Be Hiẹ Nọ Dike Gbigbọ Jiwheyẹwhe Tọn Ni Deanana We Ya?
Be Hiẹ Nọ Dike Gbigbọ Jiwheyẹwhe Tọn Ni Deanana We Ya?
“Yinyọ́n wẹ gbigbọ towe; plan mi yì aigba tenọgligli tọn ji.”—PS. 143:10.
1, 2. (a) Dọ nujijọ delẹ he whenu Jehovah yí gbigbọ wiwe etọn zan do devizọnwatọ etọn lẹ tamẹ. (b) Be nujijọ tangan delẹ kẹdẹ whenu wẹ gbigbọ wiwe nọ yinuwa te ya? Basi zẹẹmẹ.
ETẸWẸ nọ wá ayiha towe mẹ to whenue a lẹnnupọndo nuyiwa gbigbọ wiwe tọn ji? Be hiẹ nọ flin nuyiwa jiawu Gideoni po Samsọni po tọn lẹ ya? (Whẹ. 6:33, 34; 15:14, 15) Vlavo hiẹ sọgan ko flin adọgbigbo Klistiani dowhenu tọn lẹ tọn kavi tudido Stefani tọn dile e nọte to Whẹdatẹn Daho Ju lẹ tọn nukọn. (Owalọ 4:31; 6:15) Na nuhe dù ojlẹ mítọn, be a nọ flin ayajẹ susu he mí nọ mọ to plidopọ akọjọpli tọn mítọn lẹ ji, tenọgligo-hinhẹn mẹmẹsunnu mítọn he yin wiwle do gànmẹ na kadaninọ yetọn wutu lẹ tọn, po jideji ayidego tọn he azọ́n yẹwhehodidọ tọn lọ tindo po ya? Apajlẹ ehe lẹpo yin kunnudenu nuyiwa gbigbọ wiwe tọn.
2 Be nujijọ tangan kavi ninọmẹ vonọtaun delẹ kẹdẹ whenu wẹ gbigbọ wiwe nọ yinuwa te ya? Lala. Ohó Jiwheyẹwhe tọn dọ gando Klistiani lẹ go dọ yé “to zọnlinzin gbọn gbigbọ dali,” ‘yin anadena gbọn gbigbọ dali,’ bo “to gbẹnọ gbọn gbigbọ dali.” (Gal. 5:16, 18, 25) Hogbe ehelẹ dohia dọ gbigbọ wiwe sọgan yinuwado gbẹzan mítọn ji zọnmii. Mí dona nọ biọ Jehovah egbesọegbesọ nado yí gbigbọ wiwe etọn do deanana linlẹn, hodidọ, po nuyiwa mítọn lẹ po. (Hia Psalm 143:10.) Eyin mí na dotẹnmẹ gbigbọ wiwe nado yinuwado gbẹzan mítọn ji, e na gọalọna mí nado wleawuna sinsẹ́n he na fakọna mẹdevo lẹ podọ enẹ na hẹn pipà wá na Jiwheyẹwhe.
3. (a) Naegbọn mí tindo nuhudo anademẹ gbigbọ wiwe tọn? (b) Kanbiọ tẹlẹ wẹ mí na gbadopọnna?
3 Naegbọn e yin nujọnu dọ gbigbọ wiwe ni deanana mí? Na huhlọn devo, yèdọ huhlọn de he jẹagọdo nuyiwa gbigbọ wiwe tọn, nọ jlo na deanana mí wutu wẹ. Huhlọn devo enẹ wẹ Owe-wiwe ylọ dọ “agbasalan,” ehe dlẹnalọdo ayilinlẹn ylando tọn agbasa mape mítọn tọn, yèdọ mape he mí dugu etọn sọn Adam dè. (Hia Galatianu lẹ 5:17.) To whelọnu lo, etẹwẹ mí dona wà nado dike gbigbọ Jiwheyẹwhe tọn ni deanana mí? Be afọdide yọ́n-na-yizan delẹ tin he mí sọgan ze nado nọavùnte sọta nuyiwadomẹji agbasalan mape mítọn tọn ya? Mì gbọ mí ni gbadopọnna kanbiọ ehelẹ dile mí na to hodọdo adà ṣidopo “sinsẹ́n gbigbọ tọn” he pò lẹ tọn ji, yèdọ “linsinsinyẹn, homẹdagbe, dagbewà, yise, walọmimiọn, mawazẹjlẹgo.”—Gal. 5:22, 23.
