Nagpagiya Ka ba sa Espiritu sa Diyos?
Nagpagiya Ka ba sa Espiritu sa Diyos?
“Ang imong espiritu maayo; tultolan unta ako niini diha sa yuta sa katul-iran.”—SAL. 143:10.
1, 2. (a) Paghisgot ug pipila ka okasyon nga gigamit ni Jehova ang iyang balaang espiritu sa kaayohan sa iyang mga alagad. (b) Molihok ba lamang ang balaang espiritu sa espesyal nga mga okasyon? Ipatin-aw.
UNSAY mosantop sa imong hunahuna sa dihang hisgotan ang paglihok sa balaang espiritu? Makahunahuna ka ba sa gamhanang mga buhat ni Gideon ug Samson? (Maghu. 6:33, 34; 15:14, 15) Lagmit makahunahuna ka sa kaisog sa mga Kristohanon sa unang siglo o sa pagkakalmado ni Esteban samtang nagbarog atubangan sa Sanhedrin. (Buh. 4:31; 6:15) Sa modernong panahon, unsay imong ikasulti sa kalipay nga dayag panahon sa atong mga internasyonal nga kombensiyon, sa integridad sa atong mga igsoon nga nabilanggo tungod sa pagkaneyutral, ug sa talagsaong pag-uswag sa buluhatong pagsangyaw? Kining tanan maoy ebidensiya sa paglihok sa balaang espiritu.
2 Molihok ba lamang ang balaang espiritu sa espesyal nga mga okasyon o sa talagsaong mga kahimtang? Dili. Ang Pulong sa Diyos naghisgot nga ang mga Kristohanon ‘naglakaw pinaagi sa espiritu,’ “ginatultolan sa espiritu,” ug “nagkinabuhi pinaagi sa espiritu.” (Gal. 5:16, 18, 25) Kini nagpaila nga ang balaang espiritu mahimong mag-impluwensiya kanunay sa atong kinabuhi. Matag adlaw, angay kitang mohangyo kang Jehova nga giyahan ang atong panghunahuna, sinultihan, ug binuhatan pinaagi sa iyang espiritu. (Basaha ang Salmo 143:10.) Kon kita magpagiya sa espiritu, makapatungha kitag bunga nga makapadasig sa uban ug makahatag ug pagdayeg sa Diyos.
3. (a) Nganong kinahanglang magpagiya kita sa balaang espiritu? (b) Unsang mga pangutana ang atong tagdon?
3 Nganong kinahanglan kitang magpagiya sa balaang espiritu? Kay may laing puwersa nga buot mogahom kanato, usa ka puwersa nga supak sa paglihok sa balaang espiritu. Ang Kasulatan nagtawag sa maong puwersa nga “ang unod,” nga nagtumong sa makasasalang hilig sa atong unod—ang pagkadili-hingpit nga atong napanunod kang Adan. (Basaha ang Galacia 5:17.) Nan, unsay nalangkit sa atong pagpagiya sa espiritu sa Diyos? Duna bay praktikal nga mga lakang aron mapugngan ang hilig sa atong makasasalang unod? Kining mga pangutanaha matubag sa dihang atong hisgotan ang unom pa ka bahin sa “bunga sa espiritu”—“hataas-nga-pailob, kalulot, pagkamaayo, pagtuo, kalumo, pagpugong-sa-kaugalingon.”—Gal. 5:22, 23.
Kalumo ug Hataas-nga-Pailob Makapatunhay sa Pakigdait
4. Sa unsang paagi ang kalumo ug hataas-nga-pailob makapatunhay sa pakigdait diha sa kongregasyon?
4 Basaha ang Colosas 3:12, 13. Sa kongregasyon, ang kalumo ug hataas-nga-pailob mag-uban sa pagpatunhay sa pakigdait. Kining duha ka bahin sa bunga sa espiritu makatabang aron kita maayong motratar sa uban, magpabiling kalmado bisag may makapasuko, ug dili manimalos sa dihang sultihan o buhatag daotan. Kon kita may pakigbingkil sa usa ka igsoon, ang hataas-nga-pailob, o pasensiya, motabang kanato nga dili mohunong sa pagsulbad sa problema. Ang kalumo ug hataas-nga-pailob gikinahanglan ba gayod sa kongregasyon? Oo, kay kitang tanan dili hingpit.
