Ca guenda ni rudii espíritu rusisaca cani Dios
Ca guenda ni rudii espíritu rusisaca cani Dios
«Zusisaca tu Bixhoze pa iree ndu ni cayuni tu lu xhiiñaʼ, ne zacá zahuinni xpinne laatu.» (JUAN 15:8)
1, 2. 1) Ximodo zanda uguʼnu gana xcaadxi xpinni Cristu. 2) Xi cudii Jiobá laanu para gúninu xhiiñaʼ jma jneza.
GUXUÍʼLUNU ndiʼ. Ti gunaa xpinni Cristu bidiibe cuenta nuu xiixa ni naguu xizaa ti dxaapahuiiniʼ ni ridagulisaanebe ne pur ngue biʼniʼ invitarbe laa chigucheechenebe laa diidxaʼ. Ra canagucheechecabe diidxaʼ gudxi dxaapahuiiniʼ que laabe guiráʼ ni cazaaca, ne despué bidii xquíxepeʼ Jiobá, purtiʼ bizaalaʼdxiʼ gunaa Testigu que laabe; nguepeʼ nga ni caquiiñebe. Sti lugar, ra cayaca ti reunión social, ti guendaxheelaʼ nabé nayecheʼ caniʼcaʼ guiráʼ ni bizaacacaʼ ra yegucheechecaʼ diidxaʼ ndaaniʼ sti guidxi. Lade cani nuu raqué nuu ti hombrehuiiniʼ ni cucaadiaga sin guiníʼ gastiʼ. Gudiʼdiʼ si caadxi iza, ora maʼ cayuube listu para chigacanebe sti lugar, zietenaláʼdxibe de guendaxheelaʼ que, purtiʼ ca diidxaʼ guníʼcabe que gucaneni laabe quixhe íquebe gácabe misioneru.
2 Zándaca gusietenalaʼdxiʼ ca ejemplu ni maʼ bizéʼtenu riʼ laanu de tuuxa ni gucané laanu quixhe íquenu gúninu xiixa lu xquendanabáninu, o tuuxa ni gucanenu laa. Cadi primé ca biaje gunadiáganu caníʼcabe de ti cosa nga gucaani laanu quixhe íquenu gúninu xiixa, peru guiráʼ dxi zanda uguʼnu gana ne gacanenu cani nuu gaxha de laanu. Bixuiʼlú ñuu xiixa ni ñacané laanu ñápanu jma guenda sicarú para ñúninu xhiiñaʼ Dios jma jneza ne ñacanenu ca xpinni Cristu. Galanpeʼ nga ñápanu xiixa ni ñacané laanu zacá. Ni dxandíʼ nga cudii Jiobá laanu ti cosa ni cayacané laanu, laani nga: espíritu santu (Luc. 11:13). Espíritu santu stiʼ Dios racaneni para gápanu ca guenda sicarú ni zacané laanu gúninu guiráʼ ni guinabaʼ Dios laanu ne gúninu cani jneza. ¡Cadi dxandíʼ nabé sicarú ni bisigáʼdebe laanu ca la?! (biindaʼ Gálatas 5:22, 23.)
3. 1) Xiñee rusisácanu Dios ora nápanu ca guenda sicarú ni rudii espíritu santu. 2) Gunáʼ nga ca guendarinabadiidxaʼ chiguicábinu.
3 Ca guenda ni rudii espíritu santu rusihuínnicani ximódopeʼ nga Jiobá, purtiʼ de laabe nga zeeda ni (Col. 3:9, 10). Yanna, xiñee naquiiñeʼ gúninu stipa pur chinándanu ejemplu stiʼ Dios yaʼ. Jesús bidii ti razón nabé risaca para gúninu cani, ora gúdxibe ca apóstol stibe ca diidxaʼ riʼ: «Zusisaca tu Bixhoze pa iree ndu ni cayuni tu lu xhiiñaʼ, ne zacá zahuinni xpinne laatu» (Juan 15:8). a Ora rudiʼnu lugar gacané espíritu santu laanu gápanu guenda sicarú la? rihuínnini lu guiráʼ ni rúninu ne lu cani rininu, ne zacá rusisácanu Dios ni bizáʼ laanu (Mat. 5:16). Ximodo nga rihuinni gadxé xpiaʼ binni guidxilayú ne gadxé nga ca guenda ni rusihuinni tuu nga ca xpinni Cristu yaʼ. Ximodo zanda gápanu ca guenda ni rudii espíritu santu ca yaʼ. Xiñee raca nagana para laanu gúninu ni yaʼ. Guicábinu ca guendarinabadiidxaʼ riʼ laga zidúʼndanu chonna de ca guenda ni rudii espíritu santu, laacani nga: guendarannaxhii, guendanayecheʼ ne guendariuudxi.