Walọmimiọn po Linsinsinyẹn po Nọ Yidogọna Jijọho to Agun Mẹ
4. Nawẹ walọmimiọn po linsinsinyẹn po nọ yidogọna jijọho to agun mẹ gbọn?
4 Hia Kọlọsinu lẹ 3:12, 13. Walọmimiọn to pọmẹ hẹ linsinsinyẹn nọ yidogọna jijọho to agun mẹ. Adà sinsẹ́n gbigbọ tọn awe ehelẹ nọ gọalọna mí nado nọ yinuwa hẹ mẹdevo lẹ po ojọmiọn po, gbọṣi abọẹ to whenue mẹde hẹn homẹgble mí, podọ ma nado nọ yiahọsu to whenue mẹdevo lẹ dọ kavi wà nuhe ma sọgbe lẹ na mí. Eyin gbemanọpọ de tin to míwlẹ po Klistiani hatọ de po ṣẹnṣẹn, linsinsinyẹn kavi homẹfa na gọalọna mí ma nado dapana mẹmẹsunnu kavi mẹmẹyọnnu mítọn, ṣigba nado wà nuhe go mí pé lẹpo bo didẹ nuhahun lọ. Be mí tindo nuhudo walọmimiọn po linsinsinyẹn po tọn to agun lọ mẹ nugbonugbo ya? Mọwẹ, na mímẹpo wẹ yin mapenọ.
5. Etẹwẹ jọ to Paulu po Balnaba po ṣẹnṣẹn, podọ etẹwẹ ehe dohia?
5 Lẹnnupọndo nuhe jọ to Paulu po Balnaba po ṣẹnṣẹn ji. Yé ko wazọ́n to pọmẹ na owhe susu na nukọnyiyi wẹndagbe lọ tọn. Dopodopo yetọn wẹ tindo jẹhẹnu dagbe lẹ. Etomọṣo, to nujijọ de whenu, “wiwọ́ sinsinyẹn de wá aimẹ, [to ṣẹnṣẹn yetọn] sọmọ bọ yé klan sọn yedelẹ go.” (Owalọ 15:36-39) Nujijọ ehe dohia dọ gbemanọpọ lẹ sọgan fọ́n to whedelẹnu, etlẹ yin to devizọnwatọ nugbonọ Jiwheyẹwhe tọn lẹ ṣẹnṣẹn. Eyin Klistiani de tindo gbemanọpọ hẹ yisenọ hatọ de, etẹwẹ e sọgan wà ma nado dike hodọdopọ yetọn ni lẹzun homẹgble tọn he sọgan hẹn haṣinṣan yetọn gble?
6, 7. (a) Ayinamẹ Owe-wiwe tọn tẹwẹ mí sọgan hodo whẹpo hodọdopọ de hẹ yisenọ hatọ mítọn nido lẹzun homẹgble tọn? (b) Ale tẹlẹ wẹ mí na mọyi eyin mí “nọ yawu nado sè, whleawu nado dọho, bo whleawu nado gblehomẹ”?
6 Gbemanọpọ he wá aimẹ to Paulu po Balnaba po ṣẹnṣẹn lọ fọ́n to ajiji mẹ bo wá lẹzun “wiwọ́ sinsinyẹn de.” Eyin Klistiani de mọdọ emi jẹ homẹgble ji to whenue e to hodọ do whẹho de ji hẹ yisenọ hatọ de, e na wà dagbe nado hodo ayinamẹ he tin to Jakọbu 1:19, 20 mẹ, he dọmọ: “Omẹ dopodopo dona nọ yawu nado sè, whleawu nado dọho, bo whleawu nado gblehomẹ; na homẹgble gbẹtọ tọn ma nọ wazọ́n dodowiwa Jiwheyẹwhe tọn.” Sọgbe hẹ ninọmẹ lọ lẹ, e sọgan tẹnpọn nado diọ hosọ lọ, ze hodọdopọ lọ do whedevonu, kavi yì whẹpo hodọdopọ lọ nido lẹzun homẹgble tọn.—Howh. 12:16; 17:14; 29:11.
