“Thlarau Rah” Chuan Pathian A Chawimawi
“Thlarau Rah” Chuan Pathian A Chawimawi
“He mi avângin ka Pa chu chawimawiin a awm ṭhîn, tam taka in rah hian.”—JOH. 15:8.
1, 2. (a) Mi dangte fuih tûrin eng ang hun remchâng nge kan neih? (b) Pathian Jehova thilpêk engin nge a rawng kan bâwl theihna tichangtlung?
HENG dinhmun pahnihte hi han ngaihtuah teh: Unaunu pakhat chuan unaunu naupang zâwk pakhat chu thil vei a nei niin a hria a. Thlawhhma rawngbâwlnaa thawhpui tûrin ruahmanna a siam a ni. In dang an luh hmaa an inbiaknaah, a naupang zâwk chuan a rilru tibuaitu thil chu a hrilh ta a. Chu mi hnua a ṭawngṭainaah unaunu puitling takin ngaihsakna a lantîr avângin lâwmthu a sawi a ni; chu chu a mamawh tak a ni si a. Hmun dangah chuan, ram danga thu hrilhna nei nupa tuak khat chu an ramah an rawn kîr leh hlim a. An kalkhâwmna hmun pakhatah chuan, ram danga an thiltawnte phûr taka an sawi lai chu unaupa la naupang tak pakhat chuan ngawi rengin a lo ngaithla a. Kum engemaw zât a liam hnua ram danga rawngbâwla kal chhuak tûra a insiam mêk lai chuan, missionary anga rawngbâwl duhna neihtîrtu chu nupa tuak nêna an inbiakna chu a hre chhuak a ni.
2 Chûng dinhmun chuan i nuna danglamna siamtu tuemaw a hriat chhuahtîr che a nih loh pawhin an nuna danglamna i siamsak tuemaw chu a hriat chhuahtîr che mai thei. Vawikhat tîtîna chuan mi nun thlâk khât hle mah se, nî tinin mi dangte fuih theihna leh tihchak theihna hun remchâng kan nei ṭhîn. I unaute hlâwkpui zâwk leh Pathian tâna ṭangkai zâwk ni tûra i theihna leh i nihna tichangtlung thei thil engemaw a awm angah han ngaih ruat teh. Chu chu a ropui hle lâwng maw? A nihna takah chuan Pathian Jehova chuan chutiang thilpêk chu a pe che a ni—a thlarau thianghlim chu. (Lk. 11:13) Pathian thlarauvin kan nuna hna a thawh hian, Pathian rawng kan bâwlna tinrêngte tichangtlungtu mize duhawm takte kan nei a. Chu chu thilpêk ropui a va ni tak êm!—Galatia 5:22, 23 chhiar rawh.
3. (a) Engtin nge “thlarau rah” kan neih chhohna hian Pathian a chawimawi? (b) Eng zawhnate nge kan ngaihtuah ang?
3 Pathian thlarau thianghlim rah chhuah miziate chu, chu thlarau lo chhuahna Hnâr, Pathian Jehova neih miziate anpui chu a ni a. (Kol. 3:9, 10) Isua chuan Kristiante’n Pathian mizia an lâk chhan tûr ber chu târ langin, a tirhkohte hnênah: “He mi avângin ka Pa chu chawimawiin a awm ṭhîn, tam taka in rah hian,” tiin a sawi. * (Joh. 15:8) “Thlarau rah” kan neih chhoh hian, kan ṭawngkamah leh chêtziaah a rah chhuah chu a lo lang chiang hle ṭhîn a; chu chuan kan Pathian a chawimawi a ni. (Mt. 5:16) Eng kawngtein nge thlarau rah chu Setana khawvêl miziate lakah a danglam? Engtin nge thlarau rah chu kan neih theih ang? Engvângin nge chu mi neih chu harsa kan tih mai theih? Hêng zawhnate hi thlarau rah hmêlhmang hmasa pathum—hmangaihna, hlimna leh, remna—kan sawiho pahin kan ngaihtuah ang.