Rannaxhiinu purtiʼ zinándanu ti conseju nabé risaca
4. Ximodo bisiidiʼ Jesús ca discípulo stiʼ gannaxhiicaʼ binni.
4 Modo racané espíritu santu ca laanu gannaxhiinu maʼ gadxé ni de modo nadxii binni guidxilayú. Xiñee yaʼ. Purtiʼ ora rannaxhiinu rinándanu ti conseju nabé risaca. Jesús bizeeteʼ lu libana ni bidii lu dani que ximodo nga gadxé ni (biindaʼ Mateo 5:43-48). Laabe guniʼbe, dede ca binni ni qué runibiáʼ Dios rannaxhiicaʼ stobi purtiʼ laaca rannaxhiicabe laacaʼ. Laaca zanda guininu ca diidxaʼ riʼ sti modo: «Pa gacaneluʼ naa la? laaca zacaniáʼ lii». Peru ca binni runi zacá, cadi dxandíʼ nadxiicaʼ, sínuque nga nga ti modo racanesaa binni. Laanu, cani dxandíʼ xpinni Cristu la? nápanu xidé gusihuínninu maʼ gadxé laanu, «ti chi ndee [nu] Bixhoze [nu] ni nuu ibáʼ». Lugar de guquíxenu binni ni guni laanu, naquiiñeʼ guidúʼyanu laacabe casi modo ruuyaʼ Jiobá laacabe. Ne Cristu peʼ guníʼ naquiiñeʼ gannaxhiinu dede né ca xhenemígunu. Ñee dxandíʼ zanda gúninu nga la?
5. Ximodo zanda gannaxhiinu cani rizananda laanu.
5 Guiníʼ íquenu de ejemplu stiʼ Pablu ne Silas. Laga canagucheechecabe diidxaʼ ndaaniʼ guidxi Filipo, gunaazeʼ ca binni que laacabe, gudíñecaʼ laacabe, biseguyoocaʼ laacabe ne guluucaʼ ñeecabe ndaaniʼ cepu. Zándaca tobi de cani gudiñe laacabe que nga hombre ni rapa ralidxi guiibaʼ que. Ora bireecabe de ndaaniʼ lidxi guiibaʼ que pur ti xu ni guca raqué, ñee guníʼ íquecabe guquíxecabe hombre que ni biʼniʼ laacabe la? Qué niníʼ íquecabe zacá. Nagueendaca gucanécabe hombre que, purtiʼ dxandíʼ nadxiicabe laa, ne pur ngue gúcabe xpinni Cristu ne binnilídxibe (Hech. 16:19-34). Zacaca nga yanna, stale xpinni Cristu zinándacaʼ conseju riʼ lu xquendanabánicaʼ: «Lainíʼ né Dios pur cani riguu dí laatu» (Rom. 12:14).
6. Xi guiráʼ modo zanda gusihuínninu nadxiinu ca xpinni Cristu neca tiidinu ra nagana (biiyaʼ cuadru zeeda lu yaza 21).
6 Laanu cadi naquiiñeʼ si guininu nadxiinu ca xpinni Cristu, sínuque naquiiñeʼ gudiʼnu «xpida nu pur» laacabe (biindaʼ 1 Juan 3:16-18). Peru zanda gusihuínninu nadxiinu laacabe lu xcaadxi cosa jma nahuiiniʼ; casi pa bininanu laacabe pur xiixa ni guninu o ni bíninu la? naquiiñeʼ gúninu stipa pur chuʼnu galán né laacabe (Mat. 5:23, 24). Peru pa laanu nga bininácabe yaʼ. Ñee nuunu listu para gutiidiláʼdxinu donda stícabe la? o ridaʼnu xiana (Sal. 86:5). Cumu racané espíritu santu laanu gannaxhiinu laacabe de guidubi ladxidoʼno la? nga racané laanu gusiáʼndanu ca cosa huiiniʼ gúnicabe laanu ne gutiidiláʼdxinu stóndacabe, cásica «biʼniʼ perdonar Jiobá» laanu (Col. 3:13, 14, NM; 1 Ped. 4:8).
