Nagpapagiya daw Kamo sa Espiritu nin Dios?
Nagpapagiya daw Kamo sa Espiritu nin Dios?
“An saimong espiritu marahay; giyahan logod ako kaiyan sa daga nin katanosan.”—SAL. 143:10.
1, 2. (a) Magsambit nin mga pangyayari na ginamit ni Jehova an banal na espiritu para sa mga lingkod nia. (b) Sa espesyal na mga okasyon sana daw naghihiro an banal na espiritu? Ipaliwanag.
ANO an minasabong sa isip nindo kun iniisip nindo an dapit sa paghiro kan banal na espiritu? Naiimahinar daw nindo an makapangyarihan na mga gibo ni Gideon asin Samson? (Hok. 6:33, 34; 15:14, 15) Tibaad naiisip nindo an pagkapusoan kan enot na mga Kristiano o an pagkakalmado ni Esteban kan sia nasa atubangan kan Sanhedrin. (Gibo 4:31; 6:15) Sa presenteng panahon, kumusta man an kagayagayahan na heling-heling sa satong internasyonal na mga kombension, an integridad kan satong mga tugang na nakapreso huli sa neutralidad, asin an pambihirang pag-oswag kan paghuhulit? An mga halimbawang ini gabos nagpapatunay kan paghiro kan banal na espiritu.
2 Sa espesyal na mga okasyon o ekstraordinaryong mga kamugtakan sana daw naghihiro an banal na espiritu? Dai. Sinasambit kan Tataramon nin Dios an dapit sa mga Kristiano na ‘naglalakaw segun sa espiritu,’ “ginigiyahan kan espiritu,” asin ‘namumuhay segun sa espiritu.’ (Gal. 5:16, 18, 25) An mga pananaram na ini nagpaparisa na an banal na espiritu puedeng padagos na makaimpluwensia sa satong buhay. Sa aroaldaw, maninigong makimaherak kita ki Jehova na giyahan an satong pag-iisip, pagtaram, asin paggawe paagi sa espiritu nia. (Basahon an Salmo 143:10.) Mientras na tinotogotan niato an espiritu na buelong humiro sa satong buhay, makakapaheling kita nin bunga na nakakaginhawa sa iba asin nagtatao nin kaomawan sa Dios.
3. (a) Taano ta kaipuhan kitang giyahan kan banal na espiritu? (b) Anong mga hapot an pag-oolayan niato?
3 Taano ta mahalagang marhay na giyahan kita kan banal na espiritu? Huling may saro pang puersa na naghihingoang dominaron kita, sarong puersa na kinokontra an paghiro kan banal na espiritu. An puersang iyan iyo an inaapod kan Kasuratan na “an laman,” na nanonongod sa salang mga tendensia kan satong makasalan na laman, an resulta kan namana niato ki Adan na pagkabakong perpekto. (Basahon an Galacia 5:17.) Kun siring, ano an kalabot sa pagtogot niato na giyahan kita kan espiritu nin Dios? May magigibo daw kitang praktikal na mga lakdang tanganing labanan an impluwensia kan satong makasalan na laman? Pag-olayan niato an mga hapot na ini mantang tinotokar niato an natatadang anom na aspekto kan “bunga kan espiritu,” na iyo an “pakatios, kabootan, karahayan, pagtubod, kahoyoan, pagpupugol sa sadiri.”—Gal. 5:22, 23.
An Kahoyoan Asin Pakatios Nakakatabang sa Katoninongan sa Kongregasyon
4. Paano an kahoyoan asin pakatios nakakakontribwir sa katoninongan sa kongregasyon?
4 Basahon an Colosas 3:12, 13. Sa kongregasyon, an kahoyoan asin pakatios nagtitinabangan tanganing magkaigwa nin katoninongan. An duwang aspektong ini kan bunga kan espiritu nakakatabang sa sato na trataron an iba nin may kabootan, magdanay na kalmado kun pinapaanggot, asin likayan na bumalos kun an iba minataram o minagawe nin daing kabootan. Kun kita asin an sarong kapwa Kristiano dai nagkakaintindihan, an pakatios, o pasensia, makakatabang sa sato na dai sumuko kundi magmaigot nanggad na makipagkatoninongan sa satong tugang. Kaipuhan daw talaga sa kongregasyon an kahoyoan asin pakatios? Iyo, huling kita gabos bakong perpekto.
