehova, from we olfala sista ya i soemaot se hem i lavem hem mo i kea long hem. Hemia nao stret samting we yangfala ya i nidim. Seken stori, hemia: Wan man wetem woman blong hem, tufala i jes kambak long wan kantri we tufala i stap prij long hem. Wan dei, taem tufala i joen wanples wetem ol fren, tufala i storian long saed blong wok blong prij we tufala i mekem long narafala kantri ya. Tufala i glad we i glad. Long taem ya, i gat wan yangfala brata i stap, mo hem i lesin gud long tufala. Sam yia biaen, taem brata ya i stap mekemrere blong go prij long wan narafala kantri, hem i tingtingbak long storian blong tufala ya. Storian ya nao i mekem se hem i wantem tumas blong kam wan misinari.

² Ating tufala stori ya i mekem yu yu tingbaot wan man no wan woman we i givhan long yu long laef blong yu. No maet yu tingbaot wan man no wan woman we yu yu givhan long hem. I tru, i no plante taem we wan storian nomo i pulum man blong i mekem sam bigfala jenis long laef blong hem. Be evri dei, yumi gat janis blong leftemap tingting blong narafala mo blong mekem narafala i kam strong. Yu traem tingbaot sipos i gat wan samting we i mekem se ol fasin blong yumi oli kamgud moa mo yumi gat save long plante moa samting. Nao bambae yumi naf blong halpem moa ol Kristin brata blong yumi, mo tu, God i save yusum yumi moa blong mekem wanem we hem i wantem. Sipos i olsem, bambae i gud tumas. Blong talem stret, Jehova i givim wan samting finis long yumi, we i olsem wan presen blong halpem yumi. Hemia tabu spirit blong hem. (Luk 11:13) Taem spirit blong God i wok long laef blong yumi, hemia i mekem se yumi gat ol gudfala fasin we oli givhan long evri wok we yumi mekem blong God. !Hemia wan presen we i nambawan!—Ridim Galesia 5:22, 23, NW. *

3. (a) ?Taem yumi wokem ol fasin we oli olsem “frut blong spirit,” olsem wanem samting ya i leftemap nem blong God? (b) ?Wanem ol kwestin we bambae yumi faenem ansa blong olgeta?

³ Ol fasin we tabu spirit i wokem long yumi, oli soemaot prapa fasin blong Jehova God we hem nao i Stamba blong spirit ya. (Kol. 3:9, 10) Taem Jisas i stap toktok long ol aposol blong hem, hem i talemaot from wanem ol Kristin oli mas traehad blong folem fasin blong God. Hem i talem se: “Taem yufala i karem plante frut long laef blong yufala, samting ya i save leftemap nem blong Papa blong mi.” * (Jon 15:8) Taem yumi wokem ol fasin we oli olsem “frut blong spirit,” ol man oli luksave ol fasin ya long toktok mo aksen blong yumi. Nao samting ya i leftemap nem blong God. (Mat. 5:16) ?Long wanem rod, ol fasin we oli olsem frut blong spirit oli defren long ol fasin blong wol ya we Setan i bos long hem? ?Yumi save mekem wanem blong wokem ol fasin we oli olsem frut blong spirit? ?From wanem samting ya i no isi? Bambae yumi faenem ansa blong ol kwestin ya, taem yumi tokbaot trifala fasin ya we oli olsem frut blong spirit, hemia lav, glad, mo pis.

 Lav We i Stanap Long Tingting Blong God

4. ?Jisas i tijim ol man blong hem blong oli gat wanem kaen lav?

⁴ Lav we tabu spirit i wokem long yumi i defren long lav we ol man blong wol oli gat. ?Hem i defren olsem wanem? Lav ya we i kamaot long tabu spirit i stanap long tingting blong God. Long Bigfala Toktok blong Jisas antap long hil, hem i soemaot olsem wanem tufala lav ya i defren. (Ridim Matiu 5:43-48.) Hem i talem se ol man nogud, be olgeta tu oli stap mekem i gud long ol man ya we oli mekem i gud long olgeta. Man we i gat “lav” olsem, hem i no tingbaot narafala fastaem, be hem i mekem i gud long narafala nomo from we narafala i mekem i gud long hem. Sipos yumi wantem ‘soemaot we yumi pikinini blong Papa blong yumi long heven,’ yumi mas gat lav ya we i stanap long tingting blong God. Yumi no mekem i gud long ol man nomo we oli mekem i gud long yumi. Be yumi mas gat sem tingting olsem Jehova long saed blong ol man, mo yumi mas mekem i gud long ol man olsem Jehova i mekem. ?Be olsem wanem? ?Yumi naf blong lavem ol enemi blong yumi, olsem Jisas i talem?

