’A froktu fu a yeye’ e gi Gado glori

’Te unu e meki furu froktu, dan dati o gi mi Tata glori.’​—YOH. 15:8.

1, 2. (a) Sortu okasi wi abi fu gi trawan deki-ati? (b) Sortu kado Yehovah gi wi so taki wi kan dini en moro bun?

LUKU den tu situwâsi disi: Wan Kresten uma e si taki wan yongu sisa e broko en ede nanga wan sani. A sisa e meki mofo fu wroko nanga en na ini a preikiwroko. Te den e taki nanga makandra aladi den e wroko oso fu oso, dan a yongu sisa e bigin fruteri a trawan san e trobi en. Moro lati a dei dati, a yongu sisa e begi Yehovah fu taigi en tangi taki a lepi sisa ben poti prakseri na en na so wan lobi-ati fasi. Dati ben de soifri san a ben abi fanowdu. Na wan tra presi, wan trowpaar di ben go preiki na ini wan tra kondre, ben drai kon baka na oso no so langa pasa. Na wan demakandra, den e fruteri fayafaya sortu moi sani den ondrofeni. Na a srefi ten, wan yongu brada e sidon arki. Wan tu yari baka dati, a srefi brada disi e sreka ensrefi fu go dini na ini wan tra kondre. Te a e du dati, dan a e prakseri a trowpaar nanga den sani di den ben fruteri. Na den sani dati ben gi en deki-ati fu tron wan zendeling.

² Kande den eksempre disi e meki yu prakseri wan sma di ben abi krakti tapu yu libi, noso kande yu e memre fa yu ben abi krakti tapu wan tra sma en libi. Ma nofo tron, wán takimakandra nomo no e meki taki wan sma e tyari bigi kenki kon na ini en libi. Ma ibri dei wi abi okasi fu gi trawan deki-ati. Fa a ben o de efu yu ben abi wan sani di ben kan yepi yu fu du sani moro bun èn fu de wan moro bun sma? Dati ben o de wan tumusi moi sani, a no so? Na so wi ben o man yepi wi Kresten brada nanga sisa moro bun, èn Gado ben o man gebroiki wi moro bun tu. Fu taki en leti, Yehovah gi wi so wan kado, èn dati na a santa yeye fu en (Luk. 11:13). Te a santa yeye fu Gado abi krakti tapu wi libi, dan wi sa kon abi moi fasi di sa yepi wi fu dini Gado na wan moro bun fasi. Dati na trutru wan moi kado!​—Leisi Galasiasma 5:22, 23.

3. (a) Te wi e kweki ’a froktu fu a yeye’, dan fa dati e gi Gado glori? (b) Na sortu aksi wi sa poti prakseri?

³ Den fasi di a santa yeye e yepi wi fu kon abi, e sori fa Yehovah Gado, a Sma fu pe a santa yeye komoto, de trutru (Kol. 3:9, 10). Yesus ben sori den apostel fu en san ben de a moro prenspari reide fu san ede Kresten musu pruberi fu de leki Gado. A ben taki: ’Te unu e tan meki furu froktu, dan dati o gi mi Tata glori’ (Yoh. 15:8). * Te wi e kweki ’a froktu fu a yeye’, dan dati o de krin fu si na a fasi fa wi e taki èn e handri. Na so Gado e kisi glori (Mat. 5:16). Fa a froktu fu a yeye e difrenti fu den fasi di den sma fu a grontapu fu Satan abi? Fa wi kan kweki a froktu fu a yeye? Fu san ede wi ben kan feni en muilek fu du dati? Wi sa poti prakseri na den aksi disi te wi sa taki fu den fosi dri pisi fu a froktu fu a yeye. Dati na lobi, prisiri, nanga vrede.

Wi musu sori a lobi fu Gado

4. Sortu lobi Yesus ben leri den bakaman fu en fu sori?

⁴ A lobi di a santa yeye e yepi wi fu kon abi, de heri tra fasi leki a lobi di grontapusma e sori. Fa so? Fu di a lobi dati na a lobi fu Gado. Yesus ben taki fu a difrenti disi na ini a Bergitaki fu en. (Leisi Mateyus 5:43-48.) A ben sori  taki srefi sondari e handri nanga trawan soleki fa trawan e handri nanga den. Sma di e sori a lobi dati di no de trutru lobi, e du sani gi trawan aladi den e fruwakti wan sani baka. Fu taki en leti, den sma disi e du bun gi trawan fu di trawan ben du bun gi den. Efu wi wani ’sori taki wi na manpikin fu wi Tata di de na hemel’, dan wi musu de tra fasi leki den sma dati. Wi no musu handri nanga sma soleki fa den e handri nanga wi, ma wi musu si den soleki fa Yehovah e si den, èn wi musu handri nanga den soleki fa Yehovah e handri nanga den. Ma fa wi kan lobi den feanti fu wi, soleki fa Yesus ben taigi wi fu du?

