“An Bunga han Espiritu” Naghihimaya ha Dios
“An Bunga han Espiritu” Naghihimaya ha Dios
“Dida hini an akon Amay paghimayaon, nga kamo nanmumunga hin damu nga mga bunga.”—JUAN 15:8.
1, 2. (a) Ano an aton mga higayon ha pagdasig ha iba? (b) Ano nga regalo tikang kan Jehova an nagpapauswag han aton abilidad nga mag-alagad ha iya?
TAGDA an duha nga kahimtang: Naobserbaran han usa nga bugto nga babaye nga an usa nga iya kakongregasyon nga batan-on nga babaye baga hin may nababarak-an. Nakigsabot hiya nga mag-upod hira ha ministeryo. Ha ira pag-istorya samtang napakadto ha sunod nga balay, iginsumat han batan-on an iya nababarak-an. Ha urhi hito nga adlaw han nag-aampo na an batan-on, nagpasalamat hiya kan Jehova han gugma nga iginpakita ha iya han hamtong nga bugto. Ito gud an iya ginkikinahanglan. Ha lain nga lugar, usa nga mag-asawa an binalik pa la tikang ha ira toka ha iba nga nasud. Ha usa nga pagturotarampo, samtang malipayon nga gin-iistorya nira an ira mga eksperyensya, may batan-on nga bugto nga lalaki nga nagpipinamati la. Paglabay hin pipira ka tuig, samtang ini nga batan-on nag-aandam pagkadto ha iya toka ha iba nga nasud, nahunahuna niya ito nga mag-asawa ngan an ira gin-istorya nga nakaaghat ha iya nga maghingyap nga magin misyonero.
2 Ito nga mga kahimtang bangin magpahinumdom ha imo han usa nga bugto nga nagkaada maopay nga epekto ha imo kinabuhi o han usa nga imo nabuligan. Syempre, talagsa la nga an usa nga pag-istorya nakakapabag-o han kinabuhi, kondi kada adlaw may higayon kita nga dasigon ngan parig-unon an iba. Hunahunaa nga may usa nga butang nga makakabulig ha pagpauswag han imo abilidad ngan mga kalidad basi mas makagserbi ka ha kabugtoan ngan mas magagamit ka han Dios. Diri ba makalilipay gud ito? Ha pagkamatuod, gintatagan kita ni Jehova hin sugad hito nga regalo—an iya baraan nga espiritu. (Luk. 11:13) Samtang nagios ha aton kinabuhi an espiritu han Dios, nabulig ito ha aton nga magkaada mag-opay nga kalidad nga nagpapauswag han ngatanan nga bahin han aton pag-alagad ha Dios. Makalilipay gud ito nga regalo!—Basaha an Galasia 5:22, 23.
3. (a) Paonan-o an aton pagkultibar han ‘bunga han espiritu’ naghihimaya ha Dios? (b) Ano nga mga pakiana an aton hihisgotan?
3 An mga kalidad nga iginbubunga han baraan nga espiritu nagpapakita han personalidad mismo han gintikangan hito, hi Jehova nga Dios. (Kol. 3:9, 10) Gin-unabi ni Jesus an pinakaimportante nga hinungdan nga kinahanglan mangalimbasog an mga Kristiano nga subaron an Dios han hiya nagsiring ha iya mga apostol: “Dida hini an akon Amay paghimayaon, nga kamo nanmumunga hin damu nga mga bunga.” * (Juan 15:8) Samtang ginkukultibar naton ‘an bunga han espiritu,’ an mga resulta hito makikita ha aton pagyakan ngan mga buhat, ngan maghahatag ito hin kadayawan ha aton Dios. (Mat. 5:16) Ano an kaibahan han bunga han espiritu ha mga kinaiya han kalibotan ni Satanas? Paonan-o naton makukultibar an bunga han espiritu? Kay ano nga bangin makurian kita pagbuhat hito? Babatunon naton ini samtang aton ginhihisgotan an siyahan nga tulo nga bahin han bunga han espiritu—an gugma, kalipay, ngan kamurayawan.