5. ?Yumi save mekem wanem blong lavem olgeta we oli stap spolem yumi?

⁵ Yumi save tingbaot wan stori long Baebol. Taem Pol mo Saelas tufala i stap prij long taon ya Filipae, ol man oli holem tufala, oli wipim tufala, mo oli sakem tufala long kalabus, long wan rum we i insaed olgeta. Long ples ya, oli lokem leg blong tufala long wan wud we i olsem bigfala hankaf. Maet man blong lukaot long kalabus tu i mekem i nogud long tufala. Be wantaem nomo, graon i seksek nao tufala i kamfri. ?Olsem wanem? ?Tufala i tingbaot se naoia, janis blong tufala blong givimbak long man ya we i lukaot long kalabus? Nogat. Tufala i wantem mekem i gud long man ya, from we tufala i gat lav ya we i stanap long fasin blong tingbaot narafala fastaem. Ale lav ya nao i pulum tufala blong hareap blong givhan long hem. From samting ya, man ya wetem olgeta long haos blong hem oli bilif. (Wok 16:19-34) Tede, plante long ol Kristin brata blong yumi oli folem sem fasin. Oli ‘askem long God blong hem i blesem ol man we oli stap spolem olgeta.’—Rom 12:14.

6. ?Long wanem rod yumi save lavem ol Kristin brata blong yumi, long fasin we yumi tingbaot olgeta fastaem? (Lukluk bokis long pej 25.)

⁶ Yumi mas lavem moa ol Kristin brata sista blong yumi. ‘I stret nomo blong letem laef blong yumi, blong givhan long ol Kristin brata mo sista blong yumi.’ (Ridim 1 Jon 3:16-18.) Be plante taem, yumi save mekem ol smosmol samting nomo blong soemaot lav. Wan samting we yumi save mekem, hemia: Sipos Kristin brata blong yumi i harem nogud long wan samting we yumi talem no yumi mekem long hem, yumi mas faswan blong go mekem pis wetem hem. Hemia nao lav. (Mat. 5:23, 24) ?Be olsem wanem sipos narafala nao i mekem yumi harem nogud? ?Yumi ‘fogivim hem,’ no yumi holem kros blong yumi i stap longtaem? (Sam 86:5) Bigfala lav we tabu spirit i wokem long yumi i save kavremap ol smosmol rong blong ol narafala, nao yumi fogivim olgeta “long sem  fasin ya we Masta blong yumi [“Jehova,” NW] i fogivim yumi.”—Kol. 3:13, 14; 1 Pita 4:8.

7, 8. (a) ?Sipos yumi lavem God, olsem wanem fasin ya i givhan long yumi blong lavem ol man? (b) ?Yumi save mekem wanem blong yumi lavem God long fasin we i bigwan moa? (Lukluk pija long pej 23.)

⁷ ?Yumi mas mekem wanem blong lavem ol Kristin brata long fasin ya we yumi tingbaot olgeta fastaem? Blong mekem olsem, yumi mas lavem God long fasin we i bigwan moa. (Efes. 5:1, 2; 1 Jon 4:9-11, 20, 21) Yumi wanwan i mas tekem taem blong stap klosap long Jehova. Taswe, yumi mas ridim Baebol, tingting dip, mo prea. Sipos yumi mekem olsem, bambae yumi lavem moa Papa blong yumi long heven. Mo tu, yumi mas lego sam narafala samting we yumi wantem mekem, nao yumi yusum taem ya blong kam klosap long God.

⁸ Yu traem tingbaot sipos yu yu stap folem wan program we yu ridim Tok blong God, tingting dip long hem, mo prea long Jehova, long wan stret taem evri dei. Ating bambae yu no letem wan narafala samting nating i spolem taem ya we yu yu gat wetem Jehova. I tru, i no gat wan man we i save blokem yumi, blong yumi no prea long Jehova. Mo tu, bighaf blong yumi i save ridim Baebol enitaem nomo. Be maet yumi wanwan i mas mekem sam samting, blong yumi no letem ol wok blong yumi evri dei i spolem taem ya we yumi gat wetem Jehova. ?Olsem wanem? ?Evri dei, yu yu tekemaot taem long sam narafala wok, blong yu save kam klosap long Jehova?

‘Tabu Spirit i Mekem Yumi Harem Gud Tumas’

9. ?Wanem samting we i spesel long saed blong glad ya we tabu spirit i givim?

