‘Mukabu Waspiritu’ Wamulemeshaña Nzambi
‘Mukabu Waspiritu’ Wamulemeshaña Nzambi
“Chuma chakumulemesha nachu Tata yami, chochakusoña nyikabu yayivulu.”—YOW. 15:8.
1, 2. (a) Tukweti kukoolekanyi kwakukolesha amakwawu? (b)Chawaananyi chatwinkayi Yehova chatuleñelaña kwikala nawuswa wakumuzatila?
TOÑOJOKENU iyi yuma yiyedi: Muhela mukwaKristu namoni nindi kudi chuma chinakumukabisha muhela wakansi. Hakumuleja kulonda akazatili hamu mumudimu wamwiha. Henohu kanda ashiki hetala dikwawu hiyanakuyawu nakushimwina, muhela wakansi hakumuleja yuma yinakumukabisha. Kuhiñahu, ifuku dodenidi muhela wakansi hakumusakilila Yehova mukulomba hamuloña wakumwakamena kudi muhela wapama, muloña dichuma chakeñañayi. Kwiluña dikwawu, antu adisumbula dihanafuntuwu kufuma kwituña dacheñi kwayiluwu nakushimwina. Chinayuwu nakupompa, hiyakushimuna namuzañalu yuma yadiluñishiluwu, mana kwetu wakansi hakumwena nzo-o nakutiyilila. Chimunahiti yaaka, hampinji yinakudiloñeshayi kuya nakuzatila kwituña dacheñi, hakutoñojoka ana antu adisumbula ninsañu yashimwinuwu yamusañumwini kwikala mishonali.
2 Hadaha iyi nsañu yinayanukishi chuma chachiwahi cheliliyi muntu chaletesheli muhimpi chihandilu chenu indi kwiji muntu imwakwashili kuhimpa chihandilu chindi. Kafwampi kuhanjeka hohu kamu hikwavula kuhimpa chihandilu chamuntuku, ilaña tukweti kukooleka kwakukolesha amakwawu mafuku ejima. Fwikijenu neyi kudi chuma chinateli kuhimpa wuswa niyililu yenu, kulonda Nzambi yayizatisheña nankashi nikukwasha chikupu ana kwenu niahela. Komana ichi hichuma chachiwahuku? Eñañi, Yehova watwinka chawaana chamuchidiwu, spiritu yindi yajila. (Luka 11:13) Spiritu yaNzambi chiyazatikaña muwumi wetu, yatuleñelaña kwikala nayililu yayiwahi yatukwashaña mumudimu wejima wutwamuzatilaña Nzambi. Hichawaana chabadika kuwaha!—Tañenu Aŋalija 5:22,23.
3. (a) Twamulemeshaña ñahi Nzambi neyi twikala ‘namukabu waspiritu’? (b)Tukudiza malwihwinyi?
3 Yililu yasoñaña spiritu yajila yamwekeshaña yililu yaNsulu yaniyi spiritu, Yehova Nzambi. (Kol. 3:9,10) Yesu washimwini muloña walema waleteshaña akwaKristu kufwila kumwimbujola Nzambi hampinji yayilejeliyi apostolu indi nindi: “Chuma chakumulemesha nachu Tata yami, chochakusoña nyikabu yayivulu.” * (Yow. 15:8) Chitukwikalaña ‘namukabu waspiritu,’ yuma yikufumañamu yikumwekenaña muyuma yitukuhoshaña niyitukwilaña, nawa tukumulemeshaña Nzambi yetu. (Mat. 5:16) Indi mukabu waspiritu wambuka ñahi nayililu yamukaayi kaSatana? Tunateli kwikala ñahi namukabu waspiritu? Muloñadi kwikala namukabu waspiritu chikunateli kutukalila? Tukudiza awa malwihu hampinji yitukuhanjekaña hayililu yisatu yamukabu waspiritu, kukeña, muzañalu, nikuwunda.
Kukeña Kwashindamena haNshimbi Yasweja Kulema
4. Yesu wadizishili atumbanji twindi kwikala nakukeña kwamuchidinyi?
4 Kukeña kwenzaña hamuloña waspiritu yajila kwambuka hama nakukeña kwekala nawantu mukaayi. Munjilanyi? Kwashindamena hanshimbi yasweja kulema. Yesu wakonkomweneni hachaambu chenichi muMpanji yindi yaHampidi. (Tañenu Matewu 5:43-48.) Washimwini nindi niakwanshidi afwilaña kwilila akwawu neyi chayilañawu wena. Hiyadihanaña chikupu hakumwekesha “kukeña” kwamuchidiwuku, ilaña adikwashaña hohu. Neyi tunakukeña ‘kwikala anyana kaTata yetu wudi mwiwulu,’ twatela kwikala ambukaku. Chatela tuyileña akwetu neyi chatwilañawu, twatela kuyila nikuyimona neyi chayimonañayi Yehova. Hanu dinu, tunateli kukeña ñahi ayilumbu jetu neyi chatulejeliyi Yesu?
