‘Spirit Mekem Man Garem Gudfala Wei’ wea Mekhae Long God

“Samting wea mekhae long Dadi bilong mi nao hem for iufala gohed garem staka frut.”​—JOHN 15:8.

1, 2. (a) Olketa wanem chance nao iumi garem for encouragem narawan? (b) Wanem present from Jehovah nao strongim iumi for worshipim hem?

 TINGIM tufala difren samting hia: Wanfala mature sista luksavve wanfala young sista hem wari. So hem arrange for waka witim datfala young sista long preaching waka. Taem tufala preach, datfala young sista storyim problem bilong hem. Long end bilong day, young sista hia prea long Jehovah and talem thankiu for wei wea datfala mature sista tingim hem. Hem nao wanem young sista hia barava needim. Long nara ples, wanfala hasband and waef just kam bak from assignment bilong tufala long nara kantri. Taem olketa garem hapitaem, wanfala young brata lisin taem tufala storyim olketa experience bilong tufala. Samfala year bihaen, taem young brata hia redi for go long assignment long nara kantri, hem tingim story wea datfala hasband and waef talem wea mekem hem for laek kamap missionary.

² Olketa story hia maet mekem iu for tingim samting wea samwan talem or duim wea helpem iu or samting wea iu duim wea encouragem narawan. Hem tru, no evri story wea samwan talem savve changem laef bilong narawan, bat evriday iumi garem chance for encouragem and strongim narawan. Tingim sapos wanfala samting hem stap wea bae helpem iu for garem olketa gudfala wei mekem iu savve duim gud samting for God and helpem olketa brata and sista. Sapos olsem, hem bae naes tumas! Jehovah givim iumi wanfala present, wea hem nao holy spirit. (Luke 11:13) Holy spirit helpem iumi for garem olketa gudfala wei wea strongim iumi for worshipim God. Datwan hem nambawan present!​—⁠Readim Galatians 5:22, 23.

3. (a) Hao nao olketa gudfala wei wea ‘spirit mekem iumi garem’ hem praisem God? (b) Olketa wanem kwestin nao bae iumi storyim?

³ Olketa gudfala wei wea holy spirit mekem iumi for garem showimaot wei bilong Jehovah God. (Col. 3:9, 10) Samting wea Jesus talem long olketa aposol showimaot why hem important for olketa Christian garem olketa wei bilong God. Hem sei: “Samting wea mekhae long Dadi bilong mi nao hem for iufala gohed garem staka frut.” * (John 15:8) Olketa gudfala wei wea ‘spirit mekem iumi garem’ showaot long wanem iumi talem and duim and datwan mekem pipol praisem God. (Matt. 5:16) Long wanem wei nao spirit mekem iumi for garem olketa wei wea difren from pipol long world? Wanem nao iumi savve duim for garem olketa gudfala wei? Why nao maet hem no isi for garem olketa wei hia? Bae iumi storyim thrifala kwestin hia taem iumi lukluk long first thrifala wei wea holy spirit mekem iumi for garem, hem nao love, hapi, and peace.

Christian Love

4. Wanem kaen love nao Jesus teachim olketa wea followim hem for showimaot?

⁴ Holy spirit mekem iumi for garem love wea  difren from love wea pipol long world showimaot. Hao nao hem difren? Love wea iumi showimaot hem Christian love. Long Sermon long Maunten Jesus storyim wei wea Christian love hem difren. (Readim Matthew 5:43-48.) Hem sei olketa sinner tu savve duim sem samting long narawan olsem narawan duim long olketa. Wei for showimaot Christian love hem minim for duim moa samting for narawan. Sapos iumi laek for ‘showimaot iumi olketa son bilong Dadi bilong iumi long heven’ iumi mas difren from pipol long world. Iumi no duim nomoa sem samting long narawan olsem narawan duim for iumi bat iumi mas ting long pipol olsem Jehovah ting long olketa and duim gud samting for olketa. Bat hao nao iumi savve lovem olketa enemy olsem Jesus talem iumi for duim?

