Illit Guutip anersaavanit siulersortippit?

“Anersaarpit ajunngitsup ingerlatillinga nunap narsalittaani.” — TUSSIAAT 143:10.

1, 2. (a) Pisimasunik Jehovap kiffaminut iluaqutaasumik anersaaminik illernartumik atuiffiinik eqqaasaqarit. (b) Anersaaq illernartoq pisuni immikkut ittuniinnaq sulisarpa? Nassuiaruk.

ANERSAAP illernartup qanoq sulisarnera eqqarsaatigigaangakku suut eqqaasarpigit? Gideonip Samsonillu suliaat imaannaanngitsut eqqaasarpigit? (Eqqartuussisut 6:33, 34; 15:14, 15) Imaluunniit kristumiut siulliit nakimaannerat Stefanusilluunniit eqqissisimarpasilluni Killisiuisoqatigiinnut sassarnera eqqaasarpiuk? (Apustilit Suliaat 4:31; 6:15) Ullumikkut immaqa eqqaassavatit ataatsimeersuarnitsinni nunanit tamalaaneersunit peqataaffigineqartartuni nuannaarneq, qatanngutivut kalluunnaveersaartuunerput pissutigalugu parnaarussaaqqasut aalajaannerat oqaluussinermiluunniit siuariartornersuaq. Tamakku tamarmik anersaap illernartup sulineranut takussutissaapput.

² Anersaaq illernartoq pisuni pissutsiniluunniit immikkut ittuniinnaq sulisarpa? Naamik. Guutip oqaasiani allassimavoq kristumiut ‘anersaamut naapertuuttumik saqisut’, ‘anersaamit siulersorneqartut’ aamma ‘anersaamut naapertuuttumik inuusut’. (Galatiamiut 5:16, 18, 25, NV) Oqariartaatsini taakkunani erserpoq anersaaq illernartoq inuunitsinnut sunniuteqartuarsinnaasoq. Jehova ullut tamaasa qinnuigisariaqarparput anersaani illernartoq iluaqutigalugu eqqarsaatitsigut, oqaatsitsigut iliuutsitsigullu siulersoqqulluta. (Atuaruk Tussiaat 143:10). Anersaaq inuunitsinnut sunniuteqarluartikkutsigu allanut nakussatsissutaasumik Guutimillu unnersiutiginnissutaasumik inerititaqartitsissaaq.

3. (a) Sooq anersaamit illernartumit siulersortittariaqarpugut? (b) Apeqqutit suut sammissavavut?

³ Anersaamit illernartumit siulersortinnissarput sooq pingaaruteqarpa? Nukeqarmat allamik uagutsinnut sunniuteqartartumik, nukimmik anersaap illernartup sulineranut akerliusumik. Nukik taanna taaneqarpoq “uinik”-mik, tassa uinitta ajortiliusup ajortulioqqajaasarnera, naammalluinnanngissuseq Adamimut kinguaajugatta kingornussarput. (Atuaruk Galatiamiut 5:17). Guutip anersaavanit siulersortikkumalluta susinnaagatta? Uinngup ajortiliusup uagutsinnut pissaaneqarnera akiorniarlugu atoriaannaasunik imminut najoqqutassissinnaavugut? Apeqqutit taakku eqqarsaatigeriartigit anersaap inerititaanut ilaasut eqqaaneqartut sinneri arfinillit —  “kamaginninneq, inussiarnissuseq, ajunngissuseq, upperneq, saamaneq, imminut naalakkersinnaaneq” — sammitillutigit. — Galatiamiut 5:22, 23, NV.

Saamaneq kamaginninnerlu ilagiinni eqqissinermik siuarsaasarput

4. Saamaneq kamaginninnerlu ilagiinni eqqissinermik qanoq siuarsaasarpat?

⁴ Atuakkit Efesosimiut 4:2, 3. Saamaneq kamaginninnerlu, imminnut tapertariillutik ilagiinni eqqissinermik siuarsaasarput. Anersaalli inerititaanut ilaasut taakku marluk kiinneraartuunissatsinnut, puffannartoqartillugu eqqissisimanissatsinnut allallu inussiarniitsumik oqaaseqarlutilluunniit iliuuseqaraangata akiniaannginnissatsinnut iluaqutigisarpavut. Uppeqatitta arlaat isumaqatigiinngissuteqarfigigutsigu kamaginninneq, imaluunniit naammagittarneq, qatanngutitta alannginnissaanut iluaqutigissavarput, eqqisseqatigeqqinniarlugulu sapinngisarput tamaat iliuuseqassaagut. Saamaneq kamaginninnerlu ilagiinni ilumut pisariaqartinneqarpat? Aap, tamattami naammalluinnanngitsuuvugut.

