“Dika Tšeo di Enywago ke Moya” di Tagafatša Modimo

“Tate o tagafatšwa ka se, gore le tšwele pele le enywa dienywa tše dintši.” —JOH. 15:8.

1, 2. (a) Re na le dibaka dife tša go kgothatša ba bangwe? (b) Ke mpho efe e tšwago go Jehofa yeo e kaonefatšago bokgoni bja rena bja go mo hlankela?

AKANYA ka maemo a a mabedi: Mosadi wa Mokriste o lemoga gore kgaetšedi yo monyenyane o tshwenyegile. O rulaganya gore a sepele le yena tirelong ya tšhemo. Ge ba dutše ba boledišana ge ba tsena ka ntlo le ntlo, kgaetšedi yo monyenyane o thoma go mmotša se se mo tshwenyago. Ka morago lona letšatšing leo ge a rapela, kgaetšedi yo yo monyenyane o leboga Jehofa ka baka la lerato leo kgaetšedi yo a godilego ka tsebo a mmontšhitšego lona; e be e tloga e le seo a bego a se nyaka. Lefelong le lengwe, banyalani ba sa tšwa go boa nageng e šele moo ba bego ba dira boboledi. Ge ba bokane le ba bangwe, ba anega ka lethabo diphihlelo tšeo ba bilego le tšona, ngwanabo rena yo mofsa o theeditše ka kelohloko. Nywaga e itšego ka morago, ge ngwanabo rena yo a itokišeletša go ya kabelong ya gagwe nageng e šele, o nagana ka banyalani ba le poledišano yeo e mo tutueleditšego gore a nyake go ba moromiwa.

² Mohlomongwe maemo ao a go gopotša motho yo a ilego a kgoma bophelo bja gago goba motho yo o ilego wa kgoma bophelo bja gagwe. Ke therešo gore go fo kwa selo gatee ga se gantši go ka fetošago bophelo bja motho, eupša re na le dibaka tša go kgothatša le go matlafatša batho ba bangwe letšatši le letšatši. Nagana ge nkabe go na le selo seo se ka godišago bokgoni le dika tša gago, sa dira gore di be bohlokwa kudu go bana beno le go Modimo. Na seo se be se ka se kgahliše? Ge e le gabotse, Jehofa o re nea mpho ya mohuta woo—moya wa gagwe o mokgethwa. (Luka 11:13) Ge moya wa Modimo o dutše o šoma maphelong a rena, o dira gore re be le dika tše dibotse tšeo di kaonefatšago karolo e nngwe le e nngwe ya tirelo ya rena go Modimo. A mpho e botse gakaakang!—Bala Bagalatia 5:22, 23.

3. (a) Go hlagolela “dika tšeo di enywago ke moya” go tagafatša Modimo bjang? (b) Re tla ahlaahla dipotšišo dife?

³ Dika tšeo moya o mokgethwa o di tšweletšago di bontšha semelo sa Mothopo wa moya woo, Jehofa Modimo. (Bakol. 3:9, 10) Jesu o bontšhitše lebaka le bohlokwa kudu leo ka lona Bakriste ba swanetšego go katanela go ekiša Modimo ge a be a botša baapostola ba gagwe gore: “Tate o tagafatšwa ka se, gore le tšwele pele le enywa dienywa tše dintši.” * (Joh. 15:8) Ge re dutše re hlagolela “dika tšeo di enywago ke moya,” mafelelo a seo a bonagala gabotse tseleng yeo re bolelago le go dira dilo ka yona; gomme seo se dira gore Modimo wa rena a retwe. (Mat. 5:16) Dika tšeo di enywago ke moya di fapana bjang le mekgwa ya lefase la Sathane? Re ka hlagolela bjang dika tšeo di enywago ke moya? Ke ka baka la’ng go ka ba thata go dira bjalo? Re tla ahlaahla dipotšišo tše ge re dutše re hlahloba dika tše tharo tša mathomo tša dika tšeo di enywago ke moya—lerato, lethabo le khutšo.

