Nˈoknasˈijxëm etsë Diosë myëjää xytyuˈumoˈoyëm
Nˈoknasˈijxëm etsë Diosë myëjää xytyuˈumoˈoyëm
“Yëˈë mmëjää oy yëˈë; waˈanëts xytyuˈumoˈoy mä ja it naxwinyëdë diˈib tëyën.” (SAL. 143:10)
1, 2. 1) Nigäjpx mä Jyobaa dyajtuunyë myëjää parë tpudëjkë pënaty mëduunë. 2) ¿Yëˈë yˈandijpy ko jaayë Diosë myëjää tyuny extëm të yajnigajpxy? Nimaytyäˈäk.
¿TI MIIMP mwinmäˈänyoty ko xymyëdoy yajmaytyaˈaky mä wiˈix tyunyë Diosë myëjää? Waˈan myiny mä wiˈixë Gedeón mëdë Sansón tmëmadaktë myëtsip (Jue. 6:33, 34; 15:14, 15). O waˈan xyjamyetsy wiˈixë Jesusë yˈëxpëjkpë dyaˈijxëdë jotmëkˈäjtën o wiˈixë Esteban kyaj tsyëˈk jyäˈäwë ko twinguwäˈkë pënaty yajkutujktëp (Apos. 4:31; 6:15). Tyam nan nˈijxëm ko Jyobaa tuumbë myëjää, extëm ko nˈijxëm ja jotkujkˈäjtën diˈib jaˈäjtp ko tyuˈukmuktë nmëguˈukˈäjtëm diˈib tsoˈondëp kanäk paˈis mä tyunyëtyë mëjpë tuˈukmujkën. Nanduˈun ko tmëmadäˈäktë yˈittët pujxndëgoty mët ko kyaj tijaty ttuktëkëyäˈändë ets ko nˈijxëm wiˈix myëjwiin kyajaajë tuunk mä nˈëwäˈkx ngäjpxwäˈkxëm.
2 ¿Yëˈë tyäˈädë yˈandijpy ko jaayë tyunyë Diosë myëjää extëm të yajnigajpxy? Kyaj. Pesë Biiblyë jyënaˈany ko Dios mëduumbë jyukyˈattë extëm tyukˈixëdë ja “espiritë santë”, tyuˈuyoˈoytyë “mët ja espiritë santë” ets tyuˈumoˈoyëdë “ja espiritë santë” (Gal. 5:16, 18, 25). Tyäˈädë yëˈë xytyukˈijxëm ko Diosë myëjää mbäät xëmë tyuny mä ëtsäjtëm. Pääty jëjpˈam nˈamdoˈojëmë Jyobaa myëjää tuˈuk tuˈugë xëë parë ttuˈumoˈoyëdë jot winmäˈäny, xypyudëjkëm wiˈix mbäät ngäjpx nmaytyakëm ets wiˈix mbäät tijaty nduˈunëm (käjpxë Salmo 143:10). Pën nasˈijxëm etsë Diosë myëjää xytyuˈumoˈoyëm, ta nëjkxë Dios myëjpëtsemy mä tijaty nduˈunëm ets nan nëjkxëbë nmëguˈukˈäjtëm ttukˈoyˈattë.
3. 1) ¿Tiko jyëjpˈamëty ets nasˈijxëm parë Diosë myëjää xytyuˈumoˈoyëm? 2) ¿Tijaty yajtëˈëwën yaˈˈatsoojëmbitäämp?