5. Ano an nangyari ki Pablo asin Bernabe, asin ano an idinodoon kaini?
5 Isip-isipa an nangyari ki Pablo asin Bernabe. Magkatabang sinda sa laog nin mga taon sa pagpalakop kan maogmang bareta. An kada saro may kaomaw-omaw na mga kualidad. Pero, sarong beses, nagkaigwa sinda nin “grabeng pagputok nin kaanggotan, kaya nagsuwayan sinda.” (Gibo 15:36-39) Idinodoon kaini na dawa sa debotadong mga lingkod nin Dios, magkakaigwa nin dai pagkasinarabotan kun beses. Kun an sarong Kristiano may dai pagkasinabotan sa sarong kapagtubod, ano an puede niang gibohon tanganing dai na iyan umabot sa mainit na diskusyon na puedeng magresulta sa haloy na iwal?
6, 7. (a) Anong konseho sa Kasuratan an puede niatong sunodon bago uminit an pakikipag-olay sa sarong kapagtubod? (b) Ano an mga pakinabang nin pagigin “listo kun dapit sa pagdangog, maluway kun dapit sa pagtaram, maluway kun dapit sa grabeng kaanggotan”?
6 Arog kan ipinaparisa kan mga tataramon na “grabeng pagputok nin kaanggotan,” an dai pagkasinabotan ni Pablo asin Bernabe bigla asin seryosong marhay. Kun naririsa nin sarong Kristiano na naaanggot na sia mantang nakikipag-olay sa sarong kapagtubod, kadonongan na himateon nia an konseho sa Santiago 1:19, 20: “An gabos na tawo kaipuhan na magin listo kun dapit sa pagdangog, maluway kun dapit sa pagtaram, maluway kun dapit sa grabeng kaanggotan; huli ta an grabeng kaanggotan nin tawo dai nagbubunga kan katanosan nin Dios.” Depende sa kamugtakan, puede niang hingoahon na bagohon an tema, putolon nguna an pag-oolay, o maghale bago uminit an pag-oolay.—Tal. 12:16; 17:14; 29:11.
7 Ano an mga pakinabang sa pagsunod sa konsehong ini? Paagi sa pagtao nin panahon tanganing magpakalma, makapamibi dapit dian, asin makapag-isip kun paano iyan pinakamarahay na atubangon, nagpapagiya an sarong Kristiano sa espiritu nin Dios. (Tal. 15:1, 28) Sa impluwensia kan espiritu, ikakapaheling nia an kahoyoan asin pakatios. Paagi kaiyan, magigin andam siang himateon an konseho sa Efeso 4:26, 29: “Maanggot kamo nin grabe, alagad ta dai kamo magkasala . . . Dai kamo magpaluwas nin lapang tataramon sa saindong ngoso, kundi ano man na tataramon na marahay para sa pagpakosog sono sa pangangaipo, tangani na ikatao kaiyan an paborable sa mga nagdadangog.” Iyo, kun isinusulot niato an kahoyoan asin pakatios, nakakakontribwir kita sa katoninongan asin pagkasararo kan kongregasyon.
Paginhawahon an Saindong Pamilya Paagi sa Kabootan Asin Karahayan
8, 9. Ano an kabootan asin karahayan, asin ano an epekto kaiyan sa kamugtakan sa harong?
8 Basahon an Efeso 4:31, 32; 5:8, 9. Arog nin mapreskong doros asin malipot na maiinom kun mainit an panahon, an kabootan asin karahayan nakakapaginhawa. Sa laog kan pamilya, nakakakontribwir iyan sa magayagayang kamugtakan. An kabootan sarong kawiliwiling kualidad na naggigikan sa tunay na interes sa iba—interes na ipinapahayag paagi sa matinabang na mga gibo asin makonsiderasyon na mga tataramon. An karahayan, arog kan kabootan, sarong positibong kualidad na ipinapaheling paagi sa mga gibo na nagtataong pakinabang sa iba. Naririsa iyan paagi sa espiritu nin pagigin matinao. (Gibo 9:36, 39; 16:14, 15) Alagad orog pa an kalabot sa karahayan.