5. Fa wi kan sori lobi gi den wan di e frufolgu wi?

⁵ Luku wan eksempre na ini Bijbel. Di Paulus nanga Silas ben e preiki na ini Filipi, dan sma drape grabu den hori, den gi den wan steifi fonfon, den poti den te na bakasei fu a strafu-oso, èn den bui den na den futu. Kande a waktiman fu a strafu-oso no ben handri bun tu nanga den. Ma di wan gronseki pasa, dan den kon fri, sondro taki den ben fruwakti dati. Den apostel prakseri fu du ogri baka nanga a waktiman? Nôno. Fu di den ben broko den ede nanga a man, meki den sori trutru lobi gi en. Den handri esi-esi fu yepi en, èn na so a waktiman nanga en heri osofamiri tron bribiman (Tori. 16:19-34). Na ini a ten disi, furu fu wi Kresten brada nanga sisa teki na eksempre fu den apostel, fu di den ’blesi den sma di ben e frufolgu den’.​—Rom. 12:14.

6. Na sortu fasi wi kan sori trutru lobi gi wi Kresten brada nanga sisa? (Luku a faki na tapu bladzijde 21.)

⁶ A lobi di wi abi gi wi Kresten brada nanga sisa, e meki wi du moro srefi. Bijbel e taki: „Wi de fruplekti fu gi wi libi fu a bun fu den brada fu wi.”(Leisi 1 Yohanes 3:16-18.) Ma nofo tron wi kan sori lobi na ini pikin sani. Fu eksempre, efu wi taki noso du sani di hati den firi fu wan brada noso wan sisa, dan wi kan go na en fu meki vrede baka nanga en. Na so wi e sori lobi (Mat. 5:23, 24). Ma fa a de te wan sma e hati den firi fu wi? Wi de ’klariklari fu gi sma pardon’, noso wi e hori sma na ati son leisi? (Ps. 86:5) Te wi abi a santa yeye, dan wi kan kon abi tranga lobi gi trawan. A lobi dati kan yepi wi fu tapu den pikinpikin fowtu fu trawan, èn wi sa gi trawan pardon tu nanga wi heri ati, ’soleki fa Yehovah e gi wi pardon nanga en heri ati’.​—Kol. 3:13, 14; 1 Petr. 4:8.

7, 8. (a) Fa a lobi di wi abi gi Gado, e yepi wi fu sori lobi gi trawan? (b) Fa wi kan kon abi moro lobi gi Yehovah? (Luku a prenki na ondrosei.)

⁷ Fa wi kan kon abi trutru lobi gi wi Kresten brada nanga sisa? Wi musu kon abi moro lobi gi Gado (Ef. 5:1, 2; 1 Yoh. 4:9-11, 20, 21). A ten di wi e teki fu leisi Bijbel, fu denki dipi fu den  sani di wi e leri, èn fu begi Gado, na ten di wi e meki fu abi demakandra nanga Yehovah. Disi e gi wi deki-ati, èn a e meki wi kon abi moro lobi gi wi hemel Tata. Ma wi musu meki ten fu kon moro krosibei na Gado.

⁸ Luku wan eksempre: Kon meki wi taki dati yu ben abi wan spesrutu pisi ten fu a dei nomo fu leisi Gado Wortu, fu denki dipi fu en, èn fu begi Yehovah. Yu no ben o du ala san yu man fu sorgu taki nowan enkri sani kon na ini a ten dati di yu abi fu kon moro krosibei na Yehovah? A no de fu taki dati nowan sma kan tapu yu fu begi Gado, èn furu fu wi kan leisi Bijbel o ten wi wani. Toku wi musu meki ala muiti fu sorgu taki den someni sani di wi abi fu du ala dei no e tapu wi fu meki ten gi Gado. Yu e meki so furu ten leki yu man ibri dei, fu kon moro krosibei na Yehovah?

