“Epako Liespiritu” Li Sivaya Suku

“Kokuima kuene epako lia lua oko Tate a muisilua ulamba.”—YOA. 15:8.

1, 2. (a) (a) Apuluvi api tu kuete voku vetiya vakuetu? (b) Ombanjaile yipi ya Yehova yi vokiya uluño wetu woku u vumba?

 KŨLĨHĨSA ovolandu avali: Ukãi umue Ukristão, wa limbuka okuti manji umue ufeko wa sakalala calua. Noke wa linga esokiyo lioku talavaya laye kupange woku kunda. Osimbu va kala oku kunda konjo lanjo, umalẽhe ufeko wa fetika oku u lomboluila ovitangi viaye. Keteke liaco, umalẽhe ufeko wa likutilila loku eca olopandu ku Yehova omo liocisola kuenda ocikembe manji ukãi a lekisa kokuaye; momo olio ekuatiso a sukilile. Ulandu ukuavo, watiamẽla kumanji umue lukãi waye va tiuka ndopo kupange wavo woku kunda kofeka yikuavo. Eci va kala kumosi la vakuavo loku lombolola ovolandu avo lesanju, umalẽhe umue ulume wa va yevelela lutate. Noke yanyamo amue eci a kala oku pongiya ungende waye woku ka kundila kofeka yikuavo, wa sokolola olohueli viaco lombangulo va kuata yina yovetiya oku iñila kupange wumisionariu.

² Ovolandu ava, pamue a ku ivaluisa omanu vamue va ku kuatisa, ale ulandu wavo wa ku vetiya calua. Ocili okuti ombangulo yimosi, pamue ka yi pongolola omuenyo womunu, pole, eteke leteke tu kuete apuluvi alua voku lembeleka vakuetu kuenda oku va kolisa. Sokolola ndeci okuti kuli cimue ci vokiya uloño wove, lovituwa viove oco o kuatise ciwa vamanji, kuenda oku linga upange wa Suku. Anga hẽ eci ka ci komohĩsa? (Luka 11:13) Osimbu espiritu lia Suku li tu kuatisa komuenyo wetu, tu kuata ovituwa viwa vi tu kuatisa oku tẽlisa ciwa upange wa Suku. Hambanjaile kuoyo yi komõhisa!—Tanga Va Galatia 5:22, 23.

3. (a) Oku kuata “epako liespiritu” ci kuatisa ndati oku sivaya Suku? (b) Apulilo api tu konomuisa?

³ Ovilinga viunene wespiritu sandu vi situlula ekalo lia Yehova Suku Ono yespiritu liaco. (Va Kol. 3:9, 10) Yesu wa lekisa esunga lieci Akristão va sukilila oku likolisilako oku setukula Suku, eci a sapuila ovapostolo vaye hati: “Kokuima kuene epako lia lua oko Tate a muisilua ulamba.” a (Yoa. 15:8) Osimbu tu kuata “epako liespiritu,” olombangulo kuenda ovilinga vietu, vi ka eca uvangi waco, kuenje tu sivaya Suku yetu. (Mat. 5:16) Vonepa yipi epako liespiritu lia litepa lovituwa violuali lua Satana? Ndamupi tu pondola oku kuata epako liespiritu? Momo lie ka ca lelukilile oku ci linga? Tu ka konomuisa apulilo ava osimbu tu kũlĩhĩsa olonepa vitatu viepako liespiritu okuti, ocisola, esanju, kuenda ombembua.

Ocisola Cendisiwa Lolonumbi

4. Ocisola cipi Yesu a longisa kolondonge viaye oco va ci lekise?

⁴ Ocisola cepako liespiritu sandu, ca litepa locisola coluali. Ndamupi? Ocisola caco, cendisiwa lolonumbi via velapo. Yesu wa lombolola etepiso liaco Vohundo a lingila Komunda. (Tanga Mateo 5:43-48.) Eye wa lekisa okuti ndaño muẽle olondingaĩvi, vi pondolavo oku tata ciwa vakuavo ndeci va yongola oku tatiwa. Pole “vocisola” caco, ka  mua kongelele elikolisilo, momo ci lomboloka oku fetuluinya uwa va ku lingila. Oco tu ‘lekise okuti tu mãla va Isietu o kasi kilu,’ tu sukila oku litepa loluali. Handi vali, ka tu sukila lika oku tata vakuetu ndeci va tu tata, pole, tu sukilavo oku va tenda ndeci Yehova a va tenda. Tu pondola oku sola ndati ovanyali vetu ndeci Yesu a handeleka?