Gugma nga Iginbasar ha Mas Hitaas nga Prinsipyo
4. Ano nga klase hin gugma an igintutdo ni Jesus nga sadang ipakita han iya mga sumurunod?
4 An gugma nga iginbubunga han baraan nga espiritu naiiba gud ha klase han gugma nga komon ha kalibotan. Kay ano? Tungod kay iginbasar ito ha mas hitaas nga prinsipyo. Ini nga kaibahan ginpabug-atan ni Jesus ha Sermon ha Bukid. (Basaha an Mateo 5:43-48.) Hiya nagsiring nga bisan an magpakasasala maopay magtratar ha mga tawo nga maopay liwat ha ira. Ito nga “gugma” waray tinuod nga pagsakripisyo kondi pagbalyoay la hin pabor. Kon karuyag naton ‘magin anak han aton Amay nga adto ha langit,’ kinahanglan iba kita. Imbes nga trataron an iba sugad han pagtratar nira ha aton, sadang naton subaron an panhunahuna ngan pagtratar ni Jehova ha ira. Kondi paonan-o naton hihigugmaon an aton mga kaaway, sugad han iginsugo ni Jesus?
5. Paonan-o naton maipapakita an gugma ha mga nagtitimaraot ha aton?
5 Tagda an usa nga ehemplo ha Biblia. Samtang hira Pablo ngan Silas nagsasangyaw ha Filipos, gindakop hira, ginkastigo, ngan ginpriso, nga an ira mga tiil iginbutang ha pandugan. Samtang priso, bangin ginmaltrato liwat hira han gwardya han prisohan. Han diri ginlalaoman nga makakagawas na hira tungod han linog, nalipay ba hira paghunahuna nga makakabulos na hira? Waray. An sinsero nga paghunahuna ha iya kaopayan—an ira gugma nga may pagsakripisyo—nakaaghat ha ira nga gumios dayon para ha iya, ngan tungod hito hiya ngan an iya bug-os nga panimalay nagin mga tumuroo. (Buh. 16:19-34) Yana, damu liwat nga kabugtoan an ‘nagbibendisyon ha mga nagtitimaraot ha ira.’—Roma 12:14.
6. Ha ano nga mga paagi naton maipapakita ha aton kabugtoan an gugma nga may pagsakripisyo? (Kitaa an kahon ha pahina 21.)
6 Labaw pa hito an aton gugma ha kabugtoan. “Kinahanglan man nga aton ighatag an aton mga kinabuhi tungod ha aton mga kabugtoan.” (Basaha an 1 Juan 3:16-18.) Kondi kasagaran na nga maipapakita naton an gugma ha gudtiay nga paagi. Pananglitan, kon may nayakan kita nga nakapasubo ha usa nga bugto, maipapakita naton an gugma pinaagi ha pag-una ha pakigmurayaw. (Mat. 5:23, 24) Ano man kon kita an napasubo? “Andam [ba kita] ha pagpasaylo,” o usahay may tendensya kita nga magdumot? (Sal. 86:5) An daku nga gugma nga iginbubunga han baraan nga espiritu makakabulig ha aton nga tabonan an gudti nga sayop ngan magin andam ha pagpasaylo ha iba “sugad nga an Ginoo nagpasaylo” ha aton.—Kol. 3:13, 14; 1 Ped. 4:8.
7, 8. (a) Paonan-o an gugma ha Dios nakakaapekto han aton gugma ha mga tawo? (b) Paonan-o naton mapapahilarom an aton gugma kan Jehova? (Kitaa an retrato ha ubos.)
