‘Umi mbaʼe porã oúva espíritu sántogui’ ombotuicha Ñandejárape

“Péicha ojehecháta che Ru tuichaha, peẽ pejapóramo heta mbaʼe.” (JUAN 15:8)

1, 2. a) Mbaʼéichapa ñamokyreʼỹkuaa ermanokuérape? b) Mbaʼépa Jehová omeʼẽ ñandéve ñandedeprovechove hag̃ua chupe?

ÑAPENSAMÍNA koʼã mokõi mbaʼére: Peteĩ ermána ohechakuaa peteĩ mitãkuña ikongregasiongua ojepyʼapyha, upémarõ oinvita chupe opredika hag̃ua hendive. Osẽ aja oñondive, pe mitãkuña omombeʼu mbaʼéichapa oñeñandu. Upe rire oagradese Jehovápe pe ermána oipytyvõ haguére chupe oikotevẽve jave. Ambue hendápe, peteĩ ermáno ha hembireko omombeʼu umi mbaʼe porã ohasavaʼekue opredikahárupi tetã ambuépe. Peteĩ mitãrusu katu kirirĩhápe ojapysaka hesekuéra. Tiémpo rire, ko mitãrusu oñembosakoʼi aja oho hag̃ua opredika ambue tetãme, imanduʼa umi ermáno rembiasakue omokyreʼỹ hague chupe oservi hag̃ua misionéroramo.

² Koʼã mbaʼe oikovaʼekeue ikatu ñanemomanduʼa mbaʼeichaitépa opoko ñanderehe peteĩ ermáno heʼiva, térã ñande voi ñaipytyvõ hague ótrope. Péro nameméi umi mbaʼe jaʼéva og̃uahẽ ñande rapicha korasõme, upéicharõ jepe, ára ha ára ikatu ñamokyreʼỹ ha ñamombarete oimeraẽvape. Ajépa javyʼaitevaʼerã oĩramo peteĩ mbaʼe ñanembokatupyrýva ñaipytyvõ porãve hag̃ua ermanokuérape ha ñandedeprovechove hag̃ua Jehovápe. Ñandejára imbaʼeporãiterei rupi omeʼẽ ñandéve ijespíritu sánto upearã, ha jaagradeseterei chupe (Luc. 11:13). Jehová espíritu ñanesãmbyhývo, ñanepytyvõ ha ñanembokatupyry ñamombaʼeguasu porãve hag̃ua chupe. Ajépa iporãite ko jopói! (elee Gálatas 5:22, 23.)

3. a) Mbaʼérepa oñemombaʼeguasúta ñande Apoharépe jahejáramo ‘espíritu sánto’ ñanesãmbyhy? b) Mbaʼépa ñahesaʼỹijóta?

³ Pe espíritu sánto ou Jehovágui, upévare ñanepytyvõkuaa jajapo hag̃ua heta mbaʼe porã haʼéicha (Col. 3:9, 10). Mbaʼérepa ñañehaʼãvaʼerã ñahaʼanga chupe? Jesús oñemoñeʼẽrõ guare hemimboʼekuérape heʼi: “Péicha ojehecháta che Ru tuichaha, peẽ pejapóramo heta mbaʼe” (Juan 15:8). * ‘Espíritu sánto’ ñanesãmbyhýramo, ojehecha jaʼe ha jajapóvare ha upéicha oñemombaʼeguasu ñande Apoharépe (Mat. 5:16). Mbaʼéichapa ojekuaa kristianokuéra idiferenteha umi ndoservírivagui Jehovápe? Mbaʼéichapa ikatu jahechauka ñande rekovépe umi mbaʼe porã oúva espíritu sántogui? Mbaʼérepa hasyete jajapo hag̃ua upéva? Ñahesaʼỹijomína koʼã porandu ha jahecha mbohapy mbaʼe porã oúva espíritu sántogui: mborayhu, vyʼa ha pyʼaguapy.

