Ja tëëm diˈib yajkypyë espiritë santë myëjkumaabyë Dios
“Yajkumaabyëty jaˈa nDeety duˈun, ko naty duˈun miity ndëëmˈajtkëxy.” (JUAN 15:8, Nuevo Testamento de Mazatlán [NTM])
1, 2. 1) ¿Wiˈixaty mbäät nbudëjkëmë nmëguˈukˈäjtëm? 2) ¿Ti Jyobaa xynyamoˈoyëm parë mas oy nmëduˈunëm?
NˈOKWINMÄˈÄYËMË tyäˈädë: Tuˈugë toxytyëjk diˈib jantsy oy Dios mëduump tpekyë kuentë ko tuˈugë kiixy diˈib mä naymyujkën myay tyajy, ta twoy tëjkˈayeˈebyë. Ta tyäˈädë kiixy tyukmëtmaytyaktääyë jyotmay, ets ok, ta tmoˈoyë dyoskujuyëmë Jyobaa ko ja myëguˈuk të pyudëkëty, pes yëˈë naty diˈib yajtëgoyˈajtypy. Mä ja tuˈugë lugäär, jyaˈty tuˈugë kasäädë jäˈäy diˈib Dios mëduundëp wiink paˈis ets ta tjantsy myaytyäˈäktë eksperiensyë mä të tyuˈukmuktë mëdë myëguˈuktëjk. Jam tam yajpääty tuˈugë mixy diˈib jeˈeyë tmëdooˈity. Ets ko tiempë nyaxy, ta tyäˈädë mixy nyaynyiˈˈixëty parë nyëjkxäˈäny mä të yajkexy Dios mëduumbë, ets ta tjamyetsy tijaty myaytyaktë ja kasäädë jäˈäy diˈib pudëjkë parë tyunët misioneerë.
2 Waˈanë tyäˈädë mdukjamyetsyëty ja nmëguˈukˈäjtëm diˈib mbudëjkë o ja diˈib ojts xypyudëkë. Ko mëdë nmëguˈukˈäjtëm ngäjpx nmaytyakëm, mbäät kyaj ndimˈyajtëgäjtsëmë jyukyˈäjtën, per mbäät xëmë nbudëjkëm ets nmëjämoˈoyëm pënaty mëët nayˈijx nnaybyatëm. Okwinmay koxyëp jyaˈˈaty diˈib mbäät xypyudëjkëm parë niˈigyë nyajmëjwindëjkëmë oybyë jäˈäyˈäjtën etsë wijyˈäjtën parë mas oy nmëduˈunëmë Dios ets ja nmëguˈukˈäjtëm. Mëjwiin kajaaxyëp nmëjjäˈäwëm, ¿këdii? Pesë Jyobaa yajkypyë tyäˈädë naybyudëkë: yëˈë yˈespiritë santë o myëjää (Luk. 11:13). Ko tyäˈädë myëjää tyuny mä ëtsäjtëm, ta nyajnigëxëˈkëmë oybyë jäˈäyˈäjtën diˈib xypyudëjkëm parë yajxonë Dios nmëduˈunëm. ¡Mëjwiin kajaa yˈoyëty ko Jyobaa xynyamoˈoyëm! (Käjpxë Gálatas 5:22, 23, Traducción del Nuevo Mundo [NM].)
3. 1) ¿Tiko Dios yajmëjkumay ko nyajnigëxëˈkëm ja jäˈäyˈäjtën diˈib yajkypyë Diosë myëjää? 2) ¿Tijaty yaˈˈatsoojëmbitäämp?