5. Tu pondola oku sola ndati omanu vana va tu lambalala?

⁵ Kũlĩhĩsa ulandu umue Wembimbiliya. Osimbu Paulu la Siluano va kala oku kundila ko Filipu, va kuatiwa kuenda va tipuiwa, kuenje va kapiwa vokayike loku va valela ovikumbi kovolu. Citava okuti kalei kokayike wa va talisavo ohali. Pole, eci vocipikipiki kueya ocilemawe kuenje va kunduluka, anga hẽ vo fetuluinya? Sio. Omo lioku sakalala lekalo liaye liwa, ocisola cavo ca va vetiya oku u kuatisa, kuenje ca ecelela okuti kalei kaco kumue lepata liaye, va tava kondaka yiwa. (Ovil. 16:19-34) Koloneke vilo, vamanji valua va siatavo oku kuama ongangu yoku ‘likutililako vana va va lambalala.’—Va Rom. 12:14.

6. Volonepa vipi tu lekisa ocisola ca velapo ku va manjetu? (Tala vokakasia kemẽla 21.)

⁶ Ocisola cetu ku vamanji, ci lekisiwa volonepa via velapo. “Ca tu sesamela oku ecela vakuetu ovimuenyo vietu.” (Tanga 1 Yoano 3:16-18.) Pamue tu lekisa ocisola caco volonepa vitito. Ndeci, nda tua popia ocina cimue ale tua linga cimue ci sumuisa manjetu, tu pondola oku lekisa ocisola poku enda kokuaye oku ka lisunguluisa lombembua. (Mat. 5:23, 24) Nye ci popiwa nda umue wa tu lueyela? Anga hẽ tu sukila ‘oku wecela,’ ale tu u kuatela ocikumbiti? (Osa. 86:5) Ocisola cepako liespiritu sandu, ci tu kuatisa oku tuvika akandu atito loku ecela vakuetu ‘ndeci Yehova a tu ecela.’—Va Kol. 3:13, 14; 1 Pet. 4:8.

7, 8. (a) Ocisola tu lekisa komanu ci kuete ndati elitokeko locisola tu kuetele Suku? (b) Tu pamisa ndati ocisola cetu la Yehova?

⁷ Tu kuatela ndati ocisola ca velapo vamanji? Tu ci linga poku vokiya ocisola cetu ku Suku. (Va Efe. 5:1, 2; 1 Yoa. 4:9-11, 20, 21) Otembo tu pesila Yehova poku tanga Embimbiliya, loku sokolola ovina tua tanga, kuenda oku likutilila, yi pamisa utima wetu loku vokiya ocisola cetu ku Isietu wo kilu. Omo liaco, tu sukila oku sanda otembo yoku pamisa ukamba wetu la Suku.

⁸ Kũlĩhĩsa ocindekaise eci: Sokolola ndeci okuti vokuenda kueteke oco lika o kuete  otembo yoku tanga Ondaka ya Suku, loku sokolola eci wa tanga kuenda oku likutilila ku Yehova. Anga hẽ, nda kua lavele otembo yaco ya Yehova okuti lacimue ci ku tateka? Ocili okuti, lomue o tẽla oku tu tateka oku likutilila ku Suku, kuenda valua pokati ketu tu pondola oku tanga Embimbiliya vepuluvi tua sokiya. Pole, tu sukila oku lavulula oco okuti ovopange etu eteke leteke ka a tateka otembo tua sokiyila Suku. Ove hẽ, wa siata oku sanda otembo eteke leteke yoku pamisa ukamba wove la Yehova?

‘Esanju Liespiritu Sandu.’