9 An karahayan iyo an pagigin ekselente sa moral. Kalabot dian bako sanang kun ano an ginigibo niato kundi, an mas mahalaga, kun ano kita. Imahinara an sarong babae na nag-aandam nin prutas para sa pamilya nia, asin mantang pinipidaso nia iyan, inuusisa nia an kada pidaso tanganing siertohon kun iyan mahamis asin enterong hinog, mayong raot sa laog o luwas. Kaagid kaiyan, an karahayan na bunga kan banal na espiritu may epekto sa bilog na pamumuhay nin sarong Kristiano.
10. Ano an puedeng gibohon tanganing matabangan an mga miembro kan pamilya na pataluboon an bunga kan espiritu?
10 Sa Kristianong pamilya, ano an makakatabang sa mga miembro kaiyan na trataron an lambang saro nin may kabootan asin karahayan? An tamang kaaraman sa Tataramon nin Dios may mahalagang papel. (Col. 3:9, 10) Iiniiba nin nagkapirang payo nin pamilya an pag-adal dapit sa bunga kan espiritu sa saindang semanal na banggi nin Pampamilyang Pagsamba. An pag-adal na iyan bakong depisil na gibohon. Gamit an mga kasangkapan sa pagsiyasat na makukua sa lenguahe nindo, pumili nin reperensia dapit sa kada aspekto kan bunga kan espiritu. Puede nindong pag-adalan an pira sanang parapo kada semana, na naggagamit nin nagkapirang semana sa kada aspekto. Mantang pinag-aadalan iyan, basahon asin pag-olayan an sitadong mga teksto. Humanap nin mga paagi na ikaaplikar an nanodan nindo, asin mamibi ki Jehova na logod bendisyonan an saindong paghihingoa. (1 Tim. 4:15; 1 Juan 5:14, 15) An siring daw na pag-adal makakatabang talaga sa pagtratar kan mga miembro nin pamilya sa lambang saro?
11, 12. Paano an duwang mag-agom na Kristiano nakinabang sa pag-adal dapit sa kabootan?
11 Sarong mag-agom na hoben, na gustong magin mapanggana an pag-agoman, an nagdesisyon na detalyadong pag-adalan an bunga kan espiritu. Paano sinda nakinabang? An agom na babae nagkomento: “Kan manodan mi na kaiba sa kabootan an kaimbodan, nakatabang nanggad iyan kun paano mi tinatratar an kada saro sagkod ngonyan. Natokdoan kami kaiyan na magin mapagpahunod saka mapagpatawad. Asin nakatabang iyan sa samo na manodan an pagsabi nin ‘salamat’ asin ‘pasensia na’ kun angay.”
12 An saro pang mag-agom na Kristiano, na may mga problema kaidto sa saindang pag-ibanan, nakarealisar na an kabootan mayo sa relasyon ninda. Nagdesisyon sinda na pag-adalan nin magkaibanan an manongod sa kabootan. Ano an resulta? Nagigirumdoman kan agom na lalaki: “An pag-adal mi dapit sa kabootan nakatabang sa samo na maheling na kaipuhan ming magtiwala, imbes na pagdudahan an lambang saro, asin hanapon an marahay sa kada saro. Pinonan ming orog na magin interesado sa pangangaipo kan kada saro. Kaiba sa pagigin maboot an pagdagka sa agom ko na dai mag-alangan na ipahayag an nasa isip nia, asin dai iyan ikakakolog kan boot ko. Nangangahulogan iyan na kaipuhan kong ipagilid an sakong amor propio. Mientras na iinaaplikar niamo an kabootan sa pag-agoman mi, padikit-dikit na nawawara an tendensia ming idepensa an sadiri. Nakakaginhawa nanggad iyan.” Makikinabang daw an pamilya nindo sa pag-adal sa bunga kan espiritu?