3 ¿Tiko jyëjpˈamëty ets nasˈijxëm parë Diosë myëjää xytyuˈumoˈoyëm? Yëˈko taa jatuˈugë mëjää diˈib jyëjpkuwäˈkëp ets xymyëmadäˈägäˈänëm. Biiblyë ja ttijy diˈibë niniˈkx këbäjk wyinmäˈänyˈajtypy, tyäˈädë yëˈë yˈandijpy ko nbokytyunäˈänëm mët ko Adán ojts xytyukninäjxëm ja poky kaytyey (käjpxë Galasyʉ 5:17). Per ¿wiˈix mbäät nasˈijxëm etsë Diosë myëjää xytyuˈumoˈoyëm? ¿Tijaty mbäät nduˈunëm parë kyaj xymyëmadakëmë niniˈkx këbäjk diˈib poky myëët? Nˈokˈatsoˈojëmbijtëm myentrës nˈijxëm “ja tyëëmbë espiritë”, yëˈë “mëj maˈkxtujkën, ajiikyˈat amëguˈukˈat, oyjyaˈayˈäjtën, mëbëjkën, yuunkˈat naxypyˈat [ets ko] këˈëm nayjëjpkuwijtsëm” (Gál. 5:22, 23, Traducción del Nuevo Mundo [NM]).
Yuunkˈat naxypyˈat etsë mëj maˈkxtujkën yajjaˈäjtypyë tuˈugyëˈat mä naymyujkën
4. ¿Wiˈix xypyudëjkëmë yuunkˈat naxypyˈat etsë mëj maˈkxtujkën parë nˈijtëm tuˈugyë mä naymyujkën?
4 (Käjpxë Kolosʉ 3:12.) Ko nmëdäjtëmë yuunkˈat naxypyˈat etsë mëj maˈkxtujkën, yëˈë xypyudëjkëm parë nˈijtëm tuˈugyë mëdë nmëguˈukˈäjtëm. Diosë myëjää yëˈë xymyoˈoyëmë duˈumbë jäˈäyˈäjtën, yëˈë xyaˈoyjyaˈaytyakëm, xyaˈijtëm yuunk naxypy ko pën xyajjotˈambëkäˈänëm ets nan yëˈë xypyudëjkëm parë kyaj ndukmëjëmbijtëm ko pën tkajpxyë ää ayuk o ttuny diˈib kyaj oy xyajnayjäˈäwëm. Ko nmëdäjtëmë jotmay mët tuˈugë nmëguˈukˈäjtëm, yëˈë mëj maˈkxtujkën xypyudëjkëm parë nyaˈoˈoyëm ets kyaj nyajjëjpkëjxëm ja naymyayë. Jëjpˈam ets nyaˈijxëmë yuunkˈat naxypyˈat etsë mëj maˈkxtujkën mä naymyujkën, pes niˈamukë nbokyjyaˈayˈäjtëm.
5. ¿Ti jotmay myëdäjttë Pablo mëdë Bernabé, ets ti tyäˈädë xytyukˈijxëm?
5 Nˈokjamyajtsëmë Pablo mëdë Bernabé, yëˈëjëty jantsy oy jyaˈayˈäjttë ets kanäk jëmëjtë naty kujk tkäjpxwäˈkxtë ja oybyë ayuk. Per tëgok, ta “nyayajjotˈambëjkëdë niduˈuk niduˈuk es [ta ojts] yoˈoywyäˈxtë” (Apos. 15:36-39, Ja Oibyʉ Tʉiˈya̱jtʉn). Tyäˈädë yëˈë xytyukˈijxëm ko axtë Dios mëduumbë mbäät näˈäty kyaj nyayjaygyukëdë. Ko duˈun njäjtëm, ¿ti mbäät nduˈunëm parë kyaj nayajjotˈambëjkëm ets axtë naymyëjagamgakëm?
6, 7. 1) ¿Ti käjpxwijën mbäät xypyudëjkëm parë kyaj njotˈambëjkëm mä ngäjpxˈoˈoyëm tuˈugë jotmay? 2) ¿Wiˈix xypyudëjkëm ko netyë nmëdooˈijtëm, ko kyaj pojënë ngäjpxëm ets ko kyaj pojënë nˈawäˈändakëm?