Mbaʼéichapa japorohayhuvaʼerã

4. Mbaʼéichapa Jesús heʼi japorohayhuvaʼerãha?

⁴ Ñandejára espíritu ñanemomýi jahayhu añete hag̃ua ñande rapichápe, ha ndojoguaiete pe mborayhu oĩvape ko múndope. Mbaʼérepa? Ou rupi Jehovágui. Jesús oñeʼẽvaʼekue upéva rehe Sermón del Móntepe (elee Mateo 5:43-48). Haʼe ohechauka umi hénte aña jepe ikatuha oporotrata  porã ojetrata porãramo chupekuéra. Péro upéva ndahaʼéi peteĩ mborayhu añetetéva ha ojesakrifikáva hapicha rehehápe, síno haʼete omyengoviánteva umi mbaʼe porã ojejapóva hesehapekuéra. Umi kristiáno katu ndaupeichaivaʼerã ‘ohechauka hag̃ua haʼeha Ñandejára yvagapegua raʼy’. Upévare, jatrata rangue ñande rapichápe haʼe ojapoháichante, ñañehaʼãvaʼerã jahecha ha jatrata chupe Jehová ojapoháicha. Cristo heʼivaʼekue jahayhuvaʼerãha umi ndaijaʼéivape ñanderehe jepe. Ikatu piko jajapo upéva?

5. Mbaʼéichapa ikatu jahechauka jahayhuha umi ijaʼeʼỹvape ñanderehe?

⁵ Ñapensamína mbaʼépa ojapovaʼekue Pablo ha Silas. Opredikárõ guare Filípospe ojegueraha chupekuéra préso, oñembyepoti, oñemoinge kalavósope ha oñemoĩ chuguikuéra ipy yvyrakuápe térã sépope. Katuete umi ojahéiva hesekuéra apytépe oĩ avei pe guardiakársel. Upéi oiko peteĩ yvyryrýi, ha Pablo ha Silas ikatúkuri osẽntema. Oaprovecháparaʼe hikuái oñevenga hag̃ua pe guárdiare? Nahániri. Upéva rangue haʼekuéra ohechauka ohayhu ha ojepyʼapyha hapicháre ha pyaʼe oipytyvõ chupe. Upéicha rupi haʼe ha hogayguakuéragui oiko kristiáno (Hech. 16:19-34). Koʼág̃a rupi avei heta ermáno osegi ko konsého: “[Pevendesi] umi penembohasa asývape” (Rom. 12:14, BNP).

6. Mbaʼéichapa jahechauka jahayhuha ermanokuérape ñande pyʼaite guive? (Ehecha rrekuádro páh. 21-pe.)

⁶ Mbaʼeichaite pevépa jahayhuvaʼerã ermanokuérape? “Ñameʼẽvaʼerã avei ñande rekove ñane ermanokuéra rehehápe” (elee 1 Juan 3:16-18). Upéicharõ jepe, natekotevẽi jajapo tuichaiterei mbaʼe jahechauka hag̃ua jahayhuha chupekuéra. Pór ehémplo, oimérire ñambopochýraʼe peteĩme, ñañehaʼãvaʼerã jaiko porã jey (Mat. 5:23, 24). Péro mbaʼépa jajapóta oiméramo ñande hína pe ñandepochýva? Ñaporoperdonakuaápa ha ‘jaheja rei umi tembiapo vaikue’, térãpa japyta ñandepyʼaro? (Sal. 86:5.) Pe mborayhu imbaretetéva oúva espíritu sántogui ñanepytyvõ jahechakuaa hag̃ua vyroreiha umi fálla mimi. Avei ñanemomýi ñaporoperdona hag̃ua ñande pyʼaite guive Jehová “oheja rei haguéicha” ñane rembiapo vaikue (Col. 3:13, 14; 1 Ped. 4:8).

7, 8. a) Mbaʼépa jajapovaʼerã jahayhu añete hag̃ua ermanokuérape? b) Mbaʼéichapa jahayhuvéta Jehovápe? (Ehecha umi taʼanga oĩva ko páhinape.)