7 Paonan-o naton makukultibar an may pagsakripisyo nga gugma ha aton kabugtoan? Pinaagi ha pagpahilarom han aton gugma ha Dios. (Efe. 5:1, 2; 1 Juan 4:9-11, 20, 21) An panahon nga aton igin-gagahin para kan Jehova ha pagbasa han Biblia, pamalandong, ngan pag-ampo nagdadasig ha aton ngan nagpapahilarom han aton gugma ha aton langitnon nga Amay. Kondi kinahanglan talinguhaon gud naton nga magkaada panahon nga magin duok ha Dios.
8 Ha pag-ilustrar: Hunahunaa nga may-ada la espisipiko nga oras kada adlaw nga puydi ka magbasa han Pulong han Dios, mamalandong, ngan mag-ampo kan Jehova. Diri ba tatalinguhaon mo gud nga waray makaulang ha imo panahon para ha iya? Syempre, waray bisan hin-o nga makakapugong ha aton nga mag-ampo ha Dios, ngan kadam-an ha aton an makakabasa han Biblia bisan san-o. Kondi bangin kinahanglan maghimo kita hin mga paagi basi an damu nga buruhaton kada adlaw diri makaulang ha panahon nga aton igin-gagahin para ha Dios. Nangangalimbasog ka gud ba nga maggahin han pinakadaku nga panahon nga imo maihahatag kada adlaw basi magin duok kan Jehova?
“Kalipay ha Espiritu”
9. Ano an usa nga kalidad han kalipay nga bahin han bunga han baraan nga espiritu?
9 Usa nga makatirigamnan nga kalidad han bunga han espiritu amo an karig-on. Iginpapakita ini han ikaduha nga bahin han bunga han espiritu nga aton hihisgotan, an kalipay. An kalipay pariho hin tanom nga nabubuhi bisan ha lugar nga baga hin diri mabubuhian hin tanom. Ha bug-os nga tuna, damu nga alagad han Dios an ‘nagkarawat han pulong ha daku nga kagol-anan nga may kalipay ha espiritu.’ (1 Tes. 1:6) Damu an nagkukuri. Kondi gintagan hira ni Jehova hin gahum pinaagi han iya espiritu basi ‘makailob ngan makaantos nga may kalipay.’ (Kol. 1:11) Diin tikang ini nga kalipay?
10. Diin tikang an aton kalipay?
10 An ‘diri marig-on nga mga bahandi’ ha kalibotan ni Satanas temporaryo la, kondi an espirituwal nga mga bahandi nga iginhahatag ni Jehova ha aton mapulsanon ha kadayonan. (1 Tim. 6:17; Mat. 6:19, 20) Igintatanyag niya ha aton an makalilipay nga paglaom nga mabuhi ha waray kataposan. Malipayon kita nga bahin kita han bug-os-kalibotan nga Kristiano nga pagminagburugto. Labaw ha ngatanan, an aton kalipay iginbasar ha aton relasyon ha Dios. Inaabat naton an pariho han inabat ni David nga bisan kon napiritan pagkinabuhi sugad nga puga, gindayaw niya hi Jehova pinaagi hin kanta, nasiring: “Tungod kay an imo mahigugmaon nga kalooy mamaopay pa han kinabuhi, an akon mga im-im magdadayaw ha imo. Salit pagbubulahanon ko ikaw samtang nga nabubuhi pa ako.” (Sal. 63:3, 4) Bisan ha panahon nga nagkukuri, malipayon kita nga nagdadayaw ha Dios.
11. Kay ano nga importante nga magmalipayon kita ha pag-alagad kan Jehova?
11 Hi apostol Pablo nag-aghat ha mga Kristiano: “Magkalipay kamo gihapon ha Ginoo: liwat masiring ako, Magkalipay kamo.” (Fil. 4:4) Kay ano nga importante nga magmalipayon an mga Kristiano ha pag-alagad kan Jehova? Tungod han isyu nga iginbangon ni Satanas may kalabotan ha pagkasoberano ni Jehova. Hi Satanas nasiring nga waray kinaburut-on nga nag-aalagad ha Dios. (Job 1:9-11) Kon mag-aalagad kita kan Jehova tungod la kay obligasyon naton ito pero diri kita malipayon, diri magigin bug-os an aton halad han pagdayaw. Salit nangangalimbasog kita nga sundon an igin-aghat han salmista: “Pag-alagad upod an kalipay kan Jehova: sulod ha iya atubangan upod an pagkanta.” (Sal. 100:2) An malipayon ngan kinaburut-on nga pag-alagad naghihimaya ha Dios.