7, 8. 1) Xiñee naquiiñeʼ gannaxhiinu Dios para gannaxhiinu binni. 2) Ximodo zanda gannaxhiinu Jiobá jma. (Biiyaʼ ca foto ni cá lu yaza riʼ).
7 Xi caquiiñeʼ gúninu para gannaxhiinu ca xpinni Cristu neca tiidinu ra nagana. Naquiiñeʼ gaca xhamígunu Bixhózenu ni nuu guibáʼ (Efe. 5:1, 2; 1 Juan 4:9-11, 20, 21). Para ganda gúninu nga naquiiñeʼ cueenu tiempu para guni orarnu Dios stúbinu, guidúʼndanu Biblia ne guiníʼ íquenu de cani cadúʼndanu. Zacá zannaxhiinu laabe jma. Peru para ganda guidxíñanu Jiobá la? caquiiñeʼ cueenu tiempu de xcaadxi cosa ni rúninu.
8 Guiníʼ íquenu ndiʼ: pa ñaca ti hora si ñápanu lu ti dxi para guidúʼndanu Biblia, guiníʼ íquenu lu ni cadúʼndanu ne guni orarnu. Cadi dxandíʼ nidúʼyanu tiempu ca casi ti tesoro la? Dxandíʼ pue, ne qué nudiʼnu lugar ñuu xiixa ni nucueeza laanu de ñúʼnenu Bixhózenu tobi si. ¡Galán nga cadi zacá ni! Guirutiʼ tu zanda gucueeza laanu de guidxíñanu Jiobá ora gápanu gana, ne guirutiʼ tu cucueeza laanu de guidúʼndanu Biblia. Peru naquiiñeʼ gápanu laanu para cadi gucaa cani rúninu guiráʼ dxi laanu maʼ cadi chuʼnu gaxha de Dios. Ñee ribeenu tiempu guiráʼ dxi para chuʼnu gaxha de Jiobá la?
«[Ru]sieche Espíritu Santu» laanu
9. Xi ti cosa nabé risaca zanda guzéʼtenu de guendanayecheʼ, ti guenda ni rudii espíritu santu.
9 Guiráʼ ca guenda ni racané espíritu santu laanu gápanu qué ziuu dxi guiniti cani ne zusihuínninu cani neca guidxaagalunu guendanagana. Ne lu guiropa guenda ni racané espíritu santu ca laanu gápanu nga rihuinni jneza ni guninu ca, ne guenda ca nga: guendanayecheʼ. Laani zeeda gácani casi ti yaga ni runi huantar neca zuhuaa ti lugar ra nabidxi. Cadi guiaandaʼ laanu stale xpinni Cristu «ucuaa [...] ca diidxa que, neca udiʼdi [ca] ra nagana», peru neca zaqué «bisieche Espíritu Santu» laacaʼ (1 Tes. 1:6). Xcaadxi de laacabe yánnapeʼ cadxaagalucaʼ stale guendanagana ne huaxiéʼ nápacaʼ ni tiidinecaʼ dxi. Peru Jiobá caquiiñeʼ espíritu stiʼ para gudii stipa guirácabe «ti ganda guieche [cabe] neca gueeda stale enda naná luguiá [cabe], ne cadi ixhacalaʼdxi [cabe]» (Col. 1:11). Yanna ximodo racané Dios laanu chuʼnu nayecheʼ yaʼ.
