“Say Bunga na Espiritu” et Mangiglogloria ed Dios
“Say Bunga na Espiritu” et Mangiglogloria ed Dios
“Say Amak et nigloria no mantultuloy kayon manbunga na dakel.”—JUAN 15:8.
1, 2. (a) Diad antoran pankanawnawa ya napaseseg tayo so arum? (b) Anton regalo so iiter nen Jehova ya mamaaligwas ed abilidad tayon manlingkor ed sikato?
ISIPEN pa iyan duaran situasyon: Naimano na sakey a sister ya naaaburido so agin bii ya mas ugaw nen say sikato. Kanian sikatoy akipakna ya man-partner ira’d panagpulong. Diad pantotongtong dan dua diad lawak na kimeyan, imbesngaw na samay kalangweran so panaaburidoan to. Diad saman ya agew, panamegley na pikakasi et akisalamat iyan kalangweran ed si Jehova lapud maaron interes na saman ya sister. Talagan kakkaukolan to itan. Wala met so sanasawan kakkapawil da ni labat ya tinmulong ed panagpulong a kimey diad arum a bansa. Diad sakey a panlilimog, legan dan malikeliket ya iistoryaen iray eksperiensya ra, walay sakey a kalangweran ya brother a mandengdengel. Kalabas na pigaran taon, legan ton manpaparaan parad asainmin to diad arum a bansa, anonotan to iman ya sanasawa tan saramay istorya ra ya amakiwas ed sikaton pilaleken so panmisyonero.
2 Nayarin lapud sarayan situasyon et nanonotan moy sakey a toon akapanguman ed bilay mo, odino sakey ya agin apaseseg mo. Siempre, matalag tay nauman so bilay na sakey a too lapu labat ed impanistoryaan. Balet diad kada agew, walaan itayo na saray pankanawnawan pasesegen tan pabiskegen so arum. Agta marakep no walay bengatlan mamaaligwas ed saray abilidad tan kualidad mo pian mas makagunggona iratan ed saray agagim tan mas mausar iratan ed Dios? Diad tua et iikdan itayo nen Jehova na ontan a regalo—say masanton espiritu. (Luc. 11:13) Legan ya onkikiwas so espiritu na Dios ed bilay tayo, niwala’d sikatayo iray marakep a kualidad ya mamaaligwas ed kada aspekto na panaglingkor tayo’d Dios. Alay abig itan a regalo!—Basaen so Galacia 5:22, 23.
3. (a) Panon a mangigloria ed Dios so pamayubo ed “bunga na espiritu”? (b) Antoran tepet so ikonsidera tayo?
3 Saray kualidad ya pawawalaen na masanton espiritu et mangipapatnag ed mismon personalidad na Lapuan na satan ya espiritu, say Dios ya Jehova. (Col. 3:9, 10) Impabitar nen Jesus so sankamanunaanan a rason no akin a nepeg ya panggunaetan na saray Kristiano ya aligen so Dios. Inkuan to ed saray apostol to: “Say Amak et nigloria no mantultuloy kayon manbunga na dakel.” * (Juan 15:8) Legan tayon babayuboan so “bunga na espiritu,” napatnagan so epekto to ’tan diad panagsalita tan kiwas tayo, a manresulta ed kigloria na Dios. (Mat. 5:16) Diad antoran paraan ya duma so bunga na espiritu ed saray kagagawa na mundo nen Satanas? Panon tayon nabayuboan so bunga na espiritu? Akin et aliwan mainomay so pamayubo’d satan? Ikonsidera tayo irayan tepet legan tayon pantongtongan so unonan taloran aspekto na bunga na espiritu—aro, gayaga, tan deen.
Aro ya Mipara’d Aro na Dios
4. Anton klase na aro so imbangat nen Jesus ya ipanengneng na saray patumbok to?
4 Say aro ya pawawalaen na masanton espiritu et nidumaduma ed klase na aro ya kaslakan ed mundo. Akin? Ta satan ya aro et mipara ed aro na Dios. Impabitar nen Jesus iyan pandumaan diad Sermon ed Palandey. (Basaen so Mateo 5:43-48.) Impaimano ton anggan saray managkasalanan et tratratoen day arum unong ed panagtrato na arum ed sikara. Say ontan ya “aro” et anggapoy kaiba ton tuan sakripisyo ta singam labat ipapawil so kamaongan ya impanengneng na arum ed sika. No labay tayon ‘napaneknekan ya ananak itayo na Ama tayon walad tawen,’ kaukolan ya duma itayo. Imbes ya tratoen so arum unong ed panagtrato ra’d sikatayo, nepeg a say panmoria tan panagtrato tayo’d sikara et mipara’d panmoria tan panagtrato nen Jehova ed sikara. Ingen, panon tayon naaro iray mamubusol ed sikatayo, a singa ingganggan nen Jesus?