12, 13. Ano an aton puydi buhaton basi maatohan an negatibo nga mga pagbati?
12 Kondi natural la nga bisan an maunungon nga mga alagad ni Jehova usahay nanluluya ngan nakukurian pagpabilin nga positibo. (Fil. 2:25-30) Hito nga mga panahon, ano an makakabulig ha aton? An Efeso 5:18, 19 nasiring: ‘Mapuno kamo ha espiritu, pinaagi ha mga salmos ngan mga karantahon ngan mga pagkanta nga espirituhanon, nga magkanta ngan maghimo hin musika ha iyo mga kasingkasing ha Ginoo.’ Paonan-o naton ini bubuhaton?
13 Kon nagkakaada kita negatibo nga mga pagbati, puydi kita makimalooy kan Jehova ha pag-ampo ngan mangalimbasog nga pamalandungon an darayawon nga mga butang. (Basaha an Filipos 4:6-9.) Para ha iba, an pagdungan ha mga recording han aton mga karantahon ha Ginhadian nakakaliaw ngan nakakabulig ha ira nga magin positibo. Usa nga bugto nga agsob masubo ngan manluya tungod han duro nga problema an nagsiring: “Labot la ha regular ngan kinasingkasing nga pag-ampo, nagmemorya ako hin pipira nga karantahon ha Ginhadian. Kon ginkakanta ko inin makaruruyag nga mga pagdayaw kan Jehova, ha daku man nga tingog o ha akon la hunahuna, nagigin murayaw an akon kasingkasing. Hito liwat nga panahon iginpagowa an libro nga Magin Duok kan Jehova. Duha ka beses ko ito ginbasa han sumunod nga tuig. Sugad ito hin nakakarelaks nga panhaplas ha akon kasingkasing. Maaram ako nga ginbendisyonan ni Jehova an akon pangalimbasog.”
An Kamurayawan nga Nag-uurosa ha Aton
14. Ano an usa nga makatirigamnan nga bahin han kamurayawan nga iginbubunga han baraan nga espiritu?
14 Ha aton internasyonal nga mga kombensyon, malipayon nga nagkakatarampo an mga delegado nga iba-iba an gintikangan. Hito nga mga higayon nakikita an usa nga bahin han kamurayawan nga napapahimulsan han katawohan han Dios yana, an aton pagkaurosa ha bug-os nga kalibotan. Agsob nga damu an nahipapausa kon ira nakikita nga an mga tawo nga ira ginhuhunahuna nga magkaaway ‘nagtitinguha ha pagbantay ha pagkaurosa han espiritu ha gapos han kamurayawan.’ (Efe. 4:3) Makatirigamnan gud ini nga pagkaurosa kon aton tatagdon an ginpangalimbasogan nga malamposan han damu ha ira.
15, 16. (a) Ano an kultura nga gintikangan ni Pedro, ngan kay ano nga nagin problema niya ito? (b) Paonan-o ginbuligan ni Jehova hi Pedro nga bag-uhon an iya panhunahuna?