3 Espiritë santë xymyoˈoyëmë oybyë jäˈäyˈäjtën diˈib yajnigëxeˈkypy wiˈixë Jyobaa jyaˈayˈaty, pes yëˈë diˈib yajkypy (Kol. 3:9, 10). Jesus ojts tnigajpxy tiko jyëjpˈamëty etsë Dios mëduumbë tniˈˈijxtuˈuttëdë Jyobaa, ko jyënany: “Yajkumaabyëty jaˈa nDeety duˈun, ko naty duˈun miity ndëëmˈajtkëxy” (Juan 15:8, NTM). * Ja jäˈäyˈäjtënë diˈib yajkypyë Diosë myëjää ja nyajnigëxëˈkëm mä käjpx maytyakën ets mä wiˈix tijaty nduˈunëm, ets yëˈë yajmëjpëtseembyë Jyobaa (Mat. 5:16). ¿Wiˈix tyëgatsyëty extëm jyaˈayˈattë Dios mëduumbë ets extëm jyaˈayˈattë naxwinyëdë jäˈäy? ¿Wiˈix mbäät nyajnigëxëˈkëm mas niˈigyë ja jäˈäyˈäjtën diˈib yajkypyë Diosë myëjää, ets tiko tsyiptaˈaky? Nˈoknijäˈäjëm wiˈix yaˈˈatsoojëmbity mientrës nˈijxëm tëgëk peky ja jäˈäyˈäjtën diˈib yajkypyë Diosë myëjää: tsojkën, xondakën etsë tuˈugyëˈat.
Tsojkën diˈib niˈigyë kyajaajëty
4. ¿Wiˈix tyëgatsyëty ja tsojkën diˈibë Jesus tyukˈanaˈam ja yˈëxpëjkpëty?
4 Yëˈë tsojkën diˈib yajkypyë espiritë santë tim tëgatsy mët ja tsojkënë diˈib yaˈijxëbë naxwinyëdë jäˈäy. ¿Tiko? Yëˈko tyäˈädë tsojkën niˈigyë myëjwiin kyajaajëty, ninuˈun tkamëbääty diˈibë jäˈäy yaˈijxëdëp. Jesus ojts tnimaytyaˈaky wiˈix tyëgatsyëty (käjpxë Matewʉ 5:43-48). Ojts tnigajpxy ko axtë pokyjyaˈay tyuunëmbijttëp tijaty yajtukmëduundëp. Per duˈun, jeˈeyë naty yajtuunëmbity ja mayˈäjtën ets kyaj mët ko njantsy yajnigëxëˈkëm ja tsojkën. Dios mëduumbë kyaj mbäät duˈun jyaˈayˈattë, pes tsojkëp dyaˈixëdët ko yëˈë uˈunkˈäjtëdëbë Dios. Kyaj yˈoyëty ndukmëjëmbijtëmë nmëguˈukˈäjtëm extëm të xytyuˈunëm, niˈigyë mbäät njäˈäyˈäjtëm extëmë Jyobaa jyaˈayˈaty mët yëˈë, ets nˈijxëm extëm yëˈë yˈixyëty. Ets extëmë Jesus jyënany axtë ntsojkëm ja mëtsip. Per ¿mbäädëdaa ntsojkëm?
5. ¿Wiˈix mbäät ntsojkëm pënaty xyˈaxëktuˈunëm?
5 Nˈokˈijxëm mä Biiblyë tuˈugë ijxpajtën. Ko natyë Pablo mëdë Silas kyäjpxwäˈkxtë Filipos, ta yajmäjtstë, yajwojptë, yajtsuumdë ets ja tyeky yajnimaˈtpajttë mä ja kepytyuktsajtstuˈuty. Waˈan jyamˈäjty ja pujxndëjk kuentˈäjtpë ko yajtëytyuundë. Ets ko ja mëk ujx nyajxy, ta yˈawäˈätspëtsëëmdë. ¿Waˈandaa net xyondaktë parë ttukmëjëmbijttë ja pujxndëjk kuentˈäjtpë? Kyaj. Niˈigyë dyaˈijxëdë tsojkën ets tpudëjkëdë, ko duˈun ttuundë, ta ojts tˈaxäjëdë tëyˈäjtën nidukjëën niduktëjk (Apos. 16:19-34). Tyam nanduˈun jyaty, mayë nmëguˈukˈäjtëm tpadundë extëm tyäˈädë tekstë jyënaˈany: “Amdow pëjktsowdë Dios es tkunuˈxët ja diˈibë mduunëdëp axëëk” (Rom. 12:14).
