“Den esaki mi Tata ta wòrdu glorifiká, ku boso ta karga hopi fruta.”​—JUAN 15:8.

1, 2. (a) Ki oportunidat nos tin pa animá otro hende? (b) Ki regalo di Yehova ta yuda nos bira mas kapas pa sirbié?

KONSIDERÁ e dos senarionan akí: Un ruman muhé kristian ta ripará ku un ruman muhé hóben ta mustra preokupá, i e ta invit’é pa traha kuné den sirbishi. Miéntras ku nan ta bai di un kas pa otro, e ruman hóben ta kuminsá papia kuné tokante su problema. Mas lat riba e mesun dia ei, e ruman hóben ta gradisí Yehova pa e interes ku e ruman muhé a mustra den dje, pasobra esei ta nèt loke e tabatin mester. Na un otro lugá, un pareha kasá ku a kaba di regresá di un otro pais kaminda nan a bai pa prediká tabata konta nan eksperensianan ku hopi entusiasmo na un reunion sosial. Un ruman hòmber hóben tabata sinta skucha nan ku masha atenshon. Algun aña despues, ora e ta prepará pa bai sirbi den un otro pais, e ta kòrda ku ta e eksperensianan di e pareha ei a pon’é haña e deseo pa bira misionero.

² E ehèmpelnan akí kisas por pone bo kòrda riba un hende ku tabatin un bon efekto riba bo bida òf kon abo tabatin un bon efekto riba bida di un otro hende. Naturalmente, ta masha poko biaha un solo kòmbersashon ta kambia bida di un hende. Pero tur dia nos ta haña oportunidat di animá i fortalesé otro hende. Awor, kiko si tabatin algu ku por yuda bo bira mas kapas i mehorá bo kualidatnan di manera ku bo por ta mas útil pa Dios i pa bo rumannan den fe. Lo bo no deseá esei? Wèl, esei ta nèt loke Yehova ta ofresé nos: su spiritu santu. (Luk. 11:13) Segun ku Dios su spiritu ta obra den nos bida, e ta produsí den nos bunita kualidatnan ku ta yuda nos mehorá tur aspekto di nos sirbishi na dje. Un bunita regalo, no ta bèrdat?​—Lesa Galationan 5:​22 i 23.

3. (a) Kon e echo ku nos ta kultivá ‘fruta di spiritu’ ta duna gloria na Dios? (b) Ki preguntanan nos lo kontestá?

³ E kualidatnan ku spiritu santu ta produsí den nos ta un refleho di Yehova Dios su personalidat, ya ku ta e ta e fuente di e spiritu ei. (Kol. 3:​9, 10) Hesus a indiká e motibu prinsipal pakiko kristiannan tin ku hasi esfuerso pa imitá Dios ora el a bisa su apòstelnan: “Den esaki mi Tata ta wòrdu glorifiká, ku boso ta karga hopi fruta.” * (Juan 15:8) Ora nos ta kultivá ‘fruta di spiritu,’ hende por mira esei mesora den nos manera di papia i aktua; i esaki ta duna gloria na Dios. (Mat. 5:16) Awor, den ki manera fruta di spiritu ta diferente for di e karakterístikanan di e mundu di Satanas? Kon nos por kultivá e fruta di spiritu? Dikon no ta fásil pa hasi esei? Nos lo kontestá e preguntanan akí segun ku nos ta analisá e promé tres aspektonan di e fruta di spiritu, esta, amor, goso i pas.

