“Ang Bunga sa Espiritu” Maghimaya sa Diyos
“Ang Bunga sa Espiritu” Maghimaya sa Diyos
“Ang akong Amahan mahimaya niini, nga kamo magpadayon sa pagpamungag daghan.”—JUAN 15:8.
1, 2. (a) Unsay atong kahigayonan sa pagdasig sa uban? (b) Unsang gasa gikan kang Jehova ang makapauswag sa atong katakos sa pag-alagad kaniya?
TAGDA ang duha ka situwasyon: Ang usa ka sister nakamatikod nga ang usa ka mas batang sister may gikabalak-an. Nakigsabot siya nga magpartner sila sa pagsangyaw. Samtang namalaybalay, ang batan-on misulti sa iyang problema. Sa ulahi nianang adlawa, ang batan-on nagpasalamat kang Jehova sa gipakitang interes sa hamtong nga sister; kadto gayod ang iyang gikinahanglan. Sa laing dapit, usa ka magtiayon ang bag-o pang nakauli gikan sa pag-alagad sa laing nasod. Sa usa ka salosalo, samtang madasigon nilang giasoy ang ilang eksperyensiya, may batan-ong brader nga namati. Pipila ka tuig sa ulahi, samtang ang maong brader nangandam sa paglarga paingon sa iyang asaynment sa laing nasod, siya nahinumdom sa magtiayon nga nag-asoy sa ilang eksperyensiya nga nakadasig kaniya nga magmisyonaryo.
2 Ang maong mga situwasyon tingali magpahinumdom kanimo sa usa ka tawo nga nakatandog sa imong kinabuhi o sa usa kansang kinabuhi imong natandog. Siyempre, talagsa ra nga ang usa ka panagkabildo makapabag-o sa kinabuhi, apan matag adlaw may kahigayonan kita sa pagdasig ug paglig-on sa uban. Pananglit dunay butang nga makapauswag sa imong mga katakos ug hiyas, nga sa ingon mas makatabang ka sa mga igsoon ug mas magamit ka sa organisasyon. Dili ba talagsaon kana? Sa pagkatinuod, si Jehova mohatag kanato sa maong gasa—iyang balaang espiritu. (Luc. 11:13) Samtang ang espiritu sa Diyos naglihok sa atong kinabuhi, kini magpatunghag dalayegong mga hiyas nga makapauswag sa atong pag-alagad sa Diyos. Pagkakahibulongan nga gasa!—Basaha ang Galacia 5:22, 23.
3. (a) Sa unsang paagi ang atong pag-ugmad sa “bunga sa espiritu” maghimaya sa Diyos? (b) Unsang mga pangutana ang atong tagdon?
3 Ang mga hiyas nga ipatungha sa balaang espiritu nagbanaag mismo sa personalidad sa Tinubdan niana, si Jehova nga Diyos. (Col. 3:9, 10) Sa dihang si Jesus nakigsulti sa iyang mga apostoles, iyang gipaila ang pangunang rason nga ang mga Kristohanon angayng manlimbasog sa pagsundog sa Diyos. Siya miingon: “Ang akong Amahan mahimaya niini, nga kamo magpadayon sa pagpamungag daghan.” * (Juan 15:8) Samtang atong ugmaron ang “bunga sa espiritu,” ang resulta niana madayag diha sa atong sinultihan ug linihokan; sa ingon, makadayeg sa atong Diyos. (Mat. 5:16) Sa unsang mga paagi ang bunga sa espiritu lahi gikan sa mga taras sa kalibotan ni Satanas? Sa unsang paagi maugmad nato ang bunga sa espiritu? Nganong lisod kanang ugmaron? Atong tagdon kini samtang atong hisgotan ang tulo ka bahin sa bunga sa espiritu—gugma, kalipay, ug pakigdait.
Gugmang Gibase sa Hamiling Prinsipyo
4. Unsang matanga sa gugma ang gitudlo ni Jesus nga ipakita sa iyang mga sumusunod?
4 Ang gugma nga gipatungha sa balaang espiritu lahi kaayo sa gugma nga komon sa kalibotan. Sa unsang paagi? Kini gibase sa hamiling prinsipyo. Gipasiugda ni Jesus ang kalainan niini diha sa iyang Wali sa Bukid. (Basaha ang Mateo 5:43-48.) Siya miingon nga bisan ang mga makasasala motratar sa uban sumala sa pagtratar sa uban kanila. Ang maong “gugma” wala maglangkit sa tinuod nga pagsakripisyo kondili pagbalosay lamang ug mga pabor. Kon gusto nato nga ‘pamatud-an nga kita mga anak sa atong Amahan nga anaa sa mga langit,’ kita kinahanglang malahi. Imbes tratahon ang uban sumala sa ilang pagtratar kanato, angay nato silang isipon ug tratahon sumala sa pag-isip ug pagtratar ni Jehova kanila. Apan, posible ba nga kita mahigugma sa atong mga kaaway, sumala sa gisugo ni Jesus?