5. Paulusi Barnabalu suppat, tamannalu sumut erseqqissaataava?

⁵ Assersuutigeriartigu Paulusip Barnaballu isumaqatigiinnginnerat. Taakku nutaarsiassap nuannersup siammarnerunissaa anguniarlugu  ukiorpassuarni suleqatigiissimapput. Tamarmik immikkut nuannersunik pissuseqarput. Ilaannili ‘assorsuaq isumaqatigiinngilerput avissaarlutillu’. (Apustilit Suliaat 15:36-39) Pisimasumi tamatumani erseqqissarneqarpoq allaat Guutimut kiffaasut aalajaatsut ilaannikkut isumaqatigiinngissuteqalersinnaasartut. Kristumiu uppeqatinilu isumaqatigiinngikkunik, isumaqatigiinnginnertik oqqanninnguuteqqunagu ataavartuuteqqunagulu susinnaava?

6, 7. (a) Uppeqammik oqaloqateqarneq oqqanninnguuteqqunagu siunnersuut Biibilimiittoq suna malinneqarsinnaava? (b) ‘Tusarasuartarnikkut, oqalukkumaataartuunikkut kamajaatsuunikkullu’ suna anguneqartarpa?

⁶ Biibilimik nutsikkat ilaanni allassimavoq Paulusi Barnabalu sakkortuumik isumaqatigiinngileriataartut. Uppeqat arlaannik oqalliseqatigitillugu kamaqqajaalluni malugigaanni Jaaku 1:19, 20-mi siunnersuutigineqartoq malillugu iliornissaq silatusaarnerussaaq: “Kinaluunniit tusarasuartarli, kisianni oqalukkumaataartuulluni kamajaatsuullunilu, inuummi kamannera Guutip iluarisaanik sumilluunniit kinguneqarneq ajorpoq.” Pissutsit qanoq innerat apeqqutaalluni — oqaloqatigiinnerup oqqanninnguutinnginnerani — allamik oqaloqatigiissuteqalerniartoqarsinnaavoq kingusinnerusukkulluunniit oqaloqatigeeqqinniartoqarsinnaalluni utoqqatseriarluniluunniit qimagutiinnartoqarsinnaalluni. — Ussatit 12:16; 17:14, NV; 29:11.

⁷ Siunnersuummik tamatuminnga malinninnikkut suna anguneqartarpa? Kristumiup eqqissiiminissami utaqqineratigut, qinunermigut qanorlu pitsaanerpaamik akisinnaanerminik eqqarsaatiginninnermigut Guutip anersaava imminut sunniuteqarluarsinnaanngortittarpaa. (Ussatit 15:1, 28) Guutip anersaavata sunniineratigut saamanermik kamaginninnermillu ersersitsisinnaavoq. Taamaalilluni siunnersuummik Efesosimiut 4:26, 29-miittumik matuminnga malinnissinnaanngortarpoq: “Kamassimariannguaritsi, kisiannili ajortuliornasi. . . . Oqaatsinik mikiarsimasunik qanissinnit aniatitaqarniaqinasi, oqaatsinilli ajunngitsuinnarnik aniatitaqaritsi ineriartornissamut pisariaqartunik, tamakku tusartunut pilluaatissaaqqullugit.” Aap, saamasuullutalu kamaginnittuugaangatta ilagiinni eqqissinermik ataasiussusermillu siuarsaaqataasarpugut.

Ilaquttatit nukissaqalersikkit inussiarnersuunikkut ajunngitsuunikkullu

8, 9. Inussiarnersuuneq ajunngitsuunerlu suuppat, pissuserineqartussallu taakku angerlarsimaffinni pissutsinut qanoq sunniuteqartarpat?

⁸ Atuakkit Efesosimiut 4:31, 32; 5:8, 9. * Inussiarnersuuneq ajunngitsuunerlu anorsaannguup erngullu nillaarissup kiattumi nukissaqalernarlutillu inuummarissinartarnerattut nukissaqalersitsisarlutillu inuummarissisitsisarput. Pissuserineqartussat taakku ilaqutariinni pissutsinik nuannersuutitseqataasarput. Inussiarnersuuneq pissusiuvoq iluarinartoq allanik ilumoorluni soqutiginninnermit — allanik ikiuiumatunikkut soqutigittartumillu oqaluttarnikkut ersertartumit — aallaaveqarami. Ajunngitsuuneq inussiarnersuunertut  pissusiuvoq nuannersoq allanut iluaqutaasumik iliuuseqarnikkut ersertartoq. Aamma tukkortuunermik ilisarnaateqarpoq. (Apustilit Suliaat 9:36, 39; 16:14, 15) Ajunngitsuunerli aamma allamut tunngassuteqarpoq.