Thu Bul Chungnung Zâwka Innghat Hmangaihna
4. Isua’n a hnungzuitute chu eng ang hmangaihna nei tûrin nge a zirtîr?
4 Thlarau thianghlim rah chhuah hmangaihna chu khawvêla kan hmuh hmangaihna lakah chuan a danglam hle a ni. Eng angin nge a danglam? Thu bul chungnung zâwka a innghatnaah hian a danglam a ni. Chu chu Isua’n Tlâng Chunga a Thusawiah a târ lang a ni. (Matthaia 5:43-48 chhiar rawh.) Mi sualte takngial pawhin an chunga ṭhate laka ṭhat chhuah chu an duh ve ṭhîn tih a sawi a. Chutiang ‘hmangaihnaah’ chuan hmasial lo taka inpêkna a tel lo; ṭhat inlâwm tawnna mai a ni. ‘Kan Pa vâna mi fate nih’ kan duh chuan, kan danglam tûr a ni. Mi dangte chu min cheibâwl anga cheibâwl ai chuan, anni chu Jehova thlîr dân leh cheibâwl dân anga thlîrin, kan cheibâwl tûr a ni. Mahse, Isua thupêk angin kan hmêlmate hmangaih chu thil theih a ni em?
5. Engtin nge min tiduhdahtute chungah hmangaihna kan lantîr theih?
5 Bible entîrna pakhat ngaihtuah ta ila. Philippi khuaa thu an hrilh lai khân Paula leh Sila chu man an ni a, nasa taka vuak an tawrh hnuah ripa khung an ni a, chutah chuan ke kawl buntîr an ni. Chutianga an tihna lamah, tâng vêngtu ngei pawhin anni chu a sawisa tel mai thei. Lîrnghîng avânga beisei loh taka chhuah zalên an nih chuan, tâng vêngtu chungah phuba lâk theihna hun an neih avângin an hlim em? Hlim lo ve. A ṭhatna tûr an ngaihsakna—hmasial lo an hmangaihna—chuan a tâna thil ti vat tûrin a chêttîr a, chu chuan tâng vêngtu leh a chhûngte zawng zawng ringtu nih theihna kawng a hawnsak ta a ni. (Tirh. 16:19-34) Tûn lai huna kan unau tam takte pawhin chutiang bawkin ‘a tiduhdahtute chu mal an sâwmsak’ a ni.—Rom 12:14.
6. Eng ang kawngin nge unaute chungah hmasial lo hmangaihna kan lantîr theih? (Phêk 25-a bâwm en rawh.)
6 Kan rinpui unaute kan hmangaihna chu a thûk zâwk a. “Unaute tân kan nunna kan pe ve tûr a ni.” (1 Johana 3:16-18 chhiar rawh.) Mahse, kawng tênau zâwka hmangaihna lantîr theihna hun kan nei fo zâwk ṭhîn. Entîr nân, kan unau tilungni lotu thil kan ti emaw, kan sawi emaw a nih chuan, remna neih lêt nâna hma lain hmangaihna kan lantîr thei a. (Mt. 5:23, 24) Tuemawin min tilungni lo ta se, engtin nge ni ang? ‘Ngaihdam kan peih’ nge ni a, lungnih lohna pai reng duh châng kan nei zâwk? (Sâm 86:5) Thlarau thianghlim rah chhuah hmangaihna nasa tak chuan sual tê thamte khuh bo va, ‘Jehova min ngaihdam anga’ ngaidam tûrin min ṭanpui thei a ni.—Kol. 3:13, 14; 1 Pet. 4:8.
7, 8. (a) Engtin nge Pathian kan hmangaihna leh mite kan hmangaihna chu a inkûngkaih? (b) Engtin nge Jehova kan hmangaihna chu kan tihzual theih? (A hnuaia lem hi en rawh.)