Magpaheling nin Pagtubod Dawa Nagsosolo
13. Anong peligro sa satong espirituwalidad an dapat niatong likayan?
13 Kaipuhan kan mga Kristiano na magpagiya sa espiritu nin Dios may nakakaheling man o mayo. Ngonyan sa kinaban ni Satanas, padakol nin padakol an malaswang mga retrato asin hababaon na klase nin aling-alingan. Peligroso ini sa satong espirituwalidad. Ano an dapat na gibohon nin sarong Kristiano? Sinasadol kita kan Tataramon nin Dios: “Haleon nindo an gabos na kaatian asin an dai na kaipuhan na bagay na iyan, an karatan, asin akoon na may kahoyoan an pagtanom sa saindo kan tataramon na nakakapagligtas kan saindong kalag.” (Sant. 1:21) Pag-olayan niato kun paano an pagtubod, an saro pang aspekto kan bunga kan espiritu, makakatabang sa sato na magdanay na malinig sa atubangan ni Jehova.
14. Paano an kakulangan nin pagtubod minaresulta sa salang paggawe?
14 Sa pundamental, an pagtubod nangangahulogan na para sa sato tunay si Jehova. Kun bakong tunay an Dios para sa sato, madalion sanang gumawe nin sala. Isip-isipa an nangyari sa banwaan nin Dios kan suanoy na panahon. Ihinayag ni Jehova ki propeta Ezequiel na may mga bagay na makauuyam nin makuri na patagong ginigibo, na sinasabi: “Naheling mo, O aki nin tawo, an ginigibo sa diklom kan mga gurang sa kamag-anakan nin Israel, kan lambang saro na yaon sa mas nasa laog na mga kuarto kan saiyang inukit na ladawan? Huli ta sinda nagsasarabi, ‘Dai kami naheheling ni Jehova. Binayaan na ni Jehova an daga.’” (Ezeq. 8:12) Narisa daw nindo an dahelan kan problema? Dai sinda nagtutubod na aram ni Jehova an ginigibo ninda. Para sa sainda, si Jehova bakong tunay.
15. Paano nagpoprotehir sa sato an makosog na pagtubod ki Jehova?
15 Sa kabaliktaran, isip-isipa an halimbawa ni Jose. Minsan ngani harayo sa saiyang pamilya asin banwaan, si Jose nagsayumang dorogan an agom ni Potifar. Taano? Sinabi nia: “Paano ko magigibo an dakulang karatan na ini asin magkasala nanggad sa Dios?” (Gen. 39:7-9) Iyo, para sa saiya tunay si Jehova. Kun tunay an Dios para sa sato, dai kita maheling nin maating aling-alingan o patagong magibo nin ano pa man na aram niatong habo kan Dios. An determinasyon niato magigin arog kan sa salmista na nag-awit: “Malakaw ako sa integridad kan sakong puso sa laog kan sakong harong. Dai ko ibubugtak sa atubangan kan sakong mga mata an ano man na bagay na daing kamanungdanan.”—Sal. 101:2, 3.
Ingatan an Saindong Puso Paagi sa Pagpupugol sa Sadiri
16, 17. (a) Arog kan pagkaladawan sa libro nin Talinhaga, paano “an sarong hoben na lalaki na tikapo an puso” nasisiod sa kasalan? (b) Arog kan ilinaladawan sa pahina 26, paano puedeng mangyari an arog kaiyan ngonyan ano man an edad nin saro?
16 An pagpupugol sa sadiri, an ultimong aspekto kan bunga kan espiritu, nakakatabang sa sato na magsayuma sa mga bagay na kinokondenar nin Dios. Makakatabang iyan sa sato na ingatan an satong puso. (Tal. 4:23) Isip-isipa an senaryo sa Talinhaga 7:6-23, na naglaladawan kun paano “an sarong hoben na lalaki na tikapo an puso” nagpapadara sa mga pakana nin patotot. Nasiod sia pagkatapos ‘mag-agi sa tinampo harani sa kanto kan istaran kan babae.’ Tibaad naglilibotlibot sia sa lugar na idto huli sa pag-usyoso. Dai nia naririsa na madalion sana siang nabubutong pasiring sa mangmang na gibo na dian “kalabot an mismong kalag nia.”