5. Wanem nao iumi savve duim for showimaot love long pipol wea spoelem iumi?

⁵ Tingim disfala example long Bible. Taem Paul and Silas preach long Philippi, police arrestim tufala, whipim tufala nogud, putim tufala long wanfala rum midol long prison, and putim leg bilong tufala long stock. Maet man wea lukaftarem prison raf long tufala tu. Taem wanfala big earthquake mekem olketa kamap free, waswe, olketa laek changem bak nogud samting long datfala man? Nomoa. Tufala showimaot Christian love and kwiktaem duim samting for helpem datfala man. Datwan mekem hem and famili bilong hem for biliv long God. (Acts 16:19-34) Staka brata and sista long taem bilong iumi duim sem samting tu. Olketa ‘askem God for blessim pipol wea spoelem olketa.’​—Rom. 12:14.

6. Wanem nao iumi savve duim for showimaot Christian love long olketa brata and sista? (Lukim box long page 21.)

⁶ From iumi lovem olketa brata and sista, “iumi mas willing for dae for olketa” tu. (Readim 1 John 3:16-18.) Bat olketa smol samting wea iumi duim tu savve showimaot iumi lovem olketa. Olsem example, sapos iumi talem or duim samting wea mekem narawan feel nogud, iumi savve showimaot love taem iumi trae for stretem datwan. (Matt. 5:23, 24) Waswe sapos narawan mekem iumi feel nogud? Waswe, iumi “redi for forgive,” or iumi gohed for kros? (Ps. 86:5) Love wea holy spirit mekem iumi garem helpem iumi for forgivim narawan ‘olsem Jehovah hem willing for forgivim iumi.’​—Col. 3:13, 14; 1 Pet. 4:8.

7, 8. (a) Love wea iumi garem for God bae mekem iumi duim wanem for narawan? (b) Wanem nao iumi savve duim for strongim love wea iumi garem for Jehovah? (Lukim piksa long page 19.)

 ⁷ Wanem nao bae helpem iumi for showimaot Christian love long olketa brata and sista? Hem nao for strongim love wea iumi garem for God. (Eph. 5:1, 2; 1 John 4:9-11, 20, 21) Taem iumi readim and ting raonem Bible and prea long Jehovah, datwan savve encouragem iumi and strongim love wea iumi garem for hem. Bat iumi need for iusim gud taem bilong iumi mekem iumi fren gud witim God.

⁸ Tingim sapos long wanfala taem nomoa long day iu savve readim Bible, ting raonem, and prea long Jehovah. Waswe, bae iu letem eni samting spoelem datfala taem? Hem tru, no eniwan savve stopem iumi for prea long God and staka long iumi savve readim Bible enitaem wea iumi laekem. Bat iumi mas no letem olketa nara samting wea iumi duim evriday for spoelem datfala taem wea iumi markem. Waswe, iu iusim gud taem bilong iu evriday for duim samting wea bae helpem iu fren gud witim Jehovah?

“Holy Spirit Nao Mekem Iufala Hapi”

9. Holy spirit savve mekem iumi for gohed hapi nomata iumi kasem wanem?

⁹ Holy spirit savve mekem iumi for gohed hapi nomata iumi kasem olketa hard taem. Wei for hapi hem olsem wanfala plant wea savve grow gud long eni ples nomata hem hot or cold. Staka brata and sista long world ‘hapi for kasem message nomata pipol spoelem olketa. Holy spirit nao mekem olketa hapi.’ (1 Thess. 1:6) Olketa narawan kasem hard taem bat Jehovah givim holy spirit for strongim olketa ‘mekem olketa nating givap and gohed for patient and hapi.’ (Col. 1:11) Wanem nao mekem olketa gohed for hapi?

10. Wanem nao mekem iumi for hapi?

¹⁰ “Riches” long world bilong Satan “savve lus enitaem,” bat evri samting wea Jehovah givim savve helpem iumi for olowe. (1 Tim. 6:17; Matt. 6:19, 20) Hem promis for givim iumi laef olowe. Iumi hapi for garem olketa Christian brata and sista wea stap evriwea long world. Bat nambawan samting wea mekem iumi hapi nao hem from iumi fren witim God. Iumi garem sem tingting olsem David. Nomata hem mas ranawe, hem praisem Jehovah. Hem sei: “Mi bae praisem iu bikos wei wea iu faithful and showimaot love hem gud winim laef. Bae mi gohed for praisem iu go kasem taem mi dae.” (Ps. 63:3, 4) Nomata iumi kasem olketa hard taem, iumi hapi for praisem God.