Amor Basá Riba un Prinsipio Mas Elevá

4. Ki tipo di amor Hesus a siña su siguidónan praktiká?

⁴ E amor ku spiritu santu ta produsí ta masha diferente for di e amor ku ta komun den e mundu akí. Dikon? Pasobra e ta basá riba un  prinsipio mas elevá. Hesus a enfatisá e diferensia akí den su Sermon Riba Seru. (Lesa Mateo 5:​43-48.) El a bisa ku asta e paganonan ta trata otro hende manera otro hende ta trata nan. E tipo di “amor” ei no ta enserá berdadero sakrifisio, sino mas bien un interkambio di fabor. Si nos ke ta ‘yu di nos Tata ku ta den shelu,’ nos mester ta diferente. En bes di trata otro hende manera nan ta trata nos, nos mester mira i trata otro hende manera Yehova ta mira i trata nan. Pero kon nos por stima nos enemigunan manera Hesus a manda nos hasi?

5. Kon nos por mustra amor na hende ku ta persiguí nos?

⁵ Tuma por ehèmpel Pablo i Silas. Ora nan tabata prediká na Filipos, nan a ser arestá, sutá ku bara i tirá den e parti di mas paden di e prizòn, kaminda nan a sera nan pia na sepa. I no ta nada straño ku e wardadó di prizòn lo a maltratá nan tambe. Pero ora ku diripiente un temblor a sagudí e lugá i habri kaminda pa nan sali liber, nan no a bai tuma represaya kontra dje. Al kontrario, nan a mustra interes sinsero den dje. E amor di sakrifisio propio ku Pablo i Silas tabatin a motivá nan pa aktua mesora na fabor di e wardadó di prizòn i asina yuda tur e hendenan di su kas bira kreyente. (Echo. 16:​19-34) Hopi di nos rumannan den e tempu akí tambe ta trata nan enemigunan bon; ku otro palabra, nan ta ‘bendishoná esnan ku ta persiguí nan.’​—Rom. 12:14.

6. Kon nos por mustra amor di sakrifisio propio na nos rumannan? (Wak e kuadro na página 25.)

⁶ Nos amor pa nos rumannan den fe ta bai mas leu ainda. Beibel ta bisa ku ‘nos mester entregá nos bida pa nos rumannan.’ (Lesa 1 Juan 3:​16-18.) Pero hopi biaha nos por mustra amor den kosnan chikitu. Por ehèmpel, si nos bisa òf hasi algu ku a ofendé un ruman, amor mester motivá nos pa tuma inisiativa pa hasi pas. (Mat. 5:​23, 24) Awor kiko si un ruman ofendé nos? Nos ta “kla pa pordoná,” òf nos ta inkliná na warda renkor? (Sal. 86:5) E amor intenso ku spiritu santu ta produsí den nos por yuda nos pasa por haltu di fayonan chikitu i asina pordoná otro hende ‘meskos ku Yehova a pordoná nos.’​—Kol. 3:​13, 14; 1 Ped. 4:8.

7, 8. (a) Ki konekshon tin entre amor pa Dios i amor pa hende? (b) Kon nos por hasi nos amor pa Yehova mas profundo? (Wak e plachi aki bou.)

⁷ Pero kiko por yuda nos kultivá amor di sakrifisio propio pa nos rumannan? Esei ta un amor mas profundo pa Dios. (Efe. 5:​1, 2; 1 Juan 4:​9-11, 20, 21) E tempu ku nos ta  dediká na nos relashon ku Yehova pa medio di lesamentu di Beibel, meditashon i orashon ta nutri nos kurason i ta hasi nos amor pa nos Tata selestial mas profundo. Ma nos tin ku saka tempu pa hala serka Dios.

⁸ Pa ilustrá esaki, imaginá ku bo tin solamente un ora pa dia pa lesa Beibel, pa meditá riba loke bo a lesa i hasi orashon na Yehova. Lo bo no hasi esfuerso pa dediká e tempu ei na Yehova i no laga nada stroba bo? Ta klaru ku ningun hende no por stroba nos di resa na Yehova i mayoria di nos por lesa Beibel ki ora ku nos ke. Pero, nos lo tin ku tuma medida pa no laga e aktividatnan di tur dia stroba nos di dediká tempu na nos adorashon na Yehova. Bo ta trata di saka mas tantu tempu posibel tur dia pa hala serka Yehova?