5. Unsay nahitabo tali kang Pablo ug Bernabe, ug unsay gipakita niini?
5 Tagda ang nahitabo tali ni Pablo ug Bernabe. Sila kaubang nagsangyaw sa maayong balita sa daghang katuigan. Ang matag usa may dalayegong mga hiyas. Apan usa ka higayon, nahitabo ang “pagsilaob sa kasuko, mao nga sila nagbulag.” (Buh. 15:36-39) Kini nagpakita nga motungha usahay ang di-pagsinabtanay bisan taliwala sa madasigong mga alagad sa Diyos. Kon adunay di-pagsinabtanay tali sa duha ka igsoon, unsay himoon aron dili kana moresulta sa panaglalis nga makadaot sa ilang relasyon?
6, 7. (a) Unsang Kasulatanhong tambag ang atong sundon sa dili pa mahitabo ang panaglalis? (b) Unsa ang mga kaayohan sa pagkahimong ‘abtik sa pagpaminaw, hinay sa pagsulti, hinay sa pagkapungot’?
6 Ang pamulong nga “pagsilaob sa kasuko” nagpaila nga kalit ug grabe ang panagbingkil ni Pablo ug Bernabe. Kon ang usa ka Kristohanon makamatikod nga hapit na siyang masuko sa dihang makig-estorya sa isigkamagtutuo, maalamon nga iyang sundon ang tambag sa Santiago 1:19, 20: “Ang matag usa kinahanglang magmaabtik sa pagpaminaw, magmahinay sa pagsulti, magmahinay sa pagkapungot; kay ang kapungot sa tawo dili mosangpot ug pagkamatarong nga iya sa Diyos.” Depende sa kahimtang, mahimong ilisan niya ang ilang hisgotan, ihunong ang panaghisgot, o mobiya sa dili pa magkalalis.—Prov. 12:16; 17:14; 29:11.
7 Unsa ang mga kaayohan sa pagsunod niini nga tambag? Pinaagi sa pagpakalma sa kaugalingon, pag-ampo bahin sa problema, ug paghunahuna sa labing maayong itubag, ang usa ka Kristohanon nagpagiya sa espiritu sa Diyos. (Prov. 15:1, 28) Sa giya sa espiritu, siya makapasundayag sa kalumo ug hataas-nga-pailob. Busa, siya makasunod sa tambag sa Efeso 4:26, 29: “Pagkapungot, apan ayaw pagpakasala . . . Kinahanglang walay mangil-ad nga mga sulti nga mogula gikan sa inyong baba, kondili kanang bisan unsang sulti nga maayo nga makapalig-on sumala sa gikinahanglan, aron makahatag kinig kaayohan sa mga magapatalinghog.” Sa pagkatinuod, kon atong isul-ob ang kalumo ug hataas-nga-pailob, kita makapatunhay sa pakigdait ug panaghiusa sa kongregasyon.
Ang Kalulot ug Pagkamaayo Makapalig-on sa Pamilya
8, 9. Unsay kahulogan sa kalulot ug pagkamaayo, ug unsay epekto niining mga hiyasa diha sa panimalay?
8 Basaha ang Efeso 4:31, 32; 5:8, 9. Samag huyohoy ug bugnawng ilimnon sa init nga adlaw, ang kalulot ug pagkamaayo makaparepresko. Diha sa pamilya, kining mga hiyasa makaamot sa malipayong relasyon. Ang kalulot maoy dalayegong hiyas nga gibase sa tim-os nga interes alang sa uban, nga gipadayag sa matinabangong mga buhat ug mahunahunaong mga pulong. Sama sa kalulot, ang pagkamaayo maoy positibong hiyas nga gipahayag sa mga buhat nga makabenepisyo sa uban. Kini gipaila sa espiritu sa pagkamahinatagon. (Buh. 9:36, 39; 16:14, 15) Apan ang pagkamaayo naglangkit ug labaw pa.