⁹ Wan samting we i spesel long saed blong ol fasin we oli olsem frut blong spirit, hemia se oli save stap oltaem nomo, oli no lus. Fasin we bambae yumi tokbaot naoia, glad, hem i save stap oltaem nomo nating se yumi kasem trabol. Glad i olsem wan tri we i save gru gud nomata se ples i hot mo i drae. Long plante ples blong wol, taem ol man blong God ‘oli kasem tok ya blong gud nius, oli kasem plante trabol, be tabu spirit i mekem olgeta oli harem gud tumas.’ (1 Tes. 1:6) Sam narafala oli gat wan laef we i had mo oli sot long plante samting. Be Jehova i givim tabu spirit long olgeta, nao oli gat paoa blong ‘stanap strong long taem blong trabol, we tingting blong olgeta i longfala, i no save foldaon, mo oltaem oli harem gud.’ (Kol. 1:11) ?Wanem i mekem se oli glad?

10. ?Wanem i mekem se yumi glad?

¹⁰ Ol gudgudfala samting we Jehova i givim long yumi oli stap gud oltaem. Oli defren long ol samting blong wol blong Setan, olsem ‘mane we i no stap longtaem.’ (1 Tim. 6:17; Mat. 6:19, 20) Jehova i promes blong givim laef we i no save finis long yumi. Yumi glad tumas long promes ya. Mo yumi glad tu blong stap insaed long kampani blong ol Kristin brata long fulwol. Antap moa, yumi gat glad ya from we yumi fren gud wetem God. Yumi harem gud olsem Deved taem hem i singsing blong presem Jehova, nating se hem i stap haed olbaot long ol hol blong ston. Hem i singsing se: “Oltaem yu yu lavem mi, mo fasin ya, mi mi wantem moa, i winim we mi wantem stap laef. From samting ya, bambae mi presem yu. Bambae mi stap talem tangkiu long yu oltaem long laef blong mi.” (Sam 63:3, 4) Yumi tu, yumi wantem tumas blong presem God, mo yumi glad, nating se yumi kasem hadtaem long laef blong yumi.

11. ?From wanem yumi mas glad blong mekem wok blong Jehova?

¹¹ Aposol Pol i talem long ol Kristin se: “Yufala we i joen long Masta blong yumi, oltaem yufala i mas glad. Mi mi talem bakegen, se yufala i mas glad.” (Fil. 4:4) ?From wanem ol Kristin oli mas glad blong mekem wok blong Jehova? Ansa blong kwestin ya i joen wetem ol toktok we Setan i mekem agens long hae rul blong Jehova. Setan i talem se i no gat wan man we bambae i mekem wok blong God, from we hem nomo i wantem. (Job 1:9-11) Sipos yumi fosem yumi nomo blong mekem wok blong Jehova be yumi no glad blong mekem, presen we yumi givim long Jehova taem yumi presem hem, bambae i hafhaf. Taswe, yumi traehad blong folem advaes blong Sam ya se: “!Yumi glad, yumi mekem wosip long hem! !Yumi kam long fes blong hem, yumi singsing!” (Sam 100:2) Taem yumi glad blong mekem wok blong God mo yumi wantem tumas blong mekem, yumi leftemap nem blong Hem.

12, 13. ?Taem yumi harem nogud, yumi save mekem wanem?

¹² Be samtaem, tingting blong ol gudfala man blong Jehova tu i save foldaon, mo i hadwok blong oli holem wan gudfala tingting. (Fil. 2:25-30) ?Wanem i save givhan long yumi long taem olsem? Efesas 5:18, 19 i talem se: “Yufala i mas letem Tabu Spirit i kam fulap long yufala. Taem yufala i stap joen wanples i gud yufala i stap yusum ol tok blong Ol Sam, mo ol him, mo ol sing blong presem God, blong singsing long hem blong leftemap tingting blong yufala. Mo  yufala i mas mekem olsem long tingting blong yufala, blong presem Masta blong yumi.” ?Olsem wanem blong folem advaes ya?

¹³ Taem yumi harem nogud, yumi prea long Jehova, mo yumi traehad blong tingting dip long ol gudfala fasin nomo. (Ridim Filipae 4:6-9.) Sam Kristin oli lesin long ol miusik blong Kingdom mo oli singsing wetem miusik ya long smol voes. Oli luk se samting ya i leftemap tingting blong olgeta mo i givhan long olgeta blong oli gat gudfala tingting. Wan brata i kasem trabol we i mekem se, plante taem hem i harem nogud mo tingting blong hem i foldaon. Hem i tingtingbak long taem ya, i talem se: “Mi mi prea oltaem wetem fulhat blong mi, mo mi lanem baehat sam sing blong Kingdom. Taem mi singim ol gudfala singsing blong presem Jehova, nating se mi singsing wetem voes no long tingting blong mi nomo, be mi harem se mi gat pis long hat blong mi. Mo tu, long taem ya, buk ya Draw Close to Jehovah (Approchez-vous de Jéhovah) i jes kamaot. Mi mi ridim buk ya tu taem long wan yia. Ol tok blong hem i olsem wan gudfala meresin we i mekem tingting blong mi i kwaet. Mi save se, from we mi mi traehad, Jehova i givhan long mi.”