6. ¿Wiˈix mbäät nyajnigëxëˈkëm ko njantsy tsyojkëmë nmëguˈukˈäjtëm? (Ixë rekuäädrë mä pajina 24.)
6 Ja tsojkën diˈib nyaˈijxëm mä nmëguˈukˈäjtëm, niˈigyë kyajaajëty, pes axtë xypyatëm “nyajkëm ja njikyˈäjtënˈäjtëm mët jaˈagyëjxm ja nmëguˈukˈäjtëm” (käjpxë 1 Fwank 3: 16-18). Per näˈäty mbäät kyaj tyimtsekyëty nguˈoˈkëm parë ndukˈijxëm ko ntsojkëm. Extëm nˈokpëjtakëm, pën të wiˈix njënäˈänëm o të nduˈunëm diˈib ja nmëguˈukˈäjtëm të dyajpoky, oy ko ninëjkxëm ets mëët ngäjpxˈoˈoyëm (Mat. 5:23, 24). ¿Ets pën ëtsäjtëm diˈib ti të nyajpojkëm? ¿Ijtëm listë parë nbokymyaˈkxëm, o waˈandaa nbëjkëˈkëm ja tsip akë? (Sal. 86:5.) Tadë tsojkën diˈib yajkypyë Diosë myëjää, yëˈë xypyudëjkëm parë ninäjxëm ja nmëguˈukˈäjtëmë tyëgoˈoyën diˈib yiˈinëm waanë ets nbokymyaˈkxëm mëjwiin kajaa duˈun extëmë Jyobaa ojts xypyokymyaˈkxëm (Col. 3:13, 14, NM; 1 Peed. 4:8).
7, 8. 1) ¿Wiˈix mbäät xypyudëjkëm ko ntsojkëmë Dios parë ntsojkëmë nmëguˈukˈäjtëm? 2) ¿Wiˈix mbäät nyajkëktëjkëmë tsojkën mä Jyobaa? (Ixë dibujë.)
7 ¿Wiˈix mbäät nyajmëjwindëjkëmë tsojkën parë mëdë nmëguˈukˈäjtëm? Ko ntsojkëm mëjwiin kajaa Jyobaa (Éfe. 5:1, 2; 1 Fwank 4:9-11, 20, 21). Parë duˈun ntsojkëm, jëjpˈam ets nyajnäjxëmë tiempë mët yëˈë, ko nmënuˈkxtakëm, ngäjpxëmë Biiblyë ets nwinmäˈäyëm këkpäät. Duˈuntsoo, nëjkxëp mas niˈigyë ntsojkëmë Jyobaa. Per tsojkëbë duˈun ets njuˈtëmë tiempë parë nmëwingoˈonëm.
8 Nˈokpëjtakëm koxyëp nyajmoˈoyëm tuˈugë oorë näˈä mbäät nmënuˈkxtakëmë Jyobaa, ngäjpxëmë Biiblyë ets nwinmäˈäyëm këkpäät. ¿Këdii njuˈtëmxyëbë tiempë ets nitiixyëp xykyayajtuˈudujkëm parë nyajnäjxëmë tiempë mëdë Jyobaa? Per ëtsäjtëm mbäät nmënuˈkxtakëmë Jyobaa näˈä ndimtsojkëm ets ngäjpxëmë Biiblyë näˈä ndimkäjpxäˈänëm. Kyaj mbäät naˈijxëm ets ja tuunk ayoˈon diˈib nmëxënäjxëm xypyëjkëmë tiempë diˈib mbäät nyajnäjxëm mëdë Jyobaa. ¿Njuˈtëmë tiempë tuˈuk tuˈugë xëë nyaxy parë niˈigyë nmëwingoˈonëm?
Xondakën diˈib yajkypyë Diosë myëjää
9. ¿Wiˈix yajnimaytyaˈagyë xondakën diˈib yajkypyë Diosë myëjää?