⁷ Mbaʼépa jajapovaʼerã jahayhu añete hag̃ua ermanokuérape? Ñañemoag̃uivaʼerã  Jehováre (Efe. 5:1, 2; 1 Juan 4:9-11, 20, 21). Upearã tekotevẽ ñañemotiémpo ikatu hag̃uáicha ñañemboʼe, jalee la Biblia ha jajepyʼamongeta. Jajapóramo koʼẽ koʼẽre koʼã mbaʼe jahayhuvéta Jehovápe. Jaikuaaháicha, ñañemoag̃uive hag̃ua hese ñamboykeʼimimantevaʼerã ñane rembiapo.

⁸ Ñamoĩ chupe ikatuha jalee la Biblia, jajepyʼamongeta ha ñañemboʼe peteĩ órante káda día. Ajépa ndajahejamoʼãi mbaʼeve oipeʼa ñandehegui upe tiémpo iñimportantetéva ñañemoag̃ui hag̃ua Ñandejárare! Péro haʼetépe ndahaʼéi upéicha. Ñande ñañemboʼekuaa Jehovápe oimeha órante ha haimete enterovéva ikatu ñahesaʼỹijo la Biblia opyta porãveháicha ñandéve. Upéicharamo jepe ñañatendevaʼerã ani ñane rembiapokuéra oipeʼa ñandehegui pe óra jaiporúva ñamombareteve hag̃ua ñande jerovia. Ñañehaʼãmbaitépa ñañemotiémpo ára ha ára ñañemoag̃uive hag̃ua Jehováre?

‘Vyʼa espíritu sánto omeʼẽva’

9. Mbaʼépa omeʼẽ avei ñandéve pe espíritu sánto, jahasa asýramo jepe?

⁹ Umi mbaʼe porã oúva espíritu sántogui nokambiái ni ndopái jahasáramo jepe heta mbaʼe ijetuʼúva. Pór ehémplo, pe vyʼa ikatu ñambojoja peteĩ plánta imbarete ha okakuaa porãvare oúramo jepe séka puku térã ára roʼy. Ñanemanduʼavaʼerã oĩha Ñandejára rembiguái ohenduvaʼekue pe marandu porã “heta jehasa asy paʼũme”, ha upéicharõ jepe ohupyty ‘vyʼa espíritu sánto omeʼẽva’ (1 Tes. 1:6). Koʼág̃a avei oĩ ermáno ohasáva heta mbaʼe ipohýiva. Péro Jehová, ijespíritu sánto rupive omombarete chupekuéra ‘ogueropuʼaka hag̃ua pasiénsia ha vyʼa reheve’ (Col. 1:11, ÑÑB). Mbaʼéichapa Jehová omeʼẽ ñandéve peichagua vyʼa?

10. Mbaʼéichapa Jehová ñanembovyʼa?

¹⁰ ‘Umi mbaʼeta’ oikuaveʼẽva Satanás ha imúndo ndovaléi ha opa rei, péro opa mbaʼe Ñandejára omeʼẽva ndopái ha akóinte ñanepytyvõ (1 Tim. 6:17; Mat. 6:19, 20). Javyʼaiterei Ñandejára oprometégui ñandéve jeikove opaveʼỹva ha ñaime haguére ñane ermanokuéra apytépe. Koʼýte javyʼa Jehová ohejávo jaiko iñamígoramo. Upéicha ñañeñandu David oñeñandu haguéicha. Haʼe oikórõ guare okañyháre opuraheivaʼekue Jehovápe: “Ne mborayhu niko tuichave jeikovégui. Ndéve rogueropurahéine, ha aikove aja pukukue romombaʼéne” (Sal. 63:3, 4). Ñande avei vyʼápe ñamombaʼeguasu Ñandejárape heta jahasa asýramo jepe.