5. Tunateli kukeña ñahi antu atukabishaña?
5 Talenu chakutalilahu chamuBayibolu. Hampinji yashimwinineñawu muFwilipi, aPawulu naSilasi ayikasili, ayeteli tubama twatuvulu, nakuyinatila mukatala kamukachi kakaleya, nawa nyendu yawu ayipatilili mumpompa. Haniyi mpinji, mukwakuhemba kaleya niyena watela wayikabishileña. Chayifumishiluwu mukaleya muchihayamisha namutentanshi, komana atiyili kuwaha nawu akumutenda ona muntu? Inehi. Hamuloña wakwila amwakameneni chikupu, nikukeña kwawu kwasweja kwayileñeleli kumukwasha swayi-swayi, chumichi chaletesheli mukwakuhemba kaleya niakwetala dindi ejima kwikala akwakwitiya. (Yil. 16:19-34) Amana kwetu amavulu makonu niwena elaña chuma chochimu ‘chakukiswila ayikabishaña nkisu.’—Rom. 12:14.
6. Munjilanyi mutwatela kumwekeshela ana kwetu kukeña kwasweja? (Talenu chikasha chidi hefu21.)
6 Kukeña kutwakeña akwetu akwakwitiya kwabadika. “Chachiwahi ninetu kutulila ana kwetu wumi wetu.” (Tañenu 1Yowanu 3:16-18.) Hela chochu, twamwekeshaña kukeña mutuyuma twanyanya. Chakutalilahu, neyi tuhosha hela kwila yuma yikumuhilisha mana kwetu, tunateli kumwekesha kukeña neyi tutachikilahu kwila chuma chikuleta kuwunda. (Mat. 5:23,24) Chumanyi chitwatela kwila neyi muntu yatuvulumuna? Komana ‘twanakenaña,’ tahindi twahembaña nkunyi mpinji yikwawu? (Mas. 86:5) Kukeña kwenzaña naspiritu yajila kutukwashaña kwanakena akwetu tuyiluwa twanyanya, kuyanakena ‘neyi chatwanakeneniyi Yehova.’—Kol. 3:13,14; 1Pet. 4:8.
7, 8. (a) Indi kukeña kutwamukeña Nzambi kwatukojejaña ñahi kukeña antu? (b)Tunateli kumukeña ñahi Yehova chikupu? (Talenu mwevulu wudi heshina.)
7 Tunateli kuyikeña ñahi ana kwetu chikupu? Kuhitila mukumukeña Nzambi chikupu. (Efwes. 5:1,2; 1Yow. 4:9-11, 20,21) Mpinji yitwekalaña naYehova kuhitila mukutaña Bayibolu, kutoñojokahu chikupu, nikulomba yatuleñelaña kumukeña Tata yetu wamwiwulu chikupu. Hela chochu, twatela kukwatila mpinji maana kulonda tukundami kwakwihi naNzambi.
8 Chakutalilahu: Fwikijenu neyi twatelela kutaña Izu daNzambi, kutoñojokahu chikupu, nikulomba kudi Yehova haora yimu hohu yatanjikawu mafuku ejima. Komana kwila muzatisha chiwahi iyi mpinji yayiwahi kulonda kubuli kwikala chuma chikuyikañesha hampinji yimwatela kwikala naYehova nehi? Kafwampi kwosi muntu watela kutukañesha kulomba kudi Nzambi, etu amavulu twatañaña Bayibolu kala mpinji yitunakeñi. Ilaña twatela kwikala ababala kulonda tubuli kwiteja nyidimu yamafuku ejima kutukañesha hampinji yitwatela kwikala naNzambi. Komana mwakwatilaña mpinji maana mafuku ejima kulonda mukundami kwakwihi naYehova?