„A prisiri di a santa yeye e gi”

9. San na wan moi sani fu a prisiri di a santa yeye e gi?

⁹ Wan moi sani fu a froktu fu a yeye, na taki a e yepi wi fu tan sori den fasi fu Gado, awinsi na ini sortu situwâsi wi de. Prisiri, a di fu tu pisi fu a froktu fu a yeye, na wan eksempre fu dati. Prisiri de leki wan bon di man gro, srefi na wan presi pe tra bon no man gro makriki. Na heri grontapu, furu futuboi fu Gado ’teki a wortu nanga a prisiri di santa yeye e gi, aladi furu pina miti den’ (1 Tes. 1:6). Trawan abi furu problema na ini den libi. Toku Yehovah e gi den krakti nanga yepi fu en santa yeye, so taki den man ’horidoro, so taki den kan abi langa pasensi, èn so taki den kan abi prisiri’ (Kol. 1:11). San e meki taki wi de nanga prisiri?

10. San e meki taki wi de nanga prisiri?

¹⁰ Den ’gudu fu a grontapu fu Satan e lasi gowe’, ma den gudu di Yehovah e gi wi e tan fu ala ten (1 Tim. 6:17; Mat. 6:19, 20). Yehovah e gi wi a moi howpu fu libi fu têgo. Wi e prisiri fu di wi abi Kresten brada nanga sisa na heri grontapu. Ma san moro prenspari, na taki a prisiri di wi abi e kon fu di wi abi wan matifasi nanga Gado. Wi abi den srefi firi fu David di ben prèise Yehovah na ini wan singi, aladi a ben musu libi leki wan loweman. A ben taki: „A bun-ati fu yu betre moro a libi srefi. Nanga mi eigi mofo mi o prèise yu. Na so mi o blesi yu mi heri libi langa” (Ps. 63:3, 4). Awinsi wi abi problema na ini wi libi, toku a prisiri di wi abi e meki wi prèise Gado na ini wi ati.

11. Fu san ede a prenspari taki wi e dini Yehovah nanga prisiri?

¹¹ Na apostel Paulus ben gi Kresten a deki-ati disi: „Ala ten un musu prisiri na ini a diniwroko fu Masra. Ete wan tron mi o taki: Un musu prisiri!” (Fil. 4:4) Fu san ede a prenspari taki Kresten e dini Yehovah nanga prisiri? Fu di Satan ben meki wan afersi opo kon di abi fu du nanga a reti di Yehovah abi fu tiri. Satan ben taki dati nowan sma ben o dini Gado nanga en heri ati (Yob 1:9-11). Efu wi no ben o dini Yehovah nanga prisiri, ma fu di wi e si a sani dati leki wan plekti, dan a diniwroko di wi e du gi en no ben o bun nofo. Fu dati ede wi e du ala muiti fu gi yesi na a rai disi fu a psalm skrifiman: „Dini Yehovah nanga prisiri. Kon na inisei fu tanapu na en fesi èn bari fu prisiri” (Ps. 100:2). Te wi e dini Gado nanga prisiri, èn nanga wi heri ati, dan dati e gi Gado glori.

12, 13. San wi kan du te wi e firi brokosaka?

¹² Toku a de so taki srefi fayafaya futuboi fu Yehovah e firi brokosaka son leisi, èn a kan muilek gi den fu tan denki bun fu sani (Fil. 2:25-30). San kan yepi wi na den momenti dati? Efeisesma 5:18, 19 e taki: „Un musu tan meki a yeye de na un tapu, èn un musu taki nanga makandra nanga psalm èn nanga prèisesingi gi Gado èn nanga singi di abi fu du nanga yeye afersi, aladi unu e singi èn e prei poku nanga un heri ati gi Yehovah.” Fa wi kan fiti a rai dati?