9. Cipi ocituwa cimue cesanju liespiritu sandu?

⁹ Onepa yimue yepako liespiritu, yeyi okuti, ka li tokoka. Esanju okuti olio ocituwa cimue cepako liaco, ka li sulila ndaño lovitangi. Esanju li sokisiwa locikũla cimue ci pandikisa oku yova ndaño ci kasi pocitumãlo ca tĩla. Omanu valua va Suku voluali, va tala ‘ohali ya lua eci va tambula ondaka lesanju lia va ihiwa lespiritu sandu.’ (1 Va Tes. 1:6) Vakuavo va liyaka lovitangi vialua kuenda uhukũi. Pole, Yehova wa va ĩha unene lekuatiso liespiritu sandu liaye okuti va ‘likolisilako oku enda lepandi kuenda lonjolela.’ (Va Kol. 1:11) Pi ku kasi ono yesanju liaco?

10. Yipi ono yesanju lietu?

¹⁰ Ca litepa ‘lukuasi u pua pua’ woluali lulo lua Satana ceci okuti, ukuasi wespiritu tua siata oku tambula ku Yehova, u kuete esilivilo lia velapo. (1 Tim. 6:17; Mat. 6:19, 20) Eye wa tu ĩha elavoko liesanju ka li pui. Tu kuete esanju omo lioku tiamẽla kocisoko ca vamanji Akristão koluali luosi. Handi vali, esanju lietu li tunda kukamba tu kuete la Suku. Tu kuete ovisimĩlo ndevi via Daviti, una okuti ndaño wa kisikiwa oku kala ndocingendeleyi, wa sivaya Yehova locisungo hati: “Omo ocisola cove ka ci pui ca velapo, okuti omuenyo u sule, oco omela wange u ku sivayaila. Oco hu panduwaila osimbu ñasi lomuenyo.” (Osa. 63:3, 4) Ndaño ceci tu liyaka lovitangi, esanju lioku sivaya Suku li kala vutima wetu.

11. Momo lie ci kuetele esilivilo oku vumba Yehova lesanju?

¹¹ Upostolo Paulu wa vetiya Akristão hati: “Sanjukili vu Ñala olonjanja viosi. Mopia vali siti, Sanjuki.” (Va Fil. 4:4) Momo lie ci kuetele esilivilo Kakristão oku linga upange wa Yehova lesanju? Momo liocitangi Satana a katula catiamẽla kuviali wa Yehova. Satana wa lekisa okuti lomue o vumba Yehova lonjongole yaye yosi. (Yovi 1:9-11) Nda tu vumba Yehova omo lioku tẽlisa ño ocikele caco pole, ka tu kuete esanju, ovilumba vietu viesivayo ka vi sokipo. Omo liaco, tu sukila oku likolisilako oku pokola konumbi yukualosamo wa popia hati: “Vumbi Yehova lesanju. Pitili kokuaye loku imba ovisungo.” (Osa. 100:2) Upange wosi u lingiwa lesanju, kuenda lutima wosi, u sivaya Suku.

12, 13. Nye tu sukila oku linga oco tu yuvule ovisimĩlo ka via sungulukile?

¹² Ndaño muẽle vamanji vana va kasi oku vumba Yehova vokuenda kuanyamo alua, olonjanja vimue va sumua kuenda va liyaka locitangi coku kuata ovisimĩlo via sunguluka. (Va Fil. 2:25-30) Nye ci pondola oku tu kuatisa kapuluvi aco? Elivulu lia va Efeso 5:18, 19 li popia hati: “Yuki espiritu. Livanguisi pokati lolosamo lovisungo viefendelo liespiritu. Imbili Ñala [Yehova] ovisungo lovisikilo lutima wosi.” Tu pondola ndati oku kapako elungulo liaco?

¹³ Eci tu liyaka lovisimĩlo ka via sungulukile, tu sukila oku pinga ekuatiso ku Yehova vohutililo kuenda oku likolisilako oku sokolola ovina vi sivayawa. (Tanga Va Filipoi 4:6-9.) Vamue va limbuka okuti oku yevelela ovisikilo vietu Viusoma ci va kuatisa oku tula utima kuenda oku lava ovisimĩlo viavo. Manji umue ulume wa liyaka lovitangi vio nenela esakalalo kuenda esumuo, ivaluka  hati: “Ndaño nda likutalaila eteke leteke, pole, nda enda oku patekela ovisungo vimue Viusoma. Poku imba ovisungo viaco vioku sivaya Yehova, ci kale lolukandi ale vutima ca ndi kuatisa oku kuata esanju. Handi vali, elivulu Kuata Ukamba Wocili la Yehova, lia sandekiwa votembo yiwa. Vokuenda kunyamo wa kuamamo, nda tanga elivulu liaco olonjanja vivali. Lia kala ndolosimbolua viulela wa wavekiwa kutima wange. Nda kũlĩha okuti Yehova wa sumũlũisa alikolisilo ange.”