7 Engtin nge unaute chungah hmasial lo hmangaihna kan neih chhoh theih? Pathian kan hmangaihna tihzualna hmangin kan nei chho thei a ni. (Eph. 5:1, 2; 1 Joh. 4:9-11, 20, 21) Bible chhiarna te, chhût ngunna te, leh ṭawngṭainate hmanga Jehova nêna hun kan hman dunna chuan kan thinlung a châwmin, kan Pa vâna mi kan hmangaihna chu a tizual a ni. Chutianga Pathian hnaih tûr chuan hun remchâng kan lei erawh a ngai a ni.
8 Entîr nân: Pathian Thu chhiar nân, chhût ngun nân, leh Jehova hnêna ṭawngṭai nân hun ruat bîk awm angah han ngaih ruat chhin teh. Jehova nêna a fâla in inkawm theihna tûr eng mahin a tihbuai loh nân chu hun chu fîmkhur takin i châng reng dâwn lâwm ni? Tuman Pathian hnêna ṭawngṭai lo tûrin min dang thei lo va, kan zînga a tam zâwk hian kan duh hun apiangah Bible kan chhiar thei bawk ngei mai. Chuti chung pawhin, kan nî tin thiltihte’n Pathian nêna a fâla kan inkawmna hun a tihbuai loh nân ruahmanna kan siam a ngai thei a ni. Nî tin hian Jehova hnaih tûrin i theih anga tam hun i lei em?
‘Thlarau Thianghlima Hlimna’
9. Thlarau thianghlim rah chhuah hlimna nihphung chu eng nge ni?
9 Thlarau rah nihna chhinchhiah tlâk tak pakhat chu a nghehna hi a ni a. Chutiang a nihzia chu kan ngaihtuah leh tûr thlarau rah pahnihna, hlimna chuan a entîr a ni. Hlimna chu tuipui thûk tak, a chung fâwn but butin a tihbuai phâk loh ang a ni a. Khawvêl puma Pathian chhiahhlawh tam takte chuan ‘thu chu hrehawm tuar chungin, thlarau thianghlima hlimin an pawm a.’ (1 Thes. 1:6) Mi dangte chuan harsatna leh chân te pawh an nei a. Mahse, Pathian Jehova chuan a thlarau thianghlim hmangin, ‘hlim taka chhelna leh dawhtheihna tinrêng nei tûrin’ a tichak a ni. (Kol. 1:10-12) Chu hlimna chu khawi aṭanga lo chhuak nge ni?
10. Kan hlimna lo chhuahna chu eng nge ni?
10 Setana khawvêla ‘sum rinawm lote’ ang lo takin, Pathian Jehova hnên aṭanga kan dawn thlarau lam ro chuan chatuan daih hlutna a nei a ni. (1 Tim. 6:17; Mt. 6:19, 20) Ani chuan beiseina hlimawm tak, tâwp nei lo nun chu kan hmaah a dah a. Khawvêl pum huap Kristian unaute zînga mi nih avânga hlimna kan nei bawk. A pawimawh berah chuan, kan hlimna chu Pathian nêna kan inlaichînnaa a innghat tlat hi a ni. A râl tlân lai pawha hlaa Pathian Jehova faktu Davida rilru chu kan ṭâwmpui a ni: “I ngilneihna hi nunna aiin a ṭhat zâwk avângin ka hmui hian a fak ang che. Chutiang bawkin ka dam chhûng zawngin ka fak ang chia: i hmingin ka kutte ka phar ang,” titu chu. (Sâm 63:3, 4) Harsatna kan tawh hunah pawh, kan thinlung chu hlim taka Pathian faknain a khat liam a ni.
