“Babe [ukhatinyuliswa] ngaloko kutsi nitsele titselo letinyenti.”​—JOH. 15:8.

1, 2. (a) Ngumaphi ematfuba lesinawo ekukhutsata labanye? (b) Ngusiphi sipho Jehova lasipha sona lesitfutfukisa likhono letfu lekumkhonta?

 CABANGA nganati timo letimbili: Dzadze lotsite ucaphela kutsi kunentfo lekhatsata lomunye losemusha. Ngako-ke, lodzadze uhlela kusebenta nalona losemusha ensimini. Njengobe basebenta ndzawonye, lona losemusha umtjela loko lokumkhatsatako. Kamuva ngalelo langa, lona losemusha uthandaza kuJehova abonge lolutsandvo loluvetwe ngulodzadze; loko bekunguko kanye labekudzinga. Kulenye indzawo, indvodza nemfati wayo basandza kubuya kulelinye live labebayewushumayela kulo. Ngenjabulo, balandzisa lokuhlangenwe nako kwabo kulomunye umbutsano labakuwo, futsi umzalwane losemusha ubalalele. Eminyakeni letsite lelandzelako, njengobe lomzalwane losemusha asalungela kuya esabelweni sakhe sekuyewukhonta kulelinye live, ucabanga ngalendvodza nemfati wayo kanye nangalokuhlangenwe nako kwabo lokwamenta wafuna kuba sitfunywa selivangeli.

² Kungenteka kutsi letimo tikukhumbuta ngemuntfu lotsite lowagucula kuphila kwakho, nobe lotsite wena lowatsintsa kuphila kwakhe. Kuyintfo lengakavami kutsi emavi lambalwa atsintse kuphila kwemuntfu, nanobe kunjalo, malanga onkhe siba nematfuba ekukhutsata futsi sicinise labanye. Asesitsi bekunentfo lengakhulisa emakhono kanye netimfanelo takho kute ukwati kusita bazalwane kanye nabodzadzewenu, futsi usetjentiswe nguNkulunkulu. Bekungeke yini loko kube kuhle? Ecinisweni, Jehova uyasiniketa sipho lesinjalo​—umoya wakhe longcwele. (Luk. 11:13) Njengobe umoya waNkulunkulu usebenta ekuphileni kwetfu, usenta sibe netimfanelo letinhle letitfutfukisa wonkhe umsebenti lesimentela wona. Lesi sipho lesihle kakhulu!​—Fundza Galathiya 5:22, 23.

3. (a) Kuveta kwetfu ‘titselo temoya’ kumkhatimulisa njani Nkulunkulu? (b) Ngumiphi imibuto lesitawuyihlola?

³ Timfanelo umoya longcwele lotivetako tembula buntfu baNkulunkulu Jehova, longuMtfombo waloyo moya. (Khol. 3:9, 10) Jesu waveta sizatfu lesibalulekile lesenta kufaneleke ngemaKhristu kutsi alwele kulingisa Nkulunkulu, watjela baphostoli bakhe: “Babe [ukhatinyuliswa] ngaloko kutsi nitsele titselo letinyenti.” a (Joh. 15:8) Njengobe siveta ‘titselo temoya,’ imiphumela ibonakala ngalokucacile endleleni lesikhuluma kanye nalesenta ngayo, futsi loku kuletsa ludvumo kuNkulunkulu. (Mat. 5:16) Titselo temoya tehluke ngatiphi tindlela emikhubeni yalelive laSathane? Singativeta njani? Kungani singase sikutfole kumatima kwenta kanjalo? Sitawuhlola lemibuto njengobe sitawube sicoca ngetici letintsatfu tekucala taletitselo temoya​—lokulutsandvo, injabulo, kanye nekuthula.

Lutsandvo Lolusekelwe Esimisweni Lesibalulekile

4. Jesu wafundzisa balandzeli bakhe kutsi babe naluphi luhlobo lwelutsandvo?

⁴ Lutsandvo loluvetwa ngumoya longcwele lwehluke kakhulu kulolo loluvamile kulelive. Ngayiphi indlela? Lusekelwe esimisweni lesibaluleke kakhulu. Jesu wawenta wacaca lomehluko eNshumayelweni yaseNtsabeni. (Fundza Matewu 5:43-48.) Waveta kutsi ngisho nebantfu  labatoni bavame kuphatsa labanye ngendlela nabo lababaphatsa ngayo. ‘Lutsandvo’ lolunjalo aluveti kutidzela kweliciniso, kodvwa lusekelwe ekutsandzeni labanye ngobe nabo basitsandza. Nangabe sifuna ‘kutiveta singemadvodzana aBabe losezulwini,’ kufanele sehluke. Kunekutsi siphatse labanye ngendlela nabo labasiphatsa ngayo, kufanele sibe nembono waJehova ngabo futsi sibaphatse ngendlela labaphatsa ngayo. Kodvwa kungenteka njani kutsi sitsandze titsa tetfu, njengobe Jesu ayala?