17 Paano kutana nalikayan kan hoben an kapahapahamak na salang gibo na ini? Paagi sa paghimate kan patanid: “Dai ka maglagawlagaw sa saiyang mga tinampo.” (Tal. 7:25) May leksion para sa sato: Kun gusto niatong giyahan kita kan espiritu nin Dios, kaipuhan niatong likayan na ibugtak an satong sadiri sa nakakatentar na mga situwasyon. An sarong paagi na puedeng maglagawlagaw an saro pasiring sa mangmang na gibo kan “hoben na lalaki na tikapo an puso” iyo an pagbarobalyo nin channel nin TV o pagpara-Internet na mayo nin depinidong katuyohan. Tinutuyo man o dai, posibleng marhay na makaheling sia nin mga eksenang nakakapukaw sa sekso. Puedeng luway-luway na mapatalubo nia an maating ugale na pagheling nin pornograpiya, na may grabeng danyos sa saiyang konsensia asin relasyon sa Dios. Puedeng kalabot dian an saiya mismong buhay.—Basahon an Roma 8:5-8.
18. Ano an mga puedeng gibohon nin sarong Kristiano tanganing maingatan an saiyang puso, asin paano kalabot digdi an pagpupugol sa sadiri?
18 Siempre, kaya asin maninigo niatong pugolan an satong sadiri paagi sa tolos-tolos na paghiro kun makaheling nin retrato na nakakapukaw sa sekso. Alagad mas marahay nanggad kun sa kapoonpooni likayan na niato an situwasyon! (Tal. 22:3) An pagkaigwa nin angay na mga regulasyon asin an pagsunod dian may kalabot na pagpupugol sa sadiri. Halimbawa, an paglaag kan computer sa heling-heling na lugar puedeng magserbing proteksion. Napatunayan nin nagkapira na pinakamarahay na maggamit sana sinda nin computer o TV kun may kaiba sinda. An iba nagdesisyon na dai na magpakabit nin Internet. (Basahon an Mateo 5:27-30.) Logod gibohon niato an ano man na kaipuhan sa pagprotehir kan satong sadiri asin pamilya tanganing masamba niato si Jehova “gikan sa malinig na puso asin gikan sa marahay na konsensia patin gikan sa pagtubod na mayo nin pagsaginsagin.”—1 Tim. 1:5.
19. Ano an mga pakinabang kan pagpagiya niato sa banal na espiritu?
19 An bunga na resulta kan paghiro kan banal na espiritu nagtatao nin dakol na pakinabang. An kahoyoan asin pakatios nakakakontribwir sa katoninongan sa kongregasyon. An kabootan asin karahayan nakakatabang para sa kaogmahan kan pamilya. An pagtubod asin pagpupugol sa sadiri nakakatabang sa sato na magdanay na harani ki Jehova asin malinig sa atubangan nia. Apuera dian, inaasegurar kita kan Galacia 6:8: “Sia na nagtatanom para sa espiritu mag-aani nin buhay na daing katapusan gikan sa espiritu.” Iyo, basado sa pantubos ni Cristo, gagamiton ni Jehova an banal na espiritu tanganing tawan nin buhay na daing katapusan an mga nagpapagiya sa espiritu.
Ano an Isisimbag Nindo?
• Paano an kahoyoan asin pakatios nakakatabang sa katoninongan sa kongregasyon?
• Ano an makakatabang sa mga Kristiano na ikapaheling sa harong an kabootan asin karahayan?
• Paano an pagtubod asin pagpupugol sa sadiri nakakatabang sa sarong Kristiano na ingatan an saiyang puso?
[Mga Hapot Para sa Pag-adal]
[Ritrato sa pahina 24]
Paano nindo malilikayan na uminit an pag-oolay?
[Ritrato sa pahina 25]
Makikinabang an saindong pamilya sa pag-adal sa bunga kan espiritu
[Ritrato sa pahina 26]
Anong mga peligro an nalilikayan niato kun kita igwa nin pagtubod asin pagpupugol sa sadiri?