7 Ale tẹlẹ wẹ mí na mọyi eyin mí hodo ayinamẹ ehe? Eyin Klistiani de gọ̀ biọ ede mẹ, hodẹ̀ do whẹho lọ ji, bo lẹnnupọndo lehe e sọgan na gblọndo do ji, ewọ na na dotẹnmẹ gbigbọ wiwe Jiwheyẹwhe tọn nado deanana na ẹn. (Howh. 15:1, 28) To anademẹ gbigbọ wiwe tọn glọ, e sọgan do walọmimiọn po linsinsinyẹn po hia. Gbọnmọ dali, ewọ na penugo nado hodo ayinamẹ he yin mimọ to Efesunu lẹ 4:26, 29 mẹ, he dọmọ: “Mì sọgan gblehomẹ, ṣogan mì waylando blo . . . Mì dike ohó gbigble de tọ́njẹgbonu sọn onù mìtọn mẹ blo, adavo ohó depope he yọ́n na mẹjlọdote dile ninọmẹ de biọ do, na e nido sọgan wà dagbe na sisètọ lẹ.” Na nugbo tọn, eyin mí yí walọmimiọn po linsinsinyẹn po dogo, mí na yidogọna jijọho po pọninọ agun lọ tọn po.
Nọ Yí Homẹdagbe po Dagbewà po Do Fakọna Whẹndo Towe
8, 9. Etẹwẹ homẹdagbe po dagbewà po yin, podọ nawẹ yé nọ yinuwado ninọmẹ whẹndo de tọn ji gbọn?
8 Hia Efesunu lẹ 4:31, 32; 5:8, 9. Homẹdagbe po dagbewà po nọ fakọnamẹ taidi jẹhọn kavi osin fifá nùnù to owhè ṣádada de mẹ. Yé nọ yidogọna ninọmẹ dagbe to whẹndo mẹ. Homẹdagbe yin jẹhẹnu họakuẹ de he nọ wá sọn ojlo nujọnu tọn tintindo na mẹdevo lẹ mẹ, yèdọ ojlo he nọ yin didohia gbọn nuyiwa alọgọnamẹ tọn po hogbe mẹtọnhopọn tọn lẹ yiyizan po dali. Taidi homẹdagbe, dagbewà yin jẹhẹnu dagbe de he nọ yin didohia gbọn nuyiwa he nọ hẹn ale wá na mẹdevo lẹ dali. E nọ yin hiadogona gbọn gbigbọ alọtútlú tọn dali. (Owalọ 9:36, 39; 16:14, 15) Ṣigba, dagbewà sọ bẹ nudevo hẹn.
9 Dagbewà zẹẹmẹdo walọ dagbe. E ma yin nuhe mí nọ wà lẹ kẹdẹ wẹ e bẹhẹn gba, ṣigba na taun tọn, nuhe mí yin. E taidi atin-sinsẹ́n de he vivi ganji bo ma gble sọn fidepope. Dagbewà he gbigbọ wiwe nọ gọalọna mí nado wleawuna nọ yinuwado gbẹzan Klistiani de tọn blebu ji.
10. Etẹwẹ sọgan yin wiwà nado gọalọna hagbẹ whẹndo tọn lẹ nado wleawuna sinsẹ́n gbigbọ tọn?
10 To whédo Klistiani tọn de mẹ, etẹwẹ sọgan gọalọna hagbẹ whẹndo tọn lẹ nado nọ yí homẹdagbe po dagbewà po do yinuwa hẹ ode awetọ? Oyọnẹn he pegan tintindo gando Ohó Jiwheyẹwhe tọn go nọ yí adà titengbe de wà. (Kọl. 3:9, 10) Tatọ́ whẹndo tọn delẹ nọ basi tito nado gbadopọnna sinsẹ́n gbigbọ tọn to Sinsẹ̀n-Bibasi Whẹndo tọn yetọn whenu. E ma nọ vẹawu nado basi dogbapọn mọnkọtọn. Gbọn azọ́nwanu dodinnanu tọn he tin to ogbè mìtọn mẹ lẹ yiyizan dali, mì nọ dín hosọ he dọhodo adà sinsẹ́n gbigbọ tọn dopodopo ji lẹ. Mì sọgan gbadopọnna hukan vude to osẹ dopodopo mẹ, bo nọ yí osẹ susu zan nado plọnnu do adà dopodopo ji. To nupinplọn lọ whenu, mì nọ hia bo nọ dọhodo wefọ he yin dide lẹ ji. Mì nọ dín aliho voovo lẹ nado yí nuhe mì plọn lẹ do yizan mẹ, bo nọ biọ Jehovah to odẹ̀ mẹ nado dona vivẹnudido mìtọn. (1 Tim. 4:15; 1 Joh. 5:14, 15) Be nupinplọn mọnkọtọn sọgan hẹn diọdo de wá aliho he mẹ hagbẹ whẹndo tọn lẹ nọ yinuwa hẹ ode awetọ te mẹ ya?