5. Singabavetela njani lutsandvo labo labasishushisako?

⁵ Cabanga ngalesinye sibonelo lesiseBhayibhelini. Ngesikhatsi bashumayela eFiliphi, boPawula naSilasi babanjwa, babhanjabulwa ngemizaca, futsi bafakwa ejele lelingekhatsi, lapho tinyawo tabo taboshelwa khona etingodvweni. Njengobe bebalapho, kungenteka kutsi baphatfwa kabi ngumgcinijele. Ngesikhatsi sebakhululwa bangakalindzeli ngesizatfu sekutamatama kwemhlaba, bajabula yini ngekutsi sebatawukwati kutiphindziselela kulomgcinijele? Cha. Kukhatsateka lokucotfo ngenhlalakahle yalomgcinijele​—lokulutsandvo lwabo lwekutidzela, kwabenta bamsita ngekushesha, kute yena kanye nemndeni wakhe babe ngemakholwa. (Imis. 16:19-34) Lamuhla, bazalwane labanyenti basachubeka ‘babusisa lababatingelela kubashushisa.’​—Rom. 12:14.

6. Singaluveta ngatiphi tindlela lutsandvo lwekutidzela lesinalo ngebazalwane betfu? (Fundza libhokisi lelisekhasini 25.)

⁶ Lutsandvo ngebazalwane betfu luhamba libanga lelidze. “Kufanele sinikele ngekuphila kwetfu ngenca yebazalwane.” (Fundza 1 Johane 3:16-18.) Nanobe kunjalo, etikhatsini letinyenti singakwati kuveta lutsandvo lwetfu ngetindlela letincane. Sibonelo saloku kutsi nangabe kwentekile sakhuluma nobe senta intfo lemphatse kabi umzalwane wetfu, singaveta lutsandvo ngekutsatsa sinyatselo kucala sekubuyisela kuthula. (Mat. 5:23, 24) Kutsiwani nangabe lotsite asiphatsa kabi? ‘Siyakulungela yini kutsetselela,’ nobe sivame kubamba emagcubu? (Hla. 86:5) Lutsandvo lolukhulu loluvetwa ngumoya longcwele lungasisita sikwati kungawanaki emaphutsa lamancane, futsi sibatsetselele ngekukhululeka labanye ‘njengobe nje naJehova asitsetselela ngekukhululeka.’​—Khol. 3:13, 14; 1 Phet. 4:8.

7, 8. (a) Lutsandvo lwetfu ngebantfu luhlobene njani nelutsandvo lesinalo ngaNkulunkulu? (b) Singalucinisa njani lutsandvo lwetfu ngaJehova? (Buka sitfombe lesingentansi.)

⁷ Singalwakha njani lutsandvo lwekutidzela ngebazalwane betfu? Ngekutsi sicinise lutsandvo lesinalo ngaNkulunkulu. (Ef. 5:1, 2; 1 Joh. 4:9-11, 20, 21) Sikhatsi lesisicitsa sisondzelene naJehova nasifundza liBhayibheli, sizindla, kanye nalapho sithandaza, siyasikhutsata  futsi sisenta sikhulise lutsandvo lesinalo ngaBabe wetfu wasezulwini. Nanobe kunjalo, kufanele sitsengisise sikhatsi sekusondzelana naNkulunkulu.

⁸ Asesifananise: Asesitsi bewukwati kufundza liVi laNkulunkulu, kuzindla ngalo, kanye nekuthandaza kuJehova ngesikhatsi lesitsite kuphela malanga onkhe. Bewungeke yini ucaphelisise kute ingabi khona intfo lengadla lesikhatsi sakho losicitsa naJehova? Kute umuntfu longasivimbela kutsi sithandaze kuNkulunkulu, futsi linyenti letfu liyakwati kufundza liBhayibheli nobe ngunini lapho lifuna khona. Nanobe kunjalo, kungase kudzingeke sitsatse tinyatselo letibalulekile kute singavumeli tintfo letinyenti lesitenta malanga onkhe tidle sikhatsi setfu sekusondzelana naNkulunkulu. Uyasitsengisisa yini sikhatsi malanga onkhe kute usondzelane naJehova?