6 Näägë Biiblyë jyënaˈany ko ja tsip diˈib myëdäjttë Pablo mëdë Bernabé ajotkumonë nyaynyibëdëˈkëdë ets ko mëjwiin kajaa tsyiptuundë. Pääty pën tuˈugë Dios mëduumbë jyäˈäwëp ko tam jyotˈambëjknë mä tkäjpxˈoyë tuˈugë jotmay, oy ko tpanëjkxëdë tyäˈädë käjpxwijën: “Niˈamukë jäˈäy tsojkëp netyë myëdooˈittët, kyaj pojënë kyäjpxët, kyaj pojën yˈawäˈändäˈägët, yëˈko ja diˈib awäˈändakp kyaj naty yëˈë tpanëjkxy ja Diosë tyëyˈäjtën” (Sant.1:19, 20, NM). Mbäät dyajtëgatsy ja maytyaˈaky o dyajjëjpkëxët, tkäjpxˈoyët ok o tsyoonët mä kyajotˈambekynyëm (Pro. 12:16; 17:14; 29:11).
7 Ndukˈoyˈäjtëm ko nbanëjkxëmë tyäˈädë käjpxwijën, pes ko nyajnäjxëmë tiempë parë nyajxaˈamëmë akë, nmënuˈkxtakëmë Jyobaa ets nwinmäˈäyëm wiˈix nˈatsoˈojëmbitäˈänëm, yëˈë naty nasˈijxëm etsë Diosë myëjää xytyuˈumoˈoyëm (Pro. 15:1, 28). Ets duˈunë naty nyaˈijxëmë yuunkˈat naxypyˈat etsë mëj maˈkxtujkën. Duˈuntsoo net nbanëjkxëmë käjpxwijën diˈib yajpatp mä Éfesʉ 4:26, 29: “Pën myajjotˈambëjkëdëp, exkëm mët yëˈë mbekykyäˈä. [...] Katë mgoˈoyˈëw mgoˈoygyäjxtë, jeˈeyë käjx maytyäˈäktë diˈibë yajmëjwiin yajkajaajëp ja myëbëjkën pënëty myëdoodëp, es ttukˈoyˈatët”. Duˈunë duˈun, ko nmëdäjtëmë yuunkˈat naxypyˈat etsë mëj maˈkxtujkën, ta nëjkx nmëdäjtëmë jotkujkˈäjtën etsë tuˈugyëˈäjtën mä naymyujkën.
Ajiikyˈat amëguˈukˈat etsë oyjyaˈayˈäjtënë jantsy oyë familyë dyajnayjawëty
8, 9. ¿Ti yˈandijpyë ajiikyˈat amëguˈukˈat etsë oyjyaˈayˈäjtën, ets wiˈixë familyë dyajnayjawëty?
8 (Käjpxë Éfesʉ 4:31, 32; 5:8, 9.) Ko jyantsy yˈany ets myinyë poj o nˈukëm ti xeemy wyijtsnë, ¡jantsy oy xyajnayjäˈäwëm! Nanduˈun xyajnayjäˈäwëmë ajiikyˈat amëguˈukˈat etsë oyjyaˈayˈäjtën. Ets agujk jotkujk dyaˈityë familyë. Ajiikyˈat amëguˈukˈat ja nyigëxeˈeky ko tijaty ndukmëduˈunëmë nmëguˈukˈäjtëm ets ko nyajtuˈunëmë oybyë ää ayuk mët ko naytyukjotmaytyuˈunëm. Etsë oyjyaˈayˈäjtën ja nyigëxeˈeky ko nbudëjkëmë wiink jäˈäy ets ko nmoˈoyëm tijaty (Apos. 9:36, 39; 16:14, 15). Per ¿ti mas yˈandijpy?
9 Oyjyaˈayˈäjtën kyaj jeˈeyë nyigëxeˈeky mä tijaty nduˈunëm, nanduˈun mä wiˈix njäˈäyˈäjtëm. Duˈun extëm tuˈugë ujts tsäˈäm diˈib jantsy oy ets jantsy päˈäk duˈun nikëjxy ets duˈun jodoty, nanduˈunën ja oyjyaˈayˈäjtën diˈib yajkypyë Diosë myëjää, duˈun yˈoyëty nikëjxy ets jodoty. Ets tuˈugë Dios mëduumbë xëmë dyajnigëxeˈeky mä jyukyˈäjtën.