11, 12. Nawẹ Klistiani asu po asi po awe delẹ mọaleyi sọn nupinplọn do homẹdagbe ji mẹ gbọn?
11 Asu po asi po he ṣẹṣẹ wlealọ bo jlo nado tindo kọdetọn dagbe to alọwle yetọn mẹ de basi dide nado plọnnu sisosiso do sinsẹ́n gbigbọ tọn ji. Nawẹ yé mọaleyi gbọn? Asi lọ dọmọ: “Nususu pinplọn gando dagbewanyi didohia go ko yinuwado lehe mí nọ yinuwa hẹ ode awetọ mítọn do ji kakajẹ egbehe. Ehe zọ́n bọ mí nọ joawunanu bosọ nọ jonamẹ. Podọ e ko gọalọna mí nado nọ dọ ‘a basi’ kavi ‘jaale’ to whenue e biọ do mọ.”
12 Klistiani asu po asi po devo he to nuhahun tindo to alọwle yetọn mẹ de doayi e go dọ homẹdagbe ma tin to haṣinṣan yetọn mẹ. Yé basi dide nado plọnnu dopọ do homẹdagbe ji. Etẹwẹ yin kọdetọn lọ? Asu lọ flindọ: “Nuhe mí plọn do homẹdagbe ji gọalọna mí nado mọdọ kakati nado nọ vẹnudo ode awetọ, mí tindo nuhudo nado nọ dejido ode awetọ go, podọ nado nọ dín jẹhẹnu dagbe ode awetọ tọn. Mí jẹ ojlo nujọnu tọn tindo to nuhudo ode awetọ tọn lẹ mẹ ji. Homẹdagbenọ-yinyin biọ dọ ma nọ na tuli asi ṣie nado dọ linlẹn etọn tọ́n po awuvivo po bo ma na gblehomẹ na nuhe e dọ wutu. Ehe dohia dọ n’dona ze sakla ṣie do apadopo. Dile mí jẹ homẹdagbe dohia ji to alọwle mítọn mẹ, nudindọn mítọn lẹ jẹ didepo ji. Mí mọ kọgbọ.” Be whẹndo towe na mọaleyi sọn nupinplọn do sinsẹ́n gbigbọ tọn ji mẹ ya?
Nọ Do Yise Hia to Whenue Hiẹ Tin Dewe Ṣo
13. Nuhe sọgan yin owù na gbigbọnọ-yinyin mítọn tẹwẹ mí dona họ́ míde sọta?
13 Klistiani lẹ dona dike gbigbọ Jiwheyẹwhe tọn ni nọ deanana yé to whenue yé tin to gbangba kavi yedeṣo. To aihọn Satani tọn mẹ to egbé, yẹdide he hiọawu lẹ po ayidedai gblezọn lẹ po wẹ gbayipe. Ehe sọgan yin owù de na gbigbọnọ-yinyin mítọn. Etẹwẹ Klistiani de dona wà? Ohó Jiwheyẹwhe tọn na ayinamẹ mí dọmọ: “Mì de dihó lẹpo sẹ̀ po onú lánkan enẹ po, yèdọ ylanwiwa, bo yí walọmimiọn do kẹalọyi dido ohó lọ tọn do mì mẹ, he penugo nado whlẹn alindọn mìtọn lẹ gán.” (Jak. 1:21) Mì gbọ mí ni gbadopọnna lehe yise, yèdọ adà sinsẹ́n gbigbọ tọn devo, sọgan gọalọna mí nado gbọṣi wiweji to Jehovah nukọn do.