‘Injabulo Leletfwa Ngumoya Longcwele’

9. Ngusiphi sici lesihamba embili senjabulo leletfwa ngumoya longcwele?

⁹ Sici lesihamba embili saletitselo temoya, kungapheli kwato. Injabulo, lesitselo sesibili lesitawucoca ngaso, isibonelo saloku. Injabulo ifanana nesitjalo lesichubeka sikhula ngisho nobe singaphansi kwesimo selitulu lesibi. Emhlabeni wonkhe, tinceku taNkulunkulu letinyenti ‘letatisenhluphekweni lenkhulu, temukela livi ngenjabulo letatiyinikwe ngumoya longcwele.’ (1 Thes. 1:6) Letinye tihlangabetana nebumatima kanye nekuvinjelwa. Nanobe kunjalo, Jehova utiniketa emandla ngemoya wakhe ‘kuze kutsi nome sekuvelani kodvwa tisime, time, tibeketele ngekujabula.’ (Khol. 1:11) Uyini umtfombo walenjabulo?

10. Ivela kuphi injabulo yetfu?

¹⁰ Ngalokwehlukile ‘emcebeni lophelako’ walelive laSathane, umcebo wakamoya Jehova lasinikete wona, uhlala njalo. (1 Thim. 6:17; Mat. 6:19, 20) Jehova usinikete litsemba lelijabulisako lekuphila lokungapheli. Siyajabula ngekuba yincenye yebuzalwane bebuKhristu bemhlaba wonkhe. Ngetulu kwako konkhe, injabulo yetfu isekelwe ebuhlotjeni betfu naNkulunkulu. Sinemiva lefanana neyaDavide, lowatsi nanobe abephila njengembaleki, wadvumisa Jehova ngengoma, watsi: “Ngobe umusa wakho uncono kakhulu kunekuphila; umlomo wami uyawukudvumisa. Ngako-ke ngiyawukubonga, yingci nangisaphila.” (Hla. 63:3, 4) Ngisho nalapho sihlangabetana nebumatima, kudvumisa Nkulunkulu ngenjabulo kutawusenta sijabule.

11. Kungani kubalulekile kutsi sikhonte Jehova ngenjabulo?

¹¹ Umphostoli Pawula weluleka emaKhristu: “Tfokotani eNkhosini njalonjalo. Ngiyaphindza futsi ngitsi: Tfokotani.” (Fil. 4:4) Kungani kubalulekile ngemaKhristu kutsi afeze umsebenti lawentela Jehova ngenjabulo? Kungesizatfu sensayeya Sathane layiphakamisa mayelana nebukhosi baJehova. Watsi kute umuntfu lokhonta Nkulunkulu ngobe atsandza. (Jobe 1:9-11) Nangabe besingakhonta Jehova ngekutimisela kodvwa sibe singajabuli, umnikelo wetfu wekumdvumisa bewutawube ungakapheleli. Ngako-ke, sitimisele kulalela sikhutsato semhlabeli lesitsi: “Khontani Simakadze ngentfokoto! Sondzelani kuye ngekuhlabela kwenjabulo.” (Hla. 100:2) Umsebenti lowentiwa ngenhlitiyo lejabulako futsi letimisele, ukhatimulisa Nkulunkulu.

12, 13. Yini lesingayenta kute silwisane nemiva lengakafaneli?

¹² Nanobe kunjalo, kuliciniso lelingeke liphikwe kutsi ngaletinye tikhatsi ngisho netinceku taJehova letitinikele titawutiva tiphelelwa ngemandla futsi tehluleka kulondvolota simo sengcondvo lesihle. (Fil. 2:25-30) Yini lengasisita ngetikhatsi letinjalo? Efesu 5:18, 19 utsi: ‘Gcwaliswani ngemoya. Niphendvulane ngemahubo, nangemaculo, nangetingoma takamoya; nihlabele nidvumise Jehova ngenhlitiyo yenu yonkhe.’ Singasisebentisa njani leseluleko?