¹³ Te wi e firi brokosaka, dan wi kan begi Yehovah fayafaya, èn wi kan meki muiti fu denki dipi fu sani di warti fu kisi prèise. (Leisi Filipisma 4:6-9.) Son sma kon si taki te den e arki Kownukondre singi aladi den e singi safri, dan dati e meki den firi bun, èn a e meki den poti  prakseri na bun sani. Wan brada ben de na ini wan muilek situwâsi, èn a sani dati ben meki a firi brokosaka. A brada e taki: „Boiti taki mi ben e begi Gado doronomo, mi leri wan tu Kownukondre singi na ede. Mi ben e singi den moi singi disi gi Yehovah nanga wan tranga sten, noso mi ben e singi den na ini misrefi. A sani dati ben gi mi wan korostu firi. A buku Kon krosibei na Yehovah ben kon na doro tu na a srefi ten dati. A yari baka dati, mi leisi en tu tron. A ben de leki wan salfu di ben e meki mi firi bun. Mi sabi taki Yehovah blesi a muiti di mi meki.”

„A vrede di e tyari sma kon na wán”

14. San na wan moi sani fu a vrede di wi e kon abi nanga yepi fu a santa yeye?

¹⁴ Na den internationaal kongres fu wi, Kresten brada nanga sisa fu difrenti kulturu e kisi prisiri fu a demakandra di den abi. Den sortu okasi dati e sori wi krin san a vrede di a pipel fu Gado abi, e du. A vrede disi e meki taki ala brada nanga sisa na heri grontapu de na ini wánfasi. Nofo tron sma di e luku wi no man bribi te den e si taki sma di ben musu de feanti fu makandra e ’du bun furu muiti fu tan abi wán fasi fu denki, so taki den kan abi a vrede di e tyari sma kon na wán’ (Ef. 4:3). A wánfasi disi na wan tumusi moi sani te wi e luku den kenki di furu fu den brada nanga sisa disi ben musu tyari kon.

15, 16. (a) Fa Petrus ben kweki, èn fa a sani dati ben de wan tyalensi gi en? (b) Fa Yehovah yepi Petrus fu kenki a denki fu en?

¹⁵ A no makriki fu tyari wánfasi kon na mindri sma di kweki na difrenti fasi. Fu kon sabi sortu kenki wi musu tyari kon fu man abi a wánfasi dati, dan meki wi luku na eksempre fu na apostel Petrus di ben e libi na ini a fosi yarihondro. Wi kan si fa a ben e denki fu den sma di no ben de Dyu, te wi e luku a sani disi di a ben taki: „Un sabi heri bun taki a no fiti  srefisrefi gi wan Dyu fu moksi ensrefi nanga wan sma fu wan tra ras, noso fu go na so wan sma, ma toku Gado sori mi taki mi no musu taki fu nowan sma taki a no krin, noso taki a doti” (Tori. 10:24-29; 11:1-3). Fu di Petrus ben kweki nanga wan denki di furu sma fu a ten dati ben abi, meki a ben e bribi taki a Wet ben e leri en fu lobi soso den sma di ben de Dyu. Kande a no ben abi nowan problema fu si trakondre sma leki feanti èn fu abi bita-ati gi den. *

¹⁶ Prakseri fa Petrus ben musu firi di a go na ini na oso fu Kornelius. Wan man di fosi ben e denki takru fu sma di no ben de Dyu, oiti ben kan ’kon de wán’ nanga den na ini „vrede”? (Ef. 4:3, 16) Iya, dati ben kan, fu di wan tu dei nomo na fesi, a yeye fu Gado ben opo Petrus en ati, so taki a bigin kenki a fasi fa a ben e denki. Dati yepi en fu no denki takru moro fu sma di no ben de Dyu. Nanga yepi fu wan fisyun, Yehovah sori Petrus krin taki A lobi ala sortu sma, awansi fu sortu ras noso sortu kondre den de (Tori. 10:10-15). Dati meki Petrus ben kan taigi Kornelius: „Mi e si trutru taki Gado no lobi a wan sma moro a trawan, ma awansi fu sortu kondre wan sma de, efu a e du san de regtfardiki èn a e frede Gado, dan Gado feni a sma dati bun” (Tori. 10:34, 35). Petrus kenki a denki fu en, èn a kon de na ini wánfasi nanga „ala brada”.​—1 Petr. 2:17.