“Goso di Spiritu Santu”

9. Spiritu santu por yuda nos keda ku goso apesar di kiko?

⁹ Un otro aspekto di e fruta di spiritu ta goso. Esaki ta un kualidat ku nos por keda mantené apesar di e difikultatnan ku nos ta konfrontá. Nos por kompará goso ku un mata resistente ku por krese asta den sirkunstansianan difísil. Por ehèmpel, hopi sirbidó di Yehova rònt mundu “a risibí e palabra den hopi tribulashon ku e goso di spiritu santu.” (1 Tes. 1:6) Tin ku ta pasa tambe den otro tipo di difikultat, pero Yehova ta duna nan fortalesa pa medio di su spiritu pa nan por perseverá ku “pasenshi i ku goso.” (Kol. 1:11) Riba kiko e goso akí ta basá?

10. Riba kiko nos goso ta basá?

¹⁰ Na kontraste ku e ‘rikesa insigur’ di e mundu di Satanas, Yehova ta duna nos tesoro spiritual ku tin balor duradero. (1 Tim. 6:17; Mat. 6:​19, 20) E ta duna nos e speransa gososo di un futuro eterno. Ademas, nos tin e goso di ta parti di un hermandat mundial. Pero nos goso ta basá prinsipalmente riba nos relashon ku Dios. Nos tin e mesun sintimentunan ku David, kende a alabá Yehova pa medio di kantika aunke e mester a biba komo fugitivo. El a bisa: “Bo miserikòrdia ta mihó ku bida, mi lepnan lo alabá bo. Asina lo mi bendishoná bo tanten ku mi tin bida.” (Sal. 63:​3, 4) Asta ora nos ta konfrontá difikultat, nos ta alabá Yehova ku e goso ku ta sali for di nos kurason.

11. Dikon ta importante pa nos sirbi Yehova ku goso?

¹¹ Apòstel Pablo a urgi kristiannan: “Regosihá den Señor semper; atrobe lo mi bisa, regosihá!” (Fil. 4:4) Dikon ta importante pa kristiannan sirbi Yehova ku goso? Esaki ta debí na e kuestion ku Satanas a lanta relashoná ku Yehova su soberania. Satanas a pretendé ku hende lo no sirbi Dios di buena gana. (Jòb 1:​9-11) Si nos ta sirbi Yehova djis pa kumpli ku nos deber i ta hasi esei sin goso, nos sakrifisio di alabansa lo no ta kompletu. P’esei, nos ta hasi esfuerso pa tuma na serio loke e salmista a urgi nos, esta, pa ‘sirbi Yehova ku goso i bini den su presensia ku kantamentu gososo.’ (Sal. 100:2) Sí, ora nos ta rindi sirbishi ku goso i di buena gana, nos ta duna gloria na Dios.

12, 13. Kiko nos por hasi pa vense sintimentunan negativo?

¹² Pero nos mester ta realista sí. Asta sirbidónan fiel di Yehova sa desanimá i tin ku lucha pa keda ku un aktitut positivo. (Fil. 2:​25-30) Kiko por yuda nos den un situashon asina? Efesionan 5:​18 i 19 ta bisa: ‘Sea yená ku e spiritu, den salmo i himno i kantika spiritual, kantando i hasiendo melodia na SEÑOR den boso kurason.’ Kon nos por apliká e konseho akí?