“Pandikisa Oku Kala Lombembua”

14. Espiritu sandu lia siata oku kuatisa omanu oku kuata ombembua yipi?

¹⁴ Kolohongele vietu violofeka, vamanji va tunda kovisoko viñi viñi, va siata oku kuata ukamba uwa la vakuavo. Elitokeko liaco li lekisa esanju li sangiwa pokati komanu va Suku koluali luosi. Vakualuali va siata oku komõha calua poku mola ombembua yi sangiwa pokati komanu vana okuti nda va linga ovanyali pole, va ‘likapelako oku likuata omunga yespiritu poku pandikisa oku kala lombembua.’ (Va Efe. 4:3) Elitokeko liaco li tunda kapongoloko va linga komuenyo wavo.

15, 16. (a) Petulu wa kala locituwa cipi, kuenda ocituwa caco co nenela ocitangi cipi? (b) Yehova wa kuatisa ndati Petulu oco a pongolole ocituwa caye?

¹⁵ Oku tokekisa omanu vakuavisoko viñi viñi, ka ca lelukile. Oco tu limbuke ovina tu sukila oku yula okuti tu kuata elitokeko liaco, tu sukila oku kũlĩhĩsa ulandu wupostolo Petulu kocita catete. Ocituwa caye catiamẽla ku Vakualofeka vana ka va seviwile evamba, ca lekisiwa kolondaka viaye eci a popia hati: “Ene muele vu ci cokuti, umue u Yudea oku linala lukualofeka, pamue oku iñila vonjo yaye, ka ci tava. Puãi Suku wa ndekisa okuti  ka ca sungulukile ame oku tukula omunu siti, waño, pamue wa vĩha.” (Ovil. 10:24-29; 11:1-3) Petulu omo lioku kuata ovisimĩlo viomanu vo kotembo yaco, wa simĩle okuti Ocihandeleko ca kisikile oku sola lika va Yudea. Eye wa simĩle okuti oku tenda Vakualofeka ndovanyali vaye, ca sunguluka. b

¹⁶ Sokolola ekatanga Petulu a kuata eci a iñila vonjo ya Korneliu. Anga hẽ, omunu umue okuti kosimbu wa kuatele ovisimĩlo vĩvi la Vakualofeka, ci tava okuti o ‘likuata lavo omunga’ kuenda ‘o kala pokati kavo lombembua’? (Va Efe. 4:3, 16) Oloneke vimue konyima, espiritu lia Suku lia kuatisile Petulu oco a pongolole ocituwa caye kuenda oku yula olonepele a kala lavio. Lekuatiso liocinjonde caco, Yehova wo situluila okuti ocisimĩlo caye coku tenda omanu, ka ci tiamisiwila kekova ale kolofeka. (Ovil. 10:10-15) Omo liaco, Petulu wa sapuila Korneliu hati: “Nda limbuka ocili okuti Suku ka kuete ocame, puãi, volofeka viosi, wosi u sumbila loku linga esunga, u sungulukila.” (Ovil. 10:34, 35) Petulu wa pongolola ocituwa caye, kuenje wa litokeka ‘kongongela ya vamanji koluali luosi.’—1 Pet. 2:17.

17. Elitokeko liomanu va Suku li letiwe ndati?

¹⁷ Ulandu wa petulu u tu kuatisa oku limbuka apongoloko a komõhisa omanu va Suku va kasi oku linga koloneke vilo. (Tanga Isaya 2:3, 4.) Omanu valua va tunda “kolofeka viosi kuenda kapata osi, okuti omanu vakuapata osi kuenda vakualimi osi,” va kasi oku pongolola ovisimĩlo viavo loku “limbuka ndeci ci kasi ocipango ca Suku, okuti ciwa, ca sunguluka, ca pua eko.” (Esit. 7:9; Va Rom. 12:2) Valua pokati kavo va enda oku vetiyiwa lovituwa violuali lulo lua Satana, ndeci, ukuse, esuvu, kuenda olonepele. Pole, omo lielilongiso Liondaka ya Suku kuenda ekuatiso liespiritu sandu, va lilongisa oku ‘kuama ovina vi koka ombembua.’ (Va Rom. 14:19) Kuenje ca nena elitokeko li sivaya Yehova.