11. Engvângin nge hlim chunga Pathian Jehova rawngbâwl chu a pawimawh?
11 Tirhkoh Paula chuan Kristiante chu: “Lalpaah chuan lâwm fo rawh u: ka ti leh pek ṭhîn ang, lâwm rawh u,” tiin a fuih a. (Phil. 4:4) Engvângin nge Kristiante tân hlim taka Jehova rawng bâwl chu thil pawimawh tak a nih? Jehova lal chungnunna chungchânga Setana thu buai chawh chhuah vâng a ni. Setana chuan duh rêng vânga Pathian rawngbâwl tumah an awm lo a ti tlat a. (Job. 1:9-11) Hlimna nei lo va, tih tûr a nih vâng chauhva rawngbâwl kan nih chuan, kan faka inthâwina chu a famkim lo vang. Chuvângin: “Lâwm chungin LALPA rawng bâwl ula: hla sa chungin a hmâah lo kal rawh u,” tia fakna hla phuahtu fuihna chu zawm kan tum tlat a ni. (Sâm 100:2) Hlim leh lâwm chunga inhuam taka rawngbâwlna chuan Pathian a chawimawi a ni.
12, 13. Ngaihtuahna ṭha lote do tûrin eng nge kan tih theih?
12 Mahse, Jehova chhiahhlawh inpe takte pawhin lunghnual châng leh rilru put hmang dik neih hrâm hrâm tum châng an nei ngei ang. (Phil. 2:25-30) Chutiang hunah chuan engin nge min ṭanpui thei ang? Ephesi 5:18, 19 chuan: “Thlarauva khatin awm zâwk rawh u. Fakna hlate, Pathian hlate, thlarau lam hlatea inbe tawnin, Lalpa chu in thinlungah hla saksakin, ṭingṭang kaihsak rawh u,” a ti a. Engtin nge chu chu kan nunpui theih ang?
13 Ngaihtuahna ṭha lovin min tlâk buak hunah, ṭawngṭaiin Jehova kan pan thei a, fak tlâk thilte ngaihtuah chu kan tum tlat thei a ni. (Philippi 4:6-9 chhiar rawh.) Ṭhenkhat chuan kan Lalram hlate play a, a thu lam kher lo pawha lo zaipuina chuan an rilru a tihahdamin, an ngaihtuahna an thunun theih phah tih an hria a ni. Lunghnual tak leh mangang taka dah ṭhîntu harsatna namai lo tâwk unaupa pakhat chuan: “Thinlung tak zeta ṭawngṭaina bâkah, Lalram hla ṭhenkhat chu a ziak en lovin ka sa thei a. Aw chhuah emaw, chhuah lo emawa chûng Jehova fakna hlate sakna chuan thinlunga thlamuanna min neihtîr a ni. Tin, chutih hun lai vêl chuan Draw Close to Jehovah tih lehkhabu chu chhuah a ni a. A kum leh chhûng chuan vawi hnih ka chhiar chhuak a. Ka thinlung thawidamtu hriak ang mai a ni a. Jehova chuan ka ṭan lâkna mal a sâwm tih ka hria,” tiin a sawi.
‘Remna Phuarna’
14. Thlarau thianghlim rah chhuah remna a chhinchhiah tlâkna chu eng nge ni?
14 Kan international inkhâwmpuiahte chuan hmun hran hran aṭanga lo kal mi chi hrang hrangte chuan Kristian inkawmkhâwmna nuam tak an nei ṭhîn a. Chûng chuan tûn laia Pathian mite neih remna—khawvêl puma kan inpumkhatna—chu a târ lang a ni. A lo thlîrtute chuan inhmêlma ngei tûra an ngaihte’n ‘remna phuarnaah chuan thlarau inpumkhatna vawng tûra an bei’ an hmu chu mak an ti hle ṭhîn. (Eph. 4:1-3) Chutiang inpumkhatna nei tûra mi tam takin an tih ngaite han ngaihtuah chuan, chu chu a ropui hle a ni.
15, 16. (a) Petera chu eng dinhmun hnuaia seilian nge a nih a, chu chuan atân eng harsatna nge a siam? (b) Engtin nge Jehova chuan Petera chu a rilru put hmang thlâk tûra a ṭanpui?