10. Ximodo ruchátipa Jiobá ladxidoʼno de guendanayecheʼ.
10 Guiráʼ ca cosa risaca ni cudii Binidxabaʼ ne guidxilayú stiʼ, qué risaca cani biaʼ risaca cani rusiidiʼ Jiobá laanu, purtiʼ laacani zeeda gácacani casi ti tesoro ne qué ziuu dxi guiaana de guisaca cani (1 Tim. 6:17; Mat. 6:19, 20). Laabe rusiéchebe laanu purtiʼ maʼ guniʼbe zabáninu sin qué chuʼ dxi gátinu. Laaca nayecheʼ nuunu purtiʼ nápanu bíʼchinu ne bizáʼnanu lu guidubi naca Guidxilayú. Peru ni jma rusiecheʼ laanu nga gaca xhamígunu Dios. Runi sentirnu casi biʼniʼ sentir David ca dxi guyuu tu guzananda laa, David biindaʼ ti canción para Jiobá né ca diidxaʼ riʼ: «Purtiʼ jma galán guendanachaʼhuiʼ stiluʼ que guendanabani, zusisaca ruaaʼ lii. Zacá zusisacaʼ lii biaʼ dxi guibaneʼ» (Sal. 63:3, 4). Casi maʼ bidúʼyanu ca, rusisácanu Dios purtiʼ de ndaaniʼ ladxidoʼno riale gúninu ni neca cadxaagalunu guendanagana ni jma naná.
11. Xiñee nabé risaca nga chuʼnu nayecheʼ ora guni adorarnu Jiobá.
11 Apóstol Pablu cayuni invitación riʼ guiráʼ ca xpinni Cristu: «Laguieche irá dxi purti xpinni Señor laatu. Ne sti tiru rabe laatu, laguiecheʼ» (Fili. 4:4). Xiñee nabé risaca chuʼnu nayecheʼ ora maʼ cayuni adorarnu Jiobá yaʼ. Purtiʼ zacá cusihuínninu laasibe nga nápabe derechu de guni mandarbe. Guietenaláʼdxinu Binidxabaʼ guníʼ guirutiʼ tu zuzuubaʼ stiidxaʼ Dios de guidubi ladxidóʼ (Job 1:9-11). Nga runi, pa guni adorarnu laabe purtiʼ si naquiiñeʼ gúninu ni, peru sin chuʼnu nayecheʼ la? cadi de guidubi ladxidoʼno cusisácanu laabe. Pur cani maʼ bizéʼtenu ca, rúninu stipa pur chinándanu conseju bidii salmista riʼ: «Lachuu nayecheʼ ora gúnitu ni na Jiobá. Lachuu ra nuube né stale guendanayecheʼ» (Sal. 100:2). Dxandíʼ, para gusisácanu Dios naquiiñeʼ chuʼnu nayecheʼ, ne gúninu ni né stale gana.
12, 13. Xi zanda gúninu para cadi guiníʼ íquenu cosa ni qué zanda gacané laanu.
12 Peru laaca naquiiñeʼ guietenaláʼdxinu ti cosa: laanu ca xpinni Jiobá nuu biaje laaca riuʼnu triste ne napa xidé gúninu stipa pur chuʼnu nayecheʼ (Fili. 2:25-30). Xi zacané laanu ora guizaacanu zacá yaʼ. Chinándanu conseju ni zeeda lu Efesios 5:18, 19: «Laudii lugar idxá ladxidóʼ to de Espíritu Santu. Ora cayuíʼ tu diidxa la? lauzeete ni cá lu ca salmo, ne lu ca cantu, ne lu ca himno ni ruunda né tu Dios. Laguunda ne lausisaca [Jiobá] de idubi ladxidóʼ to». Ximodo zanda gúninu ni na conseju riʼ yaʼ.
13 Ora guiníʼ íquenu cosa ni qué zacané laanu la? naquiiñeʼ guni orarnu Dios ne guiníʼ íquenu de cosa ni zacané laanu (biindaʼ Filipenses 4:6-9). Nuu tu laa maʼ bidii cuenta riuu gana ne riuu nayecheʼ ora rucaadiaga ca diidxaʼ riuundaʼ stiʼ Reinu ne maʼ ziyuundaʼ huiiniʼ cani. Ti xpinni Cristu nabé guyuu triste pur ti guendanagana ni gupa. Xi gucané laabe para bidxiilube guendanagana que yaʼ. Laabe guniʼbe sicaríʼ: «Naa cadi bineʼ orar siáʼ de guidubi ladxiduáʼ, sínuque laaca biziideʼ caadxi diidxaʼ riuundaʼ de memoria. Nabé gutadxí ladxiduáʼ ora biindaʼ ca diidxaʼ riuundaʼ que para Jiobá, neca guundaʼ cani nadipaʼ o chaahuidugá. Ca dxi que laaca biree libru Acerquémonos a Jehová. Biindaʼ ni chupa biaje lu ti iza. Beeda gácani casi ti pomada para ladxiduáʼ. Nanna dxicheʼ guluu Jiobá ndaayaʼ ca stipa bineʼ».
