“Geeshsha Ayyaanaa Aifee” Xoossaa Bonchissees

“Intte daro aifiyaa [aifikko] . . . hegan ta Aawai bonchchettana.”—YOH. 15:8.

1, 2. (a) Harata minttettiyo ayba injjee nuussi deˈii? (b) Yihooway nuuni ayyo oottiyo wode eraa gujjanau maaddiya ayba imotaa immii?

NAAˈˈU hanotata qoppite: Issi Kiristtaaniyaa issi yelaga michiyo qofissidabay deˈiyoogaa akeekaasu. A he micheera haggaazanau hanotaa giigissaasu. Eti issi keettaappe hara keettaa biishin, yelaga michiyaa bana metidabaa iyyo yootiyoogaa doommaasu. Kayma michiyaa wozanappe issi qoppidoogau he yelagiyaa he gallassi Yihoowa woosan galataasu; iyyo koshshidabay hegaa mala maaduwaa. Hara sohuwan, issi azinaynne machiyaa mata wode kare biittan haggaazidi simmidosona. Eti ufayssan asau temokruwaa yootiyo wode, issi yelaga ishay loytti ezggees. Amarida layttappe simmin, i kare biitti biidi haggaazanau giigettiyo wode, he azinaanne machee hanotaa, qassi i misoonaawe gidanaadan denttettida, etaara haasayidobaa qoppiis.

² Ha hanotati intte loˈˈobau denttettido uraa woykko inttena loˈˈobau denttettida uraa hassayanaadan oottennan aggokkona. Asaara issitoo haasayidobi ubbatoo issi ura loˈˈobau denttettennan aggana danddayees; shin ubba galla harata minttettiyo injjee nuussi deˈees. Intte ishantta loytti maaddanaunne Xoossaukka kaseegaappe aaruwan oottanau, intte eraa gujjanaunne intte eeshshaa dichanau maaddiya issibay deˈees giidi qoppite. Hegee keehi ufayssiyaaba gidennee? Yihooway hegaadan maaddiya imotaa, giishin ba geeshsha ayyaanaa immees. (Luq. 11:13) Nu bolli Xoossaa ayyaanay deˈikko, Xoossaayyo oottiyo ooso ubban maaddiya muruta eeshshati nuussi deˈanaadan oottees. Hegee ayba maalaalissiya imotee!—Galaatiyaa 5:22, 23 nabbaba.

3. (a) Nuuni ‘ayyaanaa ayfiyaa’ ayfiyoogee Xoossaa bonchissiyoy ayba ogiyaanee? (b) Nuuni beˈana oyshati awugeetee?

³ Geeshsha ayyaanay ayfiyo eeshshati he ayyaanau Pultto gidida, Xoossaa Yihoowa eeshshaa qonccissiyaageeta. (Qol. 3:9, 10) Yesuusi ba kiittidoogeetuyyo, “Intte daro aifiyaa [aifikko] . . . hegan ta Aawai bonchchettana” giido wode, Kiristtaaneti Xoossaa leemisuwaa kaallanau baaxetana koshshiyo waanna gaasuwaa qonccissiis. * (Yoh. 15:8) Nuuni ‘geeshsha ayyaanaa ayfiyaa’ ayfiyo wode, hegee nuuni haasayiyoobaaninne oottiyooban qoncci beettees; hegee qassi nu Xoossaa bonchissees. (Maa. 5:16) Ayyaanaa ayfee Seexaanaa alamiyaa eeshshaappe dummatiyoy ayba ogiyaanee? Ayyaanaa ayfiyaa waatidi ayfana danddayiyoo? Hegaadan oottiyoogee nuna metana danddayiyoy aybissee? Geeshsha ayyaanaa ayfiyaa macaratuppe heezzata, giishin siiquwaa, ufayssaanne sarotettaa tobbiyo wode he oyshatu zaaruwaa beˈana.