5. Sa unsang paagi kita makapakitag gugma niadtong naglutos kanato?
5 Tagda ang usa ka pananglitan sa Bibliya. Samtang nagwali sa Filipos, si Pablo ug Silas gidakop, gibunalan, ug gibalhog sa bilanggoan, diin ang ilang mga tiil gisepohan. Lagmit gidagmalan usab sila sa magbalantay sa bilanggoan. Pagkagawas nila sa bilanggoan tungod sa usa ka linog, gusto ba nilang panimaslan ang magbalantay? Dili. Ang ilang tim-os nga kabalaka sa iyang kaayohan—ilang masakripisyohong gugma—nagtukmod kanila nga molihok dayon sa pagtabang kaniya, nga nakahatag ug kahigayonan sa magbalantay ug sa iyang panimalay nga mahimong magtutuo. (Buh. 16:19-34) Daghan sa atong kaigsoonan karon ang ‘nagpanalangin usab niadtong naglutos kanila.’—Roma 12:14.
6. Sa unsang mga paagi kita makapakitag masakripisyohong gugma sa atong mga igsoon? (Tan-awa ang kahon sa panid 21.)
6 Labaw pa niana ang gugma nga atong ipakita sa atong isigkamagtutuo. “Kita nailalom sa obligasyon nga itugyan ang atong mga kalag alang sa atong mga igsoon.” (Basaha ang 1 Juan 3:16-18.) Hinuon, subsob natong ikapakita ang atong gugma sa mas gagmayng paagi. Pananglitan, kon may igsoon nga masilo kanato tungod sa atong gisulti o gibuhat, ikapakita nato ang gugma pinaagi sa pagduol kaniya aron mapasig-uli ang pakigdait. (Mat. 5:23, 24) Komosta kon kita ang masilo? Kita ba “andam sa pagpasaylo,” o usahay maghambin kitag kasuko? (Sal. 86:5) Ang dulot nga gugma nga ipatungha sa balaang espiritu makatabang nato sa pagtabon sa ginagmayng kalapasan, nga andam magpasaylo sa uban “ingon nga si Jehova kinabubut-on nga nagpasaylo” kanato.—Col. 3:13, 14; 1 Ped. 4:8.
7, 8. (a) Sa unsang paagi ang gugma alang sa mga tawo nalangkit sa gugma alang sa Diyos? (b) Sa unsang paagi nato mapalalom ang atong gugma kang Jehova? (Tan-awa ang ilustrasyon sa ubos.)
7 Sa unsang paagi nato maugmad ang masakripisyohong gugma alang sa atong mga igsoon? Pinaagi sa pagpalalom sa atong gugma sa Diyos. (Efe. 5:1, 2; 1 Juan 4:9-11, 20, 21) Ang atong pagpakig-uban kang Jehova diha sa atong pagbasa sa Bibliya, pagpamalandong, ug pag-ampo makapalalom sa atong gugma sa atong langitnong Amahan. Apan, kinahanglang paliton nato ang panahon aron masuod sa Diyos.
8 Sa pag-ilustrar: Ibutang ta nga sa usa lamang ka tinong oras matag adlaw ikaw makabasa sa Pulong sa Diyos, makapamalandong niana, ug makaampo kang Jehova. Paneguroa nga walay makabalda sa imong panahon uban kang Jehova. Siyempre, walay makapugong kanato sa pag-ampo sa Diyos, ug kadaghanan kanato makabasa sa Bibliya bisan kanus-a. Apan, basin may angay tang himoon aron ang adlaw-adlawng buluhaton dili makabalda sa atong panahon uban sa Diyos. Naggahin ka bag daghang panahon kada adlaw aron masuod kang Jehova?