9 Ja oybyë jäˈäyˈäjtën diˈib yajkypyë Diosë myëjää, ijtëëp xëmë. Extëmë xondakën diˈib nˈixäˈänëm. Yëˈë xondakën duˈun extëm tuˈugë ujts diˈib yoon pajtp axtë mä lugäärë äänëˈëk tëtsëˈëkpë. Nˈokjamyajtsëm ko may ja Jesusë yˈëxpëjkpë yˈaxäjëdë “ja ayuk mët tuˈugë xondakën diˈibë ja espiritë santë mmooyë, oy [d]yajnäjxtë byeen ja ayoˈon” (1 Tes. 1:6). Tyam nan taaˈäjtpë nmëguˈukˈäjtëm diˈib wyinguwäˈkëdëbë ayoˈon jotmayë mëjwiin kajaabë. Perë Jyobaa mët yëˈëgyëjxmë yˈespiritë santë tmëjämoˈoy niˈamukë parë “[tm]ëmadäˈäktët tëgekyë mët ja maˈxtujkën esë xondakën” (Kol. 1:11). Per ¿wiˈixë Dios xymyoˈoyëmë xondakën?
10. ¿Wiˈixë Jyobaa xyjotkujkmoˈoyëm mëjwiin kajaa?
10 Satanás mëdë jyaˈay xyˈawäˈänëm “ja mëkjäˈäyˈat” diˈib näjx këjxp, per tijatyë Jyobaa xyˈawäˈänëm ets xymyoˈoyëm ninäˈä kyakexy kyanaxy (1 Tim. 6:17; Mat. 6:19, 20). Jyobaa xyjotkujkmoˈoyëm mëjwiin kajaa ko xyˈawäˈänëm ja jukyˈäjtën xëmëkyëjxmbë. Ets nan xyajjotkujkˈäjtëm ko xymyoˈoyëmë nmëguˈukˈäjtëm abëtsemy nyaxwinyëdë. Per diˈib mas jëjpˈam, yëˈë ko jantsy jotkujk nayjäˈäwëm ko mbäät oy mëët nˈijtëm. Duˈun nayjäˈäwëm extëmë rey David diˈib kyuyˈëëjë Jyobaa ko naty kyeˈekyjëdity: “Mˈoyjyaˈayˈäjtën diˈib kyaj myastuˈuty niˈigyë yˈoyëty ets kyaj dyuˈunëty ja jukyˈäjtën, yëˈë nˈääjëts mëjkumayanëp. Duˈunëts mijts nmëjkumayaˈany nuˈunëts ja nxëë njukyˈäjtën nyaxy” (Sal. 63:3, 4). Extëm nˈijxëm, oy mëjwiin kajaa ayoˈon jotmay nbatëm, mbäädë jot korasoon xyondaˈaky ets nmëjkumäˈäyëmë Jyobaa.
11. ¿Tiko jyëjpˈamëty ets nmëduˈunëmë Jyobaa mëdë xondakën?
11 Apostëlë Pablo ojts tˈanëëmë niˈamukë ja Dios mëduumbë: “Dëˈënyëm mxondäˈäktët mä yëˈë Nintsënˈäjtëm. Nˈakˈanmääyëmbijttëp es mˈit mxondët” (Fili. 4:4). ¿Tiko jyëjpˈamëty ets agujk jotkujk nayjäˈäwëm ko nmëduˈunëmë Jyobaa? Yëˈko duˈun nyaˈijxëm ko nbuwäˈkëm ja yˈanaˈamën diˈibë Satanás nyibëdëˈk. Nˈokjamyajtsëm ko Mëjkuˈu jyënaˈany ko nipën tkamëmëdoyë Dios amumduˈukjot (Job 1:9-11). Pääty, oy njamëduˈunëmë Dios per pën kyaj ndukxondakëm, kyaj naty nmëduˈunëm amumduˈukjot. Pääty nduˈunëm extëmë Salmo 100:2 jyënaˈany: “Mmëdundë Jyobaa mëdë agujkˈäjt jotkujkˈäjtën. Winguwäˈägëdë mëdë ää ayukë xondakën myëëtpë”. Duˈunë duˈun, parë nyajmëjpëtsëˈëmëmë Dios tsojkëp nmëduˈunëm mëdë xondakën, mët tukëˈëyë tsojkën.