Xoqqa Baaso Siraatan Baasettiya Siiquwaa

4. Yesuusi bana kaalliyaageeti bessanaadan tamaarissido siiqo qommoy awugee?

⁴ Geeshsha ayyaanay ayfiyo siiqoy, ha alamiyan meeze gidida siiqo qommuwaappe keehi dummatees. Waanidi? Hegee xoqqa baaso siraatan baasettees. He dummatettaa Yesuusi Deriyaa Bolla Timirttiyan qonccissiis. (Maatiyoosa 5:43-48 nabbaba.) Nagaranchatikka harati etau loˈˈobaa oottiyo wode, etikka  hegaadan oottanaagaa Yesuusi yootiis. Siiqo giyo hegaa malabay qoncciyoy issi uri ba goˈˈaa aggiyoogaana gidennan, kushiyaa zaariyoogaana. Nuuni ‘saluwan deˈiya nu Aawaa naata gidanau’ koyikko, hegaappe dummabaa oottana bessees. Harati nuna oyqqiyo ogiyan eta oyqqiyoogaappe, Yihooway eta xeelliyoonne oyqqiyo ogiyan nuunikka xeellanaunne oyqqanau koshshees. SHin Yesuusi azazidoogaadan nu morkketa waatidi siiqana danddayiyoo?

5. Nuna yedettiyaageetuyyo siiquwaa waatidi bessana danddayiyoo?

⁵ Geeshsha Maxaafan deˈiya issi leemisuwaa beˈite. PHauloosinne Sillaasee Piliphisiyuusan sabbakiyo wode, asay eta oyqqidi daro wadhiis, qassi qasho keetti gelissidi eta gediyaa mittaara gatti daraxidi qachiis. Qassi qasho keettaa naagiyaageekka eta qohennan aggenna. Biittaa qaattaa gaasuwan eti qoppennan qashuwaappe birshshettido wode, he bitaniyaassi haluwaa kessanau koyidonaa? CHiikka. He bitaniyau wozanappe qoppiyoogee, giishin bantta goˈˈaa agganaadan oottiya siiqoy eti au koshshiyaabaa sohuwaara oottanaadan denttettiis; qasho keettaa naagiyaageenne a soo asay ubbay Kiristtaane gidanaadan maaddidosona. (Oos. 16:19-34) Ha wodiyan deˈiya daro ishatikka hegaadan oottiyoogan ‘banttana yedettiyaageeta anjjoosona.’—Roo. 12:14.

6. Nu goˈˈaa aggiyo siiquwaa nu ishatuyyo bessana danddayiyoy ayba ogiyaanee? (Sinttaa 23n deˈiya saaxiniyaa xeella.)

⁶ Nu mala Kiristtaaneta siiqiyoogee hegaappe aadhiyaabaa gujjees. “Nu ishatu gishshau, nu shemppuwaa aattidi immanau bessees.” (1 Yohaannisa 3:16-18 nabbaba.) Gidikkokka, nuuni guuttabankka darotoo siiquwaa bessana danddayoos. Leemisuwau, nuuni issi ishaa yiilloyiyaabaa haasayidaba woy oottidaba gidikko, nu giddon sarotettay deˈanaadan kasetidi tangguwaa ekkiyoogan siiquwaa bessana danddayoos. (Maa. 5:23, 24) Issi uri nuna yiilloyiyaaba gidikko shin? ‘Atto giyooyye’ woy issi issitoo uluwan lancciyaa oyqqana koyiyoo? (Maz. 86:5) Geeshsha ayyaanay ayfiyo, wozanappe gidida siiqoy guutta balaa aggi aadhanaadan, qassi ‘Yihooway nuuyyo coo atto giidoogaadan’ nuunikka coo atto gaanaadan maaddana danddayees.—Qol. 3:13, 14, NW; 1 PHe. 4:8.

7, 8. (a) Asaa siiqiyoogee Xoossaa siiqiyoogaara gayttidaba gididoy ayba ogiyaanee? (b) Nuuni Yihoowa kaseegaappe aaruwan siiqana danddayiyoy ayba ogiyaanee? (Kaallidi deˈiya misiliyaa beˈa.)