“Kalipay sa Balaang Espiritu”
9. Unsay kalidad sa kalipay nga gipatungha sa balaang espiritu?
9 Ang kalipay, nga usa ka bahin sa bunga sa espiritu, molahutay bisan pa sa mga kalisdanan. Ang kalipay samag usa ka tanom nga makalahutay bisan sa dili maayong kahimtang. Sa tibuok yuta, daghang alagad sa Diyos ang ‘midawat sa pulong ilalom sa daghang kasakitan nga may kalipay sa balaang espiritu.’ (1 Tes. 1:6) Ang uban nakasinatig kalisdanan ug kawalad-on. Apan, si Jehova nagpalig-on kanila pinaagi sa espiritu “aron makaantos sa bug-os ug magpakitag hataas-nga-pailob uban ang kalipay.” (Col. 1:11) Unsa ang tinubdan sa maong kalipay?
10. Unsa ang tinubdan sa atong kalipay?
10 Dili sama sa “walay-kasegurohang bahandi” sa kalibotan ni Satanas, ang espirituwal nga bahandi nga gihatag ni Jehova kanato maoy malungtaron. (1 Tim. 6:17; Mat. 6:19, 20) Gitanyag niya kanato ang makalipayng palaaboton nga kinabuhing walay kataposan. Nalipay kita nga nahimong bahin sa tibuok-kalibotang Kristohanong panag-igsoonay. Labaw sa tanan, ang atong kalipay gipasukad sa atong relasyon sa Diyos. Mibati kita sama sa gipahayag ni David, nga bisag napugos sa pagkalagiw, midayeg kang Jehova pinaagig awit: “Tungod kay ang imong mahigugmaong-kalulot mas maayo pa kay sa kinabuhi, ang akong mga ngabil magadayeg kanimo. Busa dayegon ko ikaw sa tibuok kong kinabuhi.” (Sal. 63:3, 4) Bisag makasinati kitag kalisdanan, kita malipayong magadayeg sa Diyos.
11. Nganong hinungdanon nga mag-alagad kang Jehova uban ang kalipay?
11 Si apostol Pablo nag-awhag sa mga Kristohanon: “Pagmaya kanunay diha sa Ginoo. Sa makausa pa ako magaingon, Pagmaya!” (Filip. 4:4) Nganong hinungdanon nga ang mga Kristohanon mag-alagad kang Jehova uban ang kalipay? Tungod sa isyu nga gipatungha ni Satanas maylabot sa pagkasoberano ni Jehova. Si Satanas nangangkon nga walay moalagad sa Diyos nga kinabubut-on. (Job 1:9-11) Kon kita mag-alagad kang Jehova tungod lamang sa obligasyon apan walay kalipay, ang atong halad sa pagdayeg dili bug-os. Busa, paningkamotan nato nga sundon ang awhag sa salmista: “Alagara si Jehova uban ang pagmaya. Duol kamo sa iyang atubangan uban ang hugyaw sa kalipay.” (Sal. 100:2) Atong mahimaya ang Diyos kon kita mag-alagad kaniya uban ang kalipay.
12, 13. Unsay atong mahimo sa pagbuntog sa negatibong pagbati?
12 Tinuod, bisan ang madasigong mga alagad ni Jehova usahay mahigawad ug malisdan sa paghupot ug positibong tinamdan. (Filip. 2:25-30) Unsay makatabang kanato sa maong mga panahon? Ang Efeso 5:18, 19 nag-ingon: “Magmapuno sa espiritu, nga magasulti taliwala ninyo sa mga salmo ug sa mga pagdayeg sa Diyos ug sa espirituwal nga mga awit, nga magaawit ug magaduyog sa inyong kaugalingon uban sa honi diha sa inyong mga kasingkasing ngadto kang Jehova.” Unsaon nato pagpadapat ang maong tambag?
13 Sa dihang makasinatig negatibong mga pagbati, kita makaampo kang Jehova ug maningkamot sa pagpamalandong ug dalayegong mga butang. (Basaha ang Filipos 4:6-9.) Nasinati sa pipila nga ang paglaylay ug mga awit sa Gingharian makapadasig ug makapabag-o sa ilang panghunahuna. Ang usa ka brader nga nagsagubang ug mapait nga kahimtang nga sagad nakapahigawad ug nakapaluya kaniya, nahinumdom: “Gawas sa regular ug kinasingkasing nga pag-ampo, akong gimemorya ang pipila ka awit sa Gingharian. Ang pag-awit niini sa hilom o kusog nakahatag ug kalinaw sa akong hunahuna. Niadtong panahona giluwatan usab ang librong Pakigsuod Kang Jehova. Duha ka beses nako kanang gibasa pagkasunod tuig. Nahisama kanag makapahupay nga balsamo sa akong kasingkasing. Nahibalo ko nga si Jehova nagpanalangin sa akong paningkamot.”