¹³ Ora sintimentunan negativo ta molestiá nos, nos por roga Yehova pa su yudansa i hasi esfuerso pa meditá riba kosnan ku ta digno di alabansa. (Lesa Filipensenan 4:​6-9.) Algun kristian ta haña ku ora nan neuri nos kantikanan di Reino, nan ta sinti nan mihó i por enfoká riba kosnan positivo atrobe. Un ruman  hòmber ku a pasa den un situashon masha difísil i frustrante, ku hopi biaha a lag’é sinti su mes desanimá, a bisa: “Fuera di hasi hopi orashon di henter mi kurason, mi a siña algun kantika di Reino for di kabes. Ora mi tabata kanta e bunita kantikanan di alabansa ei na bos haltu òf den mi mes, mi a sinti un pas mental. Ademas, ta nèt den e tempu ei a publiká e buki Hala Serka Yehova. Mi a lesa henter e buki dos biaha durante e siguiente aña. E tabata manera un zeta ku a aliviá mi. Mi sa ku Yehova a bendishoná mi esfuerso.”

“E Vínkulo di Pas”

14. Kiko e pas ku spiritu santu ta produsí ta resaltá?

¹⁴ Na nos kongresonan internashonal, delegadonan di diferente nashon i kultura ta asosiá gososamente ku nan rumannan den fe. E pas ku ta reina den Dios su pueblo awe ta resaltá e union ku nos ta disfrutá di dje rònt mundu. Hopi biaha, hende ku tuma nota di esei ta keda masha asombrá. Nan ta mira hende ku supuestamente mester ta enemigu di otro hasi esfuerso “diligente pa preservá e unidat di e spiritu den e vínkulo di pas.” (Efe. 4:3) E union akí ta realmente remarkabel ora nos mira kuantu opstákulo hopi di nos rumannan mester a vense.

15, 16. (a) Ki punto di bista Pedro tabatin di hende ku no tabata hudiu, i dikon esei lo tabata un desafio p’e? (b) Kon Yehova a yuda Pedro kambia su aktitut?

¹⁵ No ta fásil pa hende di diferente nashon i kultura uni ku otro. Pa nos haña un idea kiko nan mester hasi pa logra e union ei, laga nos konsiderá e ehèmpel di apòstel Pedro den promé siglo. Su aktitut pa ku hende ku no tabata hudiu ni sirkunsidá a keda bisto den loke el a bisa: “Boso sa ku Lei no ta permití pa un hudiu asosiá ku un  stranhero ni bishit’é. Ma Dios a mustra mi ku mi no mester yama ningun hende profano ni impuru.” (Echo. 10:​24-29; 11:​1-3) Pedro, meskos ku otro hende di su tempu, aparentemente a lanta ku e kreensia ku segun Lei di Moisés ta otro hudiu so nan mester a stima. Probablemente, lo tabata masha normal pa e mira hende ku no tabata hudiu komo enemigu ku e mester a odia. *

¹⁶ Djis imaginá kon inkómodo Pedro mester a sintié ora el a drenta kas di Cornelio. Akaso un hòmber ku na ántes tabatin un punto di bista negativo di hende ku no tabata hudiu por a ‘uni armoniosamente’ (NW) ku e hendenan ei den un “vínkulo di pas”? (Efe. 4:​3, 16) Sí, esei tabata posibel pasobra un par di dia promé Dios su spiritu a habri kurason di Pedro di manera ku el a kuminsá kambia su aktitut i vense su prehuisio. Pa medio di un vishon, Yehova a laga Pedro mira ku no ta rasa òf nashonalidat ta determiná Su punto di bista di hende. (Echo. 10:​10-15) P’esei, Pedro por a bisa Cornelio: “Di bèrdat mi ta komprondé awor ku Dios no ta hasi distinshon di persona, ma den tur nashon e hende ku ta tem’é i ku ta hasi hustisia ta aseptabel p’e.” (Echo. 10:​34, 35) Pedro a kambia su punto di bista, el a uni ku nan i a kuminsá mira nan komo su “rumannan.”​—1 Ped. 2:17.