11. Mbaʼérepa javyʼavaʼerã ñamombaʼeguasúvo Jehovápe?

¹¹ Pablo heʼi enterove kristiánope: “Pevyʼa opa árape Ñandejára rérape. Haʼe jey voi peẽme: Pevyʼa!” (Fili. 4:4). Mbaʼérepa javyʼavaʼerã ñamombaʼeguasúvo Jehovápe? Upéicharõmante jahechaukáta ñadefendeha igoviérno ha Satanás ijapuha. Haʼe heʼivaʼekue ndaiporimoʼãiha iñeʼẽrendúva Jehovápe ipyʼaite guive (Job 1:9-11). Jajapóramo Ñandejára rembipota ñakumpli hag̃uánte, nañamombaʼegusúi chupe ñande pyʼaite guive. Upévare ñahenduvaʼerã pe salmísta heʼivaʼekue: “Pejapo vyʼapópe chupe hembipota, peg̃uahẽ hendápe sapukái rorýpe” (Sal. 100:2). Upéicharõ, ñamombaʼeguasu añete hag̃ua Jehovápe, jaservivaʼerã chupe vyʼápe ha kyreʼỹme.

12, 13. Mbaʼépa ikatu jajapo nañanekyreʼỹvéiramo?

¹² Jahechakuaavaʼerã ñande kristiáno jepe ikatuha nañanekyreʼỹvéi ha ñañehaʼãmantevaʼerã ani hag̃ua ñanekangy (Fili. 2:25-30). Mbaʼépa ñanepytyvõta upéicha jave? Jajapovaʼerã Efesios 5:18, 19 heʼíva: ‘Tapenerenyhẽ espíritu sántogui. Peiporu ñeʼẽ oúva salmokuéra ha opaichagua purahéigui Ñandejárape ojejapovaʼekue. Jehovápe pepurahéi ha pemombaʼeguasu’. Mbaʼéichapa ikatu jajapo upéva?

¹³ Nañanekyreʼỹvéi jave ñañemboʼevaʼerã, jajepyʼamongeta umi mbaʼe Jehová oguerohorývare ha ñanemboretiaʼétava (elee Filipenses  4:6-9). Oĩ heʼíva ojapo porãha hese ohendu ha opuraheiʼíramo umi kántiko. Pór ehémplo, peteĩ ermáno tuicha iprovlémava omombeʼu sapyʼánte noñeñanduporãiha ha opensa nosẽporãiha chupe mbaʼeve. Mbaʼépa oipytyvõ ko ermánope upéicha jave? Haʼe heʼi: “Añemboʼe meme che pyʼaite guive ha amemorisa heta kántiko. Tuichaiterei ningo chepyʼaguapy apurahéi hatã jave térã mbeguekatumi jepe umi kántiko porãite omombaʼegusúva Jehovápe. Upe tiémpope osẽ lívro Acerquémonos a Jehová ha dos vése alee un áñope. Haʼete voi chembopiroʼy asýva ha ahechakuaa Jehová chevendesiha péicha añehaʼã haguére”.

Ñandepyʼaguapyvaʼerã

14. Mbaʼéichapa ojehecha espíritu sánto rupi ojeikoha pyʼaguapýpe?

¹⁴ Umi Asamblea Internacionálpe ojehecha mbaʼéichapa heta kuimbaʼe ha kuña opa tetãygua oiko oñoermáno teéicha. Péicha ojekuaa Jehová organisasiónpe ojeikoha pyʼaguapýpe. Ko múndope oĩ heta ndaijaʼéiva ojuehe, upévare ojehecharamoiterei mbaʼéichapa ermanokuéra oúva opa tetãgui oiko ‘pyʼaguapýpe oñondive ha oñehaʼã oiko peteĩcha espíritu sánto rupi’ (Efe. 4:3). Tuichaiterei mbaʼe upéva, koʼýte oĩ rupi heta oñehaʼãvaʼekue oiko hag̃ua peteĩ ñeʼẽme ermanokuérandi.

15, 16. a) Mbaʼérepa ijetuʼúraʼe Pédrope ohayhu hag̃ua ambue tetãyguápe? b) Mbaʼéichapa Jehová oipytyvõ chupe okambia hag̃ua?