10. ¿Ti pudëkëdëbë familyë parë dyaˈixëdët ja jäˈäyˈäjtën diˈib yajkypyë Diosë myëjää?
10 ¿Ti pudëjkëbë familyë parë dyaˈixëdët ja ajiikyˈat amëguˈukˈat etsë oyjyaˈayˈäjtën? Ko tˈëxpëktëdë Diosë yˈAyuk (Kol. 3:9, 10). Ta uˈunktääk uˈunkteety diˈib yˈëxpëjktëp ko Diosˈawdattë mëdë Fyamilyë ja jäˈäyˈäjtën diˈib yajkypyë Diosë myëjää. Kyaj tsyipëty nˈëxpëjkëm, mbäät xypyayoˈoy mä ëxpëjkpajn diˈib mmëdäjtypy mä mgëˈëm ayuk. Xypyayoˈoyët wiˈix yajnimaytyaˈaky tuˈuk tuˈugë jäˈäyˈäjtën diˈib yajkypyë Diosë myëjää. Ëxpëktë jeˈeyë tuk parrafo majtsk parrafo ets juuttë tiempë kanäk sëmään parë xynyijawët wixaty yajnimaytyaˈagyë tyäˈädë jäˈäyˈäjtën. Ko xykyäjpxtët ja ëxpëjkpajn, ta xykyäjpxtëdë tekstë diˈib jam miimp ets xynyimaytyäˈäktët. Ta net xywyinmaytyët wiˈix xykyuytyunäˈändë ets xymyënuˈkxtäˈäktëdë Jyobaa parë mbudëkëdët (1 Tim. 4:15; 1 Fwank 5:14, 15). Per ¿pudëjkëbëdaa familyë ko tˈëxpëktë jäˈäyˈäjtën diˈib yajkypyë Diosë myëjää?
11, 12. ¿Wiˈix majtskë kasäädë jäˈäy pyudëjkëdë ko tˈëxpëjktë tidën yˈandijpy oyjyaˈayˈäjtën etsë ajiikyˈat amëguˈukˈat?
11 Tuˈugë kasäädë jäˈäy jotkujkë naty yˈitäˈändë mä tsyënäˈäy jyukyˈäjtën, ta ttukniwijtsëdë tˈëxpëkäˈändë këkpäät ja jäˈäyˈäjtën diˈib yajkypyë Diosë myëjää. ¿Wiˈix pyudëjkëdë? Ja toxytyëjk jyënaˈany: “Kots nˈëxpëjktë tidën yˈandijpy oyjyaˈayˈäjtën, yëˈëjëts të xypyudëkëdë parëts mas oy naymyënëjkxëdët tuˈuk tuˈugë xëë. Ets nan tëjëts xypyudëkëdë parëts naybokymyaˈkxëdët, naygyajpxykyupëkëdëts ets nanduˈun parëts njënäˈändët dyoskujuyëm o maˈkxkëts ko tsyekyëty”.
12 Ja tuˈugë kasäädë jäˈäy yëˈë ojts tˈëxpëktë tidën yˈandijpy ajiikyˈat amëguˈukˈat. Yëˈko myëdäjttëbë natyë jotmay mët ko kyaj dyaˈixëdë tyäˈädë jäˈäyˈäjtën. Ja yetyëjk duˈun ok jyënany: “Kots nˈëxpëjktë ajiikyˈat amëguˈukˈat, yëˈëjëts xypyudëjkëdë parëts yëˈëyë nˈixtët ja oybyë jäˈäyˈäjtën diˈibëts nmëdäjttëp, ets ko ti tyun jyatëdët, kyajts netyë axëëk nwinmääygyojtët. Nan xypyudëjkëdëts parëts naymyëmay naymyëdäjëdët nixim niyam. Ets ojts nbekyë kuentë ko tsojkëbëts nasˈixët parëts ja nnëdoˈoxy tnigäjpxët wiˈix wyinmay ets kyajts nyajpokët pën kyajts nˈoymyëdoy, tsojkëbëtsë naty nˈitët yujy tudaˈaky. Wanaty wanatyëts nayaˈoˈoyëdë ets kyajts netyë nekynyaynyibëdëˈëgëdë. Jantsy jotkujkëtsë net ojts nayjawëdë”. Ets mijts mëdë mfamilyë, ¿waˈandaa mbudëkëdët ko xyˈëxpëktët ja jäˈäyˈäjtën diˈib yajkypyë Diosë myëjää?