17. Dikon e union di e pueblo di Dios awe ta asina remarkabel?

¹⁷ Pedro su eksperensia ta yuda nos komprondé e transformashon remarkabel ku ta tuma lugá den e pueblo di Dios awe. (Lesa Isaias 2:​3 i 4.) Miónes di hende ‘di tur nashon, tribu, pueblo i lenga’ a kambia nan manera di pensa pa esaki kuadra ku “e bon i agradabel i perfekto boluntat di Dios.” (Rev. 7:9; Rom. 12:2) Un tempu, hopi di e kristiannan ei tabata den gara di e odio, enemistat i divishon di e mundu di Satanas. Pero pa medio di un estudio di e Palabra di Dios i ku yudansa di spiritu santu, nan a siña “buska e kosnan ku ta trese pas.” (Rom. 14:19) E union ku esaki ta produsí ta trese alabansa pa Dios.

18, 19. (a) Kon kada un di nos por kontribuí na pas i union den kongregashon? (b) Kiko nos lo konsiderá den e siguiente artíkulo?

¹⁸ Kon kada un di nos por kontribuí na e pas i union ku ta reina den Dios su pueblo? Den hopi kongregashon nos ta haña hende ku a bini for di otro pais. Algun di nan por tin otro kustumber i kisas no ta papia nos idioma bon. Nos ta purba siña konosé nan mihó? Esei ta nèt loke e Palabra di Dios ta rekomendá. Pablo a skirbi e kongregashon di Roma ku a konsistí di tantu kreyente hudiu komo griego: “Risibí otro ku gustu, meskos ku Kristu tambe a risibí nos ku gustu, pa e gloria di Dios.” (Rom. 15:7, NW) Tin algun ruman den bo kongregashon ku bo por siña konosé mihó?

¹⁹ Kiko mas nos por hasi pa laga spiritu santu obra den nos bida? E siguiente artíkulo lo kontestá e pregunta akí segun ku nos ta analisá e otro aspektonan di e fruta di spiritu.

[Nota]

Kon Lo Bo Kontestá?

• Kon nos por mustra amor di sakrifisio propio pa nos rumannan?

• Dikon ta importante pa nos sirbi Dios ku goso?

• Kon nos por kontribuí na pas i union den kongregashon?

[Preguntanan di Estudio]

[Kuadro na página 25]

“Esakinan Ta e Kristiannan Berdadero”

E buki Between Resistance and Martyrdom​—Jehovah’s Witnesses in the Third Reich ta konta loke un prezu hóben hudiu a bisa relashoná ku su promé kontakto ku Testigunan di Yehova despues ku el a drenta e kampo di konsentrashon na Neuengamme:

“Djis despues ku nos, hudiu di Dachau, a drenta e baraknan, e otro hudiunan a kuminsá skonde tur loke nan tabatin pasobra nan no kier a kompartí nada ku nos. . . . Promé ku nan a arestá nos, nos tabata yuda otro. Pero akí den, den un situashon di bida i morto, kada ken tabata interesá den su mes so sin kòrda riba otro hende. Ma e Studiantenan di Beibel sí tabata diferente. Na e tempu ei, nan tabatin ku traha duru pa drecha algun pipa di awa. Tabata hasi friu i nan mester a keda para henter dia den awa sumamente friu. Ningun hende no por a komprondé kon nan por a soportá esei. Nan a bisa ku ta Yehova a duna nan forsa. Meskos ku nos, nan tabatin mester di e poko pan ku nan tabatin, pasobra nan tabatin hamber. Pero asina mes, kiko nan tabata hasi? Nan a kolektá tur e pan i a tuma mitar di esaki pa nan mes. E sobrá nan a parti pa nan rumannan den fe ku a kaba di yega for di Dachau. Anto nan a yama nan bon bini i a sunchi nan. Promé ku nan kome, nan tabata hasi orashon. Despues di esei nan tur a keda kontentu i satisfecho. Nan a bisa ku nan no tabatin hamber mas. Ta e ora ei mi a yega na e konklushon: Esakinan ta e kristiannan berdadero.”

[Plachinan na página 23]

Bo ta kita tempu tur dia for di otro aktividatnan pa hala serka Yehova?