12, 13. ¿Ti mbäät nduˈunëm ko kyaj jotkujk nekynyayjäˈäwëm?
12 Per ko nwinmäˈäyëm extëm tijaty yˈixëty, jäjtp tiempë mä Dios mëduumbë kyaj jotkujk nyekynyayjawëty ets jaa mä tsyekyëty ttunëdë mëjää parë oy wyinmayët (Fili. 2:25-30). ¿Ti mbäät xypyudëjkëm ko duˈun nyajpatëm? Éfesʉ 5:18, 19 jyënaˈany: “Oy ko mduˈumoˈoyëdët ja espiritë santë. Nayajxondäˈägëdë nixim niyam mët ja salmë esë ëy diˈibë mëët ja Dios yajmëjjawë, yajnaxtë ëy esë salmë mwinmäˈänyoty Nintsënˈäjtëm [Jyobaa] myëjˈäjtëngyëjxm”. ¿Wiˈix mbäät nguytyuˈunëmë tyäˈädë käjpxwijën?
13 Ko myinët mä winmäˈäny diˈib xypyëjkëm ja xondakën, nˈokmënuˈkxtakëmë Dios ets nˈokwinmäˈäyëm këkpäät tijaty mbäät xypyudëjkëm, ets tijaty oy (käjpxë Filipʉs 4:6-9). Diˈib näägë nmëguˈukˈäjtëm jotkujkmooyëdëp ets yajwinmääyëdëp oy, yëˈë ko tmëdooˈittë cánticos del Reino ets tpaˈëwdë. Tuˈugë nmëguˈukˈäjtëm diˈib yajnäjxë mëj jotmay, janäämëty ijty nyayjawëty axëëk ets myay tyajy. ¿Ti pudëjkë? Yëˈë jyënaˈany: “Xëmëts nnuˈkxtaky amumduˈukjot, per nan ojts njaty agëbajky kanäägë ëy. Kajaajëts xyjotkujkmooyë tyäˈädë tsujpë ëy yaˈaxy diˈib myëjkumaabyë Jyobaa, oyëts mëk nˈëëy ets oy yuunk. Mä tadë tiempë nan ja pyëtseemyë liibrë Acerquémonos a Jehová. Majtsk okëts ojts ngajpxy mä tuˈukpë jëmëjt. Duˈunëts njäˈäwë extëmxyëbëtsë njot ngorasoon yajtsooyjaaxy. Seguurëts nˈity ko Jyobaa kyunuˈkx kojëts nduuny ja mëjää”.
Tuˈugyëˈäjtën diˈib yajkypyë Diosë myëjää
14. ¿Wiˈix nyigëxeˈeky ja tuˈugyëˈäjtën diˈib yajkypyë espiritë santë?
14 Ko tyunyëtyë tuˈukmujkënë mä jyäˈttë nmëguˈukˈäjtëm diˈib tsoˈondëp kanäk paˈis, jantsy agujk jotkujk nyayˈix nyaybyäädëdë. Ko duˈun yaˈixy, ta nyigëxeˈeky ko mä Diosë kyäjpn jaˈäjtpë tuˈugyëˈäjtën abëtsemy nyaxwinyëdë. Duˈunyë jäˈäy wyëˈëmëdë ko tˈixtë wiˈixë nmëguˈukˈäjtëm diˈibxyëp mbäät nyaymyëtsipˈatëdë tˈëxtäˈäytyë “ja tiˈigyëˈäjtën diˈibë ja espiritë santë yajkypy, es jikyˈattë jotkujk nixim niyam” (Éfe. 4:3). Tyäˈädë tuˈugyëˈäjtën kyaj nëgoo nyayaˈixy, pes të tsyiptakxëdë mayë nmëguˈukˈäjtëm.