Nˈokˈyaˈijxëmë mëbëjkën ko nyajpatëm naytyuˈuk
13. ¿Ti tsojkëp mëët nnaygyuentˈäjtëm parë kyaj nmëjagamgakëmë Jyobaa?
13 Dios mëduumbë tsojkëp tnasˈixët ets tyuˈumoˈoyëdët ja Diosë myëjää, oy yajpäädët mëdë mayjyaˈay o naytyuˈuk. Mä tyäˈädë tiempë, Satanásë jyaˈay yajjaˈäjttëbë ixy jawë diˈib tsäätsyëm ets dyajwäˈkxtë oymyääjëty. Tyäˈädë, mbäät xytyukmëjagamgakëmë Jyobaa. ¿Ti mbäät ttunyë Dios mëduumbë? Tpanëjkxët ja käjpxwijën diˈib yajkypyë Biiblyë: “Mastuˈuttë tëgekyë diˈibë kyaj yˈoyëty es ja axëk winmäˈäny diˈibë mëjwindëjkëp yä naxwiiny, es axäjëdë tudaˈakytyiˈknë yëˈë käjxwijën diˈibë Dios të tpëjtaˈaky [...] es dyajnitsoˈogëdë mˈanmëjäˈän [mjukyˈäjtën, NM]” (Sant. 1:21). Tuk peky diˈib mbäät xyaˈijtëm wäˈäts Dios windum, yëˈë ja mëbëjkën, min nˈokˈijxëm wiˈix xypyudëjkëmë tyäˈädë tëëm diˈib yajkypyë espiritë santë.
14. ¿Wiˈix mbäät xyajpokytyuˈunëm ko ngamëdäjtëmë mëbëjkën?
14 Mëbëjkën yëˈë yˈandijpy, nˈijxëm ko jantsy tamë Jyobaa yajpääty. Pën kyaj duˈun nˈijxëm, mbäät pojënë nbokytyuˈunëm. Min nˈokˈijxëm ti tyuunë Diosë kyäjpn ja tiempë mä jyukyˈajtyë kugajpxy Ezequiel. Dios ojts tyukˈixyëty ti naty näägë jäˈäy tyuundëp ayuˈutsyë, ojts yaˈˈanëëmë: “Naxwinyëdë jäˈäyë yˈuˈunk, ¿të xyˈixy tijaty tyuundëp agootstuuyë mëjjäˈäytyëjk diˈib Israel mä tuˈuk tuˈugë kuartë diˈib ogäjp mä të tkëxjääytyaˈaytyë awinax? Mët ko jyënäˈändë: Jyobaa kyaj xyˈijxëm. Jyobaa të tmastuˈutyë naxwinyëdë” (Eze. 8: 12). ¿Nbëjkëmë kuentë tiko duˈun yˈadëtstë? Yëˈko naty wyinmaytyë ko Dios kyaj tˈixy ja axëkˈäjtën diˈib tyuundëp. Kyaj naty tˈixtë ko Jyobaa jantsy tam yajpääty.
15. ¿Wiˈix xykyuwäˈänëm ko nmëdäjtëm mëk ja mëbëjkën?