15 Diri masayon pag-urusahon an katawohan nga iba-iba an gintikangan. Basi masabtan kon ano an kinahanglan malamposan basi magkaurosa, aton hisgotan an usa nga ehemplo ha siyahan nga siglo, hi apostol Pedro. An iya pagtagad ha diri-turi nga mga Hentil masasabtan hini nga iya ginsiring: “Kamo ngahaw maaram nga diri angay ha usa nga Judio an pagtampo, o pagtig-ob ha usa nga dumuruong, kondi an Dios nagpahayag ha akon, nga diri ako mangaran ha usa ka tawo nga malamiri ngan bastos.” (Buh. 10:24-29; 11:1-3) Posible nga nagdaku hi Pedro nga naghuhunahuna nga igin-oobligar han Balaud nga higugmaon an igkasi-Judio la, nga amo an panhunahuna han kadam-an hito nga panahon. Salit bangin normal gud la ha iya nga hunahunaon nga an mga Hentil mga kaaway nga sadang kangalasan. *
16 Handurawa la an inabat ni Pedro samtang nasulod hiya ha balay ni Cornelio. Sigurado nga diri gud hiya komportable. Posible ba nga an usa nga hadto negatibo an panhunahuna ha mga Hentil makig-urosa ha ira ha bugkos han kamurayawan? (Efe. 4:3, 16) Oo, kay pipira la ka adlaw antes hito, an espiritu han Dios binulig kan Pedro nga bag-uhon an iya panhunahuna ngan diri na magpasulabi. Pinaagi hin bisyon, iginpatin-aw ni Jehova kan Pedro nga an Iya pagtagad ha mga tawo diri nadepende ha kolor han panit o nasyonalidad. (Buh. 10:10-15) Salit nakasiring hi Pedro kan Cornelio: “Matuod, akon nakita nga an Dios waray ginpasulabi han mga tawo; kondi tikang ha ngatanan nga mga nasud hiya nga nahadlok ha iya, ngan nagbubuhat hin matadong, naruruyagan niya.” (Buh. 10:34, 35) Nagbag-o hi Pedro ngan nakig-urosa ha ngatanan nga kabugtoan.—1 Ped. 2:17.
17. Kay ano nga makatirigamnan an pagkaurosa han katawohan han Dios?
17 An eksperyensya ni Pedro nabulig ha aton nga masabtan an daku nga pagbag-o nga nahitatabo ha katawohan han Dios yana. (Basaha an Isaias 2:3, 4.) Minilyon “tikang ha tagsa-tagsa nga nasud ngan ha ngatanan nga mga panon, ngan mga katawohan ngan mga yinaknan” an nagbag-o han ira panhunahuna basi ipahiuyon ha “maopay ngan karuruyagon ngan hingpit nga kaburut-on han Dios.” (Pah. 7:9; Roma 12:2) Damu ha ira an hadto naimpluwensyahan han pagdumot, araway, ngan pagkabahin-bahin nga kalyap ha kalibotan ni Satanas. Kondi pinaagi ha pag-aram han Pulong han Dios ngan bulig han baraan nga espiritu, nahibaro hira nga ‘ipadayon an mga butang nga nakakahimo hin kamurayawan.’ (Roma 14:19) An pagkaurosa nga resulta hito nagdadayaw ha Dios.
18, 19. (a) Paonan-o an tagsa ha aton makakabulig nga magin mamurayawon ngan nagkakaurosa an kongregasyon? (b) Ano an aton hihisgotan ha sunod nga artikulo?
18 Paonan-o an tagsa ha aton makakabulig nga magin mamurayawon ngan nagkakaurosa an katawohan han Dios? Ha damu nga kongregasyon may kabugtoan nga taga-iba nga nasud. An pipira ha ira bangin iba an kultura o diri nakakayakan hin maopay han aton linggwahe. Nangangalimbasog ba kita nga makilala hira? An Pulong han Dios nag-aaghat ha aton nga buhaton ini. Hi Pablo nagsiring ha kongregasyon ha Roma, nga may Judio ngan Hentil nga kabugtoan: “Maghikarokarawat kamo an usa ha usa, sugad han pagkarawat man ni Kristo ha iyo, tungod ha kahimayaan han Dios.” (Roma 15:7) May kakongregasyon ka ba nga puydi mo pangalimbasogan nga mas makilala?