‘Yumi Holem Pis Blong Yumi Save Joen Gud’

14. ?Wanem gudfala fasin i kamaot from pis we tabu spirit i givim?

¹⁴ Evriwan we oli go long ol bigfala intenasnal asembli blong yumi, oli harem gud long kampani blong ol Kristin brata sista we oli kamaot long ol defdefren ples blong wol. Hemia i soemaot olsem wanem ol man blong God tede oli joen gud long olgeta ples, from we oli gat pis. Plante man we oli luk samting ya oli sapraes, from we oli ting se ol man ya we oli kamaot long ol defdefren ples oli mas badfren nomo. Be oli luk we ‘tabu spirit i stap mekem olgeta evriwan oli joen gud, mo i givim pis long olgeta. Nao oli traehad blong holem pis ya, blong oli save joen gud oltaem.’ (Efes. 4:3) Tru ya, ol man ya oli traehad bigwan blong jenisim ol fasin blong olgeta blong oli save joen gud. Hemia wan samting we yumi sapraes tumas long hem.

15, 16. (a) ?Pita i gruap wetem wanem tingting? ?From samting ya, i had blong hem i mekem wanem? (b) ?Jehova i mekem wanem blong givhan long Pita blong i jenisim tingting blong hem?

¹⁵ I no isi blong ol man we oli kamaot long ol defren kaen laef oli joen gud. I gud yumi tingbaot eksampol blong aposol Pita. Hemia bambae i halpem yumi  blong luksave wanem tingting we yumi mas jenisim blong yumi save joen gud. Long ol tok blong Pita, yumi luksave tingting we hem i gat long ol man we oli no laen blong Isrel. Hem i talem se: “Yufala evriwan i savegud we i tabu long ol laen blong Isrel from skul blong olgeta, blong oli go insaed long haos blong ol man we oli no laen blong Isrel, no blong oli joen wetem olgeta. Be God i soemaot long mi we mi no save luk sam man se oli doti long fes blong hem, no oli rabis.” (Wok 10:24-29; 11:1-3) Long taem blong Pita, ol man oli ting se, folem Loa, oli mas lavem ol man Isrel nomo. I luk olsem we Pita tu i gruap wetem tingting ya. Long tingting blong hem, ating i stret nomo blong luk ol man blong narafala laen olsem ol enemi, we hem i no mas laekem olgeta nating. *

¹⁶ ?Yu ting se Pita i harem olsem wanem taem hem i go insaed long haos blong Konilias? Hem i mas harem i narakaen. Yu traem tingbaot. Hem i bin holemstrong nogud tingting ya agens long ol man blong ol narafala laen. ?Olsem wanem? ?Wan man olsem, hem i save “kam wan” wetem ol man blong narafala laen, mo ‘holem pis ya blong oli joengud oltaem’? (Efes. 4:3, 16) Yes, Pita i naf blong mekem olsem, from we sam dei bifo, spirit blong God i openem hat blong hem. Nao hem i stat blong jenisim tingting blong hem, mo winim fasin ya blong no laekem ol man blong narafala laen. Jehova i mekem se Pita i luk wan vison. Long vison ya, God i soemaot klia se Hem i no tingting nogud long sam man from kala mo laen blong olgeta. (Wok 10:10-15) Taswe, Pita i talem long Konilias se: “Naoia mi mi luk we God i stap mekem i sem mak nomo long olgeta man. Hemia wan trutok ya. Sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan laen blong Isrel, no i kamaot long wan narafala laen olgeta.” (Wok 10:34, 35) Ale Pita i jenisim tingting blong hem, nao hem i joen gud wetem “olgeta Kristin man.”—1 Pita 2:17.

17. ?From wanem fasin blong ol man blong God blong joen gud i mekem yumi sapraes?