¹³ Nasifikelwa yimiva lengakafaneli, singatfola lusito lwaJehova ngekuthandaza kuye kanye nangekutimisela kutsi sizindle ngetintfo letibongekako. (Fundza Filiphi 4:6-9.) Labanye batfola kutsi kuhlabela, bahambisane netingoma  teMbuso letitsetjuliwe kuyabasita bagcine tingcondvo tabo ticabanga tintfo letakhako. Lomunye umzalwane lowahlangabetana nesimo lesimatima lebesimcindzetela futsi simenta advumale, uyakhumbula: “Ngetulu kwemithandazo lesuka enhlitiyweni lebengiyenta njalo, bengetama kubamba ngenhloko tingoma teMbuso letimbalwa. Bekungiletsela kuthula kwangekhatsi kuhlabela letingoma letimnandzi letidvumisa Jehova, ngisho ngitihlabela ngiphumisela nobe ngitihlabela ngenhlitiyo. Incwadzi letsi “Sondela KuJehova” yakhululwa ngaleso sikhatsi. Ngako-ke, ngayifundza kabili ngemnyaka lowalandzela. Yaba njengemutsi wekwelapha buhlungu enhlitiyweni yami. Ngiyati kutsi Jehova wayibusisa imetamo yami.”

‘Sibopho Sekuthula’

14. Ngusiphi sici lesiphawulekako sekuthula lokuvetwa ngumoya longcwele?

¹⁴ Emihlanganweni yetfu yetive, tivakashi letivela emaveni lehlukehlukene tijabulela kutihlanganisa nalamanye emaKhristu. Tikhatsi letinjena tiveta sici sekuthula lokujatjulelwa bantfu baNkulunkulu lamuhla​—lokubunye betfu bemhlaba wonkhe. Labo lababukele bayamangala nababona bantfu labebangalindzela kutsi babe titsa, ‘bakhutsalela kugcina bunye bemoya ngesibopho sekuthula.’ (Ef. 4:3) Lobunye bumangalisa mbamba ikakhulukati nawubuka tintfo lokuye kwadzingeka labanyenti babo batincobe.

15, 16. (a) Lalinjani limuva laPhetro, futsi loko kwambekela njani insayeya? (b) Jehova wamsita njani Phetro kutsi alungise simo sakhe sengcondvo?

¹⁵ Kumatima kuhlanganisa bantfu labavela etiveni letehlukehlukene. Kute sikwati kubona loku lokufanele kuncotjwe kucala ngembikwekutsi kube nalokuthula, asesihlole sibonelo sangelikhulu lekucala semphostoli Phetro. Simo sengcondvo labenaso ngebetive labangakasoki sibonakala emavini akhe latsi: “Nani matfupha  niyati kutsi umJuda akavunyelwa yinkholo yakhe kutsi avakashele nome atihlanganise nebetive. Kodvwa Nkulunkulu ungikhombisile kutsi angifanele kusho kutsi umuntfu ungcolile nome akahlanteki.” (Imis. 10:24-29; 11:1-3) Ngesizatfu sembono lobewuvamile ngaleso sikhatsi, kungenteka kutsi Phetro wakhula akholelwa kutsi uMtsetfo bewutsi kufanele atsandze emaJuda akubo kuphela. Kungenteka kutsi bekubonakala kuyintfo levamile kuye kutsatsa bantfu betive njengetitsa lokufanele titondvwe. b

¹⁶ Cabanga ngebumatima lokungenteka kutsi Phetro wahlangabetana nabo ngesikhatsi angena endlini yaKhoneliyuse. Njengobe Phetro abenembono lomubi ngebantfu betive, abengakwati yini ‘kutihlanganisa ndzawonye’ nabo, ‘esibopheni sekuthula’? (Ef. 4:3, 16) Yebo abengakwati, ngobe emalangeni lambalwa ngembikwaloku umoya waNkulunkulu bewuvule inhlitiyo yakhe, wamenta wakwati kulungisa simo sakhe sengcondvo futsi wancoba lubandlululo labenalo. Embonweni, Jehova wenta Phetro wabona kutsi indlela Yena labatsatsa ngayo bantfu ayincunywa buve babo. (Imis. 10:10-15) Kungako Phetro atsi kuKhoneliyuse: “Nembala sengibonile kutsi Nkulunkulu akakhetsi libala lemuntfu, kodvwa lowo lomesabako ente lokulungile uyemukeleka kuye, nome angewasiphi sive.” (Imis. 10:34, 35) Phetro wagucuka, futsi waba nebunye beliciniso ‘nabo bonkhe bazalwane.’​—1 Phet. 2:17.