15, 16. 1) ¿Tiko Pedro ojts tsyiptakxëty dyajtëgatsëdë wyinmäˈäny mä ja jäˈäy diˈib kyaj jyudiyëty? 2) ¿Wiˈixë Jyobaa tpudëjkë Pedro parë wyinmääytyëgatsët?
15 Tsiptakp nyajtuˈukmujkëmë jäˈäy diˈib wiˈixëmë kostumbrë tmëdattë. Parë njaygyujkëm nuˈunën tsyiptaˈaky, yëˈë ko nnijäˈäjëm wiˈix wyinmääyë apostëlë Pedro. Mbäät nnijäˈäjëm wiˈixë naty tˈixy ja jäˈäy diˈib kyaj jyudiyëty, ko jyënany: “Miity ajkëxy mnejwëëygyëxypy ko kaˈp jaˈa judío jaˈay kyostumbre duˈun myiny, nëkxy yoˈoymyujky nyäjxmujkkëxy mëët ja kaˈpë jyudíyojaˈayëtyëny ajkëxy”. Per ta net jyënany: “Perë ëëty të ëëty jaˈa Dios xyajniˈixëˈëy ko ëëty kaˈp mëbäät nipën ndijy jëbëkjaˈay o axëkjaˈay” (Hech. 10:24-29; 11:1-3, NTM). Tyäˈädë yëˈë xytyukˈijxëm ko Pedro myutskˈäjty ojts yajtukniˈˈixë extëm may ja israelitë, ko ja anaˈamën jyënaˈany ets yëˈëyë tsyoktëp ja myëguˈuktëjk diˈib judiyë. Pääty, waˈanë Pedro kyaj wiˈix nyayjäˈäwë tmëtsipˈatët ets tˈaxëkˈixët ja myëguˈuktëjk diˈib kyaj jyudiyëty. *
16 Okwinmay wiˈixë Pedro jantsy tëgatsy nyayjäˈäwë ko jyajty mä Cornelio tyëjk. Yëˈë jekyë naty të tˈaxëkˈixy diˈib kyaj jyudiyëty, per ¿ojtsëdaa net “tiˈigyë yˈittë” ets nyayjäˈäwëdë “jotkujk nixim niyam”? (Éfe. 4:3, 16.) Ojts, pes mä kyanëjkxynyëm mä Cornelio tyëjk, ojts dyajtëgatsyë wyinmäˈäny mä ja jäˈäy diˈib kyaj jyudiyëty. ¿Ti pudëjkë? Yëˈë Diosë myëjää yaˈˈawatsë jyot kyorasoon etsë Jyobaa tyukˈijxë ko kyaj mëj dyajnaxy tuˈugë nax käjpn o mä wiˈixë jäˈäy yˈixˈattë (Apos. 10:10-15). Päätyë Pedro tˈanmääy ja Cornelio: “Tyamëts njaygyukë ko tëyˈäjtën ja Dios nidëgekyë jäˈäy ttsojktäˈäy, es tkupëjktäˈäy oytyim pën jäˈäyëty diˈibë wintsëˈkëdëp es tmëduny” (Apos. 10:34, 35). Extëm nˈijxëm, ko Pedro dyajtëgäjtsyë jyot wyinmäˈäny, ta yˈijty tuˈugyë mët niˈamukë ja myëguˈuktëjk (1 Peed. 2:17).
17. ¿Tiko mëjwiin kajaa yaˈixy ko Diosë kyäjpn yˈity tuˈugyë?