‘Muzañalu waSpiritu Yajila’
9. Indi muzañalu wenzaña hamuloña waspiritu yajila watuleñelaña kwikala nachililwinyi?
9 Twatwalekañahu kwikala namukabu waspiritu hela tunakumona makabi. Muzañalu, hichililu chamuchiyedi chitukudiza chamwekeshaña nawu tunateli kutwalekahu kwikala akola chili tunakumona makabi. Muzañalu wudi neyi mutondu wakola wunateli kumena hela heluña dominina. Mukaayi kejima ambuña Nzambi amavulu ‘atambwila izu mulukadi lwalweni, namuzañalu waspiritu yajila.’ (1Tesa. 1:6) Amakwawu ayandaña. Ilaña Yehova wayikoleshaña naspiritu yindi ‘kulonda asweji kutatakena nakudiwunjika namuzañalu.’ (Kol. 1:11) Indi iwu muzañalu wafumaña kudihi?
10. Indi muzañalu wetu wafumaña kudihi?
10 Kwambukaku ‘namaheta abulaña kushakama’ amukaayi kaSatana, maheta akuspiritu atwinkayi Yehova ahaya nyaka. (1Tim. 6:17; Mat. 6:19,20) Watwikana nindi tukashakama namuzañalu haya nyaka. Twekala namuzañalu hakwikala hakachi kawana kwetu akwaKristu amukaayi kejima. Sweje-e dinu, twekala namuzañalu hamuloña wakwikala nawulunda naNzambi. Twatiyaña neyi chatiyili Davidi hela chakwila amukanjikijili kwikala itunduka, wamuhamekeli Yehova mukamina nindi: ‘Luwi lweyi lwabadika wumi kuwaha; dichi nyivumbu yami yikukuhamekaña. Dichi nukukukiswila nkisu hejima hinichidi wamumi.’ (Mas. 63:3,4) Hela chakwila tunakumona kukala, twamuhamekaña Nzambi namuzañalu.
11. Muloñadi chitwatelela kumukalakela Yehova namuzañalu?
11 Kapostolu Pawulu wayikonkomweneni akwaKristu nindi: “Zañalalenu mudi Mwanta mafuku ejima. Nukwila cheñi nami zañalalenu.” (Fwi. 4:4) Muloñadi akwaKristu chatelelawu kumukalakela Yehova namuzañalu? Muloña wansañu yaleteliyi Satana kutalisha hawanta waYehova. Satana wahoshaña nindi kwosi muntu wamukalakelaña Yehova namuchima wumu. (Yoba 1:9-11) Neyi tumukalakela Yehova chabula muzañalu muloña wakwila atuleja kumukalakela, tukumuhamekaña chamukunkulwayi. Dichi twafwilaña kwovwahila kukonkomwena kwañimbi yamasamu wahosheli nindi: “Mukalakelenu Yehova nakuzañalala; inzenu kwadiyi nakwimba tumina.” (Mas. 100:2) Twamulemeshaña Nzambi neyi tumukalakela namuzañalu namuchima wejima.
12, 13. Chumanyi chitwatela kwila hakwila tubuleña kuneña?
12 Kuhosha hohu mwalala, niambuña Yehova adihana mpinji yikwawu aneñaña nikulwisha hakwila nawu atwalekuhu kwikala namuzañalu. (Fwi. 2:25-30) Chumanyi chatela kutukwasha hampinji yamuchidiwu? Hamukanda waAefwesesa 5:18,19 hahosha nawu: ‘Inzalenu spiritu. Hoshenuña muntu namukwawu namasamu nitumina, nitumina twawuspiritu, namuchima wakumwimbila Yehova chachiwahi.’ Tunateli kuzatisha ñahi iku kufumba?
13 Neyi tudi nakukala kunakutuneñesha, tunateli kumulembelela Yehova mukulomba nikutoñojokahu chikupu hayuma yahamekañawu. (Tañenu Afwilipi 4:6-9.) Chuma chayikwashaña amakwawu kwikala akola nikutoñojoka hayuma yayiwahi hikuvumisha tumina twaWanta twakwatawu nikulondeja mutumina twenitu. Mana kwetu wamweni kukala kwamuneñesheleña nikumuzeyesha wanukaña nindi: “Kubombela hakulomba kwakufuma hamuchima, nahembeleli kumutu tumina twaWanta twantesha. Natiyileña kuwaha kwimba itu tumina twatuwahi twakumuhameka nachu Yehova nezu datiyakana hela wumweneni. Diyi mpinji yedeshiluwu mukanda waPalameni Kuli Yehova. Nawutañili mapampa kayedi chaaka chalondeleluhu. Wadiña neyi chuma chakuwundisha nachu muchima wami. Neluki nami Yehova wankiswilili.”