¹⁵ Hasyeterei ningo oiko porãmba hag̃ua oñondive umi tapicha idiferénteva ojuehegui. Mbaʼérepa upéva? Jahechamíta oikovaʼekue síglo primérope. Pedro opensavaʼekue omboykevaʼerãha umi noñesirkunsidáivape. Haʼe heʼi: ‘Peẽ niko peikuaa  porã peteĩ isrraelíta ndaikatuiha ojeheʼa tetã ambuegua rehe térã og̃uahẽ hógape’. Péro upéi omyesakã: ‘Opáichavo, Ñandejára chemboʼe ndaʼeivaʼerãha avave rehe ikyʼaha’ (Hech. 10:24-29; 11:1-3, BNP). Heta isrraelítape ojeʼe ohayhuvaʼerãha hudiokuérapente ha oiméne Pédrope imitã guive oñemboʼe avei upéicha. Upévare chupe g̃uarã umi ndahaʼéiva hudío haʼeténeraʼe ikontrário ha oimoʼã ndochaʼeivaʼerãha hesekuéra. *

¹⁶ Epensamíntena mbaʼéichapa oñeñandúneraʼe Pedro og̃uahẽvo Cornelio rógape. Haʼe heta áñore omboykevaʼekue umi tetã ambueguápe. Upéicharõ, ikatúne piko “oiko porã” koʼág̃a ‘pyʼaguapýpe’ peteĩ ndahaʼéiva ndive hudío? (Efe. 4:3, 16.) Ikatu. Oho mboyve Cornelio rendápe haʼe nopensavaivéima umi tetã ambueguáre. Mbaʼéicha rupípa? Espíritu sánto ohesapeʼa Pédrope ha peteĩ visión rupive Jehová ontendeuka chupe ndovaleiha omboyke ni oapoʼi hapichápe ndahaʼéi haguére hetãygua (Hech. 10:10-15). Upéicha rupi Pedro heʼi Cornéliope: ‘Koʼág̃a ahechakuaáma Ñandejárape g̃uarã añetehápe peteĩchanteha opavave, oimeraẽ tetãygua chupe omombaʼéva ha ojapóva iporãva, haʼe oguerohory’ (Hech. 10:34, 35). Jahechaháicha, Pedro tuichaiterei okambia, upéicha rupi vyʼápe oiko peteĩ ñeʼẽme ‘ermanokuéra’ ndive (1 Ped. 2:17, BNP).

17. Mbaʼérepa ojeguerohory Ñandejára siervokuéra oiko haguére peteĩ ñeʼẽme?

¹⁷ Koʼág̃a rupi avei heta kristiáno tuichaiterei okambia ojapo haguéicha Pedro (elee Isaías 2:3, 4). Heta kuña ha kuimbaʼe ‘opa tetãygua, opaichagua ñeʼẽ ha opa tavaygua’ oñehaʼã opensa peteĩcha oikuaágui ‘Ñandejára rembipota, pe iporãva, pe oguerohorýva ha mbaʼevépe ivaiʼỹva’ (Rev. 7:9; Rom. 12:2). Heta umíva apytégui oikovaʼekue ko múndope ojeikoháicha, ndoporohayhúi, oiko vaise ha ndohekái pyʼaguapy. Péro la Biblia ha Ñandejára espíritu ohechauka chupekuéra ‘ohekavaʼerãha opa mbaʼe oguerúva pyʼaguapy’ (Rom. 14:19). Upévare opa tetãygua oservíva Ñandejárape oiko koʼág̃a peteĩ ñeʼẽme ha péicha omombaʼeguasu Jehovápe.

18, 19. a) Mbaʼépa ikatu jajapo akóinte jaiko hag̃ua pyʼaguapýpe ha peteĩ ñeʼẽme kongregasiónpe? b) Mbaʼépa jahecháta pe artíkulo oúvape?