⁹ Ajunngitsuuneq ileqqorissuuneruvoq. Ajunngitsuuneq iliuutsitsinnut attuumassuteqaannarani aammali kinaassutsitsinnut attuumassuteqarpoq. Paarnamut inerilluarsimasumut qaavatigut iluatigullu ajortissimasortaqanngitsumut assersuunneqarsinnaavoq. Tamatumunnga assingusumik ajunngissuseq anersaap illernartup inerititarisartagaa kristumiup inuuneranut tamarmut sunniuteqartarpoq.

10. Ilaqutariinniittut anersaap inerititaanik ineriartortitsinissaannut ikiorumallugit susoqarsinnaava?

¹⁰ Inoqutigiinni kristumiuniittut imminnut inussiarnersumik pisarnissaminnut ajunngisaarfigeqatigiittarnissaminnullu suna iluaqutigisinnaavaat? Guutip oqaasianik eqqorluartumik ilisimasaqarnissaq pingaaruteqarpoq. (Kolossemiut 3:9, 10) Ilaqutariinni ittuusut ilaasa unnummi ilaqutariittut anersaakkut ittunik sammisaqarfimminni anersaap inerititaa pillugu atuaqqissaartarnissartik aalajangiussimavaat. * Sapaatit-akunneri tamaasa immikkoortualuit sammineqartarsinnaapput, aamma sapaatip-akunnerpaalui atorneqarsinnaapput anersaap inerititaanut ilaasut ilaannik ataatsimik sammisaqarnermut. Taakkua sammitillugit allassimaffiit innersuussutigineqartut tamarmik atuarneqartariaqarlutillu oqaloqatigiissutigineqartariaqarput. Anersaap inerititaanut ilaasunik qanoq ersersitsisinnaanerlutit eqqumaffigisaruk, Jehovalu qinnuigisiuk ilungersornisi pilluaqqoqqullugit. (1 Timotheusi 4:15; 1 Johannesi 5:14, 15) Taamatut atuaqqissaartarneq ilaqutariinniittut imminnut pinneriaasiannik ilumut allannguisitsisinnaava?

11, 12. Aappariit kristumiut marluk inussiarnisaarneq pillugu atuaqqissaarneq qanoq iluaqutigaat?

¹¹ Aappariit inuusuttut pilluarlutik aappariikkusuttut aalajangerput anersaap inerititaa pillugu iternga tikillugu misissuisarlutik atuaqqissaartarniarlutik. Qanoq iluaqutigaat? Nuliaasoq ima oqaluttuarpoq: “Paasileratsigu ilumoorfigeqatigiinneq inussiarnersuunermut tunngassuteqartoq immitsinnut periaatsitsigut malunnartumik allannguivugut. Taamaalilluta ingasaassinianngitsuunissaq isumakkeerfiginnissinnaanerlu ilikkarparput. Aamma naleqqukkaangat qujasarnissarput utoqqatsertarnissarpullu ilikkarparput.”

¹² Aappariit kristumiut allat aappariinnerminni ajornartorsiutillit paasilerpaat aappariittut imminnut inussiarnersaarfigineq ajorlutik. Aalajangerput inussiarnisaarnermut tunngasunik atuaqqissaaqatigiittarniarlutik. Qanoq  kinguneqarpa? Uiusoq ima oqaluttuarpoq: “Pissuserineqartussaq tamanna pillugu atuaqqissaarnerput iluaqutigaarput aappariittut immitsinnut ajortumik pissutiginiagaqarsorisannginnissatsinnut aappattalu pissusiinik ajunngitsunik isiginiaanerunissatsinnut. Aappatta pisariaqartitaanik eqqumaffiginninnerulerpugut. Inussiarnersunngorama nuliara eqqarsaatiminik nangaanani oqaatiginneqqullugu kajumissaartalerpara oqaasii ajuallaatiginagit. Imminut pingaartinnersuara nunusariaqartarpara. Aappariittut immitsinnut inussiarnerfiginerujartortilluta imminut illersoqqajaannginneruleriartorpugut. Oqiliallannaqaaq.” Anersaap inerititaa pillugu atuaqqissaarneq illit ilaquttannut iluaqutaassava?