14. Nawẹ yise matindo sọgan dekọtọn do ylanwiwa mẹ gbọn?
14 Eyin mí tindo yise nujọnu tọn, mí na nọ pọ́n Jehovah Jiwheyẹwhe hlan di omẹ nujọnu tọn de. Eyin Jiwheyẹwhe ma yin omẹ nujọnu tọn de na mí, mí sọgan doalọ to ylanwiwa mẹ po awubibọ po. Lẹnnupọndo nuhe jọ to omẹ Jiwheyẹwhe tọn lẹ ṣẹnṣẹn to hohowhenu ji. Jehovah de onú ylankan he yé to wiwà to nuglọ lẹ hia yẹwhegán Ezekiẹli dọmọ: “Visunnu gbẹtọ tọn, hiẹ ko mọ nuhe mẹho owhé Islaeli tọn gbè tọn lẹ to wiwà to zinvlu mẹ, omẹ dopodopo to abò boṣiọ tọn etọn lẹ mẹ? Na yé dọmọ, OKLUNỌ ma mọ mí gba; OKLUNỌ ko gbẹ́ aigba lọ dai.” (Ezek. 8:12) Be hiẹ doayi nuhe hẹn nuhahun lọ wá go ya? Yé ma yise dọ Jehovah yọ́n nuhe yé to wiwà lẹ. Jehovah ma yin omẹ nujọnu tọn de na yé gba.
15. Nawẹ yise dolido tintindo to Jehovah mẹ nọ basi hihọ́na mí gbọn?
15 To vogbingbọn mẹ, lẹnnupọndo apajlẹ Josẹfu tọn ji. Dile e tlẹ dẹn do whẹndo po omẹ etọn lẹ po, Josẹfu gbẹ́ nado deayọ hẹ asi Pọtifali tọn. Etẹwutu? E dọmọ: “Na yẹn sọgan wà oylan daho he do, bo waylan do Jiwheyẹwhe?” (Gẹn. 39:7-9) Mọwẹ, Jehovah yin omẹ nujọnu tọn de na ẹn. Eyin Jiwheyẹwhe yin omẹ nujọnu tọn de na mí, mí ma na nọ pọ́n aihundida gblezọn lẹ kavi wà nudepope to nuglọ he mí yọnẹn dọ e ma na hẹn homẹ Jiwheyẹwhe tọn hùn. Mí na tindo gbemima dopolọ taidi psalm-kantọ lọ he jihàn dọmọ: “Yẹn na yí ayiha pipé do zinzọnlin to otogun ṣie mẹ. Yẹn ma na yí onú ylankan de do nukọn nukun ṣie tọn.”—Ps. 101:2, 3.
Nọ Họ́ Ahun Towe Gbọn Mawazẹjlẹgo Didohia Dali
16, 17. (a) Dile owe Howhinwhẹn lẹ tọn basi zẹẹmẹ etọn do, nawẹ “yọpọ sunnu de he zinzin pò na” yin yẹdoklọ biọ ylando mẹ gbọn? (b) Sọgbe hẹ yẹdide he tin to weda 26tọ ji, nawẹ onú dopolọ sọgan jọ do mẹde go to egbehe mahopọnna owhe etọn gbọn?
16 Mawazẹjlẹgo he yin adà godo tọn sinsẹ́n gbigbọ tọn, nọ hẹn mí penugo nado gbẹ́ nuhe Jiwheyẹwhe gblewhẹdo lẹ dai. E sọgan gọalọna mí nado họ́ ahun mítọn. (Howh. 4:23) Lẹnnupọndo nujijọ he yin nùdego to Howhinwhẹn lẹ 7:6-23 mẹ ji, ehe basi zẹẹmẹ lehe “yọpọ sunnu de he zinzin pò na” jẹ omọ̀ galọtọ de tọn mẹ do tọn. E yin yẹdoklọ to whenue ewọ “juwayi to tòhomẹ, to họ̀gosu [galọtọ lọ tọn] dali.” Vlavo tlintlindo dindin wẹ na ko hẹn ẹn nado gbọn finẹ. E ma yawu doayi e go dọ emi to yinyin anadena yì aliho nulú tọn de ji, ehe ‘bẹ alindọn etọn hẹn.’
17 Nawẹ jọja ehe sọgan ko dapana nuṣiwa mẹhusudo tọn ehe gbọn? Gbọn tonusisena avase lọ he dọmọ: “A buali yì omọ́ etọn ji blo” dali. (Howh. 7:25) Mí sọgan plọn nude sọn e mẹ: Eyin mí jlo dọ gbigbọ Jiwheyẹwhe tọn ni deanana mí, mí ma dona nọ ze míde do ninọmẹ whlepọn tọn lẹ mẹ. Dopo to aliho he mẹ mẹde sọgan buali yì aliho nulú tọn “yọpọ sunnu de he zinzin pò na” tọn ji lẹ mẹ wẹ gbọn nọtẹn voovo televiziọn kavi Internet tọn lẹ ji yìyì matin yanwle depope dali. Vlavo e yọnẹn kavi lala, e sọgan yì jẹ yẹdide he nọ fọ́n ojlo zanhẹmẹ tọn dotenamẹ lẹ ji. E sọgan jẹ awuwlena aṣa gblezọn lọ nado nọ pọ́n yẹdide fẹnnuwiwa tọn ji vudevude, ehe na tindo kọdetọn ylankan do ayihadawhẹnamẹnu etọn po haṣinṣan etọn hẹ Jiwheyẹwhe po ji. Ehe sọgan gando ogbẹ̀ etọn lọsu go.—Hia Lomunu lẹ 8:5-8.