Ziuʼnu tobi si pa qué chuʼdíndenu
14. Ximodo racané espíritu santu ca binni para chuʼcaʼ tobi si.
14 Lu ca guendaridagulisaa ra reeda binni de guiráʼ guidxi riuu ca xpinni Cristu tobi si, neca nácacaʼ hombre ne gunaa de gadxé gadxé lugar. Ora ridagulisaa ca xpinni Cristu de guiráʼ guidxi, rihuinni nuu xquidxi Dios tobi si. Nabé ridxagayaa stale binni ora gúʼyacaʼ guiráʼ xpinni Cristu, neca zeedacaʼ de xiixa grupu ni qué randa riuu tobi si, cayúnicabe stipa pur «cadi chuʼ dinde [cabe], ti cadi ilaa saa [cabe]» (Efe. 4:3). Modo nuucabe riʼ la? nabé rudii binni cuenta de laani, jmaruʼ si ora guiníʼ íquenu xi guiráʼ stipa rúnicabe para chúʼcabe tobi si, stale de laacabe huadíʼdicabe lu stale guendanagana.
15, 16. 1) Xiñee guca nagana para Pedru guchaa modo ruuyaʼ cani cadi naca judíu. 2) Ximodo gucané Jiobá apóstol que para bichaa modo riníʼ ique.
15 Nagana nga para chuʼ binni ni gadxé gadxé modo laa tobi si. Xi zanda gacané laanu guiénenu xi guiráʼ guendanagana ridxaagalú binni para guni ni maʼ bizéʼtenu ca yaʼ. Guidúʼyanu ti ejemplu ni bizaaca lu primé siglu, ni bizaaca apóstol Pedru. Primé que, ximodo riníʼ íquebe de binni de sti guidxi para guidxaagabe laa yaʼ. Laabe guniʼbe ca diidxaʼ riʼ: «Laatu nanna tu judíu naa ne cá lu ley stidu cadi idxaaga du cani cadi judíu ne cadi chuʼ du ralidxi caʼ». De raqué guniʼbe: «Peru ma biluíʼ Dios naa zanda idxaaga tutiisi, neca cadi judíu laa» (Hech. 10:24-29; 11:1-3). Ruluíʼ si dede nahuiinibe bisiidicabe laabe naquiiñeʼ gannaxhiicabe ca judíu si casi na Ley, purtiʼ zaqué nga biziidiʼ ca israelita dxiqué. Ngue runi, para laabe la? cadi malu diʼ nga gúʼyabe binni de sti guidxi casi enemigu stibe ne gaca nanaláʼdxibe laacaʼ. b
16 Bixuíʼ lú pabiáʼ feu biʼniʼ sentir Pedru ora guyuu ra lidxi Corneliu. Pur stale tiempu biziidiʼ Pedru cadi guidxaaga cani cadi judíu, yanna, ñee zanda chuʼbe «tobi si» né ti binni ni cadi judíu la? (Efe. 4:3, 16.) Zanda purtiʼ chupa chonna gubidxa ante maʼ bizulú bichaa Pedru modo riníʼ ique de ca binni de gadxé raza. Xi gucané laabe yaʼ. Espíritu santu bixheleʼ ladxidoʼbe, ne Jiobá bidii laabe ti visión para gúʼyabe cadi naquiiñeʼ gusisácabe caadxi binni ne gúnibe menu xcaadxi, purtiʼ siʼ nácacaʼ de sti guidxi o de sti raza (Hech. 10:10-15). Nga runi, apóstol que gúdxibe Corneliu sicaríʼ: «Yanna ma nanna biaʼca risaca irá binni nezalú Dios. Tutiica idxibi laabe ne guni jneza, runi xiiñi be laa, gasti naca xi raza laa» (Hech. 10:34, 35). Casi maʼ bidúʼyanu ca, Pedru bichaa modo laa, ne ngue gucané laabe chuʼbe tobi si né «irá ca hermanu» (1 Ped. 2:17).