5. Panon tayon nipanengneng so aro ed saramay mamapasegsegang ed sikatayo?
5 Ikonsidera pa iyan alimbawa ed Biblia. Legan ya manpupulong si Pablo tan Silas ed Filipos, sikaray inaresto, nilelewet, tan inyan ed sankadaleman a prisoan, a ditan et sinigpit na manangipriso iray sali ra na angkakabaleg a tabla. Ompan minaltrato to ni ra ingen. Sanen ag-iilaloan ya akablos ira lapud yegyeg, kasin manliket ira ta makabawi la ra ed samay manangipriso? Andi. Say masimoon a pampapaga ra ed pankaabigan to—say masakripisyon aro ra—so amakiwas ed sikara pian pugeran imay manangipriso ed pambikkel to lawari. Bilang resulta et sikatoy nagmaliw ya mananisia, pati say interon sankaabungan to. (Gawa 16:19-34) Dakel ed saray kaagian tayo met natan et manggagawa na “maabig ed saramay mamapasegsegang” ed sikara.—Roma 12:14.
6. Diad antoran paraan ya nipanengneng tayoy masakripisyon aro ed saray agagi tayo? (Nengnengen so kahon ed pahina 21.)
6 Mas ni so lalanoren na pangaro ed saray kapananisiaan tayo. “Nepeg tayon iter iray kamarerwa tayo parad agagi tayo.” (Basaen so 1 Juan 3:16-18.) Anggaman ontan, nipatnag tayoy panangaro diad angkekelag a paraan. Singa bilang, no walay nibaga o ginawa tayo ya akaopendi ed sakey ya agi, nipanengneng tayoy aro no sikatayo lay unonan mikareenan. (Mat. 5:23, 24) Panon to no walay akaopendi ed sikatayo? Kasin ‘akaparaan tayon mamerdona,’ odino maneem-em tayoy sakit na linawa no maminsan? (Sal. 86:5) Say aralem ya panangaro ya pawawalaen na masanton espiritu et ontulong ed sikatayon palampasen la iray melag a lingo, a mabulos tayon perdonaen so arum “no panon a mabulos si Jehova ya amerdona” ed sikatayo.—Col. 3:13, 14; 1 Ped. 4:8.
7, 8. (a) Antoy koneksion na panangaro’d totoo ed panangaro’d Dios? (b) Panon tayon napaaralem so panangaro tayo’d si Jehova? (Nengnengen so litrato ed leksab.)
7 Antoy gawaen tayo pian nabayuboan tayoy masakripisyon aro ed saray agagi? Paaralemen so panangaro tayo’d Dios. (Efe. 5:1, 2; 1 Juan 4:9-11, 20, 21) Saramay panaon ya aliling to et kaiba tayoy Jehova diad pambabasa tayoy Biblia, panagdalepdep, tan panagpikasi so mamaseseg ed sikatayo tan mamaelet ed panangaro tayo’d si Aman Jehova. Balet, nepeg a mangigana itayoy panaon pian onapit ed Dios.
8 Pian niyilustra iyan punto, imadyin mo pan makapanbasa kay Salitay Dios, makapandalepdep ka, tan makapanpikasi ka’d si Jehova diad espisipikon oras labat ed kada agew. Agta al-alwaran mon anggapon balot so mangala’d satan ya oras ya nakaibam si Jehova? Tua, anggapoy makaamper ed sikatayon manpikasi ed Dios tan kaslakan ed sikatayo et nabasa tayoy Biblia ed anggan anton oras ya labay tayo. Balet, lapud kinarakel na kimey ed inagew-agew, kaukolay pansagpot pian anggapoy manamsam ed panaon tayon nakaibay Dios. Kasin diad kada agew et mangigagana kay magenap ya panaon pian onapit ed si Jehova?