18. Afọdide tẹlẹ wẹ Klistiani de sọgan ze nado basi hihọ́na ahun etọn, podọ nawẹ afọdide ehelẹ nọ biọ mawazẹjlẹgo didohia gbọn?
18 Na nugbo tọn, mí sọgan bosọ dona nọ do mawazẹjlẹgo hia gbọn afọdide niyaniya tọn zize to whenue yẹdide he nọ fọ́n numọtolanmẹ agọ̀ dote de sọawuhia to nukọn mítọn dali. Ṣigba, lehe e na yọ́n do sọ eyin mí dapana ninọmẹ mọnkọtọn to tintan whenu! (Howh. 22:3) E nọ biọ dọ mí ni do mawazẹjlẹgo hia, eyin mí na ze yanwle he na basi hihọ́na mí lẹ dai bo yinuwa to kọndopọ mẹ hẹ yé. Di apajlẹ, ọdinatẹẹ mítọn zizedo fihe mẹlẹpo sọgan mọ ẹn te sọgan basi hihọ́na mí. Mẹdelẹ mọdọ e nọ yọ́n hugan nado zan ọdinatẹẹ kavi pọ́n televiziọn to whenue mẹdevo lẹ tin to finẹ. Mẹdevo lẹ de ma nado nọ yì Internet ji. (Hia Matiu 5:27-30.) Mì gbọ mí ni ze afọdide he jẹ lẹpo nado basi hihọ́na míde po whẹndo mítọn po, nado sọgan to Jehovah sẹ̀n “sọn ahun wiwe de mẹ podọ sọn ayihadawhẹnamẹnu dagbe de mẹ podọ sọn yise matin yẹnuwiwa mẹ.”—1 Tim. 1:5.
19. Ale tẹlẹ wẹ tin to dotẹnmẹ nina gbigbọ wiwe nado deanana mí mẹ?
19 Sinsẹ́n he gbigbọ wiwe nọ gọalọna mí nado wleawuna lẹ nọ hẹn dona susu wá. Walọmimiọn po linsinsinyẹn po nọ yidogọna jijọho to agun mẹ. Homẹdagbe po dagbewà po nọ zọ́n bọ ayajẹ nọ tin to whẹndo mẹ. Yise po mawazẹjlẹgo po nọ gọalọna mí nado dọnsẹpọ Jehovah bo gbọṣi wiweji to nukọn etọn. Humọ, Galatianu lẹ 6:8 na mí jide dọmọ: “Ewọ he to dido sọgbe hẹ gbigbọ na gbẹ̀n ogbẹ̀ madopodo sọn gbigbọ lọ dè.” Mọwẹ, to dodonu ofligọ Klisti tọn ji, Jehovah na yí gbigbọ wiwe etọn zan nado na ogbẹ̀ madopodo mẹhe nọ dike gbigbọ lọ ni deanana yé lẹ.
Nawẹ Hiẹ Na Na Gblọndo Gbọn?
• Nawẹ walọmimiọn po linsinsinyẹn po nọ yidogọna jijọho to agun mẹ gbọn?
• Etẹwẹ sọgan gọalọna Klistiani lẹ nado nọ do homẹdagbe po dagbewà po hia to whégbè?
• Nawẹ yise po mawazẹjlẹgo po nọ gọalọna Klistiani de nado họ́ ahun etọn gbọn?
[Kanbiọ Oplọn tọn lẹ]
[Yẹdide to weda 24]
Etẹwẹ hiẹ sọgan wà ma nado dike hodọdopọ de ni lẹzun homẹgble tọn?
[Yẹdide to weda 25]
Nupinplọn do sinsẹ́n gbigbọ tọn ji sọgan hẹn ale wá na whẹndo towe
[Yẹdide to weda 26]
Owù tẹlẹ wẹ mí nọ dapana gbọn yise po mawazẹjlẹgo po didohia dali?