⁷ Nu goˈˈaa aggiyo siiquwaa nu ishatuyyo waatidi bessana danddayiyoo? Xoossaa kaseegaappe aaruwan siiqiyoogaana. (Efi. 5:1, 2; 1 Yoh. 4:9-11, 20, 21) Nuuni demmiyo wodiyaa Geeshsha Maxaafaa nabbabanau, an wotti dentti qoppanaunne woossanau goˈettiyoogee,  nuna minttetteesinne saluwan deˈiya nu Aawaa siiqiyo siiquwaa dichees. Gidikkokka, Xoossaakko shiiqanau wodiyaa bazzana koshshees.

⁸ Leemisuwau, nuuni galla galla issi bazzido saate xallan Xoossaa Qaalaa nabbabanau, an wotti dentti qoppanaunne Yihoowakko woossanau danddayoos giidi qoppoos. Yihoowaara deˈiya dabbotau intte bazzido he wodiyaa aybinne xubbennaadan mishettidi teqqekketii? Nuuni Xoossaakko woossiyoogaa ooninne diggana danddayennaagee qoncce; qassi nuuppe daroti koyido wodiyan Geeshsha Maxaafaa nabbabana danddayoos. SHin nuuni galla galla oottiyo darobay Xoossaara deˈiya dabbotau bazzido wodiyaa goˈettennaadan diggenna mala baaxetiyoogee koshshana danddayees. Yihoowakko shiiqanau intteyyo danddayettida keena ubban galla galla wodiyaa bazzeetii?

‘Geeshsha Ayyaanay Immiyo Ufayssaa’

9. Geeshsha ayyaanay ayfiyo ufayssay qoncciyo ogee aybee?

⁹ Geeshsha ayyaanaa ayfee qonccidi erettiyo hanotaappe issoy laamettennaagaa gidiyoogaa. Nuuni kaallidi tobbana naaˈˈantto macara gidida ufayssay hegaa qonccissiyaaba. Ufayssay iita hanotaanne injjetenna heeraa danddayidi dicciya ataakiltte mala. Saˈa yuushuwan deˈiya, Xoossaa ashkkaratuppe daroti “daro waayettikkokka, Geeshsha Ayyaanai immido ufaissaara kiitaa” ekkidosona. (1 Tas. 1:6) Harata qassi tuggaynne metoy gakkees. Gidikkokka, “ubbaban ufaissan genccanaadaaninne danddayanaadan” Yihooway ba geeshsha ayyaanaa etau immees. (Qol. 1:11) He ufayssau pulttoy aybee?

10. Nu ufayssau pulttoy aybee?

¹⁰ Seexaanaa alamiyan deˈiya ‘aadhiya duretettaappe’ dumma ogiyan, Yihooway immiyo duretettay merinau deˈiyaaba. (1 Xim. 6:17; Maa. 6:19, 20) I nuuyyo merinau xayenna ufayssiya hidootaa immiis. Nuuni alame yuusho Kiristtaane ishatu maabaraa yame gidiyoogan ufayttoos. Ubbaappe aaruwan nu ufayssay baasettidoy Xoossaara deˈiya dabbotaana. Daawiti asa biittan betidi deˈidaba gidikkonne, kaallidi deˈiyaagaadan giidi yexxidoogaadan gaana danddayoos: “Aggenna ne siiqoi de7uwaappe lo77iyo gishshau, ta inxxarssai nena bonchchana. Ta de7uwaa laittan taani nena galatana.” (Maz. 63:3, 4) Nuna metoy gakkiyaaba gidikkokka, ufayssan Xoossaa galatiyoogee nu wozanay keehippe ufayttanaadan oottees.