¹⁷ Stori ya blong Pita i givhan long yumi blong kasem save long bigfala jenis we ol man blong God tede oli stap mekem. (Ridim Aesea 2:3, 4.) Plante milian man we oli “kamaot long olgeta kala, mo long olgeta kantri, mo long olgeta laen, mo long olgeta lanwis,” oli jenisim tingting blong olgeta. Nao oli “save jusumaot ol fasin we God i wantem, wanem i gud, mo wanem hem i glad long hem, mo wanem i stret gud blong mekem.” (Rev. 7:9; Rom 12:2) Bifo, plante long ol Kristin man ya oli folem tingting blong wol blong Setan. Oli no laekem nating ol narafala man, oli agens long olgeta, mo oli seseraot. Be oli stadi long Tok blong God, nao tabu spirit i givhan long olgeta, ale oli lanem blong kam “strong blong folem ol fasin we i save mekem pis.” (Rom 14:19) Hemia i mekem se oli joen gud, nao samting ya i leftemap nem blong God.

18, 19. (a) ?Yumi wanwan i save mekem wanem blong givhan long kongregesen blong i gat pis mo i joen gud? (b) ?Long nekis stadi, bambae yumi tokbaot wanem?

¹⁸ ?Yumi wanwan i mas mekem wanem blong givhan long ol man blong God blong oli gat pis mo oli joen gud? Long plante kongregesen, i gat sam brata mo sista we oli kamaot long ol narafala kantri. Sam long olgeta, kastom blong olgeta i defren, mo maet oli no toktok gud long lanwis blong yumi. ?Olsem wanem? ?Yumi traehad blong savegud olgeta? Hemia nao samting we Tok blong God i pulum yumi blong mekem. Long kongregesen blong Rom bifo, i gat ol man Isrel mo ol man blong narafala laen tu. Pol i raetem leta i go long olgeta se: “Oltaem, yufala i mas rere blong tekem ol Kristin man blong ol narafala ples oli kam insaed long haos blong yufala.” (Rom 12:13) ?Olsem wanem? ?I gat wan long kongregesen blong yu we yu mas traehad blong save hem moa?

¹⁹ ?Wanem samting bakegen we yumi save mekem, blong tabu spirit i wok long laef blong yumi? Nekis stadi bambae i ansa long kwestin ya. Bambae yumi tokbaot ol narafala fasin we oli olsem frut blong spirit.

[Ol futnot]

?Bambae Yu Yu Ansa Olsem Wanem?

• ?Long wanem rod yumi save lavem ol Kristin brata blong yumi, long fasin we yumi tingbaot olgeta fastaem?

• ?From wanem yumi mas glad blong mekem wok blong Jehova?

• ?Yumi save mekem wanem blong givhan long kongregesen blong i gat pis mo i joen gud?

[Kwestin]

[Bokis blong pija long pej 25]

“Olgeta Ya Nao Oli Tru Kristin”

Long wan buk (Between Resistance and Martyrdom—Jehovah’s Witnesses in the Third Reich) i gat ol toktok blong wan yangfala man Jiu we hem i bin stap long rabis kalabus ya Neuengamme. Taem hem i jes go insaed long kalabus ya, hem i mitim ol Witnes blong Jehova. Hem i talem se:

“Mi wetem ol narafala man Jiu mifala i aot long Dachau, ale mifala i kamtru long Neuengamme. Taem mifala i jes kamtru, ol Jiu we oli stap finis long kalabus ya oli haedem olting blong olgeta, from we oli no wantem serem wetem mifala. . . . Bifo we mifala i kam insaed [long rabis kalabus ya] mifala i givgivhan long mifala. Be taem mifala i kam insaed, laef blong mifala evriwan i stap long denja. Ale evri man i tingbaot laef blong hem wan, hem i fogetem ol narafala. ?Be ol Baebol Studen oli mekem wanem? Oli stap wok had blong fiksimap ol paep blong wota. Ples i kolkol we i kolkol, mo olgeta oli stanap fuldei long wota we i kolkol olsem aes. Mifala i no kasem save olsem wanem oli save stap laef. Be olgeta oli talem se Jehova i mekem olgeta oli strong. Oli hanggri olsem mifala, mo oli nidim tumas smol bred ya we oli kasem evri dei. ?Be oli mekem wanem? Oli hivimap ol bred blong olgeta, oli kakae haf nomo, mo narafala haf oli givim long ol Kristin brata blong olgeta we oli aot long Dachau, oli jes kamtru. Mo oli kisim ol brata ya blong welkamem olgeta. Oltaem, oli prea bifo we oli kakae. Biaen, olgeta evriwan oli harem gud mo oli glad. Oli talem se oli no moa hanggri. Long taem ya nao mi mi tingting se: Olgeta ya nao oli tru Kristin.”

[Tok blong pija long pej 23]

?Evri dei, yu yu tekemaot taem long sam narafala wok, blong yu save kam klosap long Jehova?