17. Bunye lobujatjulelwa bantfu baNkulunkulu bumangalisa ngayiphi indlela?

¹⁷ Loko lokwenteka kuPhetro kusisita sicaphele lushintjo lolukhulu lolwenteka kubantfu baNkulunkulu lamuhla. (Fundza Isaya 2:3, 4.) Tigidzi tebantfu ‘letiphuma emaveni onkhe, nasetilimini tonkhe’ tiye talungisa indlela leticabanga ngayo kute ivumelane ‘nentsandvo yaNkulunkulu, lenhle, leyemukelekako, nalephelele.’ (Semb. 7:9; Rom. 12:2) Linyenti lalabantfu belibanjwe yinzondo kanye nekwehlukana lokugcwele kulelive laSathane. Kodvwa ngekutadisha liVi laNkulunkulu kanye nangelusito lwemoya longcwele, baye bafundza ‘kuphishanekela tintfo letiletsa kuthula.’ (Rom. 14:19) Lokuthula lokungumphumela waloko, kuletsa ludvumo kuNkulunkulu.

18, 19. (a) Yini ngamunye wetfu langayenta kute libandla libe nekuthula kanye nebunye? (b) Yini lesitawucoca ngayo esihlokweni lesilandzelako?

¹⁸ Yini ngamunye wetfu langayenta kute atfutfukise kuthula kanye nebunye lobukhona emkhatsini webantfu baNkulunkulu? Lamanye emabandla anebantfu labavela kulamanye emave. Labanye babo kungenteka kutsi banemasiko lehlukile nobe abalukhulumi kahle lulwimi lwetfu. Siyetama yini kubati kancono? Lena yindlela lekhutsatwa liVi laNkulunkulu. Abhalela libandla laseRoma, lebelinebazalwane labangemaJuda kanye nebetive, Pawula watsi: “Yemukelanani, njengobe naKhristu anemukela, khona kutewudvunyiswa Nkulunkulu.” (Rom. 15:7) Ukhona yini umuntfu ebandleni lakini longetama kumati kancono?

¹⁹ Yini lenye lesingayenta kute sivumele umoya longcwele usebente ekuphileni kwetfu? Sihloko lesilandzelako sitawuphendvula lombuto njengobe sitawube sicoca ngaletinye tici tetitselo temoya.

[Imibhalo lengentansi]

Ungaphendvula Njani?

• Singaluveta njani lutsandvo lwekutidzela ngebazalwane betfu?

• Kungani kubalulekile kutsi siwufeze ngenjabulo umsebenti lesiwentela Nkulunkulu?

• Yini lesingayenta kute libandla libe nekuthula kanye nebunye?

[Imibuto Yesihloko Lesifundvwako]

[Libhokisi ekhasini 25]

“Lawa NgemaKhristu Eliciniso”

Incwadzi letsi “Between Resistance and Martyrdom—Jehovah’s Witnesses in the Third Reich” ilandzisa emavi alelinye lijaha lelingumJuda lebeliboshiwe, lelichaza kuhlangana kwalo naboFakazi BaJehova kwekucala, ngemuva kwekufika enkambu yekuhlushwa yase-Neuengamme:

“Kutsite lapho tsine emaJuda ase-Dachau sifika kulenkambu, lankha lamanye emaJuda acala kufihla tonkhe tintfo tawo kute angatihlanganyeli natsi. . . . Ngesikhatsi sisengakefiki [kulenkambu yekuhlushwa], besisitana. Kodvwa lapha timo setimatima, wonkhe umuntfu ukhatsateka kakhulu ngekutisindzisa yena kuphela, bese akhohlwa ngalabanye. Nanobe kunjalo, cabanga ngaloko lobekwentiwa Bafundzi BeliBhayibheli. Ngaleso sikhatsi, bekufanele basebente kamatima balungisa emaphayiphi emanti. Bekumakhata futsi bebachitsa lilanga lonkhe beme emantini labandza mpo! Kute lobekacondza kutsi bakhona njani kubeketelela lesimo. Bona bebatsi Jehova ubaniketa emandla labawadzingako. Njengatsi sonkhe, nabo bebasidzinga mbamba sinkhwa ngobe bebalambile. Nanobe kunjalo, yini lebebayenta? Bebacongelela sonkhe sinkhwa labebanaso, batitsatsele incenye yaso, bese kutsi lena lenye bayinikete emakholwa labakanye nawo labesandza kufika avela e-Dachau. Bebawemukela futsi bawanga. Ngembikwekutsi badle, bebathandaza. Ngemuva kwaloko, bonkhe bebasuke benetisekile futsi bajabula. Bebatsi sebativa besutsi. Kungaleso sikhatsi lapho ngacabanga: Lawa ngemaKhristu eliciniso.”

[Titfombe ekhasini 23]

Sikhona yini sikhatsi lositsengisisako kuletinye tintfo lotentako kute usondzelane naJehova?