“Nagahiusang Bugkos sa Pakigdait”
14. Unsa ang talagsaong matang sa pakigdait nga gipatungha sa balaang espiritu?
14 Panahon sa atong internasyonal nga kombensiyon, ang mga delegado gikan sa lainlaing nasod malipayong nag-ubanay sa usag usa. Kana nagpasiugda sa usa ka matang sa pakigdait nga natagamtam sa katawhan sa Diyos karon—atong tibuok-kalibotang panaghiusa. Ang mga tumatan-aw sagad mahingangha inigkakita nila sa mga tawo nga giisip nilang magkaaway nga ‘matinuorong nanlimbasog sa pagsunod sa pagkausa sa espiritu sa nagahiusang bugkos sa pakigdait.’ (Efe. 4:3) Kini nga panaghiusa dalayegon gayod tungod sa daghang kababagan nga ilang nabuntog.
15, 16. (a) Unsay kagikan ni Pedro, ug nganong nalisdan siya tungod niadto? (b) Sa unsang paagi gitabangan ni Jehova si Pedro sa pagbag-o sa iyang tinamdan?
15 Lisod nga mahiusa ang mga tawong gikan sa lainlaing nasod. Aron masabtan nato kon unsay buntogon sa pagkab-ot sa maong panaghiusa, tagdon nato ang usa ka pananglitan sa unang siglo, si apostol Pedro. Ang iyang tinamdan bahin sa dili-tinuling mga Hentil mamatikdan diha sa iyang mga pulong: “Kamo nahibalo gayod nga supak sa balaod alang sa usa ka Hudiyo nga makig-uban o moduol sa usa ka tawo nga lain ug rasa; apan gipakita sa Diyos kanako nga dili ko angayng tawgon si bisan kinsang tawo nga mahugaw o dili hinlo.” (Buh. 10:24-29; 11:1-3) Sumala sa kasagarang panglantaw niadtong panahona, si Pedro dayag nga nagdako uban ang pagtuo nga ang Balaod nagsugo nga iyang higugmaon ang isigka-Hudiyo lamang. Mahimong normal lamang kaniya nga isipong kaaway ang mga Hentil. *
16 Handurawa kon unsay gibati ni Pedro sa pagsulod niya sa balay ni Cornelio. Posible ba nga ang usa ka tawo nga sa miagi negatibo ug panghunahuna sa mga Hentil ‘makigtambayayong’ kanila diha sa “nagahiusang bugkos sa pakigdait”? (Efe. 4:3, 16) Oo, kay dili pa dugay, ang espiritu sa Diyos nagbukas sa kasingkasing ni Pedro, mao nga nausab ang iyang tinamdan ug nabuntog ang iyang pagkamapihigon. Pinaagig panan-awon, gitin-aw ni Jehova kaniya nga ang panglantaw sa Diyos sa mga tawo wala ibase sa rasa o nasyonalidad. (Buh. 10:10-15) Busa, si Pedro nakaingon kang Cornelio: “Tinong naila ko nga ang Diyos dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya.” (Buh. 10:34, 35) Si Pedro nagbag-o, ug siya nakighiusa sa “tibuok kapunongan sa mga igsoon.”—1 Ped. 2:17.
17. Nganong talagsaon ang panaghiusa nga natagamtam sa katawhan sa Diyos?
17 Ang kasinatian ni Pedro motabang kanato sa pag-apresyar sa talagsaong kausaban nga nagakahitabo taliwala sa katawhan sa Diyos karon. (Basaha ang Isaias 2:3, 4.) Minilyong katawhan “gikan sa tanang kanasoran ug mga tribo ug katawhan ug mga pinulongan” ang nagbag-o sa ilang tinamdan aron kana mahiuyon sa “maayo ug dalawaton ug hingpit nga kabubut-on sa Diyos.” (Pin. 7:9; Roma 12:2) Kaniadto, daghan kanila ang naimpluwensiyahan sa pagdumot, panag-away, ug pagkabahinbahin sa kalibotan ni Satanas. Apan pinaagi sa pagtuon sa Pulong sa Diyos ug sa tabang sa balaang espiritu, sila nakakat-on sa ‘pagtinguha sa mga butang nga mopatunghag pakigdait.’ (Roma 14:19) Ang miresulta nga panaghiusa nakahatag ug pagdayeg sa Diyos.
18, 19. (a) Sa unsang paagi ang matag usa kanato makaamot sa panagdait ug panaghiusa sa kongregasyon? (b) Unsay hisgotan sa sunod artikulo?