11. Ufayssan Yihoowayyo oottiyoogee koshshiyaaba gididoy aybissee?

¹¹ Kiitettida PHauloosi Kiristtaaneta, “Godaara intte de7iyo de7uwan ubba wode ufaittite; taani hagaa gujjadakka gais; ufaittite” yaagidi zoriis. (Pili. 4:4) Kiristtaaneti Yihoowa oosuwaa ufayssan oottiyoogee koshshiyaaba gididoy aybissee? Yihooway haariyo maataa xeelliyaagan Seexaanay denttido oyshaara gayttidaba gidiyo gishshataassa. Seexaanay ooninne Xoossaayyo wozanappe koyidi oottennaagaa yootiis. (Iyy. 1:9-11) Yihoowa oosuwaa ufayttennan oottiyaaba gidikko, nuuni shiishshiyo galataa yarshshoy kumetta gidenna. Yaatiyo gishshau, mazamuraawee, “GODAAYYO ufaissan goinnite; ufaissa yettaara a sintti shiiqite” yaagido zoriyaa oosuwan peeshshanau baaxetoos. (Maz. 100:2) Ufayssan, wozanappe koyidi oottiyo oosoy Xoossaa bonchissees.

12, 13. Iita qofaa xoonanau ay oottana danddayiyoo?

¹² SHin Yihoowayyo wozanappe oottiyaageetikka, issi issitoo hidootaa qanxxiyoogaappe denddidaagan loˈˈo xeelaa oyqqidi deˈanau baaxetiyo wodee deˈana danddayees. (Pili. 2:25-30) Hegaa mala wodetun nuna aybi maaddana danddayii? Efisoona 5:18, 19y hagaadan gees: “Inttenan Geeshsha Ayyaanai [kumo] . . . Mazamuriyaa yettan, galatiiddi yexxiyoogaaninne ayyaana yettan issoi issuwaara haasayite; qassi galatiyo yettaaninne mazamuriyaa yexxiyoogan intte wozanan Godaa galatiiddi yexxite.” Nuuni ha zoriyaa waatidi oosuwan peeshshana danddayiyoo?

¹³ Nuuni iitabaa qoppiyo wode, Yihoowakko mintti woossanaunne loˈˈobaa qoppanau baaxetana danddayoos. (Piliphphisiyuusa 4:6-9 nabbaba.) Issoti issoti Kawotettaa mazamuriyaa dooyidi, cenggurssaa xoqqu oottennan  yexxiyoogee eta ayyaanaa woppissidoogaanne eti loˈˈobaa qoppanaadan maaddidoogaa akeekidosona. Darotoo hidootaa qanxxanaadaaninne unˈˈettanaadan oottida metoy gakkido issi ishay hagaadan giis: “Ubbatoo wozanappe woossiyoogaa bolli amarida Kawotettaa mazamureta hassayaas. Yihoowa sabbanau yexxiyo ha ufayssiyaa mazamureta cenggurssaa xoqqu oottada yexxiyoogaa gidin, cenggurssaa sissennan yexxiyoogeekka ta wozanau sarotettaa immiis. Qassi Yihoowakko SHiiqite giya maxaafay he wode kiyiis. Hegaappe kaalliya layttan he maxaafaa naaˈˈutoo nabbabaas. Hegee ta wozanau looxigissiya zayte mala gidiis. Yihooway taani oottidobaa anjjidoogaa erays.”

‘Issippe Gatti Qachiya Sarotettaa’

14. Geeshsha ayyaanay ayfiyo sarotettay qoncciyo ogetuppe issoy aybee?

¹⁴ Daro biittaappe yiyaageeti shiiqiyo awuraajjaa shiiquwan, dumma dumma wogan diccida, daro qommo Kiristtaaneti bantta ishatuuranne michotuura deˈiya issippetettan ufayttoosona. He hanotay Xoossaa asay ha wodiyan demmiyo sarotettaa, gishin alame yuushuwan deˈiya nu issippetettaa qonccissees. Asay, issoy issuwaara morkke gidana bessees giidi qoppiyoogeeti ‘issippe gatti qachchiya sarotettan, geeshsha ayyaanay immiyo issippetettaa naaganau minnidoogaa’ beˈiyo wode keehi garamettees. (Efi. 4:3) Daroti ha issippetettaa gishshau aggana koshshidobaa qoppiyo wode, hegee tumuppe garamissiyaaba.