“Kudikasa Mwonji Wakuwunda”
14. Kuwunda kwenzaña hamuloña waspiritu yajila kwaletaña chililwinyi chachiwahi?
14 Hakupompa kwetu kwamatuña amavulu akwaKristu afuma kuyitachi yashiyashana adiluñishaña kuhanjeka nawana kwawu niahela. Kudikunda kweniku kwamwekeshaña kuwunda kwadiluñishañawu antu jaNzambi makonu, kunuñañana kwamukaayi kejima. Antu ayitalaña ahayamaña hakumona antu akuhwelelawu nawu atela kuhelañana ‘anashi muchima hakuhemba kunuñañana kwaspiritu, nakudikasa mwonji wakuwunda.’ (Efwes. 4:3) Iku kunuñañana kwabadika chikupu muloña amakwawu aleka kwila yuma yelileñawu.
15, 16. (a) Indi Petulu wadiña nachitachi chamuchidinyi, nawa chumichi chamukalilili ñahi? (b)Indi Yehova wamukwashili ñahi Petulu kuhimpa yililu yindi?
15 Kunuñañesha antu afuma kuyitachi yashiyashana kwakala. Hakwila nawu twikali anuñañana, tushinshikenu chakutalilahu chamuyaaka nkulakaji yakusambila chakapostolu Petulu kulonda twiluki chuma chitwatela kuleka. Tunateli kwiluka chamweneñayi aJentili abulili kwalama chahosheliyi nindi: ‘Enu aweni muneluki kaYudeya kushakama namuntu wakumunza wacheñi hela kwinza kwakwihi nindi, chinjila. Hela chochu, Nzambi nanleji nindi, kutena muntu neyi watama hela wamajilu, chinjila.’ (Yil. 10:24-29; 11:1-3) Kwesekeja nachatoñojokeleñawu antu amavulu munana mafuku, chakulileñayi Petulu welukili nindi Nshimbi yamwitejeli kukeña hohu akwawu aYudeya. Wamweneña neyi chachiwahi kumona aJentili neyi hiyayilumbu atela kuhelayi. *
16 Petulu watela watiyiliyi kukala hampinji yeñililiyi mwitala daKonelisu. Komana muntu wabulileña kulemesha aJentili nateli ‘kudinuña chachiwahi’ nawu “nakudikasa mwonji wakuwunda”? (Efwes. 4:3,16) Eña, muloña mwahitili hohu mafuku antesha kufuma hampinji yamukwashiluwu Petulu naspiritu yaNzambi hakwila yahimpi yitoñojoka yindi nikuleka chaambu. Yehova wamulejeli hatooka to-o muchimwenu nindi Nzambi hamonaña antu kushindamena hekowa hela munzaku. (Yil. 10:10-15) Dichi Petulu wamulejeli Konelisu nindi: ‘Mwalala, namoni komana Nzambi haakamaña antu kumesuku; hakwila munyunza yejima, muntu wamwakamaña yena, welaña mwaloña, amutiyaña kuwaha kudi Nzambi.’ (Yil. 10:34,35) Petulu wahimpili nawa wanuñañeni chikupu ‘nawana kwetu.’—1Pet. 2:17.
17. Munjilanyi mwawahila kunuñañana kwadiluñishañawu antu jaNzambi?
17 Chakutalilahu chaPetulu chatukwashaña kwiluka chinakuhimpawu chikupu antu jaNzambi makonu. (Tañenu Isaya 2:3,4.) Yihita yawantu ‘akunyunza yejima, akunyichidi yejima, akumatuña ejima’ anahimpi yitoñojoka yawu kulonda yesekani ‘namuchima waNzambi, wawuwahi, watiyishaña kuwaha, walala chikupu.’ (Chim. 7:9; Rom. 12:2) Amavulu hakachi kanawa antu ayiluwañesheli nayililu yamukaayi kaSatana yakuhelañana, kudishila nkunyi nichaambu. Hela chochu, kuhitila mukudiza Izu daNzambi niwukwashu waspiritu yajila, anadizi ‘chakusha muchima hakwila yuma yaletaña kuwunda.’ (Rom. 14:19) Kunuñañana kwafumañamu kwaleñelaña kumuhameka Nzambi.
18, 19. (a) Indi wejima wetu tunateli kuleta ñahi kuwunda nikunuñañana muchipompelu? (b)Chumanyi chitukadiza muchibaaba chinalondeluhu?