Gayagan Pawawalaen na Masanton Espiritu
9. Antoy nikadkaduma ed gayagan pawawalaen na masanton espiritu?
9 Say gayaga, a mikaduan aspekto na bunga na espiritu, et mansiansia lawas ed sikatayo anggano walaray kairapan. Niyaliling iya ed mapaot a tanaman a sarag toy manbilay anggan diad aliwan marakep a dalin tan kipapasen. Diad interon mundo, dakel ed saray lingkor na Dios so ‘angawat ed salita to diad dakel a kairapan tekep na liket.’ (1 Tes. 1:6) Say arum et makakasagmak na nanduruman subok. Ingen ta papabiskegen ira nen Jehova panamegley na espiritu to ‘pian sigpot iran makapansungdo tan maliket a makapan-anos na andukey.’ (Col. 1:11) Anto so lapuan na sayan gayaga?
10. Anto so lapuan na gayaga tayo?
10 Aliwan singa say “agnapanmatalkan iran kayamanan” na mundo nen Satanas, say espiritual a kayamanan ya inter nen Jehova et mansiansia lawas. (1 Tim. 6:17; Mat. 6:19, 20) Inikdan to itayo na ilalon manbilay na andi-anggaan. Magayaga tayo met lapud kabiangan itayoy sankamundoan ya impanaagi. Balet, sankaimportantian ed amin, say gayaga tayo et manlalapud maapit a relasyon ed Dios. Say liknaan tayo et singa si David, ya anggano apilitan a manamot-amot et oniay impangirayew to’d si Jehova panamegley na kanta: “Saray maaro ya abig na linawam [et] magmaong nen say bilay, kanian saray bibil ko idayew da ka. Onia so panangigalang ko ed sika leleg ko a mabilay.” (Sal. 63:3, 4) Anggano makakasagmak tayoy kairapan, manlepleppua’d puso tayo so magayagan panangirayew ed Dios.
11. Akin et importantin manlingkor itayo’d si Jehova tekep na gayaga?
11 Oniay impaseseg nen apostol Pablo ed saray Kristiano: “Manliket kayon naynay ed Katawan. Uliten ko, Manliket kayo!” (Fil. 4:4) Akin et importante a manlingkor iray Kristiano ed si Jehova tekep na gayaga? Ta walay isyun pinalesa nen Satanas nipaakar ed inkasoberano nen Jehova. Papapawayen nen Satanas ya anggapoy toon mabulos tan magayagan manlingkor ed Dios. (Job 1:9-11) Kanian anggano maseseg itayo, aliwan nagnap so panangidayew tayo no agtayo maliket ed panaglingkor. Maabig sirin no panggunaetan tayon tumboken imay ipapaseseg na salmista: “Manlingkor kayo ed Jehova a tinekepan na liket, dago kayo ed arapan to a mangankanta kayo.” (Sal. 100:2) Say mabulos tan magayagan panaglingkor et mangiglogloria ed Dios.
12, 13. Antoy nagawaan tayo pian nalabanay negatibo iran liknaan?
12 Balet, diad katuaan to, anggan saray matoor ya lingkor nen Jehova et onkakapuy met so linawa ra tan mairap day mansiansian positibo no maminsan. (Fil. 2:25-30) Antoy ontulong ed sikatayo diad saratan a panaon? Oniay ibabaga na Efeso 5:18, 19: “Napano kayo komon a naynay na masanton espiritu, a mangansion kayo na saray salmo tan panangidayew ed Dios tan saray maespiritual a kanta, a mangansion kayon impapuso tan mantogtog kayo parad si Jehova.” Panon tayon niyaplika itan a simbawa?
13 Sano nagogonigon, mikasi tayo’d si Jehova tan panggunaetan tayon dalepdepen iray bengatlan makapadinayew. (Basaen so Filipos 4:6-9.) Naimano na arum a sano makalna ran bansagan iray rekording na saray Kingdom song, ombibiskeg so liknaan da tan natutulongan iran magmaliw a positibo. Oniay nanonotan na agin laki a walay dinalan ton subok ya lapud satan et adisdismaya tan kinmakkapuy: “Likud ed regular a panagpikasi, angipatlep ak na pigaran Kingdom song. Legan kon kakansionen irayan balibalin liriko na panangirayew ed si Jehova, maksil man odino makalna labat, onliligen so liknaan ko. Diad saman met et kakkapangipaway ed libron Onapit ed si Jehova. Diad sinmublay a taon et amiduak itan ya abasa. Singa itan makatambal a puyok. Amtak ya benendisyonan nen Jehova iray sagpot ko.”