17. Xiñee stale binni rudii cuenta nuu xquidxi Jiobá tobi si.
17 Ni bizaaca Pedru ca rusihuinni modo cuchaa ca xpinni Cristu. Biblia na: «Ne stale guidxi ziecaʼ ne zaniʼcaʼ: “Latáʼ, ne quíbanu lu dani stiʼ Jiobá, ralidxi Dios stiʼ Jacob; ne laabe zusiidibe laanu sanu lu neza stibe, ne dxandipeʼ zazanu luni”. Purtiʼ de Sión zaree ley, ne Jerusalén zaree stiidxaʼ Jiobá. Ne laabe zaniʼbe paraa bichee ca guidxi ca ne zuni chaahuibe guendanagana napa ca guidxi ca. Zúnicabe espada stícabe guiibaʼ ni chuʼ ruaa aradu, ne lanza stícabe zúnicabe ni guiibaʼ para uganécabe guixi. Qué zadinde guidxi roʼ ne sti guidxi roʼ né guiibaʼ duxhuʼ, ne qué zaziidirucaʼ tíndecaʼ» ( Isaías 2:3, 4). Millón de hombre ne gunaa «de irá ladu ne de irá guidxi ne irá idioma riníʼ binni» cayúnicaʼ stipa pur guiníʼ íquecaʼ modo «racalaʼdxi Dios guni [caʼ]» ne cayúnicaʼ «ni nachaʼhui ne ni chuʼlaʼdxi[be] ne ni jneza peʼ» (Apo. 7:9; Rom. 12:2). Stale de laacabe dxiqué bisihuínnicabe espíritu stiʼ guidxilayú, purtiʼ guca nanaláʼdxicabe binni, gúpacabe xhenemígucabe ne guyuuláʼdxicabe tíndecabe. Peru ora biindacabe Stiidxaʼ Dios ne gucané espíritu stiʼ Dios laacabe la? biziidicabe guyúbicabe gúnicabe ca cosa ni gacané laacabe chúʼcabe «tobi si» (Rom. 14:19). Zacá nuucabe tobi si ne cusisácacabe Jiobá.
18, 19. 1) Ximodo zanda gacanenu chuʼ ca binni ridagulisaa tobi si ne cadi tíndecaʼ. 2) Xi zadúʼyanu lu sti tema ca.
18 Ximodo zanda gacanenu chuʼ xquidxi Jiobá tobi si ne cadi chuʼ guendaridinde ládecabe ya. Ndaaniʼ stale neza binni ridagulisaa nuu xpinni Cristu de gadxé gadxé guidxi. Nuu biaje gadxé costumbre nápacabe o qué riníʼ chaahuicabe stiidxanu. Ñee ruyúbinu guidxíñanu laacabe la? Nga nga ni na Biblia gúninu. Lu carta ni bicaa Pablu ra nuu ca xpinni Cristu de Roma, ra nuu judíu ne ni cadi judíu guniʼbe ca diidxaʼ riʼ: «Lauchagalú cani zeeda de sti ladu» (Rom. 12:13). Ñee maʼ guníʼ íquenu de tuuxa xpinni Cristu ra ridagulisaanu ni zanda gunibiáʼ chaahuinu laa la?
19 Yanna, xiruʼ zanda gúninu para gacané espíritu santu laanu lu xquendanabáninu yaʼ. Lu sti tema ca zadúʼyanu ni maʼ bizéʼtenu riʼ, ne laaca zadúʼyanu de xcaadxi guenda ni rudii espíritu santu.