15 Nˈokˈijxëmë netë yˈijxpajtënë José, yëˈë tëgatsy wyinmääy. Oyë naty jagam yajpääty mä jyiiky myëguˈuk, kyaj tmëttsëënëyany ja Potifarë nyëdoˈoxy. ¿Tiko? Yëˈë jyënany: “¿Wiˈixëts ko ëxëëkpë ndunëty ets nmëbokytyunëtyëts yëˈë Dios?” (Gén. 39:7-9, Mʉgoxpʉ ja̱ noky mʉdiˈibʉ jyaayʉn Moisés). Duˈunë duˈun, José jyantsy myëbëjk ko tamë Jyobaa yajpääty. Pën nan nmëbëjkëm ko tamë Jyobaa, ta kyaj ayuˈutsyë nˈijxëmë axëëkpë ixy jawë o nduˈunëm diˈibë Jyobaa yˈaxëkˈijxypy. Tsojkëbë jot winmäˈäny nbëjtakëm extëm yˈëëy diˈib jyaayë Salmo: “Kyajts ndëgoyaˈany mätsë njot ngorasoon njënoty ndëgotyëts. Kyajts nbëjtäˈägäˈäny nwinduuy diˈib niwiˈixtsoo kyatuny” (Sal. 101:2, 3).
Kyuwaambyë korasoon ko këˈëm nayjëjpkuwijtsëm
16, 17. 1) Extëm jyënaˈanyë Proverbios, ¿wiˈix pyoky kyaˈay ja “mixy diˈib kyaj jyapëtyë jyot wyinmäˈäny”? 2) Extëm nˈijxëm mä pajina 29, ¿ti mbäät tyam xyajtëgoˈoyëm mëjjäˈäy mutsk jäˈäy?
16 Ja myëdaxtujkpë jäˈäyˈäjtën diˈib yajkypyë Diosë myëjää, yëˈë ko këˈëm nayjëjpkuwijtsëm. Ets yëˈë xypyudëjkëm parë njëjpkudijëm tijatyë Dios yajkubojkypy ets nguentˈäjtëmë korasoon (Pro. 4:23). Min nˈokˈijxëm ti yajmaytyakp mä Proverbios 7:6-23, jap yajnigajpxy tuˈugë “mixy diˈib kyaj jyapëtyë jyot wyinmäˈäny” yajkäˈäyëty tuˈugë kujenytyoˈoxy, diˈib winˈëˈën winxäjëp mä “ja tuˈu diˈib näjxp wingon mä yëˈë yˈeskinë”. ¿Ti jatsoo nyinäjxypyë tyäˈädë mixy? Waˈan mët ko nëgoobë nyaxäˈäny mä ja toxytyëjk tsyëënë. Per kyaj tpekyë kuentë ko jantsy pojënë yajmënëjkxy parë tyuundëgoyët ets ko mbäät axtë dyajtëgoyë jyukyˈäjtën.
17 ¿Tixyëbë tyäˈädë mixy tyuumpy parë kyaj yˈayoˈonbäädët? Ko tpanëjkxëdë tyäˈädë käjpxwijën: “Ni [...] mgatëkët mä pyanëˈë pyaduˈu” (Pro. 7:25). ¿Ti tyäˈädë xytyukniˈˈijxëm? Pën ntsojkëm ets ja Diosë myëjää xytyuˈumoˈoyëm, kyaj naybyëjtakëm mä ja poky kaytyey xymyëmadakëm. Mbäät oypyënëty jantsy pojënë tyuundëgoy extëm ja “mixy diˈib kyaj jyapëtyë jyot wyinmäˈäny”. Extëm nˈokpëjtakëm, ko tˈixëdë pelikula diˈibaty jemybyëtsëëmp ets kyaj jayëjp tnijawët pën oy o pën kyaj parë tuˈugë Dios mëduumbë. O tjantsy yajnaxët tuˈuk tuˈugë pajina mä Internet ets tpäädët mä jäˈäy axëëgë nyiniˈkx kyëbäjk dyaˈixëdë oyë naty yëˈë tkaˈëxtäˈäy etsë net tˈijxnëdë pornografía diˈib tsip tmastuˈudët. Ko duˈun tˈixët mbäät mëjwiin kajaa dyaˈˈaxëëgë jyot wyinmäˈäny, kyaj oy nyekyˈitët mëdë Dios ets axtë mbäät dyajtëgoyë jyukyˈäjtën (käjpxë Romanʉs 8:5-8).
18. ¿Tijaty mbäät nduˈunëm parë nguentˈäjtëmë korasoon, ets wiˈix mbäät nyaˈijxëm ko këˈëm nayjëjpkuwijtsëm?