18 Sa unsang paagi ang matag usa kanato makaamot sa panagdait ug panaghiusa sa katawhan sa Diyos? Ang daghang kongregasyon adunay mga membro nga gikan sa laing nasod. Ang pipila dunay lahi nga mga kostumbre o dili kaayo antigo sa atong pinulongan. Naningkamot ba kita nga mailhan sila? Kini ang giawhag sa Pulong sa Diyos. Sa pagsulat ni Pablo sa kongregasyon sa Roma nga may Hudiyo ug Hentil nga mga magtutuo, siya miingon: “Dawata ang usag usa, ingon nga si Kristo usab midawat kanato, alang sa himaya sa Diyos.” (Roma 15:7) Aduna bay igsoon sa kongregasyon nga mahimo pa nimong mas mailhan?
19 Unsa pay atong mahimo aron ang balaang espiritu molihok diha sa atong kinabuhi? Kini tubagon sa sunod artikulo samtang hisgotan ang ubang bahin sa bunga sa espiritu.
[Mga footnote]
^ par. 3 Ang bunga nga gihisgotan ni Jesus naglakip sa “bunga sa espiritu” ug “bunga sa mga ngabil” nga ginatanyag sa mga Kristohanon ngadto sa Diyos pinaagi sa pagsangyaw sa Gingharian.—Heb. 13:15.
^ par. 15 Ang Levitico 19:18 nag-ingon: “Dili ka manimalos ni maghambin ug kasuko batok sa mga anak sa imong katawhan; ug higugmaon mo ang imong isigkatawo sama sa imong kaugalingon.” Gituohan sa Hudiyong relihiyosong mga lider nga ang “mga anak sa imong katawhan” ug ang “imong isigkatawo” nagtumong lamang sa mga Hudiyo. Ang Balaod nagsugo nga ang mga Israelinhon magpabiling bulag sa ubang nasod. Apan, wala kana magdasig sa panglantaw nga gipasiugda sa relihiyosong mga lider sa unang siglo, nga ang tanang dili-Hudiyo maoy mga kaaway ug kinahanglang dumtan.
Unsay Imong Tubag?
• Sa unsang paagi nato ikapakita ang masakripisyohong gugma sa atong mga igsoon?
• Nganong hinungdanon nga kita mag-alagad sa Diyos uban ang kalipay?
• Sa unsang paagi makaamot kita sa panagdait ug panaghiusa sa kongregasyon?
[Mga Pangutana sa Pagtuon]
[Kahon sa panid 21]
“Sila ang Matuod nga mga Kristohanon”
Ang librong Between Resistance and Martyrdom—Jehovah’s Witnesses in the Third Reich nag-asoy sa komento sa usa ka Hudiyong batan-on nga binilanggo, nga naghubit sa iyang unang pagkakita sa mga Saksi ni Jehova sa iyang pag-abot sa Neuengamme nga kampong konsentrasyon:
“Sa dihang kaming mga Hudiyo nga gikan sa Dachau nangabot sa kampo, gitagoan sa ubang Hudiyo ang ilang mga nabatonan aron dili sila makapaambit niana. . . . Sa gawas [sa kampong konsentrasyon], kami nagtinabangay. Pero dinhi, kay nameligro ang kinabuhi, ang unang hunahunaon sa matag usa mao ang pagluwas sa kaugalingon, nga dili magtagad sa uban. Apan lahi kaayo ang gihimo sa mga Estudyante sa Bibliya. Niadtong higayona, lisod kaayo ang ilang trabaho, nga nag-ayo sa mga tubo sa tubig. Tugnaw kaayo ang panahon ug tibuok adlaw silang nagtindog diha sa samag-yelo ka bugnaw nga tubig. Natingala mi kon giunsa nila kadto pag-agwanta. Sila miingon nga si Jehova naghatag kanilag kusog. Gikinahanglan gayod nila ang ilang tinapay, kay sama namo, sila gigutom. Apan unsay ilang gibuhat? Gikolekta nila ang tanang tinapay, ang katunga ilang gikaon, ug ang laing tunga gihatag sa ilang isigkamagtutuo nga bag-ong nangabot gikan sa Dachau. Ug ilang giabiabi ug gihagkan sila. Sa wala pa mangaon, sila nag-ampo. Human niadto, silang tanan natagbaw ug nalipay. Sila miingon nga wala na sila gutoma. Niadtong panahona, ako naghunahuna: Sila ang matuod nga mga Kristohanon.”
[Mga hulagway sa panid 19]
Nagpalit ka bag panahon kada adlaw gikan sa ubang buluhaton aron masuod kang Jehova?