15, 16. (a) PHeexiroosi ay mala hanotan diccidee, qassi hegee a waatidi metidee? (b) PHeexiroosi ba xeelaa laammanaadan Yihooway waatidi maaddidee?

¹⁵ Dumma dumma wogan diccida asay issippetettaa medhanaadan oottiyoogee metiyaaba. Hegaa mala issippetettau ay oottana bessiyaakko akeekanau maaddanaadan, koyro xeetu layttan deˈida, kiitettida PHeexiroosa hanotaa ane beˈoos. Ayhuda gidenna qaxxarettibeenna  asaa xeelliyaagan a xeelay aybakko kaallidi deˈiya qaalaappe akeekana danddayoos: “Aihuda asi hara zariyaara issippetettan de7anau, woi gaittanau woga gidennaagaa intte huuphen ereeta; shin taani oonanne tuna woi sheneyiyaabaa geenna mala, Xoossai tana bessiis.” (Oos. 10:24-29; 11:1-3) He wode meeze gidida xeelaadan, PHeexiroosi ba mala Ayhudatu xallaa siiqanaadan Higgee azaziyoobadan ammanidi diccidaba milatees. I Ayhuda gidenna asaa morkkedan xeelliyoogee bessiyaabadan qoppidaba milatees. *

¹⁶ PHeexiroosi Qornneliyoosa soo geliyo wode bessennabaa oottidabadan awu siyettana danddayiyoogaa qoppite. Hegaappe kase Ayhuda gidenna asaa iita ogiyan xeelliya PHeexiroosi “issippe gatti qachchiya sarotettan” etaara ‘issippe ohettanau’ danddayii? (Efi. 4:3, 16) PHeexiroosi ba xeelaa laammanaadaaninne asa ixxiyoogaa agganaadan guutta gallassappe kase Xoossay ba geeshsha ayyaanaa baggaara a wozanaa dooyiyoogan maaddiis. Xoossay asaa zariyaa woy biittaa xeellennaagaa, i beˈido ajjuutan Yihooway qonccissiis. (Oos. 10:10-15) PHeexiroosi Qornneliyoosassi, “Xoossai asa som77o xeellenna; shin dere ubban baassi yayyiyaagaanne xillo ooso oottiyaagaa galatiyoogaa taani tumu akeekaas” yaagidoy hegaassa. (Oos. 10:34, 35) PHeexiroosi laamettiis; qassi alame yuushuwan deˈiya ‘ishanttu’ maabaraara issippetettaa medhiis.—1 PHe. 2:17.

17. Xoossaa asay demmido issippetettay maalaaliyaaba gidiyoy aybissee?

¹⁷ PHeexiroosa gakkidabay, ha wodiyan Xoossaa asay maalaaliya hanotan laamettiiddi deˈiyoogaa nuuni akeekanaadan maaddees. (Isiyaasa 2:3, 4 nabbaba.) “Zare ubbaappe, qommo ubbaappe, yara ubbaappenne dumma dumma biitta qaala ubbaappe” yiida miilooniyan qoodettiya asay “Xoossai koyiyoobi, lo77obi, a ufaissiyaabinne qassi kumettabi aibakko” eridi hegaara mogganau bantta qofaa laammidosona. (Ajj. 7:9; Roo. 12:2) He asatuppe daroti issi wode, Seexaanaa alamiyan deˈiya hanotaadan ixxiyaageeta, morkkiyaageetanne shaahettiyaageeta. SHin eti Xoossaa Qaalaa xannaˈiyoogaaninne geeshsha ayyaanaa maaduwan ‘sarotetta ehiyaabaa koyiyoogaa’ tamaaridosona. (Roo. 14:19) Yaatiyoogan demmiyo issippetettay Xoossaa bonchissees.