19 Ano pa an aton mahihimo basi gumios an baraan nga espiritu ha aton kinabuhi? Ini nga pakiana babatunon ha sunod nga artikulo samtang aton ginhihisgotan an iba pa nga bahin han bunga han espiritu.
[Mga footnote]
^ par. 3 An bunga nga gin-unabi ni Jesus nag-uupod han ‘bunga han espiritu’ ngan han “bunga han mga im-im” nga iginhahalad han mga Kristiano ha Dios pinaagi han pagsangyaw han Ginhadian.—Heb. 13:15.
^ par. 15 An Lebitiko 19:18 nasiring: “Diri ka bumulos, bisan ha pagdumot patok han mga anak han imo katawohan; kondi higugmaon mo an imo igkasi-tawo sugad ha imo ngahaw.” An Judio nga mga lider han relihiyon natoo nga an “mga anak han imo katawohan” ngan an “imo igkasi-tawo” nagtutudlok ha mga Judio la. Gin-obligar han Balaud nga an mga Israelita magpabilin nga bulag ha iba nga nasud. Pero waray iaghat hito an panhunahuna nga igintutdo han mga lider han relihiyon ha siyahan nga siglo nga an ngatanan nga diri Judio mga kaaway ngan sadang kangalasan.
Ano an Imo Baton?
• Paonan-o naton maipapakita ha aton kabugtoan an gugma nga may pagsakripisyo?
• Kay ano nga importante nga magmalipayon kita ha pag-alagad ha Dios?
• Paonan-o kita makakabulig nga magin mamurayawon ngan nagkakaurosa an kongregasyon?
[Mga Pakiana]
[Kahon ha pahina 21]
“Hira an Tinuod nga mga Kristiano”
Ha libro nga Between Resistance and Martyrdom—Jehovah’s Witnesses in the Third Reich, mababasa an ginsiring han usa nga batan-on nga Judio nga priso, diin iya iginsaysay an nahitabo han siyahan nga nakilala niya an mga Saksi ni Jehova pag-abot niya ha Neuengamme nga kampo konsentrasyon:
“Pag-abot gud namon nga mga Judio tikang ha Dachau, gintago han iba nga Judio an ngatanan nira nga gamit kay nadiri hira pagpahuram ha amon. . . . Ha gawas [han kampo konsentrasyon], nagbuburublig kami. Pero dinhi nga namimeligro an amon kinabuhi, an pinakaimportante ha kada tagsa amo an pagtalwas han iya kalugaringon, ngan waray hiya labot ha iba. Kondi hunahunaa an ginbubuhat han mga Estudyante han Biblia. Hito nga panahon, kinahanglan magtrabaho hira hin maduruto ha pag-ayad hin mga tubo han tubig. Mahagkot ngan magkulop nga nakababad hira ha matugnaw hinduro nga tubig. Waray maaram kon kay ano nga naiilob nira ito. Siring nira nga hi Jehova an naghahatag ha ira hin kusog. Pariho ha amon, kinahanglan gud nira an ira tinapay, tungod kay ginugutom hira. Kondi ano an ira ginbubuhat? Gintitirok nira an ngatanan nira nga tinapay, ginkakaon an katunga hito, ngan an katunga iginhahatag ha ira mga igkasi-tumuroo nga pag-aabot pa la tikang ha Dachau. Ngan ira gin-aabiabi ngan ginhaharokan hira. Antes hira kumaon, nag-aampo hira. Katapos hito, hira ngatanan kontento ngan malipayon. Siring nira nga diri na hira ginugutom. Tungod hito, nakasiring ako: Hira an tinuod nga mga Kristiano.”
[Mga Retrato ha pahina 19]
Gin-iibanan mo ba an panahon ha iba nga buruhaton kada adlaw basi magin duok kan Jehova?