18 Tsojkëp nayjëjpkuwijtsëm ets kyaj nˈijxˈadëtsëm ko pyëtsëmët mä jäˈäy axëëgë nyiniˈkx kyëbäjk dyaˈixëdë. ¡Per mas oy ko kyaj ndimˈijxëm pën nnijäˈäjëm ko axëëk! (Pro. 22:3.) Ko nduknibëjtakëm wiˈix nnaygyuentˈatäˈänëm etsë net nduˈunëm, ja nyajnigëxëˈkëm ko këˈëm nayjëjpkuwijtsëm. Extëm nääk, tpëjtäˈäktë kyomputadoorë ijxënduuy o tyëkëdë mä Internet o tˈixtë telebisionk pën jam pën mëët. Ets ta diˈib kyaj ttimtondë Internet (Mat. 5:27-30). Tsojkëp nˈijxëm ti mbäät nduˈunëm niduˈuk niduˈuk parë këˈëm nnaygyuentˈäjtëm ets nanduˈun ja familyë, duˈuntsoo nmëduˈunëmë Jyobaa mët wäˈätsë jot korasoon, wäˈätsë jot winmäˈäny ets mëdë mëbëjkën diˈib jantsy tëyˈäjtën (1 Tim. 1:5, NM).
19. ¿Wiˈix ndukˈoyˈäjtëm ko nasˈijxëm etsë Diosë myëjää xytyuˈumoˈoyëm?
19 Ja jäˈäyˈäjtën diˈib yajkypyë Diosë myëjää mëjwiin kajaa ndukˈoyˈäjtëm. Yuunkˈat naxypyˈat etsë mëj maˈkxtujkën, yëˈë tuump parë jyaˈˈatyë tuˈugyëˈäjtën mä naymyujkën. Oyjyaˈayˈäjtën mëdë ajiikyˈat amëguˈukˈat yajjotkujkˈäjtypyë familyë. Mëbëjkën ets ko këˈëm nayjëjpkuwijtsëm, yëˈë xypyudëjkëm parë wingon nˈijtëm mëdë Jyobaa ets wäˈäts nyajpatëm wyindum. Galasyʉ 6:8 nanduˈun xyˈanmäˈäyëm: “Pën nyipy extëmë espiritë santë ttseky, yˈaxäjëp ja jikyˈäjtën winë xëë winë tiempë”. Duˈunë duˈun, mët yëˈëgyëjxm ko Jesus të xyjuˈuybyëtsëˈëmëm, Jyobaa yëˈë yajtunaambyë myëjää parë xymyoˈoyäˈänëmë jukyˈäjtënë xëmëkyëjxmbë. Per net, pën nasˈijxëm ets ja myëjää xytyuˈumoˈoyëm.
Min nˈokˈajamyajtsëm
• ¿Wiˈix xypyudëjkëm ja yuunkˈat naxypyˈat etsë mëj maˈkxtujkën parë nˈijtëm tuˈugyë mä naymyujkën?
• ¿Ti pudëkëdëp ja Dios mëduumbë parë dyaˈixëdët mä familyë ja ajiikyˈat amëguˈukˈat etsë oyjyaˈayˈäjtën?
• ¿Wiˈix xykyuwäˈänëmë mëbëjkën ets ko nayjëjpkuwijtsëm parë nguentˈäjtëmë korasoon?
[Yajtëˈëwën]
[Letrë diˈib miimp mä dibujë mä pajina 27]
¿Ti mbäät nduˈunëm parë kyaj nayˈoˈojëm ko nayajjotˈambëjkëm?
[Letrë diˈib miimp mä dibujë mä pajina 28]
Ko familyë tˈëxpëktë ja jäˈäyˈäjtënë diˈib yajkypyë Diosë myëjää, ta ttukˈoyˈattë
[Letrë diˈib miimp mä dibujë mä pajina 29]
¿Wiˈix xykyuwäˈänëm ja mëbëjkën ets ko këˈëm nayjëjpkuwijtsëm?