Lerato Leo le Theilwego Molaong wa Motheo o Phagamego

4. Ke lerato la mohuta mang leo Jesu a rutilego balatedi ba gagwe gore ba le bontšhe?

⁴ Lerato leo le tšweletšwago ke moya o mokgethwa le fapana kudu le mohuta wa lerato le  le tlwaelegilego lefaseng. Bjang? Le theilwe molaong wa motheo o phagamego. Jesu o bontšhitše phapano ye Thutong ya Thabeng. (Bala Mateo 5:43-48.) O bontšhitše gore gaešita le badiradibe ba swara batho ba bangwe ka tsela yeo le bona ba ba swarago ka yona. “Lerato” le le bjalo ga le akaretše boikgafo bja kgonthe eupša e fo ba go dira motho seo a go dirago sona. Ge e ba re nyaka go ‘itlhatsela re le barwa ba Tatago rena yo a lego magodimong,’ re swanetše go ba bao ba fapanego. Go e na le go swara batho ka tsela yeo ba re swarago ka yona, re swanetše go ba lebelela le go ba swara ka tsela yeo Jehofa a ba lebelelago le go ba swara ka yona. Lega go le bjalo, go ka kgonega bjang gore re rate manaba a rena go etša ge Jesu a laetše?

5. Re ka bontšha bjang gore re rata bao ba re tlaišago?

⁵ Ela hloko mohlala o mongwe wa Beibele. Ge Paulo le Silase ba be ba le modirong wa boboledi kua Filipi, ba ile ba swarwa, ba otlwa gabohloko gomme ba lahlelwa kgolegong, moo dinao tša bona di ilego tša tlemelelwa setokising. Ge nako e dutše e eya, mohlomongwe mohlapetši wa kgolego le yena o ile a ba swara gampe. Ge ba be ba lokollwa go sa letelwa ka baka la tšhišinyego ya lefase, na ba ile ba thabela gore ba tla itefeletša go monna yoo? Aowa. Ka ge ba be ba tshwenyegile kudu ka bophelo bja gagwe—e lego seo se bontšhago lerato la bona la boikgafo—ba ile ba tutueletšega gore kapejana ba mo dirile selo se sengwe, ba dira gore mohlapetši wa kgolego le ba lapa la gagwe ka moka ba fetoge badumedi. (Dit. 16:19-34) Bana babo rena ba bantši lehono ba ile ba latela mokgwa wo o swanago wa go ‘šegofatša bao ba ba tlaišago.’—Baroma 12:14.

6. Re ka bontšha bjang lerato la boikgafo go bana babo rena? (Bona lepokisi le le lego go letlakala 21.)

⁶ Re bontšha badumedigotee le rena lerato ka mo go tseneletšego. “Re tlamegile go gafa meoya ya rena bakeng sa bana babo rena.” (Bala 1 Johane 3:16-18.) Lega go le bjalo, gantši re ka bontšha lerato ka ditsela tše dinyenyane. Ka mohlala, ge e ba re bolela goba re dira selo se se kgopišago ngwanabo rena, re ka bontšha lerato ka go gata mogato wa pele wa go dira khutšo. (Mat. 5:23, 24) Go thwe’ng ge e ba yo mongwe a re kgopiša? Na re “ikemišeditše go lebalela,” goba na ka dinako tše dingwe re boloka sekgopi? (Ps. 86:5) Lerato le le tseneletšego leo le tšweletšwago ke moya o mokgethwa le ka re thuša go bipa diphošo tše dinyenyane le go lebalela ba bangwe ka bolokologi “go etša ge Jehofa a [re] lebaletše ka bolokologi.”—Bakol. 3:13, 14; 1 Pet. 4:8.

7, 8. (a) Go rata batho le go rata Modimo go tswalana bjang? (b) Re ka oketša bjang tsela yeo re ratago Jehofa ka yona? (Bona seswantšho se se lego ka mo tlase.)

⁷ Re ka hlagolela lerato la boikgafo bjang go  bana babo rena? Ka go rata Modimo ka mo go tseneletšego. (Baef. 5:1, 2; 1 Joh. 4:9-11, 20, 21) Nako yeo re e fetšago le Jehofa ka go bala Beibele, ka go naganišiša le ka thapelo e fepa dipelo tša rena le go oketša tsela yeo re ratago Tatago rena wa legodimong ka yona. Lega go le bjalo, re swanetše go ipha nako ya go batamela Modimo.

⁸ Ka mohlala: Akanya o be o na le iri e itšego mo letšatšing ya go bala Lentšu la Modimo, go naganišiša ka lona le go rapela Jehofa. Na o be o ka se katanele gore go se be le selo seo se šitišanago le nako yeo ya gago le Jehofa? Ke therešo gore ga go yo a ka re thibelago go rapela Modimo, le gona bontši bja rena re ka bala Beibele ka nako le ge e le efe yeo re e nyakago. Lega go le bjalo, go ka nyakega gore re pheme ditšhitišo tša mešomo ya letšatši le letšatši gore di se šitišane le nako ya rena le Modimo. Na o ipha nako e lekanego ka mo go ka kgonegago letšatši le letšatši gore o batamele Jehofa?