18 Indi wejima wetu tunateli kuleta ñahi kuwunda nikunuñañana kwekala nawantu jaNzambi? Muyipompelu yayivulu mwekala niantu afuma kumatuña acheñi. Amakwawu atela kwikala natushidikilu twacheñi indi kwiji anakudiza idimi detu. Komana twafwilaña kuyiluka? Izu daNzambi datukoleshaña kwila mwenimu. Hampinji yasonekeleliyi chipompelu chamuRoma mwadiña akakwitiya aYudeya niaJentili, Pawulu wahosheli nindi: “Ditambulenu muntu namukwawu neyi chayitambwiliyi Kristu, kulonda kulemesha Nzambi.” (Rom.15:7) Komana muchipompelu chenu mudi muntu imwatela kwiluka chiwahi?
19 Chumanyi chikwawu chitwatela kwila hakwila nawu spiritu yajila yizatikeña muchihandilu chetu? Tukadiza ilu lwihu muchibaaba chinalondeluhu chitwakahanjekaña hayililu yikwawu yamukabu waspiritu.
[Tumazu twaheshina]
^ Mukabu wateneniyi Yesu wabombelamu ‘mukabu waspiritu’ ‘nimukabu wakunyivumbu’ wamulambulañawu Nzambi kudi akwaKristu kuhitila mukushimwina mudimu waWanta.—Heb. 13:15.
^ Mukanda waAlevi 19:18 wahosha nawu: “Kuditenda chinjila; kushila anyana kawantaña jeyi nkunyi kumuchima chinjila, chiña wakakeñaña mukwenu neyi chiwadikeñaña eyi aweni; yami Yehova.” Anlomboli jansakililu yawaYudeya atañishileña nawu nhoshelu yakwila nawu “anyana kawantaña jeyi” ‘nimukwenu’ yakundamini kudi aYudeya hohu. Nshimbi yayilejeli nawu aIsarela hiyatela kudibomba nanyunza yikwawuku. Hela chochu, hiyetejeli yitoñojoka yatañishileñawu anlomboli jansakililu amuyaaka nkulakaji yakusambila yakwila nawu antu ejima abula kwikala aYudeya hiyayilumbu nawa atela kuyihela hamuntu hamuntuku.
Mukwakula Nenudi?
• Tunateli kumwekesha ñahi netu twayikeña chikupu ana kwetu?
• Muloñadi wutwatelela kumukalakela Yehova namuzañalu?
• Tunateli kuleta ñahi kuwunda nikunuñañana muchipompelu?
[Malwihu aKuzatisha haKudiza]
[Chikasha chidi hefu 21]
“Awa HiyakwaKristu Alala”
Mukanda wukweti mutu wakwila nawu Between Resistance and Martyrdom—Jehovah’s Witnesses in the Third Reich washimuna nsañu yahosheliyi kaYudeya wakansi wadiña mukaleya, mwalumbulwiliyi chadimweniyi nawaYinsahu jaYehova katachi hampinji yashikiliyi muNeuengamme muchilombu chakuyandishila antu. Wahosheli nindi:
“Chelili etu aYudeya afumini kuDachau tushiki muchilombu tikiliki, aYudeya amakwawu atachikili kusweka yuma yejima yadiñawu nayu kulonda abuli kutwinkahu. ... Henohu kanda atutwali [muchilombu chakuyandishila antu] twadikwashileña. Ilaña akunu, kutwadiñi mukukala kwakufwa nakunoña, muntu himuntu wadiña nakudakamena yomweni, nakuvulamena akwawu. Ilaña toñojokenu chuma chelileñawu atudizi aBayibolu. Hayina mpinji, adiña nakuzata nañovu hakuloñesha nyipayipi yamenji. Kwadiña mashika nawa azatilili mumayimakanza ifuku damukuma. Kwosi muntu welukili chayikojejeleña kuumika. Ahosheli nawu Yehova wayinkeleña ñovu. Akeñeleña mankendi chikupu neyi chochitwakeñeleña ninetu, muloña atiyili nzala. Hanu dinu chumanyi chelileñawu? Apompesheli makendi ejima iyadiñawu nawu, awenawu adiiluhu amakwawu, amakwawu ayinkeli akwawu akwakwitiya, afumini kuDachau. Nawa ayitambwilili nakuyipwepujola. Alombeli henohu kanda adyi. Ejima wawu ekutili nawa azañaleli. Ahosheli nawu anekuti. Munamoni, diyi mpinji yinelukili nami: Awa hiyakwaKristu alala.”
[Mwevulu wudi hefu 19]
Komana mwakwatilaña mpinji maana kunyidimu yimwazataña mafuku ejima kulonda mukundami kwakwihi naYehova?