Kisimiikkaluaraangavilluunniit upperluartuarit

13. Jehovamut attaveqarnitsinnut akornutaasinnaasut suut eqqumaffigisariaqarpavut?

¹³ Kristumiut Guutip anersaavanit siulersortittariaqarput allanik peqateqartillutik aamma kisimiitsillutik. Ullumikkut silarsuarmi kanngunartunik asserpassuaqarlunilu kinguaassiuutitigut inuunerluttortalinnik aliikkutassarpassuaqarpoq Jehovamut attaveqarnitsinnut akornutigisinnaasatsinnik. Kristumiut susariaqarpat? Biibilimi ima allassimavoq: “Minguttuussuseq tamaat ajungaassuserlu tamaat iperarsigit, qanilaarlusilu oqaaseq ilissinnut ikkussaasimasoq tarnissinnillu annatsitsisinnaasoq ilassiniarsiuk.” (Jaaku 1:21) Misissoriartigu upperneq, aamma anersaap inerititaanut ilaasoq, Jehovap isaani minguitsuujuarnissamut qanoq iluaqutigisinnaagipput.

14. Uppernikinneq sooq eqqunngitsuliornermik kinguneqarsinnaava?

¹⁴ Uppissuseqarutta Jehova Guuti piviusutut isigissavarput. Guuti piviusutut isiginngikkutsigu eqqunngitsulioriaannaassaagut. Maluginiaruk itsaq Guutip innuttaasa akornanni qanoq pisoqartoq. Jehovap pruffiiti Ezekieli paasitippaa isertorluni maajunnartuliortoqartoq. Ima oqarpoq: “Illit inuk, takuigit Israelikkut utoqqaanertaat tamarmik iniminni taartuni assilialinni [guutipilunnik assilialinni, 1990] qanoq iliortut? Oqarput: [Jehovap] isiginngilaatigut, [Jehovap] nuna qimassimavaa.” (Ezekieli 8:12) Maluginiarpiuk ajornartorsiummut suna pissutaaqataanersoq? Upperinngilaat Jehovap iliuuserisatik ilisimagai. Taakkua Jehova piviusutut isiginngilaat.

15. Jehovamut upperluarneq qanoq illersuutigissavarput?

¹⁵ Tamatuma paarlattuanik Josefip qanoq iliorsimanera maluginiariaruk. Taassuma ilaquttani inuiaqatinilu najunngikkaluarlugit Potifarip nulia allasioqatigiumanngilaa. Sooq? Ima oqarpoq: “Qanoq taama kanngunartigisumik iliussaanga Guutimut ajortuliorlunga?” (1 Mosesi 39:7-9) Aap, Jehova taassumunnga piviusuuvoq. Uagut Jehova piviusutut isigigutsigu kinguaassiuutitigut inuunerluttortalinnik aliikkutaqartarnavianngilagut kisimiikkaangattaluunniit Guutip iluarinngisaanik iliortarnaviarata. Tussiaasiortup aalajangersimaneratut aalajangissaagut, taanna ima erinarsorami: “Uummatikkut assuarnaallunga inuujumavunga uanga illunni. Iluanngitsuliungaarnermik takusaqarumanngilanga.” — Tussiaat 101:2, 3.

 Imminut naalakkersinnaanikkut uummatit paariuk

16, 17. (a) Ussatini allaatigineqartutut ‘nukappiatsiap sianiitsup’ qanoq ililluni ajortip nigaa napitiffigaa? (b) Qassinilluunniit ukioqaraluarutta ullumikkut uagutsinnut tamatumunnga assingumik qanoq pisoqarsinnaava? (Takuuk asseq qupp. 28-miittoq).

¹⁶ Imminut naalakkersinnaaneq, anersaap inerititaanut ilaasut Galatiamiunut allakkani eqqaaneqartut kingullersaat, Guutip assuarisaasa naaggaarnissaannut iluaqutigisinnaavarput. Pissusiuvoq uummatitta paarinissaanut iluaqutigisinnaasarput. (Ussatit 4:23) Eqqarsaatigeriakkit Ussatit 7:6-23-mi allaatigineqartut. Allaatigineqarpoq “nukappiatsiaq sianiitsoq” arnap atortittartup qaninniarujoorneranut nakkaannartoq. Taassumannga napitinneqarpoq “arnap illuata teqeqquata eqqaani” angalaartilluni. Immaqa sapiiserluni alapernaallunilu taassuma najugaqarfiata eqqaanukarsimavoq. Kingusinaareerluni paasilerpaa tammartitaalerluni inuuninilu navianartorsiortillugu.