“Lethabo la Moya o Mokgethwa”

9. Ke’ng seo se kgahlišago ka lethabo leo le tšweletšwago ke moya o mokgethwa?

⁹ Seo se kgahlišago ka seka seo se enywago ke moya ke gore ga se fetofetoge. Lethabo, e lego seka sa bobedi seo re tlago go se ahlaahla, ke mohlala wa go se fetofetoge mo go bjalo. Lethabo le swantšhwa le sebjalo se sethata seo se ka phelago gaešita le ka tlase ga maemo a thata. Lefaseng ka bophara, bahlanka ba bantši ba Modimo ba “amogetše lentšu tlase ga ditlaišego tše dintši ka lethabo la moya o mokgethwa.” (1 Bathes. 1:6) Ba bangwe ba lebeletšana le mathata le go hloka. Lega go le bjalo, Jehofa o ba matlafatša ka moya wa gagwe gore ba “kgotlelele ka mo go tletšego ka go se fele pelo le ka lethabo.” (Bakol. 1:11) Lethabo le le tšwa kae?

10. Lethabo leo re nago le lona le tšwa kae?

¹⁰ Ka go se swane le “mahumo a sa kgonthišegego” a lefase la Sathane, matlotlo a moya ao re a amogetšego go Jehofa ke a sa ruri. (1 Tim. 6:17; Mat. 6:19, 20) O re beetše bokamoso bjo bo thabišago bja ka mo go sa felego. Re thabišwa ke go ba karolo ya borwarre bja Bokriste bja lefase ka bophara. Go feta tšohle, lethabo la rena le theilwe tswalanong ya rena le Modimo. Re ikwa go swana le Dafida, yoo gaešita le ge a ile a gapeletšega go ba motšhabi, a ilego a reta Jehofa ka kopelo, a re: “Gobane botho bja gago bo phala bophelo, melomo ya ka e tla go reta. Ka gona ke tla go reta bophelo bja ka ka moka.” (Ps. 63:3, 4) Gaešita le ge re kopana le mathata, dipelo tša rena di phophoma ka lethabo la go reta Modimo.

11. Ke ka baka la’ng go le bohlokwa gore re hlankele Jehofa re thabile?

¹¹ Moapostola Paulo o ile a kgothatša Bakriste gore: “Ka mehla thabang Moreneng. Ke tla buša ke re, Thabang!” (Bafil. 4:4) Ke ka baka la’ng go le bohlokwa gore Bakriste ba phethe tirelo ya bona go Jehofa ba thabile? Ka baka la kgang yeo Sathane a e rotošitšego malebana le bogoši bja Jehofa. Sathane o bolela gore ga go motho yo a hlankelago Modimo ka pelo ye e ratago. (Jobo 1:9-11) Ge e ba re be re ka fo hlankela Jehofa re sa thaba, sehlabelo sa rena sa theto se be se tla ba se sa felela. Ka gona re katanela go kwa keletšo ya mopsalme e rego: “Hlankelang Jehofa ka go hlalala. Tlang pele ga gagwe le goelela ka lethabo.” (Ps. 100:2) Tirelo yeo e dirwago ka pelo e ratago le e thabilego e tagafatša Modimo.

12, 13. Re ka dira’ng gore re lwantšhane le maikwelo a fošagetšego?

¹² Lega go le bjalo, go tla ba le dinako tšeo bahlanka ba Jehofa le bona ba nyamago le go katanela go dula ba na le pono e nepagetšego. (Bafil. 2:25-30) Re ka thušwa ke’ng dinakong tše bjalo? Baefeso 5:18, 19 e re: “Dulang le tlatšwa ka moya o mokgethwa. Le boledišane seng sa lena ka dipsalme, ditumišo tša go tumiša Modimo le dikopelo tša moya, le opelela Jehofa e bile le mo gobela mmino dipelong tša lena.” Re ka šomiša keletšo yeo bjang?

¹³ Ge re eba le maikwelo a fošagetšego, re ka tsoma Jehofa ka thapelo gomme ra katanela go naganišiša ka dilo tše di tumišegago. (Bala Bafilipi 4:6-9.) Ba bangwe ba kgothatšega kudu gomme ba kgona go nagana gabotse ge ba sepedišana le dikopelo tša rena tša Mmušo tše di gatišitšwego ka go ekiša medumo ya tšona.  Ngwanabo rena yo a bego a lebeletšana le bothata bjoo gantši bo bego bo mmakela kgakanego le manyami o gopola ka gore: “Ke be ke rapela ka mehla go tšwa pelong e bile ke swara dikopelo tše mmalwa tša Mmušo ka hlogo. Ke be ke ikwa ke le khutšong ge ke opela dikopelo tše tša go tumiša Jehofa, go sa šetšwe gore ke di opela ka go hlaboša goba ka setu. Le gona, puku ya Batamela Kgaufsi le Jehofa e ile ya lokollwa mo e ka bago ka nako yeo. Ke ile ka e bala gabedi ngwageng wo o ilego wa latela. E be e le bjalo ka sehlare se se lapološago pelo ya ka. Ke a tseba gore Jehofa o šegofaditše maiteko a ka.”