11. Why nao hem important for iumi hapi taem iumi worshipim Jehovah?

¹¹ Aposol Paul talem olketa Christian: “Iufala mas evritaem hapi bikos long Lord. Mi talem moa, Iufala mas hapi!” (Phil. 4:4) Why nao hem important for olketa Christian hapi taem olketa worshipim Jehovah? Hem bikos long samting wea Satan talem abaotem rul bilong Jehovah. Satan sei pipol bae worshipim God from olketa tingim olketa seleva nomoa and no from olketa willing for duim datwan. (Job 1:9-11) Sapos iumi worshipim Jehovah bat no hapi for duim datwan, praise wea iumi givim long hem bae iusles nomoa. Dastawe iumi trae hard for followim toktok bilong man wea raetem psalm. Hem sei: “Worshipim Jehovah witim hapi. Kam long hem witim hapi singsing.” (Ps. 100:2) Taem iumi worshipim God from iumi willing and hapi for duim datwan, datwan praisem hem.

12, 13. Wanem nao iumi savve duim sapos iumi start for no garem gudfala tingting?

¹² Nomata olsem, olketa wea faithful for worshipim Jehovah savve feel wikdaon samfala taem and faendem hem hard for gohed garem gudfala tingting abaotem future. (Phil. 2:25-30) Wanem nao savve helpem iumi long taem olsem? Ephesians 5:18, 19 sei: “Iufala mas gohed for kasem holy spirit. Singim olketa psalm and olketa song for praisem and worshipim God, and singsing long Jehovah from heart bilong iufala.” Hao nao iumi savve followim datfala kaonsel?

¹³ Sapos iumi start for no garem gudfala  tingting, iumi savve prea long Jehovah and ting raonem olketa samting wea fit for kasem praise. (Readim Philippians 4:6-9.) Samfala savve singim olketa Kingdom song and datwan mekem olketa for garem gudfala tingting. Wanfala brata wea kasem hard taem wea mekem hem for feel wikdaon sei: “Evritaem mi savve prea long Jehovah and mi baeheartim tu samfala Kingdom song. Nomata mi singsing big or singsing smol nomoa, olketa naesfala song hia wea praisem Jehovah mekem mi for garem peace long mind. Long datfala taem, olketa releasem datfala buk Kam Klos Long Jehovah. Mi readim tufala taem insaed wan year. Hem barava mekem mi for garem peace long heart. Mi savve Jehovah blessim wanem mi duim.”

“Wan Mind wea Holy Spirit Helpem Iufala for Garem”

14. From pipol bilong God garem peace, datwan mekem olketa for hao?

¹⁴ Long olketa international convention, staka brata and sista from olketa difren kantri hapi for hipap tugeta. Pipol bilong God garem peace and diswan mekem olketa for wan mind. Staka pipol long world sapraes taem olketa lukim pipol wea olketa tingse shud heitim each other “stap gud tugeta, and traem best for keepim nao wei for wan mind wea holy spirit helpem [olketa] for garem.” (Eph. 4:3) Wan mind wea iumi garem hem spesol tumas taem iumi tingim wei wea staka changem tingting bilong olketa abaotem narawan.

15, 16. (a) Long firstaem, wanem tingting nao Peter garem and why nao hem no isi for changem datwan? (b) Wanem nao Jehovah duim for helpem Peter changem tingting bilong hem?

¹⁵ Hem no isi for pipol from difren ples garem wan mind. For helpem iumi savve wanem iumi mas duim for garem wan mind, tingim example bilong aposol Peter. Samting wea hem talem showimaot tingting bilong hem abaotem pipol wea no Jew wea no circumcise. Hem  sei: “Iufala savve finis law bilong mifala hem stopem olketa Jew for no visitim or fren gud witim eniwan wea hem no wanfala Jew. Bat God hem showim long mi finis for mi mas no sei nara pipol olketa no klin.” (Acts 10:24-29; 11:1-3) Luk olsem taem Peter hem smol, pipol long datfala taem tingse Law talem for olketa mas lovem olketa Jew nomoa, and datwan mekem Peter tu for bilivim sem samting. Maet hem normal samting nomoa long Peter for ting long pipol wea no Jew olsem enemy. *

¹⁶ Taem Peter go long haos bilong Cornelius maet hem feel shame lelebet. Waswe, man wea no garem stretfala tingting abaotem olketa wea no Jew savve “join gud tugeta” witim olketa, ‘garem wan mind, and stap gud tugeta’? (Eph. 4:3, 16) Ia, datwan savve happen. Tu-thri day bifor Peter go long haos bilong Cornelius, holy spirit helpem Peter for changem tingting bilong hem. Long wanfala vision Jehovah helpem Peter for luksavve Hem no favorim eniwan. (Acts 10:10-15) Dastawe Peter talem Cornelius: “Distaem mi barava luksavve God hem no favorim eniwan. Long evri kantri long world, sapos man worshipim God and duim samting wea stret, God bae hapi long hem.” (Acts 10:34, 35) Peter changem tingting bilong hem and hem garem wan mind witim “evri brata.”​—1 Pet. 2:17.