9 Ang pagkamaayo maoy kaligdong sa moral. Kini naglangkit dili lamang sa atong ginabuhat, kondili, ilabina na sa atong pagkatawo. Kini samag usa ka tam-is nga prutas nga walay bisan unsang daot. Sa susama, ang pagkamaayo nga ipatungha sa balaang espiritu makaimpluwensiya sa tanang bahin sa kinabuhi sa usa ka Kristohanon.
10. Unsay mahimong buhaton aron maugmad sa mga membro sa pamilya ang bunga sa espiritu?
10 Sulod sa Kristohanong panimalay, unsay makatabang sa mga membro sa pamilya sa pagtratar sa usag usa uban ang kalulot ug pagkamaayo? Ang tukmang kahibalo sa Pulong sa Diyos may importanteng papel niana. (Col. 3:9, 10) Gilakip sa ubang ulo sa pamilya ang pagtuon sa bunga sa espiritu diha sa ilang senemanang Pamilyahanong Pagsimba. Ang pagtuon niana dili lisod. Gamita ang mga himan sa panukiduki ug pagpilig mga artikulo nga naghisgot sa usa ka bahin sa bunga sa espiritu. Matag semana, mahimong hisgotan ang pipila lang ka parapo, nga ang paghisgot sa matag bahin sa bunga sa espiritu dangtag mga semana. Sa inyong pagtuon, basaha ug hisgoti ang gisitar nga mga teksto. Pangitag mga paagi sa pagpadapat sa inyong natun-an, ug pag-ampo kang Jehova nga panalanginan ang inyong paningkamot. (1 Tim. 4:15; 1 Juan 5:14, 15) Ang maong pagtuon makapauswag ba gayod sa paagi sa pagtratar sa mga membro sa pamilya sa usag usa?
11, 12. Sa unsang paagi nakabenepisyo ang duha ka Kristohanong magtiayon sa pagtuon bahin sa kalulot?
11 Usa ka batan-ong magtiayon, nga gustong magmalamposon sa ilang kaminyoon, ang midesisyon sa pagtuon bahin sa bunga sa espiritu. Sa unsang paagi sila nakabenepisyo? Ang asawa miingon: “Ang pagkakat-on nga ang kalulot naglakip sa dili-pagluib sa kapikas ug pagkamaunongon dakog epekto sa among pagtratar sa usag usa hangtod karon. Nakakat-on mi nga mahimong mapahiuyonon ug mapinasayloon. Ug nakakat-on sab mi sa pag-ingon ug ‘salamat’ ug ‘sori’ kon nahiangay.”
12 Ang laing Kristohanong magtiayon, nga may problema sa kaminyoon, nakaamgo nga wala sila magpakitag kalulot sa usag usa. Sila midesisyon nga magkaubang tun-an ang bahin sa kalulot. Unsay resulta? Ang bana nahinumdom: “Kana nakatabang namo nga dili magmahukmanon ug mabutangbutangon, nga mangitag maayong mga hiyas sa usag usa. Kami mas matinagdanon na sa panginahanglan sa usag usa. Ang pagkamaluloton naglakip sa pag-awhag sa akong asawa nga dili siya magpanuko sa pagsulti kon unsay naa sa iyang hunahuna kay dili ra ko masuko. Kinahanglan nakong ipadaplin ang akong garbo. Sa dihang kami nagmaluloton, inanay nga nawala ang among pagkahilig mangatarongan. Nakapagaan gyod kadto sa among dughan.” Dili ba mapuslanon nga ang inyong pamilya magtuon bahin sa bunga sa espiritu?