‘Setlemo se se Tlemaganyago sa Khutšo’

14. Ke karolo efe e lemogegago ya khutšo yeo e tšweletšwago ke moya o mokgethwa?

¹⁴ Dikopanong tša rena tša ditšhabatšhaba, batlakopanong bao ba tšwago ditlogong tše di fapafapanego ba thabela bogwera bjo borutho bja Bokriste. Ditiragalo tše bjalo di bontšha karolo ya khutšo yeo e thabelwago ke batho ba Modimo lehono—botee bja rena bja lefase ka bophara. Gantši babogedi ba makatšwa ke go bona batho bao ka tlwaelo ba bego ba ka hloyana ba “leka ka matla go boloka botee bja moya setlemong se se tlemaganyago sa khutšo.” (Baef. 4:3) Ruri botee bjo bo a makatša ge re ela hloko dilo tšeo ba bantši ba ilego ba swanelwa ke go di fenya.

15, 16. (a) Petro o be a etšwa setlogong sefe gomme seo se ile sa mmakela tlhohlo bjang? (b) Jehofa o thušitše Petro bjang gore a fetoše pono ya gagwe?

¹⁵ Go dira gore batho ba ditlogo tše di fapafapanego ba be boteeng ke tlhohlo. Anke re hlahlobeng mohlala wa lekgolong la pele la nywaga, wa moapostola Petro, wo o tla re thušago go lemoga seo re swanetšego go se fenya gore re be boteeng ka mokgwa woo. Tsela yeo a bego a lebelela Bantle bao ba sa bollago e ka lemogwa go seo a ilego a se bolela ge a re: “Le tseba gabotse kamoo go sa dumelelwego ke molao gore Mojuda  a ikopanye le motho wa morafo o mongwe goba gore a mmatamele; lega go le bjalo Modimo o mpontšhitše gore ke se ke ka bitša motho gore o šilafetše goba gore ga se a hlweka.” (Dit. 10:24-29; 11:1-3) Ka baka la kgopolo e tlwaelegilego yeo batho ba bantši ba bego ba na le yona ka nako yeo, go bonagala Petro a gotše a dumela gore Molao o mo gapeletša go rata Bajudagotee le yena feela. Go ka direga gore o be a bona go se na bothata go lebelela Bantle e le manaba ao a swanetšego go hloiwa. *

¹⁶ Anke o nagane feela kamoo Petro a ilego a ikwa ka gona ge a tsena legaeng la Koronelio. Na monna yo a bego a na le pono e fošagetšego ka Bantle o be a ka ‘kopanywa gotee ka kwano’ le bona “setlemong se se tlemaganyago sa khutšo”? (Baef. 4:3, 16) Ee, matšatšing a sego kae pejana ga moo, moya wa Modimo o be o sa tšwa go kgoma pelo ya Petro, wa mo thuša go fetoša pono ya gagwe le go fenya kgethollo yeo a bego a na le yona. Ponong, Jehofa o ile a dira gore a kwešiše gabotse gore Modimo ga a lebelele batho go ya ka morafo goba setšhaba seo ba tšwago go sona. (Dit. 10:10-15) Ka baka leo, Petro o kgonne go botša Koronelio gore: “Bjale gona ke kwešiša gabotse gore Modimo ga a bebe sefahlego, eupša setšhabeng se sengwe le se sengwe motho yo a mmoifago gomme a dira se se lokilego o a amogelega go yena.” (Dit. 10:34, 35) Petro o ile a fetoga gomme ka kgonthe a ba boteeng le “mokgatlo wohle wa bana babo.”—1 Pet. 2:17.