17. Fu san ede a wánfasi di a pipel fu Gado abi na wan tumusi moi sani?

¹⁷ A sani di Petrus ondrofeni e yepi wi fu kon frustan a bigi kenki di a pipel fu Gado e ondrofeni na ini a ten disi. (Leisi Yesaya 2:3, 4.) Milyunmilyun sma „di komoto fu ala kondre, lo, pipel, nanga tongo” leri fu denki na wan fasi di e kruderi nanga ’a wani fu Gado di bun, di e plisi en, èn di de volmaakti’ (Openb. 7:9; Rom. 12:2). Fosi, furu fu den sma disi ben de na ini a grontapu fu Satan di ben e leri den fu abi bita-ati gi trawan, èn fu tyari prati kon. Ma fu di den sma disi studeri Gado Wortu, èn fu di a santa yeye yepi den, meki den leri fu „du den sani di e tyari vrede kon” (Rom. 14:19). A sani disi meki taki den de na ini wánfasi, èn a wánfasi disi e gi Gado glori.

18, 19. (a) Fa ibriwan fu wi kan sorgu taki wánfasi de na ini a gemeente? (b) San wi o luku na ini a tra artikel?

¹⁸ Fa ibriwan fu wi kan yepi fu sorgu taki vrede nanga wánfasi de na mindri a pipel fu Gado? Furu gemeente abi sma di froisi gowe libi a kondre fu den. Sonwan fu den sma disi abi tra gwenti, noso kande den no e taki a tongo fu wi bun. Wi e pruberi fu kon sabi den sma disi moro bun? Na dati Gado Wortu e gi wi deki-ati fu du. Paulus ben skrifi wan brifi seni go gi a gemeente na ini Rome, èn den memre fu a gemeente dati ben de Dyu nanga sma di no ben de Dyu. Paulus ben taki: „Teki makandra nanga prisiri neleki fa Krestes ben teki wi nanga prisiri, so taki Gado kan kisi glori” (Rom. 15:7). Yu sabi wan sma na ini a gemeente fu yu di yu kan leri sabi moro bun?

¹⁹ Sortu tra sani wi kan du fu meki a santa yeye abi krakti tapu wi libi? Na ini a tra artikel wi o poti prakseri na a aksi disi te wi sa taki fu den tra pisi fu a froktu fu a yeye.

[Futuwortu]

San yu ben sa piki?

• Fa wi kan sori trutru lobi gi wi brada nanga sisa?

• Fu san ede a prenspari taki wi e dini Gado nanga prisiri?

• Fa wi kan yepi fu sorgu taki vrede nanga wánfasi de na ini a gemeente?

[Aksi fu a tori disi]

[Faki na tapu bladzijde 21]

„Disi na den tru Kresten”

Wan buku e sori san wan yongu Dyu strafuman ben taki fu Yehovah Kotoigi, baka di a ben miti den fu a fosi leisi, na a ten di a doro na ini a strafuman kampu Neuengamme. A buku ben taki:

„Di mi nanga tra Dyu di ben komoto fu Dachau, doro na ini a kampu, dan wantewante den Dyu di ben de drape kaba bigin kibri ala san den ben abi, so taki den no ben abi fu prati sani nanga wi. . . . Di wi ben de dorosei fu a kampu, dan wi ben e yepi makandra. Ma dyaso pe sma ben musu feti fu tan na libi, ala sma ben e suku fu kibri den eigi libi, èn nowan sma ben e broko en ede nanga wan trawan. Ma luku san den Bijbel Ondrosukuman ben e du. Na a ten dati, den ben musu wroko bun tranga fu meki wan tu watra peipi di ben e leki. A weer ben kowru, èn den ben e tanapu heri dei na ini a bun kowru watra. Nowan sma ben man frustan fa den ben man horidoro na ini a situwâsi dati. Den ben taki dati na Yehovah ben e gi den a krakti. Neleki wi, den ben abi a brede di den ben e kisi, tranga fanowdu, fu di angri ben e kiri den. Ma san den ben e du? Den tyari ala a brede di den ben abi kon na wán, den teki afu fu en gi densrefi, èn a tra afu den gi den Kresten brada nanga sisa fu den di ben komoto fu Dachau no so langa pasa. Den gi den wan switikon èn den bosi èn brasa den. Den begi fosi den bigin nyan. Baka dati, den alamala ben de tevrede èn den ben de nanga prisiri. Den ben taki dati angri no ben e kiri den moro. Na a momenti dati mi prakseri na misrefi: Disi na den tru Kresten” (Between Resistance and Martyrdom—Jehovah’s Witnesses in the Third Reich).

[Prenki na tapu bladzijde 19]

Yu e meki ten ibri dei fu kon moro krosibei na Yehovah?