17. Why nao wei wea pipol bilong God garem wan mind hem nambawan?

¹⁷ Experience bilong Peter helpem iumi for tinghae long nambawan samting wea pipol bilong God duim distaem. (Readim Isaiah 2:3, 4.) Staka million pipol “from evri kantri, tribe, pipol, and languis” changem tingting bilong olketa mekem olketa duim samting “wea God laekem . . . wea hem gudfala and stret and wea hem hapi long hem.” (Rev. 7:9; Rom. 12:2) Bifor, staka long olketa hia heitim narawan, enemy long narawan, and garem wei for divaed. Bat taem olketa studyim Bible and holy spirit helpem olketa, olketa “traem best for stap gud witim nara pipol.” (Rom. 14:19) Wan mind wea olketa garem praisem God.

18, 19. (a) Wanem nao iumi wanwan savve duim for gohed garem peace and wan mind? (b) Wanem nao bae iumi storyim long next study?

¹⁸ Wanem nao iumi wanwan savve duim for gohed garem peace and wan mind? Staka kongregeson garem olketa brata and sista from difren kantri. Maet samfala garem olketa difren kastom and no savve long languis bilong iumi. Waswe, iumi trae hard for savve long olketa? Hem nao wanem Bible encouragem iumi for duim. Taem Paul raetem leta for kongregeson long Rome wea garem olketa brata wea Jew and no Jew, hem sei: “Iufala mas acceptim narawan, olsem Christ tu hem acceptim iumi. Iumi duim diswan for mekhae long God.” (Rom. 15:7) Waswe, iu tingim eniwan long kongregeson wea iu no savve gud long hem yet?

¹⁹ Wanem nao nara samting wea iumi savve duim for letem holy spirit leadim iumi? Long next study bae iumi storyim datwan and olketa nara gudfala wei wea holy spirit mekem iumi for garem.

[Olketa footnote]

Wanem Nao Ansa Bilong Iu?

• Wanem nao iumi savve duim for showimaot Christian love long olketa brata and sista?

• Why nao hem important for iumi hapi taem iumi worshipim God?

• Wanem nao iumi savve duim for gohed garem peace and wan mind?

[Olketa Kwestin]

[Box long page 21]

“Olketa Nao Tru Christian”

Disfala buk Between Resistance and Martyrdom​—⁠Jehovah’s Witnesses in the Third Reich, storyim wanem wanfala young Jew prisoner talem taem hem firstaem meetim Olketa Jehovah’s Witness long Neuengamme raf prison:

“Taem mifala Jew lusim Dachau raf prison and kam long disfala prison, olketa nara Jew start for haedem evri samting wea olketa garem mekem olketa no sharem witim mifala. . . . Bifor mifala kam long prison, evritaem mifala savve helpem each other. Bat long prison, evriwan tingim nomoa laef bilong olketa seleva and no tingim narawan. Bat tingim wanem olketa Bible Student duim. Long datfala taem, olketa mas waka hard for repairim olketa wata pipe. Hem cold tumas and olketa mas standap aotsaed full day insaed cold wata. Evriwan sapraes hao olketa fit for duim datwan. Olketa Bible Student sei Jehovah nao strongim olketa. Olketa barava needim bred olsem mifala bikos olketa tu hangre. Bat wanem nao olketa duim? Olketa kolektem evri bred wea olketa garem, kaikaim haf bilong hem, and givim nara haf long olketa brata and sista wea just arrive from Dachau raf prison. Olketa welkamim olketa and kissim olketa tu. Bifor olketa kaikai, olketa prea. Evriwan hapi and satisfae. Olketa sei olketa no hangre nao. Long datfala taem, mi luksavve olketa nao tru Christian.”

[Olketa piksa long page 19]

Waswe, iu iusim gud taem bilong iu evriday mekem iu fren gud witim Jehovah?