17. Ke bjang botee bja batho ba Modimo e lego bjo bo makatšago?

¹⁷ Phihlelo ya Petro e re thuša go lemoga phetogo e kgolo yeo e diregago gare ga batho ba Modimo lehono. (Bala Jesaya 2:3, 4.) Batho ba dimilione bao ba “tšwago ditšhabeng tšohle, melokong yohle, merafong yohle le malemeng ohle” ba ile ba fetoša menagano ya bona gore e dumelelane le “thato e botse le e amogelegago le e phethegilego ya Modimo.” (Kut. 7:9; Baroma 12:2) Bontši bja bona ba be ba na le lehloyo, bonaba le karogano ya lefase la Sathane. Eupša ka go ithuta Lentšu la Modimo le ka thušo ya moya o mokgethwa, ba ithutile go ‘phegelela dilo tše di išago khutšong.’ (Baroma 14:19) Botee bjo bo bago gona bo tumiša Modimo.

18, 19. (a) Yo mongwe le yo mongwe wa rena a ka tsenya letsogo bjang khutšong le boteeng bja phuthego? (b) Re tla ahlaahla’ng sehlogong se se latelago?

¹⁸ Yo mongwe le yo mongwe wa rena a ka tsenya letsogo bjang khutšong le boteeng bjo bo lego gona bathong ba Modimo? Diphuthegong tše dintši go na le bao ba hudugilego ba etšwa dinageng dišele. Ba bangwe ba ka ba ba etšwa ditšong tše di fapanego le tša rena goba ba sa kgone go bolela maleme a gabo rena gabotse. Na re katanela go tsebana le bona? Se ke seo Lentšu la Modimo le se kgothaletšago. Ge Paulo a be a ngwalela phuthego ya Roma, yeo badumedigotee ka gare ga yona e bego e le Bajuda le Bantle, o itše: “Amogelanang go etša ge Kriste le yena a re amogetše, gore go išwe letago go Modimo.” (Baroma 15:7) Na go na le motho yo o ka katanelago go mo tseba gakaone ka phuthegong ya geno?

¹⁹ Ke’ng se sengwe seo re ka se dirago gore moya o mokgethwa o šome maphelong a rena? Sehlogo se se latelago se tla araba potšišo ye ge re dutše re hlahloba dika tše di šetšego tšeo di enywago ke moya.

[Mengwalo ya tlase]

O be o tla Araba Bjang?

• Re ka bontšha bjang lerato la boikgafo go bana babo rena?

• Ke ka baka la’ng go le bohlokwa gore re phethe tirelo ya rena go Modimo re thabile?

• Re ka tsenya letsogo bjang khutšong le boteeng bja phuthego?

[Dipotšišo tša Thuto]

[Lepokisi go letlakala 21]

“Ba ke Bakriste ba Therešo”

Puku ya Between Resistance and Martyrdom—Jehovah’s Witnesses in the Third Reich e laodiša mantšu a mogolegwa yo monyenyane wa Mojuda, moo a bolelago ka go kopana la mathomo le Dihlatse tša Jehofa ka morago ga go fihla kampeng ya tshwenyo ya Neuengamme:

“Gateetee ge rena Bajuda bao ba tšwago Dachau re be re fihla kampeng, Bajuda ba bangwe ba ile ba thoma go uta selo se sengwe le se sengwe seo ba bego ba na le sona gore ba se ke ba se abelana le rena. . . . Ge re be re le ka ntle [ga kampa ya tshwenyo], re be re thušana. Eupša mo, moo maphelo a rena a lego kotsing, motho yo mongwe le yo mongwe o be a tshwenyegile kudu ka go iphološa, a se na taba le ba bangwe. Eupša nagana ka seo Barutwana ba Beibele ba bego ba se dira. Ka nako yeo, ba be ba swanetše go šoma ka thata, ba lokiša diphaephe tša meetse. Go be go tonya kudu gomme ba be ba fetša letšatši ka moka ba eme meetseng a lehlwa. Ga go yo a bego a kwešiša gore ke eng seo se bego se dira gore ba kgone go kgotlelela. Ba be ba re Jehofa o ba nea matla. Ba be ba tloga ba hloka senkgwa go swana le rena ka ge ba be ba swerwe ke tlala. Eupša ba be ba dira’ng? Ba be ba kgoboketša dinkgwa ka moka tšeo ba bego ba na le tšona gomme tše dingwe ba di nea badumedigotee le bona bao ba bego ba sa tšwa go fihla ba etšwa Dachau. E bile ba be ba ba amogela le go ba atla. Pele ba ka ja, ba be ba rapela. Ka morago ga moo, ka moka ga bona ba be ba kgotsofetše e bile ba thabile. Ba ile ba bolela gore ga ba sa swerwe ke tlala. Se ke sona se dirilego gore ke phethe ka gore: Ba ke Bakriste ba therešo.”

[Diswantšho go letlakala 19]

Na o ipha nako letšatši le letšatši ka go kgaotša mediro e mengwe gore o batamele Jehofa?