“Bedber na Kareenan”
14. Antoy sankaimanon aspekto na deen a pawawalaen na masanton espiritu?
14 Diad saray internasyonal a kombension tayo, panliliketan na saray delegadon nanlapud nanduruman bansa so pilimog ed saray kaagian da. Ipapabitar na ontan iran okasyon so aspekto na deen ya walad saray lingkor na Dios natan—say sankamundoan a pankakasakey. Mabetbet a mandinayew iray makakaimaton ta saramay totoon iilaloan da ya manbubusolan et ‘gagawaen day anggaay nayarian da pian napansiansia day pankakasakey ed espiritu diad bedber na kareenan.’ (Efe. 4:3) Sayan pankakasakey et talagan makapadinayew, lalo la no ikonsidera tayo no antoy nepeg a talonaan na karaklan a Kristiano.
15, 16. (a) Antoy datin pananisia nen Pedro, tan akin et kaukolan to itan a talonaan? (b) Panon a tinulongan nen Jehova si Pedro pian nauman toy panmoria to?
15 Aliwan mainomay a pankasakeyen iray totoon nandurumay nanlapuan da. Pian walay ideya tayo no antoy kaukolan a talonaan pian niwala itan a pankakasakey, ikonsidera tayoy alimbawa nen apostol Pedro. Napatnagan ed sarayan salita to so awawey to’d saray ag-asegat ya Gentil: “Amta yon aliwan manepeg ed sakey a Judio so miulop odino onasingger ed sakey a toon sananey so rasa to; balet impanengneng ed siak na Dios ya agko nepeg a tawagen a marutak odino agmalinis so siopaman a too.” (Gawa 10:24-29; 11:1-3) Base ed kaslakan a panmoria na totoo diad panaon nen Pedro, mapatnag ya abangonan to so pananisia ya unong ed Ganggan et sikatoy obligado ya saray kapara ton Judio labat so aroen to. Kanian natural labat a moriaen ton saray Gentil et kalaban a nepeg a busolen. *
16 Imadyin yo pa labat so pakasisikig nen Pedro legan ton onloloob ed abung nen Cornelio. Kasin say sakey a too a datin negatibo so panmoria to’d saray Gentil et makapitunosan ed sikara diad “bedber na kareenan”? (Efe. 4:3, 16) On, ta pigaran agew antis na satan et nilukasan na espiritu na Dios so puso nen Pedro, kanian sikatoy atulongan ya umanen so awawey to tan ekaley panangidumaduma to. Diad pasingawey et impalinew nen Jehova a say panmoria To ed totoo et ag-akadepende ed rasa o bansa ra. (Gawa 10:10-15) Kanian oniay imbaga nen Pedro ed si Cornelio: “Petepeteg ya atebek ko a say Dios et agmanangidumaduma, noagta diad balang nasyon et makapaliket ed sikato so toon ontatakot ed sikato tan manggagawa na inkatunong.” (Gawa 10:34, 35) Anguman so panmoria nen Pedro, tan talagan akikasakey ed “amin ya agagi” to.—1 Ped. 2:17.
17. Akin et makapadinayew so pankakasakey na saray lingkor na Dios?
17 Natulongan itayo na eksperiensya nen Pedro pian naapresyay makapadinayew a pananguman a nagagawa’d limog na saray lingkor na Dios natan. (Basaen so Isaias 2:3, 4.) Inuman na minilyon a totoo a ‘nanlapu’d amin a nasyon tan tribu tan rasa tan lenguahe’ so panmoria ra pian itunos itan ed “maong tan makapaliket tan ayadyarin linawa na Dios.” (Apo. 7:9; Roma 12:2) Karaklan ed saraya et datin naimpluensyaan na panamusol tan inkaapag-apag ed mundo nen Satanas. Balet panamegley na Salita na Dios tan tulong na masanton espiritu, naaralan dan panseetan a gawaen “iray bengatlan mamapawala na kareenan.” (Roma 14:19) Say pankakasakey da et mangiglogloria ed Dios.