15 Mi chi hrang hrangte inpumkhattîr chu thil harsa tak a ni a. Chutianga inpumkhatna awm tûra kan tih ngai thilte hriat nân, kum zabi khatnaa tirhkoh Petera entîrna hi i lo ngaihtuah ang u. Serh tan loh Jentailte a thlîr dân chu a ṭawngkam aṭang hian a hriat theih a ni: “Juda miin hnam dang pâwl leh an hnêna kal a thian lohzia nangnin in hria a ni; nimahsela tumah thiang lo leh bawlhhlawh ka tih tûr a ni lo tih Pathianin mi hriattîr a ni,” tih aṭangin. (Tirh. 10:24-29; 11:1-3) Chutih hun laia thlîr dân tlânglâwn tak ṭanchhanin, Petera chu Dân thupêk anga a Juda-puite chauh a hmangaih tûr a ni tih rinna neiin a seilian a nih hmêl hle. A tân chuan Jentailte chu hmêlma ang leh huat tûr anga thlîr chu thil pângngai tak niin a lang. *
16 Kornelia ina a luh laia Petera hrilhhai dân tûr chu han ngaihtuah teh. Tûn hmaa Jentailte lo haw ṭhîntu khân anni chu “remna phuarnaah” chuan “rem taka inchuktuah leh inzawm khâwmin” a awmpui thei ngai ang em? (Eph. 4:1-3, 16) Thei e, a hma lawk khân, Pathian thlarau chuan Petera thinlung chu tivârin, a rilru siam ṭha tûr leh chi inthliarna a neihte hneh tûra a lo ṭanpui tawh avângin. Pathian Jehova chuan hnam leh chi ṭanchhanin mite a thlîr lo tih inlârnaah chiang takin a lantîr a ni. (Tirh. 10:10-15) Chuvângin, Petera chuan Kornelia hnênah: “Pathianin mi duhsak bîk a nei lo tih dik takin ka hria e; nimahsela hnam tin zîngah tupawh amah ṭiha fel taka ti apiang a lâwmzâwng mi an ni ṭhîn,” tiin a hrilh thei a ni. (Tirh. 10:34, 35) Petera chu inthlâkthlengin, “unauhote” chu a lungrualpui thei ta a ni.—1 Pet. 2:17.
17. Engtin nge Pathian mite neih inpumkhatna chu thil chhinchhiah tlâk tak a nih?
17 Petera thiltawn chuan tûn laia Pathian mite zînga inthlâkthlengna ropui tak thlêng mêk chu hre thiam tûrin min ṭanpui a. (Isaia 2:3, 4 chhiar rawh.) Mi tam tak, “hnam tin zînga mi te, chi tin zînga mi te, mi tin zînga mi te, ṭawng tin zînga mi te” chuan “Pathian duhzâwng, a ṭha leh lawm tlâk leh, ṭhat famkim chu” mil tûrin an ngaihtuahnate an thlâk a ni. (Thup. 7:9; Rom 12:2) Hêng mite zînga tam tak chu Setana khawvêla inhuatna te, inhmêlmâkna te, leh inṭhen hranna te chuan a lo thunun tawh ṭhîn a. Mahse, Pathian Thu ngun taka zirna leh thlarau thianghlim ṭanpuinain, ‘inremna tûr thilte ûm dân’ an zir a. (Rom 14:19) Chu mi rah chhuah inpumkhatna chuan Pathian a chawimawi a ni.
18, 19. (a) Engtin nge kohhrana remna leh inpumkhatna awmtîrtu kan nih ṭheuh theih? (b) A dawta thuziakah eng nge kan ngaihtuah dâwn?
18 Engtin nge Pathian mite zînga kan hmuh remna leh inpumkhatna kan belhchhah ṭheuh theih? Kohhran tam takah chuan ram dang aṭanga lo pêmte an awm a. Ṭhenkhat chuan hnam dân dang an neiin, kan ṭawng pawh an hmang thiam vak lo mai thei. Chûng mite chu hriat chian kan tum em? Pathian Thu chuan chutianga ti tûrin min fuih a ni. Judate leh Jentailte telna Rom khua kohhranho hnêna a lehkha thawnah, Paula chuan heti hian a sawi a: “Krista chuan Pathian tihropui nân a lâwm che u ang bawk khân inlâwm tawn rawh u,” tiin. (Rom 15:7) In kohhranah hriat chian vak loh tuemaw i nei em?