17 Extëmë Pedro dyaˈoˈoyë wyinmäˈäny, yëˈë xytyukˈijxëm wiˈix tyamë nmëguˈukˈäjtëm dyaˈoyëdë mëjwiin kajaajë jyot wyinmäˈäny (käjpxë Isaías 2:3, 4). Miyonkˈamë yetyëjk toxytyëjk “diˈibaty jikyˈäjttë[p] mä maygyäjpn, mä wiinkpë may ayuk käjxpëty, es mä maynyaxwinyëdë”, dyaˈoyëdë jyot wyinmäˈäny ko tjaygyukëdë “diˈibë Dios tsyejpy, diˈibë yˈoyjäˈäp, diˈibë oy es diˈibë wäˈäts” (Diˈibʉ Jat. 7:9; Rom. 12:2). Nimay nanduˈunë naty nmëdäjtëmë jot winmäˈäny extëm naxwinyëdë jäˈäy diˈib nayˈaxëkˈijxëdëp, naywyäˈkxëdëp ets tsyiptun tsyipkäjpxtë. Per ko nˈëxpëjkëmë Diosë yˈAyuk ets ko xypyudëjkëmë Diosë myëjää, ta nˈijtëm “tiˈigyë” (Rom. 14:19, NM). Ko niˈamukë nnayaˈijtëm tuˈugyë, ta myëjpëtsemyë Jyobaa.
18, 19. 1) ¿Ti mbäät nduˈunëm parë jyaˈˈatëdë jotkujkˈäjtën etsë tuˈugyëˈäjtën mä naymyujkën? 2) ¿Ti nnijawëyäˈänëm mä ja tuˈukpë artikulo?
18 ¿Ti mbäät nduˈunëm parë jyaˈˈatëdë jotkujkˈäjtën etsë tuˈugyëˈäjtën mä Jyobaa kyäjpn? Mä mayë naymyujkën taaˈäjtpë nmëguˈukˈäjtëm diˈib tsoˈondëp wiink lugäär, ets näˈäty tëgatsyë kostumbrë tmëdattë o kyaj yajxon tkäjpxtë nˈayukˈäjtëm. ¿Nmëwingoˈonëmë tyäˈädë nmëguˈukˈäjtëm parë niˈigyë nˈixyˈäjtëm? Biiblyë xytyukˈanaˈamëm ets duˈun nduˈunëm. Ko apostëlë Pablo tnijäˈäyë ja naymyujkën diˈib Roma, mä naty yajpäättë ja judiyë ets ja diˈib kyaj jyudiyëty, duˈun tˈanmääytyë: “Nayˈaxäjëdë niduˈuk niduˈuk extëm nandëˈën oj mˈaxäjëdë ja Kristë miitsëty, es dëˈënë Dios yˈitët awdaty” (Rom. 15:7). ¿Të nwinmäˈäyëm pën mbäät mas niˈigyë nˈixyˈäjtëm?
19 Per ¿ti mbäät nˈaktuˈunëm parë Diosë myëjää tyunët mä ja jukyˈäjtën? Mä ja tuˈukpë artikulo nnijawëyäˈänëm ets nˈakˈixäˈänëm kanäk peky ja jäˈäyˈäjtën diˈib yajkypyë Diosë myëjää.
[Notë diˈib noky ëxˈääy]
^ parr. 3 Ja tëëm diˈibë Jesus myaytyak majtsk peky tˈandijy, duˈun ja diˈib yajkypyë espiritë santë ets duˈun ja wintsëˈkën diˈib nmoˈoyëmë Dios ko ngäjpxwäˈkxëm (Ebre. 13:15).
^ parr. 15 Levítico 19:18 jyënaˈany: “Kyaj xytyuunëmbitët extëm të mdunyëty ni xykyamëdatëdë akë mët ja mmëgugäjpn; ets mtsokëp ja mmëguˈuk extëm mijts këˈëm”. Ja wintsëndëjk duˈunë naty tyukniˈˈixëdë ko yëˈëyë yajmaytyakpë judiyë ko jyënaˈany, “ja mmëgugäjpn” o “ja mmëguˈuk”. Ja israelitë ojts yajtukˈanaˈamdë ets kyaj ttuktëk ttukwäˈägëdët ja nax käjpn diˈib kyaj jyudiyëty, per kyaj yaˈˈanmääytyë tmëtsipˈattët ets tˈaxëkˈixtët extëm tyukniˈˈijxëdë ja wintsëndëjk.