¹⁷ Angut inuusuttoq taanna qanoq ililluni ajunaarutaasumik taamatut kukkunaveersaarsinnaasimagaluarpa? Mianersoqqussummik matuminnga eqqumaffiginninnermigut: “Arnap . . . aqqusininnguini tammartitaaniaqinak.” (Ussatit 7:25) Tamanna sumik ilinniarfigisinnaavarput? Guutip anersaavanit siulersortikkumagutta imminut ussernartorsiortittassanngilagut. Ilaatigut sapiiserluni silatusaarnanilu ‘nukappiatsiatut sianiitsutut’ iliortoqarsinnaavoq siunertaqarnani tv-mi kanalit nuutsittaqattaarlugit imaluunniit siunertaqarnani internetterluni. Piaarinaatsoornikkut — piaarinaatsoornaluniluunniit — isiginnaagassiamik kinguaassiuutitigut atoqatigiinnissamut pileritsannartortalimmik siumuisoqarsinnaavoq, aamma pornografiimik isiginnaartarneq ileqquliukkiartuaarneqarsinnaavoq. Tamanna ilerasulissutaalersinnaavoq Guutimullu attaveqarnermut ajorluinnartunik kinguneqarsinnaalluni. Aap, allaat inuuneq annaaneqarsinnaavoq. — Atuakkit Romamiut 8:5-8.

18. Uummat paariumallugu imminut qanoq najoqqutassittoqarsinnaava, tamatumunngalu tunngatillugu imminut naalakkersinnaaneq qanoq pingaaruteqarpa?

¹⁸ Soorunami assinik pileritsassaarutinik siumugaqaraangatta imminut naalakkersinnaasariaqarlutalu ingerlaannaq iliuuseqartariaqarpugut. Kisianni pitsaanerussannginnerpa tamakkuninnga siumugaqarnaveersaareertarutta? (Ussatit 22:3) Naleqquttunik imminut najoqqutassissagaanni taakkuninngalu aalajangiusimannissagaanni imminut naalakkersinnaasariaqarpoq. Assersuutigalugu computerimik inimut ataatsimoorussamut, ilaqutariinniittut tamarmik isersimaarfigisartagaannut, inissiineq illersuutaasinnaavoq. Ilaasa taamaallaat allanik najuuttoqartillugu computerertarneq fjernsynertarnerluunniit pitsaanerutippaat. Allat aalajangersimapput internettertarniarnatik. (Matthæusi 5:27-30) Imminut illersorumalluta ilaquttavullu illersorumallugit periusissatsinnik piareersimatitsisa ‘uummammit minguitsumit ilerasuuteqannginnermillu uppernermillu piviusumik naggueqartumik’ Jehovamut kiffartorsinnaaniassagatta. — 1 Timotheusi 1:5. 

19. Anersaamit illernartumit siulersortinnerput sunik iluaqutissartaqarpa?

¹⁹ Anersaap inerititaanik inerititaqarneq iluaqutissartarpassuaqarpoq. Saamaneq kamaginninnerlu ilagiinni eqqissinermik siuarsaasarput. Inussiarnerneq ajunngissuserlu ilaqutariinniittut attaveqatigiilluarnerulissutigisarpaat. Upperneq imminullu naalakkersinnaaneq Jehovamut attaveqarluarnissatsinnut taassumalu isaani minguitsuujuarnissatsinnut iluaqutigisarparput. Aamma Galatiamiunut allakkani 6:8-mi ima uppernarsaavigineqarpugut: “[Anersaamut] siaruarterisup anersaamit inuuneq naassaanngitsoq katersugariumaarpaa.” Aap, Jiisusip utertitsissutitut pilliutaa tunngavigalugu, Jehovap anersaani illernartoq iluaqutigalugu anersaaminit siulersortittut inuunermik naassaanngitsumik tuniumaarpai. (w11 04/15-E)

[Quppernerup ataani ilanngussat]

Qanoq akissavit?

• Saamaneq kamaginninnerlu ilagiinni eqqissinermut qanoq siuarsaataasarpat?

• Kristumiut ilaqutariit iluanni inussiarnisaarnissamut ajunngisaarnissamullu suna iluaqutigisinnaavaat?

• Kristumiup uummammi paarinissaanut upperneq imminullu naalakkersinnaaneq qanoq iluaqutigisarpai?

[Atuaqqissaarnermi apeqqutit]

[Qupp. 26-mi assiliartaq]

Oqaloqatigiinnerup oqqanninnguunnissaa qanoq pinngitsoortinneqarsinnaava?

[Qupp. 27-mi assiliartaq]

Anersaap inerititaa pillugu atuaqqissaarneq ilaquttannut iluaqutaasinnaavoq

[Qupp. 28-mi assiliartaq]

Uppissuseqarnikkut imminullu naalakkersinnaanikkut navianartut suut pinaveersaarneqartarpat?