19 Thlarau thianghlimin kan nun a kaihhruai theih nân eng dang nge kan la tih ngai? He zawhna hi a dawta thuziaka thlarau rah hmêlhmang dangte kan sawiho hunah kan ngaihtuah ang. (w11-E 04/15)
[Footnote-te]
^ par. 3 Isua rah sawiah hian “thlarau rah” leh Kristiante’n Lalram chanchin hrilhna hmanga Pathian hnêna an hlan “hmuite rah” a tel ve ve a ni.—Heb. 13:5.
^ par. 15 Leviticus 19:18 chuan: “Phuba i la tûr a ni lo va, i chipui thlahte huatna i pai tûr a ni hek lo, nangmah i inhmangaih angin i ṭhenawm i hmangaih tûr a ni zâwk,” a ti a. Juda sakhaw hruaitute chuan “i chipui thlahte” tih leh “i ṭhenawm” tih chu Judate sawina chauh niin an hria a. Dân thupêk chuan Israelte chu hnam dang laka inla hrang tûrin a ti a. Amaherawhchu, kum zabi khatnaa sakhaw hruaitute thlîr dân, Juda ni lo zawng zawngte chu hmêlma an ni a, huat tûr an ni tih chu a thlâwp lo.
Engtin Nge Kan Chhân Ang?
• Engtin nge kan unaute chungah mahni inphat hmangaihna kan lantîr theih?
• Engvângin nge hlim chunga Pathian rawng kan bâwl a pawimawh?
• Engtin nge kohhrana remna leh inpumkhatna awmtîrtu kan nih theih?
[Zirlai Atâna Zawhnate]
[Phêk 25-naa bâwm]
“Hêngte Hi Kristian Dik Tak An Nih Hi”
Nazi rorêlna hnuaia Jehova Thuhretute harsatna tawh chungchâng ziakna, Between Resistance and Martyrdom—Jehovah’s Witnesses in the Third Reich tih lehkhabu chuan Juda ṭhalai pakhat thusawi chu a târ lang a; ani chuan Neuengamme concentration camp a thlen hnua Jehova Thuhretute a hmuh hmasak ber chungchâng heti hian a sawi a ni:
“Keini Dachau hmuna Judate kan va thlen chuan, Juda dang lo awm sate chuan an thil neihte min sem ve loh nân an lo thukru a. . . . [Concentration camp] pâwnah chuan kan inṭanpui ṭheuh ṭhîn kha a ni a. A chhûnga thih leh dam inkâr dinhmunah erawh chuan, mi tin mai chuan mi dangte theihnghilh khawpin mahni dam chhuahna tûr kan buaipui a. Mahse, Bible Zirlaite thiltih hi ngaihtuah teh. Chutih lai chuan, tui lâkna pipe siam ṭha tûrin hna an thawkrim hle a. Khua lah a vâwt êm êm a, vûr tluka vâwt tuiah chuan an ding ni lêng ṭhîn a ni. An tawrh theih dân chu tuma hriat thiam phâk a ni lo. An sawi dân chuan Jehova’n chakna a pe a ni. An ril a ṭâm êm avângin, an chhang dawn chu keimahni ang bawkin an mamawh hle a. Mahse, eng nge an tih? An chhang dawn zawng zawng chu dah khâwmin, a chanve chu an ei a, a bâk zawng chu Dachau aṭanga lo kal an unaute hnênah an pe a. Chu bâkah, anni chu lo lâwmin, an lo fâwp a. Chhang an ei hmain ṭawngṭaina an nei a ni. A hnuah chuan, an zain lungâwi takin an awm a, an hlim hle. An sawi dân chuan an ril pawh a ṭâm tawh lo. Chutah tak chuan: Hêngte hi Kristian dik tak an nih hi, tih ka ngaihtuah chhuak ta a ni,” tiin.
[Phêk 23-naa milemte]
Pathian Jehova hnaih nân thiltih dangte aṭangin nî tin hun i lei em?