¿Wiˈix nˈatsoˈojëmbijtëm?
• ¿Wiˈix nyajnigëxëˈkëm ko njantsy tsyojkëmë nmëguˈukˈäjtëm?
• ¿Tiko jyëjpˈamëty ets nmëduˈunëmë Jyobaa mëdë xondakën?
• ¿Ti mbäät nduˈunëm parë jyaˈˈatëdë jotkujkˈäjtën etsë tuˈugyëˈäjtën mä naymyujkën?
[Yajtëˈëwën]
[Letrë diˈib miimp mä dibujë mä pajina 24]
“Yëˈë jyantsy pyanëjkxtëbë Kristë”
Tuˈugë liibrë diˈib myaytyakypy wiˈixë Jyobaa tyestiigëty mëk nyayaˈijtëdë ko naty yˈaneˈemyë Alemania nazi, tmaytyaˈaky wiˈix jyënany tuˈugë mixy diˈib judiyë, ko ojts tim jawyiin nyaybyaatyëty mëdë Jyobaa tyestiigëty ko naty të jyaˈty Neuengamme mä ja tsumy jyaˈay yajtuumbëˈattë.
“Kojëts niˈamukë judiyëtëjk ntsoˈondë Dachau etsëts njäjttë mä ja soldäädë dyaˈittë tsumy jyaˈay, ja judiyëtëjk diˈibë naty jam yajpattëp ojts dyuˈutstë tijatyë naty myëdäjttëp parëts kyaj xymyoˈoytyët. [...] Kotsë naty nyajpäättë awäˈätstum naybyudëjkëdëptsë naty nixim niyam, per kotsë net ojts nyajpatnëdë oˈkën jëjpˈam, jeˈeyë net niduˈuk niduˈuk ojts tmëmääy tmëdäjnëdë wiˈix këˈëm nyayajtsoˈogëdët ets kyaj tnekyjyamyatstë ja myëguˈuktëjk. Per ¿mnijäˈäp ti naty tyuundëp ja jäˈäy diˈib yˈËxpëjktëbë Biiblyë? Japë naty të yajpëjtäˈäktë ets mëk tyundët mä ja tuubë yˈoyë. Jantsy xujxp o tëtykyë naty, ets jap xyënaxtë mä ja nëë diˈib jantsy tëtsn. Nipën tkajaygyujkë wiˈix tmëmadaktë. Per yëˈëjëty jyënandë ko yëˈë Jyobaa diˈib mëjäämooyëdë. Extëm ëëtsëty, nanduˈunë naty jyantsy kyayäˈändë mët ko jyantsy yuˈoogëdë. ¿Per ti tyuundë? Yajtuˈukmujktëp ja tsäjpkaaky, kujkwaˈkxy dyajwëˈëmdë ets kujkwaˈkxy tmoˈoytyë ja myëguˈuktëjk diˈib naty tsoˈondëp Dachau. Ets nanduˈun tˈanëëmëdë oy ko të mindë ta ttsuˈkxtë. Mä kyakääytyënëm jawyiinë nuˈkxtakën ttuundë ets ko kyääytyäˈädë ta jantsy agujk jotkujk kyëxëˈëktë ets të jyotkëdäˈäktë. Jyënäˈändë ko kyaj net nyeky yuˈoogëdë. Netëts nwinmääy: Tyäˈädë jäˈäyëty yëˈë jyantsy pyanëjkxtëbë Kristë.” (Between Resistance and Martyrdom—Jehovahˈs Witnesses in the Third Reich [Entre la resistencia y el martirio: los testigos de Jehová durante el Tercer Reich].)
[Letrë diˈib miimp mä dibujë mä pajina 23]
¿Njuˈtëmë tiempë mä ja tuunk ayoˈon diˈib nmëxënäjxëm parë niˈigyë nmëwingoˈonëmë Jyobaa?