18, 19. (a) Gubaaˈe giddon deˈiya sarotettaunne issippetettau nuuni ubbay ay oottana danddayiyoo? (b) Kaalliya huuphe yohuwan ay beˈanee?

¹⁸ Xoossaa asaa giddon deˈiya sarotettaunne issippetettau nuuni ubbay ay oottana danddayiyoo? Daro gubaaˈetun hara biittaappe yiida asati deˈoosona. Issotu issotussi nuugaappe dumma wogay deˈana danddayees; woy eti nu qaalaa loyttidi haasayennan aggana danddayoosona. Etaara erettanau baaxetiyoo? Hegee Xoossaa Qaalay minttettiyooba. Ayhudatinne Ayhuda gidennaageeti deˈiyo Roomen deˈiya gubaaˈiyau PHauloosi, “Kiristtoosi inttena mokkidoogaadan, Xoossaa bonchchuwau issoi issuwaa mokkite” yaagidi xaafiis. (Roo. 15:7) Intte loyttidi eranau koshshiyo uri intte gubaaˈiyan deˈii?

¹⁹ Geeshsha ayyaanay nu bolli deˈanaadan harabaa ay oottana danddayiyoo? Geeshsha ayyaanaa ayfiyaa macaratuppe attida harata tobbiyo wode, kaalliya huuphe yohuwan ha oyshaa zaaruwaa beˈana.

[Tohossa qofata]

Woygada Zaaruutii?

• Nu ishatuyyo nu goˈˈaa aggiyo siiquwaa waatidi bessana danddayiyoo?

• Nuuni Xoossaa oosuwaa ufayssan oottana koshshiyoy aybissee?

• Gubaaˈe giddon deˈiya sarotettaunne issippetettau nuuni ay oottana danddayiyoo?

[Oyshata]

[Sinttaa 23n deʼiya saxiniyaa]

“Hageeti Tumu Kiristtaaneta”

Issi yelaga Ayhuday oyqettidi, Niyungame giyo kamppiyaa qashuwau yiido wode, Yihoowa Markkatuura gayttido koyro wodiyaa xeelliyaagan yootidobaa, Bitwin Rizisttans end Martridem—Jihovas Witneses in zi Serd Rayk geetettiya maxaafay hagaadan qonccissiis:

“Nuuni Ayhudati Daaka giyo katamaappe kamppiyaa yiido wode, nuuyyo immenna mala hara Ayhudati banttau deˈiya ubbabaa qottiyoogaa doommidosona. . . . Nuuni [kamppiyaa gelanaappe kase] issoy issuwaa maaddoos. SHin hayquwaappenne paxaappe gidduwan deˈiyo ha sohuwan, ubbay harata aggi bayidi, ba xallaa ashshanau qoppees. SHin Geeshsha Maxaafaa Tamaareti oottidobaa qoppa. He wode, eti moorettida bombbaa giigissanau minni oottana koshshiis. He wode keehi meeggiyaaba gidikkokka, eti shchaadan irxxiya haattan eqqidi oottiiddi peˈidosona. Eti hegaa waani genccidaakko akeekiday baawa. Eti banttana Yihooway minttettidoogaa yootidosona. Eti namisettido gishshau, nuugaadan miyoobaa keehippe koyidosona. SHin eti ay oottidonaa? Eti bantta qumaa ubbaa shiishshidoogaappe baggaa banttau shaakkidi, baggaa Daakappe biron yiida bantta mala Kiristtaanetuyyo immidosona. Eta mokki ekkidi, yerettidosona. Qumaa maanaappe kase woossidosona. Hegaappe simmin, eti ubbay ufayttidosona. Eti namisay aggiis giidosona. Taani, hageeti tumu Kiristtaaneta gaada qoppidoy he wode.”

[Sinttaa 21n deʼiya misiliyaa qonccissuwaa]

Yihoowakko shiiqanau hara oosuwaappe galla galla wodiyaa poxxeetii?