18, 19. (a) Panon a makapitulongan so balang sakey ed sikatayo pian napansiansiay deen tan pankakasakey ed kongregasyon? (b) Antoy aralen tayo ed ontumbok ya artikulo?
18 Panon a makapitulongan so balang sakey ed sikatayo pian napansiansiay deen tan pankakasakey ed limog na saray lingkor na Dios? Diad dakel a kongregasyon et walaray agagin nanlapud arum a bansa. Arum ed sikara et dumay kultura da odino agda tanton amta so lenguahe tayo. Kasin manggagawa tayoy paraan pian mas nakabkabat tayo ra? Ontan so ipapaseseg na Salitay Dios. Oniay insulat nen Pablo ed kongregasyon diad Roma a tugyopen na saray Judio tan mananisian Gentil: “Awat yo so sakey tan sakey, a singa ed impangawat met nen Kristo ed sikatayo, diad kigloriaan na Dios.” (Roma 15:7) Wala kasi agi ed kongregasyon yo a sarag yon mas kabkabaten ni?
19 Anto ni nagawaan tayo pian mantultuloy ya onkiwas so masanton espiritu ed bilay tayo? Naebatan iyan tepet diad ontumbok ya artikulo a nipaakar ed arum ni ran aspekto na bunga na espiritu.
[Saray paimano ed leksab]
^ par. 3 Say tutukoyen nen Jesus dia ya bunga et namparan “say bunga na espiritu” tan “say bunga na saray bibil” ya iyaapay na saray Kristiano ed Dios panamegley na panagpulong a kimey.—Heb. 13:15.
^ par. 15 Oniay nabasa ed Levitico 19:18: “Agka mangala na pamales mo, nisay mantarok ka na anto a pangigagaem ed saray anak na katooan mo; noag say nepeg mo ya aroen [et say] kaparam a too unong ed sikan dili.” Iisipen na saray lider na Judion relihyon a say balikas ya “saray anak na katooan mo” tan say “kaparam a too” et ontutukoy labat ed saray Judio. Unong ed Ganggan et kaukolan a mansiansian biig iray Israelita manlapud arum a bansa. Balet, aglabay ya ibaga na satan ya amin ya aliwan Judio et kalaban da tan nepeg dan busolen, a singa imbangat na saray lider na relihyon nen inmunan siglo.
Antoy Ebat Mo?
• Panon tayon nipanengneng so masakripisyon aro parad saray agagi?
• Akin et importante ya manlingkor itayo ed Dios tekep na gayaga?
• Panon itayon makapitulongan pian napansiansiay deen tan pankakasakey ed kongregasyon?
[Tepetepet Parad Panagaral]
[Kahon ed pahina 21]
“Saraya so Tuan Kristiano”
Isasalaysay na libron Between Resistance and Martyrdom—Jehovah’s Witnesses in the Third Reich iray komento na kalangweran a Judion priso, a ditan et indeskribe toy unonan impakapikabat to ed saray Tasi nen Jehova sanen kakkasabi to’d concentration camp diad Neuengamme:
“Nen sikami ran Judio ya nanlapud Dachau et akasabi dima’d kampo, tampol ya inyamot na arum a Judio iray naakan da pian agkami miapag. . . . Diad paway [na concentration camp], mantutulongan kami ni, balet dia et teribli irap. Kanian say sankanonot na amin et no panon a mansiansian mabilay tan anggapo lay pibabali da’d arum. Balet duma ray Estudyante na Biblia. Diad saman et kaukolan ya impasya ran mantrabaho ta manaapiger iray tubo na danum. Ambetel so panaon tan sanagew iran atalem ed ambetebetel a danum. Agmi amta no panon dan naanosan iman. Say kuan da et si Jehova so mangiiter na biskeg da. Kakkaukolan day tinapay ta natnarasan met ira ya singa sikami. Balet amta yoy ginawa ra? Impantitipon day tinapay da, inapag da itan, say kapaldua et parad sikara, insan say kapaldua et inter da’d saray sinmabin kapananisiaan da a nanlapud Dachau. Inabrasa tan inangoban da ra. Antis iran angan, nampikasi ra. Kayari to et malikeliket tan kontento ira. Say kuan da et agla ra narasan. Lapud saman et oniay amoriak: Saraya so tuan Kristiano.”
[Saray litrato ed pahina 19]
Kasin diad kada agew et mangigagana kay panaon pian onapit ed si Jehova?