18, 19. (a) Ndamupi omunu lomunu pokati ketu a pondola oku kuatisa kombembua kuenda kelitokeko vekongelo? (b) Nye tu ka lilongisa vocipama ci kuãimo?

¹⁸ Ndamupi omunu lomunu pokati ketu a pondola oku kuatisa kombembua kuenda kelitokeko liomanu va Suku? Vakongelo alua mu sangiwa omanu va tunda kolofeka vikuavo. Vamue citava okuti va kuete ovituwa via litepa ale ka va vangula ciwa elimi lietu. Anga hẽ, tua siata oku likolisilako oku va kũlĩha ciwa? Eci oco Ondaka ya Suku yi tu vetiya oku linga. Upostolo Paulu poku sonehela ekongelo lioko Roma, muna mua kala va Yudea kuenda Vakualofeka vana va tava, wa popia hati: “Litambuli pokati ndeci Kristu o tambuli, okuti Suku o muisua ulamba.” (Va Rom. 15:7) Anga hẽ vekongelo liove mu sangiwa umue ove o sukila oku kũlĩha ciwa?

¹⁹ Ocina cipi tu sukila vali oku linga oco espiritu sandu li tu kuatise komuenyo wetu? Ocipama ci kuãimo ci ka tambulula epulilo eli osimbu tu ka lilongisa olonepa vikuavo viepako liespiritu.

[Atosi pombuelo yamẽla]

O Tambulula Ndati

• Ndamupi tu lekisa ocisola ku vamanjetu?

• Momo lie ci kuetele esilivilo oku tẽlisa upange wa Suku lesanju?

• Ndamupi tu pondola oku kuatisa kombembua kuenda kelitokeko vekongelo?

[Apulilo Elilongiso]

[Okakasia kemẽla 21]

“Ava Ovo Akristão Vocili”

Elivulu limue li tukuiwa hati, (Between Resistance and Martyrdom—Jehovah’s Witnesses in the Third Reich), lia tukula ulandu wumalẽhe umue u Yudea wa kala vokayike. Eye wa lombolola ndomo a lisanga onjanja yatete Lolombangi via Yehova eci a pitila kocila colomandekua ko Neuengamme. Eye wa popia hati:

“Eci etu tua Yudea tua tunda ko Dachau tua pitila kocila co ko block, vakuetu va Yudea vana tua sanga, va fetika oku seleka ovina viavo oco va tu limile. . . . Osimbu ka tu eyile [kulo kocila] tua enda oku likuatisa pokati. Pole, kulo kocitangi comuenyo loku fa, omunu lomunu wa sakalala loku li popela eye muẽle kuenda lomue o sokolola ukuavo. Kũlĩhĩsa eci Vakuakulilongisa Embimbiliya va enda oku linga. Kotembo yaco va enda oku talavaya calua koku semũlula alove ovava. Ndaño lombambi yalua, va enda oku pita eteke liosi vovava a talala. Lomue wa kũlĩhĩle ndomo va kala oku pandikisa. Ovo va lombolola okuti Yehova eye tu ĩha ongusu yaco. Ndeci ca pita letu, va sukililevo okulia, momo va kala lonjala. Nye ovo va linga? Va kongola okulia kuosi va kuatele kuenje va ku li tepaila pokati. Pole, onepa yimue va yeca ku vamanjavo va tunda ko Dachau. Va va yolela ciwa lasipulo. Osimbu ka va lile, va enda oku likutilila. Omo liaco, vekuta kuenda va kuata esanju. Ovo va popia hati, ka tu kuete vali onjala. Eci nda mola ovilinga viavo, nda popia lutima wange siti: Ava ovo Akristão vocili.”

[Elitalatu kemẽla 19]

Ove hẽ wa siata oku sanda otembo kovopange akuavo oco o pamise ukamba wove la Yehova?