Sa Pribado Ipasundayag ang Pagtuo
13. Batok sa unsang kapeligrohan nga panalipdan nato ang atong espirituwalidad?
13 Ang mga Kristohanon kinahanglang magpagiya sa espiritu sa Diyos sa publiko ug sa pribado. Sa kalibotan ni Satanas karon, kaylap ang mangil-ad nga mga hulagway ug malaw-ay nga kalingawan. Kini makapameligro sa atong espirituwalidad. Unsay angayng himoon sa usa ka Kristohanon? Ang Pulong sa Diyos nagtambag: “Isalikway ang tanang kahugawan ug kanang naghingapin nga butang, ang pagkadaotan, ug dawata nga may kalumo ang pagtisok sa pulong nga makaluwas sa inyong mga kalag.” (Sant. 1:21) Atong hisgotan kon sa unsang paagi ang pagtuo, ang laing bahin sa bunga sa espiritu, makatabang kanato nga magpabiling hinlo atubangan ni Jehova.
14. Sa unsang paagi ang kakulang sa pagtuo mahimong motultol sa daotang binuhatan?
14 Ang pagbaton ug pagtuo nagkahulogan nga isipon natong tinuod gayod si Jehova nga Diyos. Kon ang Diyos dili tinuod kanato, dali kitang matental sa pagbuhat ug daotan. Tagda ang nahitabo sa katawhan sa Diyos sa karaang panahon. Gipadayag ni Jehova kang propeta Ezequiel nga may dulumtanang mga butang nga gibuhat sa pribado: “Nakita mo ba, Oh anak sa tawo, kon unsay ginabuhat sa mga ansiyano sa balay sa Israel diha sa kangitngit, ang matag usa diha sa sulod nga mga lawak sa iyang pasundayag nga larawan? Kay sila nag-ingon, ‘Si Jehova wala makakita kanato. Si Jehova mibiya sa yuta.’” (Ezeq. 8:12) Imo bang namatikdan ang usa ka hinungdan sa problema? Wala sila magtuo nga si Jehova nahibalo sa ilang gibuhat. Si Jehova dili tinuod kanila.
15. Sa unsang paagi ang lig-ong pagtuo kang Jehova manalipod kanato?
15 Sa kasukwahi, tagda ang panig-ingnan ni Jose. Bisag layo sa iyang pamilya ug sa iyang katawhan, si Jose midumili nga makighilawas sa asawa ni Potipar. Ngano? Siya miingon: “Unsaon ko pagbuhat kining dakong pagkadaotan ug makasala gayod batok sa Diyos?” (Gen. 39:7-9) Oo, si Jehova tinuod kaniya. Kon ang Diyos tinuod kanato, dili kita motan-aw ug hugaw nga kalingawan o mohimo sa kon unsay dili makapahimuot sa Diyos diha sa pribado. Kita magmadeterminado sama sa salmista nga miawit: “Magalakaw ako sa integridad sa akong kasingkasing sulod sa akong balay. Dili ko ibutang sa atubangan sa akong mga mata ang bisan unsang butang nga walay hinungdan.”—Sal. 101:2, 3.
Panalipdi ang Imong Kasingkasing Pinaagi sa Pagpugong-sa-Kaugalingon
16, 17. (a) Ingon sa gihubit sa Proverbio, sa unsang paagi ang “usa ka batan-ong lalaki kansang kasingkasing nakulangan” nalit-agan sa sala? (b) Ingon sa gipakita sa panid 26, sa unsang paagi ang susama mahitabo karon bisag unsay edad sa usa?
16 Ang pagpugong-sa-kaugalingon, ang kataposang bahin sa bunga sa espiritu, makapaarang nato sa pagsalikway sa mga butang nga gidumtan sa Diyos. Kini makatabang nato sa pagpanalipod sa atong kasingkasing. (Prov. 4:23) Tagda ang kahimtang diha sa Proverbio 7:6-23, nga naghubit kon sa unsang paagi “ang usa ka batan-ong lalaki kansang kasingkasing nakulangan” nabiktima sa mga panglingla sa usa ka pampam. Siya nalit-agan sa dihang siya ‘miagi sa dalan duol sa eskina sa pampam.’ Siya tingali miadto sa maong dapit tungod sa pagkamausisaon. Sa hinanali lamang, ang batan-on wala makabantay nga siya gidaldal na ngadto sa hinungog nga dalan nga ‘naglangkit sa iyang kalag.’