¹⁸ Mbaʼépa ikatu jajapo akóinte jaiko hag̃ua pyʼaguapýpe ha peteĩ ñeʼẽme ermanokuéra ndive? Heta kongregasiónpe oĩ ermáno ótro tetãygua ojepokuaáva ambue hendáicha ha noñeʼẽporãiva ñane idióma. Ñañembojápa umíva rendápe jaikuaave hag̃ua chupekuéra? La Biblia ñanemokyreʼỹ jajapo hag̃ua upéva. Pablo ohaírõ guare umi hudío ha ambue tetãyguápe oĩva kongregasión Romayguápe heʼi: “Pejoguerohory, peñangareko porã ojuehe Cristo ojapo haguéicha penendive, [Ñandejára] oñemombaʼeguasu hag̃ua” (Rom. 15:7, JMP). Oúpa ñane akãme peteĩ ñane kongregasiongua ikatúva jaikuaamie?

¹⁹ Mbaʼépa ikatu jajapove pe espíritu sánto ñanepytyvõ hag̃ua? Pe artíkulo oúvape jahecháta upéva ha ambue mbaʼe porã oúva espíritu sántogui.

[Nóta]

Mbaʼéichapa ñambohováita?

• Mbaʼéichapa jahechauka jahayhu añeteha ermanokuérape?

• Mbaʼérepa javyʼavaʼerã ñamombaʼeguasúvo Jehovápe?

• Mbaʼépa ikatu jajapo akóinte jaiko hag̃ua pyʼaguapýpe ha peteĩ ñeʼẽme kongregasiónpe?

[Porandu ñahesaʼỹijóva]

[Rrekuádro oĩva páhina 21-pe]

“Koʼãva hína kristiáno teete”

Peteĩ lívro omombeʼu mbaʼéichapa testigos de Jehová nomboykéi Ñandejárape oĩrõ guare umi nazi poguýpe. Ipype oĩ avei peteĩ mitãrusu hudío heʼivaʼekue ojotopárõ guare Testigokuéra ndive kámpo de konsentrasión Neuengámmepe:

“Ore roimékuri Dacháupe, upéi oreguerova hikuái Neuengámmepe. Roikévo peteĩ varrakónpe, umi hudío oĩva upépe oñongatupa hiʼupy orekomíva ani hag̃ua ombojaʼo oréve. [...] Ore hudío roñopytyvõmivaʼekue roikórõ guare okápe, ha koʼág̃a ijetuʼuvémarõ, káda úno opensa ijehéntema ha hesarái hapichakuéragui. Péro mbaʼépa ojapo umi Estudiantes de la Biblia? Haʼekuéra oguerohoryeterei iñermanokuérape, oañuã ha ohetũmba chupekuéra. Upéi ombyatypaite umi pán orekóva, ombojaʼo ha omeʼẽ iñermanokuérape oúva Dacháugui. Hiʼarive haʼekuéra oréichante avei iñembyahyieterei ha oikotevẽ hoʼumivaʼerã. Upérõ guare ombaʼapo pohýi hikuái omyatyrõ hag̃ua peteĩ kañería. Roʼyeterei ningo ha un diaite ombaʼapo pe y roʼysãme. Enterovénte oikuaase mbaʼéichapa oaguanta hikuái. Koʼã Estudiantes de la Biblia heʼi Jehová omombareteha chupekuéra ogueropuʼaka hag̃ua. Haʼekuéra oñembyaty okaru hag̃ua, oñemboʼe ha vyʼápe oĩ oñondive, ha heʼi ni naiñembyahyiveimaha hikuái. Upépe che apensa: ‘Koʼãva hína kristiáno teete’.” (Between Resistance and Martyrdom—Jehováhʼs Witnesses in the Third Reich [Entre la resistencia y el martirio: los testigos de Jehová durante el Tercer Reich].)

[Nóta oĩva taʼanga ndive páhina 19]

Ñamboyképa ñane rembiapo ñañemoag̃uive hag̃ua Jehováre ára ha ára?