[Nota]
a Ora guníʼ Jesús de «iree ndu ni cayuni» ca discípulo lu xhiiñaʼ Dios la? laaca caniʼbe naquiiñeʼ chinándacaʼ «ni na espíritu santu» ne «usisaca [caʼ] Dios» ora gucheechecaʼ stiidxaʼ Reinu (Heb. 13:15).
b Levítico 19:18 na: «Cadi guquíxeluʼ ni guni tuuxa binni xquídxiluʼ lii ne cadi gapuʼ xiana laabe; ne napuʼ xidé gannaxhiiluʼ sti binni cásica nadxiiluʼ lii». Guyuu xaíque yuʼduʼ nacaʼ diidxaʼ «sti binni» ca laca laani nga ca diidxaʼ «binni xquídxiluʼ», ne para laacaʼ para ca judíu que si nga ca diidxaʼ ca. Neca Ley que na guixeleʼ ca israelita que de xcaadxi guidxi, qué ñuni mandar diʼ ni laacabe ñaca xhenemígucabe cani cadi judíu ne ñaca nanaláʼdxicabe laacaʼ, casi modo bisiidiʼ ca xaíque yuʼduʼ de primé siglu que.
Xi zanda guicábinu
• Ximodo zanda gusihuínninu nadxiinu ca xpinni Cristu.
• Xiñee risaca nga chuʼnu nayecheʼ ora maʼ cayuni adorarnu Jiobá.
• Ximodo zanda gacanenu para chuʼ ca binni ridagulisaa tobi si ne cadi tíndecaʼ.
[Guendarinabadiidxaʼ stiʼ párrafo]
[Cuadru ni zeeda lu yaza 21]
«Dxandíʼ xpinni Cristu laacabe»
Lu ti libru ni caníʼ ximodo biʼniʼ huantar ca testigu stiʼ Jiobá lu náʼ ca nazi, zeeda caadxi diidxaʼ ni guníʼ ti hombrehuiiniʼ ni naca judíu primé biaje biiyabe ca xpinni Cristu ora yendabe ndaaniʼ ti lidxi guiibaʼ ni nuu Neuengamme, ra ruseguyoocabe binni ora cayaca guerra:
«Laadu nácadu judíu ne ora ziúpadu de Dachau guyuʼdu ti lugar ra biseguyoocabe laadu, xcaadxi judíu que bicaachicaʼ cani nápacaʼ para cadi gudiicaʼ laadu gastiʼ. [...] Neca dxi nuudu fuera de [ra daguyoodu] que gucanésaadu, peru yanna, cumu jma nagana ra nuudu ne zándaca gueeda gátidu la? maʼ cada tobi de laadu biiyadu ximodo guiladu ne maʼ qué ñacanedu ca xcompañérudu. Peru ñee nannuʼ xi biʼniʼ cani ruundaʼ Biblia ca dxi que la? Bicaa ca binni que laacabe guni chaahuicabe ca tubu nuu raqué. Tiempu que nabé nanda raqué, ne guidubi dxi rúnicabe dxiiñaʼ ndaaniʼ nisa nanda que. Guirutiʼ tu ñanda ñene ximodo biʼniʼ huantárcabe guiráʼ ni gudíʼdicabe que. Laacabe guníʼcabe Jiobá bidii laacabe stipa. Cásica laadu la? laaca caquiiñecabe gócabe, purtiʼ nabé candaanacabe. Neca zaqué, xi bíʼnicabe yaʼ. Bitópacabe guiráʼ pan ni nápacabe que ne riaananécabe galaa de laacani ne xcaadxi que rudiicabe cani ca xpinni Cristu ni nacubi bedandá de Dachau. Ne laaca nabé sicarú modo ridxagalúcabe laacaʼ ne rudiicabe bixiduʼ laacaʼ. Ante gócabe gueta runi orárcabe Dios. Ne despué riuucabe nayecheʼ ne maʼ dxaʼ ndaanicabe. Nácabe maʼ cadi candaanacabe. Óraque guníʼ iqueʼ: “Dxandíʼ xpinni Cristu laacabe”.» (Between Resistance and Martyrdom—Jehovahʼs Witnesses in the Third Reich [Entre la resistencia y el martirio: los testigos de Jehová durante el Tercer Reich].)
[Ca dibuju/foto ni zeeda lu yaza 19]
Ñee ribeenu tiempu lu cani rúninu para guidxíñanu Jiobá guiráʼ dxi la?