17 Sa unsang paagi makalikay ang batan-on niining bug-at nga sala? Pinaagi sa pagpamati sa pasidaan: “Ayaw pagpasalaag ngadto sa iyang mga alagianan.” (Prov. 7:25) Kini ang leksiyon: Kon magpagiya kita sa espiritu sa Diyos, kinahanglang likayan nato ang makapatental nga mga situwasyon. Ang usa ka tawo mahimong mahisalaag ngadto sa hinungog nga dalan nga gisubay sa “usa ka batan-ong lalaki kansang kasingkasing nakulangan” pinaagi sa pagbalhinbalhin ug channel sa TV o pag-surf sa Internet. Tinuyo man o dili, basin makakita siyag mga esena nga makapapukaw sa sekso. Lagmit maugmad niya ang daotang batasan sa pagtan-awg pornograpiya, nga makadaot sa iyang tanlag ug sa iyang relasyon sa Diyos. Kini maglangkit sa iyang kinabuhi.—Basaha ang Roma 8:5-8.
18. Unsay mahimo sa usa ka Kristohanon aron mapanalipdan ang iyang kasingkasing, ug sa unsang paagi ang pagpugong-sa-kaugalingon nalangkit niini?
18 Siyempre, kita makapugong ug angayng magpugong sa kaugalingon pinaagi sa paglihok dayon kon makakitag makapukaw-sa-sekso nga hulagway. Apan labi pang maayo kon sa sinugdan gilikayan nato ang maong situwasyon! (Prov. 22:3) Ang pagbutang ug haom nga mga panalipod ug pagsunod niana nagkinahanglag pagpugong-sa-kaugalingon. Pananglitan, ang pagbutang sa kompiyuter sa dapit diin makita sa daghan maoy usa ka panalipod. Nakita sa uban nga mas maayong mogamit ug kompiyuter o motan-awg TV nga may kauban. Ang uban midesisyon nga dili mogamit sa Internet. (Basaha ang Mateo 5:27-30.) Hinaot himoon nato ang gikinahanglang mga lakang sa pagpanalipod sa atong kaugalingon ug sa atong pamilya aron makasimba kang Jehova “gikan sa hinlong kasingkasing ug gikan sa maayong tanlag ug gikan sa pagtuo nga walay pagkasalingkapaw.”—1 Tim. 1:5.
19. Unsa ang mga benepisyo kon kita magpagiya sa balaang espiritu?
19 Ang bunga nga ipatungha sa balaang espiritu mohatag ug daghang benepisyo. Ang kalumo ug hataas-nga-pailob magpatunhay sa pakigdait diha sa kongregasyon. Ang kalulot ug pagkamaayo makadugang sa kalipay sa pamilya. Ang pagtuo ug pagpugong-sa-kaugalingon motabang kanato sa pagpabiling suod kang Jehova ug hinlo sa iyang atubangan. Dugang pa, ang Galacia 6:8 nagpasalig kanato: “Siya nga nagapugas alang sa espiritu moani ug kinabuhing walay kataposan gikan sa espiritu.” Oo, pinasukad sa halad-lukat ni Kristo, gamiton ni Jehova ang balaang espiritu aron ihatag ang kinabuhing dayon niadtong nagpagiya sa espiritu.
Unsay Imong Tubag?
• Sa unsang paagi ang kalumo ug hataas-nga-pailob magpatunhay sa pakigdait sa kongregasyon?
• Unsay makatabang sa mga Kristohanon sa pagpakitag kalulot ug pagkamaayo sa panimalay?
• Sa unsang paagi ang pagtuo ug pagpugong-sa-kaugalingon makapanalipod sa kasingkasing sa usa ka Kristohanon?
[Mga Pangutana sa Pagtuon]
[Hulagway sa panid 24]
Sa unsang paagi malikayan ang panaglalis?
[Hulagway sa panid 25]
Ang pagtuon sa bunga sa espiritu makabenepisyo sa pamilya
[Hulagway sa panid 26]
Unsang kapeligrohan ang malikayan kon kita may pagtuo ug pagpugong-sa-kaugalingon?
